ფოტო : „პუბლიკა"


„ტვ პირველის“ გადამღებ ჯგუფს, მაკა ჩიხლაძესა და გიორგი შეწირულს შავებში ჩაცმული და ნიღბიანი უცნობი პირები თავს დაესხნენ და სცემეს. თავდასხმა ტელევიზიის პირდაპირ ეთერში, ბესიკის ქუჩის 4 ნომერთან მოხდა. 

როგორც „ტვ პირველი“ წერს, მძიმედ დაშავდა ოპერატორი. გიორგი შეწირულს დაზიანებები თავის არეში აქვს მიყენებული. დაზიანებები სახის არესა და სხვადასხვა ნაწილში აღენიშნება მაკა ჩიხლაძესაც.

ტელეკომპანიის ინფორმაციით, „გატაცებულია "ტვ პირველის" სამაუწყებლო აპარატურა“. გატაცებულია "ტვ პირველის" სამაუწყებლო აპარატურა. 

„კადრებით დასტურდება, რომ ჯგუფური ანგარიშსწორების დროს შემთხვევის ადგილზე იმყოფებოდა საპატრულო პოლიცია, თუმცა მათ რეაგირება არ მოუხდენიათ“, - წერს „ტვ პირველი“.

თავდასხმამდე გადაცემა „შაბათის ეთერის“ გუნდი აშუქებდა შავებში ჩაცმული ადამიანების ჯგუფებს, რომლებიც რუსთაველის გამზირის მიმდებარე ქუჩებში ხალხს ფიზიკურად უსწორდებოდნენ.

სპეციალური საგამოძიებო სამსახურის განცხადებით, „ტვ პირველის“ თანამშრომლებზე თავდასხმის ფაქტზე გამოძიება საქართველოს სისხლის სამართლის კოდექსის 154-ე მუხლის მეორე ნაწილით გამოძიება დაიწყო.

„საქართველოს ჟურნალისტური ეთიკის ქარტია“ გამოცემა „პუბლიკას“ ჟურნალისტებისთვის პროფესიულ საქმიანობაში ხელშეშლის ფაქტებს ეხმიანება და შინაგან საქმეთა სამინისტროს ჟურნალისტთა მიმართ ჩადენილ დანაშაულებზე პასუხისმგებლობის აღებისკენ მოუწოდებს.

„6 დეკემბერს, გამთენიისას, მუშაობაში ხელი შეუშალეს გამოცემის „პუბლიკა“ ჟურნალისტებს ნათია ამირანაშვილსა და ბასტი მგალობლიშვილს, რომლებიც სასტუმრო „რედისონის“ მიმდებარე ტერიტორიაზე პოლიციის მიერ აქციის მონაწილეების დაკავებას იღებდნენ.  გამოცემის გავრცელებულ კადრებში ჩანს, თუ როგორ ითხოვენ პოლიციელები მათგან ტერიტორიის დატოვებას. ერთ-ერთმა პოლიციელმა ჟურნალისტისთვის ტელეფონის წართმევაც სცადა. 

6 დეკემბერს შუადღისას, გამოცემის “პუბლიკა” ჟურნალისტს მინდია გაბაძეს, რომელიც რუსთაველის გამზირზე აქციას აშუქებდა, უცნობი ნიღბიანი პირები დაესხნენ თავს და სცემეს. შემთხვევის ადგილიდან რამდენიმე მეტრში იდგა პოლიციის ეკიპაჟი, რომელსაც გაქცეულმა თავდამსხმელებმა ჩაურბინეს და რომელსაც მომხდარზე რეაგირება არ მოუხდენია. “მედია აპრილის” კადრებში ჩანს, რომ მოქალაქეები სამართალდამცავებს რეაგირებისკენ მოუწოდებენ, თუმცა უშედეგოდ. ჟურნალისტს აქვს დაზიანება თავის არეში და გახეთქილი აქვს წარბი“, - ვკითხულობთ ორგანიზაციის განცხადებაში.

„ჟურნალისტური ეთიკის ქარტია“ შინაგან საქმეთა სამინისტროს მოუწოდებს, დაუყოვნებლივ შეწყვიტოს ჟურნალისტებზე ძალადობა და ძალადობის წახალისება. ქარტია მიმართავს და მოუწოდებს საქართველოს პროკურატურასაც, სწრაფად და ეფექტურად გამოიძიოს ეს და ჟურნალისტების მიმართ 28 ნოემბერი - 6 დეკემბრის პერიოდში ჩადენილი სხვა დანაშაულები. 

გამოცემა „პუბლიკის” ჟურნალისტზე, მინდია გაბაძეზე თავდასხმის ფაქტს გამოეხმაურა „საქართველოს ახალგაზრდა იურისტთა ასოციაცია“.

„სამართალდამცავთა უმოქმედობა, არა მარტო, პოლიციელების მხრიდან გამოჩენილი სამსახურეობრივი გულგრილობაა, არამედ, აჩენს ეჭვს, რომ სამართალდამცავი ორგანოები და ე.წ “ტიტუშკები“ ერთად მოქმედებენ, რათა ძალადობრივად ჩაახშონ ლეგიტიმური პროტესტი.

აღნიშნულის საფუძველს გვაძლევს ის ფაქტიც, რომ მომიტინგეების დამაშინებელი ე.წ „ტიტუშკების რეიდი“ საქართველოში დაიწყო „რუსული კანონის“ წინააღმდეგ აქციების დროს, როდესაც უცნობი პირები ხვდებოდნენ აქციის მონაწილეებს, ორგანიზატორებს და მათი ოჯახის წევრებს სახლებთან ან ქუჩაში, სადაც მათ სასტიკად უსწორდებოდნენ, რასაც ასევე არ მოჰყოლია არანაირი რეაგირება სამართალდამცავი უწყებებისგან. „ტიტუშკების რეიდებს“ ადგილი ჰქონდათ, ასევე, არჩევნებთან დაკავშირებით გამართულ პროტესტებზეც“, - ვკითხულობთ საიას განცხადებაში.

28 ნოემბრიდან დაწყებული პროევროპული აქციების გაშუქებისას მედიას პროფესიულ საქმიანობაში ხელი 80-ზე მეტ შემთხვევაში შეეშალა. მედიის წარმომადგენლების მიმართ შსს-ის ძალები აგრესიით გამოირჩევიან. ისინი ჟურნალისტების ნაწილს ფიზიკურადაც გაუსწორდნენ. მათ დასჭირდათ სამედიცინო დახმარებაც. განსაკუთრებულად დაშავდნენ: გურამ როგავა, ალექსანდრე ქეშელაშვილი და მარიამ გაფრინდაშვილი. მედიის წარმომადგენლების ნაწილს დაუზიანეს ანდა წაართვეს აღჭურვულობაც. 

28 ნოემბერს ირაკლი კობახიძემ განაცხადა, რომ ევროკავშირში გაწევრიანების მოლაპარაკების პროცესს აჩერებს, რასაც თბილისსა და საქართველოს სხვა ქალაქებში საპროტესტო აქციები მოჰყვა. 

ვრცლად ამ თემაზე, იხილეთ „მედიაჩეკერის“ მასალა: 28 ნოემბრიდან მედიის საქმიანობაში ხელშეშლის 80-ზე მეტი ინციდენტი მოხდა

28 ნოემბრიდან დაწყებული პროევროპული აქციების გაშუქებისას მედიას პროფესიულ საქმიანობაში ხელი 80-ზე მეტ შემთხვევაში შეეშალა. მედიის წარმომადგენლების მიმართ შსს-ის ძალები აგრესიით გამოირჩევიან. ისინი ჟურნალისტების ნაწილს ფიზიკურადაც გაუსწორდნენ. მათ დასჭირდათ სამედიცინო დახმარებაც. განსაკუთრებულად დაშავდნენ: გურამ როგავა, ალექსანდრე ქეშელაშვილი და მარიამ გაფრინდაშვილი. მედიის წარმომადგენლების ნაწილს დაუზიანეს ანდა წაართვეს აღჭურვულობაც. 

აღსანიშნავია, რომ მედიის რამდენიმე წარმომადგენელს ხელი პროფესიული საქმიანობის შესრულებისას არაერთხელ შეეშალა.

28 ნოემბერს ირაკლი კობახიძემ განაცხადა, რომ ევროკავშირში გაწევრიანების მოლაპარაკების პროცესს აჩერებს, რასაც თბილისსა და საქართველოს სხვა ქალაქებში საპროტესტო აქციები მოჰყვა. 

