კატეგორია: ეთიკა
12 მაისს გვიან ღამით თბილისის ღამის კლუბებში სპეცოპერაცია ჩატარდა.
როგორც შინაგან საქმეთა სამინისტრომ განმარტა, სპეცოპერაციის მიზანი
ნარკოტიკების გასაღებასთან ბრძოლა იყო.იქ მყოფ მოქალაქეებს კლუბის
ტერიტორია დაატოვებინეს, რასაც პროტესტი მოჰყვა. პოლიციასა და
მოქალაქეებს შორის მოხდა შეხლა–შემოხლა, დააკავეს რამდენიმე ადამიანი.
კლუბების ტერიტორიაზე მოვლენები ფაქტობრივად მთელი ღამის განმავლობაში
ვითარდებოდა.
შემთხვევა მედიის ყურადღების ცენტრში მაშინვე მოქეცა და ამბის
მასშტაბურობიდან გამომდინარე მოვლენათა განვითარება პირდაპირ ეთერში
გადაიცემოდა. გამონაკლისი აღმოჩნდა საზოგადოებრივი მაუწყებელი და
ტელეიმედი. მაშინ, როდესაც ამბავი დაახლოებით 1:00 საათზე დაიწყო,
საზოგადოებრივი მაუწყებელი პირდაპირ ეთერში შევიდა 3:38 საათზე,
ტელეიმედს კი მაყურებლისთვის მთელი ღამის განმავლობაში არ უცნობებია
მომხდარის შესახებ.
რაც შეეხება ამ ორი მაუწყებლის ვებსაიტებსა და ფეისბუკის
გვერდებს,საზოგადოებრივმა მაუწყებელმა სოციალური ქსელისა და ვებსაიტის
მეშვეობით ინტერნეტ აუდიტორიას მომხდარის შესახებ ოპერატიულად ამცნო.
ტელეიმედმა კი ვებსაიტზე ინფორმაცია განათავსა და მოგვიანებით
ფეიბუკშიც პირდაპირი ეთერის რეჟიმში გაუშვა რა ხდებოდა კლუბების
მიმდებარე ტერიტორიაზე.
კატეგორია: ეთიკა
პანკისის სპეცოპერაციის შედეგად გარდაცვლილი თემირლან მაჩალიკაშვილის
ოჯახის ადვოკატმა, მარიამ კუბლაშვილმა 27 აპრილს ექსპერტიზის შედეგები
გაასაჯაროვა. ადვოკატის თქმით, ოთხი თვის წინ, პანკისში ჩატარებული
სპეცოპერაციის დროს, თემირლან მაჩალიკაშვილის ოჯახიდან ამოღებულ
ხელყუმბარაზე გარდაცვლილის თითის ანაბეჭდები და დნმ-ის კვალი არ
აღმოჩნდა.
სახელმწიფო უსაფრთხოების სამსახურის ინფორმაციით, 26 დეკემბერს,
პანკისში ჩატარებული სპეცოპერაციის დროს თემირლან მაჩალიკაშვილმა
ხელყუმბარის გამოყენება სცადა, რის გამოც სპეცრაზმელებმა მას ესროლეს.
მაჩალიკაშვილმა თავის არეში ა სასიკვდილო დაზიანება მიიღო და
რამდენიმე დღეში გარდაიცვალა. ოჯახი ამტკიცებდა, რომ მის შვილს
ხელყუმბარა არ ეჭირა ხელში.
მაჩალიკაშვილების ადვოკატის მიერ გავრცელებული ექპერტიზის დასკვნის
შინაარსი ტელეკომპანიების "რუსთავი 2"-ისა და "TV პირველის" მთავარ
საინფორმაციო გამოშვებაში მოხვდა, საზოგადოებრივმა მაუწყებელმა და
"იმედმა" კი არ გააშუქეს.
კატეგორია: ეთიკა
23 აპრილს, თბილისის საქალაქო სასამართლომ სერგო თეთრაძის წამების
საქმეზე თავდაცვის ყოფილი მინისტრი ბაჩო ახალაია დამნაშავედ სცნო და 9
წელი მიუსაჯა. მასთან ერთად, 4 წლით თავისუფლების აღკვეთა მიესაჯა მის
მოადგილეს, ბრალდებულ ნიკოლოზ ძიმცეიშვილს.
ეს თემა გაშუქდა საზოგადოებრივი მაუწყებლის, იმედის და TV პირველის
დღის მთავარ საინფორმაციო გამოშვებებში, თუმცა სიახლე ვერ მოხვდა
9-საათიან “კურიერში”.
