„საქართველოს ჟურნალისტური ეთიკის ქარტია“ საქართველოს იუსტიციის უმაღლეს საბჭოს მოუწოდებს, სასწრაფოდ განმარტოს, გეგმავს თუ არა სასამართლო ჟურნალისტებისთვის სასამართლოს შენობაში მობილური ტელეფონების გამოყენების აკრძალვას. 

„როგორც საქართველოს ჟურნალისტური ეთიკის ქარტიისთვის მედიიდან გახდა ცნობილი, საერთო სასამართლოების დეპარტამენტმა 19 სასამართლოსთვის, რომელთა შორის არის თბილისის საქალაქო სასამართლო და თბილისის სააპელაციო სასამართლო, სხვადასხვა სახის ავეჯი შეისყიდა. ამ შესყიდვის ნაწილია კარადები მობილური ტელეფონების შესანახი ასობით დანომრილი და საკეტიანი სათავსოთი.

იუსტიციის უმაღლესი საბჭოს 2025 წლის 17 ივლისის დადგენილებით, სასამართლოს მანდატურს აქვს უფლება, არ დაუშვას სასამართლო სხდომის დარბაზში ფოტო-, კინო-,  ვიდეოგადაღების, ტრანსლაციის და აუდიოჩანაწერის ფუნქციის მქონე ნებისმიერი ტექნიკური საშუალების შეტანა. დადგენილება აკონკრეტებს, რომ ამგვარ საშუალებებში მოიაზრება მობილური ტელეფონიც.

ინფორმაციამ მობილური ტელეფონების შესანახი კარადების შესყიდვის შესახებ ჟურნალისტურ თემში განსაკუთრებული  მღელვარება გამოიწვია - გაჩნდა მოლოდინი, რომ ამ კარადების დამონტაჟების შემდგომ ჟურნალისტებს სასამართლოში მუშაობა და  პროცესების გაშუქება კიდევ უფრო გაუჭირდებათ.

საერთო სასამართლოების შესახებ კანონში შეტანილი ცვლილებებით, 28 ივნისიდან სასამართლოს შენობასა და ეზოში ფოტო და ვიდეო გადაღება და აუდიოჩაწერა აკრძალულია. თუმცა ჟურნალისტებს დღემდე აქვთ საშუალება, სასამართლოს შენობაში შეიტანონ მობილური ტელეფონები და ლეპტოპები და სასამართლო სხდომები ფოტო და ვიდეოგამოსახულების და ხმის გარეშე, ლაივ რეჟიმში, ტექსტური სახით გააშუქონ.

ჟურნალისტები დიდ ძალისხმევას იღებენ იმისთვის, რომ აუდიტორიამ მათ რეპორტაჟებში ფოტო და ვიდეო გამოსახულებისა და ხმის დანაკლისი ნაკლებად იგრძნოს. ამის გაკეთებას ჟურნალისტები სიზუსტის ასე ზედმიწევნით დაცვითა და ისეთი მაღალი ოპერატიულობით ვეღარ შეძლებენ, თუკი მათ სასამართლოს დარბაზებში მხოლოდ კალმისა და ფურცლის გამოყენების უფლებას დაუტოვებენ.

თბილისის საქალაქო სასამართლოში ახლა ბევრი ისეთი პროცესი მიმდინარეობს, რომელთა მიმართ საზოგადოების ინტერესი მაღალია. ჟურნალისტებისთვის სამუშაო პირობების გაუარესება საზოგადოებას მათთვის მნიშვნელოვან ინფორმაციაზე წვდომას დააკარგვინებს“, - ვკითხულობთ ქარტიის განცხადებაში. 

ჟურნალისტური ეთიკის ქარტია იმედს იტოვებს, რომ ამგვარი ზომების მიღებისგან იუსტიციის უმაღლესი საბჭო თავს შეიკავებს, ვინაიდან მსგავსი აკრძალვა არ შედის არც სასამართლოების და, რაც მთავარია, არც საზოგადოების ინტერესებში: „საზოგადოებას უნდა ჰქონდეს საშუალება, დროულად მიიღოს სრული ინფორმაცია მართლმსაჯულების აღსრულების პროცესზე მისთვის სანდო მედიასაშუალების დახმარებით“.

