"TV პირველის" წამყვანები ნინო ჟიჟილაშვილი და ვახო სანაია ტელეკომპანიას ტოვებენ. მათ გარდა არხს ტოვებს გადაცემა "პოლიტმეტრის" სრული შემადგენლობა. ამის შესახებ დღეს, 12 ივნისს, გადაცემა „პოლიტმეტრის“ დასრულების შემდეგ, მისმა წამყვანებმა ვახო სანაიამ და ნინო ჟიჟილაშვილმა  განაცხადეს.

გადაცემის დასრულების შემდეგ, ვახო სანაიამ განაცხადა, რომ არხზე 5-წლიანი მუშაობის შემდეგ, მან წასვლის გადაწყვეტილება მიიღო და ამ გადაწყვეტილების მიზეზიც ახსნა:

"ეს იყო "პოლიტმეტრის" ბოლო გადაცემა "TV პირველზე", როდესაც ამ შენობაში შემოვედი, "TV პირველი" არც არსებობდა, მაშინ ეს არხი სპორტული იყო. აქ გავატარე ჩემი ცხოვრების 5 წელი, ამდენი ხანი სხვათა შორის, არცერთ ტელევიზიაში არ მიმუშავია და ამას ჰქონდა კონკრეტული მიზეზი. აქ ჩვენ, ყველამ ერთად შევქმენით საინტერესო სივრცე და გარემო, ვიყავით გავლენების მიღმა, მოვლენების შუაგულში. იყო სხვა ფაქტორებიც, მედიასტანდარტი, ასევე ნიშა, რომელიც "TV პირველმა" საკუთარი თავი იპოვა და დაიმკვიდრა. შენებას დიდი ხანი უნდა, ნგრევას ერთი დღე ჰყოფნის, ნდობას მოპოვება უნდა, დაკარგვა ადვილია. ეს სულ გვახსოვდა ამ წლების განმავლობაში, როცა სხვებთან ერთად აქ ვმუშაობდით 5 წელი, ამ პრინციპებით ვხელმძღვანელობდით სწორედ. რა და როგორ გამოგვდიოდა, ეს თქვენი შესაფასებელია, ახლაც და მომავალშიც. თანამშრომლობის რესურსი კი, როგორც აღმოჩნდა, ამოწურულია, აქვე, კერძო არხსაც, ბუნებრივია, აქვს უფლება ისე გააგრძელოს, როგორც თავად მიაჩნია საჭიროდ, ჩვენც ვიყენებთ უფლებას, მივიღოთ ეს გადაწყვეტილება. "TV პირველს" ავტორებთან ერთად ტოვებს მისი სარედაქციო შემდაგენლობა, მე და ნინო ჟიჟილაშვილი, პროდუსერები და ჟურნალისტები", - განაცხადა ვახო სანაიამ

ნინო ჟიჟილაშვილმა, ისე როგორც საინფორმაციო სამსახურის დატოვების შემდეგ, ახლაც ხაზი გაუსვა, რომ მიზეზი სარედაქციო ხედვების აცდენაა:

"პოლიტმეტრი "TV პირველზე" დღეს ამ გადაცემით ასრულებს მუშაობას, მიზეზი არხის განვითარების პროცესია, სადაც ჩვენი ხედვები აღარ ემთხვევა არხის მენეჯმენტის ხედვებს. ამ წასვლას არ ახლავს თან პერსონალური საკითხები, აქ საუბარია მხოლოდ საქმეზე და ფუნდამენტურ განსხვავებებზე. "TV პირველში" ჩვენ არასდროს ვყოფილვართ მხოლოდ ჟურნალისტები, არხის ეთერში გასვლის დღიდან ჩრთულნი ვიყავით თითოეულ გადაწყვეტილებაში, რაც აქ მიიღებოდა, სახელისუფლებო შეტევის მოგერიებაში, რაც საკმარისად იყო. ჩვენ ამ არხზე თითოეულ ნაბიჯზე ვიღებდით პასუხისმგებლობას,  რაც სამწუხაროდ ახლა უკვე აღარ გამოგვდის. ძალიან მარტივად და გულწრფელად რომ გითხრათ, ჩვენ უბრალოდ არ მოგვწონს  რაც ჟურნალისტური სტანდარტის, გემოვნების და ყველა სხვა კომპონენტის  თვალსაზრისით "TV  პირველზე" ხდება, არ მოგვწონს და ვერც ვერაფერს ვცვლით. მოკლედ, დღეს 5 წლის თავზე ჩვენი გზები იყოფა", - თქვა ნინო ჟიჟილაშვილმა და მან მადლობა გადაუხადა  არხის დამფუძნებელს, დამოუკიდებლად მუშობის შესაძლებლობისთვის და კოლეგებსა და მაყურებელს, - "თუკი დაინტერესდებით "პოლიტმეტრის"  მოძებნით და ჩვენი ხილვით კიდევ მომავალში,  ამას აუცილებლად შეძლებთ. პულტზე აუცილებლად გვიპოვით სადმე. აი, თუ სად დაზუსტებით შეგვეძლება შეგატყობინოთ მალე".



ინფორმაცია TV პირველიდან ჟურნალისტების წამოსვლაზე ბოლო რამდენიმე დღის განმავლობაში ვრცელდებოდა. თუმცა, თავად ჟურნალისტები ამ საკითხზე მედიასთან კომენტარისგან თავს იკავებდნენ.

ნინო ჟიჟილაშვილისა და ვახო სანაიას გარდა, ტელევიზიიდან წამოსვლის მსურველთა შორის ასახელებენ დღის ამბების წამყვანს, დიანა ტრაპაიძეს. თუმცა, 10 ივნისს მან სოციალურ ქსელში დაწერა, რომ ეს ინფორმაცია სინამდვილეს არ შეესაბამება.



TV პირველში ეს ცვლილებები დროში ემთხვევა არხში ნოდარ მელაძისა და ტელეკომპანია „მთავარის“ კიდევ რამდენიმე ჟურნალისტის გადასვლასა და ნოდარ მელაძის მთავარ პროდუსერად დანიშნვას. (მელაძის პროდუსერად დანიშვნის შემდეგ გადავიდა არხზე „მთავარის“ 6 ჟურნალისტი).

მელაძე პროდუსერად 21 აპრილს დაინიშნა. მისი დანიშვნიდან მალევე, 1-ელ მაისს, ცნობილი გახდა, რომ "TV პირველის" საინფორმაციო სამსახურის უფროსი ნინო ჟიჟილაშვილი აღარ იქნებოდა. ამ გადაწყვეტილების მიზეზად მან მისი და ხელმძღვანელობის ხედვების განსხვავებულობა დაასახელა.

"კონკრეტულ საკითხებზე ვერ შევთანხმდით. ამიტომ მოგვიხდა ამ სეგმენტში დაშორება. გუნდი, რომელთან ერთადაც "TV პირველში" მოსვლის დღიდან ვმუშაობ, ახლა ტოქშოუს მიმართულებას დავუთმობთ მთელ ენერგიას", - უთხრა მაშინ ნინო ჟიჟილაშვილმა "მედიაჩექერს".

ამ ცვლილების შემდეგ არხზე კიდევ ერთი ცვლილება მოხდა. 6 ივნისს ჟურნალისტმა და ტელეწამყვანმა ინგა გრიგოლიამ TV პირველის დირექტორის თანამდებობა დატოვა. ამის შესახებ მან ფეისბუკზე დაწერა. ვრცელ სტატუსში გრიგოლიამ ახსნა, რომ ეს გადაწყვეტილება ოჯახური ინტერესების გამო მიიღო და ამ საკითხზე დამატებით კომენტარებს აღარ გააკეთებდა. გრიგოლია არხიდან არ წასულა, მან თქვა, რომ გააგრძელებს საავტორო გადაცემას "რეაქცია" და იქნება რამდენიმე გადაცემის პროდიუსერი.

ამის შემდეგ, არხის გენერალური დირექტორი მისი დამფუძნებელი ვატო წერეთელი გახდა. საინფორმაციო სამსახურის ახალი ხელმძღვანელის ვინაობა კი ამ დრომდე უცნობია.