პროევროპული აქციების გაშუქებისას დაზარალებული მედიის წარმომადგენლების განახლებადი სია:


6 დეკემბერი

„პუბლიკა“

• მინდია გაბაძე, ჟურნალისტი - გამოცემა „პუბლიკას“ ინფორმაციით, „ცისფერ გალერეასთან საპროტესტო აქციის გაშუქების დროს „პუბლიკის" ჟურნალისტ მინდია გაბაძეს „ქართული ოცნების" „ტიტუშკა" ფიზიკურად გაუსწორდა. პოლიციას მოძალადე არ დაუკავებია.“

5-6 დეკემბრის ღამე:

„პუბლიკა“

• ნათია ამირანაშვილი და ბასტი მგალობლიშვილი, ჟურნალისტები -  პოლიციამ მათ ჟურნალისტურ საქმიანობაში ხელი შეუშალა. „ისინი აქციის მონაწილეების დაკავების გადაღებას ცდილობდნენ. ჟურნალისტისთვის ეცადნენ ტელეფონის წართმევასაც“, - წერს „პუბლიკა“.

4-5 დეკემბრის ღამე:

„ტვ პირველი“

• ნანუკა ქაჯაია, ჟურნალისტი, პაპუნა ხაჩიძე ოპერატორი - „ტვ პირველის“ ინფორმაციით, სასტუმრო "ქორთიარდ მარიოტთან" კრიმინალურმა პოლიციამ ტელეკომპანიის კამერა დაამტვრია. „შავრაზმელებმა იძალადეს ჟურნალისტ ნანუკა ქაჯაიაზე, რომელიც მოვლენებს პირდაპირ ეთერში აშუქებდა“, - წერს „ტვ პირველი“.

3-4 დეკემბრის ღამე:

„ფორმულა“

• თედო ქვაჩახია, ოპერატორი -  დაშავდა პროფესიული მოვალეობის შესრულებისას. ტელეკომპანიის ინფორმაციით, მას დაზიანებები თავის არეში ჰქონდა. ქვაჩახია კლინიკაში გადაიყვანეს, მას ტვინის შერყევა აქვს.
• ლუკა ტყებუჩავა, ჟურნალისტი,  მიშო მარტაშვილი, ოპერატორი- ტელეკომპანიის მიერ გავრცელებული ინფორმაციით, „ტყებუჩავას გაზის ორი ყუმბარა მოხვდა. ის და მისი ოპერატორი, მიშო მარტაშვილი დაზიანებებს გადაურჩნენ“.

„პირველი არხი“

• ბესო გაფრინდაშვილი, ოპერატორი - ტელეკომპანიის ინფორმაციით, აქციის გაშუქებისას პიროტექნიკით დაშავდა. „ბესო გაფრინდაშვილს სასწრაფოს ექიმებმა ადგილზე გაუწიეს სამედიცინო დახმარება, თუმცა, დამატებითი კვლევისთვის ის კლინიკაში გადაიყვანეს. ოპერატორს ხელი აქვს დაზიანებული“, - წერს „პირველი არხი“.

2-3 დეკემბრის ღამე:

„სტუდია მონიტორი“

• ნინო რამიშვილი, ჟურნალისტი - ფეისბუკის პირად გვერდზე დაწერა, რომ სპეცრაზმის თანამშრომლებმა პროფესიული მოვალეობის შესრულებისას ტელეფონი წაართვეს: „რა თქმა უნდა მეკეთა ბეიჯი და მქონდა არაერთი ნიშანი პრესის, ასევე ვუთხარი რომ ვარ ჟურნალისტი და ვანახებდი პრესკარტას, მაგრამ მთხოვდნენ ვიდეოს წაშლას, ბოლოს კი გაიტაცეს ტელეფონი. შემდეგ კი რჩევად დააყოლეს წადი სახლშიო".

„პირველი არხი“

• თეო ხუბულავა, ჟურნალისტი, ლევან ქართველიშვილი და ბადრი გამრეკლაშვილი ოპერატორები - ტელეკომპანიის ინფორმაციით, ისინი სპეცრაზმის მიერ გაზის კაფსულების გამოყენების დროს დაშავდნენ. მათ სამედიცინო დახმარება სასწრაფოს დახმარების ბრიგადამ ადგილზევე აღმოუჩინა.

„მთავარი არხი“

• გივი მჭედლიშვილი, ოპერატორი - ჟურნალისტმა დეა მამისეიშვილმა   პირდაპირ ეთერში ყოფნის დროს თქვა, რომ ოპერატორი შეუძლოდ გახდა.

„TV პირველი“

• როგორც „ტვ პირველი“ წერს, „შინაგან საქმეთა სამინისტროს მიერ 2 დეკემბერს აქციის დაშლის დროს გამოყენებული არაპროპორციული ძალის გამოყენების დროს დაზიანდა "ტვ პირველი" სამაუწყებლო აპარატურა, მათ შორის გამოსაყენებლად უვარგისია პირდაპირი ტრანსლაციის კამერა. ეს არ არის პირველი  შემთხვევა, როდესაც "გომელაურის ომონს" იერიში მიაქვს "ტვ პირველის" სამაუწყებლო აპარატურაზე რათა, გაგვეთიშოს პირდპირი ეთერის სიგნალი და ვეღარ შევძლოთ მოვლენების ეპიცენტრიდან მაუწყებლობა“.

„ჩაიხანა“ 

• ნატალი ჩხარტიშვილი, აქციას აშუქებდა, როგორც პრესის წარმომადგენელი - შსს-ს ძალებმა ხელი შეუშალეს მუშაობაში, მას ხელიდან გააგდებინეს Handycam–ი. მოგვიანებით, მას ასევე უყვიროდნენ,რომ გამოერთო კამერა. ჩხარტიშვილის მიერ გადაღებულ მეორე ვიდეოში ჩანს, სხვა ჟურნალისტისთვის პროფესიულ საქმიანობაში ხელშეშლაც.

JRC

• ბაქარ ყვავაძე, ოპერატორი - „მედიაჩეკერისთვის“ მოწოდებული ინფორმაციით, ყვავაძეს გაზის კაფსულა წვივში მოხვდა. 

სხვა შემთხვევები:

„ინტერპრესნიუსი“

• ვანო გორგიშვილი, ფოტოგრაფი - გორგიშვილმა facebook-ის პირად გვერდზე 2 დეკემბერს დაწერა, რომ „30 ნოემბრის დილის 2-3 სთ-ზე მერიოტთან შეჯგუფებულ მედიას წყლის ჭავლი მოგვიშვეს. რამდენიმე კაცმა გასწრება ვცადეთ და მაშინ გვესროლეს რეზინის ტყვიები. მირიანს [მელაძე] 4 მოხვდა. მე, საბედნიეროდ, 1 პატარა და მუხლთან“. ფოტოგრაფმა გამოაქვეყნა ფოტოც. 

უცხოელი ჟურნალისტი

• ფიოდორ ხუდოკორმოვი, რუსი ჟურნალისტი - Paper Kartuli-ის ინფორმაციით, ჭიჭინაძის ქუჩაზე, როცა სპეცრაზმი მომიტინგეებს აწვებოდა, ნიღბიანმა მამაკაცმა, სავარაუდოდ ძალოვანმა, მას ხელი ჰკრა.

1-2 დეკემბრის ღამე:

„რუსთავი 2“

• გიორგი ნერგაძე, ოპერატორი - ტელეკომპანია “რუსთავი 2”-ის ინფორმაციით, ის პარლამენტის მიმდებარე ტერიტორიაზე დაშავდა. როგორც ტელეკომპანია წერს, მან აქციაზე გაშვებული გაზი შეისუნთქა. ნერგაძეს დახმარება სასწრაფო დახმარების ექიმებმა გაუწიეს და ამ ეტაპზე მისი მდგომარეობა დამაკმაყოფილებელია.
• თამთა ჩიტიშვილი, ჟურნალისტი - „რუსთავი 2-ის“ ინფორმაციით, ის პარლამენტის მიმდებარე ტერიტორიაზე დაშავდა. ტელეკომპანია წერს, რომ მას დაზიანება ფეხის არეში აქვს მიყენებული.

„TV პირველი“

• ნიკო კოკაია, ოპერატორი - ტელეკომპანიის ინფორმაციით, მას პირველადი დახმარება დასჭირდა. 
• „მედიაომბუდსმენის“ ინფორმაციით, კოკაიასთან ერთად, დაშავდა ჟურნალისტი მარიამ მაკასარაშვილიც.

