საქართველოს გენერალურმა პროკურატურამ სამშობლოს ღალატის, კერძოდ საბოტაჟის ბრალდებით, გაზეთ „ასავალ-დასავალის“ ჟურნალისტი დომენტი (დიტო) ჩუბინიძე დააკავა. ამის შესახებ საგამოძიებო ნაწილის უფროსის მოადგილემ, ბექა კვიციანმა ბრიფინგზე განაცხადა. 

პროკურატურის განმარტებით, 2026 წლის თებერვლიდან ჩუბინიძე სხვადასხვა მედიასაშუალებებისა და სოციალური პლატფორმების მეშვეობით „სისტემატურად ავრცელებს ცრუ და დეზინფორმაციულ ცნობებს და გამოგონილ ფაქტებზე დაყრდნობით ამტკიცებს, რომ საქართველოს პრემიერ-მინისტრმა მეზობელ სახელმწიფოსთან გაფორმებული საიდუმლო ხელშეკრულებით, აზერბაიჯანის რესპუბლიკას გადასცა დავით გარეჯის სამონასტრო კომპლექსის ნაწილი.

საქართველოს გენერალური პროკურატურის მიერ ჩატარებული გამოძიებით უტყუარად დადასტურდა, რომ სახელმწიფო საზღვრის დადგენა ხორციელდება მოსაზღვრე სახელმწიფოსთან დადებული საერთაშორისო ხელშეკრულებით ან შეთანხმებით, რაც შემდგომში საჭიროებს საქართველოს პარლამენტის მიერ რატიფიკაციას, ხოლო საზღვრის განსაზღვრის და დადგენის საკითხებზე მოლაპარაკებების წარმართვის და გადაწყვეტის უფლებამოსილება ექსკლუზიურად მინიჭებული აქვს საქართველოს სახელმწიფო საზღვრის დელიმიტაციისა და დემარკაციის სამთავრობო კომისიას. სამთავრობო კომისიის მანდატის ფარგლებში, დავით გარეჯის სამონასტრო კომპლექსის მონაკვეთზე, საზღვრის განსაზღვრასა და დადგენასთან დაკავშირებით, მეზობელ სახელმწიფოსთან შეთახმება ამ დრომდე არ არის მიღწეული, ზემოაღნიშნული ნორმატიული პროცედურა კი თეორიულადაც გამორიცხავს საქართველოს პრემიერ-მინისტრის მიერ ერთპიროვნულად ტერიტორიის სხვა სახელმწიფოსათვის გადაცემის შესაძლებლობას.

მიუხედავად აღნიშნულისა, ყოველგვარ სამართლებრივ საფუძველს მოკლებული, სახელმწიფო ტერიტორიის მეზობელი სახელმწიფოსთვის გადაცემის გამოგონილი ამბის მიმართ საზოგადოებაში რეალური აღქმის შესაქმნელად, დომენტი ჩუბინიძემ მისი რესპოდენტის - ლაზარე ჯორბენაძის გარდაცვალება, არაერთგზის დაუკავშირა მკვლელობას შურისძიების ნიადაგზე, რაც თითქოსდა გამოწვეული იყო ლაზარე ჯორბენაძის მიერ პრემიერ-მინისტრისადმი მამხილებელი ინფორმაციის გასაჯაროებით“. 

საქართველოს პროკურატურის მტკიცებით, ამ ქმედებით დიტო ჩუბინიძემ „განზრახ, საქართველოს სახელმწიფოს კანონიერი ინტერესების საზიანოდ, განახორციელა საბოტაჟი, რითაც ხელი შეუშალა სახელმწიფო უწყების და საქართველოს სახელმწიფო საზღვრის დელიმიტაციისა და დემარკაციის სამთავრობო კომისიის ნორმალურ ფუნქციონირებას“. 

პროკურატურა დიტო ჩუბინიძის მიმართ აღკვეთის ღონისძიების სახით პატიმრობის გამოყენებას მოითხოვს. უწყების ცნობით, ჩუბინიძეს ბრალდება სამშობლოს ღალატის, კერძოდ საბოტაჟის ფაქტზე წარედგინება, რაც 4 წლამდე თავისუფლების აღკვეთას ითვალისწინებს. 

--------------------


2026 წლის თებერვალში, ლაზარე ჯორბენაძემ, რომელიც „ასავალ-დასავალის“ ხშირი რესპონდენტი იყო, დიტო ჩუბინიძესთან ერთ-ერთ ინტერვიუში თქვა, რომ ირაკლი კობახიძემ ილჰამ ალიევთან საიდუმლო შეთანხმებას მოაწერა ხელი და დავით გარეჯის ნაწილი დათმო, რასაც მის წინააღმდეგ სოციალურ ქსელებში კამპანია მოჰყვა.  

მიმდინარე წლის გაზაფხულზე ლაზარე ჯორბენაძე გარდაიცვალა, ოფიციალურ ვერსიად სუიციდი განიხილებოდა. დიტო ჩუბინიძემ კი თქვა, რომ თვითმკვლელობის ვერსიის არ სჯეროდა. 

„ქართული ოცნების“ ყოფილმა პრემიერ მინისტრმა, პატიმრობაში მყოფმა ირაკლი ღარიბაშვილმა ციხიდან გამოგზავნილ ერთ-ერთ წერილში ლაზარე ჯორბენაძე ახსენა და თქვა, რომ პასუხი უნდა გაეცეს კითხვას, თუ რა გახდა მისი გარდაცვალების რეალური მიზეზი. ამის შემდეგ პროკურატურამ გაავრცელა განცხადება, რომ ჯორბენაძის თვითმკვლელობის ფაქტი „ამ ეტაპზე, უტყუარად დადასტურებულია“. 

„საქართველოს ჟურნალისტური ეთიკის ქარტიის“ განცხადებით, მიუხედავად იმისა, რომ პოლიტიკური პარტიების აკრძალვასთან დაკავშირებული საკონსტიტუციო სარჩელის განხილვების „საჯაროობა ნაწილობრივ უზრუნველყოფილია, ქარტია საკონსტიტუციო სასამართლოს გადაწყვეტილებას, ფოტო და ვიდეო გადაღება აეკრძალა დამოუკიდებელი მედიისთვის, მაინც პრობლემურად მიიჩნევს“. 

„საკონსტუტიციო სასამართლომ დამოუკიდებელ მედიას არ მისცა უფლება, ეწარმოებინა ფოტო და/ან ვიდეო გადაღება ხუთი პოლიტიკური პარტიის კონსტიტუციურობის და აკრძალვის შესახებ სარჩელის არსებით განხილვაზე, რომელიც დღეს, 21 ოქტომბერს დაიწყო და სამი დღე გასტანს. 

დარბაზში ახლა მხოლოდ საზოგადოებრივი მაუწყებლის კამერა მუშაობს, რომელიც სხდომას პირდაპირ ეთერში გადასცემს და სიგნალს აწვდის სხვა მედიებს. 

სხდომა სასამართლოს YouTube არხითაც გადაიცემა. 

მიუხედავად იმისა, რომ ამ ზომების ერთობლიობით სხდომების საჯაროობა ნაწილობრივ უზრუნველყოფილია, ქარტია საკონსტიტუციო სასამართლოს გადაწყვეტილებას, ფოტო და ვიდეო გადაღება აეკრძალა დამოუკიდებელი მედიისთვის, მაინც პრობლემურად მიიჩნევს.

საკონსტიტუციო სასამართლოს პრეს-სამსახური, ზეპირ საუბარში, ამ გადაწყვეტილებას სხდომათა დარბაზში ადგილების შეზღუდული რაოდენობით ხსნის. თუმცა, არ განმარტავს, რის საფუძველზე მიანიჭა მან პრიორიტეტი საზოგადოებრივ მაუწყებელს და რატომ იქნებოდა შეუძლებელი სხვა მედიასაშუალებების განცხადებების დაკმაყოფილება და მათთვის ადგილიდან გადაღების უფლების მიცემა. იკვეთება მედიის მიმართ შერჩევითი დამოკიდებულებაც.

საკონსტიტუციო სასამართლოში გადაღების საკითხს საკონსტუტუციო სასამართლოს რეგლამენტი აწესრიგებს (მუხლი 24, დასწრება საკონსტიტუციო სასამართლოს ღია სხდომაზე, პუნქტი 2). ჩანაწერი ზოგადია და რომელიმე ფორმატის მედიასაშუალებას პრიორიტეტს არ ანიჭებს. მასში ვკითხულობთ, რომ თუ სხდომაზე დამსწრე პირს სასამართლო სხდომაზე რადიო, ტელე, აუდიო ან ვიდეოჩანაწერის გაკეთება სურს, მან საკონსტიტუციო სასამართლოს სხდომის დაწყებამდე უნდა მიმართოს. დაშვების შესახებ გადაწყვეტილება საქმის განმხილველმა სასამართლომ ასევე სხდომის დაწყებამდე უნდა მიიღოს. 