ორ კვირიანი შიმშილობის შემდეგ, მოძრაობა “მე მიყვარს ბათუმის” წევრმა ალექსანდრე მილორავამ, რომელიც მე-15 დღეა აჭარის ტელევიზიის დირექტორის იმპიჩმენტს ითხოვს, შიმშილობა შეწყვიტა. ამის შესახებ განცხადება მან აჭარის საზოგადოებრივი მაუწყებლის პირდაპირ ეთერში გააკეთა:

“გამომდინარე იქიდან, რომ ჩემთვის უმნიშვნელოვანესია, აჭარის საზოგადოებრივ მაუწყებელში შეწყდეს პოლიტიკური პროცესები და დასრულდეს ხელისუფლების მიერ კონტროლი, ვწყვეტ შიმშილობას და ვაძლევ ბორდს, იმოქმედოს თავისუფლად, მიიღოს ლეგიტიმური გადაწყვეტილება და ბატონი კოხრეიძე გაათავისუფლოს დაკავებული თანამდებობიდან, წინააღმდეგ შემთხვევაში, აჭარის საზოგადოებრივი მაუწყებლის მრჩეველთა საბჭოს პასუხისმგებლობა დადგება უმაღლეს საბჭოში და ბრძოლა იქ გაგრძელდება,“ – განაცხადა ალექსანდრე მილორავამ აჭარის ტელევიზიის სატელევიზიო ჩართვაში.

ალექსანდრე მილორავას თქმით, აჭარის უმაღლეს საბჭოში ბორდის დათხოვნასთან დაკავშირებით საკითხი უკვე დაძრულია და სხვადასხვა დეპუტატებთან კონსულტაციები მიმდინარეობს.

შიმშილობის შეწყვეტამდე სამი დღით ადრე ალექსანდრე მილორავამ ბორდის ერთ-ერთ წევრს, თამარ წილოსანს ღია წერილით მიმართა, სადაც წერდა:“თუ თქვენთვის მნიშვნელოვანია, რომ მე შევწყვიტო შიმშილობა და მას შემდეგ შეიტანთ განაცხადს იმპიჩმენტზე, დააფიქსირეთ ეს პოზიცია საჯაროდ და მე ავდგები, მხოლოდ იმიტომ, რომ შედეგია ჩემთვის მნიშვნელოვანი და არა პიროვნული წარმატებები. მაგრამ აქვე დავაფიქსირებ პოზიციას, რომ თქვენ გაქვთ უკვე ყველანაირი საფუძველი დღესვე მოაწეროთ ხელი კოხრეიძის იმპიჩმენტის მოთხოვნას”.

ალექსანდრე მილორავას მიმართვას თამარ წილოსანი ფეისბუკის პირად გვერდზე გამოეხმაურა და საპასუხოდ დაწერა “დიახ, ჩემთვის მნიშვნელოვანია, რომ თქვენ შეწყვიტოთ შიმშილობა და მას შემდეგ შევიტან განაცხადს იმპიჩმენტზე, ვაფიქსირებ ამ პოზიციას საჯაროდ და თქვენ ადგებით - შეწყვიტავთ აქციას და შიმშილობას!”

პასუხის შემდეგ, ალექსანდრე მილორავამ თამარ წილოსანს შეხვედრა სთხოვა, რაზეც მან უპასუხა, რომ საჯაროდ პოზიცია უკვე დააფიქსირა და ახლა მის მოქმედებას ელოდება. ალექსანდრე მილორავა ამბობს, რომ მისთვის გაუგებარია, რატომ უშლიდა ხელს მისი პროტესტი თამარ წილოსანს, რომ მიემართა გიორგი კოხრეიძის იმპიჩმენტის მოთხოვნით ბორდისთვის.

თამარ წილოსანმა 5 ივნისს განაცხადა, რომ 8 ივნიის დირექტორის იმპიჩმენტის მოთხოვნით ბორდს განცხადებით მიმართავდა, თუმცა 8 ივნისს ბორდისთვის მიმართვა გადაიფიქრა და გადაწყვეტილება შემდეგნაირად ახსნა:

„სანამ იმპიჩმენტის პროცედურას დავიწყებ, ჩემთვის მნიშვნელოვანია, რომ პროფესიონალი კადრები, რომლებიც უახლოეს პერიოდში გაათავისუფლეს სამსახურიდან, პოზიციებზე დააბრუნონ. ასევე, ვითხოვ გამოცხადდეს მორატორიუმი ადმინისტრაციის მხრიდან და განსხვავებული პოზიციების მქონე ადამიანების გათავისუფლება შეწყდეს. გარდა ამისა, მაუწყებელში უნდა არსებობდეს კოლეგიალური ორგანო, სარედაქციო საბჭო და ვითხოვ, რომ ეს საბჭო დაუყოვნებლივ აღდგეს.“

მრჩეველთა საბჭოში დირექტორის იმპიჩმენტის მოთხოვნით, ერთი განცხადება უკვე შევიდა. ბორდის წევრმა გია ქარცივაძემ გიორგი კოხრეიძის იმპიჩმენტის მოთხოვნით საბჭოს 3 ივნისს მიმართა. მაუწყებლობის შესახებ კანონის მიხედვით, მაუწყებლის დირექტორის იმპიჩმენტის დასაწყებად, მრჩეველთა საბჭოს ხუთი წევრიდან მინიმუმ ორი წევრის მოთხოვნაა საჭირო.

რისთვის სჭირდება ხელისუფლებას მაუწყებლობის შესახებ კანონში დაფინანსების ნორმის ცვლილება და რა საფრთხეს უქმნის ის საზოგადოებრივი მაუწყებლის იდეას?

პარლამენტში დაჩქარებული წესით განიხილება განათლების სამინისტროს მიერ მომზადებული კანონპროექტი. კანონპროექტის მიხედვით, იცვლება მაუწყებლობის შესახებ კანონის 66¹ მუხლი, რომლითაც “აკრძალულია ადმინისტრაციული ორგანოს, პოლიტიკური პარტიის, თანამდებობის პირისა და საჯარო მოსამსახურის მიერ მაუწყებლის დაფინანსება, აგრეთვე, მისი მომსახურების შესყიდვა და მაუწყებლის პროგრამების მომზადების ან/და ეთერში გადაცემის პირდაპირი ან ირიბი დაფინანსება ან თანადაფინანსება”.

ეს მუხლი გამონაკლისს აწესებს სოციალურ რეკლამის ანდა საზოგადოებისთვის მნიშვნელოვანი ინფორმაციის გავრცელების მიზნით შესყიდვებზე ადმინისტრაციული ორგანოს მხრიდან, თუმცა განათლების სამინისტროს მიერ მომზადებული კანონპროექტით, ადმინისტრაციული ორგანო ასევე შეძლებს საგანმანათლებლო და კულტურული პროგრამების დაფინანსებას.

ამ ცვლილების მიღების აუცილებლობას სამინისტრო ახალი კორონავირუსის პანდემიის გამო შექმნილ ვითარებით ხსნის, როცა აუცილებელი გახდა პროექტ “ტელესკოლის” განხორციელება.

“კანონპროექტის მიღების შედეგად, შესაძლებელი გახდება მაუწყებლისა და ადმინისტრაციული ორგანოს – ამ შემთხვევაში საქართველოს განათლების, მეცნიერების, კულტურისა და სპორტის სამინისტროს თანამშრომლობით, საგანმანათლებლო და კულტურული პროგრამების საზოგადოებისათვის მიწოდების უზრუნველყოფა”, - ნათქვამია კანონპროექტის განმარტებით ბარათში.

ამასთან, განათლების სამინისტრო ითხოვს, რომ ამ კანონპროექტით გათვალისწინებული რეგულაციები გავრცელდეს წინა პერიოდზეც, კერძოდ, საზოგადოებრივ მაუწყებელსა და განათლების სამინისტროს შორის პროექტ “ტელესკოლასთან” დაკავშირებით 2020 წლის 23 მაისიდან წარმოშობილ სამართლებრივ ურთიერთობებზე.

ასეთ შემთხვევაში, კანონპროექტის მიღების შედეგად, 2020 წლის სახელმწიფო ბიუჯეტიდან “ტელესკოლა” 404 200 ლარით დაფინანსდება, საიდანაც მასწავლებლების ხელფასებისთვის გათვალისწინებულია 254,155 ლარი, ხოლო ტელეგაკვეთილების და საინფორმაციო ტიხრების გადაღებისთვის 150,000 ლარი.

“კოალიციის მედიის ადვოკატირებისთვის” კოორდინატორი ნათია კაპანაძე, რომელიც მანამდე აჭარის საზოგადოებრივ მაუწყებელს ხელმძღვანელობდა, “მედიაჩექერთან” საუბარში აცხადებს, რომ მთავარ პრინციპს - საზოგადოებრივი მაუწყებელი იყოს გამიჯნული ადმინისტრაციული ორგანოსაგან და დარჩეს ანგარიშვალდებული თავისი ძირითადი დამფინანსებელის - გადასახადის გადამხდელის წინაშე, არეგულირებს სწორედ კანონის ის ჩანაწერი, რომელსაც ამ შემთხვევაში განათლების სამინისტრო ბარიერად მიიჩნევს და მის შეცვლას ითხოვს.