„პუბლიკა“

• ნათია ამირანაშვილი, ჟურნალისტი - „პუბლიკის“ ინფორმაციით, პოლიცია გამოცემის ჟურნალისტს პროფესიული მოვალეობის შესრულების დროს ფიზიკურად გაუსწორდა. “ჟურნალისტი კედელზე მიანარცხეს, რა დროსაც გააგდებინეს ტელეფონი”, - წერს “პუბლიკა”.

„მაუწყებელი“ 

• გიორგი ჩაგელიშვილი, ჟურნალისტი - „მაუწყებლის“ ინფორმაციით, რუსთაველის მეტროში მოქალაქეების დარბევის დროს გამოცემის ჟურნალისტი, გიორგი ჩაგელიშვილი დაიჭირეს. როგორც „პუბლიკა“ წერს, მათ მიერ გადაღებულ კადრებში ჩანს, რომ ჩაგელიშვილი საპოლიციო ძალებს მიუთითებდა, რომ ჟურნალისტია, თუმცა მას ჩანთა გაუჩხრიკეს და წაიყვანეს.

OC Media

• მარიამ ნიკურაძე, OC media-სთანადამფუძნებელი და ჟურნალისტი -  ნიკურაძე წერს:  „კიდევ ერთი კამერა დამიზიანდა :)) მაკავებდნენ ცრემლსადენი გაზის ბუღში. ჟურნალისტი ვარ-თქო, გამიშვა და მიმახეთქა კედელს კამერიანად. საბედნიეროდ, მარტო ეკრანი დაზიანდა“.

„მედია აპრილი“

• გიორგი ბასხაჯაური, ჟურნალისტი - „მედია აპრილის“ ინფორმაციით, გამოცემის ჟურნალისტს, გიორგი ბასხაჯაურს პროფესიული მოვალეობის შესრულებისას პოლიციელი თავს დაესხა. „ბასხაჯაური ჭავჭავაძეზე აქციის მონაწილეების დაკავებას იღებდა, როცა ერთ-ერთ ჩიხში მას მუშაობაში ხელი შეუშალეს, ტელეფონის ჩამორთმევა სცადეს და დაედევნენ“, - წერს „მედია აპრილი“.

„საზოგადოებრივი მაუწყებელი“

„საზოგადოებრივი მაუწყებლის“ 2025 წლის მთლიანი ბიუჯეტი, მისი პროექტის მიხედვით, 123 368 234 ლარი იქნება, საიდანაც 82 727 885 ლარი სახელმწიფო ასიგნებაა.

„საზოგადოებრივი მაუწყებლის აჭარის ტელევიზიისა და რადიოს“ 2025 წლის მთლიანი ბიუჯეტი კი 18 579  900 ლარი იქნება, საიდანაც სახელმწიფო ასიგნება 17 079 900 ლარია.

„საზოგადოებრივი მაუწყებლის“ სამეურვეო საბჭომ „საზოგადოებრივი მაუწყებლისა“ და „საზოგადოებრივი მაუწყებლის აჭარის ტელევიზიისა და რადიოს“ 2025 წლის ბიუჯეტები გუშინ, 5 დეკემბერს დაამტკიცა.

3 დეკემბერს, გვიან ღამით „საზოგადოებრივი მაუწყებლის“ საინფორმაციო გამოშვებაში გავიდა ტელეკომპანიის ინტერვიუ კიმბერლი ლოუსთან, რომლის წარდგენისას გადაცემის წამყვანმა თქვა, რომ იგი „ტრამპის ადმინისტრაციის ევროკავშირში სავარაუდო წარმომადგენლად განიხილება“. 

„საზოგადოებრივ მაუწყებელთან“ ინტერვიუში კიმბერლი ლოუ ამბობს: „ვეთანხმები, რომ შეერთებულ შტატებში იყო გარკვეული ქმედებები, რომლებიც ძალიან უსამართლო გახლდათ საქართველოს მიმართ, მათ შორის, „მეგობარი აქტი“, რომელიც შეჩერდა. ის ძალიან უსამართლო იყო საქართველოს კულტურისა და ხალხის მიმართ“. ასევე, მისი თქმით, მთავრობას ევროკავშირში შესვლასთან დაკავშირებით მოლაპარაკებების შეწყვეტა არ სურდა, „მაგრამ იყო ბევრი საკითხი, სადაც აშშ-სა და საქართველოს შორის ურთიერთობები გაუარესებული იყო. ვიცით, რომ, ტრამპის ახალ ადმინისტრაციასთან ერთად, ეს გაუმჯობესდება და ჩვენ ვაპირებთ, დაგეხმაროთ მოლაპარაკებების კვლავ გახსნაში“.  

კიმბერლი ლოუს კომენტარი გაავრცელეს სხვა პროსამთავრობო მედიასაშუალებებმაც, მათ შორის ტელეკომპანია „იმედმა“.

ვინ არის რეალურად კიმბერლი ლოუ „მითების დეტექტორმა“ გადაამოწმა. როგორც ფაქტების გადამოწმების პორტალი წერს, ლოუ რესპუბლიკური პარტიის წევრია. მან მონაწილეობის მიღება 2024 წლის აშშ-ის სენატის არჩევნებში სცადა, თუმცა რესპუბლიკური პარტიის პრაიმერის კანდიდატი არ ყოფილა და იმ პირებს შორის იყო, რომლებმაც პრაიმერიდან კანდიდატურა ან მოხსნეს, ან დისკვალიფიცირებული იყვნენ.

„2022 წელს ლოუმ ასევე სცადა წარმომადგენელთა პალატის არჩევნებში მიეღო მონაწილეობა, თუმცა კანდიდატობიდან დისკვალიფიცირებული იყო, რადგან არ ჰქონდა საკმარისი ხელმოწერები და მის განაცხადში შეცდომები ჰქონდა დაშვებული. საპასუხოდ ლოუმ განაცხადა, რომ “პარტის ესტაბლიშმენტი” მის დაბლოკვას ცდილობდა.

ამერიკულ მედიაში არ იძებნება ცნობები, რომ ლოუს ევროკავშირში დონალდ ტრამპის ადმინისტრაციის წარმომადგენლად ან რაიმე სხვა თანამდეობაზე დანიშვნა იგეგმება. ინფორმაციის წყაროდ, რომ ლოუ კანდიდატად განიხილება, საზოგადოებრივი მაუწყებელი თავად ლოუს უთითებს.

2022 წელს არჩევნებში მონაწილეთათვის არსებულ კითხვარში ლოუ აღნიშნავს, რომ “მარტოხელა დედა, ფერმერი და პოლიტიკის საკითხებში მრჩეველია”. ამავე კითხვარში მითითებულია, რომ არჩევის შემთხვევაში ლოუს სურვილი ექნებოდა საერთაშორისო საკითხების კომიტეტის წევრი გახდეს და “ბევრი ქვეყნის ექსპერტთან მუშაობს, რათა ამ პოზიციისთვის მოემზადოს”. ამავე კითხვარში კითხვაზე, სასარგებლოა თუ არა წარმომადგენლებისთვის წინა პოლიტიკური გამოცდილება”, ლოუ პასუხობს: “ხალხს ყელში ჰყავს ამოსული პოლიტიკოსები, ოფისში გვჭირდება ნამდვილი ადამიანები, რათა ხალხისთვის იბრძოლონ”.

ფეისბუქზე კიმბერლის ლოუს გვერდს 3 400-მდე გამომწერი ჰყავს. ლოუ სხვადასხვა რესპუბლიკელ პოლიტიკოსთან გადაღებულ ფოტოს ხშირად აქვენებს, თუმცა სხვა წყაროები, რომ მას ტრამპის ადმინისტრაციასთან ახლო კონტაქტი აქვს, არ იძებნება.  ერთ-ერთ პოსტში ლოუ “დიფ სტეიტს” მის დევნაში ადანაშაულებს. 

