„93 ფრაზა, რომლის გამოყენებაც კრიტიკულ ტელევიზიებს ეკრძალებათ“ - „საერთაშორისო გამჭვირვალობა-საქართველომ“ ბოლო 6 თვის განმავლობაში კომუნიკაციების კომისიის მიერ კრიტიკული ტელევიზიებისთვის, „TV პირველი“ და „ფორმულა“, შედგენილი მოხსენებითი ბარათების მიხედვით, იმ სიტყვების ჩამონათვალი გამოაქვეყნა, რასაც კომისია მედიას ედავა. მათ შორისაა: „რეჟიმი“, „სინდისის პატიმრები“, „ოლიგარქი“, „ცრუ მოწმე პოლიციელები“, „პოლიტიკური პატიმრები“, „ივანიშვილის პრემიერი“, „უკანონო პატიმრობა“, „ოცნების ხელისუფლება“, „რეპრესიული კანონები“ და „სასამართლო კლანი“ .

როგორც TI წერს, კომუნიკაციების კომისია ცენზორის როლის შესრულებას განაგრძობს:

„საერთო ჯამში, ბოლო 6 თვეში, კომისიამ კრიტიკულ ტელევიზიებს - „ტელეკომპანია პირველსა“ და „ფორმულას“ ამ მიზეზით მოხსენებითი ბარათები უკვე 7-ჯერ (4-ჯერ „ფორმულას“, 3-ჯერ „ტელეკომპანია პირველს“) შეუდგინა და მათ საფუძველზე, ისინი პირველად ჯერ სიტყვიერად გააფრთხილა, შემდეგ - თითოეული ჯერ 2500 ლარით, მომდევნო ჯერზე კი - 5000 ლარით დააჯარიმა (დეტალებისთვის მიჰყევით ბმულს). უკვე 1 ოქტომბერს კი - ფორმულა დამატებით 10 000 ლარით დააჯარიმა. დიდი ალბათობით, კომისია მავნე პრაქტიკას კვლავაც გააგრძელებს და უახლოეს მომავალში, იმავე მიზეზით ახლა უკვე „ტელეკომპანია პირველსაც“ დააჯარიმებს, რადგანაც, როგორც წესი, კომისია ერთ შეკრულ წრეზე მოძრაობს და მაუწყებლებს რიგრიგობით აჯარიმებს.

აშკარაა, რომ კომუნიკაციების კომისა ამ გზით, ისედაც მძიმე ფინანსურ პირობებში მყოფი ტელევიზიების პარალიზებას ცდილობს. კომისიას მათთვის მაუწყებლობის ლიცენზიის შეჩერების უფლებამოსილებაც აქვს, რაც განსაკუთრებით საგანგაშოა.

მართალია, კომისიამ პარალელურად მონიტორინგის რეჟიმში პროსამთავრობო არხებიც - „იმედი“, „პოსტვ“, „რუსთავი 2“ - მოაქცია, თუმცა პროცესებზე დაკვირვება ტოვებს განცდას, რომ აღნიშნულს მხოლოდ ფორმალური ხასიათი აქვს და დაინტერესებული მხარეებისთვის ობიექტური დამკვირვებლისა და არბიტრის როლის ჩვენებას ემსახურება. იმთავითვე ნათელი იყო, რომ კომისიის მიზანი მხოლოდ კრიტიკული მედიების დასჯა და ფინანსური ჯარიმების გზით მათი დასუსტება ან/და დახურვა იყო“. 

„საერთაშორისო გამჭვირვალობა-საქართველო“ ვრცლად წერს იმაზეც, თუ რას ედავება კომუნიკაციების კომისია კრიტიკულ მაუწყებლებს: „კომუნიკაციების კომისია მაუწყებლებს, როგორც წესი, მიუკერძოებლობის პრინციპის დარღვევას, ასევე ამბების პირადი  დამოკიდებულებისა და მოსაზრების საფუძველზე გაშუქებას ედავება. „საერთაშორისო გამჭვირვალობა-საქართველომ“ კომისიის მიერ კრიტიკული მაუწყებლებისთვის შედგენილი ყველა მოხსენებითი ბარათი შეისწავლა (ჯამში 7 ასეთი დოკუმენტი) და მის მიერ აკრძალული სიტყვები და ფრაზები დააჯამა. გამოირკვა, რომ კომისია კრიტიკულ მაუწყებლებს ჯამში 101 სიტყვისა ან/და ფრაზის გამოყენებას უკრძალავს, აქედან 33-ს „ტელეკომპანია პირველს“, 68-ს კი - „ფორმულას“. გარკვეულ შემთხვევებში, ორი კრიტიკული მაუწყებლისთვის აკრძალული სიტყვებისა და ფრაზების ნაწილი ერთმანეთს კვეთს. ჯამში, კომისია 93 განსხვავებული სიტყვისა და ფრაზის გამოყენებას კრძალავს“.

როგორც ორგანიზაცია წერს, კონკრეტული სიტყვებისა და ფრაზების გარდა, კომუნიკაციების კომისია კრიტიკულ მაუწყებლებს ამბების მშრალად, შეფასებისა და ანალიზისგან სრულად დაცლილად გაშუქებას სთხოვს, „მაგალითად, მოხსენებითი ბარათების მიხედვით, კომისია დაუშვებლად მიიჩნევს ჟურნალისტებისა და წანყვანების შემდეგ ტექსტებსაც:

• „სიტყვის თავისუფლების შეზღუდვის ახალი ეტაპი და კანონის ჩანაცვლება ქუჩის წესრიგით. ქართული ოცნება ეგრეთწოდებული მორალის პოლიციის ჩამოყალიბებას იწყებს. არაფორმალურ დანაყოფს MMA-ის მებრძოლი გიორგი ქართველიშვილი  უხელმძღვანელებს. ჩეჩნური ტიპის რაზმი მყისიერი რეაგირებით ემუქრება ყველას, ვინც მათი  შეფასებით სიწმინდეებს, რელიგიას წინაპრებს და ისტორიას შეურაცხყოფს“.
• „არაფორმალური დანაყოფის ხელმძღვანელმა პრაქტიკულად ძალადობა კამერების წინ დააანონსა. ხელისუფლების მიერ მხარდაჭერილი ჯგუფის სიწმინდეების რელიგიის და ისტორიის შეურაცხყოფაზე მყისიერ რეაგირებას გეგმავს. ეს იდეა კი თურმე ნოდარ დუმბაძის შეურაცხყოფის შემდეგ გაუჩნდა. რეალურად ოცნებამ ჩეჩნური მოდელი დააკოპირა, სადაც სპორტსმენებს ოფიციალურ მანდატს ანიჭებენ და ძალადობის ნებას რთავენ. მმართველი გუნდი და მისი მხარდაჭერილი ძალები თავად გადაწყვეტენ, ვინ, რა ფორმით დასაჯონ და როგორ ჩაახშონ კრიტიკული ხმა“.
• „პოლიციამ აქტივისტებზე ნადირობა გვიან ღამით დაიწყო. ჯერ დააკავეს თორნიკე თოშხუა. კაცი, რომელმაც ციხე რამდენიმე კვირის წინ დატოვა, ქუჩის გამოკითხვას ატარებდა, თუმცა, პოლიციას ნერვებმა უმტყუნა და რამდენიმე წამში დააკავეს, რამაც დიდი სოლიდარობა გამოიწვია და რამდენიმე წუთში საკრებულოსთან ათობით ახალგაზრდა გაჩნდა“.
• „ოცნებას ვაშინგტონშიც პრორუსი პოლიტიკოსი ეიმედება. პროპაგანდა ტრამპის ადმინისტრაციასთან ურთიერთობის აღდგენად ასაღებს ოლიგარქის დეპუტატების ვაშინგტონში ვიზიტს. რეალურად კი მათი მასპინძელი კონსპიროლოგი უკრაინის წინააღმდეგ მოქმედი პოლიტიკოსია, კრემლთან მჭიდრო კავშირებით“.
• „ივანიშვილის ხელისუფლება ქვეყანას ევროკავშირში გაწევრიანების გზას უხშობს და დეზინფორმაციას კიდევ უფრო აძლიერებს, რომ საკუთარი დანაშაული ისევ ევროპას გადააბრალოს. ქართული ოცნების წარმომადგენლები ცდილობენ წარმოაჩინონ, რომ ეს შედეგი ევროპის ორმაგი მიდგომების გამო დადგა და არა მათი პოლიტიკის გამო, რაც ცხადად ფასდება, როგორც დემოკრატიისგან და ევროპული ღირებულებებისგან გადახვევა. ამ დეზინფორმაციისთვის რეჟიმს ძალისხმევის გაძლიერება კიდევ უფრო სჭირდება იმ ფონზე, როცა უკრაინისა და მოლდოვისთვის ევროკავშირში გაწევრიანების მოლაპარაკებები უკვე რეალურად იხსნება… “.
• „… ამ შეძახილებსაც კი ირანის პარლამენტში ირაკლი კობახიძე უპრობლემოდ ისმენდა და ტერორისტების გვერდითაც იდგა“ და სხვ.