 

10-მდე გამომცემლობა თბილისის წიგნის დღეების ფარგლებში უერთდება კამპანიას - „სინათლე არ უნდა ჩაქრეს“. თბილისის წიგნის დღეები „ექსპო ჯორჯიაში“, 14-16 ნოემბერს გაიმართება. 

„სინათლე არ უნდა ჩაქრეს“ - 22 დამოუკიდებელი ონლაინ გამოცემის ერთობლივი კამპანიაა, რომლის მიზანიც დამოუკიდებელი მედიის დასაცავად მხარდამჭერების გაერთიანებაა. პლატფორმაზე - sinatle.media ერთ ანგარიშზე ჩარიცხვით მათი მხარდაჭერა ერთად არის შესაძლებელი.

გამომცემლები, რომლებიც კამპანიას - „სინათლე არ უნდა ჩაქრეს“ უერთდებიან:

„მატარებელის“ ინიციატივით, თბილისის წიგნის დღეებზე გაყიდული ყოველი წიგნიდან თუ სხვა ნაწარმიდან, ერთი ლარი „სინათლე მედიის“ მხარდასაჭერად გადაირიცხება:

„ჩვენი ეს მხარდაჭერა შესაძლოა ზღვაში წვეთი იყოს, მაგრამ ბნელ მიწაში სიცოცხლეს წვეთები აღვივებენ!“

„ზიარი“ კი წერს, რომ დამოუკიდებელი მედია ყველა მოქალაქის თავისუფლების ქვაკუთხედია: 

„14-16 ნოემბერს წიგნის დღეებზე ადამ ზამოისკის წიგნის „ვარშავა 1920 - რუსეთის მარცხი ევროპაში“ გაყიდვიდან შემოსული თანხა გადაერიცხება დამოუკიდებელი მედიის მხარდაჭერის ფონდს“.

„მათი ძლიერი შუქი ჩვენთვის, ჩვენი ქვეყნისთვის სასიცოცხლოდ მნიშვნელოვანია“ - თბილისის წიგნის დღეებზე ქართული პროზის გაყიდული წიგნებიდან შემოსული თანხის ნაწილს დამოუკიდებელ მედიებს გადაურიცხავს „სულაკაურის გამომცემლობა“. 

„სინათლე მედიისთვის“ სერია Magnum Opus-ის ყველა გაყიდული ეგზემპლარიდან შემოსულ 30%-ს გადარიცხავს „ინტელექტიც“.

ქართულ დამოუკიდებელ მედიებს მხარს უჭერს „პალიტრა L“: „სწორედ ამ კამპანიის ფარგლებში, თბილისის წიგნის დღეებზე, 14, 15 და 16 ნოემბერს სერია „ლიტერე ინვენტეს” გაყიდული წიგნებიდან შემოსული თანხის ნაწილს გადავურიცხავთ დამოუკიდებელ მედიებს“. 

ქართველი ავტორების გაყიდული წიგნებიდან მიღებული თანხის ნაწილს მედიების მხარდასაჭერად გადარიცხავს „მედუზა“.  

დამოუკიდებელი მედიების მხარდასაჭერად ნაირა გელაშვილის საბავშვო წიგნების გაყიდვიდან შემოსული თანხის ნახევარს გადარიცხავს „ალონიც“.

„წიგნები ვაკეში“ კი წერს, „წიგნის დღეებზე თითოეული გაყიდული წიგნის თანხიდან, ლარი გადაირიცხება დამოუკიდებელი მედიის მხარდაჭერის ფონდში. „სინათლე არ უნდა ჩაქრეს“ ერთად ყველაფერს შევძლებთ!“

განახლება: კამპანიას - „სინათლე არ უნდა ჩაქრეს“ კიდევ 5 გამომცემლობა შეუერთდა.

