„საქართველოს ახალგაზრდა იურისტთა ასოციაციამ“, „სტუდია მონიტორმა“, „საქართველოს ამბებმა” და მათმა ხელმძღვანელებმა 15 მაისს, საკონსტიტიციო სასამართლოში წარადგინეს სარჩელი, რომლითაც „უცხოეთის აგენტების რეგისტრაციის აქტის“ გაუქმება და დავის დასრულებამდე კანონის შესაბამისი მუხლების მოქმედების შეჩერებაა მოთხოვნილი. 

„ქართულმა ოცნებამ” 1 აპრილს მიიღო „უცხოეთის აგენტების რეგისტრაციის აქტი“, რომელსაც ამერიკული FARA-ს სიტყვასიტყვით ნათარგმნს უწოდებენ. მოსარჩელეების განცხადებით, ე.წ. FARA საქართველოს კონსტიტუციას არღვევს და მიზნად ისახავს დამოუკიდებელი სამოქალაქო საზოგადოების ორგანიზაციებისა და მედიების გაჩუმებას, დისკრედიტაციასა და დევნას, მათ შორის, სისხლისსამართლებრივი პასუხისმგებლობის დაკისრების გზით. 

„„ქართული ოცნება“ ამ კანონს ამერიკული FARA-ს („Foreign Agents Registration Act“) ანალოგად მიიჩნევს, თუმცა, სინამდვილეში ამერიკული FARA 1938 წელს მიღებული კანონია, რომელიც, ისტორიული კონტექსტის გათვალისწინებით, ამერიკის შეერთებული შტატების იუსტიციის დეპარტამენტისა და დამოუკიდებელი სასამართლოების განმარტებების შესაბამისად, მიზნად ისახავს არა დამოუკიდებელი საზოგადოებრივი და მედია ორგანიზაციების შეზღუდვას, არამედ მტრულად განწყობილი უცხო ქვეყნის ძალების აგენტების საქმიანობის გამოაშკარავებას. ამასთან, აღნიშნული რეგულირება მიემართება ისეთ შემთხვევებს, როდესაც უცხოეთიდან დაფინანსებული პირები ავტონომიურად არ მოქმედებენ და სრულად ექვემდებარებიან პრინციპალის მითითებებს“.

ორგანიზაცია განმარტავს, რომ მნიშვნელოვანია, ქართულმა საზოგადოებამ იცოდეს, რომ კანონმდებლობის რეალური შინაარსი არ განისაზღვრება მხოლოდ მისი ტექსტით, ხოლო სხვა ქვეყნებში მოქმედი კანონმდებლობის პირდაპირ გადმოტანა მის იდენტურ ფუნქციონირებას ვერ უზრუნველყოფს.

„სამართლებრივი ნორმა, რომელსაც შეიძლება ჰქონდეს ერთი და იგივე ფორმულირება, სხვადასხვა იურისდიქციასა და სხვადასხვა დროში, შესაძლოა, სრულიად განსხვავებულ შედეგებს იწვევდეს, რაც განპირობებულია სამართლებრივი სისტემის სტრუქტურით, პოლიტიკური გარემოთი და ინსტიტუციური მექანიზმებით. 

ამერიკის შეერთებული შტატები საქართველოსაგან განსხვავებით წარმოადგენს საერთო სამართლის ქვეყანას. საერთო სამართლის ქვეყნებს ახასიათებს ფართოდ ფორმულირებული ტერმინები, ვინაიდან ამ სამართლებრივ სისტემაში სამართალია ის, რასაც სასამართლო დაადგენს (Marbury v. Madison, 5 U.S. 137 (1803). კონტინენტური სამართლის ქვეყნებში, როგორიც საქართველოა, თავად კანონის ტექსტი უნდა იძლეოდეს სამართლებრივი ვალდებულების დადგენის შესაძლებლობას. ჩვენი სისტემა ფუნდამენტურად გამორიცხავს იმგვარი ზოგადი ნორმის მიღების შესაძლებლობას, სადაც კანონმდებლის ფუნქციას მოსამართლე კისრულობს. ეს განსაკუთრებით ეხება იმ ნორმებს, რომლითაც სისხლისსამართლებრივი პასუხისმგებლობის დადგენა ხდება. შესაბამისად, როდესაც ჩვენს სისტემაში ხდება საერთო-სამართლის ინსტიტუტების გადმოღება, არ არის საკმარისი საერთო სამართლის ქვეყნის კანონის თარგმნა. აუცილებელია მხედველობაში იქნეს მიღებული საერთო სამართლის ქვეყნის სასამართლო პრაქტიკა. აშშ-ს სასამართლო პრაქტიკის თანახმად, დონორისაგან დაფინანსების მიღების ფაქტი, თავისთავად, არ აქცევს მის მიმღებს დონორის მითითების ან კონტროლის ქვეშ მყოფ სუბიექტად. ასეთ შემთხვევაში სუბსიდიის მიმღებს არ მოეთხოვება დონორის აგენტად რეგისტრაცია. კორპორაციები, რომლებიც იღებენ უცხოელი პრინციპალებისაგან ფინანსურ დახმარებას, ისე რომ არ ექვემდებარებიან უცხოური პრინციპალის კონტროლს, არ არიან აგენტები FARA-ს მიზნებისათვის“. 

წარდგენილ საკონსტიტუციო სარჩელში დასაბუთებულია, რომ ბუნდოვანი ნორმების პარალელურად, კანონის აღმსარულებელ სუბიექტებს (ანტიკორუფციული ბიურო, პროკურატურა, სასამართლო) მინიჭებული აქვთ დაუბალანსებელი უფლებამოსილებები, რაც კანონის თვითნებური გამოყენების რისკებს ზრდის. 

„ასეთ რეალობაში, განსაკუთრებით მაშინ, როდესაც ,,ქართული ოცნება” სრულად აკონტროლებს ანტიკორუფციულ ბიუროს, სასამართლოსა და პროკურატურას, არსებობს რეალური საფრთხე, რომ FARA-ს ყოველგვარი ფაქტობრივი და სამართლებრივი წინაპირობების არარსებობის მიუხედავად, გამოიყენებს დამოუკიდებელი სამოქალაქო ორგანიზაციებისა და მედიების წინააღმდეგ, რომლებიც ეხმარებიან საზოგადოების სხვადასხვა დაჩაგრულ ჯგუფს, ეწინააღმდეგენიან სისტემურ წამებას, ამხელენ ,,ქართული ოცნების” ანტი-ევროპულ კურსს, კორუფციულ გარიგებებს, აშუქებენ მიმდინარე პოლიტიკურ მოვლენებს, ადამიანის უფლებათა დამაზიანებელ პრაქტიკებს და სხვა“.

მოსარჩელეები მიიჩნევენ, რომ ,,ქართული ოცნების” ფარას დებულებები იმდენად ბუნდოვანია, რომ ქმნის რეალურ საფრთხეს, ის დამოუკიდებელი ორგანიზაციებისა და ფიზიკური პირების გასაჩუმებლად და დასასჯელად გამოიყენონ. 

„ამას ადასტურებს ის ფართო ინტერპრეტაციებიც, რომლებიც ამ კანონთან მიმართებით ბოლო ორი დღის განმავლობაში ანტიკორუფციული ბიუროს ხელმძღვანელმა გააკეთა. იმისათვის, რომ თავიდან იქნეს აცილებული კანონის ამოქმედებიდან წარმოშობილი მყისიერი და გამოუსწორებელი ზიანი, საკონსტიტუციო სასამართლო ვალდებულია შეაჩეროს გასაჩივრებული ნორმები“. 

სარჩელის ავტორებს არ გვაქვს მოლოდინი, რომ საკონსტიტუციო სასამართლო  სწრაფად და კონსტიტუციის შესაბამისად იმოქმედებს, თუმცა, მიიჩნევენ, რომ კონსტიტუციით მონიჭებული უფლებების დასაცავად სამართლებრივი ბრძოლის ყველა ფორმა უნდა გამოიყენონ. 

დამატებით იხილეთ „მედიაჩეკერის“ მასალები:

FARA სამოქალაქო და მედია ორგანიზაციებზე არ ვრცელდება - SJC 

„არალეგიტიმური მთავრობა ქართველი ხალხის დევნის აქტს იღებს,“ - სამოქალაქო საზოგადოების განცხადება

თიკო ზაზაძე 10 წელზე მეტია „სამხრეთის კარიბჭეში“ მუშაობს. Sknews.ge დამოუკიდებელი მედიასაშუალებაა სამცხე-ჯავახეთიდან. მისი რედაქტორი „მედიაჩეკერს“ უყვება, რომ წლების განმავლობაში იყო დაშინების მცდელობები, წინააღმდეგობა, თუმცა ინფორმაციის მოპოვების თვალსაზრისით ასეთი რთული ვითარება რედაქციას აქამდე არასდროს ჰქონია.

„ინტერვიუ მერთან, გუბერნატორთან, საკრებულოს თავმჯდომარესთან დიდი ხანია არ გვქონია. ჩვენ შევეცადეთ, რომ ეს ინფორმაციები უკვე საჯარო ინფორმაციის გამოთხოვის გზით მიგვეღო, თუმცა ესეც შეგვეზღუდა. არც 10-დღიან და არც ერთთვიან პერიოდში ინფორმაციას არ გვაწვდიან. თუ არის გამონაკლისი შემთხვევები, როდესაც მუნიციპალიტეტი ინფორმაციას გვაწვდის, ის არის ისეთი მცირე, არასრული, რომ იქიდან ძალიან ძნელია მაყურებელს ამომწურავი ინფორმაცია მიაწოდო“.

ზაზაძის თქმით, ჟურნალისტებს არ უშვებენ თითქმის არცერთ საჯარო შეხვედრაზე. რეგიონში ჩამოსული მინისტრების, ელჩებისა და სხვა ქვეყნის დიპლომატების შესახებ კი მხოლოდ ახალციხის მერიის მიერ სოციალურ ქსელში გავრცელებული „ძალიან მწირი და მშრალი ინფორმაციით“ იგებენ.

„იცით, როგორ ვცდილობთ მივიღოთ ინფორმაცია? - აი, შემთხვევით ვინმეს თუ  სადმე შევხვდებით. მაგალითად, საკრებულოს სხდომებზე, თუმცა ბოლო 2-3 წელია საკრებულოს თავმჯდომარისგან არცერთ მნიშვნელოვან ინფორმაციაზე ინტერვიუ, კომენტარი აღარ მიგვიღია“, - ამბობს Sknews.ge-ს რედაქტორი და ამატებს, რომ რადგან ინფორმაციას ფაქტობრივად ვერცერთი საჯარო უწყებიდან ვერ იღებენ, მას შესაბამისად ვერც მსმენელებსა და მკითხველებს აწვდიან.