საქმისადმი, რომელსაც ახლა საკონსტიტუციო სასამართლო იხილავს, საზოგადოებრივი ინტერესი გამორჩეულად დიდია. ქარტის მიიჩნევს, რომ ამის გათვალისწინებით,  საკონსტუტუციო სასამართლოს ყველაფერი უნდა გაეკეთებინა მედიისთვის სამუშაო პირობების შესაქმნელად, მათ შორის, მისთვის ვიდეო და ფოტოგადაღების უფლების მიცემით. 

საპირისპიროდ, საკონსტიტუციო სასამართლომ სწორედ ამ პროცესისთვის შეცვალა დამკვიდრებული პრაქტიკა - ჟურნალისტები ადასტურებენ, რომ დღევანდელ სხდომამდე, ისინი საკონსტიტუციო სასამართლოში შეუზღუდავად მუშაობდნენ.

საკონსტიტუციო სასამართლოს ეს ახალი მიდგომა, შეიძლება ითქვას, რომ გამოძახილია იმ მავნე პრაქტიკისა, რაც საერთო სასამართლოებში უკვე კანონის საფუძველზე დააწესა „ქართულმა ოცნებამ” და რის შედეგადაც მედიას სასამართლოებში გადაღება, ფაქტობრივად, აკრძალული აქვს“, - ვკითხულობთ ქარტიის განცხადებაში.

ჟურნალისტური ეთიკის ქარტია საქართველოს საკონსტიტუციო სასამართლოს მოუწოდებს, შეცვალოს გადაწყვეტილება და 22 და  23 ოქტომბრის სხდომებზე დააკმაყოფილოს იმ მედიასაშუალებების განცხადებები, ვისაც ამ პროცესის ფოტო და ვიდეო გადაღება სურთ.
 

ამავე თემაზე: პარტიების აკრძალვის საქმეზე სასამართლო სხდომებს მედიებიდან მხოლოდ საზმაუ გადაიღებს

საქართველოს საკონსტიტუციო სასამართლოს გადაწყვეტილებით, პოლიტიკური პარტიების აკრძალვასთან დაკავშირებული სარჩელის განხილვებს მედიებიდან მხოლოდ საზოგადოებრივი მაუწყებელი გადაიღებს. 

საკონსტიტუციო სასამართლო წერს, რომ მაღალი საზოგადოებრივი ინტერესიდან გამომდინარე, „საზოგადოებრივი მაუწყებლის თხოვნის საფუძველზე, ამავე მაუწყებლის მიერ არსებითი სხდომის ვიდეო-აუდიო გადაღების პირდაპირ ეთერში ტრანსლირებისა და სხვა მედიასაშუალებებისათვის სიგნალის მიწოდების/გავრცელების შესახებ“  თანხმობა გასცა და სხდომების ტრანსლაცია სასამართლოს Youtube არხზეც განხორციელდება.

„შესაბამისად, მაქსიმალურად დაკმაყოფილდება საზოგადოებრივი ინტერესი და სხდომის მიმდინარეობის შესახებ ინფორმაცია ხელმისაწვდომი იქნება დაინტერესებული პირებისთვის“, - მიიჩნევს სასამართლო.

პოლიტიკური პარტიების აკრძალვასთან დაკავშირებული საკონსტიტუციო სარჩელის განხილვებს სხვა მედიების წარმომადგენლები ვერ გადაიღებენ, მათ მხოლოდ სხდომებზე დასწრება შეეძლებათ. 

„დარბაზია იმდენად მცირე და მოლოდინი იმის, რომ თვითონ წარმომადგენლებიც კი საკმაოდ ბევრნი იქნებიან, ამიტომ ჩვენ მივიღეთ ასეთი გადაწყვეტილება“ - უთხრა „მედიაჩეკერს“ საქართველოს საკონსტიტუციო სასამართლოს პრესსამსახურის წარმომადგენელმა. 

„ფიზიკურად სხდომის ნორმალურად და ორგანიზებულად წარმართვისთვის რადგანაც იქნება იმის საშუალება, რომ პირდაპირ ეთერში იყოს სხდომის მიმდინარეობა, ამიტომ შიგნით არ არის აუცილებელი ჟურნალისტების დასწრება გადასაღებად, იმიტომ რომ ის, რაც საჭიროა, ლაივის საშუალებით ჟურნალისტები ამას მაინც მიიღებენ“. 

„ბათუმელების“ ჟურნალისტი, მანანა ქველიაშვილი „მედიაჩეკერთან“ საუბრისას ამბობს, რომ საქართველოს საკონსტიტუციო სასამართლოში ფოტო/ვიდეო გადაღებაზე რაიმე სახის შეზღუდვა აქამდე არასდროს ყოფილა. 

„ამასთან, მიუხედავად იმისა, რა წერია რეგლამენტში, საკონსტიტუციოში მუშაობის პრაქტიკა იყო ასეთი - სხდომის წინა დღეს ვაზუსტებდი პრესსამსახურთან, შეგეძლო თუ არა სხდომაზე ფოტო-ვიდეო გადაღება, იღებდი დასტურს და შემდეგ უკვე მიდიოდი სხდომის დღეს შესაბამისი ტექნიკით. არ ყოფილა შემთხვევა, რომ საკონსტიტუციო სასამართლოს უარი ეთქვას ან არ დაეშვას ჩვენი გამოცემის ჟურნალისტი სხდომაზე. ჩაგვირთავს ლაივიც სასამართლო დარბაზიდან, გადაგვიღია ფოტო/ვიდეო მასალა მათ შორის, ისეთ გახმაურებულ და ხალხმრავალ პროცესებზე, როგორიც იყო რუსული კანონის საკონსტიტუციო განხილვები. დღეს, ტრადიციულად, მხოლოდ გადასამოწმებლად დავრეკეთ საკონსტიტუციოში, იმის გასარკვევად ისევ თავისუფლად შეგვეძლო თუ არა გადაღება. სასამართლოში განგვიმარტეს, რომ გადაღებას შეძლებდა მხოლოდ საზოგადოებრივი მაუწყებელი, სხვა მედიები - ვერა. ვკითხეთ, ამ გადაწყვეტილების რაიმე ოფიციალური დოკუმენტი თუ არსებობდა, თუმცა გვითხრეს, რომ დარბაზი იყო პატარა და ვერ დაეტეოდა ყველა - მედია და მხარეები“.

აქამდე მსგავსი შეზღუდვა არ ახსენდება „აჭარა თაიმსის“ დამფუძნებელსა და ჟურნალისტს, სულხან მესხიძესაც:

„ნებისმიერ სხდომაზე შესაძლებელი იყო როგორც დასწრება, ისე გადაღება. მათ შორის, სასამართლო დარბაზში შესვლა და გამოსვლა თავისუფლად, პროცესის მიმდინარეობის დროსაც შეიძლებოდა. თითქმის ყველა გახმაურებულ საქმეზე სასამართლოს სპიკერი მედიასთან კომენტარსაც კი აკეთებდა“.

საქართველოს საკონსტიტუციო სასამართლოს რეგლამენტის მიხედვით, „თუ სხდომაზე დამსწრე პირს სურს სასამართლო სხდომაზე რადიო, ტელე, აუდიო ან ვიდეო ჩანაწერის გაკეთება, იგი სხდომის დაწყებამდე მიმართავს საორგანიზაციო სამსახურის უფლებამოსილ თანამშრომელს, რომელიც ხსენებულ თხოვნას ატყობინებს საქმის განმხილველ სასამართლოს. საქმის განმხილველი სასამართლო თანხმობის მიცემის საკითხს წყვეტს სასამართლო სხდომის დაწყებამდე“. 

აღსანიშნავია, რომ გასული წლის გაზაფხულზე „საერთო სასამართლოების შესახებ კანონში“ შესული ცვლილებები, რომლითაც მედიისთვის სასამართლოს შენობაში, სხდომის დარბაზსა და სასამართლოს ეზოში ფოტო, კინო, ვიდეოგადაღება, ტრანსლაცია და აუდიოჩაწერა დაუშვებელი გახდა, საქართველოს საკონსტიტუციო სასამართლოს არ ეხება. 

საქართველოს საკონსტიტუციო სასამართლოში არსებითი განხილვის სხდომა საქმეზე „საქართველოს პარლამენტის წევრების (სულ 88 წევრის) კონსტიტუციური სარჩელი პოლიტიკური პარტიების („ერთიანობა - ნაციონალური მოძრაობა“, „კოალიცია ცვლილებისთვის გვარამია მელია გირჩი დროა“, „ძლიერი საქართველო - ლელო, ხალხისთვის, თავისუფლებისთვის!“, „ფედერალისტური პარტია“, „გახარია საქართველოსთვის“) საქმიანობის კონსტიტუციურობისა და აკრძალვის საკითხზე“ 21, 22 და 23 ოქტომბერს გაიმართება. 

„საქართველოს ჟურნალისტური ეთიკის ქარტია“ აცხადებს, რომ გმობს ჟურნალისტ ვახო სანაიას მიმართ გამოტანილ უსამართლო განაჩენს და მის შემთხვევას სადამსჯელო მიზნებისთვის კანონმდებლობისა და მართლმსაჯულების ინსტრუმენტალიზაციის გამოვლინებად მიიჩნევს, „მოქალაქისა და ჟურნალისტის კრიტიკული ხმის ჩასახშობად და კრიტიკული მედიის საქმიანობის შესაზღუდად“. 