კატეგორია: ეთიკა
რუსეთის სახელმწიფო კომპანია “გაზპრომ მედიის” შვილობილი NTV Plus
საქართველოს ტელებაზარზე შემოდის. NTV Plus-ის პარტნიორი საქართველოში
შპს „მედია ჯგუფია“. ეს უკანასკნელი 2017 წლის სექტემბერში
დაფუძნებული კომპანიაა, რომლის 50%–ს დავით ნაკაშიძე ფლობს, 50%–ს კი
– გულნარა ხეჩოშვილი. აქვე აღსანიშნავია ისიც, რომ 10 აპრილს
სახელმწიფო უსაფრთხოების სამსახურმა პარლამენტში ანგარიში
წარადგინა.
ანგარიშის მიხედვით, საკუთარი ამოცანების შესასრულებლად, სხვადასხვა
ქვეყნების სპეცსამსახურები აქტიურად იყენებენ პროპაგანდისტულ
მედიაკამპანიას.
NTV Plus-ის საქართველოს ტელებაზარზე შემოსვლა მაუწყებლებისთვის
ერთ-ერთი ძირითად თემა იყო, რომელიც მთავარ საინფორმაციო გამოშვებებში
გააშუქეს. გამონაკლისი აღმოჩნდა ტელეკომპანია „იმედი“, - საკითხი
„ქრონიკის“ 20:00 საათიან გამოშვებაში ვერ მოხვდა. "იმედს"ეს
თემა არც დღის სხვა გამოშვებებში გაუშუქებია.
კატეგორია: ეთიკა
2018 წლის 14 მარტს, გარემოს ეროვნული სააგენტოს ხელმძღვანელმა თამარ
ბაგრატიამ თანამდებობა დატოვა. წასვლის მიზეზად მან ხელმძღვანელთან
პრინციპულ საკითხებზე შეუთანხმებლობა დაასახელა. 15 მარტს ბაგრატიამ
პრესკონფერენაცია გამართა და თანამდებობიდან წასვლის მიზეზები
დეტალურად განმარტა. მისი თქმით, რეორგანიზაციის პროცესში, გარემოს
დაცვისა და სოფლის მეურნეობის მინისტრის მოადგილე ნინო თანდილაშვილი
სააგენტოში არსებულ ვაკანტურ თანამდებობაზე კონკრეტული პირის უპირობო
დანიშვნას მოითხოვდა. რაზეც ბაგრატიამ, მისივე თქმით, უარი განაცხადა
და თანამდებობა დატოვა. სხვა არხებისგან განსხვავებით, ეს ამბავი 15
მარტის 9 საათიან "მოამბეში" ვერ მოხვდა.
კატეგორია: ეთიკა
23 თებერვალს ifact-ის გამომძიებელმა ჟურნალისტებმა “თბილისი
პანორამას” გოლფის მოედანის მშენებლობაზე მუშის გარდაცვალების შესახებ
ინფორმაცია გაავრცელეს. პანორამა თბილისი საქართველოს ყოფილ
პრემიერ-მინისტრთან და მმართველი პარტიის დამფუძნებელთან, ბიძინა
ივანიშვილთან არის დაკავშირებული.
შემთხვევა 21 იანვარს მოხდა, თუმცა ამ დრომდე მუშის გარდაცვალების
შესახებ არ გამხდარა ცნობილი. 23 თებერვალს კი ეს ინფორმაცია
დაადასტურა შინაგან საქმეთა სამინისტრომაც.
მუშის გარდაცვალების შესახებ ინფორმაცია “რუსთავი 2-სა” და “TV
პირველისგან” განსხვავებით, არ მოხვდა ტელეკომპანია “იმედის” 23
თებერვლის მთავარ საინფორმაციო გამოშვებაში, საზოგადოებრივ
მაუწყებელზე კი მთავარი საინფორმაციო გამოშვება არ გასულა.
კატეგორია: ეთიკა
20 თებერვალს ტელეკომპანია “იბერიის” საინფორმაციო სამსახურის უფროსმა
პირდაპირ ეთერში განაცხადა, რომ ფინანსური პრობლემები უჩნდება
ხელისუფლების მიმართ კრიტიკულად განწყობილ ტელეკომპანია
“იბერიასაც”.
“არხზე მომუშავე ჟურნალისტები ვვარაუდობთ, რომ ეს ხდება
მიზანმიმართულად იმისთვის, რომ ტელეკომპანიამ ვეღარ გააგრძელოს
მაუწყებლობა თავისუფალი სარედაქციო პოლიტიკით”, - განაცხადა არხის
საინფორმაციო სამსახურის უფროსმა.