„“ქართულმა ოცნებამ“ ძალიან დიდი ხნის წინ გათვალა, თავიდანვე დაიწყო ჩვენთვის ინფორმაციის შეზღუდვა. ამ რეპრესიულმა კანონებმა კი ფაქტობრივად ისეთ მდგომარეობაში დაგვტოვა, რომ შეუძლებელიც კია მუშაობა“.

TOK2Region-ი სამცხე–ჯავახეთში მოქმედი კიდევ ერთი დამოუკიდებელი მედიაა. მისი ჟურნალისტი, ინგა ირიციანი „მედიაჩეკერს“ უყვება, რომ ახლადდანიშნულმა გუბერნატორმა, ზაალ გელაშვილმა კოლეგების ტელეფონის ნომრებიც კი დაბლოკა, მედიისთვის დახურული აღმოჩნდა მისი წარდგენის ღონისძიებაც. 

„გვიჭირს საჯარო ინფორმაციაზე პასუხების მიღება. ამას თან ერთვის ხელშეშლა საჯარო მოხელეების მხრიდან. ახლადდანიშნულმა გუბერნატორმა, რომელიც ჯერ კიდევ არ იყო ოფიციალურად წარდგენილი, ჩვენი სამი ჟურნალისტის ნომერი დაბლოკა, რამდენიმე დღეში კი განბლოკა. მოგვიანებით გუბერნატორმა ჩვენი ტელევიზია წარდგენაზე დაპატიჟა და კითხვებზე პასუხის გაცემას დაჰპირდა, თუმცა მეორე დღეს გადამღები ჯგუფი ადგილზე არ შეუშვეს“. 

ინგა ირიციანის თქმით, რეგიონული ტელევიზიებისთვის მუშაობა წლებია რთულია, მაგრამ ის, რაც ბოლო პერიოდში ხდება მედიასაშუალებების არსებობას უქმნის საფრთხეს, დამოუკიდებელი მედიების გაქრობა კი რეგიონებიდან ხმების სრულად ჩახშობას გამოიწვევს: „აღარ გაჟღერდება ადგილობრივების პრობლემები, მათი საჭიროებები და ხალხის სათქმელი“.

საჯარო ინფორმაციას ვერ იღებს Qartli.ge-ც. შიდა ქართლში მოქმედი ონლაინ გამოცემის დამფუძნებლისა და ჟურნალისტის, საბა წიწიკაშვილის თქმით, მათთვის საჯარო სხდომების გამართვის თარიღებიც უცნობია.

„4 წერილი გავაგზავნეთ კასპის მერიაში და პასუხი არცერთზე არ მიგვიღია. როცა ვეკითხები, პასუხს რატომ არ მცემთ-მეთქი, მაგაზეც არ მცემენ პასუხს. რაც შეეხება სხდომებს, ვერ ვიგებთ როდის ტარდება. მაგალითად, ქარელის მერიას მივწერე, რომ სხდომის მასალები მოეწოდებინათ და გაუკვირდათ, რატომ ვითხოვდით და რა სხდომის მასალებს ვითხოვდით, არ მომცეს ინფორმაცია. 

ხაშურში ცოტა უკეთესი მდგომარეობაა, იმიტომ რომ ბრძანებებსა და განკარგულებებს მაინც აქვეყნებენ და იმ ინფორმაციის გამოთხოვა მაინც არ გვიწევს, რაც სხვა მუნიციპალიტეტების შემთხვევაში“. 

საბა წიწიკაშვილი ამბობს, რომ მათთვის პრობლემაა რესპოდენტების ჩაწერაც, რადგან „მოსახლეობა დაშინებულია“. 

„გორსა და ქარელში უფრო მეტად შიშია. აი, მაგალითად, ერთ-ერთ სოფელში 3 წელია წყალი არ აქვთ. 3 ჭაბურღილი ამოთხარეს და არცერთმა არ გაამართლა. წარმოიდგინეთ, ელემენტარული ამბავია. ამ სამი წლის განმავლობაში როგორ ვერ ახერხებენ წლის მიწოდებას, როგორ არიან უწყლოდ - ამაზე მინდოდა ადგილობრივები ჩამეწერა, მაგრამ არაო, გადაგვასახლებენო. ჩვეულებრივ მესაუბრნენ, მაგრამ ჩაწერაზე უარი მითხრეს“. 

წიწიკაშვილი იხსენებს, რომ ფრაზით - „არავის არ დაუპატიჟებიხარ, რატომ მოხვედი“, მას კასპის მერმა ერთ-ერთი სოფლის კრების დატოვებაც კი მოსთხოვა.

„კრებაზე სულ 5 კაცი იყო, პატარა სოფელია და იმათმაც თქვეს, რომ კრების გადაღება არ გვინდაო. კრებაზე უნდა დაფიქსირებულიყო, ვინ მიიღო გადაწყვეტილება, რამდენმა ადამიანმა დაუჭირა მხარი. ეს არავის ნება-სურვილზე არ არის დამოკიდებული და უნდა დავაფიქსირო, ხმათა უმრავლესობით გადაწყდება ეს საკითხი თუ არა-მეთქი. მერე კიდევ სხვა ადამიანები გამოჩნდნენ და რაღაცნაირად გადავრჩი, რომ ამ გადაღებიდან არ გამოვეშვით. რაღაცას თუ მათთვის კრიტიკულად გააშუქებ, მერე იწყება შურისძიება. არ გადაგაღებინებენ სოფლის კრებას, ვიღაცებს მოგიქსევენ, ხელს შეაშლევინებენ და ა.შ.“

ადგილობრივ ხელისუფლებასთან კომუნიკაცია უჭირს „რადიო მარნეულსაც“. 

„სრული იზოლაცია, ჩაკეტილობა - ასეთ ვითარებაში გვიწევს მუშაობა. მარნეულის მერს მე-4 წელია ჩვენთან ურთიერთობა არ აქვს. ჩვენს ზარებს არ პასუხობს, როცა მის ჩასაწერად მივდივართ, ის უბრალოდ გაგვირბის, საერთოდ არ უნდა საუბარი. საკმაოდ რთულია იმუშაო და მოსახლეობას სრული ინფორმაცია მიაწოდო, როცა ადგილობრივი თვითმმართველობა დუმს და ამბობს, რომ გამოვიყენოთ მათი პრესრელიზები, რომელიც გარკვეულ შეხვედრებს შეეხება. მაგალითად, მერი მივიდა სოფელში და დააკვირდა, გზას როგორ აკეთებენ, ამის იქით ინფორმაციას არ გვაძლევენ და არც შეხვედრების შესახებ არის ინფორმაცია საჯარო“, - ამბობს „რადიო მარნეულის“ ჟურნალისტი, ვლადიმერ ჩხიტუნიძე 

ის ჰყვება, რომ მათ დიდძალი შრომა გასწიეს საიმისოდ, რომ მოსახლეობას პრობლემებზე ღიად ესაუბრა, თუმცა ბოლო 2 წლის განმავლობაში გავრცელებულმა სხვადასხვა დეზინფორმაციულმა ნარატივმა და დაშინებებმა შედეგი გამოიღო და მოსახლეობასთან კომუნიკაცია გართულდა. 

„ახლა უფრო ეშინიათ საუბრის, ვიდრე 4 წლის წინ და მდგომარეობა ნელ-ნელა უფრო უარესობისკენ იცვლება. მიუხედავად იმისა, რომ გარკვეულ შემთხვევებში, როცა მოსახლეობის პროტესტი პიკს აღწევს, გვირეკავენ და საკუთარ აზრს აფიქსირებენ, ადგილობრივი თვითმმართველობა ცდილობს, რომ მოსახლეობამ ჩვენთან არ ისაუბროს და ჩაიკეტოს. 

განსხვავებული ვითარებაა წალკაში. ვინაიდან იქ ადგილობრივი მედია არ არსებობს, თვითმმართველობას საჭიროება არ ჰქონია, რომ მოსახლეობასთან გარკვეული სახის კომუნიკაცია დაემყარებინა იმაზე, რომ მედიისთვის ინტერვიუ არ მიეცათ. როდესაც 2 კვირის წინ, წალკის მუნიციპალიტეტის რამდენიმე სოფელში გადაღებაზე ჩავედი, ხალხი საკმაოდ გახსნილი იყო და პრობლემებზე საკმაოდ ღიად საუბრობდნენ“.

პროფესიული საქმიანობის შესრულებისას, ბოლო 15 წლის მანძილზე, ასეთი სახიფათო, შემზღუდავი პრეცედენტები და პრაქტიკა არ ახსენდება „აჭარა თაიმსის“ დამფუძნებელსა და დირექტორს, სულხან მესხიძეს. ის ფიქრობს, რომ ამ იზოლირებულ გარემოში „ქართული ოცნება“ ცდილობს, მედიის კითხვებს თავი აარიდოს და ძალაუფლება მანამდე შეინარჩუნოს, სანამ ამის შესაძლებლობა ექნება. 

„პირველად მოხდა - აჭარის ავტონომიური რესპუბლიკის არალეგიტიმური თავმჯდომარე ისე წარადგინეს და დაამტკიცეს აჭარის უმაღლეს საბჭოში, რომ სხდომა დახურული იყო, პირდაპირ ეთერში არ გადაიცემოდა, ჟურნალისტები არ შეგვიშვეს და დღემდე არ არის დასაბუთება, არგუმენტი, თუ რა გახდა ამ გადაწყვეტილების მიზეზი, ან ვინ მიიღო ეს გადაწყვეტილება. ამ სხდომის დახურვას მოჰყვა ისიც, რომ აჭარის არალეგიტიმურმა თავმჯდომარემ, მთავრობის პირველი სხდომაც დახურა და მედიამ ეს მათ მიერ გამოქვეყნებული ინფორმაციის შემდეგ გავიგეთ. ანუ, აჭარის უმაღლესი საბჭო დაიხურა, აჭარის მთავრობა დაიხურა, მუნიციპალიტეტები საჯარო ინფორმაციაზე არ პასუხობენ, კომენტარებს არ აკეთებენ, ანალოგიური პოლიტიკით სარგებლობენ სამინისტროებიც. მხოლოდ ერთადერთი საშუალება რჩება - საკრებულოს სხდომები. გვაქვს მოლოდინი, რომ მედიისთვის ეს სხდომებიც დაიხურება, რადგან „ქართული ოცნების“ ხელისუფლება უკვე ყველანაირად იზოლირებულია“.

