ბრიტანეთის მიერ სანქცირებულ, პროსამთავრობო ტელეკომპანია POSTV-ში „ხალხის ძალის“ წევრის, ვიქტორ ჯაფარიძის კუთვნილი 52%-იანი წილის ახალ მმართველად გიორგი შენგელია დაინიშნა. ცვლილების რეგისტრაციისთვის საჯარო რეესტრის ეროვნულ სააგენტოს არხის აღმასრულებელმა დირექტორმა და 24%-იანი წილის მფლობელმა, თემურ ჭარელაშვილმა გუშინ, 22 სექტემბერს მიმართა, მონაცემებში ცვლილება კი დღეს აისახა.

გიორგი შენგელია შპს „პოსტივის მხარდამჭერების“ დირექტორი და 100%-იანი წილის მფლობელია. მან ეს ორგანიზაცია სამთავრობო POSTV-ის დასანქცირებიდან მეორე დღეს, 25 თებერვალს დაარეგისტრია. 

ვიქტორ ჯაფარიძემ POSTV-ის წილი სამართავად სხვას უკვე მეორედ გადასცა. 28 იანვარს, არხის დასანქცირებამდე თითქმის 1 თვით ადრე, ჯაფარიძის 52%-იანი წილის მმართველი კასპის მერის ყოფილი მოადგილე, ზაზა მარიდაშვილი გახდა.

ვიქტორ ჯაფარიძემ POSTV-ის საკონტროლო წილი 2022 წლის 3 ოქტომბერს ჯამში 520 000 ლარად იყიდა. არხის დანარჩენ 24-24%-იან წილებს თემურ ჭარელაშვილი და შალვა რამიშვილი ფლობენ. საზოგადოებასთან ურთიერთობის საკითხებში დირექტორი კი ნუგზარ რუხაძეა.

POSTV-ი, სამთავრობო ტელეკომპანია „იმედთან“ ერთად, დიდმა ბრიტანეთმა 24 თებერვალს დაასანქცირა. ორივე ტელევიზიის შემთხვევაში სანქციის მიზეზად რუსეთის მიერ უკრაინაში სრულმასშტაბიანი შეჭრის შესახებ განზრახ გავრცელებული შეცდომაში შემყვანი ინფორმაციები დასახელდა.

დღეს, 23 სექტემბერს, „TV პირველის“ 100%-იანი წილის მფლობელმა და დირექტორმა, ვატო წერეთელმა არხის სამეურვეო საბჭო და მომავალი დირექტორობის კანდიდატი ლევან ჯორბენაძე წარადგინა. ჯორბენაძე პარტია „ლელო - ძლიერი საქართველოს“ სტრატეგიული კომუნიკაციების დეპარტამენტს ხელმძღვანელობდა. 

როგორც „TV პირველი“ წერს, საბჭოს პირველი შეხვედრა ტელევიზიაში დღეს გაიმართა. არხის საზოგადოებრივ მრჩეველთა საბჭოში კი, რომელსაც ვატო წერეთელი უხელმძღვანელებს, არიან: ირაკლი მელაშვილი, დოდო შონავა, გიორგი მშვენიერაძე, გია ხუხაშვილი, დავით ძიძიშვილი, ირაკლი აფაქიძე, ზაალ უდუმაშვილი, ინგა გრიგოლია და თამარ ჯინჭარაძე. 

„“TV პირველის“ მთავარი ღირებულებები ყოველთვის იყო დამოუკიდებლობა, სიმართლე და საზოგადოების წინაშე პასუხისმგებლობა.

მაქსიმალური ღიაობა, ტელევიზიის განვითარებასა და ყოველდღიურ ცხოვრებაში საზოგადოების ჩართულობა ჩვენი გუნდის მთვარი გამოწვევაა - ამ გზაზე დგება თანამედროვე, განვითარების შემდგომ ეტაპზე გადასვლისა და ახალი მედიასტანდარტის დანერგვის დრო.

ჩემი და ჩვენი გუნდის გადაწყვეტილებით შეიქმნა „TV პირველის” საზოგადოებრივ მრჩეველთა საბჭო, რომელსაც თავად მე ვუხელმძღვანელებ. საბჭო აერთიანებს მედიის, კულტურისა და საზოგადოებრივი სფეროს ავტორიტეტულ წარმომადგენლებს - ირაკლი მელაშვილს, დოდო შონავას, გიორგი მშვენიერაძეს, გია ხუხაშვილს, დავით ძიძიშვილს, ირაკლი აფაქიძეს, ზაალ უდუმაშვილს, ინგა გრიგოლიას და თამარ ჯინჭარაძეს. ეს ადამიანები ხელს შეუწყობენ „TV პირველში“ ახალი იდეების გენერირებას, არხის განვითარებასა და მოქალაქეების აქტიურ ჩართულობას პროცესებში.

პირველ სამუშაო შეხვედრაზე საბჭოს წარვუდგინე დირექტორობის ახალი კანდიდატი - ლევან ჯორბენაძე, რომელიც ყველა იდეის განხორციელებაში დაგვეხმარება.

მჯერა, რომ  ეს ცვლილებები მეტი შესაძლებლობებისა და „TV პირველის“ განვითარების ახალი ეტაპის დასაწყისია“, - დაწერა წერეთელმა სოციალურ ქსელში. 

„TV პირველში“ დაგეგმილი ცვლილებები ჯერ საჯარო რეესტრში ასახული არ ასახულა. სუბიექტის რეგისტრირებულ მონაცემებში ცვლილებებისთვის წარმოება განცხადების საფუძველზე უნდა დაიწყოს. 

„სოციალური სამართლიანობის ცენტრმა“ აზერბაიჯანელი ჟურნალისტის, აფგან სადიგოვის საქმეზე ადამიანის უფლებათა ევროპულ სასამართლოში კიდევ ერთი საჩივარი წარადგინა. ის 2026 წლის 5 აპრილს ფეისბუქის პოსტის გამო სადიგოვის სამართალდამრღვევად ცნობასა და საქართველოდან აზერბაიჯანში მის გაძევებას ეხება და ევროპული კონვენციის მე-6, მე-10 და მე-18 მუხლების დარღვევაზე მიუთითებს. როგორც ორგანიზაცია აღნიშნავს, ეს საჩივარი დამოუკიდებელია იმ საქმისგან, რომელიც ევროპულ სასამართლოში ამჟამად განიხილება და რომელიც საექსტრადიციო პროცედურებს, ჟურნალისტის პატიმრობასა და კონვენციის 34-ე მუხლის შესაძლო დარღვევას შეეხება. 

„ფეისბუქ-პოსტის გამო, რომელიც ჩვენი მოსაზრებით, გამოხატვის თავისფულების ფარგლებში ექცეოდა, მას ადმინისტრაციული სამართალდარღვევათა კოდექსის 173-ე მუხლის მე-2 ნაწილით გათვალისწინებული ყველა სანქცია ერთდროულად — 2 000 ლარის ჯარიმა, ქვეყნიდან გაძევება და შემოსვლის აკრძალვა კანონით დადგენილი მაქსიმალური, სამწლიანი ვადით შეეფარდა. პოსტი ეხებოდა პოლიციის ქმედებებს მშვიდობიან აქციებზე, ანუ საჯარო ინტერესის საკითხს, და წარმოადგენდა შეფასებით მსჯელობას, რომელსაც თან ერთვოდა ავტორის მიერვე გადაღებული ვიდეომასალა. ამ არგუმენტებზე დაყრდნობით, საჩივარში მივუთითეთ, რომ აღნიშნული ფეისბუქ-პოსტის გამო სადიგოვისთვის ადმინისტრაციულ პასუხისგების დაკისრებითა და ქვეყნიდან გაძევებით, დაირღვა მისი კონვენციის მე-10 მუხლით დაცულ გამოხატვის თავისუფლების უფლება.

