„პუბლიკის“ ინფორმაციით, გამოცემის ორი ჟურნალისტისთვის, ქეთო მიქაძისა და ალექსანდრე ქეშელაშვილისთვის პროფესიულ საქმიანობაში ხელშეშლის გამო ბრალდებულებს, 39 წლის ლევან ზარდიაშვილსა და 26 წლის საბა მინდიაშვილს მოსამართლე მზია გარშაულიშვილმა 3000-3000 ლარის გირაო შეუფარდა. წინასასამართლო სხდომის თარიღად კი 16 აპრილი, 16:00 განისაზღვრა.

გამოცემის ცნობით, აღკვეთის ღონისძიების სახით გირაოს გამოყენების შუამდგომლობის დასაბუთებისას, პროკურორმა ლაშა გამყრელიძემ განაცხადა, რომ „მომატებულია საფრთხე მორიგი ახალი დანაშაულის ჩადენისა, ვინაიდან ბრალდებულებმა იცოდნენ, რომ [„პუბლიკის“ ჟურნალისტები] ასრულებდნენ პროფესიულ მოვალეობას ერთ-ერთი საპროტესტო აქციის დროს, რა დროსაც ხელი შეუშალეს ჟურნალისტურ საქმიანობაში, რის გამოც ჟურნალისტებს არ ჰქონდათ შესაძლებლობა ინფორმაციის მოპოვებისა და გავრცელებისა“.

როგორც „პუბლიკა“ წერს, პროკურორმა ყურადღება გაამახვილა ერთ-ერთი ბრალდებულის, ლევან ზარდიაშვილის ნასამართლეობასა და სხვა ფორმალურ საფუძვლებზეც - მოწმეებზე ზემოქმედებისა და მტკიცებულებების განადგურების საფრთხეებზე:

„პროკურატურის პოზიციის საპასუხოდ ბრალდებულები აღკვეთის ღონისძიების სახით გირაოს გამოყენებას დაეთანხმნენ, თუმცა მოსამართლეს თანხის შემცირება და გადახდის ვადის გაზრდა სთხოვეს [პროკურატურა 20 დღეს მოითხოვდა].

ბრალდებულმა ლევან ზარდიაშვილმა განაცხადა, რომ არის დროებით უმუშევარი, „არ აქვს საშუალება, რომ გადაიხადოს 3000 ლარი“ და სასამართლოს შეღავათის გაწევა სთხოვა.

საბა მინდიაშვილმა კი მოსამართლის შეკითხვის საპასუხოდ აღნიშნა, რომ გამგეობაში მუშაობს.

„წეღან ვუთხარი [პროკურორს], რომ ქორწილი მაქვს-მეთქი და თუ დამეთანხმება, რომ დამიკლოს გირაოს თანხა, გამიხარდება… გამგეობის თანამშრომელი ვარ“, – თქვა საბა მინდიაშვილმა“. 

ლევან ზარდიაშვილსა და საბა მინდიაშვილს ბრალი სისხლის სამართლის კოდექსის 154-ე მუხლის პირველი ნაწილით აქვთ წარდგენილი, რაც ისჯება ჯარიმით ან საზოგადოებისათვის სასარგებლო შრომით ან გამასწორებელი სამუშაოთი ანდა შინაპატიმრობით ვადით ექვსი თვიდან ორ წლამდე.

საქმე ეხება 2025 წლის 8 სექტემბერს, თბილისში, კახა კალაძის საარჩევნო შტაბის წინ, „ქართული ოცნების“ მხარდამჭერებსა და პროევროპული აქციის მონაწილეებს შორის მიმდინარე დაპირისპირების გაშუქებისას, „პუბლიკის“ ჟურნალისტ ქეთო მიქაძეზე ძალადობისა და ტელეფონის წართმევის, ხოლო გამოცემის მეორე ჟურნალისტისთვის, ალექსანდრე ქეშელაშვილისთვის ჟურნალისტურ საქმიანობაში ხელის შეშლის ფაქტებს. ქეშელაშვილს „ქართული ოცნების“ შტაბთან დაპირისპირების გაშუქებისას, პირდაპირი ეთერის დროს ხელზე დაარტყეს, ტელეფონი გააგდებინეს და წაართვეს. მან ტელეფონი მოგვიანებით კოლეგის დახმარებით დაიბრუნა.

იმავე ღამით, კალაძის შტაბთან მომხდარი დაპირისპირების გაშუქებისას საქმიანობაში ხელი ჯამში 6 ჟურნალისტს შეუშალეს. 

შინაგან საქმეთა სამინისტრო ფოტოგრაფ გიორგი თარხნიშვილს, 2025 წლის 18 დეკემბერს, პროფესიული მოვალეობის შესრულებისას, ტროტუარზე დგომით ფეხით მოსიარულეთათვის დაბრკოლების შექმნას ედავება. 

თბილისის საქალაქო სასამართლოს ადმინისტრაციულ საქმეთა კოლეგიის მოსამართლე დავით მაკარაძემ ჟურნალისტის ე.წ. „ტროტუარის საქმეზე“ მტკიცებულებები დღეს, 6 მარტს გამოიკვლია და განაჩენის გამოცხადება გადადო.

„საბუთებიც წარვადგინეთ, რომ ჟურნალისტია, „ბეიჯებიც“, რაც ეკეთა. ქუდზეც აწერია - PRESS, დიდი ფოტოკამერა უჭირავს ხელში. ეს ყველაფერი ამტკიცებს, რომ პროფესიულ მოვალეობას ასრულებდა და შსს-ს წარმოდგენილ ვიდეოშიც ჩანს, რომ ფოტოს ან ვიდეოს იღებს“, - თქვა თარხნიშვილის ადვოკატმა, გიორგი ტაბატაძემ „მედიაჩეკერთან“ საუბრისას.

ე.წ. „ტროტუარის საქმეები“ ადმინისტრაციულ სამართალდარღვევათა კოდექსის 174-ე პრიმა მუხლით განიხილება. 2026 წლის იანვრიდან მოყოლებული ამ საქმეებზე სასამართლომ მოქალაქეთა ნაწილს სიტყვიერი შენიშვნა გამოუცხადა, ნაწილი კი ადმინისტრაციულ პატიმრობაში გაუშვა. 

დღესვე ცნობილი გახდა, რომ შსს პროფესიული მოვალეობის შესრულების დროს  „გზის გადაკეტვას“ ედავება გამოცემა „ტაბულას“ ჟურნალისტს, მარიამ კუპრავასაც. „ტაბულას“ ცნობით, 7 თებერვალს, მარიამ კუპრავა რუსთაველის გამზირზე პროფესიულ მოვალეობას ასრულებდა, ის პარლამენტთან მიმდინარე აქციას, შაბათის მარშს აშუქებდა.