სულხან მესხიძე ამბობს, „თუ უცნობი ნომრიდან დაურეკავ, გიპასუხებენ და როგორც კი გაიგებენ, რომელ მედიასაც წარმოადგენ, მაშინვე იმიზეზებენ, რომ საჭესთან არიან, არ სცალიათ, შეხვედრაზე არიან და გეუბნებიან, რომ გადმოგირეკავენ, რის შემდგომაც ქრებიან“. 

„აჭარა თაიმსის“ დირექტორი აღნიშნავს იმასაც, რომ ბოლო ერთი წლის განმავლობაში, საჯარო ღონისძიებებზე არა თუ კრიტიკულ, არამედ სახელისუფლებო მედიებსაც აღარ ასწრებენ, „ისინი თავად იღებენ მასალას და შემდგომ აწვდიან სახელისუფლებო მედიასაშუალებებს გასავრცელებლად“.

კონტექსტი: საქართველოში დამოუკიდებელ და კრიტიკულ მედიას მუშაობა რთულ გარემოში უწევს. „ქართულმა ოცნებამ“ ერთიმეორის მიყოლებით მიიღო მედიის შემზღუდავი საკანონმდებლო ცვლილებები. მეოთხე თვეა უკანონო პატიმრობაშია „ბათუმელები“/„ნეტგაზეთის“ დამფუძნებელი და დირექტორი მზია ამაღლობელი, სატელევიზიო მაუწყებლობა შეწყვიტა ხელისუფლების მიმართ კრიტიკულად განწყობილმა ტელეკომპანია „მთავარმა არხმა“. საზოგადოებრივმა მაუწყებელმა სამსახურიდან გაათავისუფლა ნინო ზაუტაშვილი, ვასილ ივანოვ-ჩიქოვანი და დახურა გადაცემა „რეალური სივრცე“. ჟურნალისტებს ხელს უშლიან პროფესიული მოვალეობის შესრულებისას, მათ აქციების გაშუქებისას აჯარიმებენ „გზის ხელოვნურად გადაკეტვისთვისაც“. დღემდე არ დასჯილან პროევროპული აქციების გაშუქებისას ჟურნალისტებზე (გურამ როგავა, ალექსანდრე ქეშელაშვილი, მაკა ჩიხლაძე, გიორგი შეწირული და სხვები) თავდამსხმელები. 

მზია ამაღლობელის ადვოკატები ქუთაისის სააპელაციო სასამართლოს მოუწოდებენ შეწყვიტოს ადმინისტრაციული სამართალდარღვევის საქმის წარმოება, რადგან პოლიციამ ამ საქმეზე მტკიცებულებათა ფალსიფიკაცია  მოახდინა.

ქუთაისის სააპელაციო სასამართლო „ბათუმელები“/„ნეტგაზეთის“ დამფუძნებლისა და დირექტორის საჩივარს, რომელიც ბათუმის საქალაქო სასამართლოს მიერ მზია ამაღლობელის ადმინისტრაციულ სამართალდარღვევათა კოდექსის 173-ე მუხლის საფუძველზე დაჯარიმებას შეეხება, ხვალ, 20 მაისს, ზეპირი მოსმენის გარეშე განიხილავს. 

„საქართველოს ახალგაზრდა იურისტთა ასოციაციის“ განცხადებით, მზია ამაღლობელის სამაგალითო დასჯა და ანგარიშსწორება ჟურნალისტური საქმიანობისა და აქტიური სამოქალაქო პოზიციისათვის რამდენიმე მიმართულებით მიმდინარეობს:

„ერთ-ერთი საქმე, რომელიც მის წინააღმდეგ სისტემამ წამოიწყო, დაკავშირებულია ადმინისტრაციულ სამართალდარღვევათა კოდექსის 173-ე მუხლთან, რაც გულისხმობს პოლიციელისათვის სიტყვიერი შეურაცხყოფის მიყენებას. 2025 წლის 11 იანვარს, აჭარის ავტონომიური რესპუბლიკის პოლიციის დეპარტამენტის შენობასთან მიმდინარე საპროტესტო აქციაზე, მზია ამაღლობელი თავდაპირველად საპროტექსტო სტიკერის კედელზე გაკვრის გამო დააკავა იმ დროისათვის აჭარის პოლიციის უფროსმა, გრიგოლ ბესელიამ. თუმცა, იმის გამო, რომ სტიკერის გაკვრისათვის ადმინისტრაციული წესით დაკავების უფლებამოსილება პოლიციას არ გააჩნია, მზია ამაღლობელის დაკავების ოქმი გააყალბეს და მასში მიუთითეს, რომ თითქოს  მზია ამაღლობელმა ჩაიდინა ადმინისტრაციულ სამართალდარღვევათა კოდექსის 173-ე მუხლით გათვალისწინებული სამართალდარღვევა, რომლის საფუძველზეც იგი დააკავეს. მოგვიანებით, ამავე მუხლით შეადგინეს სამართალდარღვევის ოქმი და მზია ამაღლობელს დააბრალეს იმ სამართალდარღვევის ჩადენა, რაც მას არ ჩაუდენია“. 

ეს საქმე ბათუმის საქალაქო სასამართლომ 18 მარტს განიხილა და ორგანიზაციის შეფასებით, სრულიად დაუსაბუთებელი და უკანონო გადაწყვეტილება მიიღო:

„საქმის განხილვა ატარებდა ფორმალურ ხასიათს, მოსამართლემ არ გამოიკვლია საქმისათვის არსებითი მნიშვნელობის მქონე გარემოებები, მტკიცების ტვირთი გადაანაწილა არასწორად და უსაფუძვლოდ დაეყრდნო მხოლოდ პოლიციელის მიერ მიცემულ ცრუ ჩვენებას და ასევე, მტკიცებულებათა ფალსიფიკაციის საფუძველზე შექმნილ 2 ვიდეოფაილს, რომელსაც შემხებლობა არ აქვს განსახილველ საქმესთან.

კერძოდ, მოსამართლე დაეყრდნო იმ ვიდეო ჩანაწერებს, რომელიც ბათუმის პოლიციის სამმართველომ მტკიცებულების სახით წარადგინა სასამართლოში, თუმცა, არც ერთ ამ ვიდეო ჩანაწერს შემხებლობა არ აქვს საქმესთან. ვიდეო ჩანაწერებზე დაყრდნობით შსს ამტკიცებდა, რომ სწორედ ამ ვიდეოში ასახული ქმედების გამო დააკავეს მზია ამაღლობელი ადმინისტრაციული წესით. მიუხედავად იმისა, რომ ადვოკატებმა  სასამართლოს მიუთითა ვიდეოები არ იყო გადაღებული მზია ამაღლობელის დაკავებამდე, მოსამართლემ აღნიშნული მითითება და წარდგენილი მტკიცებულება (მოწმე/ჟურნალისტი, რომელმაც გადაიღო ეს ვიდეო) არ გაითვალისწინა და არც ის მიუთითა გასაჩივრებულ გადაწყვეტილებაში, თუ რატომ არ გაითვალისწინა დაცვის პოზიცია“. 

როგორც საია აღნიშნავს, მზია ამაღლობელის მიერ 173-ე მუხლის ჩადენის ფაქტს არც ეს კადრები ადასტურებს, რადგან მასში ამაღლობელის უკანონო ქცევა ასახული არ არის:

„იმის გათვალისწინებით, რომ ეს ვიდეო მასალა გახდა მზია ამაღლობელის სამართალდამრღვევად მიჩნევის საფუძველი, ხოლო მისი პირველი დაკავება ასევე დაკავშირებულია სისხლის სამართლის ბრალდების საქმესთან და მისი პატიმრობა დღემდე დასაბუთებულია სწორედ ამ უკანონო ადმინისტრაციული დაკავებით, გვინდა საზოგადოებას წარვუდგინოთ ახალი მტკიცებულებები, რომლითაც უტყუარად დგინდება, რომ (ა) პოლიციის მიერ წარმოდგენილი 2 ვიდეო ჩანაწერი გადაღებულია მზია ამაღლობელის ადმინისტრაციული წესით დაკავებიდან რამდენიმე საათის შემდგომ და ასახავს ბოლო დაკავებულის (ლ. გაბაიძის) დაკავებას, რაც პოლიციამ განახორციელა 00:43 საათზე, ხოლო მზია ამაღლობელი ადმინისტრაციული წესით დააკავეს 22:58 საათზე, და (ბ) პოლიციის ერთადერთი მოწმის, ბათუმის პოლიციის უფროსის მოადგილის გ. ვანაძის ჩვენება არ შეესაბამება სინამდვილეს“.   

ამაღლობელის ადვოკატების განცხადებით, ვიდეო მტიცებულებების ფალსიფიკაციის და მოწმის ცრუ ჩვენების დამადასტურებელი მტკიცებულებები ქუთაისის სააპელაციო სასამართლოს დამატებით წარუდგინეს და საჩივრით მოითხოვენ, შეწყვიტოს მზია ამაღლობელის წინააღმდეგ დაწყებული ადმინისტრაციული სამართალდარღვევის საქმე მისი უსაფუძვლობის გამო და გააუქმოს ბათუმის საქალაქო სასამართლოს მიერ მიღებული სრულიად უკანონო და დაუსაბუთებელი გადაწყვეტილება. 

ისინი მიმართავენ საქართველოს გენერალურ პროკურორსაც დაუყოვნებლივ დაიწყოს გამოძიება და „სისხლის სამართლებრივი დევნა როგორც ბათუმის პოლიციის სამმართველოს უფროსის მოადგილის გ. ვანაძის და მზია ამაღლობელის წინააღმდეგ ადმინისტრაციული სამართალწარმოების პროცესში მონაწილე პოლიციის და შსს-ს სხვა მოხელეთა წინააღმდეგ სსკ-ის 332- (სამსახურებრივ უფლებამოსილების ბოროტად გამოყენება), 369-ე (მტკიცებულების ფალსიფიკაცია) და  370-ე (ცრუ ჩვენება) მუხლებით გათვალისიწნებული დანაშაულის ნიშნების არსებობის გამო“.

მზია ამაღლობელის ადვოკატები საჯაროდ მიმართავენ გენერალურ პროკურორს, რომ მიღებული გადაწყვეტილების შესახებ უმოკლეს დროში აცნობოს, რადგან მზია ამაღლობელის პატიმრობა დღემდე სწორედ ამ გაყალბებულ ადმინისტრაციულ სამართალწარმოებას ეფუძნება.

