კონკურსები
ადამიანის უფლებათა სახლი აცხადებს კონკურსს მედიის სფეროში მომუშავე პროფესიონალებისთვის.

მედია პროფესიონალები, როგორც უფლებადამცველები

მედიის სფეროში მომუშავე პროფესიონალები, განსაკუთრებით კი ჟურნალისტები, პროფესიული საქმიანობის განხორციელებისას, ხშირად ადამიანის უფლებებს იცავენ. ისინი უფლებადამცველები ხდებიან, როდესაც შექმნილი მედია პროდუქტებით იცავენ ადამიანის უფლებებს, ზრდიან საზოგადოების ცნობიერებას ძირითადი უფლებების და თავისუფლებების შესახებ, აშუქებენ უფლებადარღვევებს და უწევენ ადვოკატირებას ადამიანის უფლებების დაცვას.

სწორედ ამიტომ, მსოფლიოს ბევრ ქვეყანაში, ჟურნალისტები, როგორც უფლებადამცველები, ხშირად იდევნებიან და ძალადობის, მუქარის თუ შევიწროების მსხვერპლნი არიან.

ლექსოს პრემიის დაწესებით გვსურს გამოვეხმაუროთ საქართველოში ბოლოდროინდელ მოვლენებს, განსაკუთრებით, 5 ივლისს, მედიის თავისუფალი და უფლებადაცვითი საქმიანობის წინააღმდეგ განხორციელებულ ზეწოლას და ძალადობას. პრემიის დაწესებით გვინდა, მხარი დავუჭიროთ თავისუფალი მედია გარემოს არსებობას და განვითარებას საქართველოში. გვსურს ხაზი გავუსვათ, რომ თავისუფალი და უფლებადამცველი მედია აუცილებელია დემოკრატიულ საზოგადოებაში და უმნიშვნელოვანეს როლს თამაშობს თავისუფალი, ტოლერანტული და პლურალისტური საზოგადოების მშენებლობაში.

ლექსოს პრემიის ისტორია

საგანგაშო იყო 2021 წლის 5 ივლისს ლგბტ+ თემის, მათი მომხრეების, უფლებადამცველებისა და უფლებადაცვითი ორგანიზაციების წინააღმდეგ განხორციელებული ძალადობა რადიკალურად განწყობილი, ორგანიზებული ჯგუფების მხრიდან. ძალადობის სამიზნედ იქცნენ ასევე ჟურნალისტები, ოპერატორები და ფოტოგრაფები, რომლებიც ადგილზე აშუქებდნენ მიმდინარე მოვლენებს და აგრესიული ჯგუფების მიერ ჩადენილ უფლებადარღვევებს.

სხვადასხვა წყაროების ცნობით, დაშავდა მედიის 53 წარმომადგენელი, მათ შორის იყო „TV პირველის“ ოპერატორი - ალექსანდრე (ლექსო) ლაშქარავა. ლექსო ლაშქარავას თბილისი პრაიდის ორგანიზატორებთან ჩაწერილი ინტერვიუს შემდეგ, მოძრაობა „სირცხვილია“-ს ოფისში სასტიკად გაუსწორდნენ ძალადობრივი კონტრ-დემონსტრანტები. თავის არეში მიღებული მძიმე დაზიანებების შედეგად მას ოპერაცია ჩაუტარდა, რამდენიმე დღეში კი ის საკუთარ სახლში გარდაცვლილი იპოვეს. გარდაცვალების ზუსტი მიზეზი ჯერ არ დადგენილა და ექსპერტიზა არ დასრულებულა.

სამწუხაროდ, ამ დრომდე, შესაბამის სახელმწიფო უწყებებს არ გადაუდგამთ ქმედითი ნაბიჯები 5 ივლისს გამოვლენილი ძალადობრივი ქმედებების ეფექტიანად გამოსაძიებლად. ამასთან, ხელისუფლების წარმომადგენლები არ გამოხატავენ უფლებადამცველების და მედიის წარმომადგენლების მიმართ მხარდაჭერას და არ გმობენ ძალადობრივი ჯგუფების ორგანიზებულ საქმიანობას.

ლექსო ლაშქარავა გახდა ძალადობის სამიზნე და მისი უფლებები დაირღვა სწორედ იმის გამო, რომ ის აშუქებდა უფლებადარღვევებს.

ლექსოს პრემიის დაწესების მიზანი არის საქართველოში უფლებადამცველი მედიის მხარდაჭერა, შენარჩუნება და მისი შემდგომი განვითარება.

ვის შეუძლია კონკურსში მონაწილეობის მიღება?

18+ ასაკის მედია პროფესიონალები (ჟურნალისტები, ოპერატორები და ა.შ. ).

საკონკურსო აპლიკაციები მიიღება შემდეგი მიმართულებებით:

- უფლებადაცვითი ვიდეო-რეპორტაჟი

- უფლებადაცვითი სტატია

წარმოდგენილი სააპლიკაციო პროდუქტები შესაძლოა ასახავდეს და აშუქებდეს რეალურ ისტორიებს და უფლებადარღვევებს, წარმოადგენდეს დოკუმენტურ მასალას, ან ჰქონდეს უფლებების დაცვის, ადვოკატირების და საზოგადოებაში უფლებების შესახებ ცნობიერების ამაღლების მიზნები.

აპლიკაციის წარდგენის მომენტისთვის, საკონკურსო პროდუქტი შესაძლოა იყოს უკვე გადაღებული/გამოქვეყნებული 2020-2021 წლებში, ან მომზადდეს უშუალოდ კონკურსისთვის.

საკონკურსო პროდუქტი შესაძლოა წარადგინოს როგორც ერთმა, ისე რამდენიმე ადამიანმა (მაგალითად, ჟურნალისტი და ოპერატორი, ჟურნალისტი და ფოტოგრაფი და სხვ. ).

გამარჯვებულები გამოვლინდებიან შემდეგ კატეგორიებში:

1. საუკეთესო უფლებადაცვითი ვიდეო-რეპორტაჟი
წარდგენილი აპლიკაცია: უფლებადაცვითი ვიდეო-რეპორტაჟი.
2. საუკეთესო უფლებადაცვითი სტატია
წარდგენილი აპლიკაცია: უფლებადაცვითი სტატია.

თითოეულ კატეგორიაში ფულადი ჯილდო შეადგენს 2000 ლარს (ფულადი ჯილდო გაუნაწილდება მედია პროდუქტის ყველა მითითებულ ავტორს თანაბრად).

რა უნდა წარადგინოთ?

1) მოკლე პროფესიული რეზიუმე (CV); თუ აპლიკანტი ერთზე მეტი პირია, საკონკურსო გუნდის ყველა წევრის პროფესიული რეზიუმე (CV).
2.1. საკონკურსო სტატია ადამიანის უფლებების შესახებ. კონკურსანტი(ები) თავისუფალია აირჩიოს კონკრეტული თემა და სტატიის ფორმატი (სტატია, ბლოგი და სხვ.)
ან
2.2. საკონკურსო ვიდეო-რეპორტაჟი ადამიანის უფლებების შესახებ. კონკურსანტი(ები) თავისუფალია აირჩიოს კონკრეტული თემა და ვიდეო რეპორტაჟის ფორმატი (სატელევიზიო სიუჟეტი, ინტერნეტ-პლატფორმის ვიდეო და სხვ.) მნიშვნელოვანი: თუ თქვენი წარმოდგენილი აპლიკაცია მოიცავს რეალური პერსონაჟის/პერსონაჟების ფოტოს, ვიდეოს ან სხვა სახის პერსონალურ ინფორმაციას, ხოლო წარმოდგენილი პროდუქტი ჯერ არ არის გამოქვეყნებული, აუცილებელია წარმოადგინოთ აღნიშნული პირის/პირების წინასწარი თანხმობის ფორმა, მათ შესახებ მასალის გამოქვეყნებაზე.

საკონკურსო განაცხადები უნდა გამოგზავნოთ მისამართზე: info@hrht.ge

გაითვალისწინეთ, რომ განაცხადის გამოგზავნით თქვენ თანხმდებით, რომ ადამიანის უფლებათა სახლმა გამოაქვეყნოს თქვენი მედია პროდუქტები თავის პლატფორმებზე.

საკონკურსო განაცხადების მიღების ბოლო ვადაა 2021 წლის 31 ოქტომბერი, თბილისის დროით 20:00 საათი.

დამატებითი ინფორმაციისთვის შეგიძლიათ დაგვიკავშირდეთ მეილზე: info@hrht.ge

გამარჯვებულები გამოვლინდებიან 2021 წლის 9 დეკემბერს, უფლებადამცველთა საერთაშორისო დღეზე.
საქართველოს ჟურნალისტური ეთიკის ქარტია იწყებს განაცხადების მიღებას „ქარტიის პრიზი 2020-ის" მოსაპოვებლად. ყოველწლიური კონკურსის მიზანია პროფესიული სტანდარტების დამკვიდრების და ეთიკური ჟურნალისტიკის განვითარების ხელის შეწყობა.

კონკურსი ცხადდება შემდეგ რვა ნომინაციაში:
  1. ვიდეორეპორტაჟი
  2. მულტიმედია პროექტი (1 მასალა ან სერია)
  3. სტატია ან ნარკვევი ბეჭდურ ან ონლაინ მედიაში
  4. ჟურნალისტური გამოძიება
  5. ვიდეორეპორტაჟი COVID-19-ზე
  6. მულტიმედია პროექტი COVID-19-ზე (1 მასალა ან სერია)
  7. სტატია ან ნარკვევი ბეჭდურ ან ონლაინ მედიაში COVID-19-ზე
  8. ჟურნალისტური გამოძიება COVID-19-ზე

პირველ ოთხ კატეგორიაში პრიზი გაიცემა აშშ-ს საელჩოს დემოკრატიის კომისიის მცირე გრანტების პროგრამის მხარდაჭერით, ხოლო COVID-19-ის საკითხებზე პრიზი დაწესებულია IREX-ის M-TAG პროგრამის მიერ.

გამარჯვებულებს შეარჩევს დამოუკიდებელი ჟიური.

პროცედურები და შერჩევის კრიტერიუმები:

  • მონაწილეობის მსურველებმა უნდა წარადგინონ ჟურნალისტური პროდუქტი, რომელიც გამოქვეყნდა 2019 წლის 1 ნოემბრიდან 2020 წლის 25 ნოემბრამდე პერიოდში;
  • საკონკურსოდ მასალის წარდგენა შეუძლია როგორც ჟურნალისტს ინდივიდუალურად, ისე მედიასაშუალებას;
  • მონაწილეობის მსურველმა უნდა წარადგინოს გამოქვეყნებული მასალის ბმული. იმ შემთხვევაში თუ საკონკურსო ნამუშევარი ინტერნეტ სივრცეში არ მოიძებნება, კონკურსანტს შეუძლია გამოგზავნოს ვიდეო რეპორტაჟის და მულტიმედიის შემთხვევაში ჩანაწერი, სტატიის შემთხვევაში კი მისი სკანირებული ან სქრინ ვერსია;
  • მონაწილეობის მსურველმა უნდა შეავსოს აპლიკაცია;
  • დამატებითი მასალები (არსებობის შემთხვევაში) გამოგზავნეთ შემდეგ ელექტრონულ მისამართზე: ethicscharter@gmail.com;
  • თითოეულ აპლიკანტს შეუძლია ერთი საკონკურსო ნაშრომის წარდგენა ერთ ნომინაციაში;
  • საკონკურსო ნაშრომი გამოქვეყნებული უნდა იყოს საქართველოში მოქმედ რომელიმე მედიასაშუალებაში.

    საკონკურსო ნამუშევრების მიღების ბოლო ვადაა 2020 წლის 30 ნოემბერი, 18.00 საათი.

გამარჯვებული გამოვლინდება 2020 წლის დეკემბერში საქართველოს ჟურნალისტური ეთიკის ქარტიის საერთო კრებაზე.

ნამუშევრების შეფასების ზოგადი კრიტერიუმები:

  • თემის აქტუალობა/მაღალი საზოგადოებრივი ინტერესი
  • თხრობის სტილი და ტექნიკა
  • ინფორმაციის გადმოცემის ხერხების მრავალფეროვნება
  • სიუჟეტების და მულტიმედია პროექტის შემთხვევაში ასევე დრამატურგია და ვიზუალური მხარე • ინფორმაციის წყაროთა მრავალფეროვნება
  • ინფორმაციის სიზუსტე
  • ფაქტებისა და მოსაზრებების გამიჯვნა, მიუკერძოებლობა
  • მხარეთა ბალანსი
  • სიძულვილის ენისა და შეუფერებელი ლექსიკის უარყოფა/ გამოუყენებლობა

ჟურნალისტური პროდუქტის შერჩევის მთავარი კრიტერიუმია პროფესიული და ეთიკური სტანდარტები, რასაც ეფუძნება საქართველოს ჟურნალისტური ეთიკის ქარტია.

IREX-ის საქართველოს ოფისი აცხადებს ღია კონკურსს ონლაინ მედიასაშუალებებისთვის რომლებიც დედაქალაქის ფარგლებს გარეთ არიან ბაზირებული, საქართველოს მედია პარტნიორობის პროგრამაში (GMPP) 2021 წ. მონაწილეობის მისაღებად. პროგრამა აშშ-ის საელჩოს დაფინანსებით ხორციელდება.

კონკურსის მიზანია რეგიონში ბაზირებული ორი ქართული ონლაინ მედია საშულების შერჩევა პროგრამაში მონაწილეობის მისაღებად.

GMPP პროგრამის მიზანია ქართული მედიის როგორც ორგანიზაციებისა და მდგრადი ბიზნესების განვითარების ხელშეწყობა ამერიკულ პარტნიორ მედიასთან ვირტუალური თანამშრომლობითა და ორმხრივი გაცვლითი ვიზიტების გზით.

განაცხადის შეტანის ბოლო ვადაა პარასკევი, 9 ოქტომბერი 17:00 სთ.

  • ღია კარის დღე ჩატარდება პარასკევს, 25 სექტემბერს 12:00 საათზე, რათა პროგრამის და აშშ საელჩოს წარმომადგენლებმა დამსწრეებს მიაწოდონ ინფორმაცია პროგრამის შესახებ, უპასუხონ მათ შეკითხვებს და დეტალურად განიხილონ განაცხადის ფორმის შევსებისა და შეტანის პროცესი.
  • მედიასაშუალებებისთვის, რომლებიც კონკურსში მონაწილეობას გეგმავენ, რეკომენდებულია ღია კარის დღეზე დასწრება.
  • ღია კარის დღეზე დასასწრებად აუცილებელია წინასწარ რეგისტრაციის გავლა ამ ბმულზე - https://bit.ly/3iRkt7m
დეტალური ინფორმაციისთის იხილეთ ბმული - https://bit.ly/3clRs1p
ქალთა საინფორმაციო ცენტრი და ქალ მშვიდობის მშენებელთა გლობალური ქსელი (GNWP) აცხადებს კონკურსს ჟურნალისტებისათვის.

კონსურსი 2020 წლის 11 ივნისს დაიწყო და მედია პროდუქტის მიღების ბოლო ვადა 2020 წლის 11 ივლისია.

კრიტერიუმები, რომელსაც კონკურსში მონაწილეობის მსურველი უნდა აკმაყოფილებდეს:

  • უნდა იყოს საქართველოში მოღვაწე ჟურნალისტი;
  • შექმნილი მედია პროდუქტი უნდა ფარავდეს რეზოლუცია “ქალები, მშვიდობა და უსაფრთხოების”ოთხ მოქმედების სფეროს (მონაწილეობა, პრევენცია,დაცვა და პოსტ-კონფლიქტური რეაბილიტაცია) ან ქალების წვლილს COVID19-თან ბრძოლაში;
  • პროდუქტი უნდა გამოქვეყნდეს კონკურსის მიმდინარეობისას ან მისი დასრულების შემდეგ.

მედია პროდუქტი უნდა იყოს:

  • ინოვაციური და პრობლემის გადაწყვეტაზე მიმართული;
  • იყენებდეს ტრანსფორმაციულ მიდგომას - წარმოაჩენდეს ქალებს, როგორც ცვლილებების აგენტებს და არა მსხვერპლებს;
  • ხელს უწყობდეს საქართველოს კონტექსტში WPS-ის იმპლემენტაციას ან/და ქალების როლის წარმოჩენას კრიზისულ სიტუაციებში.

o წერილობითი პროდუქტი უნდა შედგებოდეს მინიმუმ 500 მაქსიმუმ 3000 სიტყვისგან.

o აუდიო/ვიდეო პროდუქტის ხანგრძლივობა მინიმუმ 5 მაქსიმუმ 30წუთი

პრიზები:

კონკურსის შედეგად გამოვლენილი 3 საუკეთესო მედია პროდუქტი და ჟურნალისტი წახალისდება პრიზებით:

  • I ადგილი - სმარტფონი
  • II ადგილი - 100$
  • III ადგილი - 50$

ასევე, კონკურსის სამ საუკეთესო მონაწილეს შესაძლებლობა ექნება მონაწილეობა მიიღოს მედიის გლობალურ კონკურსში,რომლის გამარჯვებულიც გაემგზავრება ნიუ-იორკში და შეძლებს გააშუქოს გაეროს უშიშროების საბჭოს საქმიანობა.

დაინტერესებულმა პირებმა კრიტერიუმების შესაბამისი მედია პროდუქტი უნდა გაგზავნონ 2020 წლის 11 ივლისის ჩათვლით შემდეგ მეილზე: kostavanatia@gmail.com; თემაში მიუთითეთ- მედია კონკურსი_სახელი_გვარი.

კონკურსი ცხადდება ქალთა საინფორმაციო ცენტრისა და ქალ მშვიდობის მშენებელთა გლობალური ქსელის (GNWP) აერთობლივი პროექტის „გაძლიერებული ქალები და ახალგაზრდები მშვიდობის მშენებლობისა და შენარჩუნებისთვის” ფარგლებში.