საჩივარში ასევე მივუთითეთ, მოსამართლე თორნიკე ქოჩქიანის მიერ წარმართული თბილისის საქალაქო სასამართლოში გამართულ ადმინისტრაციულ სამართალდარღვევის სხდომაზე სადიგოვის სამართლიანი სასამართლოს უფლება (კონვენციის მე-6 მუხლი) დაირღვა. ადვოკატს პროცესის შესახებ შუაღამისას აცნობეს, საქმის მასალების გასაცნობად მხოლოდ ოცდაათი წუთი მიეცა, სხდომის გადადების შუამდგომლობა კი დაუსაბუთებლად არ დაკმაყოფილდა. ასევე, სასამართლომ არ დაამკაყოფილა ჩვენი შუამდგომლობები, საქმეს მტკიცებულებად დართვოდა სტრასბურგის სასამართლოს დროებითი ღონისძიების გადაწყვეტილებები მისი აზერბაიჯანისთვის გადაცემის აკრძალვასთან დაკავშირებით.

მესამე, ჩვენ მივუთითეთ, რომ სადიგოვის გაძევებით დაირღვა კონვენციის მე-18 მუხლი მე-6 და მე-10 მუხლებთან ერთობლიობაში. მოვლენათა თანმიმდევრობა ქმნის დასაბუთებულ ეჭვს, რომ ადმინისტრაციული სამართალდარღვევის საქმე არ იყო რეალური რეაგირება ფეისბუქ-პოსტზე, არამედ გამოყენებულ იქნა როგორც სამართლებრივი ინსტრუმენტი ევროპული სასამართლოს დროებითი ღონისძიების გვერდის ავლისა და ჟურნალისტის აზერბაიჯანისთვის გადაცემის მიზნით.

საქმის შემდგომმა განვითარებამ ეს ეჭვები კიდევ უფრო გააძლიერა. აზერბაიჯანში დაბრუნების შემდეგ ჟურნალისტი არაერთხელ დააკავეს, 26 მაისს მას ქვეყნიდან გასვლა აუკრძალეს, ხოლო 8 ივნისს ბაქოს ბინაგადის რაიონულმა სასამართლომ გააუქმა 1 აპრილს მიღებული დევნის შეწყვეტის გადაწყვეტილება და იმავე დღეს ჟურნალისტს წინასწარი პატიმრობა შეეფარდა — ზუსტად იმ ბრალდებებზე, რომლებზეც ადრე ექსტრადიცია მოითხოვებოდა. მისი პატიმრობა 2026 წლის 30 ოქტომბრამდე გაგრძელდა“, - ვკითხულობთ SJC-ის განცხადებაში.

„სოციალური სამართლიანობის ცენტრი“ აზერბაიჯანის ხელისუფლებას მოუწოდებს, დაუყოვნებლივ გაათავისუფლოს აფგან სადიგოვი და უზრუნველყოს მისი დაცვა წამებისა და არასათანადო მოპყრობისგან. 

„აფგან სადიგოვის იმავე საქმეზე დაპატიმრება ცხადია, რომ ქმნის გონივრულ ეჭვს, რომ საქართველოსა და აზერბაიჯანის ხელისუფლებებს შორის ტრანსნაციონალური რეპრესიის მიზნით მაღალი დონის კოორდინაციისა და სამართლებრივი პროცედურების ბოროტად გამოყენების შესახებ.

აღსანიშნავია, რომ ტრანსნაციონალური რეპრესია თანამედროვე ავტორიტარული რეჟიმების ერთ-ერთ ყველაზე სახიფათო პრაქტიკად მიიჩნევა და მოიცავს შემთხვევებს, როდესაც სახელმწიფოები საკუთარი საზღვრების მიღმაც ცდილობენ კრიტიკული ჟურნალისტების, უფლებადამცველებისა და პოლიტიკური ოპონენტების გადაადგილების, საქმიანობისა და უსაფრთხოების კონტროლს. აფგან სადიგოვის საქმე სწორედ ასეთი პრაქტიკის მკაფიო მაგალითს წარმოადგენს, რადგან მისი დევნა აღარ შემოიფარგლება მხოლოდ ერთი სახელმწიფოს იურისდიქციით და მოიცავს სხვადასხვა სახელმწიფო ინსტიტუტის თანმიმდევრულ მოქმედებებს, რომელთა საბოლოო შედეგი ჟურნალისტის თავისუფლების აღკვეთა გახდა.

განსაკუთრებით საგულისხმოა, რომ საქმე ეხება იმავე სისხლის სამართლის ბრალდებებს, რომელთა საფუძველზეც წარსულში მისი ექსტრადიცია მოითხოვებოდა, მოგვიანებით კი თავად აზერბაიჯანის ხელისუფლებამ დევნის შეწყვეტის გადაწყვეტილება მიიღო. ამ პირობებში სისხლის სამართლის საქმის ხელახალი გააქტიურება და ჟურნალისტის დაპატიმრება აჩენს სერიოზულ კითხვებს სისხლის სამართლის მექანიზმების პოლიტიკური მიზნებისთვის გამოყენების და კონვენციური ვალდებულებების უხეში და მიზანმიმართული დარღვევის შესახებ.

ამ ეჭვებს ჯერ კიდევ აპრილის თვეში ამძაფრებდა ის გარემოება, რომ აფგან სადიგოვის ქვეყნიდან გაძევება დაემთხვა აზერბაიჯანის პრეზიდენტის, ილჰამ ალიევის თბილისში ვიზიტს და ბიძინა ივანიშვილთან შეხვედრას. ამასთან, მიმდინარე წლის მაისში, ასევე ცნობილი გახდა ორმხრივი საკოორდინაციო საბჭოს პროტოკოლის შესახებ, რომლის თანახმადაც სრულ ექსპლუატაციაში შევიდა ბაქო–თბილისი–ყარსის ახალი სარკინიგზო მონაკვეთი. ამასთან, გაფორმდა 20-წლიანი მთავრობათაშორისი შეთანხმება საქართველოსა და აზერბაიჯანს შორის ელექტროენერგიის მიწოდებისა და სატრანზიტო მიმოსვლის ძირითადი პირობების შესახებ“.

როგორც SJC-ი წერს, მოვლენათა ქრონოლოგია ქმნის შთაბეჭდილებას, რომ სისხლის სამართლის პროცედურები წინასწარ განსაზღვრული პოლიტიკური შედეგის მისაღწევად იქნა გამოყენებული:

„თავდაპირველად სისხლისსამართლებრივი დევნის შეწყვეტამ შესაძლებელი გახადა საქართველოდან აფგან სადიგოვის მიმართ მოქმედი სამართლებრივი შეზღუდვების მოხსნა და მისი ქვეყნიდან გაძევება, ხოლო შემდგომ იმავე საქმის ხელახალმა გააქტიურებამ აზერბაიჯანის ხელისუფლებას მისი დაუყოვნებლივი დაკავების შესაძლებლობა მისცა. ასეთი თანმიმდევრობა კიდევ უფრო აძლიერებს ეჭვს, რომ სამართლებრივი მექანიზმები გამოყენებული იყო არა მართლმსაჯულების ინტერესებისთვის, არამედ კონკრეტული პოლიტიკური მიზნების მისაღწევად.

სამწუხაროდ, საქართველო უკვე მრავალი წელია აზერბაიჯანის მიმართ ლოიალურ დამოკიდებულებას ავლენს და, მათ შორის, არ ერიდება ადამიანის უფლებათა დაცვის აბსოლუტური პრინციპების უგულებელყოფას. აფგან სადიგოვის საქმეში კი საქართველომ პირველად უახლოეს ისტორიაში ღიად და დემონსტრაციულად დაარღვია ადამიანის უფლებათა ევროპული სასამართლოს გადაწყვეტილება და დროებითი ღონისძიების გამოყენების შესახებ სავალდებულო გადაწყვეტილების მიუხედავად, დევნილი ჟურნალისტი აზერბაიჯანს გადასცა“.

„სოციალური სამართლიანობის ცენტრის“ 23 სექტემბრის განცხადებაში აღწერილია განვითარებული მოვლენების ქრონოლოგია და საერთაშორისო რეაქციებიც. ვრცლად განცხადება იხილეთ აქ. 