კომუნიკაციების კომისია მიიჩნევს, რომ ჟურნალისტების მხრიდან ამ სიტყვებისა და ფრაზების გამოყენება „ორგანოების/ინსტიტუციების საქმიანობის მიმართ მაუწყებლის მოსაზრებისა და პირადი დამოკიდებულების გამოხატვას წარმოადგენს. ამდენად, სახეზეა, მაუწყებლის პირადი დამოკიდებულების ან მოსაზრების საფუძველზე საჯარო პოლიტიკის მიმდინარე საკითხების გაშუქება, რითაც ადგილი აქვს „მაუწყებლობის შესახებ“ საქართველოს კანონის 54-ე მუხლის მე-5 პუნქტის დარღვევას“,“ - წერს TI.

„საერთაშორისო გამჭვირვალობა-საქართველო“ ხაზგასმით აღნიშნავს, რომ საგანგაშოა კომუნიკაციების კომისიის ხელში მაუწყებლების შინაარსობრივი რეგულირების ბერკეტის არსებობა და ამ საფუძველზე, მათთვის ფინანსური სანქციების დაწესებისა და ლიცენზიის შეჩერების უფლების მინიჭება:

„მით უფრო, როდესაც საქართველოში მყარად დამკვიდრებული და აშკარად გამოკვეთილი სახელმწიფოს მიტაცების ფონზე, წლებია, კომისია „ქართული ოცნებისადმი“ ლოიალური და მასთან დაკავშირებული კომისიონერებით არის დაკომპლექტებული (კომინაციების კომისიის წევრების შესახებ დეტალებისთვის მიჰყევით ბმულს) და მის მიერ მიღებულ გადაწყვეტილებებთან დაკავშირებით არაერთი კითხვის ნიშანი არსებობს მმართველი გუნდის ინტერესების გატარებისა და მიკერძოების თვალსაზირისთ. კომინიკაციების კომისია არ უნდა ოპერირებდეს ცენზორის პოზიციიდან და ის არ უნდა იყოს გამოყენებული კრიტიკული მაუწყებლების დასჯის მექანიზმად. ხოლო საერთაშორისო პრაქტიკის გადათვალისწინებით, სადავო საკითხები თვითრეგულირების მექანიზმების ფარგლებში უნდა იხილებოდეს. სწორედ ამ უკანასკნელის წახალისება და ხელშეწყობა უნდა იყოს კომუნიკაციების კომისიის მთავარი მიზანიც და არა „ქართული ოცნების“ ინტერესების სამსახურში ჩადგომა და მაუწყებლების დასჯა მმართველი პარტიის წარმომადგენლების კრიტიკისა და მხილებისთვის“. 

„93 ფრაზა, რომლის გამოყენებაც კრიტიკულ ტელევიზიებს ეკრძალებათ“ - TI-ის მიერ შედგენილი სიის სრულად ნახვა შესაძლებელია ამ ბმულზე. 

კომუნიკაციების კომისიამ „მაუწყებლობის შესახებ“ კანონითა და „მაუწყებელთა ქცევის კოდექსით“ დადგენილი ნორმების პრაქტიკაში ამოქმედება, „რათა მაუწყებელთა ობიექტურობა სათანადო პროცედურის საფუძველზე და მაღალი სამართლებრივი სტანდარტით შეფასდეს“, 6 მარტს, ბრიტანეთის მიერ სამთავრობო ტელეკომპანიების: „იმედისა“ და „პოსტვ“-ის დასანქცირების შემდეგ, დააანონსა. ComCom-ს თვითრეგულირების სფეროში მოქცეული საკითხების განხილვისა და მაუწყებლების დასანქცირების შესაძლებლობა გასული წლის გაზაფხულზე, „მაუწყებლობის შესახებ“ კანონში შესული ცვლილებებით მიეცა. 

2025 წელი პროსამთავრობო ტელეკომპანიებმა: „იმედმა“, „რუსთავი 2“-მა,  POSTV-იმ და „მაესტრომ“ ჯამში, 75.97 მილიონი ლარის ზარალით დაასრულეს, გასულ წელს მოგება - 6.17 მილიონი ლარი მხოლოდ GDS-მა ნახა. წინა წლების განმავლობაში ამ 5 არხის მიერ დაგროვილმა ჯამურმა ზარალმა კი ₾860 მილიონს გადააჭარბა. ტელეკომპანიების ზარალის შესახებ მონაცემები ხელმისაწვდომია სახელმწიფო ანგარიშგების პორტალზე გამოქვეყნებულ წლიურ ფინანსურ ანგარიშებში. 

„იმედი“

reportal.ge-ზე გამოქვეყნებული მონაცემების მიხედვით, 2025 წელს „იმედმა“ ₾43.11 მილიონის ზარალი ნახა, არხის წლების მანძილზე დაგროვილმა ჯამურმა ზარალმა კი ₾497.2 მილიონს მიაღწია. 

ფინანსური ანგარიშის მიხედვით, 2025 წელს არხის შემოსავალი ₾46.58 მლნ იყო, საიდანაც ₾46.06 მილიონი რეკლამებზე მოდის. „იმედმა“ შარშან ₾32.7 მილიონის ხელფასი გასცა, რეიტინგის კვლევების ხარჯად კი 2 მილიონზე მეტია მითითებული. გასულ წელს კომპანიაში საშუალოდ 841 ადამიანი იყო დასაქმებული (39-ით ნაკლები, ვიდრე 2024 წელს).

„მედია ჰოლდინგი“

გასულ წელს 29.3 მილიონი ლარი იზარალა სს „მედია ჰოლდინგმა“, სატელევიზიო არხმა ბრენდული სახელით „რუსთავი 2“. კომპანიის წლების განმავლობაში დაგროვილი ჯამური ზარალი კი 143.3 მილიონი ლარია.

ფინანსური ანგარიშგების მიხედვით, 2025 წელს „მედია ჰოლდინგის“  შემოსავალი - ₾20.29 მლნ, ხარჯი კი ₾49.62 მლნ იყო. ტელეკომპანიამ შარშან 28.34 მლნ ლარის ხელფასი გასცა, რაც 2024 წელთან შედარებით 747 ათასი ლარით მეტია. 

დოკუმენტში აღნიშნულია, რომ 2025 წლის 31 დეკემბრის მდგომარეობით კომპანიის დასაქმებულთა საშუალო რაოდენობა 618 თანამშრომელია (53-ით ნაკლები ვიდრე 2024 წელს).

სს „მედია ჰოლდინგის“ აქციების 90%-ს შპს „პრაიმ თაიმი“ ფლობს, 10%-ის კი - შპს „სამაუწყებლო კომპანია რუსთავი 2“.

POSTV

2025 წელი ზარალით დაასრულა პროპაგანდისტულმა POSTV-მაც. ანგარიშგების პორტალზე გამოქვეყნებული მონაცემებით, შარშან ტელეკომპანიის ზარალმა ₾799 295 შეადგინა, წლების განმავლობაში დაგროვილმა ჯამურმა ზარალმა კი ₾8 635 937-ს მიაღწია.

POSTV-ის ფინანსურ ანგარიშში მითითებულია, რომ არხმა გასულ წელს დასაქმებულთა ანაზღაურებაზე ₾3 933 940 დახარჯა, რაც 2024 წელს ხელფასებზე გაწეულ ხარჯთან შედარებით ₾342 937-ით ნაკლებია.

დიდმა ბრიტანეთმა ქართული სამთავრობო ტელევიზიები: POSTV და „იმედი“ 2026 წლის თებერვალში დაასანქცირა. ორივე ტელევიზიის შემთხვევაში სანქციის მიზეზად რუსეთის მიერ უკრაინაში სრულმასშტაბიანი შეჭრის შესახებ განზრახ გავრცელებული შეცდომაში შემყვანი ინფორმაციებია დასახელებული. 

„მაესტრო“ 

გასული წელი ზარალით დასრულდა შპს „სტუდია მაესტროსთვისაც“. შარშან არხის ზარალმა ₾2.72 მილიონი შეადგინა და ჯამურად, ₾90.17 მილიონს გაუტოლდა. 

ფინანსური ანგარიშის მიხედვით, გასულ წელს „მაესტროს“ მიერ საქონლის გაყიდვიდან და მომსახურების გაწევიდან მიღებულმა ფულადმა სახსრებმა ₾2.92 მილიონი შეადგინა. რაც შეეხება ხელფასებს, არხმა შრომის ანაზღაურებაზე 2025 წელს ₾2.13 მილიონი დახარჯა.