“ჩემთვის, კანონპროექტის მოსალოდნელი შედეგი საზოგადოებრივი მაუწყებლის იდეის უარყოფითი ტრანსფორმაცია იქნება”, - ამბობს ნათია კაპანაძე, ვინაიდან მისი თქმით, “თუ ადმინისტრაციული ორგანოს გეგმების განხორციელებაა საზოგადოებრივი მაუწყებლის დანიშნულება/დავალება, ჩნდება მთავარი კითხვა - მაშინ რა სიკეთე მოაქვს საზოგადოებრივ მაუწყებელს, რომელსაც სწორედ საზოგადოების ინტერესებზე ორიენტირებული პროგრამების მიწოდების უზრუნველყოფა ევალება?”

ნათია კაპანაძის თქმით, ხელისუფლებას ამ საკანონმდებლო ცვლილების განხორციელების გარეშეც შეუძლია მაუწყებლისთვის დაფინანსების გაზრდა, რომელიც შესაძლოა სწორედ პროექტ “ტელესკოლას” მოხმარდეს:

“აუცილებელი მგონია, ამ კონკრეტული შემთხვევისთვის, შეიცვალოს საზოგადოებრივი მაუწყებლისათვის თანხის გამოყოფის სქემა. ნაცვლად ადმინისტრაციული ორგანოს დაფინანსების დაშვებისა, პარლამენტმა გამოიყენოს იგივე გზა, როგორც ხდება ბიუჯეტიდან თანხის ყოველწლიურად გამოყოფა საზოგადოებრივი მაუწყებლისათვის. გაზარდოს დაფინანსების მუხლი, სწორედ „ტელესკოლის“ მაღალი საჭიროებებიდან გამომდინარე და საგანმანათლებლო მიმართულების განვითარებისათვის. ბიუჯეტიდან დაფინანსების გაზრდა მიმაჩნია ყველაზე სამართლიან გზად. ეს იქნება შესაძლებლობა შეიცვალოს საზოგადოებრივი მაუწყებლის ბიუჯეტი, ღირებულებების ცვლილების გარეშე”.

ბიუჯეტიდან საზოგადოებრივი მაუწყებლის დაფინანსების მოცულობა, კანონის მიხედვით, წინა წლის მთლიანი შიდა პროდუქტის არანაკლებ 0,14%-ით განისაზღვრება, რაც იმას ნიშნავს, ბიუჯეტის ზედა ზღვარი დაწესებული არ არის და შესაბამისად, საჭიროების შემთხვევაში ხელისუფლებას შეუძლია მაუწყებლის დაფინანების მოცულობის გაზრდა. 2020 წლის ბიუჯეტის მიხედვით, საზოგადოებრივი მაუწყებლისთვის 68 მილიონ 700 ათასი ლარია გამოყოფილი.

განათლების სამინისტროს მიერ მომზადებული კანონპროექტის განმარტებით ბარათში აღნიშნულია, რომ ტელესკოლის პროგრამისთვის საშუალოვადიან 2021-2023 წლებში საორიენტაციო ხარჯი იქნება 3.8 მლნ. ლარი.

“2020 წლისათვის საქართველოს განათლების, მეცნიერების, კულტურისა და სპორტის სამინისტროს ბიუჯეტიდან საჭიროა დაახლოებით 800.0 ათასი ლარი (სემესტრულად განხილვის შემთხვევაში) მიმდინარე წლის არსებულ და დარჩენილ პერიოდზე”, - ვკითხულობთ განმარტებით ბარათაში.

წარმოდგენილი კანონპროექტის მიხედვით ჩანს, რომ განათლების სამინისტრო არა მხოლოდ მიმდინარე წლის შემოდგომაზე, 2020-21 სასწავლო წელსაც განიხილავს ტელესკოლის საჭიროებას და მის დაფინანსებას, არამედ მომდევნო 3 წლის განმავლობაშიც. ამასთან, ჯერ არ არსებობს კონკრეტულ სრულფასოვან კვლევაზე დაფუძნებული შეფასება, თუ რამდენად ეფექტური აღმოჩნდა ეს პროექტი ზოგადად და შეიძლება თუ არა ის ჩაითვალოს დისტანციური სწავლების ეფექტურ მოდელად.

„მაღალია იმ რესპოდენტების ოდენობა, ვინც ფიქრობს, რომ ხელისუფლება მედიის საქმიანობაში ერევა, რათა უზრუნველყოს მოვლენების მისთვის მისაღები ფორმით გაშუქება. კერძოდ, გამოკითხულთა 71% აცხადებს, რომ ხელისუფლება ხანდახან (45%) ან ყოველთვის (26%) ერევა მედიის საქმიანობაში” – ასეთია „საერთაშორისო გამჭვირვალობა საქართველოს“ კვლევის შედეგები, რომელიც დღეს 11 ივნისს გამოქვეყნდა და რომელიც ეხება მედიის მდგომარეობას საქართველოში.

კვლევის მიხედვით, გამოკითხულთა 50% ფიქრობს, რომ ხელისუფლების მიერ იმ მედიის წარმომადგენლების შევიწროება, რომლებიც ხელისუფლებას აკრიტიკებენ, უფრო (39%) ან ძალიან გავრცელებულია (11%). 



კვლევაში ყურადღება გამახვილებულია ყალბ ამბებზეც. კითხვაზე, რამდენად არის მოსახლეობა ინფორმირებული „ფეისბუკში“ ყალბი ინფორმაციის გავრცელების მიზნით შექმნილი გვერდების შესახებ, აღმოჩნდა, რომ გამოკითხულთა 53%-ს მსგავსი გვერდების შესახებ სმენია, რაც 2019 წლის მონაცემებთან შედარებით, 17%-ით არის გაზრდილი.



გასული წლის დეკემბერში „ფეისბუკმა“ საქართველოში, „კოორდინებული არაავთენტური ქცევის“ გამო, ასობით გვერდი წაშალა. იმ 53%-დან, რომელსაც „ფეისბუკის“ ყალბი გვერდების შესახებ სმენია, 70% ამ ფაქტის შესახებაც ინფორმირებულია, თუმცა, 46%-მა არ იცის, ვინ დგას ამ გვერდების უკან.




კვლევა „საერთაშორისო გამჭვირვალობა - საქართველოს“ დაკვეთით „კავკასიის კვლევითი რესურსების ცენტრმა“ (CRRC) 2020 წლის 27 თებერვლიდან 18 მარტამდე პერიოდში ჩაატარა. კვლევის ფარგლებში მთელი ქვეყნის მასშტაბით 1763 ადამიანი გამოიკითხა. კვლევის საშუალო ცდომილება 2.2%-ია.

“თქვენი ნაბიჯებიდან გამომდინარე, მრჩება შთაბეჭდილება, რომ ჩემი შიმშილობის პარალელურად, არ გსურთ იმპიჩმენტის საკითხის დაყენება”, - მოძრაობა “მე მიყვარს ბათუმის” ერთ-ერთი წევრმა ალექსანდრე მილორავამ, რომელიც მე-12 დღეა აჭარის ტელევიზიის დირექტორის იმპიჩმენტის მოთხოვნით შიმშილობს, ბორდის წევრს თამარ წილოსანს ღია წერილით მიმართა.

ალექსანდრე მილორავა წილოსანს ახსენებს მისი 5 ივნისის პოსტს ფეისბუკზე, რომელშიც მკაფიოდ წერდა, რომ ორშაბათს, 8 ივნისს, მრჩეველთა საბჭოს საზოგადოებრივი მაუწყებლის აჭარის ტელევიზიისა და რადიოს დირექტორის გიორგი კოხრეიძისთვის უნდობლობის გამოცხადების თხოვნით მიმართავდა. თუმცა, გუშინ გადაიფიქრა.

“გუშინ შუადღეზე ალტერნატიულ პროფკავშირებს მოუწოდეთ ხელმოწერები შეეგროვებინათ და თქვენთვის მოემართათ თხოვნით, რასაც ისინი გაემიჯნენ. 17:48 საათი იყო მაუწყებელში რომ მოხვედით და გააკეთეთ სულ სხვა განცხადება, რაზეც ბორდის თავმჯდომარემ გითხრათ, რომ ეს კანონის დარღვევაა და შეუძლებელია ამ მოთხოვნის დაკმაყოფილება (სხვა იურისტებთანაც გადავამოწმე). დღეს ჩატარდება ამ საკითხების არაფორმალური განხილვა, იმისათვის, რომ მიიღოთ ყველაფერზე მკაფიო პასუხი. თუ თქვენთვის მნიშვნელოვანია, რომ მე შევწყვიტო შიმშილობა და მას შემდეგ შეიტანთ განაცხადს იმპიჩმენტზე, დააფიქსირეთ ეს პოზიცია საჯაროდ და მე ავდგები, მხოლოდ იმიტომ, რომ შედეგია ჩემთვის მნიშვნელოვანი და არა პიროვნული წარმატებები. მაგრამ აქვე დავაფიქსირებ პოზიციას, რომ თქვენ გაქვთ უკვე ყველანაირი საფუძველი დღესვე მოაწეროთ ხელი კოხრეიძის იმპიჩმენტის მოთხოვნას”, - წერს ალექსანდრე მილორავა.