„საერთაშორისო გამჭვირვალობა-საქართველო“ 2025 წლის ნოემბერში გამოქვეყნებულ კვლევაში პროტესტის გაშუქებისას მედიის წარმომადგენლების მიმართ ჩადენილ დანაშაულებს მიმოიხილავს და წერს, რომ ბოლო ერთი წლის განმავლობაში, განსაკუთრებით საგანგაშო ტენდენციად იქცა ჟურნალისტებისა და მედიის წარმომადგენლების უკანონო დაკავება, რომელთა რიცხვმაც შემაშფოთებელ ნიშნულს მიაღწია. „მხოლოდ ბოლო 1 წლის განმავლობაში, მედიის 26 წარმომადგენელი დააკავეს, მათგან ნახევარზე მეტი, ბოლო 1 თვეში ადმინისტრაციული წესით - ე.წ. გზის ხელოვნურად გადაკეტვის საბაბით“.

TI-ის კვლევის მიხედვით, კიდევ ერთი მავნე ტენდენცია, რაც ერთწლიანი საპროტესტო ციკლის პერიოდში გამოვლინდა, ჟურნალისტური საქმიანობის შესრულებისას, მედიის წარმომადგენლების ე.წ. გზის ხელოვნურად გადაკეტვის საბაბით დაჯარიმებაა. „ბოლო 1 წლის განმავლობაში, 40-მდე ასეთი შემთხვევა დაფიქსირდა. აშკარაა, რომ საპროტესტო აქციებზე სამართალდამცველი სტრუქტურების მხრიდან ჟურნალისტური საქმიანობის, როგორც ფაქტის  უგულებელყოფა და პროფესიული მოვალეობის შესრულებისთვის მედიის წარმომადგენლების სოლიდური თანხებით დაჯარიმება, ჟურნალისტების დაშინებისა და სულ უფრო მეტად შევიწროების მიზანს ემსახურება, რათა საბოლო ჯამში, მათთვის დამატებითი ფინანსური წნეხი პროფესიაზე უარის თქმის წინაპირობა გახდეს“.

კომუნიკაციების კომისია აცხადებს, რომ ის, როგორც მაუწყებლობის სფეროს მარეგულირებელი „პასუხისმგებელია უზრუნველყოს მასობრივი ინფორმაციის საშუალებების თავისუფლება, გამოხატვის თავისუფლება, მედიაპლურალიზმი და სტაბილური მედიაგარემო საქართველოში“. 

ComCom-ი წერს, რომ „გაერთიანებული სამეფოს მიერ ორი ქართული ტელეკომპანიის წინააღმდეგ მიღებული გადაწყვეტილება, რომელთაგან ერთ-ერთი საქართველოში ყველაზე მაღალრეიტინგული მაუწყებელია, მიმართულია როგორც მასობრივი ინფორმაციის საშუალებებს შორის სამართლიანი კონკურენციის შეზღუდვისკენ, ისე ჟურნალისტების პროფესიული საქმიანობის შეფერხებისკენ, რამაც საფრთხე შეიძლება შეუქმნას მედიაპლურალიზმსა და სიტყვის თავისუფლებას ქვეყანაში. 

მასობრივი ინფორმაციის საშუალებების თავისუფლების შეზღუდვა მხოლოდ მტკიცებულების მაღალი სტანდარტით, განსაკუთრებული საფუძვლითა და საგანგებო კანონისმიერი პროცედურით არის დასაშვები. ამ ფონზე აღსანიშნავია, რომ საკითხებზე, რომლებიც ზემოაღნიშნულ გადაწყვეტილებებს დაედო საფუძვლად, კომისიაში საჩივარი არავის შემოუტანია“.

კომუნიკაციების კომისია აღნიშნავს, რომ „მაუწყებლობის შესახებ“ კანონი და „მაუწყებელთა ქცევის კოდექსი“, „რომლებიც პროგრამების შინაარსობრივი რეგულირების თვალსაზრისით გაერთიანებული სამეფოს კანონმდებლობას ეფუძნება და მედიის თავისუფლების საერთაშორისო სტანდარტებს შეესატყვისება“, მას მედიაში ობიექტურობის სტანდარტების დაცვის ვალდებულებას ანიჭებს. „რაც შეეხება მედიის შინაარსობრივი რეგულირების საკითხს, მიუხედავად კანონის არსებობისა, კომისია თითქმის ერთი წელია მხოლოდ საჩივრებზე რეაგირებს და თავად მაუწყებლების მიმართ ამავე კანონით ადმინისტრაციული წარმოება არ დაუწყია“.

ComCom-ის განცხადებით, ზემოაღნიშნულის გათვალისწინებითა და მედიაგარემოში არსებული გამოწვევების ანალიზის საფუძველზე, აუცილებლად მიაჩნიათ, „მომდევნო კვირიდან კომისიამ პრაქტიკაში აამოქმედოს „მაუწყებლობის შესახებ“ კანონითა და „მაუწყებელთა ქცევის კოდექსით“ დადგენილი ნორმები. რათა მაუწყებელთა ობიექტურობა სათანადო პროცედურის საფუძველზე და მაღალი სამართლებრივი სტანდარტით შეფასდეს. აქვე ხაზგასასმელია, რომ ეს გადაწყვეტილება ნებისმიერ შემთხვევაში უნდა მიღებულიყო სწორი და დაბალანსებული მედიაპრაქტიკის ჩამოყალიბებისათვის, დღევანდელმა მოცემულობამ კი საკითხი და მისი გადაწყვეტის აუცილებლობა კიდევ უფრო აქტუალური გახადა“.

24 თებერვალს, დიდმა ბრიტანეთმა სამთავრობო ტელეკომპანიები: „იმედი“ და POSTV დაასანქცირა. ორივე ტელევიზიის შემთხვევაში სანქციის მიზეზად რუსეთის მიერ უკრაინაში სრულმასშტაბიანი შეჭრის შესახებ განზრახ გავრცელებული შეცდომაში შემყვანი ინფორმაციებია დასახელებული. მათთვის დაკისრებული სანქციების სიაში კი წერია: აქტივების გაყინვა, სანქციები ტრასტის სერვისებისთვის, დირექტორის დისკვალიფიკაცია.

2025 წელს, „მაუწყებლობის შესახებ“ კანონში შესული ცვლილებებით, კომუნიკაციების კომისიას აქამდე თვითრეგულირების სფეროში მოქცეული საკითხების განხილვისა და მაუწყებლების დასანქცირების შესაძლებლობა მიეცა. მათ საფუძველზე ComCom-მა „უცხოური ძალისგან“ დაფინანსების მიღების შეწყვეტა დაავალა ტელე და რადიო მაუწყებლებს: „ფორმულა“, „ფორმულა მულტიმედია“, „ჟურნალისტთა კავშირი ხალხის ხმა“(რადიო „მარნეული), „რადიო-ტვ ნორი“ და „სისტემა გამა“. კომისიამ რადიო „მარნეული“ წერილობით გააფრთხილა ამერიკული ორგანიზაცია „დემოკრატიის ეროვნული ფონდიდან“ (NED) შემოსავლის სახით 32 541.60 ლარის მიღების გამოც. „ქართული ოცნების“ საჩივრების საფუძველზე კომუნიკაციების კომისიამ კრიტიკული ტელევიზიები სამართალდამრღვევებად ცნო „მიუკერძოებლობის პრინციპის დარღვევისთვისაც“. ამასთან, ComCom-მა  სამთავრობო ტელეკომპანია „იმედის“ წინააღმდეგ „საქართველოს მომავლის აკადემიის“ არცერთი (4) საჩივარი არ დააკმაყოფილა. „იმედის“ წინააღმდეგ კომისიამ არ დააკმაყოფილა „სამაუწყებლო კომპანია ჰერეთის“ საჩივარიც.