GDS

ზემოთ ჩამოთვლილი ტელეკომპანიებისგან განსხვავებით, „ჯი-დი-ეს თი-ვი“ გამონაკლისია, რომელმაც 2025 წელი მოგებით დაასრულა. ფინანსური ანგარიშის მიხედვით, გასულ წელს ტელეკომპანიის წლიურმა მოგებამ ₾6.17 მილიონი შეადგინა და არხის დაგორვილი ჯამური ზარული ₾121.77 მილიონამდე შემცირდა. 

არხს გასულ წელს ₾7.94 მილიონის შემოსავალი ჰქონდა, საიდანაც ₾7.85 მილიონი სარეკლამო მომსახურებაზე მოდის. „ჯი-დი-ეს თი-ვი“-მ შარშან შრომის ანაზღაურებაზე ჯამში 102 570 ლარი დახარჯა.

რაც შეეხება ხელისუფლების მიმართ კრიტიკულად განწყობილ ტელეკომპანიებს, „TV პირველმა“ 2025 წელს ₾1.04 მილიონით იზარალა, წლების მანძილზე დაგროვილმა ჯამურმა ზარალმა კი ₾14.76 მილიონს მიაღწია.

არხის ფინანსური ანგარიშის მიხედვით, შარშან ტელეკომპანიის ზოგადმა და ადმინისტრაციულმა ხარჯმა ₾7.33 მილიონი შეადგინა, საიდანაც ₾5.14 მილიონი შრომის ანაზღაურებაზე მოდის. 

ტელეკომპანია „ფორმულას“ შემთხვევაში კი, reportal.ge-ზე არხის ფინანსური ანგარიში 2023 წლის შემდეგ ხელმისაწვდომი არ არის. რედაქციას ტელევიზიაში ამის მიზეზად დამოუკიდებელი აუდიტორის დასაქირავებლად საჭირო ფინანსური რესურსის არარსებობა დაუსახელეს, შესაბამისი სახსრების მოძიების შემდეგ კი, მათი თქმით, აღნიშნული დოკუმენტიც მომზადდება.

(ფოტო: ლევან ზაზაძე)

საზოგადოებრივმა მაუწყებელმა დამოუკიდებელი ოპოზიციონერი პოლიტიკოსი, თეონა ჭალიძე „საქართველოს რადიოს“ დღევანდელი, წინასწარ შეთანხმებული გადაცემიდან ჩახსნა და „ღია სტუდია“ ეთერში არ გასულა. მისი თქმით, თითქმის სტუდიასთან მისული, შენობიდან უკან გამოუშვეს. ჭალიძე მანამდე „პირველ არხთან“ მიმდინარე პატიმარ გიორგი დავითაძის მხარდამჭერ აქციაზე იმყოფებოდა და საპროტესტო ბანერი ტელევიზიის ეზოშიც გაშალა. 

როგორც ის ჰყვება, საზოგადოებრივი მაუწყებლის რადიოს გადაცემაში დავით პაიჭაძესთან სტუმრობა ჯერ კიდევ გუშინ შეთანხმდა და მასში საუბარი პენიტენციურ სისტემაში მიმდინარე და არსებულ პრობლემებთან დაკავშირებით უნდა ყოფილიყო. ჭალიძის თქმით, დღეს ის გიორგი დავითაძის მხარდამჭერ აქციაზე სპეციალურ პენიტენციურ სამსახურთანაც იმყოფებოდა, სადაც სპონტანურად საზოგადოებრივ მაუწყებელთან მისვლა და პირდაპირი ეთერის მოთხოვნა გადაწყდა. 

„გამოვყევი ამ მსვლელობას. დათქმულ დროს შევედი შენობაში, რადგან საზოგადოებრივი მაუწყებლის რადიოგადაცემის ეთერში უნდა ვყოფილიყავი სტუმრად. შესასვლელთან, ეზოში, დაუგეგმავად და სპონტანურად გამოვიყენე ჩემი უფლება და საზოგადოებრივი მაუწყებლის ლოგოსთან გავშალე პლაკატები - „არა წამებას!“ და „დაუთმეთ ეთერი პატიმრების მშობლებს“.

შიგნით შესულს, ფოიეში შემომხვდა ვასილ მაღლაფერიძე, რომელთანაც 5-7-წუთიანი საუბარი მქონდა. დეტალურად მოვახსენე, თუ რა ხდება გარეთ, რა მოთხოვნები აქვთ არამარტო გიორგი დავითაძის მშობლებს, არამედ ზოგადად პოლიტპატიმრების მშობლებს. რატომ ითხოვენ საზოგადოებრივი მაუწყებლის ეთერს და მას ვთხოვე, იქნებ, მინიმუმ რამედ ჩააგდოთ ეს ადამიანები, გახვიდეთ, შემოიყვანოთ, მოუსმინოთ და თუნდაც გაესაუბროთ-მეთქი. რა თქმა უნდა, მაღლაფერიძეს თავის მოსაზრებები ჰქონდა და მითხრა, რომ არ აპირებს აქციების ორგანიზატორებთან რაიმე კომუნიკაციას, ან აქციებით დაყენებული მოთხოვნების შესრულებას. ბოლოს, რომ დავასრულეთ საუბარი, რამდენიმე ნაბიჯი გადადგა და გადაცემის პროდიუსერს უთხრა: „აქციას გიწყობს და ეთერში იწვევ?“

ამის შემდეგ დამიბრუნეს პირადობის მოწმობა, რომელიც საშვისთვის გამომართვეს, გამომიცხადეს, რომ საზოგადოებრივი მაუწყებლის რადიოგადაცემაში სტუმრად დაბლოკილი ვარ და გამომიშვეს უკან. დაგეგმილი გადაცემა რამდენიმე წუთით ადრე ჩახსნეს - ასე იცავენ ისინი თავისუფალი მედიისა და საზოგადოებრივი მაუწყებლის პრინციპებს“, - ამბობს თეონა ჭალიძე ჩვენთან საუბრისას. 

„მედიაჩეკერი“ საზოგადოებრივი მაუწყებლის რადიოს იმ გადაცემის წამყვანსაც დაუკავშირდა, ვისი სტუმარიც თეონა ჭალიძე უნდა ყოფილიყო. დავით პაიჭაძეს ვკითხეთ, რა დაუსახელეს დღევანდელი ეთერის გაუქმების მიზეზად და როგორია მისი დამოკიდებულება მომხდარის მიმართ. 

პაიჭაძის თქმით, ის ჯერ ტელევიზიაში მისულიც არ იყო, როდესაც დაურეკეს და უთხრეს, რომ გადაცემა ჩაიხსნა და უკან დაბრუნებულიყო. 

„მიზეზად აქცია დაასახელეს. მეც აღარ მივედი ტელევიზიაში და დავბრუნდი სახლში. აქამდე ასეთი რამე არ მომხდარა. 

ჩემთან შეუთანხმებლად რომ ჩახსნეს გადაცემა, ამასთან დაკავშირებით გეტყვით, რომ საზოგადოებრივი მაუწყებელი არ უყურებს საკითხს ასე, რომ ჟურნალისტებს საკუთარი გადაცემა აქვთ. ასეთი მიდგომაა, რომ ეს არის საზოგადოებრივი მაუწყებლის გადაცემა და შენ ხარ ამ არხის ჟურნალისტი. ამ გადაცემას რამდენიმე წამყვანი ჰყავს და მე ერთ-ერთი ვარ. ეს არ არის ჩემი საავტორო გადაცემა.  

დღეს გადაცემის გაუქმების გადაწყვეტილება, ალბათ, ხელმძღვანელობამ მიიღო. მე რომ არ მიმიღია, ეგ ზუსტად ვიცი და ისიც ზუსტად ვიცი, რომ ამ თემატიკას მე არ დავეხსნები, არ გაკეთდა დღეს, გაკეთდება მერე. 

ჩემთვის, როგორც ჟურნალისტისთვის, არ წარმოადგენს პრობლემას, რომ გადაცემის სტუმარი მანამდე საზოგადოებრივ მაუწყებელთან გამართულ აქციაზე იყო. 