31 ოქტომბრის პოსტში ლოუ აღნიშნავს, რომ “საყოველთაო მშვიდობის ფედერაციის” მშვიდობის ელჩი გახდა. “საყოველთაო მშვიდობის ფედრაცია” კორეის უნიფიკაციის ტაძრის დამფუძნებლის, სუნ მიონ მუნის დაფუძნებული ორგანიზაციაა. თავად უნიფიკაციის ტაძარი მუნმა 1954 წელს დააფუძნა. მუნი თავს “მესიად” აცხადებდა. რელიგიური მოძრაობა არაერთ სკანდალთან არის დაკავშირებული. 2023 წელს იაპონიის პრემიერმინისტრის, შინძო აბეს მკლელმა განაცხადა, რომ აბე უნიფიკაციის ტაძართან კავშირის გამო მოკლა. მკვლელობის შემდეგ იაპონიის მთავრობას იაპონიაში ორგანიზაციის მოქმედების შეჩერება სურდა. კრიტიკოსები უნიფიკაციის ტაძარს მიმდევრების ექსპულატაციაში ადანაშაულებენ“.

„საზოგადოებრივი მაუწყებლის“ ახალი და მიმდინარე ამბების ბლოკის დირექტორმა, გიორგი გვიმრაძემ 4 დეკემბერს, დილით ფეისბუკის პირად გვერდზე დაწერა, რომ კიმბერლი ლოუს პირადად ესაუბრა და „არ თქმულა, რომ ის არის მომავალი ადმინისტრაციის წარმომადგენელი, ის შეიძლება გახდეს, რასაც თავად ამბობს ამ ეტაპზე მხოლოდ. და სწორედ ამიტომ, ითქვა, რომ შესაძლოა იყოს. თუმცა, ის რომ რესპუბლიკური პარტიის წევრია და თან კენჭს იყრიდა სენატში, ეს ადვილად იძებნება. მისი კავშირები, ტრამპის მომავალი ადმინისტრაციის უკვე დასახელებულ წევრებთან, ასევე იძებნება. ამის გარდა, ქალბატონი კიმბერლი, არაფერს ამბობს ისეთს, რაც არ უთქვამს ტრამპთან დაახლოებულ სხვა ადამიანებს. ამდენად მისი გამონათქვამები, დიდწილად თანხვედრაშია ტრამპის პოლიტიკის ძირითად გზავნილებთან და ეს არის მნიშვნელოვანი. შესაბამისად, ამ ინტერვიუს გარკვეული ნაწილების გამოქვეყნებაზე, პასუხისმგებელი ვარ მე და მხოლოდ მე და არავინ ჩემს გარდა“.

როგორც „მითების დეტექტორი“ წერს, „გვიმრაძე აღნიშნავს, რომ ის სენატში კენჭს იყრიდა და ეს “ადვილად იძებნება”. თუმცა, როგორც აღინიშა, ლოუ სენატში რესპუბლიკური პარტიის კანდიდატი არასოდეს ყოფილა. გარდა ამისა, ტრამპის ადმინისტრაციის უკვე დასახელებულ წევრებთან ლოუს კავშირები, რომელბსაც გვიმრაძე ახსენებს, ლოუს მიერვე გამოქვეყნებული ფოტოების გარდა სხვა წყაროებით არ დასტურდება“. 

გუშინ, შუადღით, „რადიო თავისუფლებამ“ გაავრცელა ინფორმაცია, რომ გიორგი გვიმრაძემ „საზოგადოებრივი მაუწყებლის“ ახალი და მიმდინარე ამბების ბლოკის დირექტორის პოსტი დატოვა. თუმცა, გამოცემას ტელევიზიის კომუნიკაციების სამსახურში ამ გადაწყვეტილების მიზეზი არ დაუზუსტეს. გვიმრაძეს ეს პოზიცია 2015 წლის ოქტომბრიდან ეკავა. 

„მედიაჩეკერის“ ინფორმაციით, გიორგი გვიმრაძე, როგორც წამყვანი ტელევიზიაში რჩება. 

„მითების დეტექტორი“ წერს, ქართულ მედია წყაროებში კიმბერლი ლოუ ბესარიონ შენგელიას კომენტარებშიც გვხვდება.

„შენგელიას პოსტები თავის ფეისბუქ გვერდზე კიმბერლის ლოუსაც აქვს გაზიარებული (1;2;3;4) ბესარიონ (ბესო) შენგელია საბავშვო წიგნის “ქინდერბუბუს” ავტორია. ის  საქართველოში “მსოფლიო მშვიდობის ფორუმის” ჩატარებას გეგმავს. შენგელია ამბობს, რომ ფორუმის შესახებ კიმბერლი ლოუსთან კომუნიკაციის შედეგად დონალდ ტრამპიც ინფორმირებულია. მისივე მტკიცებით, ტრამპს ფორუმის საპატიო სტუმრობა შესთავაზა და ამერიკული მხარე მზად არის ფორუმის ორგანიზებაშიც მიიღოს მონაწილეობა და ფინანსურადაც დაეხმაროს. გარდა ამისა, შენგელია ოქტომბერში ქართულ მედიებს კიმბერლი ლოუსთან ინტერვიუს ჩასაწერად მასთან დაკავშირებას სთავაზობდა. შენგელია ლოუს “სენატორობის კანდიდატად” მოიხსენიებს, ასევე გაზიარებული აქვს Georgia Today-ს ივლისის სტატია, რომელშიც ლოუ კვლავ შენგელიასთან არის დაკავშირებული და ასევე “მომავალ სენატორად” არის მოხსენიებული, თუმცა როგორც უკვე აღინიშნა, ლოუ სენატორობის კანდიდატი არ ყოფილა და რეპუბლიკური პარტიის პრაიმერშიც კი ვერ მიიღო მონაწილეობა. Georgia Today-სთან მოყვანილია ლოუს კომენტარი, სადაც ის ამბობს, რომ პირადად ცდილობს მსოფლიოს მასშტაბით დიპლომატიური ურთიერთობების გამოსწორებას მსოფლიო ლიდერებთან შეხვედრებით, თუმცა მისი დიპლომატიური საქმიანობის და ოფიციალური ვიზიტებისა და შეხვედრების შესახებ ინფორმაცია სხვა წყაროებში არ იძებნება. მსგავსი ოფიციალური შეხვედრების შესახებ ლოუს სიახლეები თავის ვებ-საიტზეც კი არ აქვს გამოქვეყნებული.

შენგელია აცხადებს, რომ 2024 წელს მშვიდობის დარგში ნობელის პრემიის ლაურეატობის კანდიდატებს შორის იყო და ის თეოლოგმა პროფესორმა კონსტანტინე აკოპმა წარადგინა. ნობელის პრემიის კომისიის მხრიდან ლაურეატობის კანდიდატების სია კონფიდენციალურია.  სოციალური მედიაში შენგელიას მითითებული აქვს, რომ “ნობელის პრემიის მშვიდობის კანდიდატი, გამომგონებელი და ეკონომისტია”. ასევე, მითითებული აქვს, რომ საქართველოს ტექნიკურ უნივერსიტეტში სწავლობდა. ბესარიონ შენგელია ასევე იძებნება რუსეთის  ეკონომიკის უმაღლესი სკოლის სამაგისტრო პროგრამის კურსდამთავრებულებულთა შორის“.

„ჟურნალისტთა დაცვის კომიტეტი“ (CPJ) პროევროპული აქციების გაშუქებისას ჟურნალისტებზე ძალადობის ფაქტებს ეხმიანება და საქართველოს ხელისუფლებას მოუწოდებს, უზრუნველყოს ჟურნაისტების უსაფრთხოება და დააყენოს პოლიციელების პასუხისმგებლობა.

CPJ-ის ევროპისა და ცენტრალური აზიის პროგრამის კოორდინატორის, გულნოზა საიდის განცხადებით, ჟურნალისტების დაცვა ნებისმიერი დემოკრატიული საზოგადოებისთვის დამახასიათებელი ნიშან-თვისებაა. 

„ქვეყანაში მიმდინარე მასობრივი პროტესტის გაშუქებაში ჩართული ჟურნალისტების მიმართ აღმაშფოთებელი და  საყოველთაო საპოლიციო ძალადობის აღკვეთის საკითხში საქართველოს ხელისუფლების სრული უმოქმედობა ქვეყნის დემოკრატიული ღირებულებებისაგან დაშორების ნიშანია.  

საქართველოს ხელისუფლებამ პასუხისგებაში უნდა მისცეს პოლიციის ის ოფიცრები, რომლებიც შემჩნეულნი არიან მედიის წარმომადგენლების მიმართ სასტიკ მოპყრობაში და სახალხოდ გამოუცხადოს მხარდაჭერა პროტესტის მიმდინარეობისას ჟურნალისტების უსაფრთხოების დაცვის საკითხს“. 