აჭარის საზოგადოებრივი მაუწყებლის ტელევიზიისა და რადიოს მრჩეველთა საბჭოს წევრმა, თამარ წილოსანმა 5 ივნისს განაცხადა, რომ 8 ივნიის დირექტორის იმპიჩმენტის მოთხოვნით ბორდს განცხადებით მიმართავდა: “აჭარის ტელევიზიაში ჟურნალისტების დაუსაბუთებელი გათავისუფლების, მედიაციის პროცესის შეწყვეტისა და ხელშეკრულებების ცალმხრივად შეცვლის გამო მივიღე გადაწყვეტილება, რომ მივმართო მრჩეველთა საბჭოს უნდობლობის პროცედურების დაწყების შესახებ. პროცედურების დაცვით 2 წევრის ერთობლივი წერილობითი მოთხოვნა სხდომის დანიშვნის შესახებ ორშაბათს შევა მრჩეველთა საბჭოში. კულმინაცია იყო შორენა ღლონტის უკვე მეორეჯერ გათავისუფლება”, - წერდა თამარ წილოსანი, თუმცა 8 ივნისს ბორდისთვის მიმართვა გადაიფიქრა და გადაწყვეტილება შემდეგნაირად ახსნა:

„სანამ იმპიჩმენტის პროცედურას დავიწყებ, ჩემთვის მნიშვნელოვანია, რომ პროფესიონალი კადრები, რომლებიც უახლოეს პერიოდში გაათავისუფლეს სამსახურიდან, პოზიციებზე დააბრუნონ. ასევე, ვითხოვ გამოცხადდეს მორატორიუმი ადმინისტრაციის მხრიდან და განსხვავებული პოზიციების მქონე ადამიანების გათავისუფლება შეწყდეს. გარდა ამისა, მაუწყებელში უნდა არსებობდეს კოლეგიალური ორგანო, სარედაქციო საბჭო და ვითხოვ, რომ ეს საბჭო დაუყოვნებლივ აღდგეს,“ - განაცხადა თამარ წილოსანმა “მედიაჩეკერთან” საუბრისას.

მრჩეველთა საბჭოში დირექტორის იმპიჩმენტის მოთხოვნით, ერთი განცხადება უკვე შევიდა. ბორდის წევრმა გია ქარცივაძემ გიორგი კოხრეიძის იმპიჩმენტის მოთხოვნით საბჭოს 3 ივნისს მიმართა. მაუწყებლობის შესახებ კანონის მიხედვით, მაუწყებლის დირექტორის იმპიჩმენტის დასაწყებად, მრჩეველთა საბჭოს ხუთი წევრიდან მინიმუმ ორი წევრის მოთხოვნაა საჭირო.

---

ფოტო: რადიო თავისუფლება

აჭარის საზოგადოებრივი მაუწყებლის ტელევიზიისა და რადიოს მრჩეველთა საბჭოს წევრმა, თამარ წილოსანმა, რომელიც ამბობდა, რომ დღეს, 8 ივნისს, ბორდს დირექტორის იმპიჩმენტის მოთხოვნით მიმართავდა, მრჩეველთა საბჭოს ნამდვილად მიმართა, თუმცა, არა დირექტორისთვის უნდობლობის გამოცხადების თხოვნით. პარალელურად, დღეს მაუწყებლის ალტერნატიულმა პროფესიულმა გაერთიანებამ გაავრცელა განცხადება, რომელშიც ნათქვამია, რომ წილოსანმა იმპიჩმენტის თემაზე მათგან ღია მხარდაჭერა ითხოვა.

საზოგადოებრივი მაუწყებლის აჭარის ტელევიზიისა და რადიოს ალტერნატიულმა პროფესიულმა გაერთიანებამ დღეს გაავრცელა განცხადება, რომელშიც ნათქვამია, რომ თამარ წილოსანმა იმპიჩმენტის საკითხში მათგან ღია მხარდაჭერა ითხოვა.

„საჯაროდ გაჟღერდა კიდევ ერთი მრჩევლის - თამარ წილოსანის პოზიცია, რომელმაც დაადასტურა მზაობა იმპიჩმენტის მხარდასაჭერად; თუმცა, როგორც აღმოჩნდა - ის, საბოლოო გადაწყვეტილების მისაღებად ალტერნატიული პროფესიული გაერთიანების ღია მხარდაჭერას ითხოვს ამ კონკრეტული საკითხის მიმართ. ურთიერთობისა და პროცესების ამგვარად წარმართვა სცდება ჯანსაღი კომუნიკაციის და ზოგადად, მაუწყებლის საუკეთესო ინტერესის უზრუნველყოფის ფორმატს.

სრულად ვაცნობიერებთ და ვიაზრებთ, რომ ალტერნტიული პროფესიული გაერთიანების გადაწყვეტილებები და ჟურნალისტური, თუ შრომითი უფლებებისთვის ბრძოლა ახდენს მნიშვნელოვან გავლენას მაუწყებელში მიმდინარე პროცესებზე, თუმცა, აქვე ვფიქრობთ, რომ არსებობს რიგი საკითხები, რომლებიც სცდება გაერთიანების უფლებამოსილებას და მრჩეველმა უნდა იმოქმედოს საკუთარი სინდიდისა და პროფესიული ვალდებულება/პასუხისმგებლობის ფარგლებში. მრჩეველი თავად უნდა წყვეტდეს და აფასებდეს არსებულ ვითარებას, ჟურნალისტების დევნის კონტექსტს და იმასაც, არსებობს თუ არა იმპიჩემნტის კანონიერი საფუძვლები. ამგვარი პასუხისმგებლობის აღება მისი, როგორც მრჩევლის პრეროგატივაა", - ვკითხულობთ განცხადებაში, რომელიც დღეს პროფესიულმა გაერთიანებამ გაავრცელა.

ბორდის წევრი თამარ წილოსანი „მედიაჩექერთან“ ადასტურებს, რომ მას პროფესიულ გაერთიანებასთან კომუნიკაცია ნამდვილად ჰქონდა: „ჩვენი აზრები ერთმანეთს ემთხვეოდა და მე უბრალოდ ვთქვი, რომ თუკი პროფკავშირებსაც აქვთ იგივე დამოკიდებულება, რომ იმპიჩმენტი არის საჭირო, მათ შეუძლიათ ამის შესახებ განაცხადონ“.

კითხვაზე, აპირებს თუ არა მიმართოს ბორდს იმპიჩმენტის მოთხოვნით, რომლის შესახებაც მან გასულ კვირას განაცხადა, თამარ წილოსანმა განაცხადა, რომ საწყის ეტაპზე ის რამდენიმე საკითხის გადაწყვეტას ითხოვს, მოითხოვს თუ არა დირექტორისთვის უნდობლობის გამოცხადებას, სწორედ ამ საკითხების გადაწყვეტაზეა დამოკიდებული:

„სანამ იმპიჩმენტის პროცედურას დავიწყებ, ჩემთვის მნიშვნელოვანია, რომ პროფესიონალი კადრები, რომლებიც უახლოეს პერიოდში გაათავისუფლეს სამსახურიდან, პოზიციებზე დააბრუნონ. ასევე, ვითხოვ გამოცხადდეს მორატორიუმი ადმინისტრაციის მხრიდან და განსხვავებული პოზიციების მქონე ადამიანების გათავისუფლება შეწყდეს. გარდა ამისა, მაუწყებელში უნდა არსებობდეს კოლეგიალური ორგანო, სარედაქციო საბჭო და ვითხოვ, რომ ეს საბჭო დაუყოვნებლივ აღდგეს“.

---

წილოსანის სტატუსი ფეისბუკზე, რომელშიც იგი წერდა, რომ 8 ივნისს ბორდს დირექტორის იმპიჩმენტის მოთხოვნით მიმართავდა

---

წილოსანი ამბობს, რომ იგი ითხოვს ამ საკითხების განსახილველად სხდომა 15 ივნისამდე დაინიშნოს და გათავისუფლებული ადამიანები პოზიციებზე დაბრუნდნენ. თუ მისი ეს მოთხოვნა არ შესრულდება, შემდეგ უკვე მრჩეველთა საბჭოს წინაშე დირექტორის იმპიჩმენტის საკითხს დააყენებს.