ქართულ დამოუკიდებელ მედიებს მხარს უჭერს „დიოგენე“ და სერია „დიოგენე NONFICTION” გაყიდული წიგნებიდან შემოსული თანხის ნაწილს მათ გადაურიცხავს.

თბილისის წიგნის დღეებზე შემოსული თანხის ნაწილს დამოუკიდებელ მედიებს გადაურიცხავს „მოუბარიც“. 

„სიესტა“ კი წერს, რომ „თავისუფალი მედიის გარეშე არ არსებობს დემოკრატია!“ და აცხადებს აქციას: „გადაიხადე, რამდენიც გინდა ვაცლავ ჰაველის წიგნში „ძალა უძალოთა“ (მინიმალური ფასი - 5 ლარი). 5 ლარამდე გადახდილი თანხის 10% გადაირიცხება თავისუფალი ონლაინმედიის დასახმარებელ ფონდში, ხოლო 5 ლარზე მეტის გადახდის შემთხვევაში, მთელი ნამატი თანხა იმავე ფონდის შევსებას მოხმარდება“.

„აზროვნების აკადემიის გამომცემლობას“ სჯერა, რომ „თავისუფალი და დამოუკიდებელი მედია თავისუფალი და დამოუკიდებელი ქვეყნის წინაპირობაა“ და თბილისის წიგნის დღეებზე გაყიდული წიგნებიდან შემოსული თანხის ნაწილს დამოუკიდებელ მედიებს გადაურიცხავს.

„აგორა“ კი წერს, რომ დამოუკიდებელი მედიების დასახმარებელ ფონდში კოლექცია „კვალის“ დეტექტივების გაყიდვით მიღებული შემოსავლის 50%-ს გადარიცხავს.

კამპანიას - „სინათლე არ უნდა ჩაქრეს“ შეუერთდნენ ავტორებიც: ლელა ცუცქირიძე და ვასილ გულეური.

 

 

აფგან სადიგოვს პარლამენტის მიმდებარე ტერიოტირაზე გზის ხელოვნურად გადაკეტვის საბაბით ადმინისტრაციული პატიმრობა მეორედ შეუფარდეს. მოსამართლე ნინო ენუქიძემ მას 7-დღიანი ადმინისტრაციული პატიმრობა მიუსაჯა. 

შსს აზერბაიჯანელ ჟურნალისტს გზის გადაკეტვას ამჯერად 19-21 ოქტომბერს ედავებოდა. სადიგოვი 18 ოქტომბრის აქციაზე გზის გადაკეტვის საბაბით სამართალდამრღვევად ერთხელ უკვე ცნეს და 14-დღიანი ადმინისტრაციული პატიმრობა შეუფარდეს. მან დროებითი მოთავსების იზოლატორი 5 ნოემბერს დატოვა. 

„სოციალური სამართლიანობის ცენტრის“ განცხადებით, რომელიც აზერბაიჯანელი ჟურნალისტის ინტერესებს იცავს, მაშინ შსს-მ სასამართლოს დანარჩენ დღეებთან დაკავშირებით განზრახ არ მიმართა, რათა მას აფგან სადიგოვის მიმართ ადმინისტრაციული პატიმრობის გამოყენების შესაძლებლობა ორჯერ ჰქონოდა.

აფგან სადიგოვი აზერბაიჯანელი ჟურნალისტია, რომელიც თბილისში, აზერბაიჯანის მოთხოვნით, შარშან დააკავეს. სადიგოვი საექსტრადიციო პატიმრობაში თითქმის 9 თვე იმყოფებოდა. მან პროტესტის ნიშნად 161 დღე იშიმშილა.

გამოცემა „ინდიგოს“ განცხადებით, ანტიკორუფციულმა ბიურომ სხვა მეგობარი ორგანიზაციების მსგავსად, „ინდიგოს“ მიმართაც დაიწყო წარმოება „გრანტების შესახებ“ კანონის საფუძველზე. 