მზია ამაღლობელის საქმე

„ბათუმელები“/„ნეტგაზეთის“ დამფუძნებელი და დირექტორი 11-12 იანვარს, ბათუმის პოლიციის მთავარ სამმართველოსთან ორჯერ დააკავეს. პირველად მზია ამაღლობელი პოლიციამ კედელზე იმ სტიკერის გაკვრის გამო დააკავა, რომელზეც „გაიფიცე“ ეწერა, ის მოგვიანებით ხელწერილის საფუძველზე გაათავისუფლეს, თუმცა მალევე მეორედ, ირაკლი დგებუაძისთვის, ბათუმის პოლიციის უფროსისთვის სილის გაწვნის გამო დააკავეს.

15 იანვარს „საქართველოს ახალგაზრდა იურისტთა ასოციაციამ“ გაავრცელა ინფორმაცია, რომ დაკავების შემდეგ, მზია ამაღლობელს დგებუაძე სიტყვიერ შეურაცხყოფას აყენებდა და აგრესიულად ეპყრობოდა, მან ამაღლობელს სახეშიც შეაფურთხა.

„ბათუმელები“/„ნეტგაზეთის“ დამფუძნებელი და დირექტორი მოსამართლე სალიხ შაინიძემ ადმინისტრაციულ საქმეზე სამართალდამრღვევად 18 მარტს ცნო და 2 000 ლარით დააჯარიმა.

პოლიცია „ბათუმელებისა“ და „ნეტგაზეთის“ დამფუძნებელსა და დირექტორს ადმინისტრაციულ სამართალდარღვევათა კოდექსის 173-ე მუხლით გათვალისწინებული ქმედების ჩადენას ედავებოდა, თუმცა „საქართველოს ახალგაზრდა იურისტთა ასოციაციის“ ინფორმაციით, საქმეში შესაბამისი ფაქტების დამადასტურებელი მტკიცებულებები წარმოდგენილი არ იყო და მზია ამაღლობელის წინააღმდეგ პოლიციას ყალბი ადმინისტრაციული დაკავების და სამართალდარღვევის ოქმები ჰქონდა შედგენილი. 

მზია ამაღლობელის დაკავების ოქმში წერია, რომ ის არა სტიკერის გაკვრისთვის, არამედ პოლიციელების სიტყვიერი შეურაცხყოფის გამო დააკავეს. თუმცა, ამაღლობელი სტიკერის გაკვრისთვის, ადმინისტრაციულ სამართალდარღვევათა კოდექსის 150-ე მუხლით რომ დააკავეს, ამას არსებულ ვიდეოჩანაწერში ბათუმის პოლიციის უფროსი, ირაკლი დგებუაძეც ადასტურებს. 

ადვოკატების განმარტებით, რადგან 150-ე მუხლი დაკავების საფუძველი არ არის, ოქმში 173-ე მუხლი სწორედ იმიტომ ჩაიწერა, რომ მზია ამაღლობელის დაკავების საფუძველი შექმნილიყო. 

შინაგან საქმეთა სამინისტრომ „ბათუმელები“/„ნეტგაზეთის“ დამფუძნებლისა და დირექტორის წინააღმდეგ, 150-ე მუხლით დაიწყო მეორე ადმინისტრაციული საქმეც. უწყება ამაღლობელს 11 იანვარს, აჭარის პოლიციის დეპარტამენტის წინ, დამხმარე ნაგებობაზე სტიკერის გაკვრის გამო იერსახის დამახინჯებას ედავება. ამ საქმეზე სასამართლო პროცესი ბათუმის საქალაქო სასამართლოში 7 მაისს გაიმართა, მოსამართლე მარიანა ფომაევამ მისი განხილვა 9 ივნისისთვის გადადო.

მზია ამაღლობელის სისხლის სამართლის საქმის არსებითი განხილვა კი ბათუმის საქალაქო სასამართლოში მიმდინარეობს. ამაღლობელს 4-დან 7 წლამდე პატიმრობა ემუქრება. ის დაკავების დღიდან, 38 დღე შიმშილობდა.

მზია ამაღლობელის დაუყოვნებლივ გათავისუფლებას 300-ზე მეტი ჟურნალისტი, რედაქტორი, მედიამენეჯერი და პრესის თავისუფლებისა და ჟურნალისტების უფლებების დამცველი 80-ზე მეტი ორგანიზაცია ითხოვს. 18 მარტიდან „ბათუმელები“/„ნეტგაზეთის“ დამფუძნებელისა და დირექტორის სასამართლო პროცესების მონიტორინგი დაიწყო მსახიობ ჯორჯ კლუნისა და უფლებადამცველ ამალ კლუნის ფონდმა. ამაღლობელის საქმეში სამართლიანობის მოთხოვნით კამპანია დაიწყო ადამიანის უფლებადამცველი საერთაშორისო ორგანიზაცია Amnesty International-მაც. 

„საქართველოს ახალგაზრდა იურისტთა ასოციაციამ“ მზია ამაღლობელის სახელით მიმართა ადამიანის უფლებათა ევროპულ სასამართლოსაც.

ამაღლობელმა თბილისის საქალაქო სასამართლოს მიმართა ირაკლი კობახიძის, მამუკა მდინარაძისა და სოზარ სუბარის წინააღმდეგაც. მოსარჩელე კობახიძის, მდინარაძის და სუბარის მიერ მედიასაშუალებებით, სხვადასხვა დროს გაკეთებული განცხადებების ცილისწამებად მიჩნევას და იმავე საშუალებით მათ უარყოფას ითხოვს. 

კომუნიკაციების კომისიის ინფორმაციით, 2025 წლის I კვარტალში ტელე და რადიო მაუწყებლების ჯამურმა კომერციულმა სარეკლამო შემოსავალმა 16.4  მილიონი ლარი შეადგინა, რაც 2024 წლის იმავე პერიოდთან შედარებით, 5%-ით მეტია. 

კომერციული სარეკლამო შემოსავლებიდან 14.8 მილიონი ლარი მიიღეს მხოლოდ ტელევიზიებმა, რაც წინა წლის ამავე პერიოდთან შედარებით 5.7%-ით მეტია.

მიმდინარე წლის იანვარ-მარტში სატელევიზიო კომერციული სარეკლამო შემოსავლების ყველაზე დიდი წილი - 6.1 მილიონი ლარი [41.2%]  კვლავ „ტელეიმედს” ჰქონდა, რაც გასული წლის იმავე პერიოდთან შედარებით 0.8 მილიონი ლარით მეტია. 

• უცვლელი დარჩა „რუსთავი 2“-ის (მედია ჰოლდინგი) კომერციული შემოსავალი და 2024 წლის I კვარტლის მსგავსად, კვლავ 1.8 მილიონი ლარი შეადგინა. 
• 0.2 მილიონი ლარით გაიზარდა „პოსტვ“-ის შემოსავალი და 1.7 მილიონ ლარს გაუტოლდა. 
• 0.8 მილიონით გაიზარდა „ფორმულას“ კომერციული შემოსავალი და 2025 წლის I კვარტალში 1.5 მილიონი ლარი შეადგინა. 
• წინა წლის ამავე პერიოდთან შედარებით, 0.4 მილიონი ლარით მეტი მიიღო „ტელეკომპანია პირველმა“, რომლის სარეკლამო შემოსავალმაც 1.2 მილიონი ლარი შეადგინა.
• 0.3 მილიონი ლარით გაიზარდა და მიმდინარე წლის I კვარტალში 0.4 მილიონ ლარს გაუტოლდა „საზოგადოებრივი მაუწყებლის“ სარეკლამო შემოსავალი.
• წინა წლის ამავე პერიოდთან შედარებით, ორჯერ გაიზარდა „სილქნეტის“ შემოსავალი და 0.2 მილიონი ლარი შეადგინა. 
• „პალიტრანიუსის“ შემთხვევაში კი, მათი კომერციული შემოსავალი არ შეცვლილა და 0.1 მილიონი ლარი იყო.
• უცვლელი დარჩა „ბი ემ ჯი“-სა და „ჯი-დი-ეს თი-ვი“-ის კომერციული შემოსავლები და 2025 წლის პირველ კვარტალში „ბი ემ ჯი“-ის შემოსავალი ისევ 0.8 მილიონ ლარი იყო, „ჯი-დი-ეს თი-ვი“-ის შემთხვევაში კი კვლავ 0.4 მილიონ ლარს უდრიდა.
• რაც შეეხება რადიომაუწყებლებს, 2025 წლის პირველ კვარტალში მათ მიერ  მიღებული სარეკლამო შემოსავალი, 2024 წლის იმავე პერიოდთან შედარებით, 1.1%-ით გაიზარდა და 1.7 მილიონი ლარი შეადგინა, საიდანაც 89% პირდაპირ რეკლამაზე, ხოლო დანარჩენი 11% სპონსორობაზე მოდიოდა.

კომერციული სარეკლამო შემოსავალი კომერციულ რეკლამას, სპონსორობას, პროდუქტის განთავსებას, ტელეშოპინგსა და კომერციულ განცხადებებს მოიცავს.

2024 წლის ოთხივე კვარტალში მიღებულ სარეკლამო შემოსავლებთან დაკავშირებით, იხილეთ „მედიაჩეკერის“ მასალები:

• 2024 წლის პირველ კვარტალში ტელე-რადიო მაუწყებლების ჯამური კომერციული სარეკლამო შემოსავალი 15.6 მილიონი ლარია
• 2024 წლის II კვარტალში სარეკლამო შემოსავლების ყველაზე დიდი წილი - 6 მილიონი ლარი კვლავ „იმედმა“ მიიღო
• 2024 წლის III კვარტალში სარეკლამო შემოსავლების ყველაზე დიდი წილი - 5.6 მილიონი ლარი კვლავ „იმედმა“ მიიღო
• 2024 წლის IV კვარტალში კომერციული სარეკლამო შემოსავლების თითქმის მესამედი „იმედმა“ მიიღო

თბილისის სააპელაციო სასამართლომ ბორჯომის მერიის სარჩელი არ დააკმაყოფილა და ახალციხის რაიონული სასამართლოს გადაწყვეტილება - მერიას „სამხრეთის კარიბჭისთვის“ 2023 წელს გამოთხოვილი საჯარო ინფორმაცია მიეწოდებინა, ძალაში დატოვა.

ახალციხის რაიონული სასამართლოს გადაწყვეტილებით, ბორჯომის მერიას „სამხრეთის კარიბჭის“ მიერ ჟურნალისტური გამოძიების ფარგლებში გამოვლენილ უკანონო მშენებლობებთან დაკავშირებით, პერსონალური და მაიდენტიფიცირებელი მონაცემების დაცვით, ინფორმაციის გაცემა დაევალა.