კომუნიკაციების კომისიის ახალმა წევრმა, ანი ვაზაგაშვილმა 2025 წელს სამთავრობო ტელეკომპანია „იმედიდან“ ხელფასის სახით (ხელზე ასაღები) 61 571.6 ლარი აიღო, „მაესტროდან“ კი - 6 030 ლარი. 

„ქართული ოცნების“ პარლამენტმა ბრიტანეთის მიერ სანქცირებული „იმედის“ იურიდიული დეპარტამენტის უფროსი, ანი ვაზაგაშვილი კომუნიკაციების კომისიის წევრად მიმდინარე წლის აპრილში აირჩია. გაზაფხულზე კომისიის წევრობის ვადა ვახტანგ აბაშიძეს ამოეწურა. ცნობისთვის, აბაშიძემ 2025 წელს ComCom-დან ხელფასის სახით 192 973.68 ლარი აიღო.

კომისიამდე ვაზაგაშვილი ტელეკომპანია „მაესტროს“ იურიდიულ სამსახურსაც ხელმძღვანელობდა. ის „იმედსა“ და „მაესტროში“ 2024 წლის ივნისიდან მუშაობდა.

ტელევიზიებამდე, 2019 წლიდან ანი ვაზაგაშვილი შინაგან საქმეთა სამინისტროს საპატრულო პოლიციის დეპარტამენტის სამართლებრივი უზრუნველყოფისა და ადმინისტრაციული საქმისწარმოების სამმართველოს მთავარი სპეციალისტი/იურისტი იყო.  

                                                    
2023 წლიდან სამთავრობო ტელეკომპანია „იმედში“ მუშაობდა კომუნიკაციების კომისიის თავმჯდომარე, გოგა გულორდავაც. ის მონიტორიგის და აუდიტის ხელმძღვანელი იყო. გულორდავამ 2025 წელს „იმედიდან“ ხელფასის სახით (ხელზე ასაღები) 166 428 ლარი აიღო. 

კომისიამდე, 2020 წლიდან, ის მუშაობდა სს „საქართველოს სახელმწიფო ელექტროსისტემაშიც“. 2016-2020 წლებში გულორდავა „ქართული ოცნების“ მაჟორიტარი დეპუტატი იყო, 2013-2016 წლებში კი - წალენჯიხის მუნიციპალიტეტის გამგებელი. 

გოგა გულორდავასა და ანი ვაზაგაშვილის გარდა, კომუნიკაციების კომისიის წევრები არიან: ნათია კუკულაძე, ეკატერინე იმედაძე და ივანე მახარაძე.
                                                    

თანამდებობის პირის ქონებრივი მდგომარეობის შესახებ დეკლარაციის მიხედვით, ვაზაგაშვილის მფლობელობაშია 2018 და 2023 წლებში შეძენილი, $46 000-ისა და $105 000-ის ღირებულების 2 ბინა გორსა და თბილისში. 2021 წელს, მან $14 000-ად გორში კომერციული ფართიც შეიძინა. ანი ვაზაგაშვილის საკუთრებაშია 2024 წელს $10 000-ად შეძენილი Lexus-ის მარკის მსუბუქი ავტომანქანაც. 

კომუნიკაციების კომისიის წევრს დეკლარაციაში მითითებული აქვს, რომ მან 2025 წელს, ჯამში 102 000 ლარის 2 სესხი აიღო:

                                                    
კომუნიკაციების კომისიამ ბრიტანეთის მიერ სამთავრობო ტელეკომპანიების: „იმედისა“ და postv-ის დასანქცირების შემდეგ, „მაუწყებლობის შესახებ“ კანონითა და „მაუწყებელთა ქცევის კოდექსით“ დადგენილი ნორმების პრაქტიკაში ამოქმედება დააანონსა, „რათა მაუწყებელთა ობიექტურობა სათანადო პროცედურის საფუძველზე და მაღალი სამართლებრივი სტანდარტით შეფასდეს“.

მას შემდეგ კომისიამ მედიამომსახურებების რეგულირების დეპარტამენტის მიერ ჩატარებული მედიამონიტორინგის საფუძველზე, „მაუწყებლობის შესახებ“ კანონის იმ მუხლების დარღვევისთვის, რომელიც შინაარსობრივ რეგულირებას შეეხება, ორ-ორჯერ, 2 500 და 5 000 ლარით დააჯარიმა ხელისუფლების მიმართ კრიტიკულად განწყობილი ტელეკომპანიები „TV პირველი“ და „ფორმულა“, ერთხელ, 2 500 ლარით კი - პროსამთავრობო „პოსტვ“-ი. კომისიამ ეს მაუწყებლები, „იმედთან“ ერთად, პირველად აპრილში წერილობით გააფრთხილა. გაფრთხილების შემდეგ, კომისიას არ განუხილავს პროსამთავრობო ტელეკომპანია „იმედის“ მიერ კანონმდებლობის ამავე საფუძვლით შესაძლო დარღვევის საკითხი. ComCom-მა წერილობით გააფრთხილა „რუსთავი 2“-იც.  

კომუნიკაციების კომისიას თვითრეგულირების სფეროში მოქცეული საკითხების განხილვისა და მაუწყებლების დასანქცირების შესაძლებლობა გასული წლის გაზაფხულზე, „მაუწყებლობის შესახებ“ კანონში შესული ცვლილებებით მიეცა. 

„ვინ არიან ივანიშვილის ახალი ცენზორები კომუნიკაციების კომისიაში?“ - „საერთაშორისო გამჭვირვალობა - საქართველომ“ აპრილში, ანი ვაზაგაშვილის ComCom-ის წევრად არჩევის შემდეგ, ანგარიში ამ სათაურით გამოაქვეყნა. მასში მიმოხილულია რა როლს ასრულებს კომისია პრაქტიკაში, ვინ არიან კომუნიკაციების კომისიის ძველი და ახალი წევრები და რა აკავშირებთ მათ „ქართული ოცნებასთან“. TI-ის მასალა იხილეთ აქ.  

„სინათლე არ უნდა ჩაქრეს“ - სარეკლამო სააგენტო Windfor’s-ი „სინათლე მედიას“ მხარდასაჭერად შექმნილი კამპანიით კრეატიული ინდუსტრიის საერთაშორისო ფესტივალის, Ad Black Sea 2026-ის გრანპრის მფლობელი გახდა, „სინათლე მედია“ კი - წლის საუკეთესო დამკვეთი. 

Windfor’s-მა, Advan Production-თან ერთად, „სინათლე მედიას“ ქსელში შემავალი დამოუკიდებელი ონლაინმედიების მხარდასაჭერად კამპანია - „სიმართლე მხოლოდ სინათლეში ჩანს!“ ივლისში დაიწყო. ვიდეორგოლთან ერთად გამოიცა გაზეთიც, რომლის წაკითხვაც მხოლოდ შუქის დახმარებით არის შესაძლებელი და მოეწყო ინტერაქციული გამოფენა. 

GRAND PRIX FOR GOOD-თან ერთად, ამ კამპანიისთვის Windfor’s-ი 4 ოქროს, 2 ვერცხლისა და 5 ბრინჯაოს პრიზითაც დაჯილდოვდა. Ad Black Sea-ის წლევანდელ ფესტივალზე „სინათლე მედიას“ მხარდამჭერი კამპანია16 კატეგორიაში იყო წარდგენილი. გამარჯვებული ნამუშევრების სრულ ჩამონათვალს ნახავთ აქ. 