(ფოტო: „პუბლიკა“)

„პუბლიკის“ ინფორმაციით, გამოცემის ორი ჟურნალისტისთვის პროფესიულ საქმიანობაში ხელის შეშლის მუხლით პროკურატურამ ორ პირს, ლევან ზარდიაშვილსა და საბა მინდიაშვილს ბრალი წარუდგინა. 

„“პუბლიკას“ საქმის გამომძიებელმა უთხრა, რომ ბრალის წარდგენა მოხდა დღეს, 5 მარტს. შეკითხვაზე, როდის მიმართავენ სასამართლოს აღკვეთი ღონისძიების შეფარდებაზე – გვიპასუხა, რომ აღნიშნულს „პროკურორი გადაწყვეტს“. მისივე ცნობით, საქმეზე ბრალდებულები დაკავებულები არ არიან“, - წერს გამოცემა.

ლევან ზარდიაშვილსა და საბა მინდიაშვილს ბრალი სისხლის სამართლის კოდექსის 154-ე მუხლის პირველი ნაწილით აქვთ წარდგენილი, რაც ისჯება ჯარიმით ან საზოგადოებისათვის სასარგებლო შრომით ან გამასწორებელი სამუშაოთი ანდა შინაპატიმრობით ვადით ექვსი თვიდან ორ წლამდე.

საქმე ეხება 2025 წლის 8 სექტემბერს, თბილისში, კახა კალაძის საარჩევნო შტაბის წინ, „ქართული ოცნების“ მხარდამჭერებსა და პროევროპული აქციის მონაწილეებს შორის მიმდინარე დაპირისპირების გაშუქებისას, „პუბლიკის“ ჟურნალისტ ქეთო მიქაძეზე ძალადობისა და ტელეფონის წართმევის, ხოლო გამოცემის მეორე ჟურნალისტისთვის, ალექსანდრე ქეშელაშვილისთვის ჟურნალისტურ საქმიანობაში ხელის შეშლის ფაქტებს. ქეშელაშვილს „ქართული ოცნების“ შტაბთან დაპირისპირების გაშუქებისას, პირდაპირი ეთერის დროს ხელზე დაარტყეს, ტელეფონი გააგდებინეს და წაართვეს. მან ტელეფონი მოგვიანებით კოლეგის დახმარებით დაიბრუნა. 

იმავე ღამით, კალაძის შტაბთან მომხდარი დაპირისპირების გაშუქებისას საქმიანობაში ხელი ჯამში 6 ჟურნალისტს შეუშალეს. 

„ნეტგაზეთის“ ინფორმაციით, უზენაესმა სასამართლომ „ბათუმელები“/„ნეტგაზეთის“ დამფუძნებლისა და დირექტორის, მზია ამაღლობელის საჩივარი განსახილველად არ მიიღო. ეს ნიშნავს, რომ ძალაში დარჩა ქუთაისის სააპელაციო სასამართლოს გადაწყვეტილება და დავა დასრულებულია. მზია ამაღლობელის მიმართ სასამართლოების მიერ მიღებული გადაწყვეტილების საქართველოში გასაჩივრება აღარ შეიძლება.

როგორც გამოცემა წერს, გადაწყვეტილება ზეპირი მოსმენის გარეშე უზენაესი სასამართლოს სისხლის სამართლის საქმეთა პალატამ შემდეგი შემადგენლობით: ლევან თევზაძე, მერაბ გაბინაშვილი, მამუკა ვასაძე მიიღო. 

მზია ამაღლობელის ადვოკატები ქუთაისის სააპელაციო სასამართლოს განაჩენის გაუქმებას, მის ნაცვლად გამამართლებელი განაჩენის გამოტანასა და კონკრეტული საოქმო განჩინებების კანონიერების საკითხის განხილვას ითხოვდნენ. თავის მხრივ, უზენაესი სასამართლოსგან სააპელაციო სასამართლოს განაჩენში ცვლილებას და ამაღლობელისთვის ბრალის დამძიმებას ითხოვდა მზია ამაღლობელის საქმის პროკურორი თორნიკე გოგეშვილი. 

ვარლამ წიკლაურის, ახალციხის მერის, თანამდებობის პირის ქონებრივი მდგომარეობის შესახებ დეკლარაციაში „იმედში“ მუშაობა და შესაბამისად, არხიდან მიღებული შემოსავალი არ ჩანს. დეკლარაციაში შესაბამისი გრაფა - „საქართველოში ან სხვა ქვეყანაში, თქვენი, თქვენი ოჯახის წევრის მიერ შესრულებული ნებისმიერი ანაზღაურებადი სამუშაო, სამეწარმეო საქმიანობაში მონაწილეობის გარდა“ ცარიელია.

წიკლაურმა „მედიაჩეკერს“ უთხრა, რომ „იმედიდან“ მიღებული შემოსავალი საჯაროდ დეკლარაციაში ასახული მისი გადაწყვეტილებით არ არის და ამის შესაძლებლობას მას კანონი აძლევდა. მისი განმარტებით, დეკლარაციის შევსების დრო, მას შეეძლო მოენიშნა, რომ ამის გასაჯაროებას საჭიროდ არ თვლიდა: 

„ბუნებრივია, მე ყველა ველი შევსებული მაქვს, კანონის შესაბამისად. უბრალოდ ეს ჩემი ნება-სურვილი იყო, ჩემი წინა სამსახურში აღებული ხელფასი არ ყოფილიყო საჯარო და კანონი მე ამის შესაძლებლობას მაძლევს…ჩემი გადაწყვეტილება იყო, რომ არ იყო საჭირო, ჩემი ხელფასი ყოფილიყო საჯარო, რა ხელფასი მქონდა მანამდე, ვიდრე დავიკავებდი პოლიტიკურ თანამდებობას“.

ანტიკორუფციულ ბიუროში „მედიაჩეკერს“ დაუდასტურეს, რომ ვარლამ წიკლაურს მისი და მისი ოჯახის წევრების მიერ 2024 წლის განმავლობაში მიღებული შემოსავალი დეკლარაციაში მითითებული აქვს, თუმცა „კორუფციის წინააღმდეგ ბრძოლის შესახებ“ საქართველოს კანონის შესაბამისად, ეს ინფორმაცია საჯარო არ არის:

„“კორუფციის წინააღმდეგ ბრძოლის შესახებ“ საქართველოს კანონის მე-19 მუხლის შესაბამისად, საჯაროობას არ ექვემდებარება სადეკლარაციო თანამდებობაზე დანიშვნამდე და თანამდებობის დატოვების შემდეგ, ანაზღაურებადი სამუშაოდან მიღებული შემოსავალი.

ვარლამ წიკლაური თანამდებობაზე პირველად განწესდა 2025 წლის 29 ოქტომბერს, შესაბამისად დეკლარაციაში მითითებული აქვს მისი და მისი ოჯახის წევრების მიერ 2024 წლის განმავლობაში მიღებული შემოსავალი, თუმცა ზემოთ აღნიშნულის გამო, ეს ინფორმაცია საჯარო არ არის“.