მე მგონია, საზოგადოებრივი მაუწყებლის დანიშნულება სწორედ ის არის, რომ ყველა ფენამ და ინტერესთა ჯგუფმა შეძლოს მაუწყებლის ეთერში საკუთარი შეხედულებების გამოთქმა. ეს ხალხი მოვიდა ლეგიტიმური პროტესტით. საზოგადოებრივ მაუწყებელში არ უწამებიათ ის ადამიანი, მაგრამ თუ ვინმემ ხმა უნდა გაიღოს ამაზე, არამარტო ოპოზიციურმა მედიებმა… დღევანდელ გადაცემაში მე ვაპირებდი, რომ თეონა ჭალიძესთან მესაუბრა პენიტენციურ სისტემაში არსებულ პრობლემებზე, ადამიანის უფლებათა სხვა დარღვევებსა და ცხადია, ამ უკანასკნელ გახმაურებულ შემთხვევაზე“, - თქვა დავით პაიჭაძემ.

„მედიაჩეკერმა“ სცადა საზოგადოებრივი მაუწყებლის პრესსამსახურთან და ვასილ მაღლაფერიძესთან დაკავშირებაც. მათგან პასუხის მიღების შემთხვევაში, მასალა შესაბამისად განახლდება. ვასილ მაღლაფერიძე საზოგადოებრივი მაუწყებლის სამეურვეო საბჭოს თავმჯდომარეა. 

მსჯავრდებულ გიორგი დავითაძის ოჯახის წევრებმა და მხარდამჭერებმა საზოგადოებრივ მაუწყებელთან აქცია პირდაპირი ეთერის დათმობის მოთხოვნით გამართეს. დავითაძის მამამ, ავთანდილ დავითაძემ საზოგადოებრივი მაუწყებლის გენერალურ დირექტორს, თინათინ ბერძენიშვილს შესაბამისი განცხადებითაც მიმართა. გიორგი დავითაძე ამბობს, რომ რუსთავის N6 პენიტენციური დაწესებულების დეესკალაციის ოთახში მასზე სექსუალურად იძალადეს.

ეს არ არის პირველი შემთხვევა, როდესაც საზოგადოებრივ მაუწყებელთან აქცია მსგავსი მოთხოვნით გაიმართა. „პირველი არხისგან“ პირდაპირი ეთერის დათმობას თვეებია ითხოვენ სინდისის პატიმრების ოჯახის წევრებიც. 

„საქართველოს ამბების“/„მთის ამბების“ დამფუძნებლის, ჟურნალისტ გელა მთივლიშვილის ინფორმაციით, „საქართველოს ამბების“ ვებგვერდი კიბერთავდასხმის შედეგად გაითიშა.

მთივლიშვილი სოციალურ ქსელში გამოქვეყნებულ პოსტში აღნიშნავს, რომ ეს მათ ვებგვერდებზე კიბერთავდასხმის პირველი შემთხვევა არაა:

„ერთი, ორი, სამი - ყველაზე მოწყვლადები მაინც კიბერთავდასხმების მიმართ აღმოვჩნდით. ალბათ იმიტომაც, რომ წლების განმავლობაში, მწირი და მუდმივად შეზღუდული რესურსების ფონზე, მთელ დროსა და ენერგიას კონტენტის წარმოებას ვუთმობდით. გვინდოდა, ყველგან მივსულიყავით, სადაც ვჭირდებოდით - სიღრმისეულად შეგვესწავლა, გაგვეშუქებინა, სათქმელი რაც შეიძლება ფართო აუდიტორიამდე მიგვეტანა და რეალური ცვლილებები გამოგვეწვია.

ამისათვის გვერდით ვედექით ადგილობრივ ინიციატორებს სხვადასხვა რეგიონიდან, უმეტესად კი თვითონ ვაინიცირებდით და პარტნიორებთან ერთად ვახორციელებდით ადვოკატირების მრავალ კამპანიას. მათ შორის: დიალიზის ცენტრების გახსნა მთიან რეგიონებში - თითქმის ყველგან, სადაც წლების განმავლობაში ეს სერვისიც არ არსებობდა; სკოლამდელი განათლების ხელმისაწვდომობა მთისა და ეთნიკური უმცირესობებით დასახლებულ სოფლებში; სინათლე უშუქო სოფლებში; მთის და საზღვრისპირა დასახლებების ინტერნეტიზაცია; რუსი ოლიგარქის პარტნიორზე გასხვისებული რაჭის ტყეების გამოხსნა და ბევრი სხვა. ეს იყო ჩვენი ყოველდღიური საფიქრალიც და საზრუნავიც. სამწუხაროდ, კიბერუსაფრთხოების კუთხით მედეგობა არასდროს ყოფილა ჩვენი ძლიერი მხარე.

ხოდა, ჯერ ერთი საიტი გაგვიუბედურეს - regmarket.ge, რომელიც 2015 წელს IREX-ის მხარდაჭერით შევქმენით. ეს იყო ფასიანი და უფასო განცხადებების პლატფორმა, რომელსაც ცოტაოდენი შემოსავალი მოჰქონდა და ამ რესურსს ისევ ხარისხიანი ჟურნალისტიკის შესაქმნელად ვიყენებდით. როგორც კი შევიტყვეთ, რომ საიტზე ნარკოტიკების რეალიზაციის შესახებ განცხადებები განათავსეს და მათი წაშლა ვერაფრით შევძელით, იძულებული გავხდით, პლატფორმა დაუყოვნებლივ მთლიანად გამოგვერთო. ამ უკიდურესად რეპრესიულ და კრიზისულ პერიოდში მის აღსადგენად ფიზიკურად რესურსი არ გვაქვს.

მალევე გატეხეს ჩვენი მეორე ვებგვერდი - reginfo.ge. მასზე კახეთის საინფორმაციო ცენტრისა და შემდგომ უკვე მთელი საქართველოს მასშტაბით წლების განმავლობაში დაგროვილი მნიშვნელოვანი მასალების არქივი ინახებოდა, რომელიც საძიებო სისტემებში საუკეთესოდ იძებნებოდა. ეს საიტიც გამოვრთეთ. არქივები კი შენახული გვაქვს, თუმცა, სამწუხაროდ, საზოგადოებისთვის ხილვადი აღარ არის.

ახლა კი ჩვენი მთავარი საიტი - sakartvelosambebi.ge გატეხეს. ვვარაუდობთ, ასე მარტივად იმიტომ გვერევიან, რომ საიტები ძველ ძრავებზეა აწყობილი. მინიმალური რესურსების გამო შესაბამისი პროგრამული განახლებები ვერ უზრუნველვყავით, რამაც თავდამსხმელებს საქმე გაუადვილა. ძალიან ამოგვიჩემეს და გვარიანადაც გვაზიანებენ“.

ვებგვერდებზე მომხდარ კიბერთავდასხმებთან ერთად, გელა მთივლიშვილი პანკისის სათემო რადიოს მნიშვნელობასა და მისი დახურვის მიზეზებზეც წერს: 

„თითქოს ეს არ იყო საკმარისი, „ქართული ოცნების“ რეპრესიული კანონმდებლობის გამო, იძულებული გავხდით და დავხურეთ პანკისის სათემო რადიო - პროექტი, რომელიც მრავალი გამოწვევის მიუხედავად, 10 წლის წინ შევქმენით. ამ პერიოდში უზარმაზარი საქმე გავაკეთეთ, მათ შორის ბევრი ისეთი, რაც სამსახურებრივად არც გვევალებოდა, მაგრამ ხალხს ჰაერივით სჭირდებოდა. ხეობაში რადიო მხოლოდ ინფორმაციის წყარო არ ყოფილა - მან საგანმანათლებლო მისიაც იკისრა. შეიქმნა სასწავლო ცენტრი, სადაც 500-ზე მეტმა ადამიანმა უფასოდ ისწავლა კომპიუტერული პროგრამები, ავტომობილის მართვის თეორია და პრაქტიკა, „ორის“ ბუღალტერია, საფეხმავლო გიდობა და საოჯახო ტურიზმი. სულ მცირე 40-ზე მეტ ოჯახს დავეხმარეთ სტარტაპ გრანტების (25–50 ათასი ლარი) მოპოვებასა და საკუთარი ბიზნესის წამოწყებაში.

ყველა კრიტიკულ მომენტში სათემო რადიო თემის გვერდით იდგა - იქნებოდა ეს სირიაში ახალგაზრდების წასვლის წინააღმდეგ ბრძოლა, ლაფანყურის სპეცოპერაციის მხილება და საქმის ობიექტური გამოძიების მოთხოვნა, თემირლან მაჩალიკაშვილის მკვლელობის საქმე, ჰესების მასობრივი მშენებლობის საწინააღმდეგო გამოსვლები თუ სხვა.