ეს თემა “იმედის”, “რუსთავი 2-სა” და “TV პირველისგან” განსხვავებით,
არ მოხვდა საზოგადოებრივი მაუწყებლის მთავარ საინფორმაციო
გამოშვებაში. რამდენიმე დღის წინ საზოგადოებრივმა მაუწყებელმა მთავარ
საინფორმაციო გამოშვებაში ხელისუფლების მხრიდან “TV პირველის”
სარედაქციო პოლიტიკაში შესაძლო ჩარევასთან დაკავშირებული ინფორმაციაც
არ გააშუქა.
კატეგორია: ეთიკა
16 თებერვალს სასტუმრო „ჰოლიდეი ინში“ მედიის უახლესი გამოწვევების
შესახებ გამართულ მრგვალ მაგიდაზე, ტელეკომპანია “პირველის”
პოლიტიკური გადაცემის წამყვანებმა, ნინო ჟიჟილაშვილმა და ვახო სანაიამ
ხელისუფლების მხრიდან არხის სარედაქციო პოლიტიკის შეცვლის მიზნით,
გარკვეული ზეწოლის მცდელობაზე ისაუბრეს. ნინო ჟიჟილაშვილის
განცხადებით, დღეს ხელისუფლებას ბაზარზე არსებული პატარა, მაგრამ
დამოუკიდებელი და მიუკერძოებელი მედიასივრცის არსებობა დისკომფორტს
უქმნის. შეხვედრაზე, "რუსთავი-2-ის" გენერალურმა დირექტორმა ნიკა
გვარამიამ საკითხის შესახებ მეტი დეტალის გასაჯაროება მოითხოვა.
ეს თემა საერთოდ ვერ მოხვდა ტელეკომპანია „იმედის“ მთავარ
საინფორმაციო გამოშვებაში. საზოგადოებრივმა მაუწყებელმა კი, „მოამბის“
მთავარ გამოშვებაში მხოლოდ მედიისა და არასამთავრობო ორგანიზაციების
შეხვედრა გააშუქა მოკლე კადრ-სინქრონის სახით, „ტვ პირველის“ საკითხი
კი აქაც ყურადღების მიღმა დარჩა.
კატეგორია: ეთიკა
14 თებერვალს, თბილისსა და ბათუმში, შრომის ინსპექციის შექმნისა და
შრომის უსაფრთოხების უზრუნველყოფის მოთხოვნით, საპროტესტო აქცია
გაიმართა. დემონსტრაცია მას შემდეგ დაიგეგმა, რაც ცნობილი გახდა, რომ
13 თებერვალს მშენებარე შენობის მეხუთე სართულიდან კიდევ ერთი მუშა,
26 წლის ახალგაზრდა გადმოვარდა და დაიღუპა. ეს თემა "მოამბის" დღის
მთავარ საინფორმაციო გამოშვებაში არ გაშუქებულა.
კატეგორია: ეთიკა
6 თებერვალს პატიმართა წამებასა და არაადამიანური მოპყრობაში
ბრალდებული 7 პირის მიმართ მოსამართლემ გამამტყუნებელი განაჩენი
გამოიტანა. საქმის მასალების თანახმად, 2010-2012 წლებში
ბრალდებულები, რომლებიც სასჯელაღსრულების #8 დაწესებულების
თანამშრომლები იყვნენ, პატიმრებზე ფიზიკურად და ფსიქოლოგიურად
სისტემატიურად ძალადობდნენ. სასამართლო განაჩენი საზოგადოებრივი
მაუწყებლის დღის მთავარი საინფორმაციო გამოშვების პირველი თემა იყო,
საკითხზე მასალა 8 საათიანმა „ქრონიკამაც“ მოამზადა. ტელეკომპანია
„პირველის“ და „რუსთავი-2-ის“ მთავარ საინფორმაციო გამოშვებებში კი ეს
თემა ვერ მოხვდა.
კატეგორია: ეთიკა
საზოგადოებრივი მაუწყებელი ბიძინა ივანიშვილის შვილის, ბერა
ივანიშვილის კომპანიას 372 011 ლარს უხდის. მაუწყებელი კომპანიისგან
ორი გადაცემისთვის საჭირო განათებებს ქირაობს, ეს გადაცემებია -
„არჩევნები 2017“ და “აქტუალური თემა 1 არხზე მაკა ცინცაძესთან
ერთად”. მაუწყებელმა მომსახურების შესაძენად ტენდერი 10 ოქტომბერს
გამოაცხადა და მასში მხოლოდ ბერა ივანიშვილის კომპანია - "სილქ
ფაქტორი სტუდიო" მონაწილეობდა. ამის შესახებ ცნობილი 24 ოქტომბერს
„ნეტგაზეთის“ მასალიდან გახდა, თემის მიმართ საჯარო ინტერესიც სწორედ
ამ დღეს გაჩნდა. მიუხედავად ამისა, თემა 8 საათიან „მოამბეში“ ვერ
მოხვდა.