„იმპიჩმენტის მოთხოვნის საფუძვლები ჩემი მხრიდან იქნება განსხვავებული პოზიციის მქონე ადამიანების გათავისუფლება, დაუსაბუთებელი გადანაცვლებები პოზიციებზე, ხელშეკრულების პირობების შეცვლა დაინტერესებული პირების მონაწილეობის გარეშე, ასევე, მედიაციის პროცესის ჩაშლა კოლექტიური დავის პროცესში. კიდევ ერთი პრობლემა ის არის, რომ დირექტორმა პანდემიის პირობებში ისე მიიღო რამდენიმე გადაცემის შეჩერების გადაწყვეტილება, რომ ბორდის წევრებმა ამის შესახებ არაფერი ვიცოდით“, - ამბობს წილოსანი.

შეგახსენებთ, აჭარის საზოგადოებრივი მაუწყებლის მრჩეველთა საბჭოს წევრმა გია ქარცივაძემ, დირექტორის გიორგი კოხრეიძის იმპიჩმენტის მოთხოვნით, მრჩეველთა საბჭოს 3 ივნისს მიმართა.

საზოგადოებრივი მაუწყებლის სამეურვეო საბჭოს 3 წევრის ვაკანტურ ადგილზე გამოცხადებულ ღია კონკურსში 10 კანდიდატი მონაწილეობს. ბორდის ახალ წევრებს, შესარჩევი კომისია შემდეგი კანდიდატებისგან შეარჩევს:

• ზაზა აბაშიძე
• თამარ ამაშუკელი
• ნათია კაპანაძე
• გრიგოლ მურღულია
• ბონდო მძინარაშვილი
• ოთარ შაორშაძე
• დოდო შონავა
• კონსტანტინე ჩლაიძე
• ნინო ჭალაგანიძე
• ზაურ ხალილოვი

საზოგადოებრივი მაუწყებლის სამეურვეო საბჭო სამი წევრის ადგილი მას შემდეგ გახდა ვაკანტური, რაც ქეთევან მსხილაძეს, ნინია კაკაბაძეს და გია იაკობაშვილს უფლებამოსილების ვადა ამოეწურა.

აღნიშნულ სამ ვაკანტურ პოზიციაზე ერთი კანდიდატი პარლამენტს შესარჩევად უმრავლესობამ უნდა წარადგინოს, ორი კი - უმრავლესობის მიღმა დარჩენილმა პარლამენტის წევრთა არანაკლებ ერთმა მეოთხედმა.

საზოგადოებრივი მაუწყებლის სამეურვეო საბჭოს წევრობის − მეურვეობის 3 კანდიდატის შესარჩევი ღია კონკურსი, პარლამენტის თავმჯდომარე არჩილ თალაკვაძის ბრძანებით, 16 მარტს გამოცხადდა, თუმცა, ქვეყანაში კორონავირუსის შესაძლო გავრცელების პრევენციის მიზნით გამოცხადებული საგანგებო მდგომარეობის გამო, 31 მარტს, საგანგებო მდგომარეობის გაუქმებამდე, შეჩერდა.

საკონკურსო კომისია მეურვეობის კანდიდატებს კანდიდატურების წარდგენის ვადის ამოწურვიდან 10 კალენდარული დღის ვადაში, ორ ეტაპად შეარჩევს. პირველ ეტაპზე კანდიდატები შეირჩევიან „მაუწყებლობის შესახებ“ საქართველოს კანონით დადგენილი საკვალიფიკაციო მოთხოვნების შესაბამისად. კანდიდატთა შეფასების დამატებითი კრიტერიუმები განისაზღვრება საკონკურსო კომისიის დებულებით. მეორე ეტაპზე კი კანდიდატები შეირჩევიან მათ მიერ წარდგენილი საზოგადოებრივი მაუწყებლის განვითარების კონცეფციების განხილვის და მათთან გასაუბრების შედეგად.

კანდიდატთა შერჩევის შემდეგ, საკონკურსო კომისია უმრავლესობას, უმრავლესობის გარეთ დარჩენილ პარლამენტის წევრებს, საქართველოს სახალხო დამცველსა და აჭარის ავტონომიური რესპუბლიკის უმაღლეს საბჭოს წარუდგენს ასარჩევზე სულ ცოტა სამჯერ მეტ კანდიდატურას.

საზოგადოებრივი მაუწყებლის სამეურვეო საბჭო სულ 9 წევრისგან შედგება. მეურვის უფლებამოსილების ვადა არაუმეტეს 6 წელია. სამეურვეო საბჭოს შემადგენლობის ერთი მესამედი როტაციის წესით 2 წელიწადში ერთხელ იცვლება. ერთი და იგივე პირი კი მეურვედ 1 ვადაზე მეტი ხნით არ შეიძლება აირჩეს.

საქართველოს პარლამენტი სიითი შემადგენლობის უმრავლესობით ირჩევს ორ მეურვეს საქართველოს სახალხო დამცველის წარდგინებით, სამს – საპარლამენტო უმრავლესობის წარდგინებით, სამს – საპარლამენტო უმრავლესობის გარეთ დარჩენილ პარლამენტის წევრთა არანაკლებ ერთი მეოთხედის წარდგინებით, ხოლო ერთს – აჭარის ავტონომიური რესპუბლიკის უმაღლესი საბჭოს წარდგინებით.

ამ ეტაპზე ბორდი შემდეგნაირად არის დაკომპლექტებული: სამეურვეო საბჭოს თავმჯდომარე ირინა ფუტკარაძეა. საბჭოს წევრები კი არიან მიხეილ ჩიკვილაძე, იზაბელა ოსიპოვა, ბესიკ ლილუაშვილი, ირაკლი პაპავა და გიორგი ნიჟარაძე.

ჟურნალისტმა და ტელეწამყვანმა ინგა გრიგოლიამ TV პირველის დირექტორის თანამდებობა დატოვა. ამის შესახებ მან ფეისბუკზე დაწერა. ვრცელ სტატუსში გრიგოლია წერს, რომ ეს გადაწყვეტილება ოჯახური ინტერესების გამო მიიღო და ამ საკითხზე დამატებით კომენტარებს აღარ გააკეთებს. გრიგოლია წერს, რომ არხიდან არ მიდის, იგი გააგრძელებს საავტორო გადაცემას "რეაქცია" და იქნება რამდენიმე გადაცემის პროდიუსერი.

"ბოლო პერიოდში, ჩემი საქმიანი და ჩემი ოჯახური ინტერესები ძალიან შეეჯახა ერთმანეთს. იმის გამო, რომ ჩემთვის ყველაზე ფასეულია ჟურნალისტის თავისუფლება, როგორც დირექტორს, არასოდეს მიცდია ჩემი ოჯახური ინტერესების გამო რამე თემა დამებლოკა ან გამელაითებინა, სხვათა შორის, არც ჩემს გადაცემებში...

ვაწყენინე უამრავ ადამიანს, იმიტომ რომ არ ჩავერიე (არც არასდროს ჩავერევი!) მწვავე რეპორტაჟების გაკეთებასა და გაშვებაში. ვაწყენინე უამრავ მეგობარს და ახლობელს, რადგან მართლა მჯერა, როცა ჟურნალისტი ხარ არასოდეს არავის ინტერესებით არ უნდა დაგეგმო გადაცემა ან რეპორტაჟი.

მაგრამ ამ ბოლო დროს ვაწყენინე და ლამის დავკარგე ჩემი ოჯახის წევრები, ტელევიზიაში გადიოდა რეპორტაჟები, რომელიც პირდაპირ მათ სამსახურს ეხებოდა. ისინი თვლიდნენ, რომ არ იყო სწორი რასაც ვაშუქებდით, მე ვთვლიდი, რომ სწორი იყო და ახლაც ასე მჯერა (გავაგრძელებ იგივეს)...

რა უფრო ძვირფასია ჩემთვის? ოჯახი თუ საქმე, რომელსაც ვაკეთებ? ორივე! ორივე ძალიან მიყვარს, ვერც ერთს ვერ შეველევი. თუმცა აღმოვაჩინე, რომ არ მინდა ჩემი დირექტორობით ტკივილი მივაყენო ჩემთვის ძვირფას ადამიანებს, რომლებსაც ცხადია, გაუჭირდებოდათ იმის გაგება, რომ დირექტორი არ ერევა ჟურნალისტების საქმიანობაში.

ამიტომ გადავწყვიტე, მოვიხსნა ეს პასუხისმგებლობა, რომ არ დავაზარალო არც საქმე და არც ოჯახი. რომ როდესმე, ჩემი ტელევიზიის ჟურნალისტების თავისუფლებაზე არ მოვახდინო თუნდაც ირიბი გავლენა. ეს იმას არ ნიშნავს, რომ ჩემს გადაცემებში რაიმეს არ გავაშუქებ, იგივე სიმწვავით და ობიექტურობით, როგორც აქამდე მიკეთებია.