დღეს, 19 ოქტომბერს, ტელეკომპანია „ფორმულას“ წამყვანს, ვახო სანაიას სოციალურ ქსელში გამოქვეყნებული 2 პოსტისა და ვიდეოს გამო თბილისის საქალაქო სასამართლოს მოსამართლე თორნიკე ქოჩქიანმა 30-დღიანი ადმინისტრაციული პატიმრობა შეუფარდა. სანაიას „ქართული ოცნების“ წევრების, შალვა პაპუაშვილისა და ლადო ბოჟაძის შეურაცხყოფის საბაბით 14-დღიანი ადმინისტრაციული პატიმრობა ივლისში ერთხელ უკვე ჰქონდა შეფარდებული, მანამდე ის სასამართლომ 6 000 ლარითაც დააჯარიმა. 

„კანონმდებლობაში შეტანილი რეპრესიული ხასიათის ცვლილებები „ქართულ ოცნებას“ საშუალებას აძლევს, არაპროპორციული ძალით იმოქმედოს კრიტიკულად განწყობილი მოქალაქეების, მათ შორის ჟურნალისტების, წინააღმდეგ. 

ქარტია ვახო სანაიას შემთხვევას სადამსჯელო მიზნებისთვის კანონმდებლობისა და მართლმსაჯულების ინსტრუმენტალიზაციის გამოვლინებად მიიჩნევს, მოქალაქისა და ჟურნალისტის კრიტიკული ხმის ჩასახშობად და კრიტიკული მედიის საქმიანობის შესაზღუდად. 

„ქართულმა ოცნებამ“ საკანონმდებლო ცვლილებებით და შემდგომ უკვე ამ ცვლილებების აღსრულების პრაქტიკით, უარი თქვა თმენის ვალდებულებაზე. დღევანდელი გადაწყვეტილებით „ქართულმა ოცნებამ“ კიდევ ერთხელ თვალსაჩინოდ წარმოაჩინა საქართველოში დემოკრატიული უკუსვლის სიღრმე. 

ქარტია სოლიდარობას უცხადებს ვახო სანაიას და  ყველა ჟურნალისტსა და მოქალაქეს, ვისი გამოხატვის თავისუფლებაც „ქართულმა ოცნებამ“ სამართლებრივი თუ ძალისმიერი ინსტრუმენტების გამოყენებით შეზღუდა“, - ვკითხულობთ „საქართველოს ჟურნალისტური ეთიკის ქარტიის“ განცხადებაში.

შინაგან საქმეთა სამინისტრო ვახო სანაიას პოლიტიკური თანამდებობის პირების შეურაცხყოფას ამჯერად ამ პოსტების  გამო ედავებოდა:

• „14 დღე *ლეები არ დაუძახოთ შალვას და ლადოს. რომ გამოვალ, მე მივხედავ მაგ ამბავს“.

• „მე რომ დავწერე პაპუაშვილსა და ბოჟაძეზე, *ლეებს ნუ დაუძახებთ-მეთქი, დამაპატიმრეს. ახლა შეკითხვა, რომელიც ორი კვირაა არ მასვენებს: თავად შალვა პაპუაშვილმა და ბოჟაძემ რომ დაწერონ საკუთარ თავზე, *ლეებს ნუ დაგვიძახებთო, თვითონ მაგათაც საციხოდ გაუხდებათ საქმე ხო? შალვა, ლადო, გაბედეთ, ბიჭებო!“

• ვიდეო სათაურით - „ვეხმაურებით შალვა პაპუაშვილის მე*ლენბურგობას“. 

სანაია ფეისბუქპოსტების გამო დაწყებული ადმინისტრაციული საქმეებს განხილვას არ ესწრება. ის შსს-ს წარმომადგენლებმა მოგვიანებით საცხოვრებელ სახლთან დააკავეს, სადაც სასამართლოს გადაწყვეტილების აღსრულებას ოჯახის წევრებთან და კოლეგებთან ერთად ელოდებოდა. 

-------------------------------

2026 წლის 10 ივლისის სასამართლო პროცესზე, როდესაც ვახო სანაია მოსამართლე თორნიკე ქოჩქიანმა შალვა პაპუაშვილსა და ლადო ბოჟაძის შესახებ დაწერილი პოსტების გამო 6 000 ლარით დააჯარიმა, ცნობილი გახდა, რომ ის პოლიტიკური თანამდებობის პირის შეურაცხყოფის საბაბით, 4 000 ლარით იქამდეც, შსს-ს სიძულვილის ენის წინააღმდეგ ბრძოლის სამმართველოს შექმნამდეც, ყოფილა დაჯარიმებული. სანაიას გზის გადაკეტვის ბრალდებით  6-დღიანი ადმინისტრაციული პატიმრობა ჰქონდა შეფარდებული 2025 წლის ოქტომბერშიც. 

ტელეკომპანია „ფორმულას“ წამყვანს, ვახო სანაიას სოციალურ ქსელში გამოქვეყნებული 2 პოსტისა და ვიდეოს გამო თბილისის საქალაქო სასამართლოს მოსამართლე თორნიკე ქოჩქიანმა 30-დღიანი ადმინისტრაციული პატიმრობა შეუფარდა. 

სანაიას „ქართული ოცნების“ წევრების, შალვა პაპუაშვილისა და ლადო ბოჟაძის შეურაცხყოფის საბაბით 14-დღიანი ადმინისტრაციული პატიმრობა ივლისში ერთხელ უკვე ჰქონდა შეფარდებული, მანამდე ის სასამართლომ 6 000 ლარითაც დააჯარიმა.

ვახო სანაია ფეისბუქპოსტების გამო დაწყებული ადმინისტრაციული საქმეებს განხილვას არ ესწრება.  

შინაგან საქმეთა სამინისტრო სანაიას პოლიტიკური თანამდებობის პირების შეურაცხყოფას ამჯერად ამ პოსტების  გამო ედავებოდა:

• „14 დღე *ლეები არ დაუძახოთ შალვას და ლადოს. რომ გამოვალ, მე მივხედავ მაგ ამბავს“.

• „მე რომ დავწერე პაპუაშვილსა და ბოჟაძეზე, *ლეებს ნუ დაუძახებთ-მეთქი, დამაპატიმრეს. ახლა შეკითხვა, რომელიც ორი კვირაა არ მასვენებს: თავად შალვა პაპუაშვილმა და ბოჟაძემ რომ დაწერონ საკუთარ თავზე, *ლეებს ნუ დაგვიძახებთო, თვითონ მაგათაც საციხოდ გაუხდებათ საქმე ხო? შალვა, ლადო, გაბედეთ, ბიჭებო!“

• ვიდეო სათაურით - „ვეხმაურებით შალვა პაპუაშვილის მე*ლენბურგობას“. 

სასამართლოს გადაწყვეტილების გამოცხადების შემდეგ ვახო სანაიამ თქვა:

მას შსს-ს წარმომადგენლები, სავარაუდოდ, მოგვიანებით დააკავებენ. 

-------------------------------

2026 წლის 10 ივლისის სასამართლო პროცესზე, როდესაც ვახო სანაია მოსამართლე თორნიკე ქოჩქიანმა შალვა პაპუაშვილსა და ლადო ბოჟაძის შესახებ დაწერილი პოსტების გამო 6 000 ლარით დააჯარიმა, ცნობილი გახდა, რომ ის პოლიტიკური თანამდებობის პირის შეურაცხყოფის საბაბით, 4 000 ლარით იქამდეც, შსს-ს სიძულვილის ენის წინააღმდეგ ბრძოლის სამმართველოს შექმნამდეც, ყოფილა დაჯარიმებული. სანაიას გზის გადაკეტვის ბრალდებით  6-დღიანი ადმინისტრაციული პატიმრობა ჰქონდა შეფარდებული 2025 წლის ოქტომბერშიც.

ბრიტანეთის მიერ სანქცირებული, პროსამთავრობო ტელეკომპანია „იმედის“ მფლობელი კომპანიის - „ჯორჯიან მედია პროდაქშენ გრუპის“ წილები ხელახლა გადანაწილდა. დღევანდელი ცვლილებებით, მას ახლა 4 მფლობელი: მარიამ ლომიძე, ირაკლი ჩიხლაძე, მაია ჩიგოშვილი და მადგა ანიკაშვილი ჰყავს. ოთხივე მათგანი „იმედის“ მფლობელი კომპანიის თანაბარ, 25-25%-იან წილს ფლობს. 

მარიამ ლომიძე - „ჯორჯიან მედია პროდაქშენ გრუპისა“ და „იმედის“  გენერალური დირექტორი. აქამდე ტელევიზიის მფლობელი კომპანიის 10%-ს ფლობდა. 