როგორც „სამხრეთის კარიბჭის“ რედაქტორი, თიკო ზაზაძე „მედიაჩეკერთან“ საუბრისას აღნიშნავს, გამოცემამ დავა ასპინძისა და ახალციხის მერიებსაც მოუგო:

„მივმართეთ სასამართლოს ასპინძის, ახალციხის და ბორჯომის წინააღმდეგ. მათ არ მოგვცეს საჯარო ინფორმაცია, რომელიც ისედაც ღია უნდა ყოფილიყო. სასამართლო პროცესი სამივე შემთხვევაში მოვიგეთ. ასპინძის მერიამ რამდენიმე თვის წინ გამოგვიგზავნა ინფორმაცია და ფაქტობრივად იმ საგამოძიებო მასალისთვის ვერც გამოვიყენეთ. დავა მოვიგეთ ახალციხის მერიასთანაც, მაგრამ მათ ჯერ გადაწყვეტილება არ ჩაბარებიათ და შესაბამისად, ვერ მივიღეთ ინფორმაცია იმაზე, თუ რამდენი საჯარო მოხელე გაუშვეს „ქართული ოცნების“ შეხვედრაზე თბილისსა და ახალციხეში. რაც შეეხება ბორჯომს, აქაც მოვიგეთ პროცესი, თუმცა გაგვისაჩივრეს სააპელაციოში. ფაქტობრივად, წელიწადზე მეტი დავკარგეთ. საქალაქო სასამართლოს გადაწყვეტილება სააპელაციოში მხოლოდ ბორჯომის მერიამ გაასაჩივრა“.

თიკო ზაზაძის თქმით, სასამართლო დავების შემდეგ, მათ ამ მერიებიდან სხვადასხვა სახის საჯარო ინფორმაცია ისევ გამოითხოვეს და პასუხი კი მხოლოდ ასპინძის მერიისგან მიიღეს.

„ბორჯომის მერთან დაკავშირებით ჩვენ კიდევ მოვითხოვეთ სხვა ინფორმაცია და გვიპასუხეს: „შეგიძლიათ გვიჩივლოთ“.“

„ადამიანის უფლებათა ცენტრმა“ გასული წლის მედიაგარემოს შეფასების აღნიშნა, რომ საჯარო ინფორმაციაზე წვდომა ჟურნალისტებისთვის კრიტიკულ ნიშნულამდეა მისული.

„ინფორმაციის თავისუფლების განვითარების ინსტიტუტის“ 2025 წლის ანგარიშის მიხედვით კი, განვლილი 2 წლის განმავლობაში საქართველოში დემოკრატიის ხარისხის მკვეთრმა უკუსვლამ საჯარო დაწესებულებების ანგარიშვალდებულებაზე არსებითი მნიშვნელობის ნეგატიური გავლენა იქონია.

ანგარიშში - „ინფორმაციის თავისუფლება: მედია და საზოგადოება სისტემური უკანონობის პირისპირ“ ვკითხულობთ, რომ  საჯარო ინფორმაციის განცხადებათა დაახლოებით 60% საჯარო დაწესებულებებმა რეაგირების გარეშე დატოვეს, რაც საქართველოს კონსტიტუციის და კანონმდებლობის უხეში დარღვევაა. საჯარო ინფორმაციის 204 განცხადებიდან კი 10-დღიანი პერიოდის განმავლობაში მხოლოდ 12 (6%) დაკმაყოფილდა.

სახალხო დამცველი კი წლიურ ანგარიშში აღნიშნავს, რომ „2024 წელს შესწავლილი საჩივრების შედეგად გამოვლენილი გამოწვევები კიდევ ერთხელ წარმოაჩენს ქვეყანაში ინფორმაციის თავისუფლების მარეგულირებელი კანონმდებლობის რეფორმის დაწყებისა და ეფექტიანი საზედამხედველო ინსტიტუტის შექმნის აუცილებლობას“. 

დღეს, 14 მაისს, პარლამენტში შალვა პაპუაშვილის მოხსენებისთვის უსაფრთხოების დამატებითი ზომები იმოქმედებს და ონლაინ მედიას შენობაში არ დაუშვებენ.

პარლამენტის განცხადებით, უსაფრთხოების ყვითელი დონის გამო, შენობაში თითო მაუწყებლიდან მხოლოდ აკრედიტებულ არაუმეტეს ორ ჯგუფს დაუშვებენ.

როგორც პარლამენტი წერს, ამ “ღონისძიების მიზანია საქართველოს პარლამენტის სასახლეში სამუშაო და უსაფრთხო გარემოს უზრუნველყოფა”.

პარლამენტში ონლაინ მედია არ დაუშვეს 4 თებერვალს, მიხეილ ყაველაშვილის მოხსენების დროსაც.

მედიას პარლამენტისგან სპეციალური აკრედიტაციის მიღება დასჭირდა ყაველაშვილის ინაუგურაციისა და პრეზიდენტად არჩევის გასაშუქებლად.

უსაფრთხოების ყვითელი დონის მოქმედების გამო პარლამენტში ონლაინ მედიის წარმომადგენლებს არ უშვებდნენ გასულ წელსაც. ისინი პარლამენტში არ დაუშვეს 28 ივნისს, ირაკლი კობახიძის წლიური ანგარიშის მოსმენისას.

ონლაინ მედიის წარმომადგენლებს საკანონმდებლო ორგანოში შესვლა რუსული კანონის განხილვების დროსაც ეკრძალებოდათ.

„TV პირველის“ ჟურნალისტი მარიამ მაკასარაშვილი, რომელსაც გიორგი შინჯიკაშვილის მამა თავს დაესხა, ტვინის შერყევით დღესაც „ინგოროყვას საუნივერსიტეტო კლინიკაში“ რჩება. გიორგი შინჯიკაშვილი ქვემო ქართლში სახელმწიფოს რწმუნებულის პირველი მოადგილე იყო, რომელიც თანამდებობიდან გუშინ გადადგა. კლინიკის ექიმის განცხადებით, ჟურნალისტს კოორდინაციის დარღვევა აღენიშნება და მეთვალყურეობის ქვეშ რჩება:

„მარიამი მიღებულია ტვინის შერყევის დიაგნოზით გუშინ საღამოს. მას უპირატესად წამოდგომისას აღენიშნება კოორდინაციის დარღვევა, რის გამოც მივიღეთ გადაწყვეტილება, რომ დღესაც რჩება მეთვალყურეობის ქვეშ. თვალსაჩინო დაზიანება არ არის, თუმცა როგორც თვითონ ამბობს, აქვს ბლაგვი საგნით მიყენებული ტრავმა მარცხენა მხრიდან, თავის მარცხენა მხარეში“.

მარიამ მაკასარაშვილი კლინიკაში, ადვოკატების თანდასწრებით, გამოკითხა სპეციალური საგამოძიებო სამსახურის გამომძიებელმა თამარ ბახუამ. უწყებამ გამოძიება ჟურნალისტურ საქმიანობაში უკანონოდ ხელშეშლის ფაქტზე, სისხლის სამართლის კოდექსის 154-ე მუხლის მეორე ნაწილით გუშინ დაიწყო.

„TV პირველის“ ჟურნალისტის ერთ-ერთი ადვოკატის, თორნიკე მიგინეიშვილის შეფასებით, ამ შემთხვევაში იყო არამხოლოდ ჟურნალისტურ საქმიანობაში ხელშეშლა, არამედ თავდასხმაც იმის გამო, რომ მარიამი ჟურნალისტია. 

„მარიამმა დეტალურად გაიხსენა ყველა ის მომენტი, რა მომენტიც განხორციელდა გუშინ, რა ფაქტიც მოხდა. ასევე მიყენებულ ზიანზე ისაუბრა, რასაც ასევე ადასტურებს სამედიცინო დოკუმენტაცია და სპეციალურმა საგამოძიებო სამსახურმა გადაუდებელი აუცილებლობით ამოიღო ეს დოკუმენტაცია და მასზე დაინიშნება ექსპერტიზა იმისთვის, რომ დადგინდეს, რა სახის დაზიანება აქვს მარიამს მიყენებული. არა მხოლოდ ხელშეშლა, ეს იყო თავდასხმა იმის გამო, რომ მარიამი არის ჟურნალისტი, დევნა პროფესიული ნიშნით. შესაბამისად, არა მხოლოდ ერთი მუხლით, სამომავლოდ რამდენიმე მუხლით უნდა დაიწყოს და გააგრძელოს გამოძიება სპეციალურმა საგამოძიებო სამსახურმა. ჩვენ მიერ მიცემული გამოკითხვის ოქმის თანახმად, მათ აქვთ სრული არეალი იმისთვის, რომ სხვადასხვა საგამოძიებო მოქმედება დაგეგმონ, თუმცა რამდენად გააკეთებენ ამას და შედეგი რამდენად იქნება, ამას უკვე პროცესის განმავლობაში ვნახავთ, იმიტომ რომ არაერთხელ ყოფილა შემთხვევა, როდესაც შემზარავი ფაქტი მომხდარა და გამოკითხვის ოქმი შემდგარა, ჩვენგან ყველანაირი კომუნიკაცია შემდგარა, თუმცა შედეგი წლების შემდეგაც კი არ დამდგარა“, - განაცხადა მიგინეიშვილმა „TV პირველთან“ საუბრისას.

„TV პირველის“ გადამღებ ჯგუფზე თავდასხმას სამოქალაქო საზოგადოების ორგანიზაციები გუშინვე გამოეხმაურნენ. 

„საქართველოს ჟურნალისტური ეთიკის ქარტია“ მომხდარ ინციდენტზე პასუხისმგებლობას აკისრებს „ქართულ ოცნებას“, „რომლის რეპრესიული პოლიტიკა მედიის მიმართ ქმნის გარემოს, სადაც ჟურნალისტების უსაფრთხოება და უფლებები დაცული არ არის და სადაც ადამიანები თავს უფლებას აძლევენ, ჟურნალისტებს თავს დაესხან და ფიზიკურად გაუსწორდნენ. ამ ფონზე კი დღემდე არ არის გამოვლენილი და პასუხისგებაში მიცემული არცერთი პირი, რომელმაც ბოლო თვეების განმავლობაში ჟურნალისტებზე იძალადა“. 

„საქართველოს ახალგაზრდა იურისტთა ასოციაციისთვის“ გუშინ „მომხდარი ადასტურებს ჟურნალისტების მიმართ გახშირებული ძალადობის ფაქტებს, რასაც პირდაპირ უწყობს ხელს შესაბამისი საგამოძიებო ორგანოების გულგრილობა. ასეთი დამოკიდებულება ახალისებს ძალადობას და აჩენს დაუსჯელობის განცდას.