აღარ ვიქნები დირექტორი, მაგრამ ვიქნები "რეაქციის" წამყვანი და ანუნა-რუსოს გადაცემების პროდუსერი. მადლობა მთელს ტელევიზიას, ტვ ,"პირველის" მთელს შემადგენლობას, ვისი დირექტორობაც ჩემთვის საამაყო იყო და ბოდიში ჩემს ოჯახს, ჩემი საქმის გამო რომ არაერთხელ ვაწყენინე",- წერს ინგა გრიგოლია.

მისი ამ განცხადებიდან ირკვევა, რომ ტელევიზიის დირექტორი ამიერიდან ტელევიზიის დამფუძნებელი ვატო წერეთელი იქნება. 

 "მეგობრებო,შევხვდებით ერთმანეთს სამშაბათს,,რეაქციაში,,მერე ხუთშაბათს, მერე ისევ შაბათს ,მერე ისევ სამშაბათს, ხუთშაბათს,შაბათს და ასე შემდეგ. და სიბერემდე ვიქნები სულ ჩემს საყვარელ ტვ ,"პირველზე" ჟურნალისტად, პროდუსერად თუ სხვა პოზიციაზე, ამას არ აქვს მნიშვნელობა. ბევრად უფრო მეტ დროს დავუთმობ ჩემს გადაცემებს, რომელსაც ბევრი რამ დავაკელი, მენეჯერად გადასვლის გამო", - წერს გრიგოლია.


 

TV პირველის დირექტორად ინგა გრიგოლია 2019 წლის ოქტომბრიდან დაინიშნა. მაშინ ამ პოზიციაზე მან პაატა კაკაურიძე ჩაანაცვლა. 

აჭარის საზოგადოებრივი მაუწყებლის მრჩეველთა საბჭოს წევრმა გია ქარცივაძემ, დირექტორის გიორგი კოხრეიძის იმპიჩმენტის მოთხოვნით, 3 ივნისს მრჩეველთა საბჭოს მიმართა. ორშაბათს, 8 ივნისს, საბჭოში კიდევ ერთი განცხადება შევა - ბორდის მეორე წევრის, თამარ წილოსანის. პარალელურად, მერვე დღეა ტელევიზიის წინ ამავე მოთხოვნით შიმშილობს საზოგადოებრივი მოძრაობა “მე მიყვარს ბათუმის” ერთ-ერთი წევრი, ალექსანდრე მილორავა და დღეს, 5 ივნისს, ამავე მოთხოვნით, ტელევიზიასთან საპროტესტო აქციაც გაიმართა. “მედიაჩეკერი” შეეცადა გაერკვია, დაიწყება თუ არა დირექტორის იმპიჩმენტის პროცედურა.

დასაქმებულთა დევნა, სარედაქციო დამოუკიდებლობის, სტრუქტურული ერთეულების მსხვრევა და პრიორიტეტების შეუსრულებლობა - ეს ნაწილია იმ პრობლემებისა, რის გამოც, აჭარის ტელევიზიისა და რადიოს მრჩეველთა საბჭოს წევრმა გია ქარცივაძემ საბჭოს დირექტორის იმპიჩმენტის პროცედურის დაწყების განცხადებით მიმართა.

მაუწყებლობის შესახებ კანონის მიხედვით, მაუწყებლის დირექტორის იმპიჩმენტის დასაწყებად, მრჩეველთა საბჭოს ხუთი წევრიდან მინიმუმ ორი წევრის მოთხოვნაა საჭირო. გია ქარცივაძე “მედიაჩეკერთან” ამბობს, რომ ახლა მაუწყებელში იმდენად მძიმე მდგომარეობაა, რომ გადაწყვიტა საბჭოსთვის ინდივიდუალურად მიემართა, იმ იმედით, რომ სხვა მრჩევლებიც შეუერთდებოდნენ.

“თითქმის ყველა კვარტალური ანგარიშის მოსმენის შემდეგ მქონდა მცდელობა, რომ მიმემართა საბჭოსთვის, მაგრამ მხოლოდ ერთი მრჩევლის მიმართვა საკმარისი არ იქნებოდა პროცედურების დასაწყებად. თუმცა, ახლა იმდენად დამძიმდა სიტუაცია, რომ ვიმედოვნებდი სხვა მრჩევლებიც შემომიერთდებოდნენ. ეს ნამდვილად არ გადამიწყვეტია ახლა, ამ კვირაში, აქამდეც მქონდა მცდელობა, მაგრამ სხვა მრჩევლების თანხმობა არ მქონდა. ახლა გადავწყვიტე ინდივიდუალურად მიმემართა, თუ ვინმე შემომიერთდებოდა და დაინახავდა იგივეს, რასაც მე ვხედავდი, ამ პროცესს მსვლელობა მიეცემოდა - ამ განწყობით შევიტანე მე”.

ქარცივაძის გადაწყვეტილებას მოგვიანებით შეუერთდება საბჭოს მეორე წევრი - თამარ წილოსანი. გადაწყვეტილების მისაღებად მას რამდენიმედღიანი ფიქრი დასჭირდა. დღეს მან სოციალურ ქსელში დაწერა, რომ გადაწყვეტილება მიიღო და ამ გადაწყვეტილებაზე შორენა ღლონტის გათავისუფლებამ იქონია გავლენა. მანამდე ის ამბობდა, რომ გარკვეულ კონსულტაციებს გადიოდა.

“აჭარის ტელევიზიაში ჟურნალისტების დაუსაბუთებელი გათავისუფლების, მედიაციის პროცესის შეწყვეტისა და ხელშეკრულებების ცალმხრივად შეცვლის გამო მივიღე გადაწყვეტილება, რომ მივმართო მრჩეველთა საბჭოს უნდობლობის პროცედურების დაწყების შესახებ. პროცედურების დაცვით 2 წევრის ერთობლივი წერილობითი მოთხოვნა სხდომის დანიშვნის შესახებ ორშაბათს შევა მრჩეველთა საბჭოში. კულმინაცია იყო შორენა ღლონტის უკვე მეორეჯერ გათავისუფლება”, - წერს თამარ წილოსანი.



მეტი დეტალის გასარკვევად, რატომ დასჭირდა თამარ წილოსანს ამ გადაწყვეტილების მისაღებად ამდენი დრო და რატომ არ მიმართა დღესვე, ”მედიაჩეკერი” დღეს მთელი დღის განმავლობაში ცდილობდა მასთან დაკავშირებას. თავდაპირველად იგი ჩვენს ზარებს არ პასუხობდა, მოგვიანებით კი ტელეფონი გამორთო.

გია ქარცივაძის თქმით, მან ამ განცხადების შემდეგ თამარ წილოსანს შესთავაზა, რომ დღესვე მოაწერდა ხელს ტექსტზე და დღეს შეეტანათ განცხადება, თუმცა, მან უპასუხა, რომ დოკუმენტზე შაბათ-კვირას უნდა იმუშაოს და სრულყოფილი ტექსტი საბჭოში შესატანად ორშაბათს ექნება.

ბორდის წევრების გარდა, უკვე მერვე დღეა, დირექტორის იმპიჩმენტისა და გათავისუფლებული ჟურნალისტების დაბრუნების მოთხოვნით, ტელევიზიის წინ შიმშილობს მოძრაობა “მე მიყვარს ბათუმის” ერთ-ერთი წევრი, ალექსანდრე მილორავა.

“მივმართავთ აჭარის საზოგადოებრივი მაუწყებლის ბორდს, დააყენოს დირექტორის იმპიჩმენტის საკითხი და გადააყენოს ის დაკავებული თანამდებობიდან. ამ მოთხოვნით მე დღეიდან ვიწყებ შიმშილობას და აქვე მინდა აღვნიშნო, რომ აუცილებლად უნდა დაბრუნდეს ყველა ის ჟურნალისტი, რომელიც გათავისუფლდა კოხრეიძის დირექტორად დანიშვნის შემდეგ”,- განაცხადა მან 29 მაისს, შიმშილობის დაწყების პირველ დღეს, აჭარის ტელევიზიასთან საუბრისას.

პარალელურად, დღეს, საზოგადოებრივი მოძრაობა “მე მიყვარს ბათუმის” ორგანიზებით, მაუწყებლის წინ აქცია გაიმართა, სადაც აჭარის ტელევიზიიდან კრიტიკული ჟურნალისტების რედაქციიდან ჩამოშორება გააპროტესტეს.