ირაკლი ჩიხლაძე - „იმედის კვირის“ წამყვანი და ტელევიზიის სამეთვალყურეო საბჭოს თავმჯდომარე. 16 ოქტომბრის ცვლილებებამდე „ჯორჯიან მედია პროდაქშენ გრუპის“ 10%-იანი წილის მფლობელი იყო. 

მაია ჩიგოშვილი - „იმედის“ პროგრამების ხელმძღვანელი, აქამდე ტელეკომპანიის მფლობელი კომპანიის 10%-იანი წილი ეკუთვნოდა. ჩიგოშვილი „ჯი-დი-ეს თი-ვის“ დირექტორიცაა. 

მაგდა ანიკაშვილი - „იმედი LIVE“-ისა და „ღია ეთერი - დებატების“ წამყვანი, ტელევიზიის სამეთვალყურეო საბჭოს წევრი. „იმედის“ მფლობელი კომპანიის - „ჯორჯიან მედია პროდაქშენ გრუპის“ ახალი მეწილე.

„ჯორჯიან მედია პროდაქშენ გრუპში“ წილები აღარ ეკუთვნით ილია მიქელაიშვილის კომპანიას - „პრაიმ მედია გლობალს“, ვასილ კალანდარიშვილსა და ნათია სონღულაშვილს.  

16 ოქტომბრის ცვლილებებამდე ბიზნესმენ ილია მიქელაიშვილის კომპანია „ჯორჯიან მედია პროდაქშენ გრუპის“ 50%-იან წილს ფლობდა, ვასილ კალანდარიშვილი და ნათია სონღულაშვილი კი - 10-10%-იან წილებს. კალანდარიშვილი „იმედის“ ფინანსური დირექტორია, სონღულაშვილი - „იმედის“ საინფორმაციო სამსახურის უფროსი და ტელეკომპანიის სამეთვალყურეო საბჭოს თავმჯდომარის მოადგილე. 

საჯარო რეესტრის ეროვნული სააგენტოსთვის დღეს წარდგენილი დოკუმენტებით, ვასილ კალანდარიშვილმა და ნათია სონღულაშვილმა თავიანთ საკუთრებაში არსებული „იმედის“ მფლობელი კომპანიის წილები მაგდა ანიკაშვილს სიმბოლურ ფასად, 100-100 ლარად მიჰყიდეს, ანიკაშვილმა კომპანიის 5%-იანი წილი, 50 ლარად, იყიდა „პრაიმ მედია გლობალისგანაც“. „პრაიმ მედია გლობალმა“ დარჩენილი 45%-იანი წილი თანაბრად, სიმბოლურად, 150-150 ლარად მიჰყიდა მარიამ ლომიძეს, ირაკლი ჩიხლაძესა და მაია ჩიგოშვილს. 

--------------------------------------

დიდი ბრიტანეთის მიერ „იმედის“ დასანქცირებიდან მეორე დღეს, 25 თებერვალს, „იმედის“ ყოფილმა მფლობელმა და სამეთვალყურეო საბჭოს თავმჯდომარემ, ირაკლი რუხაძემ და საბჭოს სამმა წევრმა: დავით შონიამ, გიორგი კალანდარიშვილმა და გიორგი ბახტაძე საჯარო რეესტრის ეროვნულ სააგენტოს განცხადებებით მიმართეს, სამეთვალყურეო საბჭოს წევრის პოზიციების დატოვების შესახებ აცნობეს და არხის რეგისტრირებულ მონაცემებში ცვლილებების დაჩქარებული წესით ასახვა სთხოვეს. საჯარო რეესტრში წარდგენილი დოკუმენტების მიხედვით, გადადგომის შესახებ მათი იდენტური განცხადებები 6 თებერვლით თარიღდება. ისინი ამ განცხადებებში „იმედის“ გენერალურ დირექტორს სწერენ, რომ „კომპანიის მფლობელობის ცვლილებასთან დაკავშირებით“, პირადი განცხადების საფუძველზე სამეთვალყურეო საბჭოს წევრის პოზიციის დატოვების გადაწყვეტილება მიიღეს. 

რეესტრმა სამთავრობო ტელეკომპანია „იმედის“ სამეთვალყურეო საბჭოდან თავმჯდომარის, ირაკლი რუხაძისა და საბჭოს სამი წევრის: დავით შონიას, გიორგი კალანდარიშვილისა და გიორგი ბახტაძის წასვლა რამდენიმე საათში დაარეგისტრირა. 

რა მოხდა 6 თებერვალს?

„ჩემს პარტნიორებთან გრძელი და დაძაბული კონსულტაციების შემდეგ, გადავწყვიტეთ, რომ დღევანდელ სიტუაციაში, ყველაზე გონივრული გამოსავალი არის ჩვენი „იმედთან“ დამშვიდობება“, - ამ დღეს „იმედმა“ „ჰანიველ პარტნერსის“ ტელეკომპანიიდან გასვლის შესახებ ირაკლი რუხაძის განცხადება გაავრცელა. რუხაძე წერდა, რომ ახალი მფლობელის პოვნა, „რომელიც ერთი მხრივ ითავებდა „იმედის“ დაფინანსებას საბიუჯეტო დანაკლისის შემთხვევებში და ასევე დათანხმდებოდა, შეენერჩუნებინა არსებული მენეჯმენტის აქტიური როლი სარედაქციო პოლიტიკაში“ ადვილი არ იყო. 

„იმედის“ მფლობელი კომპანია - „ჯორჯიან მედია პროდაქშენ გრუპი“ სიმბოლურ ფასად, 1000 ლარად ილია მიქელაიშვილის კომპანიამ, „პრაიმ მედია გლობალმა“ 30 იანვარს იყიდა და იკისრა ვალდებულება, რომ მის 50%-იან წილს ტელეკომპანიის წარმომადგენლებს გადასცემდა. „ჯორჯიან მედია პროდაქშენ გრუპის“ 10-10%-იანი წილი ნათია სონღულაშვილმა, ირაკლი ჩიხლაძემ, მარიამ ლომიძემ, მაია ჩიგოშვილმა და ვასილ კალანდარიშვილმა სიმბოლურ ფასად, 100-100 ლარად 10 თებერვალს იყიდეს. 

მარტში განახლდა დიდი ბრიტანეთის მიერ სანქცირებული „იმედის“ სამეთვალყურეო საბჭოს შემადგენლობაც. მისი წევრები ირაკლი ჩიხლაძის, ნათია სონღულაშვილისა და მაგდა ანიკაშვილის გარდა, არიან: მარიამ ლომიძე, ვასილ კალანდარიშვილი, მაია ჩიგოშვილი და ილია მიქელაიშვილი. 

„ჯორჯიან მედია პროდაქშენ გრუპი“ ფლობს კიდევ 8 სხვა კომპანიას, მათ შორის, „რადიო იმედსა“ და GDS TV-ის. 

„საქართველოს ჟურნალისტური ეთიკის ქარტიის“ განცხადებით, „TV პირველსა“ და „ფორმულას“ საქართველოს საპატრიარქომ პროფესიული საქმიანობის უფლება დაუსაბუთებლად შეუზღუდა. ქარტია საპატრიარქოს გადაწყვეტილებას, ეს ტელეკომპანიები სვეტიცხოვლობის დღესასწაულზე არ დაეშვა, საგანგაშოდ მიიჩნევს.

„საპატრიარქომ თავისი გადაწყვეტილება იმით ახსნა, რომ მსგავსი ღონისძიებების დროს ამ ტელევიზიების ჟურნალისტები ხშირად არღვევენ შინაგანაწესს და, არაერთი გაფრთხილების მიუხედავად, თვითნებურად ტოვებენ მედიისთვის განკუთვნილ სივრცეს. ჟურნალისტების თავისუფალი გადაადგილება კი ღვთისმსახურების პროცესს აფერხებს. 

„ტვ პირველის“ საინფორმაციო სამსახურის ხელმძღვანელის ნოდარ მელაძის ინფორმაციით, საპატრიარქომ არ მიიჩნია საჭიროდ, ტელევიზიის მენეჯმენტისთვის გადაწყვეტილების სამართლებრივი საფუძველი და კონკრეტული მიზეზი განემარტა. მისი თქმით, ერთადერთი, რაც ტელეკომპანიასა და საპატრიარქოს საზოგადოებასთან ურთიერთობის სამსახურის უფროსს შორის მიმოწერისას გამოჩნდა, არის მითითება 2021 წლის 8 მარტის ინციდენტზე მარტვილში, როცა სასულიერო პირებსა და მრევლის ნაწილს შორის დაპირისპირების გაშუქებისას რამდენიმე ჟურნალისტი დაშავდა. 

ქარტიის მოსაზრებით, ამ ინციდენტსა და სვეტიცხოვლობის დღესასწაულის გაშუქებას შორის პარალელის გავლება უადგილოა.  

ქარტია მიიჩნევს, რომ ამ გადაწყვეტილებით საპატრიარქო, პარლამენტის მსგავსად, დისკრიმინაციულ დამოკიდებულებას იჩენს დამოუკიდებელი და ხელისუფლების მიმართ კრიტიკულად განწყობილი ტელევიზიების მიმართ. მნიშვნელოვანი რელიგიური დღესასწაულის დროს სვეტიცხოვლის ტაძრის ტერიტორიაზე „ტვ პირველისა“ და „ფორმულას“ არდაშვებით საპატრიარქომ უპატივცემულობა გამოიჩინა მათი მაყურებლების მიმართ.  

