საზოგადოებრივი მაუწყებლის აჭარის ტელევიზიის 20:00 საათიან საინფორმაციო გამოშვებას თეონა ბაკურიძის ნაცვლად გიორგი აბაზაძე წაიყვანს. მისი თქმით, მთავარი საინფორმაციო გამოშვების წაყვანა, სავარაუდოდ, მხოლოდ ორ დღეს მოუწევს, ვიდრე თეონა ბაკურიძის საქმის მოკვლევა დასრულდება.

“ვიდრე დასრულდება მოკვლევა, არ ვიცი ეს ორი დღე გაგრძელდება თუ სამი დღე, იქამდე, სავარაუდოდ მე დავჯდები, შექმნილი მდგომარეობიდან გამომდინარე. როგორც ვიცი, რაც შეიძლება მოკლე პერიოდში უნდა დასრულდეს მოკვლევა, - განუცხადა მან “მედიაჩეკერს”.

დღეს, 9 მარტს, თავდაპირველად გავრცელდა ინფორმაცია, რომ მთავარ საინფორმაციო გამოშვებას ჟურნალისტი და შუადღის საინფორმაციო გამოშვების წამყვანი, თეონა თურმანიძე გაუძღვებოდა. ეს ინფორმაცია მან თავად გააჟღერა 15:00 საათიან გამოშვებაში.

“დილიდან ვიცოდით, რომ რვასაათიან გამოშვებას წაიყვანდა საინფორმაციო სამსახურის უფროსის მოვალეობის შემსრულებელი, გიორგი აბაზაძე. ეს ინფორმაცია დაგვიდასტურა რედაქტორმა ფირუზ ბოლქვაძემ. თუმცა, სამსაათიანი ეთერის დაწყებამდე დაახლოებით ნახევარი საათით ადრე, გიორგი აბაზაძემ შემომთავაზა, რომ რვასაათიან ეთერში დავჯდე დღეს. მე ვფიქრობ, რომ ეს იყო ცოტა დაგვიანებული გადაწყვეტილება, რადგან თეონა ბაკურიძესთან დაკავშირებით გადაწყვეტილება დირექტორმა მიიღო პარასკევს, მათ ჰქონდათ სრული ორი დღე, რომ ეს შემოთავაზება გაეკეთებინათ.

მაგრამ, იმის გამო, რომ მაუწყებელი არის კრიზისში და ჩვენთვის ძალიან მნიშვნელოვანია სარედაქციო პოლიტიკის შენარჩუნება, ვთანხმდები მხოლოდ დროებით. დარწმუნებული ვარ, რომ სხვა გადაწყვეტილება არც იქნება მიღებული დირექტორის მხრიდან და თეონა ბაკურიძე რამდენიმე დღეში დაბრუნდება ეთერში”, - თქვა საინფორმაციო გამოშვებაში თეონა თურმანიძემ.

მედიაში ამ ამბის გავრცელებიდან მალევე, გავრცელდა მეორე ამბავიც, რომ მთავარი საინფორმაციო გამოშვების დროებითი წამყვანობიდან თეონა თურმანიძეც მოხსნეს. როგორც გამოცემა “ბათუმელებთან” თურმანიძე ჰყვება, მას აბაზაძემ უსაყვედურა ამბის გასაჯაროება, იმ მოტივით, რომ მასთან შეთანხმების გარეშე გამოაცხადა თანხმობა.

"ბათუმელების" თანახმად, აჭარის ტელევიზიის ჟურნალისტები ფიქრობენ, რომ აბაზაძეს ჰქონდა მოლოდინი, რომ თურმანიძე ამ შეთავაზებას არ დასთანხმდებოდა და "დემოკრატია გაითამაშა"

“მედიაჩეკერთან” საუბარში გიორგი აბაზაძე ამბობს, რომ ჯერ გადაწყვეტილება მიღებული არ იყო და თეონა თურმანიძეს მასთან შეთანხმების გარეშე, პირდაპირ ეთერში არ უნდა გაეჟღერებინა, რომ მთავარ საინფორმაციო გამოშვებას ის წაიყვანდა:

“ეს გადაწყვეტილება არც იყო მიღებული. მე შევთავაზე თეონა თურმანიძეს, წაიყვანდა თუ არა მთავარ გამოშვებას, შემდეგ მან მითხრა, რომ არ ჰქონდა გადაწყვეტილება მიღებული, ამის შემდეგ, 3 საათზე, როცა იწყებოდა საინფორმაციო გამოშვება, ისევ ჩავედი სტუდიაში და მან მითხრა, რომ კიდევ მიმეცა დრო მოსაფიქრებლად. თუ ის მეტყოდა უარს, მაშინ მე დროზე უნდა მიმეღო ზომები. ამის შემდეგ, მან მითხრა, რომ მომწერდა, შემეხმიანებოდა და ტელეფონზე, 4-ის 20 წუთზე ზუსტად, გამომიგზავნა შეტყობინება, ჯერ მითხრა, რომ თუ შემეძლო დღეს ჯერ მე დავმჯდარიყავი ეთერში და ხვალ თვითონ დაჯდებოდა, ხოლო ამის შემდეგ, რამდენიმე წუთში კიდევ მოუწერია შეტყობინება, რომ ის დაჯდებოდა დღესაც ეთერში. მე ეს შეტყობინება არ მქონდა ნანახი და არ მითქვამს პასუხი. მან პირდაპირ ეთერში გამოაცხადა ეს და ამის გამო მე მას ვუთხარი, რომ არ უნდა ეთქვა ეს პირდაპირ ეთერში, ჯერ ჩემთან უნდა შეეთანხმებინა და ამის გამო მივიღე ეს გადაწყვეტილება”, - ამბობს გიორგი აბაზაძე.

აჭარის საზოგადოებრივი მაუწყებლის დირექტორმა, გიორგი კოხრეიძემ მაუწყებლის მთავარი საინფორმაციო გამოშვების წამყვანი, თეონა ბაკურიძე ეთერიდან 6 მარტს მოხსნა. დირექტორის ბრძანების მიხედვით, თეონა ბაკურიძეს დღეიდან, 9 მარტიდან დროებით აეკრძალა საკუთარი უფლება-მოვალეობების შესრულება. დირექტორის ამ გადაწყვეტილებას წინ უძღოდა შელაპარაკება ჟურნალისტებსა და საინფორმაციო სამსახურის უფროსის დროებით მოვალეობის შემსრულებელს, გიორგი აბაზაძეს შორის. დირექტორი ირწმუნება, რომ თეონა ბაკურიძე ფსიქოლოგიურად აიძულებდა გიორგი აბაზაძეს განცხადება დაეწერა და სამსახურიდან წასულიყო.