ვარლამ წიკლაური ახალციხის მერობამდე, სამთავრობო ტელეკომპანია „იმედში“ წლების განმავლობაში მუშაობდა. ის 2025 წლის 4 ოქტომბრის მუნიციპალურ არჩევნებზე, რომელსაც ოპოზიციის დიდმა ნაწილმა ბოიკოტი გამოუცხადა, ახალციხის მერობის ერთადერთი კანდიდატი იყო და შესაბამისად, ხმების 100% აიღო. 

დეკლარაციის მიხედვით, წიკლაური ფლობს 2022 წელს, 185 000 დოლარად შეძენილ საცხოვრებელ სახლს თბილისში. ამავე წელს კი, მისმა მეუღლემ, ხატია კობერიძემ 165 000 ევროდ საცხოვრებელი სახლი ბელგიაში შეიძინა.

ვარლამ წიკლაურის სახელზეა 2025 წლის თებერვალში, 23 000 დოლარად ნაყიდი მსუბუქი ავტომანქანა JETOUR DASHING და 2024 წლის დეკემბერში, 7 000 დოლარად შეძენილი - CHERY, QQSUNDAES.

წიკლაურს აქვს 2, სამომხმარებლო და იპოთეკური სესხიც:

წიკლაურმა თანამდებობის პირის ქონებრივი მდგომარეობის დეკლარაცია 2025 წლის 29 დეკემბერს ჩააბარა. 

ზუგდიდის რაიონული სასამართლოს მოსამართლე შოთა ბიჭიამ ვიტალი გუგუჩია, რომელსაც პროპაგანდისტული ტელეკომპანია POSTV-ის ჟურნალისტისთვის, ნათია ბერიძისთვის პროფესიულ საქმიანობაში ხელშეშლასა და ძალადობას ედავებოდნენ, 25 თებერვალს, სრულად გაამართლა.

ვიტალი გუგუჩიას ერთ-ერთი ადვოკატის, რევაზ მიქაიას თქმით, სასამართლომ ობიექტური გადაწყვეტილება მიიღო და ყველაფერს გაკეთებენ იმისთვის, რომ ეს განაჩენი შემდეგ ინსტანციებშიც ძალაში დარჩეს:

„ბრალდებამ თავისი დასკვნითი სიტყვა წარმოადგინა, დაცვამ - თავისი და მოსამართლემ ადგილზე თათბირით მიიღო გადაწყვეტილება. სრულად გამოვიკვლიეთ დაცვის მხარის მტკიცებულებები, ასევე, ბრალდების მხარის მტკიცებულებები… სასამართლომ სრულიად ობიექტური გადაწყვეტილება მიიღო. მოლოდინი გვქონდა და დარწმუნებულებიც ვართ, რომ პროკურატურა გაასაჩივრებს სააპელაციოში და უზენაესშიც წავლენ. ჩვენ ყველაფერს გავაკეთებთ იმისთვის, რომ ეს განაჩენი დარჩეს ძალაში“, - განაცხადა მიქაიამ „მედიაჩეკერთან“ საუბრისას.

ვიტალი გუგუჩიას საქმე

2024 წლის 28 მაისს, მას შემდეგ, რაც „ქართული ოცნებამ“ რუსულ კანონზე პრეზიდენტის ვეტო დაძლია, პარლამენტის შენობიდან მომავალ დეპუტატებს გზად ერთ-ერთმა მოქალაქემ სიტყვიერი შეურაცხყოფა მიაყენა. ამ დროს „ხალხის ძალის“ წევრი, ვიქტორ ჯაფარიძე მანქანიდან გადმოვიდა, ახლოს მდებარე მაღაზიიდან ფორთოხალი აიღო და მოქალაქეს ესროლა.

მეორე დღეს, 29 მაისს ჯაფარიძე ამ მაღაზიაში ბოდიშის მოსახდელად მივიდა, თუმცა, ვიტალი გეგუჩიამ და მირანდა ჯობავამ დეპუტატს უთხრეს, რომ ბოდიში არა ფორთოხლის, არამედ მათი შვილების მომავლის გაყიდვისთვის ჰქონდა მოსახდელი. 31 მაისს კი, POSTV-ის გადამღები ჯგუფი სამეგრელოში წასულ ოჯახთან მივიდა, რასაც დაპირისპირება მოჰყვა. 

ამ მოვლენებიდან მალევე, 5 აგვისტოს, პროკურატურამ „გირჩი - მეტი თავისუფლების“ წევრს, ვიტალი გუგუჩიას ბრალი სისხლის სამართლის კოდექსის 126-ე მუხლის პირველი ნაწილით (ცემა, რამაც ფიზიკური ტკივილი გამოიწვია) და 154-ე მუხლის პირველი ნაწილით (ჟურნალისტისათვის პროფესიულ საქმიანობაში უკანონოდ ხელის შეშლა) წარუდგინა, რაც 1 წლამდე თავისუფლების აღკვეთას ითვალისწინებს. 

მეორე დღეს, 6 აგვისტოს კი, ზუგდიდის რაიონულმა სასამართლომ ვიტალი გუგუჩიას აღკვეთის ღონისძიების სახით 5 000-ლარიანი გირაო შეუფარდა. 

ბრიტანეთის მიერ დასანქცირებული პროპაგანდისტული ტელეკომპანია POSTV-ის 52%-იანი წილის მფლობელი პარლამენტარი, „ხალხის ძალის“ წევრი ვიქტორ ჯაფარიძეა. მან დასანქცირებამდე, 28 იანვარს, თავისი წილი მართვაში კასპის მერის ყოფილ მოადგილეს, ზაზა მარიდაშვილს გადასცა.

ჯაფარიძემ POSTV-ის საკონტროლო წილი 2022 წლის 3 ოქტომბერს ჯამში 520 000 ლარად იყიდა. დანარჩენ 24-24%-ს თემურ ჭარელაშვილი და შალვა რამიშვილი ფლობენ. 

საზოგადოებრივმა მაუწყებელმა ტექნიკისა და ტექნოლოგიების ოპერატორების ჯგუფის სტუდიის ოპერატორს გივი ჩიმაკაძეს სოციალურ ქსელში „მაუწყებლის რეპუტაციის შემლახავი“ განცხადების გავრცელების გამო საყვედური გამოუცხადა. 

11 თებერვლის ბრძანებით, არხის გენერალურმა დირექტორმა, თინათინ ბერძენიშვილმა გივი ჩიმაკაძე დისციპლინარული სანქციის მოქმედების პერიოდში (12 თვე) „ანალოგიური ან/და სხვა სახის დარღვევის შემთხვევაში“ სამუშაოდან შესაძლო გათავისუფლების შესახებაც გააფრთხილა.

დისციპლინარული სანქციის შესახებ ბრძანებით, „პირველი არხი“ მიიჩნევს, რომ ოპერატორმა შრომის შინა განაწესის გარდა, საზოგადოებრივი მაუწყებლის სოციალური ქსელების გამოყენების წესები და მაუწყებელთა ქცევის კოდექსი დაარღვია. 