„რადგან მთელი ჩვენი საქმიანობა ღია კომუნიკაციასა და მხოლოდ თქვენს ნდობაზე დგას, გვინდა ეს ამბავიც იცოდეთ. ცხადია, ჩვენ ისევ ვაგრძელებთ და ვემსახურებით მისიას, რომელმაც შეგვქმნა - თავისუფალი სიტყვისა და გამოხატვისთვის, თავისუფალი აზრისა და იდეებისთვის ვაგრძელებთ მუშაობას. თქვენ ყველაზე კარგად იცით, რას ვაშუქებთ, რატომ აღვწერთ და როგორ ვყვებით ამბებს.

ახლაც გვჯერა, რომ ამ რთულ დროს, როდესაც ქვეყანაში სამართლიანი მართლმსაჯულების რწმენა დაკარგულია, ერთმანეთის თანადგომა, პრინციპულობა და სიმართლე გაიმარჯვებს. ინდიგო მუდამ დააკვირდება და აღწერს  ყველაფერს, რაც ჩვენ გარშემო ხდება, რაც აღგვაფრთოვანებს, გვიზიდავს, გვაშინებს და შთაგვაგონებს“, - წერს გამოცემა სოციალურ ქსელში.

ანტიკორუფციულმა ბიურომ სექტემბრის ბოლოს საქმის წარმოება დაიწყო ორგანიზაციების: iFact, „მთის ამბები“, „ფლანგვის დეტექტორი“, „რეალპოლიტიკა“, „პროექტი 64“, „საქართველოს ჟურნალისტური ეთიკის ქარტია“ წინააღმდეგაც. 

მაშინ ქართული მედიებისგან ინფორმაციის მოთხოვნის თაობაზე განგაშის სიგნალი ჩართო ევროსაბჭოს „ჟურნალისტების უსაფრთხოების პლატფორმამ“. საქართველოს მთავრობას უცხოური დაფინანსების შესახებ ახალი რეპრესიული კანონების უკან გაწვევისკენ მოუწოდა „ჟურნალისტთა დაცვის კომიტეტმაც“.

„გრანტების შესახებ“ კანონთან დაკავშირებით საკონსტიტუციო სასამართლოს სარჩელებით მიმართა „საქართველოს ახალგაზრდა იურისტთა ასოციაციამ“. ორგანიზაციის შეფასებით, „სადავო ნორმა ანტიკორუფციულ ბიუროს ანიჭებს განუზომელ უფლებამოსილებას, სასამართლოს თანხმობით, არასამთავრობო ორგანიზაციიდან, ბანკებიდან, ნებისმიერი სახელმწიფო დაწესებულებიდან გამოითხოვოს განსაკუთრებული კატეგორიის და სხვა პერსონალური მონაცემების შემცველი ინფორმაციები, ნებისმიერი საიდუმლო ინფორმაცია, გარდა სახელმწიფო საიდუმლოებისა“.

„ქართული ოცნების“ პარლამენტმა 16 აპრილს „გრანტების შესახებ“ კანონში მიიღო ცვლილებები, რომლითაც მთავრობის ნებართვის გარეშე არასამთავრობო ორგანიზაციებისა და მედიისთვის გრანტების გაცემა აიკრძალა. უნებართვო გრანტისთვის კი სასჯელი გრანტის მიმღებს - „საგრანტო თანხის ორმაგი ოდენობით“ დაეკისრება.  

საქართველოში დამოუკიდებელ და კრიტიკულ მედიას მუშაობა რთულ გარემოში უწევს. „ქართულმა ოცნებამ“ ერთიმეორის მიყოლებით მიიღო მედიის შემზღუდავი საკანონმდებლო ცვლილებები. მნიშვნელოვნად შეიზღუდა მედიისთვის სასამართლოში მუშაობაც.