მედიასამართლის იურისტები დირექტორის ბრძანებას უსაფუძვლოსა და დაუსაბუთებელს უწოდებენ და ამბობენ, რომ ის პრობლემურია. უკვე ცნობილია, რომ თეონა ბაკურიძე დირექტორის გადაწყვეტილების გასაჩივრებას აპირებს. თეონა ბაკურიძის, ასევე მაია მერკვილაძისა და შორენა ღლონტის ინტერესებს სასამართლოში EMC დაიცავს.

აჭარის საზოგადოებრივი მაუწყებლის დირექტორმა, გიორგი კოხრეიძემ მაუწყებლის მთავარი საინფორმაციო გამოშვების წამყვანი, თეონა ბაკურიძე ეთერიდან მოხსნა.  გადაწყვეტილება თეონა ბაკურიძეს დღეს, 6 მარტს, საღამოს ჩაბარდა. ბრძანების მიხედვით, თეონა ბაკურიძეს ორშაბათიდან, 9 მარტიდან დროებით ეკრძლება საკუთარი უფლება-მოვალეობების შესრულება.

დირექტორის ბრძანებაში ნათქვამია, რომ თეონა ბაკურიძემ, საინფორმაციო სამსახურის უფროსის დროებით მოვალეობის შემსრულებელს, გიორგი აბაზაძეს არ მისცა საქმიანობის განხორციელების უფლება. გიორგი კოხრეიძის მტკიცებით, თეონა ბაკურიძე ფსიქოლოგიურად აიძულებდა გიორგი აბაზაძეს განცხადება დაეწერა და სამსახურიდან წასულიყო. ბრძანების თანახმად, დირექტორმა რეკომენდაცია მრჩეველთა საბჭოზე ლალი ბერძენიშვილისა და ფირუზ ბოლქვაძისგან მიიღო.

ბრძანებაში, რომელიც თეონა ბაკურიძეს ჩაბარდა, არაფერი წერია მეორე მხარის პოზიციების შესახებ.

თეონა ბაკურიძე "მედიაჩეკერთან" საუბარში ამბობს, რომ დროებით ეთერიდან მოხსნის საფუძვლად დღეს დილით ნიუსრუმში გიორგი აბაზაძესთან კამათი დაუდეს.

მრჩეველთა საბჭოს წევრი გია ქარცივაძე გვეუბნება, რომ ბრძანება, რომელიც დირექტორმა გამოსცა,  კანონშეუსაბამოა.  მას არ გააჩნია არც ფაქტობრივი და არც სამართლებრივი საფუძველი.

"დირექტორს მოსმენილი არ აქვს განმარტებები არც იმისგან, ვისაც შეუჩერა უფლებამოსილება და არც მისგან, ვის გამოც შეუჩერა. გარდა იმისა, რომ სამართლებრივად გაწერილი არ არის ეს შეიძლება თუ არა, თეორიულადაც რომ ყოფილიყო შესაძლებელი, კონკრეტული მონაწილე მხარეების გარეშე გადაწყვეტილების მიღება არ შეიძლებოდა", - ამბობს იგი "მედიაჩეკერთან" საუბარში და ამატებს, რომ ბრძანებაში ასევე არ არის დასაბუთებული მიზანშეწონილობის საკითხი:

"არსებითი არის ის, რომ ამ შეჩერებით რა მოხდება, რა შედეგი დადგება, პოზიტივი რა იქნება, ბრძანებას რომ მიიღებ, უნდა იყოს რა უკეთეს შედეგს მიიღებ. ანუ თეონა ბაკურიძე ეთერში რომ აღარ გამოჩნდება, ამით აბაზაძე აღარ გაღიზიანდება?! უნდა დაასაბუთო ბრძანება".

გია ქარცივაძე ფიქრობს, რომ ეს არის ძალაუფლების დემონსტრირების და თანამშრომელთა დაშინების მცდელობა: "თეონა რადგან ხშირად ჩანდა ეკრანზე და გამოირჩეოდა კმამაღალი განცხადებებით, ეს არის უბრალოდ ანგარიშსწორება მასთან". 

ქარცივაძის განმარტებით, თეონა ბაკურიძეს შეუძლია ეს ბრძანება სასამართლოში გაასაჩივროს, თუმცა, ცხადია, რომ პროცესები გაიწელება და სადღაც, რამდენიმე წლის მერე დამდგარ შედეგს ეფექტი უკვე აღარ ექნება.  




 

აჭარის საზოგადოებრივი მაუწყებლის ალტერნატიული პროფკავშირის წევრების განცხადებით, მაუწყებელში ვითარება უკიდურესად დაძაბულია.  პროფკავშირი მდგომარეობას საგანგაშოდ აფასებს.

განცხადების თანახმად, რომელიც პროფკავშირებმა დღეს, 6 მარტს გაავრცელა, მაუწყებელში, განსაკუთრებით ბოლო კვირის განმავლობაში, ყოველდღიური ხასიათი მიიღო ხელმძღვანელობის ნდობით აღჭურვილ პირებსა და ახალი ამბების სამსახურის თანამშრომლებს შორის კონფლიქტმა. პროფკავშირი ამ ფაქტზე პასუხისმგებლობას მაუწყებლის ხელმძღვანელობას აკისრებს.  

პროფკავშირებში აცხადებენ, რომ მმართველთა საბჭოზე მიღებულმა გადაწყვეტილებამ, რომლის მიხედვით, ახალი ამბების სამსახურის ხელმძღვანელის მოვალეობის შემსრულებლად გიორგი აბაზაძე დაინიშნა, მაუწყებელში არსებული კრიზისი განმუხტვის ნაცვლად კიდევ უფრო გააღრმავა.

"ამ მომენტში, აუცილებლობად მიგვაჩნია ორგანიზაციის ხელმძღვანელობის მხრიდან შესაბამისი ნაბიჯების გადადგმა, რათა მაქსიმალურად ავირიდოთ კონფლიქტური სიტუაციების გაღვივება. წინააღმდეგ შემთხვევაში, არსებობს გონივრული ვარაუდი იმისა, რომ სიტყვიერი და სხვა სახის შეურაცხყოფა, შესაძლოა, გადაიზარდოს უმართავ და უკონტროლო პროცესებში. 