ამ მოვლენების პარალელურად, უკვე არაერთი საერთაშორისო და ადგილობირივ ორგანიზაციების განცხადება იძებნება, რომელთა მთავარი აქცენტი არის ის, რომ მაუწყებელზე პოლიტიკური ზეწოლა მიმდინარეობს. ბოლო ასეთი გამოხმაურება საერთაშორისო ორგანიზაციების მხრიდან იყო ორგანიზაციის “რეპორტიორები საზღვრებს გარეშე” განცხადება 14 მაისს, მას შემდეგ, რაც მაუწყებლიდან ალტერნატიული პროფკავშირების თავმჯდომარე და გადაცემა “ჰეშთეგის” წამყვანი მალხაზ რეხვიაშვილი გაათავისუფლეს. ადგილობრივმა ორგანიზაციებმა კი, უფრო კონკრეტულად, “კოალიციამ მედიის თავისუფლებისთვის” ბოლო განცხადება გუშინ, 4 ივნისს გაავრცელა, მას შემდეგ, რაც მაუწყებლიდან შორენა ღლონტიც გაუშვეს. ამ განცხაებაში კოალიციამ კიდევ ერთხელ გაუსვა ხაზი იმას, რომ “აჭარის საზოგადოებრივი მაუწყებლის ირგვლივ განვითარებული მოვლენები კვლავაც კრიტიკულია და საზოგადოების ყურადღების მიღმა არ უნდა დარჩეს”.

ამ ყველაფრის ფონზე, დღეს, 5 ივნისს, აჭარის მაუწყებლის ადმინისტრაციამ აქციის მონაწილეებისა და მოშიმშილეების დისკრედიტაცია მათი პოლიტიკური აფილაციების ძებნით სცადა.

"ადგილი აქვს მოშიმშილეებისა და აქციის მონაწილეების მხრიდან პოლიტიკურ დაკვეთებს და ჩარევას მაუწყებლის ფუნქციებში. ზეწოლას თანამშრომლებზე და მთლიანად მაუწყებელზე", - ეს არის ამონარიდი საგანგებო განცხადებიდან, რომელიც დღეს აჭარის მაუწყებლის ადმინისტრაციის სახელით, აჭარის ტელევიზიისა და რადიოს საკადრო ბაზის განვითარების უფროსის მოვალეობის შემსრულებელმა ემზარ პაქსაძემ პრესკონფერენციაზე გაახმოვანა.

თუ თამარ წილოსანი გადაწყვეტილებას აღარ შეცვლის და ორშაბათს განცხადებას შეიტანს, საბჭომ იმპიჩმენტის საკითხის განხილვა უნდა დაიწყოს. “მედიაჩეკერი” ბორდის თავმჯდომარესთან გიგა ჩხარტიშვილთან დაკავშირებას ცდილობდა, თუმცა ჩვენს სატელეფონო ზარებს არც მან უპასუხა. ერთ-ერთმა მრჩეველმა თამილა დოლიძემ კი დღეს აჭარის ტელევიზიასთან საუბარში განაცხადა, რომ მან, გიგა ჩხარტიშვილმა და სოსო სტურუამ იმსჯელეს და ისინი დირექტორის იმპიჩმენტს მხარს არ დაუჭერენ:

“შედგა კომუნიკაცია მრჩეველთა საბჭოს სამ წევრთს შორის - გიგა ჩხარტიშვილს, სოსო სტურუასა და ჩემ შორის და მინდა საზოგადოებას და ასევე მოშიმშილეებს ვუთხრა, რომ იმპიჩმენტის საკითხი შემოვა თუ არ შემოვა, მას ჩვენგან მხარდაჭერა არ ექნება. არ შედგება იმპიჩმენტი გიორგი კოხრეიძის, ვინაიდან სამი მხარდამჭერი არ ეყოლება ამ პროცესს”, - განაცხადა თამილა დოლიძემ.

თუ ორშაბათს მრჩეველთა საბჭოში წილოსანის განცხადება შევა, საბჭოს გიორგი კოხრეიძისთვის უნდობლობის გამოცხადებაზე გადაწყვეტილების მისაღებად 10 დღის ვადა ექნება. მაუწყებლობის შესახებ კანონის მიხედვით, მრჩეველთა საბჭო ვალდებულია უნდობლობის გამოცხადების შესახებ წინადადება განიხილოს და მას კენჭი უყაროს წინადადების წარდგენიდან 10 კალენდარული დღის ვადაში. დირექტორი კი უფლებამოსილია დაესწროს საკითხის განხილვას და წარადგინოს თავისი მოსაზრება.

გია ქარცივაძეს ფიქრობს, რომ ეს პროცედურა გიორგი კოხრეიძის იმპიჩმენტით არ დასრულდება, თუმცა, იმედს იტოვებს, რომ მაუწყებელში მიმდინარე მოვლენების კიდევ ერთხელ გაცხადება სხვა მრჩევლებზეც მოახდენს გავლენას.

“სიმართლე რომ გითხრათ, მოლოდინი არ მაქვს, რომ შედეგით დასრულდება ეს პროცედურა. მაგრამ, კიდევ ერთი მცდელობა მექნება და კიდევ ერთხელ გაცხადდება რა ხდება მაუწყებელში, ვფიქრობ, რომ რაღაცნაირად, ეს გავლენას მოახდენს სხვა მრჩევლებზე და დაინახავენ იმას, რისი დანახვაც, სამწუხაროდ, არ სურთ. შეიძლება, გადაწყვეტილებაც მიიღონ, ფარული კენჭისყრაა და ყველაფერი მოსალოდნელია”, - ამბობს გია ქარცივაძე.

კანონის მიხედვით, იმ შემთხვევაში, თუ მრჩეველთა საბჭომ უნდობლობა არ გამოუცხადა დირექტორს, მისთვის უნდობლობის გამოცხადების საკითხის დასმა მომდევნო 2 თვის განმავლობაში დაუშვებელია.

"ადგილი აქვს მოშიმშილეებისა და აქციის მონაწილეების მხრიდან პოლიტიკურ დაკვეთებს და ჩარევას მაუწყებლის ფუნქციებში. ზეწოლას თანამშრომლებზე და მთლიანად მაუწყებელზე", - ეს არის ამონარიდი საგანგებო განცხადებიდან, რომელიც დღეს, 5 ივნისს, აჭარის მაუწყებლის ადმინისტრაციის სახელით, აჭარის ტელევიზიისა და რადიოს საკადრო ბაზის განვითარების უფროსის მოვალეობის შემსრულებელმა ემზარ პაქსაძემ პრესკონფერენციაზე გაახმოვანა. 

 ადმინისტრაციამ ამ განცხადებით სცადა პირები, ვინც ტელევიზიის წინ დირექტორის იმპიჩმენტის მოთხოვნით შიმშილობენ, პოლიტიკური ინტერესების გატარებაში დაედანაშაულებინა. 

"ბოლო დღეებში ხშირია კანონმდებლობის დარღვევა და ადგილი აქვს მოშიმშილეებისა და აქციის მონაწილეების მხრიდან პოლიტიკურ დაკვეთებს და ჩარევას მაუწყებლის ფუნქციებში. ზეწოლას თანამშრომლებზე და მთლიანად მაუწყებელზე, რაც კანონმდებლობით აკრძალულია.

საზოგადოების ყურადღება გვინდა გავამახვილოთ იმ გარემოებაზე, რომ დღეს ის პირები, რომლებიც მოცემულ შემთხვევაში წარმოგვიდგნენ, როგორც ნეიტრალური ადამიანები, რომლებსაც უყვართ აჭარა, რომლებსაც თითქოს აინტერესებთ აჭარის საზოგადოებრივი მაუწყებლის მომავალი, ახორციელებენ პოლიტიკურ დაკვეთებს.

აქციაში მონაწილე ორივე პირი იყო მაჟორიტარობის კანდიდატი, აქვთ პოლიტიკური განაცხადები, შეწირულობები პარტიისათვის და რაც მთავარია ეს პირები ახორციელებენ პოლიტიკურ ზეწოლას მაუწყებელზე.

გვინდა ჩვენი თანამშრომლების სახელით კიდევ ერთხელ მივმართო საზოგადოებას, ამ პროცესებში უკანონოდ ჩართულ პირებს, რომ თავიანთი პოლიტიკური მიზნების განსახორციელებლად ნუ გამოიყენებენ საზოგადოებრივ მაუწყებელს და ნუ განახორციელებენ ზეწოლას ჩვენს თანამშრომლებზე.

მოშიმშილე პირი, ალექსანდრე მილორავა და შოთა ცაავა კენჭს იყრიდნენ სხვადასხვა პერიოდებში. ალექსანდრე მილორავამ “ევროპულ საქართველოს” 2017 წლის არჩევნებზე თანხა შესწირა.

როცა ჩვენს თანამშრომლებს “ჩამოსულებს” ეძახდნენ, თვითონ ალექსანდრე მილორავა თბილისშია რეგისტრირებული.