დაჯილდოების ღონისძიების დასრულების შემდეგ, Windfor’s-ის სტარტეგიის გუნდის ხელმძღვანელმა, მარიამ ჩხაიძემ „მედიაჩეკერთან“ დამოუკიდებელი ონლაინ მედიების ერთობის მნიშვნელობაზეც ისაუბრა: „ეს ერთობა ძალიან შთამაგონებელია ჩვენთვის, ამიტომ ჩვენ ყოველთვის გვინდოდა, რომ რაღაც წვლილი შეგვეტანა ამ ყველაფერში, მადლობაც კი გვეთქვა და ეს კამპანია რეალურად იმისთვის გავაკეთეთ, რომ ხალხისთვის მოგვეწოდებინა, რომ გააძლიერონ დამოუკიდებელი ონლაინ მედია… საქართველოში, ქალაქის სხვადასხვა ქუჩაში ძალიან ბევრი საპროტესტო გზავნილია, რომელიც გადაშლილია, ფარავს რეალურად იმ გამოძახილს, რაც აქვთ ადამიანებს, იმ პროტესტს, რასაც გამოხატავს საზოგადოება და ჩვენ ამოვანათეთ ეს გზავნილები, ხელახლა შევძელით მათი წარმოჩენა და ამით მთავარი გზავნილი ვთქვით, რომ „სიმართლე მხოლოდ სინათლეში ჩანს“ და რამხელა როლი აქვს „სინათლე მედიას“, ანუ დამოუკიდებელ ონლაინ მედიას ჩვენს ყოველდღიურობაში“.

Ad Black Sea-ის თანადამფუძნებელმა და სარეკლამო სააგენტო Windfor’s-ის დამფუძნებელმა, ვატო ქავთარაძემ კი აღნიშნა: „“სინათლე მედია“ რაღაც განსაკუთრებული სიზუსტით გამოხატავდა იმას, რისი თქმაც გვინდოდა, იმიტომ რომ ჩვენი მტერი ახლა რასაც შვება, არის, რომ ჩვენ კოლექტიურ მეხსიერებას შლის ამა თუ იმ ფორმით და ეს ძალიან ნათელი და ისეთი, გამოხატული მაგალითი იყო, როდესაც ამ სტენსილებს მეორე დღესვე რაღაც სამსახური შავ ფერებად აქცევს და ზუსტად ამავე კონტექსტში „სინათლე მედია“, რომელიც თავისთავად „სინათლე“ სიტყვის მნიშვნელობიდან გამომდინარე რასაც გულისხმობს და ამ კონკრეტულ შემთხვევაში, მინათებული სინათლით ვაცოცხლებდით იმ წაშლილ ფრაზებს…ალბათ, ერთ-ერთი მნიშვნელოვანი, რატომაც გამოარჩია ეს ჟიურიმ, იყო ზუსტად ეგ, რომ აი, ზუსტად ასახავდა იმას, რასაც სინათლე და სიბნელესთან ბრძოლა გულისხმობს“.

კრეატიული ინდუსტრიის საერთაშორისო ფესტივალის - Ad Black Sea 2026-ის დახურვისა და დაჯილდოების ცერემონია ბათუმში, 12 სექტემბერს გაიმართა. სამდღიან ფესტივალზე კონკურსის მონაწილეები ერთმანეთს 13 ძირითად კატეგორიაში, მათ შორის ბრენდინგის, დიზაინის, ციფრული კომუნიკაციისა და ფილმის მიმართულებით, ეჯიბრებოდნენ. Windfor’s-თან ერთად, AD Black Sea 2026-ის გრანპრის მფლობელი გახდა სააგენტო Playmakers-ი. ნამუშევრები 20-ზე მეტი ქვეყნიდან მოწვეულმა 30-ზე მეტმა საერთაშორისო ექსპერტმა შეაფასა. AD Black Sea-ის მე-10 საიუბილეო ფესტივალის მთავარი გზავნილი იყო ON THE EDGE - Festival of Creative Resistance.

„სინათლე მედია“ დამოუკიდებელი ონლაინმედიების სოლიდარობისა და მდგრადობის ქსელია, რომელიც მათ ფინანსურ, იურიდიულ და ოპერაციულ მხარდაჭერას უზრუნველყოფს. „სინათლე მედიას“ მხარდამჭერი შეუძლია გახდეს ნებისმიერ ადამიანს, ვისთვისაც მნიშვნელოვანია ქვეყანაში თავისუფალი მედიის არსებობა. მხარდაჭერა შესაძლებელია როგორც ერთჯერადი, ისე ნებისმიერი თანხის ყოველთვიური გადარიცხვით.

დამოუკიდებელმა ონლაინ მედიებმა ერთობლივი კამპანია - „სინათლე არ უნდა ჩაქრეს“ შარშან, 13 აგვისტოს დაიწყეს. ამ დღეს, იმ რეალური საფრთხის საჩვენებლად, რომ მათ გაქრობა ემუქრებათ, 22 ონლაინ გამოცემის ვებგვერდი დროებით, სიმბოლურად გაითიშა. მალევე გაიმართა ფარნების მარში და ფოტოგამოფენა. ამ კამპანიის ფარგლებში „სინათლე მედიამ“ საახალწლო და საგაზაფხულო ფლიმარკეტები მოაწყო და არაერთ ღონისძიებაში მიიღო მონაწილეობა. 

კომუნიკაციების კომისიამ პროსამთავრობო ტელეკომპანია „რუსთავი 2“ (სს „მედია ჰოლდინგი“) ახალი ამბების პირადი დამოკიდებულების/მოსაზრებების საფუძველზე გაშუქებისთვის წერილობით გააფრთხილა. როდესაც მაუწყებელი ბოლო ერთი წლის განმავლობაში მსგავსი ხასიათის დარღვევისთვის სანქცირებული არ არის, კომისია მას პირველ ჯერზე წერილობით აფრთხილებს.

კომისიამ „რუსთავი 2“-ის მიერ კანონმდებლობის შესაძლო დარღვევის საკითხი წინა ხუთშაბათს განიხილა, გადაწყვეტილება კი დღეს, 10 სექტემბერს გამოაცხადა. 3 სექტემბრის სხდომაზე ამ საკითხის მოხსენებელმა თქვა, რომ მედიამომსახურებების რეგულირების დეპარტამენტმა, პერიოდული მონიტორინგის ფარგლებში, „რუსთავი 2“-ის ეთერში 10-12 აგვისტოს გასული ახალი ამბების პროგრამები შეამოწმა და გამოავლინა, რომ ტელეკომპანია ახალ ამბებს პირადი მოსაზრებისა და დამოკიდებულების საფუძველზე გადასცეს, რითაც „მაუწყებლობის შესახებ“ კანონის 54-ე მუხლის - „სამართლიანობა და მიუკერძოებლობა“ მე-5 პუნქტი დაარღვია.  

დარღვევის მაგალითებად პავლე ბერიამ ახალი ამბების გაშუქებისას წამყვანის მიერ გამოყენებული შემდეგი ფრაზები დაასახელა: „კონცერტები რუსეთში აგვისტოს ომის შემდეგ და იძულებითი მეტამორფოზა უკრაინის ომზე“, „დუმილის კომფორტი მათ მხოლოდ უკრაინის ომმა დაურღვია და ისიც მხოლოდ იმიტომ, რომ გლობალურმა ტრენდმა აიძულა მორალური ამნეზიიდან გამოსულიყვნენ“, „ოპოზიციის პასიურობით გაბრაზებული ბელადი და პლიაჟზე წამოკოტრიალებული ოპოზიცია“, „კეთილდღეობა სხვების ხარჯზე“, „სკანდალური განცხადებაც არ გამოდის სპონტანური და ის იმ სცენარის ნაწილია, რომლითაც საქართველოს საერთაშორისო იმიჯის დაზიანება უნდა მოხდეს“, „რევანშით ანთებული ბელადი“, „ახლა მას სურს ერთპიროვნული მმართველობა ოპოზიციაში, ერთპიროვნულად იღებს გადაწყევტილებებს საკუთარ პარტიაში, თუმცა მას მორჩილი უმრავლესობა სჭირდება სხვა პარტიებშიც, რათა მათი მთავარი დღის წესრიგი აგებული იყოს მისი ციხიდან გათავისუფლებაზე“. 

საკითხის განხილვას ესწრებოდა „რუსთავი 2“-ის წარმომადგენელიც. მისი თქმით, არხი შეეცდება, რომ გაითვალისწინოს კომისიის მითითება, თუმცა „ჩვენი მიზანი არ ყოფილა, რომ სპეციალურად რაღაც დარღვევა გვქონოდა“. 