როგორც „ჟურნალისტთა დაცვის კომიტეტი“ წერს, ორგანიზაციამ საქართველოს შინაგან საქმეთა სამინისტროსა და სპეციალურ საგამოძიებო სამსახურს კომენტარისთვის წერილობით მიმართა, თუმცა პასუხი არ მიუღია.

28 ნოემბრიდან დაწყებული პროევროპული აქციების გაშუქებისას 50-ზე მეტი ჟურნალისტი დაშავდა. მედიის წარმომადგენლების მიმართ შსს-ის ძალები აგრესიით გამოირჩევიან. ისინი ჟურნალისტების ნაწილს ფიზიკურადაც გაუსწორდნენ. მათ დასჭირდათ სამედიცინო დახმარებაც. განსაკუთრებულად დაშავდნენ: გურამ როგავა, ალექსანდრე ქეშელაშვილი და მარიამ გაფრინდაშვილი. მედიის წარმომადგენლების ნაწილს დაუზიანეს ანდა წაართვეს აღჭურვულობაც. აღსანიშნავია, რომ მედიის რამდენიმე წარმომადგენელს ხელი პროფესიული საქმიანობის შესრულებისას არაერთხელ შეეშალა. 

28 ნოემბერს ირაკლი კობახიძემ განაცხადა, რომ ევროკავშირში გაწევრიანების მოლაპარაკების პროცესს აჩერებს, რასაც თბილისსა და საქართველოს სხვა ქალაქებში საპროტესტო აქციები მოჰყვა. 

პროევროპული აქციების გაშუქებისას დაზარალებული ჟურნალისტების შესახებ ვრცლად, იხილეთ „მედიაჩეკერის“ მასალა - პროევროპული აქციების გაშუქებისას 50-ზე მეტი ჟურნალისტი დაშავდა

სოფო მთივლიშვილის წერილი

2019 წლის ოქტომბერში, „საზოგადოებრივი მაუწყებლისთვის“ ცნობილი გახდა, რომ ამავე არხის ოპერატორმა, 29 წლის სანდრო ბერაძემ სიცოცხლე თვითმკვლელობით დაასრულა. მანამდე ოჯახი და მეგობრები, შემდეგ კი შინაგან საქმეთა სამინისტროს თანამშრომლები გაუჩინარებულ სანდროს რამდენიმე დღე ეძებდნენ. ყველამ იცოდა, რომ სანდრო აზარტულ თამაშებზე დამოკიდებული იყო, სამსახურშიც, სახლშიც და მეგობრებშიც. მომხდარმა მართლა ყველა გაამწარა.

ამ პერიოდში, „საზოგადოებრივ მაუწყებელზე“, საკვირაო გადაცემაში - „ახალი კვირა“ ვმუშაობდი და გადავწყვიტე სანდროზე, როგორც გემბლინგის ერთ-ერთ მსხვერპლზე გამეკეთებინა სიუჟეტი. ვერაფრით დავმალავ იმ სიამაყის განცდას როდესაც, „საზოგადოებრივმა მაუწყებელმა“ თიკო ბერძენიშვილისა და ვასილ მაღლაფერიძის ხელმძღვანელობით განცხადება გააკეთეს, რომ მაუწყებელზე ტოტალიზატორებისა და სლოტ კლუბების რეკლამა აიკრძალებოდა. მათ ამ განცხადებაში სანდროს სახელი და გვარი არ უხსენებიათ, მაგრამ ცხადი იყო ყველასთვის, რომ არხმა ეს გადაწყვეტილება სანდროს გარდაცვალების გამო მიიღო. ჩემი აზრით, ეს იყო ასევე იმპულსურად მიღებული გადაწყვეტილება და მიხვდებით რატომ. 

შეგახსენებთ, რომ თიკო ბერძენიშვილიც და ვასილ მაღლაფერიძეც ამ განცხადებას სანდროს ცხედარის აღმოჩენის დღეს აკეთებს.  

(აქვე ხაზგასასმელია ისიც, რომ ტოტალიზატორების რეკლამა ეთერში კვლავ  იყო. მაგალითად, გადაცემა „კაცების“  სპონსორი ძალიან დიდხანს „აჭარაბეთი“ იყო.)

მოკლედ, დავიწყე ამ თემაზე მუშაობა, რაოდენ საძულველიც არ უნდა იყოს ასეთ დროს ჭირისუფალთან მისვლა და თხოვნა მომხდარზე ილაპარაკოს. ჩვენ ხომ ვიცით, ზოგჯერ ეს იმდენად მნიშვნელოვანია, რომ შესაძლოა, სხვისთვის ჯოჯოხეთიდან ხსნას გავდეს. 

სანდროს ოჯახის წევრები და მეგობრები ჩავწერე. აბსოლუტურად ყველა გემბლინგის წინააღმდეგ სანდროს ბრძოლაზე საუბრობდა. საუბრობდნენ კანონის ნაკლოვანებაზე, სისტემის უმოქმედობასა და იმაზეც, რომ ადამიანმა რომც მოინდომოს შეწყვიტოს თამაში, ამას მხოლოდ თავად ვერ მოახერხებს, თუ პოლიტიკური გადაწყვეტილება არ იქნა მიღებული; შესაბამისი კანონმდებლობის არარსებობა რომ მწვანე შუქს უნთებს მთავრობაში ამ ბიზნესის მფლობელებსა და ლობისტებს. 

ჩვენ ხომ ყველამ ვიცით, როგორ განადგურებულა არაერთი ოჯახი ამის გამო. ჩვენ ხომ ვიცით, რომ ადამიანების სიცოცხლის ფასად მდიდრდებიან? ხომ ვიცით, რომ ახალგაზრდებს ითრევენ ამ შავ ხვრელში და მათი მომავლის განადგურების ფასად მდიდრდებიან.

ჩვენ ხომ ყველამ ვიცით ეს?!  ასევე, ისიც ხომ ვიცით, რომ გემბლინგს ჯანდაცვის მსოფლიო ორგანიზაციამ სპეციალური კოდი მიანიჭა (F 63.0), როგორც პათოლოგიას, რასთან ბრძოლასაც ადამიანი ხელშეწყობის გარეშე ვერ უმკლავდება და უმრავლესობა სიცოცხლეს თვითმკვლელობით ასრულებს.

მოკლედ, ჩაწერილი მყავს სანდროს ოჯახი, მეგობრები. ასევე, აზარტულ თამაშებზე დამოკიდებულები, გამოჯანმრთელებულები, რეაბილიტირებულები, ფსიქოლოგები, აქტივისტები, იურისტები და ყველა სხვა შემადგენელი, ვინც ამ თემას შეიძლება უკავშირდებოდეს.  

პარასკევს, საღამოს ჩავწერე ძლივს დათანხმებული მოთამაშეები, ანონიმურობის დაცვით, დიდი ხვეწნა-მუდარისა და ათასი პირობის გათვალისწინებით. ისინი მეუბნებოდნენ, რომ არ გამაშვებინებდნენ ეთერში, მეუბნებოდნენ, რომ ეს არაერთხელ მომხდარა, რომ მთავრობაში ამ ბიზნესს დიდი მფარველი ჰყავს. ჩემგან პირობა იყო მიცემული, რომ ინტერვიუებს იმ ფორმით გავუშვებდი, როგორც უნდოდათ. 

ჩაწერილი ინტერვიუებით ტელევიზიაში ვბრუნდებოდი პარასკევ ღამეს, დაახლოებით 10 საათი იქნებოდა. (სიუჟეტი ეთერში კვირას უნდა გასულიყო)  საინფორმაციო სამსახურის უფროსმა, ეკა შონიამ დამირეკა და მითხრა, სიუჟეტი გამეკეთებინა მხოლოდ სანდროზე, ნეკროლოგის სახით, არ მეხსენებინა გემბლინგი, საერთოდ ამომეღო ეგ ნაწილი და აზარტულ თამაშებზე დამოკიდებულებიც აღარ გვჭირდებოდნენ. ანუ სიუჟეტი იქნებოდა სანდროზე ნეკროლოგი. რა თქმა უნდა, არ დავთანხმდი. ვკითხე, რა შეიცვალა-თქო და პასუხი მივიღე, რომ ვასიკოსთან გაიარა ეს თემა და ვერ გათვალეს, რომ გემბლინგი ერთ-ერთი ფსიქიკური აშლილობის ფორმაა და გარდაცვლილ თანამშრომელზე ვერ იტყვიან, რომ ეს დიაგნოზი ჰქონდა. რა თქმა უნდა, ეს იყო სრული აბსურდი. ჩემი და არა მხოლოდ ჩემი ვარაუდით, მაშინდელი „ახალი კვირის“ გუნდიც დამეთახმება, ასე ვასილ მაღლაფერიძე მიხვდა ამ სიუჟეტის ეთერში გაშვებით, ვის მიაყენებდა ზიანს და ეს არ უნდოდა.