გუშინ, 24 თებერვალს, საზოგადოებრივმა მაუწყებელმა „დამსაქმებლის რეპუტაციაშემლახავი, არასწორი ინფორმაციის საჯარო სივრცეში გავრცელების/გავრცელების ხელშეწყობის გამო“ თებერვლის ხელფასის 30% დაუქვითა ადამიანური რესურსების მართვის სამსახურის ადამიანური რესურსების პროექტების მენეჯერს, ქეთევან სინიცას.

საზოგადოებრივმა მაუწყებელმა მიმდინარე წლის 1 იანვრიდან სამსახურიდან გაათავისუფლა ტექნიკისა და ტექნოლოგიების საეთერო ჯგუფის პულტის რეჟისორი, კახა მელიქიძე. 

შარშან „პირველმა არხმა“ სამსახურიდან გაათავისუფლა ნინო ზაუტაშვილი, ვასილ ივანოვ-ჩიქოვანი; დახურა გადაცემები „რეალური სივრცე“, „ამ შაბათ-კვირას“ და მათი გუნდის წევრებს, რომლებმაც ახალ შეთავაზებაზე უარი თქვეს, ხელშეკრულებები შეუწყვიტა. ისინი „პირველი არხის“ სარედაქციო პოლიტიკას ღიად აკრიტიკებენ და პოლიტიკურ გავლენებზე საუბრობენ.

(ფოტო: მარიამ ნიკურაძე)

ჟურნალისტები, რომლებიც 2024 წლის ნოემბერ-დეკემბრის აქციებს აშუქებდნენ, ქიმიური ნივთიერებებით შესაძლო მოწამვლაზე საუბრობენ. რა სახის ჯანმრთელობის პრობლემები შეექმნათ მათ - „მედიაჩეკერი“ ამ მასალაში რამდენიმე ჟურნალისტის ამბავს გიყვებათ.

2024 წლის ნოემბერ-დეკემბრის პროევროპული აქციების დროს სამართალდამცველები მედიის წარმომადგენლების მიმართ განსაკუთრებული აგრესიით გამოირჩეოდნენ, მათ არასათანადოდ ეპყრობოდნენ და პროფესიულ საქმიანობაში ხელს უშლიდნენ. სიტყვიერი შეურაცხყოფის გარდა, ისინი ჟურნალისტების ნაწილს ფიზიკურადაც გაუსწორდნენ. მედიის წარმომადგენლები დაშავდნენ დემონსტრაციების დასაშლელად სხვადასხვა სახის სპეციალური საშუალების გამოყენების დროსაც. 

გასული წლის 1 დეკემბერს BBC-მ გამოაქვეყნა დოკუმენტური მასალა, რომლის მიხედვითაც, 2024 წლის ნოემბერ-დეკემბრის დემონსტრაციების დაშლის დროს ხელისუფლებამ, სავარაუდოდ, ტოქსიკური ქიმიური ნაერთი ბრომობენზილ ციანიდი („კამიტი“) გამოიყენა, რომელიც წყლის ჭავლში იყო შერეული. რამდენიმე დღეში სახელმწიფო უსაფრთხოების სამსახურმა წყლის ჭავლში ქიმიური ნივთიერების შერევის ფაქტი დაადასტურა, თუმცა განაცხადა, რომ ის არა - „კამიტი“, არამედ „ქლორობენზილიდინ მალონონიტრილი“ იყო. 

„TV პირველის“ ჟურნალისტი ანა მდივანი „მედიაჩეკერთან“ საუბრისას იხსენებს, რომ 2024 წლის 28-29 ნოემბრის ღამეს, ქაშვეთის ტაძარის მოპირდაპირე მხარეს, სასწრაფო სამედიცინო დახმარების მანქანასთან იდგა და სხვადასხვა დაზიანების მქონე მოქალაქეებს წერდა, როდესაც წყლის ჭავლი მოხვდა და ისე ცუდად გახდა, რომ პროფესიული საქმიანობის გაგრძელება ვეღარ შეძლო.

„ზოგადად ალერგიული ადამიანი ვარ და მით უმეტეს, ეს რაღაც უბედურება რომ შემესხა თვალებში და გადაყლაპვაც მომიწია, ძალიან ცუდად გავხდი. იქვე იყო სასწრაფო დახმარების მანქანა. გამაშორეს ამ ტერიტორიას და თითქმის ნახევარი საათი სასწრაფო დახმარების მანქანაში ვიყავი. იმ დღეს არა, მაგრამ მეორე დღეს უკვე საავადმყოფოშიც მომიწია წასვლა. რამდენიმე გადასხმა გამიკეთეს. ამ ალერგიულმა ფონმა კიდევ უფრო გამირთულა სიტუაცია. ხელებსა და ფეხებზე, ყველგან, სადაც წყლის ჭავლი მომხვდა, გამონაყარი მქონდა.

სხვებსაც უსაუბრიათ ამ თემაზე, ეს ჭავლი მხოლოდ წყლის არ იყო, თორემ ის ასეთ გავლენას ვერ მოახდენდა. თვალებიდან ვერ ვიხედებოდი და სუნთქვა მიჭირდა. მე არ ვიცი, ეს რა ნივთიერება იყო, მაგრამ წყალში აშკარად რაღაც ისეთი იყო შერეული, რომ ადამიანს სუნთქვის საშუალებას აღარ აძლევდა“, - გვიყვება ანა.

სუნთქვის პრობლემები დღემდე შემორჩა გიორგი ბარამიძეს, „სტუდია მონიტორის“ ყოფილ ოპერატორს: „წინ ვიდექი „სტუდია მონიტორის“ ჟურნალისტებთან ერთად და წყლის ჭავლიც მოგვხვდა. ექიმს მალევე მივმართე. სუნთქვის უკმარისობა და სასუნთქ გზებთან დაკავშირებული პრობლემები მქონდა. მან მითხრა, რომ შესაძლოა, ამის ბრალიც ყოფილიყო. სუნთქვის პრობლემები ახლაც მაქვს, მაგრამ მაშინ უფრო გამოხატული იყო“. 

მიუხედავად იმისა, რომ წყლის ჭავლი დამიზნებით არ მოხვედრია, ცხვირიდან სისხლიან გამონადენს ქიმიური ნივთიერებებით შესაძლო ინტოქსიკაციას უკავშირებს ჟურნალისტი გივი ავალიანი, რომელიც მაშინ „ნეტგაზეთში“ მუშაობდა.

„ძალიან მკაფიოდ მახსოვს, სახლში რომ მივედი, ქურთუკი და ტანსაცმელი, რაც რუსთაველზე, აქციის გაშუქებისას მეცვა, აივანზე დავტოვე, ისეთი მძაფრი და არასასიამოვნო სუნი ჰქონდა. მეორე დილითაც, როცა ისინი ავიღე, ალერგიული ცემინება დამაწყებინა. ჯერ კიდევ გაჟღენთილი იყო ამ რაღაც ქიმიური ნივთიერებით. რაღაც პერიოდი, დაახლოებით 2 კვირა, თუ მეტია არა, დილაობით ცხვირიდან სისხლის გამონადენი მქონდა, რასაც აქციაზე ინტოქსიკაციას ვუკავშირებ. მეგობარი ექიმის რჩევით, მალამოს ვიყენებდი, თუმცა მაინც დიდხანს გამყვა. 3-4 თვის შემდეგაც, სისხლის გამონაჟონი ზოგჯერ ისევ მქონდა“. 