31 მაისიდან ამოქმედდა „უცხოეთის აგენტების რეგისტრაციის აქტიც“, რომელსაც „ქართული ოცნება“ ამერიკული FARA-ს სიტყვასიტყვით ნათარგმნს უწოდებს, სამოქალაქო საზოგადოების ორგანიზაციები კი მიიჩნევენ, რომ ის მიზნად ისახავს დამოუკიდებელი ორგანიზაციებისა და მედიების გაჩუმებას, დისკრედიტაციასა და დევნას. 

„მაუწყებლობის შესახებ“ კანონში შესული ცვლილების საფუძველზე, კომუნიკაციების კომისიამ „უცხოური ძალისგან“ დაფინანსების მიღების შეწყვეტა დაავალა ტელე და რადიო მაუწყებლებს: „ფორმულა“, „ფორმულა მულტიმედია“, „ჟურნალისტთა კავშირი ხალხის ხმა“(რადიო „მარნეული), „რადიო-ტვ ნორი“ და „სისტემა გამა“.

ფოტო: „ბათუმელები“

„ბათუმელები“/„ნეტგაზეთის“ დამფუძნებელი და დირექტორი, პატიმრობაში მყოფი მზია ამაღლობელი პაულ ვაიზის პრემიით დააჯილდოვეს. პაულ ვაიზის პრემია, რომელიც სამოქალაქო საზოგადოების ინიციატივის, Courage2030-ის მიერ გაიცემა, სიმამაცისთვის გადაეცემათ იმ პირებსა და ორგანიზაციებს, რომლებმაც ადამიანის უფლებების დაცვაში განსაკუთრებული წვლილი შეიტანეს.

დაჯილდოების ცერემონიას, რომელიც 10 ნოემბერს, ვენაში გაიმართა, „ნეტგაზეთის“ მთავარი რედაქტორი, ნესტან ცეცხლაძე და „ბათუმელების“ მთავარი რედაქტორი, ეთერ თურაძე დაესწრნენ. ადამიანის უფლებების დაცვაში შეტანილი წვლილისთვის პაულ ვაიზის პრემია წელს მესამედ, სამ კატეგორიაში, მათ შორის ჟურნალისტიკაში გაიცა.

6 ნოემბერს, გერმანიაში, მზია ამაღლობელს გადაეცა თავისუფალი მედიის პრემიაც. Free Media Awards-ი ნორვეგიული The Fritt Ord Foundation-ისა და გერმანული The Zeit Stiftung Bucerius-ის მიერ არის ინიციირებული. ორი ევროპული ფონდი აღნიშნავს, რომ ამაღლობელი საქართველოში დამოუკიდებელი ჟურნალისტიკის სახე გახდა და იგი ჟურნალისტური ეთიკისა და სიმართლის მიმართ 25-წლიანი ერთგულებისთვის არის დაჯილდოებული.

„პრესის თავისუფლების კვირეულის“ ფარგლებში გამართულ დაჯილდოების ცერემონიალზე წაიკითხეს მზია ამაღლობელის გზავნილიც: „მინდა იცოდეთ, რომ ეს პრიზი მარტო მე კი არა, ეკუთვნის ჩემს კოლეგებს, ყველა იმ ქართველ ჟურნალისტს, რომლებიც რეპრესიების პირობებში იცავენ და იბრძვიან სიტყვის თავისუფლებისთვის“.

ამაღლობელის გარდა, თავისუფალი მედიის პრემიის 2025 წლის ლაურეატები გახდნენ: მედია-პლატფორმა Gwara Media (უკრაინა), საგამოძიებო ონლაინ-მედია Direkt 36 (უნგრეთი), ფოტოგრაფი და ფოტოჟურნალისტი ალექსანდრა ასტახოვა (რუსეთი), მედია არხი Belarusian Investigative Center (ბელარუსი), ჟურნალისტი ნარგიზ აბსალამოვა (აზერბაიჯანი). 