რადიოსთვის ლაფანყურის თემა წლების განმავლობაში საკვანძო იყო. პანკისის სათემო რადიო ჯერ არც კი არსებობდა, როდესაც ლაფანყურის სპეცოპერაციის დეტალები ვამხილეთ: ის, რომ დივერსანტები დაღესტნიდან თუ ჩრდილოეთ კავკასიიდან არ გადმოსულან (როგორც ამას მაშინდელი ხელისუფლება და პროპაგანდა ამტკიცებდა) და სინამდვილეში პანკისის ხეობის მცხოვრებლებიც ჩახოცეს. წლები ვაშუქებდით ამ ამბავს, ვიდრე აქ თუ საზღვარგარეთ (თურქეთში, გერმანიაში, სირიაში) სათითაოდ არ ამოხოცეს ამ საქმის ცოცხლად გადარჩენილი მონაწილეები და მოწმეები.

გვებრძოდა სუს-თან მჭიდროდ დაკავშირებული და ორგანიზებულ დანაშაულებებში (მკვლელობა, გატაცება) ჩვენ მიერ არაერთხელ მხილებული ჯგუფი, რომელსაც ზოგიერთი ადგილობრივიც უჭერდა მხარს. აორგანიზებდნენ აქციებს რადიოს წინააღმდეგ, გვემუქრებოდნენ სიცოცხლის მოსპობით და რადიოს დარბევითაც კი, თუმცა სახელმწიფოს არცერთი ეს შემთხვევა არ გამოუძიებია!

პანკისში კეთილმოწყობილი ოფისი და სასწავლო ცენტრი გვქონდა. კეთილმოწყობილი ახლაა, თორემ როდესაც მუნიციპალიტეტისგან იჯარით ავიღეთ, სრულიად დანგრეული და გაოხრებული იყო: წყალი ჩადიოდა, სახურავი, კარ-ფანჯარა და იატაკიც კი არ ჰქონდა. ყველაფერი ჩვენი ხელით გავაკეთეთ. ისეთი სივრცე შევქმენით, რომ „ქართული ოცნების“ მინისტრებიც კი ვერ მალავდნენ გაოცებას, როდესაც სათემო რადიოს პირდაპირ ეთერში სტუმრად მოდიოდნენ.

ამ ოფისიდან რომ გაგვასახლონ, ჯერ პოლიციას მიმართეს გამობარგების მოთხოვნით, ახლა კი სასამართლოში გვიჩივლა ახმეტის მერმა, ალექსი ფიცხელაურმა (წარმოშობით ხევსურმა!!!). მერად მხოლოდ იმიტომ მოხვდა, რომ ბიძამისი, შენგელი ფიცხელაური, სუს-ის უფროსის მოადგილე იყო. ეს ოფისი „ქართული ოცნების“ ერთ ხარბ აქტივისტს დაჰპირდნენ, რომელიც დიდი ხანია ცდილობს მის ხელში ჩაგდებას.

ახლა მთავარია ქვეყანა არ დავკარგოთ. ბრძოლა ბოლომდე - ყველაფერი დანარჩენი აღდგება! სარგებელზე დახარბებული ჭია-ღუები მხოლოდ დროებით ხარობენ!“. 

ცნობისთვის, 25 ივლისს საგამოძიებო პლატფორმა „მონიტორმა” გაავრცელა ინფორმაცია, რომ მათ YouTube არხზე კიბერშეტევა განხორციელდა, რის გამოც ის 5 დღის მანძილზე გათიშული იყო. დროებით დაიბლოკა „მონიტორის“ facebook გვერდიც.

რეგიონული მედიის - TOKTV-ის ინფორმაციით, კიბერშეტევა რამდენჯერმე განხორციელდა მათ ვებგვერდზეც. 

„მედიის ადვოკატირების კოალიცია“ საქართველოში „მედიაგარემოს გაუარესებას და გამოხატვის თავისუფლების შეზღუდვისა და დამოუკიდებელი მედიის დევნის მორიგ მცდელობებს“ ეხმაურება და აცხადებს, რომ „ბოლო პერიოდში განვითარებული მოვლენები მკაფიოდ ადასტურებს, რომ „ქართული ოცნება“ ატარებს მიზანმიმართულ და კოორდინირებულ პოლიტიკას თავისუფალი მედიის ხმის ჩასახშობად, ჟურნალისტთა  შესავიწროებლად და საზოგადოების ალტერნატიული ინფორმაციის გარეშე დასატოვებლად“.

როგორც კოალიცია აღნიშნავს, ბოლო დღეების განმავლობაში დამოუკიდებელი მედიის დევნის რამდენიმე შემთხვევა დაფიქსირდა:

„კომუნიკაციების კომისია განაგრძობს დამოუკიდებელი მაუწყებლების ცენზურას და რეპრესიული კანონმდებლობის იმპლემენტირებას. ამჯერად 10 000 ლარით დააჯარიმეს ტელეკომპანია „ფორმულა“. დარღვევად მიიჩნიეს საინფორმაციო გამოშვებებში ისეთი ტერმინების გამოყენება, როგორებიცაა „ოცნების პრემიერი“, „ქართული ოცნების სუსი“ თუ „ივანიშვილის პრემიერი“. აღნიშნული გადაწყვეტილება, ისევე როგორც „ფორმულასა“ და „ტვ პირველის“ თაობაზე ადრე  მიღებული გადაწყვეტილებები, წარმოადგენს შინაარსობრივი რეგულირების მექანიზმის ბოროტად გამოყენებას და მედიაზე ფინანსურ თუ სამართლებრივ წნეხს.

ტელეკომპანია „ფორმულას“ წამყვანი, ვახო სანაია კვლავ სამართალდამცავი ორგანოების სამიზნე გახდა. მას შემდეგ, რაც ივლისში, სოციალურ ქსელში გამოქვეყნებული პოსტების გამო, მას 14-დღიანი ადმინისტრაციული პატიმრობა ერთხელ უკვე შეეფარდა, შინაგან საქმეთა სამინისტრომ (მათ შორის, ახლად შექმნილმა სიძულვილის ენის წინააღმდეგ ბრძოლის სამმართველომ) მის წინააღმდეგ მორიგი სამართლებრივი დევნა წამოიწყო ფეისბუქის სტატუსებისა და ვიდეოს გამო. ეს ფაქტი დამოუკიდებელი ჟურნალისტების მიზანმიმართულ დევნასა და დაშინების მცდელობაზე მიუთითებს.

„ქართული ოცნების“ დამფუძნებლისა და ყოფილი პრემიერის, ბიძინა ივანიშვილის შვილმა, ბერა ივანიშვილმა მედიისა და კონკრეტული პირების წინააღმდეგ ცილისწამების მუხლით სასამართლოში საჩივრების შეტანა დაანონსა. მიტაცებული სახელმწიფო ინსტიტუტების, მათ შორის, სასამართლოს, მდგომარეობისა და ივანიშვილის სახელმწიფო უწყებებზე გავლენების გათვალისწინებით, მსგავსი განცხადება სამოქალაქო ჩართულობის წინააღმდეგ სტრატეგიული სამართალწარმოების (SLAPP) გამოყენების რეალურ საფრთხეს ზრდის. ასეთი სარჩელები მიზნად ისახავს არა უფლებების დაცვას, არამედ მედიისთვის ფინანსური და სამართლებრივი პრობლემების შექმნას.

საგამოძიებო მედიაჯგუფის „სტუდია მონიტორის“ მიერ ბიძინა ივანიშვილის ოჯახისა და „ქართულ ოცნებასთან“ დაახლოებული ბიზნესმენის, ვანო ჩხარტიშვილის სავარაუდო ინტერესებთან დაკავშირებული საგამოძიებო ფილმის გამოქვეყნებას მოჰყვა მაღალი თანამდებობის პირების, „ქართული ოცნების“ მხარდამჭერი მედიის მხრიდან მიზანმიმართული დისკრედიტაციული კამპანია „სტუდია მონიტორის“ წინააღმდეგ. რეპუტაციული დაზიანებისა და სტიგმატიზაციის მცდელობა მსგავსი ახალისებს სიძულვილსა და ძალადობას ჟურნალისტების მიმართ“.

„მედიის ადვოკატირების კოალიცია“, რომელიც ადამიანის უფლებების დამცველ და მედიის საკითხებზე მომუშავე 17 ორგანიზაციას აერთიანებს, მიიჩნევს, რომ ეს პროცესები არ არის ცალკეული ინციდენტები, „არამედ „ქართული ოცნების“ მიზანმიმართულ პოლიტიკას წარმოადგენს, რომლის გამოც დამოუკიდებელ ჟურნალისტებსა და საქართველოს მოქალაქეებს შემზღუდველი საკანონმდებლო ბაზის, სისტემური დევნისა და სრული დაუსჯელობის პირობებში უწევთ ცხოვრება და მუშაობა“.

 MAC-ი სრულ სოლიდარობას უცხადებს ყველა დამოუკიდებელ ჟურნალისტს, „რომელიც მზარდი წნეხის, შანტაჟისა და დევნის მიუხედავად, აგრძელებს საზოგადოების ინფორმირებასა და ქვეყანაში მიმდინარე პროცესების გაშუქებას“. 