იმავე წუთს პროდიუსერებს ვუთხარი, ან სანდროზე სიუჟეტი გავა იმ ფორმით, როგორსაც მე ვფიქრობ, ან არა და წავალ სამსახურიდან და საჯაროდ დავწერ, რატომ მივდივარ-თქო. მაშინ, ობიექტურად უნდა აღინიშნოს, რომ პროდიუსერებიც და წამყვანიც ჩემს პოზიციაზე იყვნენ. ამორალურად მიაჩნდათ სიუჟეტის ამ ფორმით ეთერში გაშვება. 

ვასილ მაღლაფერიძესთან ამ თემაზე საუბარი შუაღამეს შედგა. ის გაღიზიანებული იყო და ამბობდა იგივეს, რაც ზემოთ ვთქვი, გვადანაშაულებდა  მაუწყებელთა ქცევის კოდექსისა და ჟურნალისტური ეთიკის დარღვევაში. ბოლოს, წინააღმდეგობა რომ ვერ გაგვიწია, მოგვაძახა, რაც გინდათ, ის ქენითო და წავიდა. მეც, რა თქმა უნდა, გავიგე, ისე როგორც თქვა. რაც მინდოდა, ის გავაკეთე. 

სიუჟეტი ეთერში გავიდა. ისე, როგორც მინდოდა. 

მეორე დღეს დამიბარეს და გამლანძღეს, როგორ და რატომ ვერ გავიგე ვასილ მაღლაფერიძის ნათქვამი - „რაც გინდა ის ქენი“. მართლა ეგრე კი არ უნდა გაგეგოთო. ამოიჩემეს „ახალი კვირის“ მთელი გუნდი და ვასილ მაღლაფერიძე მას შემდეგ გამარჯობასაც კი აღარ ეუბნებოდა მთელ გუნდს. 

წლებია, ამ ამბავს ვერ ვყვებოდი, სანდროს ოჯახის წევრებისა და მეგობრების გათვალისწინებით. მაშინ ძალიან მადლიერები იყვნენ იმით, რაც „საზოგადოებრივმა მაუწყებელმა“ განაცხადა და ერთგვარი კამპანიაც კი დაიწყო გემბლინგის წინააღმდეგ, სახელად #სანდრიკასთვის. არ მინდოდა, მათთვის ტკივილი მიმეყენებინა. ასე ვფიქრობდი, ძალიან დიდი იმედგაცრუება იქნებოდა მათთვის. 

წარმოიდგინეთ სირთულე, ჯერ ერთი რომ გარდაცვლილ კოლეგაზე წერ სიუჟეტს, მერე მეორე, როგორი ზეწოლაა და მესამე - როგორი სიყალბე. ერთი ხელით ვითომ გარემოს აჯანსაღებენ და იგივე სხეულის მეორე ხელით ამავე პროცესს ეწინააღმდეგებიან. სახეები კი ჭირისუფალთან დამწუხრებულები აქვთ.  რა მავნებლობაა, რა სიყალბეა, რა ფარისევლობა. ამ ყველაფერზე ვფიქრობდი წერისას, ბურთი ყელში მქონდა გაჩხერილი. 

მიხარია, რომ ვთქვი ის, რაც მინდოდა. 

მიხარია, რომ ბევრი რამ გავაკეთე ისე, როგორც მინდოდა ჩემი იქ ყოფნის დროს, „ახალ კვირაში“. 

მიხარია, რომ ჩემს კოლეგებსაც ვუჭერდი მხარს, გაეკეთებინათ ისე, როგორც მათ უნდოდათ და ამას რაღაც ეტაპამდე ერთადაც და ცალკ-ცალკეც რაღაცნაირად ვახერხებდით. 

მიხარია, რომ ჩემი არცერთი სიუჟეტი არ და ვერ აღიქმება ლოიალურად ან მაამებლად მოქმედი ხელისუფლების ან ყოფილი ხელისუფლებების მიმართ.  ამას იქამდე ვაკეთებდი, ვიდრე შემეძლო. 

ლგბტქ ადამიანებზე სიუჟეტების გაკეთება „საზოგადოებრივ მაუწყებელზე“ ფაქტობრივად შეუძლებელი იყო.

როცა საინფორმაციო სამსახურის უფროსს ეუბნები, 17 მაისი მოდის და გინდა, გააკეთო ლგბტქ პრაიდის ისტორია იმისთვის, რომ ადამიანებს ჰქონდეთ სწორი ინფორმაცია, რა არის პრაიდი, საიდან მოვიდა და რა დატვირთვა აქვს, რადგან „საზოგადოებრივი მაუწყებლის“ პირდაპირი მოვალეობა ცნობიერების ამაღლებაა, ის რომ არ ხდებოდეს, რაც ყოველ წელს, 17 მაისს ხდება. ამის პასუხად გეუბნება: „უი, უი, უი, რას ამბობ, მე ძაან მაგარი თემა მაქვს შენთვის, მოდი, ხვამლის მთის საიდუმლოებაზე გააკეთე სიუჟეტიო“, მანდ მართლა, გეფიცებით, იმხელა ნერწყვი ჩავყლაპე, მეგონა, დავიხრჩობოდი. 

ჰოდა, ეს სათქმელიც მახრჩობდა. კი, გვიანი შეიძლება იყოს, მაგრამ იმედი

მაქვს, ასეთ გადამწყვეტ დროს ერთ ადამიანს მაინც დავაფიქრებ მაუწყებელში. გაახილეთ, კოლეგებო, ფართოდ დახუჭული თვალები. 

ბოდიში მინდა, მოვუხადო ანდრო ბერაძის სულს და მისი ოჯახის წევრებს.  

„პრესის საერთაშორისო ინსტიტუტი“ (IPI), პარტნიორ პრესის თავისუფლების ორგანიზაციებთან ერთად თბილისში, პროევროპული აქციების გაშუქებისას, სახელმწიფო უსაფრთხოების ძალების მხრიდან მხრიდან მედიის წარმომადგენლებზე თავდასხმის ფაქტებს ეხმაურება. 

განცხადებაზე ხელმომწერი 11 ორგანიზაცია სპეცდანიშნულების რაზმის წარმომადგენლების მხრიდან მედიის წარმომადგენლებზე თავდასხმას, რასაც როგორც ჩანს მიზანმიმართული ხასიათი აქვს, გმობენ და საქართველოს ხელისუფლებას მოუწოდებენ, დაუყოვნებლივ შეწყვიტოს დამოუკიდებელ და კრიტიკულ მედიაზე მიმდინარე თავდასხმა.

„ჩვენ სრულ მხარდაჭერას ვუცხადებთ საქართველოს მამაც ჟურნალისტებს, რომლებიც მედიისთვის მზარდი მტრული და საშიში სამუშაო გარემოს მიუხედავად, საზოგადოების ინფორმირებას აგრძელებენ“.

როგორც განცხადებაში ვკითხულობთ, სპეციალური საგამოძიებო სამსახურისადმი არაერთგზის მიმართვის მიუხედავად, ჟურნალისტების წინააღმდეგ ჩადენილი დანაშაულები ძირითადად გამოუძიებელი რჩება, რაც დაუსჯელობის კულტურას განამტკიცებს. 

„დაშავებული ჟურნალისტების უმეტესობა თბილისში დამოუკიდებელ და ხელისუფლების კრიტიკულ საშუალებებში იყო დასაქმებული. საქართველოში მედიის ეს სასტიკი დარბევა არ არის იზოლირებული ეპიზოდი, არამედ არის მიზანმიმართული ძალადობისა და ჟურნალისტების წინააღმდეგ ჩადენილი დანაშაულების დაუსჯელობის შემაშფოთებელი ნიმუშის ნაწილი, მათ შორის იმ დანაშაულების, რომლებიც ჩადენილია ამ წლის დასაწყისში „უცხოური გავლენის გამჭვირვალობის შესახებ“ შემზღუდავი კანონის წინააღმდეგ საპროტესტო აქციების დროს“.