ეკლესია თავის გავლენას არ უნდა იყენებდეს დისკრიმინაციის წასახალისებლად და არ უნდა იმეორებდეს პარლამენტის ცუდ მაგალითს - ზრდიდეს დისტანციას ჟურნალისტებსა და ძალაუფლების მქონე რესპონდენტებს შორის და ჟურნალისტებთან კომუნიკაციას მათ კეთილ ნებაზე დამოკიდებულს ხდიდეს.  

ყოველგვარ პირობითობაზე ბევრად უფრო მნიშვნელოვანია საზოგადოების უფლება, იყოს ინფორმირებული“, - ვკითხულობთ „საქართველოს ჟურნალისტური ეთიკის ქარტიის“ განცხადებაში.

ქარტია საპატრიარქოს მოუწოდებს, რომ „პატივი სცეს პრესის თავისუფლებას, როგორც დემოკრატიული საზოგადოების ფუნდამენტურ ღირებულებას, და თავისი ურთიერთობა მედიასა და ჟურნალისტებთან ამ ღირებულების გათვალისწინებით ააგოს“.   

საქართველოს საპატრიარქომ ხელისუფლების მიმართ კრიტიკულად განწყობილ ტელეკომპანიებს, „TV პირველსა“ და „ფორმულას“ სვეტიცხოვლობის დღესასწაულისთვის, რომელიც 14 ოქტომბერს აღინიშნება, აკრედიტაცია არ მისცა. ვრცლად იხილეთ ამ ბმულზე.

ბრიტანეთის მიერ სანქცირებული, პროსამთავრობო ტელეკომპანია POSTV-ის 52%-იანი წილის მფლობელი გიორგი შენგელია, შპს „პოსტივის მხარდამჭერების“ დამფუძნებელი ხდება. შენგელიამ „პოსტივის მხარდამჭერები“ POSTV-ის დასანქცირებიდან მეორე დღეს, 25 თებერვალს დაარეგისტრია და მისი დირექტორი და 100%-იანი წილის მფლობელია.

„ხალხის ძალის“ წევრმა, ვიქტორ ჯაფარიძემ POSTV-ში მისი კუთვნილი 52%-იანი წილი გიორგი შენგელიას, ამ წილის მმართველს, სიმბოლურ ფასად - 1 000 ლარად მიჰყიდა. მას არხის საკონტროლო წილი ჯამში 520 000 ლარად ჰქონდა ნაყიდი. 

ჯაფარიძესა და შენგელიას შორის პარტნიორის წილის ნასყიდობის ხელშეკრულება დღევანდელი დღით თარიღდება. გიორგი შენგელიამ საჯარო რეესტრის ეროვნულ სააგენტოს POSTV-ის რეგისტრირებულ მონაცემებში ცვლილების რეგისტრაციისთვის დღეს, 15 ოქტომბერს მიმართა და სხვა თანდართულ დოკუმენტებთან ერთად, წილის ნასყიდობის ხელშეკრულებაც წარუდგინა. ის POSTV-ის 52%-იანი წილის სრულუფლებიანი მესაკუთრე რეესტრში პარტნიორის ცვლილების რეგისტრაციის შემდეგ გახდება.

შენგელია POSTV-ში ვიქტორ ჯაფარიძის კუთვნილი 52%-იანი წილის ახალ მმართველად სექტემბერში დაინიშნა. მანამდე, 28 იანვარს, არხის დასანქცირებამდე თითქმის 1 თვით ადრე, ჯაფარიძემ თავის წილი სამართავად კასპის მერის ყოფილ მოადგილეს, ზაზა მარიდაშვილს გადასცა.

ვიქტორ ჯაფარიძემ POSTV-ის საკონტროლო წილი 2022 წლის 3 ოქტომბერს ჯამში 520 000 ლარად იყიდა. არხის დანარჩენ 24-24%-იან წილებს თემურ ჭარელაშვილი (ტელევიზიის აღმასრულებელი დირექტორი) და შალვა რამიშვილი ფლობენ. საზოგადოებასთან ურთიერთობის საკითხებში დირექტორი კი ნუგზარ რუხაძეა.

POSTV-ი, სამთავრობო ტელეკომპანია „იმედთან“ ერთად, დიდმა ბრიტანეთმა 24 თებერვალს დაასანქცირა. ორივე ტელევიზიის შემთხვევაში სანქციის მიზეზად რუსეთის მიერ უკრაინაში სრულმასშტაბიანი შეჭრის შესახებ განზრახ გავრცელებული შეცდომაში შემყვანი ინფორმაციები დასახელდა.

საქართველოს საპატრიარქომ ხელისუფლების მიმართ კრიტიკულად განწყობილ ტელეკომპანიებს, „TV პირველსა“ და „ფორმულას“ სვეტიცხოვლობის დღესასწაულისთვის, რომელიც 14 ოქტომბერს აღინიშნება, აკრედიტაცია არ მისცა. 

საპატრიარქოს საზოგადოებასთან ურთიერთობის სამსახურის უფროსმა, ანდრია ჯაღმაიძემ მედიას ამის მიზეზად ის დაუსახელა, რომ ამ ტელევიზიების ჟურნალისტები „მუდმივად არღვევდნენ შინაგანაწესს, მიუხედავად არაერთი გაფრთხილებისა, თვითნებურად ტოვებდნენ მედიისთვის განკუთვნილ სივრცეს, რაც დაუშვებელია და გვიქმნის პრობლემებს ღვთისმსახურების პროცესში“. 

ანდრია ჯაღმაიძეს დამატებითი კითხვებით მიმართა „მედიაჩეკერმაც“, ინფორმაციის მიღების შემთხვევაში, მასალა შესაბამისად განახლდება. 

„TV პირველისა“ და „ფორმულას“ ჟურნალისტების სვეტიცხოვლობაზე არდაშვებასთან დაკავშირებით ინფორმაცია „TV პირველის“ საინფორმაციო სამსახურის ხელმძღვანელმა, ნოდარ მელაძემ გაავრცელა. 

„საპატრიარქოს საზოგადოებასთან ურთიერთობის სამსახურის უფროსი ანდრია ჯაღმაიძე ამ დრომდე, ხანგრძლივი კომუნიკაციის მიუხედვად, არ გვაწვდის ბრძანებას, რომლის თანახმადაც TV Pirveli • ტელეკომპანია პირველი და Formula • ფორმულა ჟურნალისტების აკრედიტაციები ხვალ დაგეგმილ ღონისძიებაზე გაუქმდა.

დღეს დარეკა საპატრიარქოს პრესამსახურის წარმომადგენელმა სოსო ტყებუჩავამ, „თქვენი აკრედიტაცია გაუქმდა“ თქვა და ტელეფონი გათიშა. ამის შემდეგ ზარებს აღარ პასუხობს. 

ასეთი რამ, არასდროს მომხდარა პატრიარქ ილია მეორეს მოღვაწეობის დროს. არასდროს ყოფილა სვეტიცხოვლობაზე ჟურნალისტები არ დაეშვათ. ეს არის პირველი სვეტიცხოვლობა, სადაც აკრძალვა ორ დამოუკიდებელ ტელეკომპანიას შეეხო.

საპატრიარქოს ვთხოვეთ ბრძანება აკრედიტაციის გაუქმებაზე და ნორმა რას ეყრდნობა ეს ბრძანება, რაც არ მოგვაწოდა, როგორც გაირკვა ასეთი ბრძანება ამ დროისთვის (13 ოქტომბერი, 19:00 ) არც არსებობს.

რადგან ჟურნალისტური საქმიანობის თავისუფლება დაცულია კანონით, ხოლო შეზღუდვა შეიძლება დაწესდეს მხოლოდ კანონის საფუძველზე, ისიც გამონაკლის შემთხვევაში, გვაინტერესებს რა სამართლებრივ საფუძველს ეყრდნობა ანდრია ჯაღმაიძის გადაწყვეტილება.

მიმოწერის დროს ანრია ჯაღმაიძემ მიზეზად დაასახელა, 2021 წლის 8 მარტს მარტვილში მომხდარი ინციდენტი, სადაც საეპისკოპოსო კრების სხდომაზე, პირიქით დაზარალებულები იყვნენ ჟურნალისტები, რომლებიც მოაჯირის გადმოვარდნის დროს დაშავდნენ.

არ არსებობს იურდიული ძალის მქონე წერილი ან დოკუმენტი, რომელიც ამ წლების განმავლობაში მიიღო ტელეკომპანია პირველმა საპატრიარქოში მუშაობის წესების დარღვევის ან წესების ცვლილების შესახებ. 

საინტერესოა რა პოზიცია აქვთ წმინდა სინოდის წევრებს მომხდართან დაკავშირებით და მათ თუ მაინც იციან რა კანონიერ საფუძველზე და ვის მიერ გამოიცა ბრძანება?“ - დაწერა მელაძემ სოციალურ ქსელში. 