ჩვენ ნათლად ვხედავთ და ყოველდღიურად საკუთარ თავზე ვცდით, თუ როგორ ნეგატიურად აისახება აჭარის მაუწყებელში არსებული ვითარება თანამშრომელთა ფიზიკურ და მორალურ მდგომარეობაზე. ვითარება ხელს უწყობს და ახალისებს ჩვენს დემორალიზებას და ფაქტობრივად, აფერხებს პროფესიული საქმიანობის ჯეროვნად შესრულებას. კიდევ ერთხელ მოვუწოდებთ ხელმძღვანელობას და პროცესში ჩართულ პირებს - გამონახონ მათ ხელთ არსებული ყველა რესურსი სიტუაციის განმუხტვისთვის და მოამზადონ ნიადაგი მედიაციისთვის, - ვკითხულობთ პროფკავშირების მიერ გავრცელებულ განცხადებაში. 

პროფკავშირების წევრები იმედოვნებენ, რომ მაუწყებლის არცერთი თანამშრომლის ჯანმრთელობას არ დაემუქრება საფრთხე და მენეჯმენტი უზრუნველყოფს მშვიდი სამუშაო გარემოს შექმნას. 

საზოგადოეbრივი მაუწყებლის აჭარის ტელევიზიისა და რადიოს ალერნატიულ პროფესიულ გაერთიანებას, ვითარების დროებით დასტაბილურების საუკეთესო გზად, მიმდინარე პროცესებში სახალხო დამცველის აპარატის წარმომადგენლის ჩართულობა მიაჩნია. 

შეგახსენებთ,  მაუწყებელში მიმდინარე პროცესებზე ანგარიშის მომზადების  თხოვნით მიმართა სახალხო დამცველს  დღეს კოალიციამ “მედია ადვოკატირებისათვის” .  ამ განცხადებაშიც ხაზგასმულია, რომ მაუწყებელში სარედაქციო პოლიტიკის ცვლილების მცდელობის საფრთხე აშკარაა, შექმნილი ვითარება კი საგანგაშო.

ბოლო წლებში საქართველოში ჟურნალისტებს რამდენიმე მნიშვნელოვან საკითხზე ჰქონდათ პროტესტის გამოხატვის მცდელობები, თუმცა, მასშტაბურობისა და სოლიდარობის ნაკლებობის გამო, ეს მცდელობები უშედეგო აღმოჩნდა.

“მე/ჩვენ ივან გოლუნოვები ვართ” - ამ სლოგანმა დაიპყრო გასულ წელს მთელი რუსეთის მედია დაკავებული გამომძიებელი ჟურნალისტის, ივან გოლუნოვისადმი სოლიდარობის ნიშნად. სოლიდარულები აღმოჩნდნენ ხელისუფლებისადმი ლოიალურად განწყობილი მედიებიც კი. შედეგი თვით ივან გოლუნოვისთვისაც კი მოულოდნელი აღმოჩნდა - იგი პატიმრობიდანაც გაათავისუფლეს და მის მიმართ შეთითხნილი საქმის გამოძიებაც შეწყდა. სისხლის სამართლის საქმე ნარკოდანაშაულს უკავშირდებოდა.

თავად ივანიც და “მედუზას” (გამოცემა, სადაც მუშაობს ივან გოლუნოვი) რედაქტორიც ღიად აცხადებენ, რომ საქმის ასეთი შემოტრიალება შესაძლოა მხოლოდ ერთადერთი რამით აიხსნას და ეს არის ჟურნალისტების სოლიდარობა და ერთსულოვანი პოზიცია, რომ ივანი უდანაშაულო იყო და ის მხოლოდ მისი პროფესიული საქმიანობის გამო ისჯებოდა.

ბოლოს ჟურნალისტების ასეთი ერთსულოვანი პოზიცია საქართველოში 2011 წლის ზაფხულში მომხდარმა ფაქტმა განაპირობა, როდესაც ხელისუფლებამ ჯაშუშობის ბრალდებით ფოტორეპორტიორები დააკავა. ფოტორეპორტიორები 7 ივლისს დააკავეს, რასაც მოჰყვა ჟურნალისტების მხრიდან არნახული სოლიდარობის გამოხატვა - ეს იყო საპროტესტო აქციები, სხვადასხვა სახის პერფორმანსები, განცხადებები და ა.შ. პროტესტი არ განელებულა ორი კვირის განმავლობაში, რის შემდეგაც ხელისუფლება იძულებული გახდა დაკავებულები სასამრთლო დარბაზიდან გაეთავისუფლებინა.

თითქმის 3 წელი გავიდა თბილისის ცენტრიდან აზერბაიჯანელი ჟურნალისტის, აფგან მუხთარლის გატაცებიდან. ეს ფაქტი იმთავითვე გახდა საქართველოში მომუშავე ჟურნალისტების პროტესტი საფუძვლიანი მიზეზი, რადგან იმთავითვე იყო ცხადი, რომ მუხთარლის არანაირი მწვანე საზღვარი არ გადაულახავს ფულის გასათეთრებლად, რასაც დაკავების ოფიციალურ მიზეზად გვასაღებდა 2 ქვეყნის ხელისუფლება, არამედ ის მისი პროფესიული საქმიანობისთვის დასაჯეს. ამის მიუხედავად, ეს საქმე ვერ აღმოჩნდა ჟურნალისტებს შორის ერთიანობის, ფართო კონსესუსისა და სოლიდარობის მყარი საფუძველი - პროტესტი ვერ გახდა მასშტაბური, განგრძობადი და ამით კარგად ისარგებლა ხელისუფლებამ, რომელსაც დღემდე არ გაუცია პასუხი მთავარი შეკითხვისთვის - ვინ და როგორ გაიტაცა თბილისის ცენტრიდან ჟურნალისტი და გადაიყვანა აზერბაიჯანის საზღვარზე, სადაც დააკავეს და დღემდე პატიმრობაში იმყოფება.