ისედაც გაუარესებულ მედიაგარემოში, საია გმობს მომხდარს და მოუწოდებს სპეციალურ საგამოძიებო სამსახურს და პროკურატურას გავრცელებულ ინფორმაციაზე მოახდინონ სწრაფი და ეფექტიანი“.

მედიის წარმომადგენლებზე განხორციელებულ ფიზიკურ თავდასხმას გმობს „მედიის ადვოკატირების კოალიციაც“ და აღნიშნავს, რომ ეს ფაქტი ქვეყანაში მედიის თავისუფლებისა და უსაფრთხოების კრიტიკულ მდგომარეობას კიდევ ერთხელ წარმოაჩენს.

გუშინ, 12 მაისს, „ტვ პირველის“ გადამღებ ჯგუფს, რომლებიც  ქვემო ქართლში სახელმწიფო რწმუნებულის პირველი მოადგილის, გიორგი შინჯიკაშვილის გადადგომის მიზეზების გასარკვევად მარტყოფში, მის საცხოვრებელ სახლთან მივიდნენ, შინჯიკაშვილის მამა ფიზიკურად გაუსწორდა. როგორც მარიამ მაკასარაშვილი ჰყვება, ის აგრესიული მოულოდნელად გახდა, ოპერატორს - ვიდეოკამერა, მას კი პირადი მობილური წაართვა და ხელიც კი გაარტყა. 

მაკასარაშვილის თქმით, მათ შინაგან საქმეთა სამინისტრის მომხდარის შესახებ მალევე შეატყობინეს, პოლიციელები კი შემთხვევის ადგილას თითქმის საათნახევრის შემდეგ მივიდნენ.  

„ტვ პირველის“ ჟურნალისტს პირველადი სამედიცინო დახმარება სასწრაფო დახმარების ექიმებმა აღმოუჩინეს და ჩივილებიდან გამომდინარე კლინიკაში გადაიყვანეს.  

12 მაისს, საღამოს, რუსთავის მე-5 პენიტენციურ დაწესებულებასთან მზია ამაღლობელის მხარდამჭერი აქცია გაიმართა. „ბათუმელები“/„ნეტგაზეთის“ დამფუძნებლსა და დირექტორს კოლეგებმა და მეგობრებმა დაბადების დღე მიულოცეს და მისი 4-თვიანი უკანონო პატიმრობა გააპროტესტეს. 

ჟურნალისტები პენიტენციურ დაწესებულებასთან შეიკრიბნენ და საპატიმროს იმ მხარეს, შემაღლებულ ადგილას გადაინაცვლეს, საიდანაც, სავარაუდოდ, მზია ამაღლობელის საკანი ჩანს. შეკრებილებმა  შეძახილებით: „გილოცავთ“; „თავისუფლება მზიას“; „არ იქნება სამართალი? არ იქნება მშვიდობა!“ ამაღლობელი გაამხნევეს და გაუშვეს ფრანები წარწერით: „მზია, გილოცავთ“.

პენიტენციურ დაწესებულებასთან იმყოფებოდა ჟურნალისტი ვასილ ივანოვ-ჩიქოვანიც. მისი თქმით, მზია ამაღლობელს მადლობა უნდა გადავუხადოთ იმ სიძლიერისთვის, რომელსაც ყველას სამაგალითოდ გვაჩვენებს.

„აქ მოსვლის მიზეზია მცირედით მაინც ვეცადოთ, რომ ფიზიკურად მაინც გავაგებინოთ მას, რომ გვერდში ვუდგავართ. დარწმუნებული ვარ, ის გრძნოს ამ თანადგომას. მინდა მას კიდევ ერთხელ მხნეობა ვუსურვო. მადლობა [მას] იმ დიდი მაგალითისთვის, რომელსაც ყველას გვაჩვენებს. აუცილებლად ეს ყველაფერი მალე დასრულდება თავისუფალი სიტყვის გამარჯვებით. ის, ვინც თავისუფალ სიტყვას ებრძვის, ამ ბრძოლიდან დამარცხებული გამოვა“.

„ბათუმელები“/„ნეტგაზეთის“ დირექტორის მოვალეობის შემსრულებლისთვის,  თამარ რუხაძისთვის კი წარმოუდგენელია, რომ კოლეგები და მეგობრები მზია ამაღლობელს დაბადების დღეს ამ ფორმით ულოცავენ: „ის ციხის კედლებშია და ჩვენ ვდგავართ და ვცდილობთ, აქედან მივაწვდინოთ როგორმე ხმა, ალბათ, ყველაზე ცუდ სიზმარშიც ვერ წარმოიდგენდა ვერცერთი ჩვენგანი ამ სურათს“.

აქციის დასასრულს, მზია ამაღლობელის კოლეგებმა პენიტენციურ დაწესებულებასთან სანთლებით წარწერაც - FREE MZIA [თავისუფლება მზიას] გააკეთეს.

„ბათუმელები“/„ნეტგაზეთის“ დამფუძნებელი და დირექტორი 11-12 იანვარს, ბათუმის პოლიციის მთავარ სამმართველოსთან ორჯერ დააკავეს. პირველად მზია ამაღლობელი პოლიციამ კედელზე იმ სტიკერის გაკვრის გამო დააკავა, რომელზეც „გაიფიცე“ ეწერა, ის მოგვიანებით ხელწერილის საფუძველზე გაათავისუფლეს, თუმცა მალევე მეორედ, ირაკლი დგებუაძისთვის სილის გაწვნის გამო დააკავეს.

15 იანვარს „საქართველოს ახალგაზრდა იურისტთა ასოციაციამ“ გაავრცელა ინფორმაცია, რომ დაკავების შემდეგ, მზია ამაღლობელს დგებუაძე სიტყვიერ შეურაცხყოფას აყენებდა და აგრესიულად ეპყრობოდა, მან ამაღლობელს სახეშიც შეაფურთხა.

„ბათუმელები“/„ნეტგაზეთის“ დამფუძნებელი და დირექტორი მოსამართლე სალიხ შაინიძემ ადმინისტრაციულ საქმეზე სამართალდამრღვევად 18 მარტს ცნო და 2 000 ლარით დააჯარიმა.

პოლიცია „ბათუმელებისა“ და „ნეტგაზეთის“ დამფუძნებელსა და დირექტორს ადმინისტრაციულ სამართალდარღვევათა კოდექსის 173-ე მუხლით გათვალისწინებული ქმედების ჩადენას ედავებოდა, თუმცა „საქართველოს ახალგაზრდა იურისტთა ასოციაციის“ ინფორმაციით, საქმეში შესაბამისი ფაქტების დამადასტურებელი მტკიცებულებები წარმოდგენილი არ იყო და მზია ამაღლობელის წინააღმდეგ პოლიციას ყალბი ადმინისტრაციული დაკავების და სამართალდარღვევის ოქმები ჰქონდა შედგენილი. 

მზია ამაღლობელის დაკავების ოქმში წერია, რომ ის არა სტიკერის გაკვრისთვის, არამედ პოლიციელების სიტყვიერი შეურაცხყოფის გამო დააკავეს. თუმცა, ამაღლობელი სტიკერის გაკვრისთვის, ადმინისტრაციულ სამართალდარღვევათა კოდექსის 150-ე მუხლით რომ დააკავეს, ამას არსებულ ვიდეოჩანაწერში ბათუმის პოლიციის უფროსი, ირაკლი დგებუაძეც ადასტურებს. 

ადვოკატების განმარტებით, რადგან 150-ე მუხლი დაკავების საფუძველი არ არის, ოქმში 173-ე მუხლი სწორედ იმიტომ ჩაიწერა, რომ მზია ამაღლობელის დაკავების საფუძველი შექმნილიყო. 

შინაგან საქმეთა სამინისტრომ „ბათუმელები“/„ნეტგაზეთის“ დამფუძნებლისა და დირექტორის წინააღმდეგ, 150-ე მუხლით დაიწყო მეორე ადმინისტრაციული საქმეც. უწყება ამაღლობელს 11 იანვარს, აჭარის პოლიციის დეპარტამენტის წინ, დამხმარე ნაგებობაზე სტიკერის გაკვრის გამო იერსახის დამახინჯებას ედავება. ამ საქმეზე სასამართლო პროცესი ბათუმის საქალაქო სასამართლოში 7 მაისს გაიმართა, მოსამართლე მარიანა ფომაევამ მისი განხილვა 9 ივნისისთვის გადადო.

მზია ამაღლობელის სისხლის სამართლის საქმის არსებითი განხილვა კი ბათუმის საქალაქო სასამართლოში მიმდინარეობს. ამაღლობელს 4-დან 7 წლამდე პატიმრობა ემუქრება. ის დაკავების დღიდან, 38 დღე შიმშილობდა.

მზია ამაღლობელის დაუყოვნებლივ გათავისუფლებას 300-ზე მეტი ჟურნალისტი, რედაქტორი, მედიამენეჯერი და პრესის თავისუფლებისა და ჟურნალისტების უფლებების დამცველი 80-ზე მეტი ორგანიზაცია ითხოვს. 18 მარტიდან „ბათუმელები“/„ნეტგაზეთის“ დამფუძნებელისა და დირექტორის სასამართლო პროცესების მონიტორინგი დაიწყო მსახიობ ჯორჯ კლუნისა და უფლებადამცველ ამალ კლუნის ფონდმა. ამაღლობელის საქმეში სამართლიანობის მოთხოვნით კამპანია დაიწყო ადამიანის უფლებადამცველი საერთაშორისო ორგანიზაცია Amnesty International-მაც. 

„საქართველოს ახალგაზრდა იურისტთა ასოციაციამ“ მზია ამაღლობელის სახელით მიმართა ადამიანის უფლებათა ევროპულ სასამართლოსაც.

ამაღლობელმა თბილისის საქალაქო სასამართლოს მიმართა ირაკლი კობახიძის, მამუკა მდინარაძისა და სოზარ სუბარის წინააღმდეგაც. მოსარჩელე კობახიძის, მდინარაძის და სუბარის მიერ მედიასაშუალებებით, სხვადასხვა დროს გაკეთებული განცხადებების ცილისწამებად მიჩნევას და იმავე საშუალებით მათ უარყოფას ითხოვს. 

დღეს, 8 მაისს, ნინო ზაუტაშვილმა და ვასილ ივანოვ-ჩიქოვანმა საზოგადოებრივი მაუწყებლის მიერ მათი სამსახურიდან გათავისუფლების გადაწყვეტილება თბილისის საქალაქო სასამართლოში გაასაჩივრეს. ზაუტაშვილი ჩივილს აპირებს ტელეკომპანია „იმედის“ წინააღმდეგაც, რომელმაც მის შემოსავლებთან დაკავშირებით „აბსოლუტურად უკანონო ინფორმაცია“ გაავრცელა: „ერთი წამით არ მეპარება ეჭვი, ყველაფერი დამთავრდება კარგად. რატომ? იმიტომ, რომ ვართ ცამდე მართლები“.