გივი ჩვენთან საუბრისას აღნიშნავს, რომ მაშინ სამართალდამცველები არა მარტო აქციის მონაწილეებს, მედიის წარმომადგენლებსაც ერჩოდნენ: „ჟურნალისტებს, ვინც მახსოვს, მათ შორის მეც, სპეციალური დამცავი აღჭურვილობა გვქონდა, რამდენიმე ადგილას გვეწერა, რომ პრესა ვიყავით, მაგრამ პრინციპში, ეს დამცავი სულაც არ ყოფილა, პირიქით სამიზნედ გვაქცევდა“.

ავალიანი იხსენებს, რომ 28-29 ნოემბრის ღამით, როცა არაერთი ჟურნალისტი დაშავდა, ერთ-ერთმა სპეცრაზმელმა მას გამიზნულად წიწაკის სპრეიც შეასხა: 

„ჩემი განცდით სპეციალურად, ერთ-ერთმა სპეცრაზმელმა შემომასხა წიწაკის სპრეი. იმ დღეს, რაც მახსოვს, დაშავდა მარიამ ნიკურაძეც. გადაღებული მაქვს „რუსთავი 2“-ის ჟურნალისტის დაშავებაც, რაც წყლის ჭავლმა გამოიწვია. დისტანციიდან შეესხათ წყლის მასა, რომელსაც სპეციალური მანქანებით აქციის მონაწილეების დასაშლელად იყენებდნენ“. 

რამდენიმე თვის მანძილზე ცხვირიდან სისხლდენა ჰქონდა OC Media-ს თანადამფუძნებელსა და ჟურნალისტს, მარიამ ნიკურაძესაც. მარიამი ერთ-ერთია იმ ჟურნალისტებს შორის, ვისაც 2024 წლის ნოემბერ-დეკემბრის აქციების გაშუქებისას პროფესიულ საქმიანობაში ხელი არაერთხელ შეუშალეს, დაუზიანეს სამუშაო ტექნიკაც.

„პირველი დარბევის დღეს, პარლამენტთან რომ მივედი, ჯერ ჭიჭინაძის მხარეს ვიღებდი, შადრევანთან რომ შემაღლებული ადგილია, იქიდან. წყლის ჭავლის გამოყენება რომ დაიწყეს, ჯერ ოპერატორებს მოხვდათ, რომლებიც ასევე, შემაღლებულ ადგილას იდგნენ, ოღონდ უფრო დაბლა. მათი გადაღება მინდოდა, მოვტრიალდი და ეს ჭავლი მომხვდა მეც და ჩამომაგდო. გამიტყდა კამერა, გავილუმპე, მსუბუქად დავზიანდი, თუმცა სხვა სიმპტომები არ მქონია. იმ წყლის ჭავლში არაფერი იყო შერეული. 

მართალია კამერა აღარ მუშაობდა, მაგრამ ტელეფონით გავაგრძელე მუშაობა და რაღაც მომენტში წყლის ჭავლის მანქანები და რობოკოპები წამოვიდნენ რუსთაველის მხარეს, ზუსტად პარლამენტის წინ, სადაც მე ვმუშაობდი. იმ დღეს არქივს ვუყურებდი და რამდენიმე ვიდეოც კი მაქვს გადაღებული, როცა არაფერი არ არის, იგრძნობა რომ ჩვეულებრივი წყალია და მერე, რაღაც მომენტში ისევ ვიღებ, რუსთაველზე ვარ და ჭავლი პირდაპირ არც კი მხვდება, მხოლოდ - შხეფები, რომელიც უკვე თეთრი ფერისაა, ვიდეოშიც ჩანს და იმდენად ცუდად ვხდები, ვიგინები კიდეც. დავკარგე ორიენტაციის უნარი, ვერც ვინძრეოდი, იმდენად ცუდად ვიყავი. ეს იყო სახის, ყელის ძალიან მწვავე წვა, ვეღარ ვსუნთქავდი, თვალებს საერთოდ ვერ ვახელდი, საით უნდა წავსულიყავი, მაგასაც ვერ ვხვდებოდი.

თავიდან შადრევანთან, შემაღლებული ადგილიდან რომ ჩამომაგდეს, დამცავი აღჭურვილობის ნაწილი დავკარგე, ამიტომ მთლიანად სახე დამისველდა, რამაც გამოიწვია ეს წვა“, - გვიყვება ნიკურაძე და საუბრისას იხსენებს, რომ მეგობარმა ქაშვეთის ტაძართან მდგარ სასწრაფო სამედიცინო დახმარების მანქანასთან მიიყვანა, სადაც პირველადი დახმარება გაუწიეს.

ჟურნალისტის თქმით, მეორე დღიდან ცხვირიდან სისხლდენა დაეწყო, რამაც ყოველდღიური სახე მიიღო და დაახლოებით 4-5 თვე გაგრძელდა: „ამას ყოველთვის წყლის ჭავლით მოწამვლას ვუკავშირებდი. რამდენჯერ მოვხვედრილვარ დარბევაზე, თუნდაც 20 ივნისს, ცესკოთანაც, სხვათა შორის, როგორც მახსოვს, წყალში რაღაც ნივთიერება გარეული იქაც იყო, თუმცა ნაკლებად, აქამდე ასეთი მძიმე ეფექტი კი არაფერს არ ჰქონია: არც წყალს, არც გაზს და არაფერს“. 

2024 წლის ნოემბერ-დეკემბრიდან მოყოლებული ცხვირიდან სისხლიანი გამონადენი აქვს ფოტოგრაფ გოგიტა ბუხაიძესაც: „აქციებს ყოველდღე ვიღებდი. ვიდექი ხალხსა და სპეცრაზმს შორის. მაშინ კარგი რესპირატორი არ მქონდა და უბრალო, კოვიდის დროს რომ სამედიცინო პირბადეებს ვიყენებდით, მსგავსი მეკეთა. გაზით გავიბერე, მიხაროდა, არაფერს მიშვება-მეთქი და თურმე მიშვებოდა. ერთ დღეს, მოსწავლე-ახალგაზრდობის სასახლესა და პარლამენტს შორის, წყლის ჭავლიც მომხვდა. მაშინ ამას ვერ ვხვდებოდი. ხალხმა ამაზე საუბარი რომ დაიწყო, მეც მერე დავაკავშირე, რადგან ეს სისხლდენაც არ მთავრდებოდა და სხვებსაც იგივე სიმპტომები ჰქონდათ“. 

ბუხაიძემ გაგვიზიარა ის ფოტოებიც, რომელთა გადაღების დროსაც მოხვდა წყლის ჭავლი

ჟურნალისტი ქეთი თუთბერიძე, რომელიც მაშინ „სტუდია მონიტორში“ მუშაობდა, გვიყვება, რომ 2024 წლის 30 ნოემბრიდან 4 დეკემბრის ჩათვლით, რუსთაველის გამზირზე პროფესიულ მოვალეობას ყოველ ღამე ასრულებდა, რა დროსაც არაერთხელ მოყვა წყლის ჭავლშიც და ფეხთან „გაზის კაფსულაც“ აუფეთქდა.