სამწუხაროდ, ემპათიას ამ საქმისადმი მნიშვნელოვნად შეუშალა ხელი იმ ფაქტმა, რომ დაკავებული ჟურნალისტი არ იყო საქართველოს მოქალაქე და რომ გატაცების დანაშაულში მონაწილე მხარე იყო არა მხოლოდ საქართველოს ხელისუფლება. ამიტომაც პროტესტის გამომხატველ ჟურნალისტებს ხშირად მოუწოდებნენ ობივატელები, რომ “მხოლოდ ქვეყნის შიდა საქმეებისთვის მიეხედათ”.

ამას მოჰყვა ის, რომ ხელისუფლებამ ანტისაოკუპაციო აქცია დაარბია და განსაკუთრებული სისასტიკით ჟურნალისტებს გაუსწორდა. ამ ამბიდან უკვე რამდენიმე თვეა გასული, თუმცა დღემდე არ უცვნიათ ჟურნალისტები დაზარალებულად და არ დაუკავებიათ მათზე მოძალადეები. ჰო, ამ შემთხვევაშიც ძალიან სუსტი აღმოჩნდა ჟურნალისტებს შორის სოლიდარობის გამომხატველი აქციები, რადგან ის ვერ გახდა ვერც მასშტაბური და ვერც განგრძობადი, ვერ გამოიწვია ემპათია პირველ რიგში ჟურნალისტებს შორის და შესაბამისად, ვერ მთლიანად საზოგადოებაში.

მაშინაც ისმოდა ფრაზები - “მე მის გვერდით ან მის დასაცავად არ/ვერ დავდგები!” ჰო, ეს ფრაზები ხშირად გაისმის დღესაც, როდესაც აჭარის საზოგადოებრივ მაუწყებელში ხელისუფლება წარმატებით ახორციელებს სპეცოპერაციას მის მიმართ კრიტიკული სარედაქციო პოლიტიკის შესაცვლელად.



ჟურნალისტური სოლიდარობა ამ ბოლო შემთხვევაშიც საკმაოდ უსიცოცხლოა, არათანმიმდევრული იმის მიუხედავად, რომ უშუალოდ მაუწყებლის შიგნით ვხედავთ კარგად ორგანიზებულ წინააღმდეგობასა და პროტესტს ჟურნალისტების მხრიდან. თუმცა გარედან არასაკმარისი მხარდაჭერის გამო სულ უფრო სუსტდება შიგნით მებრძოლი ადამიანების პროტესტის გავლენა. ხელისუფლებამ მოახერხა ამ ადამიანების დათხოვნა, რომლებიც უზრუნველყოფდნენ სარედაქციო დამოუკიდებლობას, ახლა მხოლოდ მათი შემცვლელების დანიშვნასთან შეგუების პროცესი დარჩა გასავლელი.

ფაქტია, რომ ხელისუფლება შესაშური ოსტატობით სარგებლობს სოლიდარობის დეფიციტით, რომლებიც არსებობს ჟურნალისტებს შორის როგორც ობიექტური, ისე სუბიექტური გარემოებებით. ობიექტურად შესაძლოა ჩანდეს ის მიზეზი, რომ პოლარიზებულ მედიაგარემოში სულ უფრო ვიწროვდება რეალურად მიუკერძოებელი მედიასაშაულებებისა და იქ დასაქმებული ჟურნალისტების წრე და შესაბამისად, უფრო ადვილია მათი მარგინალიზაციაც.

ამასთან, არსებობს სუბიექტური გარემოებებიც, როცა უშუალოდ ჟურნალისტთა კორპუსის შიგნით ხდება კიდევ უფრო მარგინალური ან დომინანტი ჯგუფების შექმნა და დაქსაქსულობა, სხვადასხვა მოტივით. და სანამ მედიის წარმომადგენლები ამ გათითოკაცებულ ჯგუფებში ნაწილდებიან, ხელისუფლება სწრაფი მოქმედების რეჟიმშია, რომ რაც შეიძლება სუსტად ან სულაც არ ისმოდეს კრიტიკული ხმა ამ ქვეყანაში.

“მიგვაჩნია, რომ ობიექტური და დამოუკიდებელი არხის სარედაქციო პოლიტიკის ცვლილების მცდელობის საფრთხე აშკარაა, შექმნილი ვითარება კი საგანგაშო ხასიათს ატარებს”, - ნათქვამია კოალიცია “მედია ადვოკატირებისათვის” მიერ 6 მარტს გავრცელებულ განცხადებაში.

აჭარის მაუწყებლის მენეჯმენტისა და მრჩეველთა საბჭოს მიერ მიღებული გადაწყვეტილებების საფუძველზე, კოალიცია “მედია ადვოკატირებისათვის” წევრი ორგანიზაციები მიიჩნევენ, რომ საფრთხის წინაშე დგანან მაუწყებელში დასაქმებული კრიტიკული აზრის მქონე თანამშრომლები, რომლებიც ცდილობენ დაიცვან სარედაქციო დამოუკიდებლობა.

“ვფიქრობთ, კრიტიკულია საზოგადოებრივი მაუწყებლის იდეის, როგორც ღირებულების შენარჩუნების საკითხიც. მიგვაჩნია, რომ პოლიტიკური ინტერესებით მოტივირებული ხელოვნური კრიზისები აფერხებს საჯარო დაფინანსებით მოქმედ საზოგადოებრივ მაუწყებელს, რომლის საქმიანობის უმთავრეს მიზანს საზოგადოებისთვის გავლენებისგან თავისუფალი, მიუკერძოებელი, საზოგადოებრივი ინტერესების შესაბამისი და მრავალფეროვანი პროგრამების მიწოდება წარმოადგენს. შექმნილმა ვითარებამ ქმედითი დახმარების საჭიროების წინაშე დაგვაყენა”, - ნათქვამია განცხადებაში.

ბოლო ორ დღეში აჭარის ტელევიზიაში მიმდინარე მოვლენებს ევროპის საბჭო და ჟურნალისტური ეთიკის ქარტიაც გამოეხმაურნენ. ევროპის საბჭოს გვერდზე გამოქვეყნებულ განცხადებაში წერია, რომ აჭარის ტელევიზიიდან ჟურნალისტები პოლიტიკური ზეწოლის შედეგად გაათავისუფლეს. ჟურნალისტური ეთიკის ქარტიის მიერ გავრცელებულ განცხადებაში კი ნათქვამია, რომ აჭარის მაუწყებლის საინფორმაციო სამსახურის უფროსის მოვალეობის შემსრულებელად გიორგი აბაზაძის დაინიშვნით, კიდევ ერთხელ დადასტურდა, რომ მაუწყებელში მიმდინარე საკადრო ცვლილებები დამოუკიდებელი სარედაქციო პოლიტიკის შეცვლას ისახავს მიზნად.