12 ოქტომბერს, საქართველოს საპატრიარქოს საზოგადოებასთან ურთიერთობის სამსახურმა გამოაქვეყნა განცხადება, რომ სვეტიცხოვლობის დღესასწაულზე „მასმედიის წარმომადგენლები ისარგებლებენ ისეთივე რეგულაციით, როგორიც კანონითაა განსაზღვრული სახელმწიფოს სხვადასხვა ინსტანციის ოფიციალურ ღონისძიებებზე“ და სვეტიცხოვლის ეზოში დაიშვებიან „მხოლოდ აკრედიტებული ჟურნალისტები და მედიის წარმომადგენლები, მათთვის გამოყოფილი იქნება სპეციალური სივრცე და დამზადდება სახელობითი „ბეიჯები““. მათი ინფორმაციით, იგივე რეგულაციები შეეხება ფოტოგადაღებასაც.

მედიის წარმომადგენლებს აკრედიტაციის მისაღებად საპატრიარქოს საზოგადოებასთან ურთიერთობის სამსახურისთვის უნდა მიემართათ.

საპატრიარქოს ინფორმაციით, ხვალ „სვეტიცხოვლობის დღესასწაულთან და საქართველოში ქრისტიანობის სახელმწიფო რელიგიად გამოცხადების 1700 წლისთავთან დაკავშირებით, უწმინდესი და უნეტარესი, სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი შიო III საქართველოს მართლმადიდებელი ეკლესიის წმინდა სინოდის წევრებთან ერთად წირვას აღავლენს სვეტიცხოვლის საპატრიარქო ტაძარში“ და მას სხვადასხვა ადგილობრივი მართლმადიდებელი ეკლესიის დელეგაციის წევრები და უცხოეთიდან ჩამოსული სტუმრები დაესწრებიან. 

„მედიაჩეკერის“ მასალა მსგავს თემაზე: 

„ფორმულა“ და „ TV პირველი“ „შიგა განაწესის დარღვევისათვის“ მომდევნო საეკლესიო დღესასწაულებზე აკრედიტაციას ვერ მიიღებენ 

(ფოტო: Le Républicain Lorrain) 

თბილისის საქალაქო სასამართლომ 12 ოქტომბერს, ფრანგი ფოტოგრაფის, ფრანსის ნიკოლას პრიმერსკის სარჩელი, რომლითაც ის სახელმწიფო სერვისების განვითარების სააგენტოს მიერ გამოცემული აქტის გაუქმებას მოითხოვდა, არ დააკმაყოფილა. სააგენტომ ამ გადაწყვეტილებით, ფრანგი ფოტოგრაფისთვის ცოტა ხნით ადრე გაცემული მოკლევადიანი დროებითი ბინადრობის ნებართვა ძალადაკარგულად გამოაცხადა. ფრანსის პრიმერსკი წლებია საქართველოში ცხოვრობს. 

------------------------------------
სახელმწიფო სერვისების განვითარების სააგენტომ მიმდინარე წლის გაზაფხულზე ფრანსის პრიმერსკის აცნობა, რომ „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ კანონით დადგენილ მოთხოვნებს აკმაყოფილებდა  და საქართველოში მოკლევადიანი ბინადრობის ნებართვა 2027 წლის 9 მარტამდე გაუგრძელა. თუმცა, 25 მარტის გადაწყვეტილებით, სააგენტომ პრიმერსკის მიმართ გამოცემული ეს აქტი ძალადაკარგულად გამოაცხადა. ფრანგმა ფოტოგრაფმა აპრილში, სწორედ ეს, მისთვის მინიჭებული მოკლევადიანი ბინადრობის ნებართვის გაუქმებასთან დაკავშირებული გადაწყვეტილება გაასაჩივრა. სასამართლოში გასაჩივრებულია ქვეყნის დასატოვებლად მიცემული ვადის გადავადებაზე მიღებული უარიც.  
------------------------------------

„მოუთმენლად ველოდები სასამართლოს წერილობითი გადაწყვეტილების მიღებას, რათა გავეცნო მის დასაბუთებას და ჩემს ადვოკატთან ერთად განვიხილო გასაჩივრების შესაძლო გზები.

საქართველო უკვე ოც წელზე მეტია ჩემი ძირითადი საცხოვრებელი ადგილია. ეს ულამაზესი ქვეყანა, რომლის მიმართაც ღრმა სიყვარული და განსაკუთრებული მიჯაჭვულობა მაკავშირებს, ჩემი ცხოვრების განუყოფელ ნაწილად იქცა. გაურკვევლობა იმის შესახებ, შევძლებ თუ არა აქ დარჩენას, ჩემთვის განსაკუთრებით მტკივნეულია.

მტკიცედ მაქვს გადაწყვეტილი, ღირსეულად და შეუპოვრად გავაგრძელო ეს ბრძოლა იმ იმედით, რომ შევძლებ აქ ჩემი მომავლის შენებას გავაგრძელო, ამ ქვეყანაში, რომელიც უკვე ორ ათეულ წელზე მეტია ჩემი სახლია“, - დაწერა დღეს, 13 ოქტომბერს, პრიმერსკიმ სოციალურ ქსელში. 

მისი ადვოკატი, შორენა ლოლაძე „მედიაჩეკერთან“ საუბრისას განმარტავს, რომ სახელმწიფო სერვისების განვითარების სააგენტოს ბოლოს გამოცემულ აქტში ფაქტობრივი გარემოება, თუ რა დაედო საფუძვლად ფრანგი ფოტოგრაფისთვის გაცემული მოკლევადიანი ბინადრობის ნებართვის გაუქმებას, მითითებული არ არის. მისი თქმით, მასში მხოლოდ კანონის ის მუხლია მოყვანილი, რომელშიც ვკითხულობთ: „თუ იგი ახორციელებს საქმიანობას, რომელიც საფრთხეს უქმნის საქართველოს სახელმწიფო უსაფრთხოებას“.

როგორც ლოლაძე ამბობს, „საინტერესოა ის საკითხიც, რომ კონკრეტულად რა ტიპის დასკვნა გასცა სახელმწიფო უსაფრთხოების სამსახურმა, მხარისთვის უცნობია, რადგან იგი სახელმწიფო საიდუმლოებას წარმოადგენს და მისი გაცნობის უფლება მხოლოდ სასამართლოს აქვს“.

ფრანსის პრიმერსკის თბილისის საქალაქო სასამართლოს მიერ მიღებული გადაწყვეტილების სააპელაციო სასამართლოში გასასაჩივრებლად 14-დღიანი ვადა აქვს, რომელიც დასაბუთებული გადაწყვეტილების ჩაბარებიდან აითვლება.

„მედიაჩეკერმა“ სცადა სახელმწიფო სერვისების განვითარების სააგენტოსთან დაკავშირებაც, გვაინტერესებდა, რა გახდა ფრანგი ფოტოგრაფისათვის გაცემული მოკლევადიანი ბინადრობის ნებართვის გაუქმების მიზეზი. სააგენტოსგან პასუხის მიღების შემთხვებაში მასალა შესაბამისად განახლდება.

„მედიაჩეკერის“ მასალები მსგავს თემაზე: 

• SJC-მა აფგან სადიგოვის გაძევებასთან დაკავშირებით ევროპულ სასამართლოს მიმართა 
• უნგრელმა ჟურნალისტმა, ლასლო მეზეშიმ საქართველო დატოვა, მას გაძევება ემუქრებოდა

„93 ფრაზა, რომლის გამოყენებაც კრიტიკულ ტელევიზიებს ეკრძალებათ“ - „საერთაშორისო გამჭვირვალობა-საქართველომ“ ბოლო 6 თვის განმავლობაში კომუნიკაციების კომისიის მიერ კრიტიკული ტელევიზიებისთვის, „TV პირველი“ და „ფორმულა“, შედგენილი მოხსენებითი ბარათების მიხედვით, იმ სიტყვების ჩამონათვალი გამოაქვეყნა, რასაც კომისია მედიას ედავა. მათ შორისაა: „რეჟიმი“, „სინდისის პატიმრები“, „ოლიგარქი“, „ცრუ მოწმე პოლიციელები“, „პოლიტიკური პატიმრები“, „ივანიშვილის პრემიერი“, „უკანონო პატიმრობა“, „ოცნების ხელისუფლება“, „რეპრესიული კანონები“ და „სასამართლო კლანი“ .