„ჯოჯოხეთურად მახსოვს, მერე როგორ ცუდად ვიყავი. 2 დეკემბერს, რუსთაველის გამზირიდანვე მოვხვდი სასწრაფო სამედიცინო დახმარების მანქანაში, სატურაცია გამისინჯეს. მაშინ სტატუსიც დავწერე, რომ ჩემი ვარაუდით, ეს არ არის ის ნივთიერება, რითაც აქამდე გვწამლავდნენ-მეთქი. მახსოვს 2023 წლის მარტის აქციები, 2024 წლის გაზაფხულის აქციები და ეს აშკარაც რაღაც სხვა ნივთიერება იყო“. 

ქეთის თქმით, ამ მოვლენებიდან სუნთქვის პრობლემები მალევე დაეწყო. რამდენჯერმე ბრადიკარდიის შეტევაც (გულისცემის შენელება) ჰქონდა, რის გამოც საავადმყოფოშიც მოხვდა. გარდა ამისა, რამდენიმე თვის განმავლობაში თავის მარცხენა მხარეს, პერიოდულად ყრუ ტკივილებიც ჰქონდა:

„ფარისებრი ჯირკვლის პრობლემა მაქვს 15 წელია, მაგრამ არა რთულად. მაგის გამო ცვლილება სისხლის საერთო ანალიზში არასდროს მქონია. არც კოვიდი რომ გადავიტანე მაშინ, არც ფილტვების ანთების დროს და არც მაშინ, ორი ურთულესი ოპერაცია რომ გავიკეთე. თუ 2023 წლის ბოლოს გაკეთებულ ანალიზში ყველაფერი რიგზე მქონდა, დარბევების შემდეგ ჩატარებულ სისხლის ანალიზში ზედა ზღვარამდე იყო ასული თრომბოციტების მაჩვენებელი, რაც მთელი ცხოვრება ნორმაში მქონდა. ასევე, გამიუარესდა ძლივს მოწესრიგებული TSH-ის ანალიზის შედეგი, გაიზარდა ლიმფური ჯირკვლები“.

წყლის ჭავლში შერეული ნივთიერებებით დაზიანებული მოქალაქეების სახელით წინა კვირაში სამართალწარმოება დაიწყო „საქართველოს ახალგაზრდა იურისტთა ასოციაციამ“. საიამ წყლის ჭავლში ქიმიური ნივთიერებების შერევასა და მასთან დაკავშირებულ საფრთხეებზე, საჯარო წყაროებში გავრცელებულ ინფორმაციასა და აქციის მონაწილეთა ინტერვიუებზე დაყრდნობით, 2025 წლის დეკემბრამდეც არაერთხელ ისაუბრა.  ვრცლად გაეცანით კვლევას - „ადამიანის უფლებების კრიზისი საქართველოში 2024 წლის საპარლამენტო არჩევნების შემდგომ“. 

საზოგადოებრივმა მაუწყებელმა ადამიანური რესურსების მართვის სამსახურის ადამიანური რესურსების პროექტების მენეჯერს, ქეთევან სინიცას „დამსაქმებლის რეპუტაციაშემლახავი, არასწორი ინფორმაციის საჯარო სივრცეში გავრცელების/გავრცელების ხელშეწყობის გამო“ თებერვლის თვის შრომის ანაზღაურებიდან ერთჯერადად 30% დაუქვითა.

თინათინ ბერძენიშვილმა ქეთევან სინიცა დისციპლინარული სანქციის მოქმედების პერიოდში (12 თვე) „ანალოგიური ან/და სხვა სახის დარღვევის შემთხვევაში“ სამუშაოდან შესაძლო გათავისუფლების შესახებაც გააფრთხილა.

ბერძენიშვილი თანამშრომელს განუმარტავს, რომ „იგი ვალდებულია დაიცვას საკანონმდებლო და კანონქვემდებარე, ასევე, შიდა ლოკალური აქტებითა და შრომის ხელშეკრულებით განსაზღვრული ვალდებულებები და თავი შეიკავოს ისეთი აქტივობისგან (მათ შორის ინტერნეტ პლატფორმებზე), რომელმაც შესაძლოა ზიანი (მათ შორის რეპუტაციული) მიაყენოს დამსაქმებელს, ან შექმნას ასეთი ზიანის მიყენების საფრთხე“.

„პირველი არხმა“ სინიცას დისციპლინარული სანქცია საზოგადოებრივი მაუწყებლიდან გათავისუფლებული თანამშრომლის, კახა მელიქიძის ფეისბუკ პოსტის გაზიარებით, ხელშეკრულებისა და შრომის შინა განაწესის გარდა, საზოგადოებრივი მაუწყებლის „სოციალური ქსელების გამოყენების წესებისა“ და მაუწყებელთა ქცევის კოდექსის მუხლების დარღვევის გამო დაუწესა.

საზოგადოებრივმა მაუწყებელმა ტექნიკისა და ტექნოლოგიების საეთერო ჯგუფის პულტის რეჟისორი, კახა მელიქიძე სამსახურიდან 2026 წლის 1 იანვრიდან გაათავისუფლა.

შარშან საზოგადოებრივმა მაუწყებელმა სამსახურიდან გაათავისუფლა ნინო ზაუტაშვილი, ვასილ ივანოვ-ჩიქოვანი; დახურა გადაცემები „რეალური სივრცე“, „ამ შაბათ-კვირას“ და მათი გუნდის წევრებს, რომლებმაც ახალ შეთავაზებაზე უარი თქვეს, ხელშეკრულებები შეუწყვიტა. ისინი „პირველი არხის“ სარედაქციო პოლიტიკას ღიად აკრიტიკებდნენ და პოლიტიკურ გავლენებზე საუბრობდნენ.

სამთავრობო ტელეკომპანია „იმედის“ 5-წევრიან სამეთვალყურეო საბჭოში ახლა მხოლოდ ერთი წევრი, ამავე არხის დირექტორი მაკა ლომიძეა. ლომიძე „იმედის“ მფლობელი კომპანიის - „ჯორჯიან მედია პროდაქშენ გრუპის“ დირექტორიცაა და მის 10%-საც ფლობს.

დღეს, დიდი ბრიტანეთის მიერ „იმედის“ დასანქცირებიდან მეორე დღეს, „იმედის“ სამეთვალყურეო საბჭოს თავმჯდომარემ, ირაკლი რუხაძემ და საბჭოს სამმა წევრმა: დავით შონიამ, გიორგი კალანდარიშვილმა და გიორგი ბახტაძე საჯარო რეესტრის ეროვნულ სააგენტოს განცხადებებით მიმართეს, სამეთვალყურეო საბჭოს წევრის პოზიციების დატოვების შესახებ აცნობეს და არხის რეგისტრირებულ მონაცემებში ცვლილებების დაჩქარებული წესით ასახვა სთხოვეს. 

