„ევროპის ფონდის“ მიერ დაწესებული ყოველწლიური კონკურსის - „საგამოძიებო ჟურნალისტიკის ჯილდო“ ფარგლებში საკონკურსო განაცხადების მიღება 10 სექტემბრამდე გრძელდება.

დაინტერესებულ ჟურნალისტებსა და მედიასაშუალებებს შეუძლიათ კონკურსზე წარადგინონ მათ მიერ მომზადებული საგამოძიებო სიუჟეტები, რომლებიც 2023 წლის 30 სექტემბრიდან 2024 წლის 1 სექტემბრამდე პერიოდში გამოქვეყნდა.

კონკურსს ევროპის ფონდი 2021 წლიდან მართავს. მისი მიზანია იმ ქართველი გამომძიებელი ჟურნალისტების მხარდაჭერა და წახალისება, ვისაც მნიშვნელოვანი საკითხების გასაშუქებლად ხშირად სახიფათო და მტრულ გარემოში უწევთ მუშაობა.

„კონკურსი გამოავლენს და დააჯილდოვებს იმ ჟურნალისტებს და მედია საშუალებებს, რომლებმაც გამოააშკარავეს სიმართლე და, ამავდროულად, ბიძგი მისცეს ფართო საზოგადოებრივ მობილიზაციას პასუხისმგებელი პირების ანგარიშვალდებულების მოთხოვნით, ან მიაღწიეს სხვა ხელშესახებ ცვლილებას საქართველოს მოქალაქეთა საკეთილდღეოდ,“ - აღნიშნულია ორგანიზაციის განცხადებაში.

დეტალური ინფორმაციისათვის ეწვიეთ ბმულს

მედიის განვითარების ფონდი (MDF), საერთაშორისო პარტნიორებთან თანამშრომლობით, მედიაწიგნიერების ჰაკათონს DataFest Tbilisi 2024-ზე უმასპინძლებს.

ჰაკათონის მიზანი ისეთი ელექტროული რესურსების (კომპიუტერული თამაში, ინტერაქციული სასწავლო ელექტრონული რესურსები) შემუშავებაა, რომელიც ხელს შეუწყობს:

● მედია და ინფორმაციული წიგნიერების შესახებ ცნობიერების ამაღლებას;

● დეზინფორმაციასთან ბრძოლაში მედიის მომხმარებლების მედიაწიგნიერების უნარებით აღჭურვას;

ჰაკათონში მონაწილეობა შეუძლია 15-35 წლის ნებისმიერ ახალგაზრდას, რომელიც დაინტერესებულია ციფრული ტექნოლოგიებით და სჯერა, რომ მათი გამოყენებით მნიშვნელოვანი გამოწვევების დაძლევა და პრობლემის გადაჭრაა შესაძლებელი;

ჰაკათონის საპრიზო ფონდია 12 000 ევროს ექვივალენტი ლარში (დასაბეგრი თანხა). გამარჯვებულ გუნდებს პროექტის განსახორციელებლად გადაეცემათ:

● I ადგილი - 5, 000 ევროს ექვივალენტი ლარში (დასაბეგრი თანხა).

● II ადგილი - 4,000 ევროს ექვივალენტი ლარში (დასაბეგრი თანხა).

● III ადგილი - 3,000 ევროს ექვივალენტი ლარში (დასაბეგრი თანხა).

მსურველებმა სააპლიკაციო ფორმა, რომლის მიხედვითაც მონაწილეები შეირჩევიან, 30 აგვისტომდე უნდა შეავსონ.

პროექტისა და რეგისტრაციის შესახებ დეტალური ინფორმაციის ნახვა შესაძლებელია აქ.

ორგანიზაცია "ქალები საერთო მომავლისთვის (WECF) - საქართველო" კახეთსა და სამცხე-ჯავახეთში მომუშავე ჟურნალისტებისთვის 3-დღიან ტრეინინგს მართავს, რომელიც გენდერულ დეზინფორმაციასთან ბრძოლას, კიბერ უსაფრთხოებასა და ჟურნალისტების ფიზიკური და მენტალური ჯანმრთელობის დაცვას შეეხება.

მონაწილეობის მსურველებმა სარეგისტრაციო ფორმა 28 ივლისის ჩათვლით უნდა შეავსონ.

29-30 ივლისს „საერთაშორისო გამჭვირვალობა - საქართველო“ მოქმედი და დამწყები ჟურნალისტებისთვის აცხადებს ტრენინგს თემაზე - „რა უნდა ვიცოდეთ 2024 წლის საპარლამენტო არჩევნებისთვის“.

ტრენინგის ფარგლებში განხილული იქნება ისეთი საკითხები, როგორებიცაა:

• მოსალოდნელი დარღვევები წინასაარჩევნო პერიოდში;
• ადმინისტრაციული რესურსების საარჩევნოდ გამოყენება;
• ელექტრონული ტექნოლოგიები 26 ოქტომბრის არჩევნებისთვის;
• რას ითხოვს საქართველოსგან ევროპა;
• როგორ ვიპოვოთ კორუფციის ნიშნები სახელმწიფო შესყიდვების მონაცემებში;
• როგორ ვიპოვოთ თანამდებობის პირთა დამალული ქონება ქონებრივი დეკლარაციებით;
• რას ნიშნავს ბენეფიციარი (საბოლოო) მესაკუთრე და როგორ დავადგინოთ ის ღია წყაროების გამოყენებით.

ტრენინგი ჩატარდება ქალაქ თბილისში და მასში მონაწილეობა უფასოა.

ტრენინგთან და რეგისტრაციასთან დაკავშირებით, დამატებითი ინფორმაცია იხილეთ აქ.