როგორც TI წერს, კომუნიკაციების კომისია ცენზორის როლის შესრულებას განაგრძობს:

„საერთო ჯამში, ბოლო 6 თვეში, კომისიამ კრიტიკულ ტელევიზიებს - „ტელეკომპანია პირველსა“ და „ფორმულას“ ამ მიზეზით მოხსენებითი ბარათები უკვე 7-ჯერ (4-ჯერ „ფორმულას“, 3-ჯერ „ტელეკომპანია პირველს“) შეუდგინა და მათ საფუძველზე, ისინი პირველად ჯერ სიტყვიერად გააფრთხილა, შემდეგ - თითოეული ჯერ 2500 ლარით, მომდევნო ჯერზე კი - 5000 ლარით დააჯარიმა (დეტალებისთვის მიჰყევით ბმულს). უკვე 1 ოქტომბერს კი - ფორმულა დამატებით 10 000 ლარით დააჯარიმა. დიდი ალბათობით, კომისია მავნე პრაქტიკას კვლავაც გააგრძელებს და უახლოეს მომავალში, იმავე მიზეზით ახლა უკვე „ტელეკომპანია პირველსაც“ დააჯარიმებს, რადგანაც, როგორც წესი, კომისია ერთ შეკრულ წრეზე მოძრაობს და მაუწყებლებს რიგრიგობით აჯარიმებს.

აშკარაა, რომ კომუნიკაციების კომისა ამ გზით, ისედაც მძიმე ფინანსურ პირობებში მყოფი ტელევიზიების პარალიზებას ცდილობს. კომისიას მათთვის მაუწყებლობის ლიცენზიის შეჩერების უფლებამოსილებაც აქვს, რაც განსაკუთრებით საგანგაშოა.

მართალია, კომისიამ პარალელურად მონიტორინგის რეჟიმში პროსამთავრობო არხებიც - „იმედი“, „პოსტვ“, „რუსთავი 2“ - მოაქცია, თუმცა პროცესებზე დაკვირვება ტოვებს განცდას, რომ აღნიშნულს მხოლოდ ფორმალური ხასიათი აქვს და დაინტერესებული მხარეებისთვის ობიექტური დამკვირვებლისა და არბიტრის როლის ჩვენებას ემსახურება. იმთავითვე ნათელი იყო, რომ კომისიის მიზანი მხოლოდ კრიტიკული მედიების დასჯა და ფინანსური ჯარიმების გზით მათი დასუსტება ან/და დახურვა იყო“. 

„საერთაშორისო გამჭვირვალობა-საქართველო“ ვრცლად წერს იმაზეც, თუ რას ედავება კომუნიკაციების კომისია კრიტიკულ მაუწყებლებს: „კომუნიკაციების კომისია მაუწყებლებს, როგორც წესი, მიუკერძოებლობის პრინციპის დარღვევას, ასევე ამბების პირადი  დამოკიდებულებისა და მოსაზრების საფუძველზე გაშუქებას ედავება. „საერთაშორისო გამჭვირვალობა-საქართველომ“ კომისიის მიერ კრიტიკული მაუწყებლებისთვის შედგენილი ყველა მოხსენებითი ბარათი შეისწავლა (ჯამში 7 ასეთი დოკუმენტი) და მის მიერ აკრძალული სიტყვები და ფრაზები დააჯამა. გამოირკვა, რომ კომისია კრიტიკულ მაუწყებლებს ჯამში 101 სიტყვისა ან/და ფრაზის გამოყენებას უკრძალავს, აქედან 33-ს „ტელეკომპანია პირველს“, 68-ს კი - „ფორმულას“. გარკვეულ შემთხვევებში, ორი კრიტიკული მაუწყებლისთვის აკრძალული სიტყვებისა და ფრაზების ნაწილი ერთმანეთს კვეთს. ჯამში, კომისია 93 განსხვავებული სიტყვისა და ფრაზის გამოყენებას კრძალავს“.

როგორც ორგანიზაცია წერს, კონკრეტული სიტყვებისა და ფრაზების გარდა, კომუნიკაციების კომისია კრიტიკულ მაუწყებლებს ამბების მშრალად, შეფასებისა და ანალიზისგან სრულად დაცლილად გაშუქებას სთხოვს, „მაგალითად, მოხსენებითი ბარათების მიხედვით, კომისია დაუშვებლად მიიჩნევს ჟურნალისტებისა და წანყვანების შემდეგ ტექსტებსაც:

• „სიტყვის თავისუფლების შეზღუდვის ახალი ეტაპი და კანონის ჩანაცვლება ქუჩის წესრიგით. ქართული ოცნება ეგრეთწოდებული მორალის პოლიციის ჩამოყალიბებას იწყებს. არაფორმალურ დანაყოფს MMA-ის მებრძოლი გიორგი ქართველიშვილი  უხელმძღვანელებს. ჩეჩნური ტიპის რაზმი მყისიერი რეაგირებით ემუქრება ყველას, ვინც მათი  შეფასებით სიწმინდეებს, რელიგიას წინაპრებს და ისტორიას შეურაცხყოფს“.
• „არაფორმალური დანაყოფის ხელმძღვანელმა პრაქტიკულად ძალადობა კამერების წინ დააანონსა. ხელისუფლების მიერ მხარდაჭერილი ჯგუფის სიწმინდეების რელიგიის და ისტორიის შეურაცხყოფაზე მყისიერ რეაგირებას გეგმავს. ეს იდეა კი თურმე ნოდარ დუმბაძის შეურაცხყოფის შემდეგ გაუჩნდა. რეალურად ოცნებამ ჩეჩნური მოდელი დააკოპირა, სადაც სპორტსმენებს ოფიციალურ მანდატს ანიჭებენ და ძალადობის ნებას რთავენ. მმართველი გუნდი და მისი მხარდაჭერილი ძალები თავად გადაწყვეტენ, ვინ, რა ფორმით დასაჯონ და როგორ ჩაახშონ კრიტიკული ხმა“.
• „პოლიციამ აქტივისტებზე ნადირობა გვიან ღამით დაიწყო. ჯერ დააკავეს თორნიკე თოშხუა. კაცი, რომელმაც ციხე რამდენიმე კვირის წინ დატოვა, ქუჩის გამოკითხვას ატარებდა, თუმცა, პოლიციას ნერვებმა უმტყუნა და რამდენიმე წამში დააკავეს, რამაც დიდი სოლიდარობა გამოიწვია და რამდენიმე წუთში საკრებულოსთან ათობით ახალგაზრდა გაჩნდა“.
• „ოცნებას ვაშინგტონშიც პრორუსი პოლიტიკოსი ეიმედება. პროპაგანდა ტრამპის ადმინისტრაციასთან ურთიერთობის აღდგენად ასაღებს ოლიგარქის დეპუტატების ვაშინგტონში ვიზიტს. რეალურად კი მათი მასპინძელი კონსპიროლოგი უკრაინის წინააღმდეგ მოქმედი პოლიტიკოსია, კრემლთან მჭიდრო კავშირებით“.
• „ივანიშვილის ხელისუფლება ქვეყანას ევროკავშირში გაწევრიანების გზას უხშობს და დეზინფორმაციას კიდევ უფრო აძლიერებს, რომ საკუთარი დანაშაული ისევ ევროპას გადააბრალოს. ქართული ოცნების წარმომადგენლები ცდილობენ წარმოაჩინონ, რომ ეს შედეგი ევროპის ორმაგი მიდგომების გამო დადგა და არა მათი პოლიტიკის გამო, რაც ცხადად ფასდება, როგორც დემოკრატიისგან და ევროპული ღირებულებებისგან გადახვევა. ამ დეზინფორმაციისთვის რეჟიმს ძალისხმევის გაძლიერება კიდევ უფრო სჭირდება იმ ფონზე, როცა უკრაინისა და მოლდოვისთვის ევროკავშირში გაწევრიანების მოლაპარაკებები უკვე რეალურად იხსნება… “.
• „… ამ შეძახილებსაც კი ირანის პარლამენტში ირაკლი კობახიძე უპრობლემოდ ისმენდა და ტერორისტების გვერდითაც იდგა“ და სხვ.

კომუნიკაციების კომისია მიიჩნევს, რომ ჟურნალისტების მხრიდან ამ სიტყვებისა და ფრაზების გამოყენება „ორგანოების/ინსტიტუციების საქმიანობის მიმართ მაუწყებლის მოსაზრებისა და პირადი დამოკიდებულების გამოხატვას წარმოადგენს. ამდენად, სახეზეა, მაუწყებლის პირადი დამოკიდებულების ან მოსაზრების საფუძველზე საჯარო პოლიტიკის მიმდინარე საკითხების გაშუქება, რითაც ადგილი აქვს „მაუწყებლობის შესახებ“ საქართველოს კანონის 54-ე მუხლის მე-5 პუნქტის დარღვევას“,“ - წერს TI.