პრესის თავისუფლებისა და გამოხატვის თავისუფლების საკითხებზე მომუშავე ორგანიზაციები საერთაშორისო თანამეგობრობას მოუწოდებენ, მოსთხოვონ საქართველოს მთავრობას, შეწყვიტოს მედიის თანამშრომლების დარბევა და შეასრულოს თავისი ვალდებულებები დემოკრატიული თავისუფლებებისა და გამოხატვის თავისუფლების მიმართ. 

ხელმომწერი ორგანიზაციები: პრესის საერთაშორისო ინსტიტუტი (IPI), პრესისა და მედიის თავისუფლების ევროპული ცენტრი (ECPMF), ევროპის ჟურნალისტთა ფედერაცია (EFJ), Free Press Unlimited (FPU), OBC Transeuropa (OBCT), Index on Censorship, Justice for Journalists Foundation, ევროპელ ჟურნალისტთა ასოციაცია (AEJ), რეპორტიორები საზღვრებს გარეშე (RSF), PEN International, ევროპის მაუწყებელთა კავშირი (EBU);

პროევროპული აქციების გაშუქებისას მედიის წარმომადგენლებზე ძალადობასა და დაკავებებს გამოეხმაურა ორგანიზებული კრიმინალისა და კორუფციის გამოძიების პროექტი (OCCRP).

28-29 ნოემბრის ღამეს პარლამენტთან მიმდინარე საპროტესტო აქციის დარბევისას 40-მდე ჟურნალისტის დაშავების ფაქტს გამოეხმაურა ჟურნალისტთა უსაფრთხოების პლატფორმაც (SJP). 

28 ნოემბრიდან დაწყებული პროევროპული აქციების გაშუქებისას 50-ზე მეტი ჟურნალისტი დაშავდა. მედიის წარმომადგენლების მიმართ შსს-ის ძალები აგრესიით გამოირჩევიან. ისინი ჟურნალისტების ნაწილს ფიზიკურადაც გაუსწორდნენ. მათ დასჭირდათ სამედიცინო დახმარებაც. განსაკუთრებულად დაშავდნენ: გურამ როგავა, ალექსანდრე ქეშელაშვილი და მარიამ გაფრინდაშვილი. მედიის წარმომადგენლების ნაწილს დაუზიანეს ანდა წაართვეს აღჭურვულობაც. აღსანიშნავია, რომ მედიის რამდენიმე წარმომადგენელს ხელი პროფესიული საქმიანობის შესრულებისას არაერთხელ შეეშალა. 

28 ნოემბერს ირაკლი კობახიძემ განაცხადა, რომ ევროკავშირში გაწევრიანების მოლაპარაკების პროცესს აჩერებს, რასაც თბილისსა და საქართველოს სხვა ქალაქებში საპროტესტო აქციები მოჰყვა. 

„სოციალური სამართლიანობის ცენტრმა“ აფგან სადიგოვისთვის საქართველოში საერთაშორისო დაცვის მინიჭებაზე უარის შესახებ თბილისის საქალაქო სასამართლოს გადაწყვეტილება სააპელაციო სასამართლოში გაასაჩივრა.

ორგანიზაციის შეფასებით, მოსამართლე ლიელა ფოლადიშვილის მიერ მიღებული გადაწყვეტილება არის „აშკარად დაუსაბუთებელი, სრულად იმეორებს შინაგან საქმეთა სამინისტროს გადაწყვეტილების შინაარსს და არ შეესაბამება საერთაშორისო დაცვის საკითხების განხილვასთან დაკავშირებით ეროვნულ და საერთაშორისო დონეზე დადგენილ სამართლებრივ სტანდარტებს“.

„სოციალური სამართლიანობის ცენტრის“ განცხადებით, თბილისი საქალაქო სასამართლომ სათანადოდ არ შეაფასა მათ მიერ წარდგენილი მტკიცებულებები, რომლებიც აზერბაიჯანში აფგან სადიგოვის აშკარა და განგრძობადი დევნის ფაქტებზე მიუთითებდა. 

ორგანიზაციის შეფასებით, სასამართლომ სიტყვასიტყვით გაიმეორა შსს მიგრაციის დეპარტამენტის დასკვნაში მითითებული მსჯელობა და პრაქტიკულად ყოველგვარი შეფასების მიღმა დატოვა მათ მიერ წარმოდგენილი ყველა მტკიცებულება და მნიშვნელოვანი არგუმენტი.

როგორც „სოციალური სამართლიანობის ცენტრის“ განცხადებიდან ირკვევა,  სასამართლომ მის გადაწყვეტილებაში არა თუ არ გაითვალისწინა ორგანიზაციის მიერ ზემოთ წარმოდგენილი ძირითადი მტკიცებები და მტკიცებულებები, არამედ მათი შეფასებაც კი არ მოახდინა, „რაც მიუთითებს იმაზე, რომ თბილისის საქალაქო სასამართლოს გადაწყვეტილება აშკარად დაუსაბუთებელია და არ შეესაბამება საქართველოს კანონმდებლობის და საერთაშორისო ადამიანის უფლებათა დაცვის სტანდარტებს. მით უფრო, რომ წინამდებარე საქმეში ჩვენ ვამტკიცებთ აფგან სადიგოვის მიმართ ექსტრადიციის შემთხვევაში წამებისა და არაადამიანური მოპყრობის ან დასჯის აბსოლუტური უფლების, ასევე სამართლიან სასამართლოზე ხელმისაწვდომობის დარღვევის ძალიან მაღალ რისკებს, რაც ეროვნული სასამართლოების მხრიდან ფრთხილ და მაღალი სტანდარტით შეფასებას ითხოვს“.

28 ნოემბერს თბილისის საქალაქო სასამართლომ აფგან სადიგოვის აზერბაიჯანში ექტრადიციის გადაწყვეტილება მიიღო. მოსამართლე არსენ კალატოზიშვილმა საქართველოს გენერალური პროკურატურის შუამდგომლობა დააკმაყოფილა. პროკურატურა სასამართლოსგან აფგან სადიგოვის აზერბაიჯანის რესპუბლიკაში ექსტრადიციის დასაშვებად ცნობას ითხოვდა.

აფგან სადიგოვს შსს-ის მიგრაციის დეპარტამენტმა საქართველოში პოლიტიკური თავშესაფრის მიცემაზე უარი 16 სექტემბერს უთხრა. 21 სექტემბრიდან კი, თბილისში დაკავებულმა ჟურნალისტმა შიმშილობა დაიწყო.

სადიგოვს საექსტრადიციო პატიმრობა კიდევ 3 თვით თბილისის საქალაქო სასამართლომ 1 ნოემბერს გაუხანგრძლივა. ის შემდგომი ექსტრადირების მიზნით 3 აგვისტოს დააკავეს.

„საზოგადოებრივი მაუწყებლის“ თანამშრომელთა ნაწილი თანამოქალაქეებისა და კოლეგების მიმართ ძალადობას გმობს და მოითხოვს ტელეკომპანიის ეთერები საზოგადოებრივი აზრის გაჟღერებასა და საჯარო დისკუსიებს დაეთმოს. 

„საზოგადოებრივი მაუწყებლის“  60-ზე მეტი თანამშრომლის ერთობლივი განცხადებით, „სამწუხაროდ, საზოგადოებრივი მაუწყებელი ბოლო ხანია ვერ ასრულებს კანონით დაკისრებულ ვალდებულებებს, არ ასახავს მოვლენებს სიღრმისეულად და მიუკერძოებლად“.

„საქართველოს ევროპული მომავალი ჩვენი ისტორიული არჩევანია, რომელიც კონსიტუტიის 78-ე მუხლით მყარდება („კონსტიტუციურმა ორგანოებმა თავიანთი უფლებამოსილების ფარგლებში მიიღონ ყველა ზომა ევროპის კავშირსა და ჩრდილოატლანტიკური ხელშეკრულების ორგანიზაციაში საქართველოს სრული ინტეგრაციის უზრუნველსაყოფად.”). საქართველოს პრემიერ-მინისტრისა და პარლამენტის თავმჯდომარის მიერ 28 ნოემბერს გაჟღერებული გადაწყვეტილება არღვევს კონსტიტუციით გამყარებულ ევროპულ და ევროატლანტიკურ სტრუქტურებში ინტეგრაციის უზრუნველყოფის ვალდებულებას, რამაც გამოიწვია მასობრივი აქციები და მანიფესტაციები თბილისსა და რეგიონებში.