ასეთ კომენტარებს პოლიტიკური მომავლის პირები არ უნდა აკეთებდნენ. ეს პირები განმარტავდნენ, რომ ისინი იყვნენ ნეიტრალურები. გვინდა საზოგადოებას ვაცნობოთ, რომ კონკრეტულ პოლიტიკურ ძალასთან დაკავშირებული პირები ახორციელებენ ზეწოლას ჩვენ მიმართ, ორგანიზაციაზე, საზოგადოებრივ მაუწყებელზე”,  – განაცხადა ემზარ პაქსაძემ.

შეგახსენებთ, რომ აჭარის ტელევიზიის დირექტორის, გიორგი კოხრეიძის გადადგომის მოთხოვნით, საზოგადოებრივი მოძრაობა „მე მიყვარს ბათუმის“ აქტივისტმა, ალექსანდრე მილორავამ შიმშილობა დაიწყო. მან 29 მაისს მაუწყებლის წინ კარავი გაშალა და განაცხადა, რომ მხოლოდ მოთხოვნის დაკმაყოფილების შემთხვევაში შეწყვეტს შიმშილობას.

“მივმართავთ აჭარის საზოგადოებრივი მაუწყებლის ბორდს, დააყენოს დირექტორის იმპიჩმენტის საკითხი და გადააყენოს ის დაკავებული თანამდებობიდან”,- განაცხადა მან აჭარის ტელევიზიასთან საუბრისას.იგი ასევე ითხოვს, რომ ტელევიზიაში დაბრუნდეს ყველა ჟურნალისტი, ვინც კოხრეიძის დირექტორად დანიშვნის შემდეგ გათავისუფლდა. 

ალექსანდრე მილორავა, რომელიც აჭარის ტელევიზიის წინ დირექტორის იმპიჩმენტის მოთხოვნით მერვე დღეა შემშილობს, აცხადებს, რომ 2017 წლის თვითმმართველობის არჩევნებში მართლაც მონაწილეობდა „ევროპული საქარველოს“ მაჟორიტარობის კანდიდატად და პარტიისთვის ჰქონდა შეწირული 1000 ლარი, თუმცა ამჟამად მას რაიმე კავშირი პარტიასთან არ აქვს.

დირექტორის იმპიჩმენტის საკითხი ბოლო დღეებია საზოგადოებაში აქტიურად განიხილება. იმპიჩმენტის მოთხოვნით მრჩეველთა საბჭოს უკვე მიმართა ბორდის ერთ-ერთმა წევრმა გია ქარცივაძემ. 

დღეს აჭარის ტელევიზიასთან აქციაც გაიმართება, სადაც აჭარის ტელევიზიიდან კრიტიკული ჟურნალისტების რედაქციიდან ჩამოშორებას გააპროტესტებენ. აქციის ორგანიზატორია საზოგადოებრივი მოძრაობა „მე მიყვარს ბათუმი“.

"კოალიცია მედიის ადვოკატირებისათვის" მიიჩნევს, რომ აჭარის საზოგადოებრივი მაუწყებლის ირგვლივ განვითარებული მოვლენები კვლავაც კრიტიკულია და საზოგადოების ყურადღების მიღმა არ უნდა დარჩეს.

კოალიციის განცხადებაში, რომელიც დღეს, 4 ივნისს გავრცელდა, ხაზგასმულია, რომ კოალიციის წევრმა ორგანიზაციებმა არაერთხელ გაავრცელეს განცხადება, რადგან აჭარის მაუწყებელი, ერთის მხრივ, თავს არიდებს კანონით დაკისრებული ვალდებულებების შესრულებას და მეორეს მხრივ, ხდება ადამიანების დევნა და შევიწროება განსხვავებული აზრის გამო.

ამავე განცხადების მიხედვით, ორგანიზაციაში მიმდინარე პროცესები უარყოფითად შეაფასეს შიდა და საერთაშორისო ექსპერტებმა. ამასთან, აჭარის მაუწყებლის ჟურნალისტების მხარდამჭერი / სოლიდარობის აქციის მონაწილეები გახდნენ ტელემაუწყებლები, ონლაინ მაუწყებლები და სამოქალაქო სექტორი.

"დღეისათვის აჭარის მაუწყებლის წინ შიმშილობის აქციის მეშვიდე დღეა, ასევე დევნისა და შევიწროების მსხვერპლი გახდა ახალი ამბების სამსახურის უფროსი შორენა ღლონტი, რომელიც დღეს სამსახურიდან გაათავისუფლეს კიდეც. 

ამ და სხვა მოვლენებზე პასუხისმგებლობა აჭარის მაუწყებლის ხელმძღვანელ ორგანოებს დირექტორსა და მრჩეველთა საბჭოს ეკისრება", - ვკითხულობთ კოალიციის განცხადებაში.

კოალიცია განცხადებაში ასევე ხაზს უსვამს, რომ საქართველოს კონსტიტუცია და კანონი „მაუწყებლობის შესახებ“ არის ჩარჩო საზოგადოებრივი მაუწყებლის თავისუფლების და დამოუკიდებლობის უზრუნველსაყოფად.

კოალიცია “მედიის ადვოკატირებისთვის” მიიჩნევს, რომ აჭარის საზოგადოებრივი მაუწყებლის ირგვლივ განვითარებული მოვლენები კვლავაც კრიტიკულია და არ უნდა დარჩეს საზოგადოების ყურადღების მიღმა.

საქართველოს საზოგადოებრივი მაუწყებელი შესყიდვების შესახებ ინფორმაციას, რომელსაც ამ დრომდე არ გასცემდა, ვეღარ გაასაიდუმლოებს. შესყიდვებთან დაკავშირებული ინფორმაციის გაცემა მაუწყებელს თბილისის სააპელაციო სასამართლომ დაავალდებულა.

სააპელაციო სასამართლოს საქართველოს ახალგაზრდა იურისტთა ასოციაციამ მას შემდეგ მიმართა, როცა მაუწყებლისგან ინფორმაციის მიღება ვერ შეძლო, მათ შორის, სარეკლამო მომსახურებების შესახებ. თბილისის სააპელაციო სასამართლომ ნაწილობრივ დააკმაყოფილა საიას სააპელაციო საჩივარი და საზოგადოებრივ მაუწყებელს დაევალა სახელმწიფო შესყიდვის ფარგლებში 10 არარეზიდენტ პირთან გაფორმებული ხელშეკრულების (თითოეულზე თანხის მითითებით) გადმოცემა.

საიას განცხადების მიხედვით, თბილისის სააპელაციო სასამართლომ განმარტა, რომ „სახელმწიფო შესყიდვების შესახებ“ და „მაუწყებლობის შესახებ“ კანონები გამორიცხავენ საზოგადოებრივი მაუწყებლის მიერ ტელე-, რადიო-, ასევე ვებგვერდებისა და სოციალური ქსელისთვის განკუთვნილი პროდუქციის ან/და მის შესაქმნელად საჭირო მომსახურების შესყიდვაზე სახელმწიფო შესყიდვების კანონმდებლობის გავრცელებას, მაგრამ ეს არ გულისხმობს სახელმწიფო დაფინანსების ფარგლებში განხორციელებული შესყიდვების ამსახველი ხელშეკრულებების საჯაროობის გამორიცხვას და საჯარო ინფორმაციის გაცემის ვალდებულება მაინც არსებობს.

როგორც საიაში განმარტავენ, „სააპელაციო სასამართლომ ასევე განმარტა, რომ საჯარო ინფორმაციის გაცემის მიზნებისთვის, მხოლოდ მხარეთა შეთანხმება ხელშეკრულების კონფიდენციალურად მიჩნევის თაობაზე, ვერ აქცევს მას კომერციულ საიდუმლოებად. დამატებით, საჭიროა, საზოგადოებრივმა მაუწყებელმა მიიღოს გადაწყვეტილება ხელშეკრულების კომერციულ საიდუმლოებად მიჩნევის მიზანშეწონილობის თაობაზე. მოცემულ შემთხვევაში კი აღნიშნულთან დაკავშირებით, საზოგადოებრივ მაუწყებელს წარმოება არ ჩაუტარებია და შესაბამისი გადაწყვეტილება არ მიუღია, რის გამოც, ეს ინფორმაცია ვერ მიიჩნევა კომერციულ საიდუმლოებად“.

საიას განცხადებით, მოცემული დავა სასამართლოში, ერთ წელზე მეტია, გრძელდება და ამ დროის განმავლობაში საზოგადოებრივი მაუწყებელი ამ ინფორმაციას დაინტერესებული პირებისთვის არ ასაჯაროებს.

"თბილისის სააპელაციო სასამართლოს გადაწყვეტილება არ შესულა კანონიერ ძალაში და ის შეიძლება, კანონით დადგენილი წესით გასაჩივრდეს საქართველოს უზენაეს სასამართლოში", - აცხადებენ საიაში.