კომუნიკაციების კომისიამ მედიამომსახურებების რეგულირების დეპარტამენტის მიერ ჩატარებული მედიამონიტორინგის საფუძველზე, „მაუწყებლობის შესახებ“ კანონის იმ მუხლების დარღვევისთვის, რომელიც შინაარსობრივ რეგულირებას შეეხება, უკვე ორ-ორჯერ, 2 500 და 5 000 ლარით დააჯარიმა ხელისუფლების მიმართ კრიტიკულად განწყობილი ტელეკომპანიები „TV პირველი“ და „ფორმულა“, ხოლო ერთხელ, 2 500 ლარით - პროსამთავრობო „პოსტვ“-ი. კომისიამ ეს მაუწყებლები, „იმედთან“ ერთად, პირველად წერილობით აპრილში გააფრთხილა. გაფრთხილების შემდეგ, კომისიას არ განუხილავს პროსამთავრობო ტელეკომპანია „იმედის“ მიერ კანონმდებლობის ამავე საფუძვლით შესაძლო დარღვევის საკითხი. 

-------------------------------------  

კომუნიკაციების კომისიამ „მაუწყებლობის შესახებ“ კანონითა და „მაუწყებელთა ქცევის კოდექსით“ დადგენილი ნორმების პრაქტიკაში ამოქმედება, „რათა მაუწყებელთა ობიექტურობა სათანადო პროცედურის საფუძველზე და მაღალი სამართლებრივი სტანდარტით შეფასდეს“, 6 მარტს, ბრიტანეთის მიერ სამთავრობო ტელეკომპანიების: „იმედისა“ და „პოსტვ“-ის დასანქცირების შემდეგ, დააანონსა. ComCom-ს თვითრეგულირების სფეროში მოქცეული საკითხების განხილვისა და მაუწყებლების დასანქცირების შესაძლებლობა გასული წლის გაზაფხულზე, „მაუწყებლობის შესახებ“ კანონში შესული ცვლილებებით მიეცა.
                                                                                          
კომუნიკაციების კომისიას 29 იანვრიდან ახალი თავმჯდომარე - გოგა გულორდავა ჰყავს. მან 2025 წელს, სამთავრობო ტელეკომპანია „იმედიდან“ ხელფასის სახით (ხელზე ასაღები) 166 428 ლარი აიღო. გულორდავა „იმედში“ 2023 წლიდან მუშაობდა, ის მონიტორიგის და აუდიტის ხელმძღვანელი იყო.

კომისიამდე, 2020 წლიდან გოგა გულორდავა მუშაობდა სს „საქართველოს სახელმწიფო ელექტროსისტემაშიც“. ის 2016-2020 წლებში „ქართული ოცნების“ მაჟორიტარი დეპუტატი იყო, 2013-2016 წლებში კი - წალენჯიხის მუნიციპალიტეტის გამგებელი. 

აპრილში კომუნიკაციების კომისიის წევრი გახდა „იმედის“ იურიდიული დეპარტამენტის უფროსიც, ანი ვაზაგაშვილი. ის ტელეკომპანია „მაესტროს“ იურიდიული სამსახურის ხელმძღვანელიც იყო. 2024 წლამდე, ამ ტელევიზიებში მუშაობის დაწყებამდე, ვაზაგაშვილი შინაგან საქმეთა სამინისტროს საპატრულო პოლიციის დეპარტამენტის სამართლებრივი უზრუნველყოფისა და ადმინისტრაციული საქმისწარმოების სამმართველოს მთავარი სპეციალისტი/იურისტი იყო. 

გოგა გულორდავასა და ანი ვაზაგაშვილის გარდა, კომუნიკაციების კომისიის წევრები არიან: ნათია კუკულაძე, ეკატერინე იმედაძე და ივანე მახარაძე. 

გამომძიებელ ჟურნალისტთა გაერთიანება „აი, ფაქტს“ 2026 წლის Free Media Awards-ი („თავისუფალი მედიის ჯილდო“) გადაეცემა.

„“აი, ფაქტი“ იღებს თავისუფალი მედიის ჯილდოს იმ გამოძიებებისთვის, რომლებსაც საქართველოში დიდი საზოგადოებრივი ინტერესი აქვს და რომელთა დაფარვასაც სხვები ცდილობენ. თბილისში დაფუძნებული მედიის გამომძიებელი ჟურნალისტები დგანან ისეთი მასშტაბური გამოძიებების უკან, რომელიც ეხება ქვეყანაში რუსულ გავლენებს, „ქართულ ოცნებასთან“ კავშირებს და სახელმწიფო დონეზე ელიტურ კორუფციებს“, - ვკითხულობთ Free Media Awards 2026-ის გამარჯვებულების შესახებ გავრცელებულ განცხადებაში.

„აი, ფაქტთან“ ერთად 2026 წლის „თავისუფალი მედიის ჯილდოს“ ფლობელები გახდნენ:

• გამომძიებელი ჟურნალისტი Mykhailo Tkack უკრაინიდან;
• ონალინ მედია Factor TV სომხეთიდან;
• ონლაინ მედია Verstka  რუსეთიდან (ემიგრაციაში);
• ჟურნალისტი და მედია მენეჯერი Andrei Aliaksandrau ბელორუსიდან, რომელიც პატიმრობაში იმყოფება.

Free Media Awards-ი ნორვეგიული The Fritt Ord Foundation-ისა და გერმანული The Zeit Stiftung Bucerius-ის მიერ არის დაარსებული. ის ყოველწლიურად გადაეცემა აღმოსავლეთ და ცენტრალური ევროპის ქვეყნებში მომუშავე მედიაგამოცემებს ან ჟურნალისტებს, რომლებიც განსაკუთრებულ როლს თამაშობენ დამოუკიდებელი მედიისა და სიტყვის თავისუფლების დაცვაში.

შარშან პრესის თავისუფლების მხარდამჭერი ეს ჯილდო „ბათუმელები“/„ნეტგაზეთის“ დამფუძნებელმა, პარიმრობაში მყოფმა მზია ამაღლობელმა მიიღო. 

„აჭარის ტელევიზიის“ წამყვანი, მეტეოროლოგი კობა ფარტენაძე ბათუმის საქალაქო სასამართლოს მოსამართლე ალექსანდრე გოგუაძემ ადმინისტრაციულ სამართალდამრღვევად ცნო და 2000 ლარით დააჯარიმა. 

კობა ფარტენაძე გუშინ შინაგან საქმეთა სამინისტროს თქმით, პოლიციის შეურაცხყოფისა და წვრილმანი ხულიგნობის გამო ადმინისტრაციული წესით დააკავეს. 

„კობა ფარტენაძე, პოლიციის მიმართ სხვადასხვა დროს განხორციელებული სიტყვიერი შეურაცხყოფის, ასევ წვრილმანი ხულიგნობის ფაქტზე, ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს. 

კობა ფარტენაძემ, 16 აგვისტოს, მასთან დაკავშირებულ ერთ-ერთ სისხლის სამართლის საქმეზე მოწმის სახით გამოკითხვისას, სამართალდამცველებს მიაყენა სიტყვიერი შეურაცხყოფა – აღნიშნულ ფაქტზე დაიწყო ადმინისტრაციული წარმოება.

ასევე, აღნიშული პირი 17 აგვისტოს ღამის საათებში, ბათუმში, ხმამაღლა ლანძღვა-გინებით არღვევდა საზოგადოებრივ წესრიგს, სამართალდამცველებმა, არაერთხელ მოუწოდეს შეეწყვიტა კანონსაწინააღმდეგო ქმედება, თუმცა ის არ დაემორჩილა პოლიციელების მოთხოვნას, პოლიციელებს მიაყენა შეურაცხყოფა“. 

მოგვიანებით „აჭარის ტელევიზიის“ მეტეოროლოგი ზესტაფონის დროებითი მოთავსების იზოლატორიდან ხელწერილის საფუძველზე გაათავისუფლეს. ის იზოლატორის დატოვების შემდეგ „აჭარა თაიმსმა“ ჩაწერა.  