“აჭარის ტელევიზიიდან რამდენიმე ჟურნალისტი პოლიტიკური ზეწოლის შედეგად გაათავისუფლეს” - ამ სათაურით 5 თებერვალს ევროსაბჭოს გვერდზე განცხადება გამოქვეყნდა. განცხადებაში ნათქვამია, რომ RSF (ჟურნალისტები საზღვრებს გარეშე) შეშფოთებულია საქართველოში მედიაზე კონტროლის გაზრდის გამო და მოუწოდებს ხელისუფლებას, რომ პატივი სცეს აჭარის მაუწყებლის სარედაქციო დამოუკიდებლობას.

განცხადებაში შორენა ღლონტის და მაია მერკვილაძის გათავისუფლებაზეა საუბარი და აღნიშნულია, რომ ორივე მათგანი მნიშვნელოვანი ფიგურა იყო მაუწყებელში დამოუკიდებელი სარედაქციო პოლიტიკის შენარჩუნებაში. ასევე, წერია, რომ ნათია ზოიძემ თანამდებობის დატოვების გადაწყვეტილება პოლიტიკური ზეწოლით ახსნა.

განცხადებაში საუბარია ჟურნალისტების პროტესტზეც. ნათქვამია, რომ ჟურნალისტებმა რამდენჯერმე გააპროტესტეს მიმდინარე მოვლენები და ახლახანს ალტერნატიული პროფკავშირებიც შეიქმნა, რომელიც გაფიცვისთვის ემზადება, რათა სარედაქციო დამოუკიდებლობა დაიცვას.

ბოლო პერიოდში ხშირად ყოფილა საქართველოში შემთხვევა, როდესაც ხელისუფლების წარმომადგენლები ბოიკოტს უცხადებენ კონკრეტულ მედიასაშუალებებს, თუმცა ტელეკომპანია “იმედმა” მიიჩნია, რომ ოპოზიციური პარტიის, “ევროპული საქართველოს” ერთ-ერთ ლიდერისთვის, გიგა ბოკერიასთვის ეთერის დათმობაა აზრს მოკლებული.

“ვიდრე ბოკერიას ჟურნალისტებთან ურთიერთობის ფორმა ექნება აგრესიული და შეურაცხმყოფელი, “იმედი” აზრს ვერ ხედავს დაუთმოს მას ეთერი”, - ეს განცხადება “იმედის” სახელით დღეს დილით საინფორმაციო პროგრამის წამყვანმა გააცნო მაყურებელს.

ტელეკომპანიის მხრიდან ასეთი რეაქცია განაპირობა “იმედის” ჟურნალისტის, სოფო ბერიძის შეკითხვაზე ბოკერიას პასუხმა. ბერიძე დაინტერესდა საარჩევნო თემატიკაზე ხელისუფლების მიერ ინიცირებული საკონტიტუციო განხილვის ფორმატშიც ჩაერთვებოდა თუ არა “ევროპული საქართველო”. სწორედ ამას მოჰყვა ასეთი დიალოგი ჟურნალისტს და პოლიტიკოსს შორის:

ბოკერია:  თუნდაც ამ ფორმატში-ც, რომელ ფორმატში არ ვერთვებით?
ბერიძე:  არა, ამ ფორმატში ჩაერთოთ
ბოკერია:  ანუ ც-ს გარეშე
ბერიძე:  ძაან რთული გახდა თქვენთან
ბოკერია:  არა, თქვენთან რთულია, მაგრამ გიტანთ, იმიტომ რომ ეს არის თავისუფლება
ბერიძე:   რა გვაქვს აუტანელი, ბატონო გიგა, კითხვას გისვამთ
ბოკერია:   თუ შეიძლება, აცადეთ სხვებს, თქვენ რომ ჩემი პასუხები არ მოგწონთ, ეს იმას ხომ არ ნიშნავს, რომ ხელი უნდა შემიშალოთ
ბერიძე:   მაშინ მოხსენი კამერა, რა
ბოკერია:   მოხსენით და კარგად ბრძანდებოდეთ.

ტელეკომპანია “იმედმა” დილის საინფორმაციო გამოშვებაში ამ დიალოგზე მომზადებული სიუჟეტი ასე დაასათაურა: “გიგა ბოკერიას უცვლელი აგრესიული მიდგომა”. თუმცა სიუჟეტში არ ყოფილა ახსნილი, რას ეფუძნება ასეთი შეფასება - რას ნიშნავს “უცვლელი”, მანამდე კიდევ რა აგრესიულ მიდგომებს ჰქონდა ადგილი. სიუჟეტს თან ერთვოდა შემდეგი შინაარსის სარედაქციო ტექსტი:

“შეიძლება ამა თუ იმ პოლიტიკოსს არხის სარედაქციო პოლიტიკა არ მოსწონდეს, მაგრამ მსგავსი განცხადებების გაკეთება მინიმუმ უხერხულია, მითუმეტეს, როცა ამას “ნაციონალური მოძრაობისა” და ახლა უკვე მისი განაყოფის, “ევროპული საქართველოს” მთავარი იდეოლოგი აკეთებს. როგორც ჩანს, გიგა ბოკერიას აგრესიული მიდგომები დღემდე არ შეუცვლია”.

მეტი სიმძაფრისთვის ტელეკომპანიამ ამის შემდეგ მაყურებელს აჩვენა ბოკერიას ცოლის, თამარ ჩერგოლეიშვილის ფეისბუკ სტატუსი, სადაც ის ჟურნალისტ სოფო ბერიძეს “არარაობას” უწოდებს და მას ტყუილების გავრცელებაში ადანაშაულებს.

“იმედის” შეფასებით, ჩერგოლეიშვილმა ამ სტატუსით, “ქრონიკის” ჟურნალისტის დაბულინგება გადაწვიტა:

“ეს მაშინ, როცა სიცრუის მთავარი გამავრცელებელი თავად გიგა ბოკერია და მისი მეუღლე არიან”, - იუწყება ტელეკომპანია.