ბრიტანეთის მიერ სანქცირებული, სამთავრობო ტელეკომპანია „იმედის“ წამყვანი, გიორგი ფუტკარაძე კომუნიკაციების კომისიასთან არსებული „მედიააკადემიის“ აღმასრულებელი დირექტორის მოვალეობას აღარ შეასრულებს. ფუტკარაძე „მედიააკადემიის“ აღმასრულებელი დირექტორის მოვალეობის შემსრულებლის თანამდებობიდან 2026 წლის 1 ოქტომბრიდან, ამ თანამდებობაზე ყოფნის ვადის ამოწურვამდე 3 თვით ადრე, გაათავისუფლეს. 

კომუნიკაციების კომისიის თავმჯდომარემ, გოგა გულორდავამ გიორგი ფუტკარაძე „მედიააკადემიის“ აღმასრულებელი დირექტორის მოვალეობის შემსრულებლად 10 თებერვალს, 1 თვით დანიშნა, შემდეგ ვადა ჯერ 31 აგვისტოს ჩათვლით, ბოლოს კი კიდევ 4 თვით, 2026 წლის ბოლომდე გაუგრძელა. 

1 ოქტომბრიდან „მედიააკადემიის“ აღმასრულებელი დირექტორის თანამდებობაზე  გოგა გულორდავამ ბონდო გასვიანი დანიშნა. გასვიანი 2025 წლიდან კომუნიკაციების კომისიაში ადმინისტრაციის უფროსი იყო. 

ამ გადაწყვეტილებებთან დაკავშირებულ კითხვებზე „მედიაჩეკერს“ კომისიიდან წერილობით უპასუხეს, რომ „განხორციელდა ჩვეულებრივი საკადრო ცვლილებები, გიორგი ფუტკარაძე ხელმძღვანელის მოვალეობას დროებით ასრულებდა. დღეიდან ხელმძღვანელის პოზიციას ბონდო გასვიანი იკავებს. გიორგი ფუტკარაძე რჩება „მედიააკადემიის“ „მედიასკოლის“ მიმართულების ხელმძღვანელად. კომუნიკაციების კომისიის ადმინისტრაციის უფროსის მოვალეობას შესაბამისი ჯგუფის უფროსი შეასრულებს“.

„მედიააკადემიას“ 2021 წლის სექტემბრიდან 2026 წლის 10 თებერვლამდე შორენა შავერდაშვილი ხელმძღვანელობდა. ის აღმასრულებელი დირექტორის თანამდებობიდან გოგა გულორდავამ ComCom-ის თავმჯომარედ არჩევიდან მალევე გაათავისუფლა. გიორგი ფუტკარაძე მაშინაც „მედიასკოლას“ ხელმძღვანელობდა. ის „მედიააკადემიის“ ერთ-ერთი მიმართულებაა. 

კომუნიკაციების კომისიამ „საზოგადოებაში მედიაწიგნიერების განვითარებისა და მისი ხელშეწყობის მიზნების მისაღწევად“ ააიპ „მედია აკადემია“ 2018 წელს დააფუძნა. კომისიას „მედია აკადემიის“ დაფინანსებაზე წლევანდელი ბიუჯეტიდან 3 853 205 ლარი აქვს გათვალისწინებული. 

კომუნიკაციების კომისიამ ტელეკომპანია „ფორმულა“ მის მიერ ჩატარებული მედიამონიტორინგის საფუძველზე, „მაუწყებლობის შესახებ“ კანონის იმ მუხლის დარღვევისთვის, რომელიც შინაარსობრივ რეგულირებას შეეხება, მესამედ, ამჯერად 10 000 ლარით დააჯარიმა.   

მედიამომსახურებების რეგულირების დეპარტამენტმა „ფორმულას“ ეთერში, შერჩევითი წესით, 14-16 სექტემბერს გასული ახალი ამბების პროგრამები დაამონიტორინდა და მიიჩნია, რომ ტელეკომპანიამ „მაუწყებლობის შესახებ“ კანონის 54-ე მუხლის - „სამართლიანობა და მიუკერძოებლობა“ მე-5 პუნქტი ისევ დაარღვია. 

„ფორმულას“ ახალი ამბების პროგრამაში საკითხის მაუწყებლის პირადი დამოკიდებულების ან მოსაზრების საფუძველზე გაშუქებად ჩაუთვალეს სადავო სიუჟეტებში ისეთი ფრაზების სისტემატურად გამოყენება, როგორებიცაა: „ოცნების პრემიერი“, „ქართული ოცნების სუსი“, „ოცნების პარლამენტი“, „ივანიშვილის პრემიერი“, „ოცნების ფინანსთა სამინისტრო“, „ქართული ოცნების პრეზიდენტი“. მედიამომსახურებების რეგულირების დეპარტამენტის დასაბუთებით, ეს ფრაზები „სახელმწიფო ორგანოების/ინსტიტუციების საქმიანობის მიმართ მაუწყებლის მოსაზრებისა და პირადი დამოკიდებულების გამოხატვას წარმოადგენს“. 

                                                             

„მაუწყებლობის შესახებ“ კანონით, „მედიამომსახურების ან ვიდეოგაზიარების პლატფორმის მომსახურების მიმწოდებლის მეორედ დაჯარიმების შემდეგ მის მიერ დენადი ხასიათის დარღვევის გაგრძელების ან/და მეორედ დაჯარიმების შემდეგ, მაგრამ პირველი დაჯარიმებიდან 1 წლის განმავლობაში, ყოველი ახალი ერთჯერადი ხასიათის დარღვევის ჩადენის შემთხვევაში კომისია უფლებამოსილია დამრღვევს დააკისროს ჯარიმა არაუმეტეს მისი წლიური შემოსავლის 3%-ისა, მაგრამ არანაკლებ 10 000 ლარისა, ან დაიწყოს საჯარო ადმინისტრაციული წარმოება ლიცენზიის მოქმედების შესაჩერებლად/ ავტორიზაციის შესაჩერებლად“. 

                                                             

კომუნიკაციების კომისიამ ტელეკომპანია „ფორმულა“ მსგავსი ფრაზებით ახალი ამბების პროგრამაში საკითხის მაუწყებლის პირადი დამოკიდებულების ან მოსაზრების საფუძველზე გაშუქებისთვის 5 000 ლარით დააჯარიმა ივლისში, 2 500 ლარით - მაისში, აპრილში კი, „TV პირველთან“, Postv-ისა და „იმედთან“ ერთად, წერილობით გააფრთხილა. 

„მაუწყებლობის შესახებ“ კანონის იმ მუხლების დარღვევისთვის, რომელიც შინაარსობრივ რეგულირებას შეეხება, 2 500 და 5 000 ლარით დააჯარიმეს „TV პირველიც“, ერთხელ, 2 500 ლარით - „პოსტვ“-ი. ComCom-მა სექტემბერში, ახალი ამბების პირადი დამოკიდებულების/მოსაზრებების საფუძველზე გაშუქებისთვის წერილობით გააფრთხილა „რუსთავი 2“-იც. 

კომუნიკაციების კომისიამ „მაუწყებლობის შესახებ“ კანონითა და „მაუწყებელთა ქცევის კოდექსით“ დადგენილი ნორმების პრაქტიკაში ამოქმედება, „რათა მაუწყებელთა ობიექტურობა სათანადო პროცედურის საფუძველზე და მაღალი სამართლებრივი სტანდარტით შეფასდეს“, 6 მარტს, ბრიტანეთის მიერ სამთავრობო ტელეკომპანიების: „იმედისა“ და „პოსტვ“-ის დასანქცირების შემდეგ, დააანონსა. ComCom-ს თვითრეგულირების სფეროში მოქცეული საკითხების განხილვისა და მაუწყებლების დასანქცირების შესაძლებლობა გასული წლის გაზაფხულზე, „მაუწყებლობის შესახებ“ კანონში შესული ცვლილებებით მიეცა.
                                                                                         
კომუნიკაციების კომისიას 29 იანვრიდან ახალი თავმჯდომარე - გოგა გულორდავა ჰყავს. მან 2025 წელს, სამთავრობო ტელეკომპანია „იმედიდან“ ხელფასის სახით (ხელზე ასაღები) 166 428 ლარი აიღო. გულორდავა „იმედში“ 2023 წლიდან მუშაობდა, ის მონიტორიგის და აუდიტის ხელმძღვანელი იყო.

კომისიამდე, 2020 წლიდან გოგა გულორდავა მუშაობდა სს „საქართველოს სახელმწიფო ელექტროსისტემაშიც“. ის 2016-2020 წლებში „ქართული ოცნების“ მაჟორიტარი დეპუტატი იყო, 2013-2016 წლებში კი - წალენჯიხის მუნიციპალიტეტის გამგებელი. 