კობა ფარტენაძემ 10 აგვისტოს Facebook-ის საკუთარ გვერდზე გამოაქვეყნა ვიდეო, რომლის მიხედვითაც, მას დაჭრით ემუქრებოდნენ და ჰომოფობიური ლექსიკის გამოყენებით მიმართავდნენ. მეორე დღეს, 11 აგვისტოს, შსს-მ ფარტენაძის მიმართ ბათუმში მომხდარ ძალადობისა და მუქარის ფაქტებზე 2 პირი დააკავა. 12 აგვისტოს, ბათუმის საქალაქო სასამართლოს მოსამართლე ეკატერინე კულულაშვილმა „კობა ფარტენაძეზე დისკრიმინაციული ნიშნით ძალადობის და მუქარის საქმეზე“ ბრალდებულ ორივე პირს 7 000-7 000 ლარიანი გირაო შეუფარდა. 16 აგვისტოს კი კობა ფარტენაძემ ისევ გაავრცელა ინფორმაცია, რომ მას თავს მორიგჯერ დაესხნენ. 

ფარტენაძეზე გახშირებული თავდასხმების სასწრაფოდ გამოძიებისა და მისი უსაფრთხოების უზრუნველყოფისკენ მოუწოდა 10 აგვისტოს, შსს-ს „საქართველოს ჟურნალისტური ეთიკის ქარტიამ“. 

შინაგან საქმეთა სამინისტროს ინფორმაციით, „აჭარის ტელევიზიის“ წამყვანი, მეტეოროლოგი კობა ფარტენაძე პოლიციელების შეურაცხყოფისა და წვრილმანი ხულიგნობის გამო დააკავეს. 

„კობა ფარტენაძე, პოლიციის მიმართ სხვადასხვა დროს განხორციელებული სიტყვიერი შეურაცხყოფის, ასევ წვრილმანი ხულიგნობის ფაქტზე, ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს.

კობა ფარტენაძემ, 16 აგვისტოს, მასთან დაკავშირებულ ერთ-ერთ სისხლის სამართლის საქმეზე მოწმის სახით გამოკითხვისას, სამართალდამცველებს მიაყენა სიტყვიერი შეურაცხყოფა – აღნიშნულ ფაქტზე დაიწყო ადმინისტრაციული წარმოება.

ასევე, აღნიშული პირი 17 აგვისტოს ღამის საათებში, ბათუმში, ხმამაღლა ლანძღვა-გინებით არღვევდა საზოგადოებრივ წესრიგს, სამართალდამცველებმა, არაერთხელ მოუწოდეს შეეწყვიტა კანონსაწინააღმდეგო ქმედება, თუმცა ის არ დაემორჩილა პოლიციელების მოთხოვნას, პოლიციელებს მიაყენა შეურაცხყოფა“. 

კობა ფარტენაძის ადვოკატის, თემურ ქავშბაიას თქმით, „აჭარის ტელევიზიის“ წამყვანი ადმინისტრაციული წესით დააკავების შემდეგ ზესტაფონის წინასწარი დაკავების იზოლატორში გადაიყვანეს. როგორც ადვოკატმა სოციალურ ქსელში დაწერა, ფარტენაძე ბათუმის საქალაქო სამმართველოს პოლიციის მე 2 განყოფილებაში დააკავეს. 

„ჩვენ გამოთხოვილი გვაქვს პოლიციის მე-2 განყოფილებიდან მიმართვის, წერილის საფუძველზე წერილობითი მტკიცებულებები, თუმცა ჯერჯერობით არაფერი გადმოგვცემია“, - უთხრა ქავშბაიამ „მედიაჩეკერს“. ამ დროისთვის, მას ნანახი არ ჰყავდა ფარტენაძეც. 

12 აგვისტოს, ბათუმის საქალაქო სასამართლოს მოსამართლე ეკატერინე კულულაშვილმა „კობა ფარტენაძეზე დისკრიმინაციული ნიშნით ძალადობის და მუქარის საქმეზე“ ბრალდებულ ორივე პირს 7 000-7 000 ლარიანი გირაო შეუფარდა. „აჭარის ტელევიზიის“ მეტეოროლოგმა, ჟურნალისტმა კობა ფარტენაძემ 10 აგვისტოს Facebook-ის საკუთარ გვერდზე გამოაქვეყნა ვიდეო, რომლის მიხედვითაც, მას დაჭრით ემუქრებიან და ჰომოფობიური ლექსიკის გამოყენებით მიმართავენ. მეორე დღეს, 11 აგვისტოს, შსს-მ ფარტენაძის მიმართ ბათუმში მომხდარ ძალადობისა და მუქარის ფაქტებზე 2 პირი დააკავა. გუშინ, 16 აგვისტოს კობა ფარტენაძემ ისევ გაავრცელა ინფორმაცია, რომ მას თავს მორიგჯერ დაესხნენ. 

ფარტენაძეზე გახშირებული თავდასხმების სასწრაფოდ გამოძიებისა და მისი უსაფრთხოების უზრუნველყოფისკენ მოუწოდა 10 აგვისტოს, შსს-ს „საქართველოს ჟურნალისტური ეთიკის ქარტიამ“. 

კომუნიკაციების კომისიის ინფორმაციით, 2026 წლის II კვარტალში ტელემაუწყებლებმა ჯამურად 24 მილიონი ლარის კომერციული სარეკლამო შემოსავალი მიიღეს. როგორც კომისია აღნიშნავს, მასში ინფორმაციის წარმოუდგენლობის გამო, არ შედის „ფორმულას“ კომერციული შემოსავალი. ტელეკომპანიის იურისტის თქმით, ტექნიკური მიზეზების გამო, არხი ComCom-ს ამ მონაცემებს უახლოეს მომავალში წარუდგენს. 

მიმდინარე წლის აპრილი-ივნისის პერიოდში ტელევიზიების მიერ მიღებული კომერციული სარეკლამო შემოსავლების 74% კი სამთავრობო ტელეკომპანიებზე,  „რუსთავი 2“-სა და „იმედზე“ მოდის. 

analytics.comcom.ge-ზე გამოქვეყნებული მონაცემების მიხედვით, 2026 წლის II კვარტალში ტელემაუწყებლებს შორის ყველაზე მეტი - 9 750 717 ლარის კომერციული სარეკლამო შემოსავალი სწორედ „რუსთავი 2“-მა („მედია ჰოლდინგი“) მიიღო და ამჯერად „იმედს“ გაუსწრო. ბრიტანეთის მიერ სანქცირებულმა „ტელეიმედმა“ ამ პერიოდში 8 056 696 ლარის კომერციული შემოსავალი მიიღო. სამთავრობო ტელეკომპანიებთან შედარებით ბევრად ნაკლები - 1 378 024 ლარის კომერციული სარეკლამო შემოსავალი ჰქონდა ხელისუფლების მიმართ კრიტიკულად განწყობილ „TV პირველს“. აპრილი-ივნისის პერიოდში 1 177 502 ლარის კომერციული შემოსავალი მიიღო ბრიტანეთის მიერ სანქცირებულმა POSTV-მა.  