ამ განცხადებამდე ტელეკომპანიის საინფორმაციო სამსახურის უფროსმა ირაკლი ჩიხლაძემ, ასევე, ფეისბუკით უპასუხა ბოკერია-ჩერგოლეიშვილს:

“ცოლმაც დაკარგა სახე და კვირას, 21:00 საათზე, ორივე მიიღებს პასუხს და ჩავახედებ კიდეც სარკეში! ისტერიჩკა დედაკაცი”.

 

“მაუწყებლის ქცევის კოდექსი” მაუწყებლებს ავალდებულებს მიუკერძოებელ გაშუქებას - პოლიტიკური, ნებისმიერი სახის დაპირისპირების ამსახველი ან მიმდინარე საჯარო პოლიტიკის საკითხები, რომლებზეც მიმდინარეობს დებატები, არ უნდა შუქდებოდეს მაუწყებლის პირადი დამოკიდებულების ან მოსაზრების საფუძველზე.

საქართველოს ჟურნალისტური ეთიკის ქარტია შემაშფოთებლად აფასებს აჭარის მაუწყებელში მიმდინარე პროცესებს და მოუწოდებს საერთაშორისო ორგანიზაციებს დაინტერესდნენ აჭარის ტელევიზიაში მიმდინარე პროცესებით.

“ჟურნალისტური ეთიკის ქარტია მიიჩნევს, რომ აჭარის ტელევიზიაში მიმდინარე პროცესები უკიდურესად შემაშფოთებელია და მენეჯმენტის მიერ მიღებული საკადრო გადაწყვეტილებები მიმართულია არხის სარედაქციო პოლიტიკის შეცვლისკენ”, - ვკითხულობთ ქარტიის მიერ 5 მარტს გამოქვეყნებულ განცხადებაში.

ორგანიზაციის შეფასებით, აჭარის მაუწყებლის საინფორმაციო სამსახურის უფროსის მოვალეობის შემსრულებელად გიორგი აბაზაძე დაინიშვნით, კიდევ ერთხელ დადასტურდა, რომ მაუწყებელში მიმდინარე საკადრო ცვლილებები დამოუკიდებელი სარედაქციო პოლიტიკის შეცვლას ისახავს მიზნად.

“მიგვაჩნია, რომ საინფორმაციო სამსახურის უფროსის მოვალეობის შემსრულებლის დანიშვნა, ისევე როგორც სხვა საკადრო ცვლილებები, არის გაუმჭირვალე. უცნობია, რომელი კრიტერიუმებით და რა გამოცდილების გამო შეირჩა გიორგი აბაზაძე ამ პოზიციაზე. სამწუხაროა, რომ დირექტორი გიორგი კოხრეიძე ანგარიშს არ უწევს ახალი ამბების გუნდს, რომელიც ერთსულოვანია და არ მოსწონს შერჩეული კანდიდატი. ისინი მიიჩვენევენ, რომ დირექტორის გადაწყვეტილება ემსახურება მათი სამსახურის გუნდის გახლეჩვას, მით უფრო იმ ფონზე რომ თანამშრომელთა ნაწილმა გაფიცვა დაანონსა”, - ნათქვამია განცხადებაში.

ჟურნალისტური ეთიკის ქარტია შეშფოთებას გამოთქვამს იმის გამოც, რომ აჭარის მაუწყებლის საინფორმაციო სამსახურის უფროსის მოვალეობის შემსრულებელი სოციალურ ქსელებში ჰომოფობიური და სექსისტური შენაარსის გზავნილებით გამოირჩევა, ორგანიზაციის განმარტებით, ეს დაუშვებელია, რადგან პირველ რიგში საზოგადოებრივი მაუწყებელია ვალდებული დაიცვას ეთიკური სტანდარტი.

ქარტია ასევე მოუწოდებს ტელევიზიის მენეჯმენტს, რომ განმარტონ განხორციელებული ცვლილებების საჭიროებები და დაასაბუთონ მიღებული გადაწყვეტილებები.

საზოგადოებრივი მაუწყებლის აჭარის ტელევიზიისა და რადიოს თანამშრომლების ნაწილი გაფიცვისთვის ემზადება. “სტატუს კვოს აღდგენა, სარედაქციო დამოუკიდებლობა, შრომითი უფლებები და სტრატეგიული ხედვა”, - აღნიშნული ოთხი მიმართულებით საგაფიცვო მოთხოვნები აჭარის ტელევიზიის ალტერნატიულმა პროფკავშირებმა დღეს, 2 მარტს შეიტანა მაუწყებელში.

“განცხადებას დავტოვებთ კანცელარიაში და ამის შემდგომ, იგივე განცხადებას დავტოვებთ საქართველოს შრომის, ჯანმრთელობის და სოციალური დაცვის სამინისტროშიც, იმიტომ, რომ მედიაციის პროცესში ჩაერთოს სამინისტროც", - ამბობს მაუწყებლის ალტერნატიული პროფკავშირის ხელმძღვანელი მალხაზ რეხვიაშვილი.

მისივე თქმით, განცხადების შეტანის შემდეგ, 21 დღის ვადაში თუ მათი მოთხოვნები არ დაკმაყოფილდება, გაიფიცებიან:

“ამ განცხადებას რომ დავტოვებთ, დაიწყება ავტომატურად ათვლა 21 დღის.  ჩვენ ვამბობთ, რომ ვაპირებთ გაფიცვას, თუმცა, გაფიცვამდე, სამართლიანობისთვის, საჭიროა, რომ ობიექტური მხარე იყოს დარწმუნებული იმაში, რომ ჩვენ მოლაპარაკებები ვცადეთ და სხვა გზა არ დარჩა. ამას გულისხმობს მედიაციის პროცედურა, რომ მედიატორი მოდის, რწმუნდება, რომ მოლაპარაკებები მიმდინარეობდა. თუ მოლაპარაკებები შედგება, ფორმდება დოკუმენტი, თუ ვერ შედგება, ამაზეც შესაბამისი დოკუმენტი ფორმდება და ჩვენ წარმოგვეშვება გაფიცვის უფლება".

მალხაზ რეხვიაშვილი ამბობს, რომ საგაფიცვო სტრატეგია ჯერ არ შეუმუშავებიათ და ჯერჯერობით არ იციან გაფიცვა ნაწილობრივი იქნება თუ სრული:

“საგაფიცვო სტრატეგია როგორი იქნება, ჯერ არ ვიცით, თუმცა, კოლექტიურ დავაში მონაწილეობას მივიღებთ პროფკავშირის სრული შემადგენლობა - 90 წევრამდე (მაუწყებლის თანამშრომლები და ყოფილი თანამშრომლები).