აპრილში კომუნიკაციების კომისიის წევრი გახდა „იმედის“ იურიდიული დეპარტამენტის უფროსიც, ანი ვაზაგაშვილი. ის ტელეკომპანია „მაესტროს“ იურიდიული სამსახურის ხელმძღვანელიც იყო. ვაზაგაშვილმა 2025 წელს სამთავრობო ტელეკომპანია „იმედიდან“ ხელფასის სახით (ხელზე ასაღები) 61 571.6 ლარი აიღო, „მაესტროდან“ კი - 6 030 ლარი. 2024 წლამდე, ამ ტელევიზიებში მუშაობის დაწყებამდე, ის შინაგან საქმეთა სამინისტროს საპატრულო პოლიციის დეპარტამენტის სამართლებრივი უზრუნველყოფისა და ადმინისტრაციული საქმისწარმოების სამმართველოს მთავარი სპეციალისტი/იურისტი იყო. 

გოგა გულორდავასა და ანი ვაზაგაშვილის გარდა, კომუნიკაციების კომისიის წევრები არიან: ნათია კუკულაძე, ეკატერინე იმედაძე და ივანე მახარაძე. 

დღეს, 30 სექტემბერს, „ბათუმელები“/ „ნეტგაზეთის“ დამფუძნებელს, მზია ამაღლობელს დემოკრატიული ღირებულებების ხელშეწყობისა და მხარდაჭერის აღიარების ნიშნად პოლონეთის საგარეო საქმეთა სამინისტრომ ლეხ ვალენსას სახელობის „სოლიდარობის ჯილდო“ გადასცა.

„ბათუმელების“ ცნობით, ვარშავაში გამართულ დაჯილდოების ცერემონიაზე, რომელსაც თავად ლეხ ვალენსაც ესწრებოდა, რადოსლავ სიკორსკიმ პატიმრობაში მყოფი მზია ამაღლობელის ნაცვლად, მისი ჯილდო გამოცემის წარმომადგენელს, ირმა დიმიტრაძეს გადასცა. 

პოლონეთის ყოფილი პრეზიდენტის, ნობელის პრემიის ლაურეატის, ლეხ ვალენსას „სოლიდარობის ჯილდო“ საგარეო საქმეთა სამინისტროს ინიციატივით 2014 წელს დაარსდა. ის იმ პირებს ან ორგანიზაციებს გადაეცემათ, რომლებმაც განსაკუთრებული წვლილი შეიტანეს მსოფლიოში დემოკრატიისა და სამოქალაქო თავისუფლებების დაცვასა და ხელშეწყობაში. 

პრემიის სხვადასხვა დროის ლაურეატებს შორის არიან: 

• 2025 წელი - უბელი დისიდენტი, მოძრაობა - „ქალები თეთრებში“ ლიდერი, ბერტა სოლერ ფერნანდესი;

• 2024 წელი - ბელარუსი დისიდენტი პაველ ლატუშკო;

• 2015 წელი - ჟურნალისტი და სამოქალაქო აქტივისტი ჟანა ნემცოვა. ის რუსეთში მოკლული ოპოზიციონერის, ბორის ნემცოვის შვილია;

• 2014 წელი - ყირიმელი თათრების ლიდერი მუსტაფა ჯემილევი. 

პატიმრობაში ყოფნისას მზია ამაღლობელმა არაერთი ჯილდო მიიღო. მას შარშან ევროკავშირის ადამიანის უფლებათა უმაღლესი ჯილდო, სახაროვის პრემიაც გადასცეს. გასულ წელს ამაღლობელი დააჯილდოვეს პაულ ვაიზის და თავისუფალი მედიის პრემიებით, ის გახდა 2025 წლის მსოფლიო პრესის თავისუფლების გმირის ჯილდოს მფლობელიც, რომელსაც „პრესის საერთაშორისო  ინსტიტუტი“ (IPI) „საერთაშორისო მედიის მხარდაჭერასთან“ (IMS-სთან) პარტნიორობით ყოველწლიურად გასცემს. მზია ამაღლობელს გადაეცა „ფორუმ 2000“-ის საერთაშორისო ჯილდოც. ის მოხვდა ვაცლავ ჰაველის სახელობის ადამიანის უფლებათა პრემიის 2025 წლის ფინალისტთა სიაშიც.

„ბათუმელები“/„ნეტგაზეთის“ დამფუძნებელსა და დირექტორს, მზია ამაღლობელს 6 აგვისტოს, ბათუმის საქალაქო სასამართლოს მოსამართლე ნინო სახელაშვილმა 2-წლიანი პატიმრობა მიუსაჯა. ის 20 თვეზე მეტია უკანონო პატიმარია. 

„საქართველოს ჟურნალისტური ეთიკის ქარტია“ აცხადებს, რომ გმობს პროფესიული საქმიანობის გამო კამპანიური ხასიათის თავდასხმას საგამოძიებო მედიაპლატფორმა „მონიტორზე“. 

„მას შემდეგ, რაც „სტუდია მონიტორმა“ 26 სექტემბერს გამოაქვეყნა ფილმი, რომელიც ესტონელი ინვესტორის წინააღმდეგ წარმოებულ საქმეს ეხება და მისი ქონების მიმართ ბიძინა ივანიშვილისა და ვანო ჩხარტიშვილის სავარაუდო ინტერესს აღწერს, გამომძიებელ ჟურნალისტთა ჯგუფი ხელისუფლების სამიზნედ იქცა.

ქვეყნის უმაღლესი თანამდებობის პირებმა ბიძინა ივანიშვილის დასაცავად „სტუდია მონიტორის“ წინააღმდეგ საჯარო განცხადებები გააკეთეს.

27 სექტემბერს შალვა პაპუაშვილმა „სტუდია მონიტორი“ საქართველოს წინააღმდეგ მოქმედებაში დაადანაშაულა და ბიძინა ივანიშვილის წინააღმდეგ „შავი პროპაგანდისტული ხაზის“ ნაწილად მოიხსენია.

„ფანტაზიორობა“ და „აბსურდული საკითხის მტკიცება“ - ასე შეაფასა მან „სტუდია მონიტორის“ ნაშრომი.

იმავე დღეს გააკრიტიკა „სტუდია მონიტორის“ ფილმი ირაკლი კობახიძემაც და გამომძიებელი ჟურნალისტები „უცხოურ აგენტურად“ მონიშნა.

მედიაზე უსამართლოდ და დაუსაბუთებლად თავდასხმის ეს შემთხვევა პირველი არ არის. „ქართული ოცნების“ წარმომადგენლები უკვე წლებია, თანმიმდევრულად ცდილობენ საზოგადოების თვალში მედიის რეპუტაციის შელახვას, პროფესიული კეთილსინდისიერებით გამორჩეული ჟურნალისტების სტიგმატიზებას და მარგინალიზაციას.

მსგავსი განცხადებები ახალისებს სიძულვილს და ნოყიერ ნიადაგს ქმნის ჟურნალისტების წინააღმდეგ ძალადობრივი დანაშაულებისთვის, რომელთა აბსოლუტური უმრავლესობა გამოუძიებელი რჩება.

თავად „სტუდია მონიტორი“ პროცესს აფასებს, როგორც მის წინააღმდეგ მიმართულ „კოორდინირებულ მადისკრედიტებელ კამპანიას“.

ქარტია სოლიდარობას უცხადებს „სტუდია მონიტორსა“ და მის გაბედულ ჟურნალისტებს, რომელთაც არაერთი პროფესიული ჯილდო აქვთ მიღებული ეთიკური სტანდარტების დაცვით შესრულებული ნამუშევრებისთვის, რითაც სააშკარაოზე გამოიტანეს კორუფცია, ნეპოტიზმი და ძალაუფლების ბოროტად გამოყენების შემთხვევები“, - წერს ჟურნალისტური ეთიკის ქარტია.

გუშინ „მონიტორმა“ განაცხადა, რომ მიუკერძოებელ მედიაზე თავდასხმად მიიჩნევს ირაკლი კობახიძისა და შალვა პაპუაშვილის საჯარო განცხადებებს, რომლებიც გამოცემის მიერ 25 სექტემბერს გამოქვეყნებულ ჟურნალისტურ გამოძიებას მოჰყვა. 

„მსგავსი დაუსაბუთებელი განცხადებები ემსახურება „მონიტორის“ დისკრედიტაციას და შესაბამისად, ამას აღვიქვამთ  კრიტიკული მედიის მიმართ ხელისუფლების რეპრესიული პოლიტიკის გაგრძელებად და თავდასხმად.   