„რუსთავი 2“-ის TOP დამფინანსებლები:

რეკლამის დამკვეთები, რომლებმაც „რუსთავი 2“-ს 500 000 ლარზე მეტი გადაუხადეს:

• Eurasian Broadcasting Enterprise Limited (07801244) - ინგლისი 
• მეამა (405139425) - საქართველო 

რეკლამის დამკვეთები, რომლებმაც „რუსთავი 2“-ს 100 000 ლარიდან 500 000 ლარამდე გადაუხადეს:

• PG Tüketim Mallari Sanayi AŞ (733 003 2509) - თურქეთი 
• ავერსი ფარმა (211386695) - საქართველო 
• აიდიეს ბორჯომი თბილისი (404888528) - საქართველო 
• ანაგი (245416401) - საქართველო 
• ვიმ ბილ დან საქართველო (204546553) - საქართველო 
• კოკა–კოლა ბოთლერს ჯორჯია (201948063) - საქართველო 
• ლაქტალის ჯორჯია (404898973) - საქართველო 
• პსპ ფარმა (202203123) - საქართველო 
• შპს ავენიუ ბაი ორბი (445488749) - საქართველო 
• შპს მეტროპოლ მენეჯმენტ (405561379) - საქართველო 

„იმედის“ TOP დამფინანსებლები:

რეკლამის დამკვეთები, რომლებმაც „იმედს“-ს 500 000 ლარზე მეტი გადაუხადეს:

• ანაგი (245416401) - საქართველო 
• მეამა (405139425) - საქართველო 
• შპს ავენიუ ბაი ორბი (445488749) - საქართველო 

რეკლამის დამკვეთები, რომლებმაც „იმედს“-ს 100 000 ლარიდან 500 000 ლარამდე გადაუხადეს:

• ავერსი ფარმა (211386695) - საქართველო 
• აიდიეს ბორჯომი თბილისი (404888528) - საქართველო 
• ბერლინ-ქიმიას წარმომადგენლობა საქართველოში (211390396) - საქართველო 
• დიპლომატ ჯორჯია (204557121) - საქართველო 
• ვიმ ბილ დან საქართველო (204546553) - საქართველო 
• თ და კ რესტორნები (204909180) - საქართველო 
• კოკა–კოლა ბოთლერს ჯორჯია (201948063) - საქართველო 
• ლაქტალის ჯორჯია (404898973) - საქართველო 
• მიკროსაფინანსო ორგანიზაცია სვის კაპიტალ (205274273) - საქართველო 
• პსპ ფარმა (202203123) - საქართველო 
• ქართული ლუდის კომპანია (404900737) - საქართველო 

ბოლო წლების მონაცემებით, (2021-2025) „იმედს“ ტელევიზიებს შორის ყველაზე მეტი კომერციული სარეკლამო შემოსავალი ჰქონდა. მან ყველაზე მეტი - 10 812 705 ლარის კომერციული შემოსავალი მიიღო 2026 წლის I კვარტალშიც, „რუსთავი 2“-ის კომერციულმა შემოსავალმა კი ამ პერიოდში 7 938 064 ლარი შეადგინა.

                                              
დიდმა ბრიტანეთმა ქართული სამთავრობო ტელევიზიები: POSTV და „იმედი“ 2026 წლის თებერვალში დაასანქცირა. სანქციის მიზეზად ორივე ტელევიზიის შემთხვევაში რუსეთის მიერ უკრაინაში სრულმასშტაბიანი შეჭრის შესახებ განზრახ გავრცელებული შეცდომაში შემყვანი ინფორმაციები დასახელდა. 

ცნობისთვის, ივნისში, ბრიტანულმა გამოცემა CITY A.M-იმ გაავრცელა ინფორმაცია, რომ Nestle-მ ბრიტანეთის მიერ სანქცირებულ „იმედზე“ მისი პროდუქციის რეკლამის განთავსებაზე შიდა გამოძიება დაიწყო, ხოლო Procter & Gamble-ის ევროპული ეთიკისა და შესაბამისობის ოფისის უფროსი დირექტორისა და ხელმძღვანელის, ჯონ ბრენდონის მიერ ჩატარებული შიდა გამოძიების შედეგად, კომპანიამ, „იმედთან“ თანამშრომლობა შეწყვიტა. 
                                              

კომერციული სარეკლამო შემოსავალი მოიცავს: კომერციულ რეკლამას, სპონსორობას, პროდუქტის განთავსებას, ტელეშოპინგსა და კომერციულ განცხადებებს. 

ტელემაუწყებლების 2026 წლის I კვარტლის კომერციულ შემოსავლებზე იხილეთ აქ. 

კომუნიკაციების კომისიამ „TV პირველი“ მის მიერ ჩატარებული მედიამონიტორინგის საფუძველზე, „მაუწყებლობის შესახებ“ კანონის იმ მუხლების დარღვევისთვის, რომელიც შინაარსობრივ რეგულირებას შეეხება, ამჯერად 5 000 ლარით დააჯარიმა. 

მედიამომსახურებების რეგულირების დეპარტამენტმა „TV პირველის“ ეთერში 27-28 ივლისის ახალი ამბების პროგრამები შერჩევითად დაამონიტორინდა და მიიჩნია, რომ ტელეკომპანიამ „მაუწყებლობის შესახებ“ კანონის 52-ე მუხლის - „ფაქტის ჯეროვანი სიზუსტე და პასუხის უფლება“ 1-ელი და მე-2 პუნქტები და 54-ე მუხლის - „სამართლიანობა და მიუკერძოებლობა“ მე-5 პუნქტი დაარღვია.  

„პოლიციელები ამბობენ, რომ ყველა იმ პირს, რომელიც დღეს საკრებულოსთან მოვა, თავის პოზიციას დააფიქსირებს, დააკავებენ“, - 27 ივლისის საინფორმაციო გამოშვებაში ჟურნალისტის მიერ ნათქვამი ეს წინადადება მედიამომსახურებების რეგულირების დეპარტამენტს მოხსენებით ბარათში „მაუწყებლობის შესახებ“ კანონის 52-ე მუხლის ორი პუნქტის დარღვევის მაგალითად აქვს მოყვანილი. 

დეპარტამენტის დასაბუთებით, მაუწყებლის მიერ გავრცელებული ეს ინფორმაცია არაჯეროვანი სიზუსტით იყო გადაცემული, რადგან სიუჟეტში ჩასმულ ინტერვიუში გოგა მემანიშვილი ასეთ განცხადებას არ აკეთებს:

„სიუჟეტში ჟურნალისტი პოლიციის მაღალჩინოსანს უსვამს შეკითხვას: „მაგალითად, ამ ადამიანს უწერია კი თეთრ ბანერზე, ეს ეხლა დანაშაულია? ადმინისტრაციული სამართალდარღვევაა? [...] ანუ კი არის ადმინისტრაციული სამართალდარღვევა?”. რაზეც პოლიციის მაღალჩინოსანი პასუხობს: „ვინც დაარღვია ის დავაკავეთ, ხო არ ვედავებით [...].“ ჟურნალისტი: „ანუ სხვა ადამიანების დაკავებასაც აპირებთ?“. პასუხი: „რატომ უნდა დავაკავოთ?“ აღნიშნულიდან კი წამყვანის მიერ გაჟღერებული ზემოხსენებული ინფორმაცია არ გამომდინარეობს“. 

„TV პირველს“ ახალი ამბების პროგრამაში საკითხის მაუწყებლის პირადი დამოკიდებულების ან მოსაზრების საფუძველზე გაშუქებად ჩაუთვალეს სადავო სიუჟეტებში ისეთი ფრაზების გამოყენება, როგორიცაა, მაგალითად: „დიდი ნადირობა მოაწყო“; „სქროლვა სქრინვის სააგენტო“; „სიტყვის თავისუფლების შეზღუდვის ახალი ეტაპი და კანონის ჩანაცვლება ქუჩის წესრიგით. ქართული ოცნება ეგრეთწოდებული მორალის პოლიციის ჩამოყალიბებას იწყებს“; „ჩეჩნური ტიპის რაზმი“; „რეალურად ოცნებამ ჩეჩნური მოდელი დააკოპირა, სადაც სპორტსმენებს ოფიციალურ მანდატს ანიჭებენ და ძალადობის ნებას რთავენ. მმართველი გუნდი და მისი მხარდაჭერილი ძალები თავად გადაწყვეტენ, ვინ, რა ფორმით დასაჯონ და როგორ ჩაახშონ კრიტიკული ხმა“; „დიდი ნადირობა დედაქალაქის ცენტრალურ გამზირზე“; „აქტივისტებზე ნადირობა“; „პოლიციას ნერვებმა უმტყუნა“.  

„TV პირველს“ არხის მიერ კანონმდებლობის შესაძლო დარღვევის საკითხის განხილვის გადადება სურდა, თუმცა კომუნიკაციების კომისიამ ტელეკომპანიის  შუამდგომლობა არ დააკმაყოფილა. 