ბოლო ორი კვირაა საზოგადოებრივი მაუწყებლის აჭარის ტელევიზიაში მნიშვნელოვანი პროცესები მიმდინარეობს. მაუწყებლის საინფორმაციო სამსახურის უფროსი შორენა ღლონტი 28 თებერვალს თანამდებობიდან გაათავისუფლეს. შორენა ღლონტის გათავისუფლებამდე 4 დღით ადრე, 24 თებერვალს მაია მერკვილაძე აჭარის ტელევიზიის მთავარი საინფორმაციო გამოშვების რედაქტორის პოზიციაზე ნინო ხაჟომიამ ჩაანაცვლა. თუმცა, 28 თებერვალს ცნობილი გახდა, რომ ნინო ხაჟომიამ დაკავებული პოზიცია პირადი განცხადების საფუძველზე დატოვა. მაია მერკვილაძის საინფორმაციო სამსახურის რედაქტორობიდან გათავისუფლებამდე, 19 თებერვალს კი, აჭარის მაუწყებლის მრჩეველთა საბჭომ მხარი დაუჭირა დირექტორის მიერ წარდგენილ საშტატო განრიგის ცვლილებას და მაია მერკვილაძის, როგორც ახალი ამბების სამსახურის უფროსის მოადგილის შტატი გააუქმა.

შეგახსენებთ, აჭარის ტელევიზიის დირექტორად გიორგი კოხრეიძის არჩევის შემდეგ, არხი რამდენიმე ადამიანმა დატოვა. ახალ დირექტორთან მუშობაზე თავად თქვეს უარი დირექტორის მრჩევლებმა ზვიად ქორიძემ და მარინა ვაშაყმაძემ. 2020 წლის იანვრიდან კონტრაქტი აღარ გაუგრძელეს ახალი ამბების პროდიუსერს ნათია შავაძეს. თებერვლიდან კი არხი დატოვა დირექტორის მოადგილემ ნათია ზოიძემ, რომელიც მაუწყებელს თითქმის 10 თვის განმავლობაში ხელმძღვანელობდა. მან თქვა, რომ ეს გადაწყვეტილება იძულებით მიიღო, მას შემდეგ, რაც ახალმა დირექტორმა სარედაქციო პოლიტიკის წარმართვას ჩამოაშორა.

“ვფიქრობთ, ეს არის საფასური, რომელსაც ვიხდით მიუკერძოებლობისა და კეთილსინდისიერებისათვის”, - ტელეკომპანია “მაესტროს” წამყვანი ანა ცხოვრებავა ამბობს, რომ “ბიზნეს სიახლეები” ორშაბათიდან ეთეში აღარ გავა, რადგან მიუკერძოებელი და კეთილსინდისიერი მუშაობისთვის გადაცემას ხურავენ. მისივე თქმით, გადაცემის დახურვას სარედაქციო პოლიტიკაში ჩარევის არაერთი მცდელობა უძღვოდა წინ.

“დღეს თქვენ ბოლოჯერ უყურებთ ბიზნესის გადაცემას მაესტროს ეთერში. ჩვენ ერთმანეთს ამ ეთერში 2017 წლის 13 ივნისს შევხვდით, 3 წლის წინ და მას შემდეგ ყოველ საღამოს ჩვენ ვცდილობდით, რომ მიუკერძოებლად მოგვეტანა თქვენამდე ბიზნესისა და ეკონომიკის სიახლეები.

ჩვენთვის მთავარი პრიორიტეტი იყო, რომ თქვენ - გადასახადების გადამხდელებს და ჩვენს მაყურებლებს გქონოდათ მიუკერძოებელი ინფორმაცია იმაზე, თუ რაზე იხარჯება თქვენ მიერ გადახდილი გადასახადები. ასევე, რა გავლენას ახდენს ესა თუ ის რეგულაცია და პოლიტიკური გადაწყვეტილება თქვენს ყოველდღიურ ცხოვრებაზე, ასევე, მაკროეკონომიკური მაჩვენებლებიც.

ვფიქრობთ, რომ ეს არის მიზეზი, რის გამოც ჩვენ ერთმანეთს ამ ეთერში აღარ შევხვდებით. არხის მენეჯმენტმა, ჰოლდინგის მენეჯმენტმა ოფიციალურ მიზეზად, რის გამოც იხურება გადაცემა, დაასახელა ის, რომ იცვლება "მაესტროს" ფორმატი, თუმცა ეს ჩვენთვის არ ჟღერს დამაჯერებლად, იმის გათვალისწინებით, რომ მას წინ უძღვოდა არაერთი მცდელობა ჩვენს სარედაქციო პოლიტიკაში ჩარევის. შესაბამისად, ვფიქრობთ, ეს არის საფასური, რომელსაც ვიხდით მიუკერძოებლობისა და კეთილსინდისიერებისათვის”, - ეს განცხადება ანა ცხოვრებავამ დღეს, გადაცემის დასრულებისას პირდაპირ ეთერში გააკეთა.

დეკემბრიდან პოლიტიკური გადაცემა “მაესტროელებიც” აღარ გადის ეთერში. გადაცემის პროდიუსერი თიკო ბაშარული ორივე გადაცემის - “მაესტროელების” და “ბიზნესის სიახლეების” დახურვას ცენზურის გაძლიერებას უკავშირებს:

“ჩემი პოლიტიკური გადაცემაც დახურეს.  გადაცემა “მაესტროელები”, რომელიც საღამოს 7 საათზე გადიოდა, ჰყავდა სამი წამყვანი და იყო ძირითადად პოლიტიკური თემები. გადაცემა აღარ გადის დეკემბრიდან. მოხდა იგივე, რაც ჩემს პოლიტიკურ გადაცემაზე, რომ შეიზღუდა და ცენზურა გაძლიერდა".

“მედიაჩეკერი” ცდილობს დამატებითი დეტალები მაუწყებლის დირექტორთან გაარკვიოს, თუმცა ამ დრომდე  ვაკო ავალიანი ჩვენს ზარებსა და შეტყობინებებს არ პასუხობს. დამატებითი ინფორმაციის მოძებისთნავე მასალა განახლდება. 