„მონიტორი“ ირაკლი კობახიძეს და შალვა პაპუაშვილს  შეახსენებს, რომ მედიის მოვალეობაა საზოგადოების ინფორმირება, ყველა მნიშვნელოვანი პროცესისა და მოვლენის გაშუქება და კრიტიკული შეკითხვების დასმა. ხოლო თანამდებობის პირების ვალდებულებაა, ამ შეკითხვებს უპასუხონ“, - ვკითხულობთ „მონიტორის“ განცხადებაში. 

წაიკითხეთ „საქართველოს ჟურნალისტური ეთიკის ქარტიის“ განცხადებაც ბოლო დროს „მონიტორზე“ მომხდარ კიბერთავდასხმებზე.  

საგამოძიებო მედიაპლატფორმა „მონიტორი“ მიუკერძოებელ მედიაზე თავდასხმად მიიჩნევს ირაკლი კობახიძისა და შალვა პაპუაშვილის გუშინდელ საჯარო განცხადებებს, რომლებიც გამოცემის მიერ 25 სექტემბერს გამოქვეყნებულ ჟურნალისტურ გამოძიებას მოჰყვა და განცხადებას ავრცელებს.

„“მონიტორი“ მიუკერძოებელ მედიაზე თავდასხმად მიიჩნევს საქართველოს პრემიერ-მინისტრისა და პარლამენტის თავმჯდომარის მიერ 27 სექტემბერს გაკეთებულ საჯარო განცხადებებს, რომლებიც 25 სექტემბერს ჩვენ მიერ გამოქვეყნებულ ჟურნალისტურ გამოძიებას მოჰყვა.

ჟურნალისტური გამოძიება აღწერს ესტონელი ინვესტორის, ოლეგ ოსინოვსკის მიმართ დაწყებული  გამოძიებისა და მისი კომპანიის - Tbilisi Hills Golf & Residences-ის  ქონებისა და საბანკო ანგარიშების დაყადაღების ამბავს. ჩვენ ქრონოლოგიურად აღვწერეთ ის მოვლენები, რაც Tbilisi Hills Golf & Residences- ის მეზობლად „ქართული ოცნების“ დამფუძნებლისა და საპატიო თავმჯდომარის  ბიძინა ივანიშვილის ოჯახის  ბიზნესცენტრის მშენებლობა დაიწყო. მათ შორის, საზოგადოებას მივაწოდეთ ინფორმაცია, რომ ესტონელმა ბიზნესმენმა ამ ტერიტორიაზე კუთვნილი მიწებიდან 10 ჰექტარი ივანიშვილთან დაახლოებული ბიზნესმენის, ვანო ჩხარტიშვილის ოჯახის კომპანიას მიყიდა.

ჟურნალისტური ეთიკისა და პროფესიული სტანდარტების დაცვით, „მონიტორმა“ პასუხის უფლების გამოყენა შესთავაზა მასალაში მოხსენიებულ ყველა მხარეს. პასუხის უფლებით ისარგებლა ბატონმა ჩხარტიშვილმა, რაც ჩვენ სრულყოფილად ავსახეთ საბოლოო პროდუქტში. ამიტომ გაუგებარია, რას ესამხურებოდა ბიზნესმენის მიერ 27 სექტემბერს გავრცელებული განცხადება, რომ თითქოს ჩვენ რაღაც დავმალეთ, რაც სინამდვილეს არ შეესაბამება.

ამას მოჰყვა ქვეყნის აღმასრულებელი და საკანონმდებლო ხელისუფლების პირველი პირების მხრიდან კოორდინირებული მადისკრედიტირებელი კამპანია „მონიტორის“ წინააღმდეგ.

ირაკლი კობახიძემ „მონიტორი“ „უცხოურ აგენტურად“ მოიხსენია, პაპუაშვილმა კი „შავი პროპაგანდისტული ხაზის ნაწილად“, რომელიც „საქართველოს წინააღმდეგ მოქმედებს“.

მსგავსი დაუსაბუთებელი განცხადებები ემსახურება „მონიტორის“ დისკრედიტაციას და შესაბამისად, ამას აღვიქვამთ  კრიტიკული მედიის მიმართ ხელისუფლების რეპრესიული პოლიტიკის გაგრძელებად და თავდასხმად.     

„მონიტორი“ ირაკლი კობახიძეს და შალვა პაპუაშვილს  შეახსენებს, რომ მედიის მოვალეობაა საზოგადოების ინფორმირება, ყველა მნიშვნელოვანი პროცესისა და მოვლენის გაშუქება და კრიტიკული შეკითხვების დასმა. ხოლო თანამდებობის პირების ვალდებულებაა, ამ შეკითხვებს უპასუხონ“, - ვკითხულობთ „მონიტორის“ განცხადებაში, რომელიც გამოცემამ დღეს გამოაქვეყნდა. 

„TV პირველის“ დირექტორის თანამდებობაზე 3 წლის ვადით ლევან ჯორბენაძე დაინიშნა. ის პარტია „ლელო - ძლიერი საქართველოს“ სტრატეგიული კომუნიკაციების დეპარტამენტს ხელმძღვანელობდა. 

ჯორბენაძე 2014-2016 წლებში „თავისუფალი დემოკრატების“ პრესსამსახურში, 2012-2015 წლებში კი თავდაცვის სამინისტროში მუშაობდა. სხვადასხვა დროს მუშაობდა „დილის გაზეთში“, „პირველ არხზე“, „რადიო უცნობში“,  „რუსთავი 2“-სა და „იმედშიც“. 

„TV პირველის“ 100%-იანი წილის მფლობელმა და დირექტორმა, ვატო წერეთელმა არხის სამეურვეო საბჭო და დირექტორობის მომავალი კანდიდატი გუშინ, 23 სექტემბერს წარადგინა.  

ტელევიზიის საზოგადოებრივ მრჩეველთა საბჭოში, რომელსაც ვატო წერეთელი უხელმძღვანელებს, არიან: ექსპერტი საარჩევნო საკითხებში ირაკლი მელაშვილი, ჟურნალისტი და მედიის კომუნიკაციის სპეციალისტი დოდო შონავა, იურისტი და უფლებადამცველი გიორგი მშვენიერაძე, პოლიტოლოგი გია ხუხაშვილი, მედიის მკვლევარი დავით ძიძიშვილი, მსახიობი ირაკლი აფაქიძე და ჟურნალისტები: ზაალ უდუმაშვილი, ინგა გრიგოლია, თამარ ჯინჭარაძე.  

ბრიტანეთის მიერ სანქცირებულ, პროსამთავრობო ტელეკომპანია POSTV-ში „ხალხის ძალის“ წევრის, ვიქტორ ჯაფარიძის კუთვნილი 52%-იანი წილის ახალ მმართველად გიორგი შენგელია დაინიშნა. ცვლილების რეგისტრაციისთვის საჯარო რეესტრის ეროვნულ სააგენტოს არხის აღმასრულებელმა დირექტორმა და 24%-იანი წილის მფლობელმა, თემურ ჭარელაშვილმა გუშინ, 22 სექტემბერს მიმართა, მონაცემებში ცვლილება კი დღეს აისახა.

გიორგი შენგელია შპს „პოსტივის მხარდამჭერების“ დირექტორი და 100%-იანი წილის მფლობელია. მან ეს ორგანიზაცია სამთავრობო POSTV-ის დასანქცირებიდან მეორე დღეს, 25 თებერვალს დაარეგისტრია. 

ვიქტორ ჯაფარიძემ POSTV-ის წილი სამართავად სხვას უკვე მეორედ გადასცა. 28 იანვარს, არხის დასანქცირებამდე თითქმის 1 თვით ადრე, ჯაფარიძის 52%-იანი წილის მმართველი კასპის მერის ყოფილი მოადგილე, ზაზა მარიდაშვილი გახდა.

ვიქტორ ჯაფარიძემ POSTV-ის საკონტროლო წილი 2022 წლის 3 ოქტომბერს ჯამში 520 000 ლარად იყიდა. არხის დანარჩენ 24-24%-იან წილებს თემურ ჭარელაშვილი და შალვა რამიშვილი ფლობენ. საზოგადოებასთან ურთიერთობის საკითხებში დირექტორი კი ნუგზარ რუხაძეა.

POSTV-ი, სამთავრობო ტელეკომპანია „იმედთან“ ერთად, დიდმა ბრიტანეთმა 24 თებერვალს დაასანქცირა. ორივე ტელევიზიის შემთხვევაში სანქციის მიზეზად რუსეთის მიერ უკრაინაში სრულმასშტაბიანი შეჭრის შესახებ განზრახ გავრცელებული შეცდომაში შემყვანი ინფორმაციები დასახელდა.