საზოგადოებრივი მაუწყებლის მენეჯმენტმა წამყვანები ნინო ზაუტაშვილი და ვასილ ივანოვ-ჩიქოვანი არხიდან 11 აპრილს გაათავისუფლა. ზაუტაშვილისა და ივანოვ-ჩიქოვანის ადვოკატის, გიორგი იასაშვილის თქმით,  „სახეზეა კანონდარღვევა და ამ კანონდარღვევის ცალსახა ნიშნებია ის, რომ გამოხატვის უფლება არ მიეცათ  ჟურნალისტებს და ამ შემთხვევაში, შეეზღუდათ მათი უფლებები“. ტელევიზიის შეფასებით კი, მიღებული გადაწყვეტილება „სამართლიანი, მიუკერძოებელი და სამართლებრივად დასაბუთებული“ იყო.

ტელეწამყვანების გათავისუფლებასთან ერთად, არხის გენერალურმა დირექტორმა, თინათინ ბერძენიშვილმა „საჯარო სივრცეში გავრცელებული განცხადებებით მაუწყებლის სარედაქციო დამოუკიდებლობისა და მიუკერძოებლობის ეჭვქვეშ დაყენება და ამის შედეგად, დამსაქმებლისთვის რეპუტაციული ზიანის მიყენების“ გამო უსაყვედურა და 12 თვის განმავლობაში „ანალოგიური ან/და სხვა სახის დარღვევის შემთხვევაში“ შესაძლო გათავისუფლების შესახებ გააფრთხილა „რეალური სივრცის“ თანამშრომლები: თამარ მშვენიერაძე, იოსებ კაციტაძე და ტუხა კვინიკაძე, პულტის რეჟისორი და შეთავსებით სპორტული არხის რეჟისორი, კახაბერ მელიქიძე, ბრენდინგისა და პრომოციის ჯგუფის რეჟისორი, ირმა ჩუბინიძე, „შაბათ-კვირის შოუს“ კორესპონდენტი ანა აბაკელია, ამავე გადაცემის აღმასრულებელი პროდიუსერი თამარ ჭინჭარაულიც და ტექნიკისა და ტექნოლოგიების მემონტაჟეთა და გრაფიკოსთა ჯგუფის მემონტაჟე-ოპერატორი, გივი კიტია. 

30 აპრილს კი საზოგადოებრივმა მაუწყებელმა გადაცემა „რეალური სივრცის“ თანამშრომლებს წერილობით შეატყობინა, რომ გადაცემა დახურა და მათ მუშაობის გაგრძელება რადიოს დილის გადაცემაში, ვებგვერდზე, პრომოუშენის დეპარტამენტსა და მუსიკალურ გადაცემაზე შესთავაზა. „რეალური სივრცის“ გუნდმა ტელევიზიის მენეჯმენტის შეთავაზებაზე უარი თქვა: 

„მენეჯმენტის მიერ გამოგზავნილ შეთავაზებაზე ხელის მოწერა ნიშნავს, რომ საკუთარი ნებით მოვაწეროთ ხელი ამ გადაცემის, ანუ იმ სივრცის დახურვას, რომელიც თქვენთვის შევქმენით.

ამიტომ ჩვენ უარს ვამბობთ მენეჯმენტის შემოთავაზებაზე, რომელმაც უკვე გვითხრა, რომ უარი ნიშნავს ჩვენთან შრომითი ხელშეკრულების გაწყვეტას.

დავარქვათ ყველაფერს თავისი სახელი, საზოგადოებრივი მაუწყებლის დღევანდელმა მენეჯმენტმა, იმ კონკრეტული სახელებით და გვარებით, რომლებსაც შეინახავს ამ არხის საქმის წარმოების დეპარტამენტი, დახურა 12-წლიანი ისტორიის გადაცემა - „რეალური სივრცე“ და უკანონოდ გაუშვა მისი წამყვანი ნინო ზაუტაშვილი“.

ნინო ზაუტაშვილი, ვასილ ივანოვ-ჩიქოვანი და  ტელევიზიის თანამშრომელთა გაერთიანების - „საზოგადოებრივი მაუწყებლის მცველები“  წევრები „პირველი არხის“ სარედაქციო პოლიტიკას ღიად აკრიტიკებენ და პოლიტიკურ გავლენებზე საუბრობენ. 

-------------------

საზოგადოებრივი მაუწყებლის გადაწყვეტილებებს წინ უძღვოდა ე.წ. მოკვლევა, რომლის ჩატარებაც არხის იურისტს, ელენე მიხაილოვას ტელევიზიის სამეურვეო საბჭოს თავმჯომარემ, ვასილ მაღლაფერიძემ დაავალა. ტელევიზიაში დაწყებული „მოკვლევის“ შედეგებთან დაკავშირებით საზოგადოებრივი მაუწყებლის სამეურვეო საბჭოს 8 წევრმა სამუშაო შეხვედრა 21 მარტს გამართა. 24 მარტს კი „პირველმა არხმა“ განაცხადა, რომ თანამშრომელთა მიერ საჯაროდ გავრცელებული განცხადებები „საზოგადოებრივი მაუწყებლის მიმართ ცრუ ბრალდებების ტირაჟირებას და მედიაორგანიზაციის იმიჯის, ნდობის დაზიანებას“ იწვევდა და რეაგირების გარეშე ვერ დარჩებოდა. 

საზოგადოებრივ მაუწყებელში მიმდინარე მოვლენებს კრიტიკულად აფასებს არაერთი საერთაშორისო და ადგილობრივი სამოქალაქო საზოგადოებრის ორგანიზაციაც. 

„რა ხდება საზოგადოებრივ მაუწყებელში“ - სარედაქციო დამოუკიდებლობის მონიტორინგის ანგარიშის მიხედვით, „ქართული ოცნების“ სასარგებლოდ მიკერძოების გამო საზოგადოებრივი მაუწყებლის მიმართ კითხვის ნიშნები მრავალი წლის განმავლობაში არსებობდა, თუმცა ბოლო თვეების განმავლობაში ქვეყანაში განვითარებულმა მოვლენებმა კიდევ ერთხელ გამოკვეთა მისი როლი მკვეთრად „ქართული ოცნების“ მიმართ კეთილგანწყობილი პოლიტიკის გატარების კუთხით. მაუწყებლის სარედაქციო პოლიტიკასა და მენეჯმენტის გადაწყვეტილებებზე დაკვირვებამ კი ნათლად აჩვენა, რომ „ქართული ოცნება“ საზოგადოებრივ მაუწყებელსაც პროპაგანდისტულ იარაღად იყენებს, მათ შორის დეზინფორმაციისა და ანტიდასავლური ნარატივის გასავრცელებლად. არხის მენეჯმენტი ღიად დევნის იმ თანამშრომლებსაც, რომლებიც მაუწყებლის  სარედაქციო პოლიტიკის გამო პროტესტს ღიად გამოხატავენ.

შინაგან საქმეთა სამინისტრომ „ბათუმელები“/„ნეტგაზეთის“ დამფუძნებლისა და დირექტორის, მზია ამაღლობელის წინააღმდეგ კიდევ ერთი ახალი ადმინისტრაციული საქმე დაიწყო. სასამართლო პროცესი ბათუმის საქალაქო სასამართლოში დღეს, 12:00 საათზე გაიმართება. 

შსს მზია ამაღლობელს 11 იანვარს, აჭარის პოლიციის დეპარტამენტის წინ, დამხმარე ნაგებობაზე სტიკერის გაკვრის გამო იერსახის დამახინჯებას ედავება. 

მოსამართლე სალიხ შაინიძემ ამაღლობელი პირველ ადმინისტრაციულ საქმეზე სამართალდამრღვევად 18 მარტს ცნო და 2 000 ლარით დააჯარიმა.

პოლიცია „ბათუმელებისა“ და „ნეტგაზეთის“ დამფუძნებელსა და დირექტორს ადმინისტრაციულ სამართალდარღვევათა კოდექსის 173-ე მუხლით გათვალისწინებული ქმედების ჩადენას ედავებოდა, თუმცა „საქართველოს ახალგაზრდა იურისტთა ასოციაციის“ ინფორმაციით, საქმეში შესაბამისი ფაქტების დამადასტურებელი მტკიცებულებები წარმოდგენილი არ იყო და მზია ამაღლობელის წინააღმდეგ პოლიციას ყალბი ადმინისტრაციული დაკავების და სამართალდარღვევის ოქმები ჰქონდა შედგენილი. 

----------------------------
მზია ამაღლობელის დაკავების ოქმში წერია, რომ ის არა სტიკერის გაკვრისთვის, არამედ პოლიციელების სიტყვიერი შეურაცხყოფის გამო დააკავეს. თუმცა, ამაღლობელი სტიკერის გაკვრისთვის, ადმინისტრაციულ სამართალდარღვევათა კოდექსის 150-ე მუხლით რომ დააკავეს, ამას არსებულ ვიდეოჩანაწერში ბათუმის პოლიციის უფროსი, ირაკლი დგებუაძეც ადასტურებს. 

ადვოკატების განმარტებით, რადგან 150-ე მუხლი დაკავების საფუძველი არ არის, ოქმში 173-ე მუხლი სწორედ იმიტომ ჩაიწერა, რომ მზია ამაღლობელის დაკავების საფუძველი შექმნილიყო. 
----------------------------

მზია ამაღლობელის სისხლის სამართლის საქმის არსებითი განხილვა კი ბათუმის საქალაქო სასამართლოში მიმდინარეობს. ამაღლობელს ირაკლი დგებუაძისთვის, ბათუმის პოლიციის უფროსისთვის სილის გაწვნის გამო 4-დან 7 წლამდე პატიმრობა ემუქრება.

„საქართველოს ახალგაზრდა იურისტთა ასოციაციამ“ „ბათუმელებისა“ და „ნეტგაზეთის“ დამფუძნებლის, მზია ამაღლობელის სახელით 28 აპრილს  საჩივრით ადამიანის უფლებათა ევროპულ სასამართლოსაც მიმართა. 