საჯარო რეესტრში წარდგენილი დოკუმენტების მიხედვით, გადადგომის შესახებ მათი იდენტური განცხადებები 6 თებერვლით თარიღდება. ისინი ამ განცხადებებში „იმედის“ გენერალურ დირექტორს სწერენ, რომ „კომპანიის მფლობელობის ცვლილებასთან დაკავშირებით“, პირადი განცხადების საფუძველზე სამეთვალყურეო საბჭოს წევრის პოზიციის დატოვების გადაწყვეტილება მიიღეს. 

რეესტრმა სამთავრობო ტელეკომპანია „იმედის“ სამეთვალყურეო საბჭოდან თავმჯდომარის, ირაკლი რუხაძისა და საბჭოს სამი წევრის: დავით შონიას, გიორგი კალანდარიშვილისა და გიორგი ბახტაძის წასვლა რამდენიმე საათში დაარეგისტრირა. 

რა მოხდა 6 თებერვალს? 

„ჩემს პარტნიორებთან გრძელი და დაძაბული კონსულტაციების შემდეგ, გადავწყვიტეთ, რომ დღევანდელ სიტუაციაში, ყველაზე გონივრული გამოსავალი არის ჩვენი „იმედთან“ დამშვიდობება“, - ამ დღეს „იმედმა“ „ჰანიველ პარტნერსის“ ტელეკომპანიიდან გასვლის შესახებ ირაკლი რუხაძის განცხადება გაავრცელა. რუხაძე წერდა, რომ ახალი მფლობელის პოვნა, „რომელიც ერთი მხრივ ითავებდა „იმედის“ დაფინანსებას საბიუჯეტო დანაკლისის შემთხვევებში და ასევე დათანხმდებოდა, შეენერჩუნებინა არსებული მენეჯმენტის აქტიური როლი სარედაქციო პოლიტიკაში“ ადვილი არ იყო. 

„იმედის“ მფლობელი კომპანია - „ჯორჯიან მედია პროდაქშენ გრუპი“ სიმბოლურ ფასად, 1000 ლარად ილია მიქელაიშვილის კომპანიამ, „პრაიმ მედია გლობალმა“ 30 იანვარს იყიდა და იკისრა ვალდებულება, რომ მის 50%-იან წილს ტელეკომპანიის წარმომადგენლებს გადასცემდა. „ჯორჯიან მედია პროდაქშენ გრუპის“ 10-10%-იანი წილი ნათია სონღულაშვილმა, ირაკლი ჩიხლაძემ, მარიამ ლომიძემ, მაია ჩიგოშვილმა და ვასილ კალანდარიშვილმა სიმბოლურ ფასად, 100-100 ლარად 10 თებერვალს იყიდეს. „ჯორჯიან მედია პროდაქშენ გრუპი“ ფლობს კიდევ 8 სხვა კომპანიას, მათ შორის, „რადიო იმედსა“ და GDS TV-ის. 

ნასყიდობის ხელშეკრულებით, ილია მიქელაიშვილის კომპანიამ იკისრა ვალდებულებაც, რომ „ჯორჯიან მედია პროდაქშენ გრუპის“ შვილობილი კომპანიების ეთერი არ იქნება გამოყენებული/მიმართული გამყიდველისა და მასთან დაკავშირებული პირების/კომპანიების საწინააღმდეგოდ. 

----------------------------------------

გუშინ „იმედი“, პროპაგანდისტულ ტელეკომპანია POSTV-სთან ერთად, დიდმა ბრიტანეთმა დაასანქცირა. ორივე ტელევიზიის შემთხვევაში სანქციის მიზეზად რუსეთის მიერ უკრაინაში სრულმასშტაბიანი შეჭრის შესახებ განზრახ გავრცელებული შეცდომაში შემყვანი ინფორმაციებია დასახელებული. მათთვის დაკისრებული სანქციების სიაში კი წერია: აქტივების გაყინვა, სანქციები ტრასტის სერვისებისთვის, დირექტორის დისკვალიფიკაცია.

POSTV-ის 52%-იანი წილის მფლობელი პარლამენტარი, „ხალხის ძალის“ წევრი ვიქტორ ჯაფარიძეა. მან დასანქცირებამდე, 28 იანვარს, თავისი წილი მართვაში კასპის მერის ყოფილ მოადგილეს, ზაზა მარიდაშვილს გადასცა. ჯაფარიძემ POSTV-ის საკონტროლო წილი 2022 წლის 3 ოქტომბერს ჯამში 520 000 ლარად იყიდა. არხის დანარჩენ 24-24%-იან წილებს თემურ ჭარელაშვილი და შალვა რამიშვილი ფლობენ. 

დიდმა ბრიტანეთმა ქართული სამთავრობო ტელევიზიები: POSTV  და „იმედი“ დაასანქცირა. ორივე ტელევიზიის შემთხვევაში სანქციის მიზეზად რუსეთის მიერ უკრაინაში სრულმასშტაბიანი შეჭრის შესახებ განზრახ გავრცელებული შეცდომაში შემყვანი ინფორმაციებია დასახელებული:

„ის ავრცელებს და განზრახ ავრცელებდა შეცდომაში შემყვან ინფორმაციას რუსეთის მიერ უკრაინაში სრულმასშტაბიანი შეჭრის შესახებ თავის აუდიტორიაში, რომელიც ძირითადად საქართველოში იმყოფება, რაც მხარს უჭერს ან ხელს უწყობს პოლიტიკას ან ქმედებას, რომელიც დესტაბილიზაციას ახდენს უკრაინაში ან ძირს უთხრის ან საფრთხეს უქმნის უკრაინის ტერიტორიულ მთლიანობას, სუვერენიტეტს ან დამოუკიდებლობას. 

კერძოდ, ის რეგულარულად ავრცელებს შინაარსს, რომ უკრაინის მთავრობა და პრეზიდენტი ზელენსკი არალეგიტიმურია, უკრაინა არის დასავლეთის „მარიონეტი“, უკრაინა არის კორუმპირებული ქვეყანა და რომ უკრაინა და დასავლეთი ცდილობენ საქართველოს დესტაბილიზაციას“, - წერია ბრიტანეთის საგარეო საქმეთა, თანამეგობრობისა და განვითარების ოფისის დოკუმენტში.

დღეს, უკრაინაში ომის დაწყებიდან ზუსტად ოთხი წლის შემდეგ  ბრიტანეთის საგარეო საქმეთა, თანამეგობრობისა და განვითარების ოფისმა რუსეთისთვის დაწესებული სანქციების სია განაახლა და მას 300-მდე სუბიექტი, მათ შორის ქართული პროსამთავრობო ტელევიზიები დაამატა.

POSTV-სა  და „იმედისთვის“ დაკისრებული სანქციების სიაში წერია: აქტივების გაყინვა, სანქციები ტრასტის სერვისებისთვის, დირექტორის დისკვალიფიკაცია.

POSTV-ის 24%-24%-იანი წილის მფლობელები თემურ ჭარელაშვილი და შალვა რამიშვილი არიან. 52%-იან წილს კი „ხალხის ძალის“ წევრი ვიქტორ ჯაფარიძე ფლობს. ჯაფარიძემ მიმდინარე წლის იანვარში თავისი წილის მმართველად ზაზა მარიდაშვილი დანიშნა.