„საერთაშორისო გამჭვირვალობა-საქართველო“ ხაზგასმით აღნიშნავს, რომ საგანგაშოა კომუნიკაციების კომისიის ხელში მაუწყებლების შინაარსობრივი რეგულირების ბერკეტის არსებობა და ამ საფუძველზე, მათთვის ფინანსური სანქციების დაწესებისა და ლიცენზიის შეჩერების უფლების მინიჭება:

„მით უფრო, როდესაც საქართველოში მყარად დამკვიდრებული და აშკარად გამოკვეთილი სახელმწიფოს მიტაცების ფონზე, წლებია, კომისია „ქართული ოცნებისადმი“ ლოიალური და მასთან დაკავშირებული კომისიონერებით არის დაკომპლექტებული (კომინაციების კომისიის წევრების შესახებ დეტალებისთვის მიჰყევით ბმულს) და მის მიერ მიღებულ გადაწყვეტილებებთან დაკავშირებით არაერთი კითხვის ნიშანი არსებობს მმართველი გუნდის ინტერესების გატარებისა და მიკერძოების თვალსაზირისთ. კომინიკაციების კომისია არ უნდა ოპერირებდეს ცენზორის პოზიციიდან და ის არ უნდა იყოს გამოყენებული კრიტიკული მაუწყებლების დასჯის მექანიზმად. ხოლო საერთაშორისო პრაქტიკის გადათვალისწინებით, სადავო საკითხები თვითრეგულირების მექანიზმების ფარგლებში უნდა იხილებოდეს. სწორედ ამ უკანასკნელის წახალისება და ხელშეწყობა უნდა იყოს კომუნიკაციების კომისიის მთავარი მიზანიც და არა „ქართული ოცნების“ ინტერესების სამსახურში ჩადგომა და მაუწყებლების დასჯა მმართველი პარტიის წარმომადგენლების კრიტიკისა და მხილებისთვის“. 

„93 ფრაზა, რომლის გამოყენებაც კრიტიკულ ტელევიზიებს ეკრძალებათ“ - TI-ის მიერ შედგენილი სიის სრულად ნახვა შესაძლებელია ამ ბმულზე. 

კომუნიკაციების კომისიამ „მაუწყებლობის შესახებ“ კანონითა და „მაუწყებელთა ქცევის კოდექსით“ დადგენილი ნორმების პრაქტიკაში ამოქმედება, „რათა მაუწყებელთა ობიექტურობა სათანადო პროცედურის საფუძველზე და მაღალი სამართლებრივი სტანდარტით შეფასდეს“, 6 მარტს, ბრიტანეთის მიერ სამთავრობო ტელეკომპანიების: „იმედისა“ და „პოსტვ“-ის დასანქცირების შემდეგ, დააანონსა. ComCom-ს თვითრეგულირების სფეროში მოქცეული საკითხების განხილვისა და მაუწყებლების დასანქცირების შესაძლებლობა გასული წლის გაზაფხულზე, „მაუწყებლობის შესახებ“ კანონში შესული ცვლილებებით მიეცა. 

2025 წელი პროსამთავრობო ტელეკომპანიებმა: „იმედმა“, „რუსთავი 2“-მა,  POSTV-იმ და „მაესტრომ“ ჯამში, 75.97 მილიონი ლარის ზარალით დაასრულეს, გასულ წელს მოგება - 6.17 მილიონი ლარი მხოლოდ GDS-მა ნახა. წინა წლების განმავლობაში ამ 5 არხის მიერ დაგროვილმა ჯამურმა ზარალმა კი ₾860 მილიონს გადააჭარბა. ტელეკომპანიების ზარალის შესახებ მონაცემები ხელმისაწვდომია სახელმწიფო ანგარიშგების პორტალზე გამოქვეყნებულ წლიურ ფინანსურ ანგარიშებში. 

„იმედი“

reportal.ge-ზე გამოქვეყნებული მონაცემების მიხედვით, 2025 წელს „იმედმა“ ₾43.11 მილიონის ზარალი ნახა, არხის წლების მანძილზე დაგროვილმა ჯამურმა ზარალმა კი ₾497.2 მილიონს მიაღწია. 

ფინანსური ანგარიშის მიხედვით, 2025 წელს არხის შემოსავალი ₾46.58 მლნ იყო, საიდანაც ₾46.06 მილიონი რეკლამებზე მოდის. „იმედმა“ შარშან ₾32.7 მილიონის ხელფასი გასცა, რეიტინგის კვლევების ხარჯად კი 2 მილიონზე მეტია მითითებული. გასულ წელს კომპანიაში საშუალოდ 841 ადამიანი იყო დასაქმებული (39-ით ნაკლები, ვიდრე 2024 წელს).

„მედია ჰოლდინგი“

გასულ წელს 29.3 მილიონი ლარი იზარალა სს „მედია ჰოლდინგმა“, სატელევიზიო არხმა ბრენდული სახელით „რუსთავი 2“. კომპანიის წლების განმავლობაში დაგროვილი ჯამური ზარალი კი 143.3 მილიონი ლარია.

ფინანსური ანგარიშგების მიხედვით, 2025 წელს „მედია ჰოლდინგის“  შემოსავალი - ₾20.29 მლნ, ხარჯი კი ₾49.62 მლნ იყო. ტელეკომპანიამ შარშან 28.34 მლნ ლარის ხელფასი გასცა, რაც 2024 წელთან შედარებით 747 ათასი ლარით მეტია. 

დოკუმენტში აღნიშნულია, რომ 2025 წლის 31 დეკემბრის მდგომარეობით კომპანიის დასაქმებულთა საშუალო რაოდენობა 618 თანამშრომელია (53-ით ნაკლები ვიდრე 2024 წელს).

სს „მედია ჰოლდინგის“ აქციების 90%-ს შპს „პრაიმ თაიმი“ ფლობს, 10%-ის კი - შპს „სამაუწყებლო კომპანია რუსთავი 2“.

POSTV

2025 წელი ზარალით დაასრულა პროპაგანდისტულმა POSTV-მაც. ანგარიშგების პორტალზე გამოქვეყნებული მონაცემებით, შარშან ტელეკომპანიის ზარალმა ₾799 295 შეადგინა, წლების განმავლობაში დაგროვილმა ჯამურმა ზარალმა კი ₾8 635 937-ს მიაღწია.

POSTV-ის ფინანსურ ანგარიშში მითითებულია, რომ არხმა გასულ წელს დასაქმებულთა ანაზღაურებაზე ₾3 933 940 დახარჯა, რაც 2024 წელს ხელფასებზე გაწეულ ხარჯთან შედარებით ₾342 937-ით ნაკლებია.

დიდმა ბრიტანეთმა ქართული სამთავრობო ტელევიზიები: POSTV და „იმედი“ 2026 წლის თებერვალში დაასანქცირა. ორივე ტელევიზიის შემთხვევაში სანქციის მიზეზად რუსეთის მიერ უკრაინაში სრულმასშტაბიანი შეჭრის შესახებ განზრახ გავრცელებული შეცდომაში შემყვანი ინფორმაციებია დასახელებული. 

„მაესტრო“ 

გასული წელი ზარალით დასრულდა შპს „სტუდია მაესტროსთვისაც“. შარშან არხის ზარალმა ₾2.72 მილიონი შეადგინა და ჯამურად, ₾90.17 მილიონს გაუტოლდა. 

ფინანსური ანგარიშის მიხედვით, გასულ წელს „მაესტროს“ მიერ საქონლის გაყიდვიდან და მომსახურების გაწევიდან მიღებულმა ფულადმა სახსრებმა ₾2.92 მილიონი შეადგინა. რაც შეეხება ხელფასებს, არხმა შრომის ანაზღაურებაზე 2025 წელს ₾2.13 მილიონი დახარჯა.

GDS

ზემოთ ჩამოთვლილი ტელეკომპანიებისგან განსხვავებით, „ჯი-დი-ეს თი-ვი“ გამონაკლისია, რომელმაც 2025 წელი მოგებით დაასრულა. ფინანსური ანგარიშის მიხედვით, გასულ წელს ტელეკომპანიის წლიურმა მოგებამ ₾6.17 მილიონი შეადგინა და არხის დაგორვილი ჯამური ზარული ₾121.77 მილიონამდე შემცირდა. 

არხს გასულ წელს ₾7.94 მილიონის შემოსავალი ჰქონდა, საიდანაც ₾7.85 მილიონი სარეკლამო მომსახურებაზე მოდის. „ჯი-დი-ეს თი-ვი“-მ შარშან შრომის ანაზღაურებაზე ჯამში 102 570 ლარი დახარჯა.

რაც შეეხება ხელისუფლების მიმართ კრიტიკულად განწყობილ ტელეკომპანიებს, „TV პირველმა“ 2025 წელს ₾1.04 მილიონით იზარალა, წლების მანძილზე დაგროვილმა ჯამურმა ზარალმა კი ₾14.76 მილიონს მიაღწია.

არხის ფინანსური ანგარიშის მიხედვით, შარშან ტელეკომპანიის ზოგადმა და ადმინისტრაციულმა ხარჯმა ₾7.33 მილიონი შეადგინა, საიდანაც ₾5.14 მილიონი შრომის ანაზღაურებაზე მოდის. 

ტელეკომპანია „ფორმულას“ შემთხვევაში კი, reportal.ge-ზე არხის ფინანსური ანგარიში 2023 წლის შემდეგ ხელმისაწვდომი არ არის. რედაქციას ტელევიზიაში ამის მიზეზად დამოუკიდებელი აუდიტორის დასაქირავებლად საჭირო ფინანსური რესურსის არარსებობა დაუსახელეს, შესაბამისი სახსრების მოძიების შემდეგ კი, მათი თქმით, აღნიშნული დოკუმენტიც მომზადდება.