შეგახსენებთ, რომ ტელეკომპანია “მაესტრო” “იმედის” ჰოლდინგის ნაწილია.

დღეს, 28 თებერვალს, მას შემდეგ რაც ცნობილი გახდა რომ აჭარის მაუწყებლის დირექტორმა საინფორმაციო სამსახურის უფროსის  პოზიციიდან გაათავისუფლა შორენა ღლონტი, მაუწყებლის ჟურნალისტების ნაწილმა, მთავარი საინფორმაციო გამოშვების დასასრულს, პირდაპირ ეთერში, ერთწუთიანი დუმილით და მესიჯით -  "აჭარის მაუწყებელში სუსია" , კიდევ ერთხელ გამოუცხადა პროტესტი ტელევიზიაში მიმდინარე მოვლენებს. 

"ჩვენ გვინდა ერთწუთიანი დუმილის უფლებით ვისარგებლოთ და ამ დუმილით გამოვხატოთ პროტესტი იმ პროცესის მიმართ, რაც აჭარის ტელევიზიაში მიმდინარეობს. ჩვენ რამდენიმე თვეა ვსაუბრობთ, რომ მაუწყებლის სარედაქციო პოლიტიკის შეცვლის ღია მცდელობა, ღია შტურმი მიმდინარეობს, ადამიანებს დევნიან სხვადასხვა ფორმით, აშანტაჟებენ, ათავისუფლებენ სამსახურიდან, ამ ყველაფერში კი რა თქმა უნდა ჩართულია მაუწყებლის დირექტორი და მრჩეველთა საბჭოს სამი წევრი,  "ქართული ოცნების" კვოტით დაკომპლექტებული. ჩვენი პროტესტი გვინდა გამოვხატოთ ერთწუთიანი დუმილით", - თქვა პირდაპირ ეთერში მთავარი საინფორმაციო გამოშვების წამყვანმა თეონა ბაკურიძემ, პარალელურად კი სტუდიაში შეიკრიბნენ ჟურნალისტები, საპროტესტო წარწერებით , შემდეგი ერთი წუთი კი ეთერში სრული დუმილი იყო. 

შეგახსენებთ, დღეს, 28 თებერვალს, ცნობილი გახდა, რომ აჭარის საზოგადოებრივი მაუწყებლის საინფორმაციო სამსახურის უფროსი, შორენა ღლონტი, დაკავებული თანამდებობიდან გაათავისუფლეს. 

''ახალი ამბების სამსახურის უფროსის, შორენა ღლონტის გადაცდომასთან დაკავშირებით დასრულებულია მოკვლევა და იგი გათავისუფლებულია დაკავებული თანამდებობიდან. გათავისუფლების საფუძვლის გაცნობა შეუძლიათ დაინტერესებულ პირებს. მზად ვარ ქალბატონ შორენას შევთავაზო ისეთი პოზიცია, სადაც მას არ ექნება მსგავსი გადაცდომის შესაძლებლობა და მიეცემა პროფესიული საქმიანობის გაგრძელების საშუალება'', - წერია განცხადებაში, რომელიც დირექტორის სახელით ონლაინ სამსახურს გაუგზავნეს.

შორენა ღლონტის გათავისუფლებას წინ უსწრებდა 20:00 საათიანი გამოშვების რედაქტორის მაია მერკვილაძის გათავისუფლება დაკავებული პოზიციიდან. ამ თანამდებობაზე იგი ნინო ხაჟომიამ ჩაანაცვლა, თუმცა, დღეს ასევე ცნობილი გახდა, რომ დანიშვნიდან 4 დღეში ნინო ხაჟომიამ აღნიშნული პოზიცია საკუთარი განცხადებით დატოვა. 


"მედიაჩეკერი" მთელი საღამოა ცდილობს ტელევიზიის დირექტორთან დაკავშირებას, თუმცა იგი სატელეფონო ზარებს არ პასუხობს. 

 

დანიშვნიდან ოთხ დღეში აჭარის ტელევიზიის მთავარი საინფორმაციო გამოშვების უფროსმა ნინო ხაჟომიამ, პირადი განცხადების საფუძველზე დაკავებული პოზიცია დატოვა. ინფორმაციას ამის შესახებ აჭარის ტელევიზია ავრცელებს.  მაუწყებლისვე ინფორმაციით, მის მოვალეობას ფირუზ ბოლქვაძე შეასრულებს. 

ფირუზ ბოლქვაძე


რატომ მიიღო ნინო ხაჟომიამ ეს გადაწყვეტილება უცნობია, "მედიაჩეკერი" ცდილობს მასთან დაკავშირებას, თუმცა მისი ტელეფონი გამორთულია.  რაც შეეხება აჭარის ტელევიზიის დირექტორს გიორგი კოხრეიძეს, იგი ჩვენს ზარებს არ პასუხობს. 

შეგახსენებთ, აჭარის ტელევიზიის 20:00 საათიანი საინფორმაციო გამოშვების უფროსის პოზიციაზე ნინო ხაჯომიამ მაია მერკვილაძე ჩაანაცვლა. მაია მერკვილაძე ამ პოზიციიდან დირექტორმა გაათავისუფლა და სანაცვლოდ რადიოს საინფორმაციო გამოშვების რედაქტორობა და მაუწყებელში ჯერ არარსებული ტოქშოუს პროდიუსერობა შესთავაზა. 

 დღეს ასევე გავრცელდა ინფორმაცია, რომ დირექტორმა დაკავებული პოზიციიდან გაათავისუფლა ასევე საინფორმაციო სამსახურის უფროსი შორენა ღლონტი. 

შენიშვნა:  სტატიის თავდაპირველ ვერსიაში მითითებული იყო რომ ნინო ხაჟომია აჭარის მაუწყებელს ტოვებს. ეს აქცენტირებული იყო სათაურშიც, ვინაიდან  ასე გავრცელდა ინფორმაცია აჭარის ტელევიზიის მიერ.  მასალის გამოქვეყნების შემდეგ "მედიაჩეკერს" დაუკავშირდა მაუწყებლის ერთ-ერთი თანამშრომელი, რომელმაც თქვა, რომ ნინო ხაჟომია ტოვებს მთავარი საინფორმაციო  სამსახურის უფროსის პოზიციას. რჩება თუ არა იგი მაუწყებელში, მისთვის უცნობია.