ჩვენ, როგორც ამ ქვეყნის რიგითი მოქალაქეები, ვგმობთ მშვიდობიანი მოქალაქეების სასტიკ დარბევას, დევნას და დაპატიმრებას, ვდგავართ დემონსტრანტების გვერდით და ვიაზრებთ ჩვენს მოქალაქეობრივ პასუხისმგებლობას დავიცვათ ხალხის მიერ არჩეული, კონსტიტუციით გამყარებული აწმყო და მომავალი.

ამ მნიშვნელოვან პროცესებში განსაკუთრებული როლი აკისრია მედიას, განსაკუთრებით საზოგადოებრივ მაუწყებელს, რომლის დამოუკიდებლობაც კონსტიტუციის მე-17 მუხლითაა გაწერილი („კანონი უზრუნველყოფს საზოგადოებრივი მაუწყებლის დამოუკიდებლობას სახელმწიფო უწყებებისაგან და თავისუფლებას პოლიტიკური და არსებითი კომერციული გავლენისაგან.”).

თითოეულ თანამშრომელს გვჯერა საზოგადოებრივი მაუწყებლის ძალის და გავლენის, იდეის, რომ ის ანგარიშვალდებულია მხოლოდ საზოგადოების წინაშე.

სამწუხაროდ, საზოგადოებრივი მაუწყებელი ბოლო ხანია ვერ ასრულებს კანონით დაკისრებულ ვალდებულებებს, არ ასახავს მოვლენებს სიღრმისეულად და მიუკერძოებლად.

საზოგადოებრივი მაუწყებლის იდეა დემოკრატიული სახელმწიფოს უმნიშვნელოვანესი მონაპოვარია, შესაბამისად, საკუთარ ვალდებულებად მიგვაჩნია თავისუფალი სიტყვის დაცვა.

საზოგადოებრივი მაუწყებლის პირველი არხის თანამშრომლები ვგმობთ და ვაპროტესტებთ ძალადობას ჩვენი თანამოქალაქეებისა და კოლეგების მიმართ. ვგრძნობთ მოქალაქეობრივ და პროფესიულ პასუხისმგებლობას, სწორედ ამიტომ, მივესალმებით და მოვითხოვთ, ჩვენი ეთერები დაეთმოს საზოგადოებრივი აზრის გაჟღერებას და საჯარო დისკუსიებს“.

განცხადებაზე ხელმომწერთა რაოდენობა განახლებადია. 

„საზოგადოებრივი მაუწყებლის“ ძველ შენობასთან მეოთხე დღეა, მოქალაქეები საპროტესტო აქციებს მართავენ და ეთერის დათმობას ითხოვენ. აქცია დაგეგმილია დღესაც, 18:00 საათზე. 

28 ნოემბრიდან თბილისსა და საქართველოს სხვა ქალაქებში პროევროპული აქციები იმართება, ამ დღეს ირაკლი კობახიძემ განაცხადა, რომ ევროკავშირში გაწევრიანების მოლაპარაკების პროცესს აჩერებს. 

საქარველოს ჟურნალისტური ეთიკის ქარტია“ კატეგორიულად გმობს ძალადობას ჟურნალისტების მიმართ და საქართველოს პროკურატურასა და სპეციალურ საგამოძიებო სამსახურს ჟურნალისტთა მიმართ ჩადენილი დანაშაულების გამოძიებისკენ მოუწოდებს. 

2-3 დეკემბრის ღამე:

„სტუდია მონიტორი“

• ნინო რამიშვილი, ჟურნალისტი - ფეისბუკის პირად გვერდზე დაწერა, რომ სპეცრაზმის თანამშრომლებმა პროფესიული მოვალეობის შესრულებისას ტელეფონი წაართვეს: „რა თქმა უნდა მეკეთა ბეიჯი და მქონდა არაერთი ნიშანი პრესის, ასევე ვუთხარი რომ ვარ ჟურნალისტი და ვანახებდი პრესკარტას, მაგრამ მთხოვდნენ ვიდეოს წაშლას, ბოლოს კი გაიტაცეს ტელეფონი. შემდეგ კი რჩევად დააყოლეს წადი სახლშიო".

„პირველი არხი“

• თეო ხუბულავა, ჟურნალისტი, ლევან ქართველიშვილი და ბადრი გამრეკლაშვილი ოპერატორები - ტელეკომპანიის ინფორმაციით, ისინი სპეცრაზმის მიერ გაზის კაფსულების გამოყენების დროს დაშავდნენ. მათ სამედიცინო დახმარება სასწრაფოს დახმარების ბრიგადამ ადგილზევე აღმოუჩინა.

„მთავარი არხი“

• გივი მჭედლიშვილი, ოპერატორი - ჟურნალისტმა დეა მამისეიშვილმა   პირდაპირ ეთერში ყოფნის დროს თქვა, რომ ოპერატორი შეუძლოდ გახდა.

„TV პირველი“

• როგორც „ტვ პირველი“ წერს, „შინაგან საქმეთა სამინისტროს მიერ 2 დეკემბერს აქციის დაშლის დროს გამოყენებული არაპროპორციული ძალის გამოყენების დროს დაზიანდა "ტვ პირველი" სამაუწყებლო აპარატურა, მათ შორის გამოსაყენებლად უვარგისია პირდაპირი ტრანსლაციის კამერა. ეს არ არის პირველი  შემთხვევა, როდესაც "გომელაურის ომონს" იერიში მიაქვს "ტვ პირველის" სამაუწყებლო აპარატურაზე რათა, გაგვეთიშოს პირდპირი ეთერის სიგნალი და ვეღარ შევძლოთ მოვლენების ეპიცენტრიდან მაუწყებლობა“.

„ჩაიხანა“ 

• ნატალი ჩხარტიშვილი, აქციას აშუქებდა, როგორც პრესის წარმომადგენელი - იღებდა აქციის მონაწილის დაკავებას, რა დროსაც შსს-ს ძალების წარმომადგენლებმა მუშაობაში ხელი შეუშალეს, მას ხელიდან გააგდებინეს Handycam–ი. ასევე, უყვიროდნენ, რომ გამოერთო კამერა. 

სხვა შემთხვევები:

„ინტერპრესნიუსი“

• ვანო გორგიშვილი, ფოტოგრაფი - გორგიშვილმა facebook-ის პირად გვერდზე 2 დეკემბერს დაწერა, რომ „30 ნოემბრის დილის 2-3 სთ-ზე მერიოტთან შეჯგუფებულ მედიას წყლის ჭავლი მოგვიშვეს. რამდენიმე კაცმა გასწრება ვცადეთ და მაშინ გვესროლეს რეზინის ტყვიები. მირიანს[მელაძე] 4 მოხვდა. მე, საბედნიეროდ, 1 პატარა და მუხლთან“. ფოტოგრაფმა გამოაქვეყნა ფოტოც. 

უცხოელი ჟურნალისტი

• ფიოდორ ხუდოკორმოვი, რუსი ჟურნალისტი - Paper Kartuli-ის ინფორმაციით, ჭიჭინაძის ქუჩაზე, როცა სპეცრაზმი მომიტინგეებს აწვებოდა, ნიღბიანმა მამაკაცმა, სავარაუდოდ ძალოვანმა, მას ხელი ჰკრა.

28 ნოემბრიდან დაწყებული პროევროპული აქციების გაშუქებისას 50-ზე მეტი ჟურნალისტი დაშავდა. მედიის წარმომადგენლების მიმართ შსს-ის ძალები აგრესიით გამოირჩევიან. ისინი ჟურნალისტების ნაწილს ფიზიკურადაც გაუსწორდნენ. მათ დასჭირდათ სამედიცინო დახმარებაც. განსაკუთრებულად დაშავდნენ: გურამ როგავა, ალექსანდრე ქეშელაშვილი და მარიამ გაფრინდაშვილი. მედიის წარმომადგენლების ნაწილს დაუზიანეს ანდა წაართვეს აღჭურვულობაც. აღსანიშნავია, რომ მედიის რამდენიმე წარმომადგენელს ხელი პროფესიული საქმიანობის შესრულებისას არაერთხელ შეეშალა. 

28 ნოემბერს ირაკლი კობახიძემ განაცხადა, რომ ევროკავშირში გაწევრიანების მოლაპარაკების პროცესს აჩერებს, რასაც თბილისსა და საქართველოს სხვა ქალაქებში საპროტესტო აქციები მოჰყვა. 

პროევროპული აქციების გაშუქებისას დაზარალებული მედიის წარმომადგენლების განახლებადი სია: