ბრიტანული რადიოს TalkRadio-ს წამყვანმა ჯეიმს ვეილმა ჟურნალისტ ნიჩი ჰოჯსონთან ინტერვიუს დროს, რომელიც ყვებოდა, რომ სექსუალური შევიწროების მსხვერპლი იყო, სრული გულგრილობა გამოიჩინა, რის გამოც ის რადიომ დროებით სამსახურიდან გაათავისუფლა.

TalkRadio-მ მომხდართან დაკავშირებით განცხადება გაავრცელა,რომელშიც განმარტებულია, რომ ვეილის ინტერვიუ “თანხვედრაში არ იყო რადიოს ღირებულებებთან და ის მგრძნობელობისგან სრულად იყო დაცლილი, როდესაც სტუმარი საკუთარ ისტორიაზე საუბრობდა”.

“მაუწყებლობის ეს სტილი სრულებით არ არის ის, რასაც რადიო მხარს უჭერს და ახალისებს, ამიტომ, საქმის ბოლომდე შესწავლამდე ჩვენ მისთვის დროებით უფლებამოსილების შეწყვეტის გადაწყვეტილება მივიღეთ”, - ნათქვამია განცხადებაში. ეს ინციდენტი “იყო როგორც “ფროდაქშენის”, ისე წარმდგენი გუნდის მიერ დაშვებული სამწუხარო შეცდომა და ჩვენ ყოველ ღონეს ვიხმართ, რომ მსგავსი ინციდენტი აღარ განმეორდეს”, - განმარტეს რადიოში.

ინტერვიუს დროს, ვეილი იცინოდა და რესპონდენტს არაადექვატურ კითხვებს უსვამდა, მან სტუმარს ისიც უთხრა, რომ ინციდენტის თავიდან ასაცილებლად, სათანადო ღონე არ იხმარა. “ნუთუ, არ გაწუხებთ ის, იმ დროს, როდესაც თქვენ ამ საკითხს ბოლომდე არ მიჰყვებით, მას ამ საშინელების სხვა ქალებისთვის გაკეთებაც შეძლია”, - ასეთი კითხვა დაუსვა ვეილმა სტუმარს.

ჰოჯსონმა The Guardian-ისთვის დაწერილ სტატიაში, რომელშიც ვეილთან ინტერვიუზე ისაუბრა, აღნიშნა, რომ რაც მოხდა იყო კარგი გამოცდილება იმის, თუ როგორი არ უნდა იყოს ინტერვიუ ადამიანთან, რომელიც სექსუალური შევიწროების მსხვერპლი გახდა. მან სცადა, რომ შემთხვევა ჩემს ქცევასთან დაეკავშირებინა, ასევე მითხრა, რომ მე ვლაპარაკობდი “როგორც ქალი”, - აღნიშნა ჰოჯსონმა.

მანვე განმარტა, რომ არც ვეილს და არც რადიოს რომელიმე სხვა წარმომადგენელს მისთვის ბოდიშის მოხდის მცდელობა არ ჰქონია. მან ინტერვიუს შესახებ Sky News-თანაც ისაუბრა და აღნიშნა, რომ ეს მისთვის “ტრავმული” გამოცდილება იყო.

Press Gazzete-ის ცნობით, ჯეიმს ვეილი არასათანადო მოქცევისთვის 2008 წელს TalkSport რადიოდანაც გაათავისუფლეს. ის მსმენელებს მოუწოდებდა, რომ არჩევნებში მხარი ბორის ჯონსონისთვის დაეჭირათ. მისი ამ მოწოდებების გამო, TalkRadio-ს ფინანასური ჯარიმაც დაეკისრა.

წყარო: imediaethics.org