საკითხის მომხსენებლის, ეკატერინე ჭახრაკიას თქმით, ამ შუამდგომლობაში აღნიშნული იყო, რომ „განსახილველი საკითხის შინაარსიდან გამომდინარე აუცილებელია საკითხი დეტალურად იქნეს შესწავლილი ტელეკომპანია „პირველის“ საინფორმაციო სამსახურის ხელმძღვანელის, ნოდარ მელაძის მიერ. გარდა ამისა, მას თავად სურს მონაწილეობა მიიღოს პროცესში და იმ ფაქტის გათვალისწინებით, რომ ბატონი ნოდარ მელაძე იმყოფება შვებულებაში 19 აგვისტოს ჩათვლით, მოთხოვნილია სხდომის გადადება გონივრული ვადით და განცხადებას ერთვის ბრძანება შვებულების მიცემის თაობაზე“.

კომისიის თავმჯდომარემ, გოგა გულორდავამ კი აღნიშნა, რომ „თუ იურისტს ბმული გაეგზავნა და არ ესწრება სხდომას და ის, რომ ბატონი ნოდარი იმყოფება შვებულებაში, ჩემი აზრით ვერ იქნება მიჩნეული საპატიო მიზეზად. ერთი ის, რომ, კი ბატონო, გვესმის შვებულებაში ყოფნის პერიოდი, თუმცა ვიცით, რომ სხდომას მხარეები ესწრებიან ონლაინ და ამიტომ არა მგონია ახლა ბატონი ნოდარი ისეთ ადგილას იმყოფებოდეს, საიდანაც ჩართვა არ შეეძლო. მეორე ის, რომ ტელეკომპანია „პირველის“ მხრიდან ასევე სხვასაც შეეძლო, სხვა უფლებამოსილ პირს დაეფიქსირებინა თავისი პოზიცია ამასთან დაკავშირებით. ეს ჩემი მოსაზრებაა, თუმცა საბოლოოდ, რა თქმა უნდა, ეს საკითხი კენჭისყრაზე დადგება და კომისია გადაწყვეტს. ვფიქრობ, რომ ეს არ არის ის მიზეზი, რის გამოც ჩვენ საკითხის განხილვა უნდა გადავდოთ“. 

კომუნიკაციების კომისიამ „TV პირველი“ მის მიერ ჩატარებული მედიამონიტორინგის საფუძველზე, ისეთი ფრაზების გამოყენებისთვის, როგორებიცაა: „სინდისის პატიმრები“, „ოცნების გამოძიების“, „ოლიგარქი“, „არარსებული დანაშაული“, „აქტივისტების ტერორი გრძელდება“ და სხვ. ივნისში 2 500 ლარით დააჯარიმა.   

                                                    

„მაუწყებლობის შესახებ“ კანონით, 2 500 ლარით დაჯარიმების შემდეგ კომისია უფლებამოსილია დამრღვევს, მის მიერ დენადი ხასიათის დარღვევის გაგრძელების ან/და დაჯარიმებიდან 1 წლის განმავლობაში ახალი ერთჯერადი ხასიათის დარღვევის ჩადენის შემთხვევაში, დააკისროს ჯარიმა არაუმეტეს მისი წლიური შემოსავლის 1%-ისა, მაგრამ არანაკლებ 5 000 ლარისა, ან დაიწყოს საჯარო ადმინისტრაციული წარმოება ლიცენზიის მოქმედების შესაჩერებლად/ ავტორიზაციის შესაჩერებლად.
                                                 

ComCom-მა მონიტორინგისას 2 დარღვევა გამოუვლინა და 6 აგვისტოს, „მაუწყებლობის შესახებ“ კანონის იმ მუხლების დარღვევისთვის, რომელიც შინაარსობრივ რეგულირებას შეეხება, 2500 ლარით დააჯარიმა „პოსტვ“-იც.          

მედიამომსახურებების რეგულირების დეპარტამენტის მიერ ჩატარებული მედიამონიტორინგის საფუძველზე, კომუნიკაციების კომისიამ ორჯერ: 2 500 და 5 000 ლარით დააჯარიმა ტელეკომპანია „ფორმულა“. 

„მაუწყებლობის შესახებ“ კანონის იმ მუხლების დარღვევისთვის, რომელიც შინაარსობრივ რეგულირებას შეეხება, აპრილში კომისიამ წერილობით გააფრთხილა: „პოსტვ“-ი, „იმედი“, „TV პირველი“ და „ფორმულა“. გაფრთხილების შემდეგ, ComCom-ს ჯერ არ განუხილავს პროსამთავრობო ტელეკომპანია „იმედის“ მიერ კანონმდებლობის ამავე საფუძვლით შესაძლო დარღვევის საკითხი.

17 ივლისს კომუნიკაციების კომისიიდან „მედიაჩეკერს“ წერილობით უპასუხეს, რომ კომისია „სისტემატურად მონიტორინგს ახორციელებს 6 ყველაზე ყურებად არხზე, მათ შორის მონიტორინგდება „იმედი“, „რუსთავი 2“, „პოსტვ“, „ტვ პირველი“, საზოგადოებრივი მაუწყებლის პირველი არხი და „ფორმულა“. გარდა ამისა, კომისია პერიოდულად ამოწმებს ასევე სხვა მაუწყებლებსაც, მაგალითად „პალიტრა“, BMG, კავკასია.

აპრილის შემდეგ, კომისიის სისტემატური მონიტორინგის ფარგლებში, „ფორმულას“ და „ტვ პირველის“ გარდა განხორციელდა სხვა არხების მონიტორინგიც, ბოლო მონიტორინგის შედეგად „პოსტვ“-ის შესაძლო დარღვევის საკითხი კომისიაში ჩანიშნულია 23 ივლისს. ხაზგასასმელია, რომ კომუნიკაციების კომისია თანამშრომლობს მაუწყებლებთან საკანონმდებლო მოთხოვნების განმარტების მიმართულებით, მათ შორის აღნიშნულ რეგულაციებთან დაკავშირებით შედგა სამუშაო შეხვედრები „ტვ პირველის“ წარმომადგენლებთან. აღსანიშნავია, რომ რეგულაციების ამოქმედების შემდეგ, ყველა მაუწყებლის შემთხვევაში, რომელიც სისტემატურად მონიტორინგდება, დარღვევების რაოდენობა შემცირებულია. გამონაკლისი არის მხოლოდ ტელეკომპანია „ფორმულა“, რომლის შემთხვევაშიც დარღვევები არ შემცირებულა. აქვე აღვნიშნავთ, რომ „ფორმულამ“ გამოთქვა კომისიასთან სამუშაო შეხვედრის სურვილი, რაზეც თანხმობა განვაცხადეთ, თუმცა შეხვედრა ამ დრომდე არ შემდგარა“.

კომუნიკაციების კომისიამ „მაუწყებლობის შესახებ“ კანონითა და „მაუწყებელთა ქცევის კოდექსით“ დადგენილი ნორმების პრაქტიკაში ამოქმედება, „რათა მაუწყებელთა ობიექტურობა სათანადო პროცედურის საფუძველზე და მაღალი სამართლებრივი სტანდარტით შეფასდეს“, 6 მარტს, ბრიტანეთის მიერ სამთავრობო ტელეკომპანიების: „იმედისა“ და „პოსტვ“-ის დასანქცირების შემდეგ, დააანონსა. აპრილში კი, ComCom-მა მის მიერ ჩატარებული მედიამონიტორინგის საფუძველზე, შინაარსობრივი რეგულირების საკითხების: მიუკერძოებლობა, ბალანსი, პირადი დამოკიდებულების/მოსაზრების საფუძველზე გაშუქება, ფაქტის ჯეროვანი სიზუსტე, დარღვევაზე პირველად იმსჯელა. 

ComCom-ს თვითრეგულირების სფეროში მოქცეული საკითხების განხილვისა და მაუწყებლების დასანქცირების შესაძლებლობა გასული წლის გაზაფხულზე, „მაუწყებლობის შესახებ“ კანონში შესული ცვლილებებით მიეცა.