ამაღლობელის დაუყოვნებლივ გათავისუფლებას 300-ზე მეტი ჟურნალისტი, რედაქტორი, მედიამენეჯერი და პრესის თავისუფლებისა და ჟურნალისტების უფლებების დამცველი 80-ზე მეტი ორგანიზაცია ითხოვს. 18 მარტიდან „ბათუმელები“/„ნეტგაზეთის“ დამფუძნებელისა და დირექტორის სასამართლო პროცესების მონიტორინგი დაიწყო მსახიობ ჯორჯ კლუნისა და უფლებადამცველ ამალ კლუნის ფონდმა. ამაღლობელის საქმეში სამართლიანობის მოთხოვნით კამპანია დაიწყო ადამიანის უფლებადამცველი საერთაშორისო ორგანიზაცია Amnesty International-მაც. 

„მედიის ადვოკატირების კოალიცია“ მკაცრად გმობს საზოგადოებრივი მაუწყებლის ხელმძღვანელობის გადაწყვეტილებას დახუროს გადაცემა „რეალური სივრცე“, უკანონოდ გაათავისუფლოს მისი წამყვანი ნინო ზაუტაშვილი, გააფრთხილოს ჟურნალისტები და შექმნას არასათანადო სამუშაო გარემო. 

კოალიციის განცხადებით, საზოგადოებრივი მაუწყებლის გადაწყვეტილება მიზანმიმართული რეპრესიული ქმედებაა იმ ჟურნალისტების წინააღმდეგ, რომლებიც ღიად აკრიტიკებდნენ მაუწყებლის მიკერძოებულ სარედაქციო პოლიტიკას, ამხელდნენ მასში არსებულ პოლიტიკურ გავლენებსა და პროპაგანდას „ქართული ოცნების“ სასარგებლოდ.  

„მაუწყებლის დირექტორმა თინათინ ბერძენიშვილმა და სამეურვეო საბჭოს თავმჯდომარე ვასილ მაღლაფერიძემ და მათმა მომხრე საბჭოს წევრმა, მედიაში შექმნა ისეთი პირობები, რომლებიც გადაცემის გუნდს არ აძლევს საკუთარი პროფესიული მოვალეობის შესრულების შესაძლებლობას. გუნდისთვის შეთავაზებული სამუშაო პირობები წარმოადგენს მიზანმიმართულ მცდელობას გუნდის დასანაწევრებლად და პროფესიული საქმიანობის შესაძლებლობის წასართმევად. სამწუხაროდ, მაუწყებლის ხელმძღვანელობა არა მხოლოდ იყენებს სამსახურიდან უკანონო გათავისუფლების მეთოდს, არამედ ასევე მიმართავს დისციპლინურ სანქციებს კრიტიკულად განწყობილი თანამშრომლების წინააღმდეგ“.

„მედიის ადვოკატირების კოალიცია“ აღნიშნავს, რომ თინათინ ბერძენიშვილისა და ვასილ მაღლაფერიძის ხელმძღვანელობით მაუწყებელი სისტემატურად ახორციელებს დამოუკიდებელი და პროფესიონალი ჟურნალისტების დევნას, მათ შორის ვასილ ივანოვ-ჩიქოვანის, ნინო ზაუტაშვილისა და „რეალური სივრცის" გუნდის სხვა წევრების მიმართ. 

„ეს ქმედებები მიმდინარეობს იმ ფონზე, როდესაც საზოგადოება აქტიურად ითხოვს მაუწყებლისგან თავისი კონსტიტუციური ვალდებულებების შესრულებას და ხალხის ხმის გაჟღერებას, ხოლო ზემოხსენებული ჟურნალისტები ღიად ითხოვდნენ ეთერების გახსნას და მოქალაქეების სათანადო ინფორმირებას.

მაუწყებლის ხელმძღვანელობის ქმედებები პირდაპირ ეწინააღმდეგება საზოგადოებრივი მაუწყებლის მანდატს და საერთაშორისო სტანდარტებს. მნიშვნელოვანია აღინიშნოს, რომ საზოგადოებრივი მაუწყებლის ხელმძღვანელობა მოხსენიებულია ევროპარლამენტის რეზოლუციაში, რომელიც მათ წინააღმდეგ სანქციების დაწესებისკენ მოუწოდებს. ეს კიდევ ერთხელ ადასტურებს, რომ მათი საქმიანობა შორს არის დემოკრატიული სტანდარტებისგან და მხოლოდ ივანიშვილის რეჟიმის ინტერესებს ემსახურება“.

კოალიცია, რომელიც ადამიანის უფლებების დამცველ და მედიის საკითხებზე მომუშავე 17 ორგანიზაციას აერთიანებს, საზოგადოებრივი მაუწყებლის დამოუკიდებელ ჟურნალისტებს სრულ სოლიდარობას უცხადებს და მიიჩნევს, რომ მათ მიერ გამოჩენილი პროფესიული სიმამაცე და ჟურნალისტური სტანდარტებისადმი ერთგულება მთელი ქართული მედიისთვის მაგალითია.

„საზოგადოებრივი მაუწყებელი უნდა იყოს ხალხის საკუთრება და არა ბიძინა ივანიშვილის „ქართული ოცნების“ პროპაგანდისტული რუპორი. ჩვენ გავაგრძელებთ ბრძოლას, რათა მაუწყებელმა შეასრულოს თავისი კონსტიტუციური ვალდებულება და ემსახუროს საზოგადოების ინტერესებს“, - ვკითხულობთ კოალიციის განცხადებაში. 

გადაცემა „რეალური სივრცის“ გუნდმა ტელევიზიის მენეჯმენტის შეთავაზებაზე: მუშაობა გაეგრძელებინათ რადიოს დილის გადაცემაში, ვებგვერდზე, პრომოუშენის დეპარტამენტსა და მუსიკალურ გადაცემაზე, უარი თქვა. საზოგადოებრივმა მაუწყებელმა „რეალური სივრცის“ დახურვის შესახებ თანამშრომლებს 30 აპრილს, წერილობით შეატყობინა. მანამდე კი, 11 აპრილს, „პირველმა არხმა“ სამსახურიდან ამ გადაცემის წამყვანი, ნინო ზაუტაშვილი და საინფორმაციო გამოშვება „მოამბის“ წამყვანი, ვასილ ივანოვ-ჩიქოვანი გაათავისუფლა. 

საზოგადოებრივი მაუწყებლის გადაცემა „რეალური სივრცის“ გუნდმა ტელევიზიის მენეჯმენტის შეთავაზებაზე: მუშაობა გაეგრძელებინათ რადიოს დილის გადაცემაში, ვებგვერდზე, პრომოუშენის დეპარტამენტსა და მუსიკალურ გადაცემაზე, უარი თქვა. 

„მენეჯმენტის მიერ გამოგზავნილ შეთავაზებაზე ხელის მოწერა ნიშნავს, რომ საკუთარი ნებით მოვაწეროთ ხელი ამ გადაცემის, ანუ იმ სივრცის დახურვას, რომელიც თქვენთვის შევქმენით.

ამიტომ ჩვენ უარს ვამბობთ მენეჯმენტის შემოთავაზებაზე, რომელმაც უკვე გვითხრა, რომ უარი ნიშნავს ჩვენთან შრომითი ხელშეკრულების გაწყვეტას.

დავარქვათ ყველაფერს თავისი სახელი, საზოგადოებრივი მაუწყებლის დღევანდელმა მენეჯმენტმა, იმ კონკრეტული სახელებით და გვარებით, რომლებსაც შეინახავს ამ არხის საქმის წარმოების დეპარტამენტი, დახურა 12-წლიანი ისტორიის გადაცემა - „რეალური სივრცე“ და უკანონოდ გაუშვა მისი წამყვანი ნინო ზაუტაშვილი“, - გუნდის გადაწყვეტილება საზოგადოებას „რეალური სივრცის“ კორესპონდენტმა, თამარ მშვენიერაძემ დღეს გამართულ პრესკონფერენციაზე გააცნო. 

მათი შეფასებით, მენეჯმენტის განზრახვა გუნდის დანაწევრებაა, რათა „მისმა ვერცერთმა წევრმა ვერ მოახერხოს იმის გაკეთება, რისი კეთების გამოცდილება და კვალიფიკაციაც აქვს, არ აკეთოს გადაცემა, რომელიც ვფიქრობთ, ახლა განსაკუთრებით სჭირდება საზოგადოებას, რომელიც პირდაპირ პასუხობს საზოგადოებრივი მაუწყებლის მთავარ ფუნქციას - ისმოდეს საზოგადოების ხმა საზოგადოებრივ მაუწყებელზე“.

საზოგადოებრივმა მაუწყებელმა გადაცემა „რეალური სივრცის“ დახურვის შესახებ თანამშრომლებს 30 აპრილს, წერილობით შეატყობინა:

„როგორც თქვენთვის ცნობილია, საზოგადოებრივი მაუწყებლის მედიის თოქ-შოუს - „რეალური სივრცე“, ეწურება საპროექტო ვადა 1 მაისს. იმის გათვალისწინებით, რომ 2025 წლის 11 აპრილს შრომითი ურთიერთობა შეწყდა აღნიშნული თოქ-შოუს წამყვანთან და სახესთან, ხსენებული თოქ-შოუს საპროექტო ვადის გაგრძელება აღარ იგეგმება“.

ნინო ზაუტაშვილის გათავისუფლებასთან ერთად, არხის გენერალურმა დირექტორმა, თინათინ ბერძენიშვილმა „საჯარო სივრცეში გავრცელებული განცხადებებით მაუწყებლის სარედაქციო დამოუკიდებლობისა და მიუკერძოებლობის ეჭვქვეშ დაყენება და ამის შედეგად, დამსაქმებლისთვის რეპუტაციული ზიანის მიყენების“ გამო უსაყვედურა და 12 თვის განმავლობაში „ანალოგიური ან/და სხვა სახის დარღვევის შემთხვევაში“ შესაძლო გათავისუფლების შესახებ გააფრთხილა „რეალური სივრცის“ თანამშრომლები: თამარ მშვენიერაძე, იოსებ კაციტაძე და ტუხა კვინიკაძეც. 

11 აპრილს „პირველმა არხმა“ სამსახურიდან გაათავისუფლა საინფორმაციო გამოშვება „მოამბის“ წამყვანი, ვასილ ივანოვ-ჩიქოვანიც. 

ნინო ზაუტაშვილი, ვასილ ივანოვ-ჩიქოვანი და ტელევიზიის გენერალური დირექტორის მიერ გაფრთხილებული თანამშრომლები „პირველი არხის“ სარედაქციო პოლიტიკას ღიად აკრიტიკებენ და პოლიტიკურ გავლენებზე საუბრობენ. 

„რეალური სივრცე“ ტელევიზიიდან რადიოს ეთერში 2024 წლის შემოდგომიდან, ტელევიზიის ახალ შენობაში გადასვლის პროცესის საფუძვლით, გადავიდა.