22 ოქტომბერს, მზია ამაღლობელს, ბელარუს პატიმარ ჟურნალისტთან ერთად, გადაეცა სახაროვის პრემია. დაჯილდოების ცერემონია 16 დეკემბერს, სტრასბურგში გაიმართება. 

2025 წლის სახაროვის პრემიის ფინალისტები კი იყვნენ: 

„თქვენი და ჩვენი თავისუფლებისთვის მებრძოლი პატიმრები, ანდჟეი პაჩობუტი ბელორუსიდან და მზია ამაღლობელი საქართველოდან“;

„სერბი სტუდენტები“;

„ჟურნალისტები და ჰუმანიტარული დახმარების მუშაკები პალესტინასა და ყველა კონფლიქტურ ზონაში, რომლებსაც წარმოადგენენ პალესტინის ჟურნალისტთა სინდიკატი, წითელი ნახევარმთვარე და UNRWA;“

ანდრეი სახაროვის სახელობის სახაროვის პრემია ევროკავშირის უმაღლესი ჯილდოა ადამიანის უფლებების სფეროში. მას ევროპარლამენტი ყოველწლიურად გადასცემს ფიზიკურ პირებს, ჯგუფებს ან ორგანიზაციებს ადამიანის უფლებების, გამოხატვის თავისუფლებისა და დემოკრატიული ღირებულებების მხარდაჭერის სფეროში მათი მოღვაწეობის აღიარების მიზნით.

მზია ამაღლობელი გახდა 2025 წლის მსოფლიო პრესის თავისუფლების გმირის ჯილდოს მფლობელიც, რომელსაც „პრესის საერთაშორისო  ინსტიტუტი“ (IPI) „საერთაშორისო მედიის მხარდაჭერასთან“ (IMS-სთან) პარტნიორობით ყოველწლიურად გასცემს. 

მსოფლიო პრესის თავისუფლების გმირის ჯილდო 2025 წლის 7 გამარჯვებულს 24 ოქტომბერს, ვენაში, „პრესის საერთაშორისო ინსტიტუტის“ 75-ე წლისთავისადმი მიძღვნილ მსოფლიო კონგრესზე, გადაეცა.

ამაღლობელს გადაეცა „ფორუმ 2000“-ის საერთაშორისო ჯილდოც. ის არის ვაცლავ ჰაველის სახელობის ადამიანის უფლებათა პრემიის 2025 წლის ფინალისტთა სიაშიც.

„ბათუმელებსა“ და მის დამფუძნებლებს, მზია ამაღლობელსა და ეთერ თურაძეს ასევე გადაეცათ „ილია ჭავჭავაძის ეროვნული პრემია - საზოგადოების განვითარებისთვის გაწეული განსაკუთრებული ღვაწლისთვის“.

„ბათუმელები“/„ნეტგაზეთის“ დამფუძნებელსა და დირექტორს, მზია ამაღლობელს 6 აგვისტოს, ბათუმის საქალაქო სასამართლოს მოსამართლე ნინო სახელაშვილმა 2-წლიანი პატიმრობა მიუსაჯა. ის მე-10 თვეა უკანონო პატიმარია. „ბათუმელები“/„ნეტგაზეთის“ დამფუძნებელი და დირექტორი დაკავების დღიდან, 38 დღე შიმშილობდა. პატიმრობაში მას მკვეთრად დაუქვეითდა მხედველობა.

აზერბაიჯანელმა ჟურნალისტმა, აფგან სადიგოვმა, რომელიც „გზის ხელოვნურად გადაკეტვის“ საბაბით იყო დაკავებული, 5 ნოემბერს, 19:16 საათზე, მარნეულის დროებითი მოთავსების იზოლატორი დატოვა. მას 14-დღიანი ადმინისტრაციული პატიმრობა ჰქონდა შეფარდებული.

„მან [ბიძინა ივანიშვილმა] აუცილებლად უნდა მიმართოს ექიმს, რადგან მან ვერ შეიყვარა თავისი ხალხი, ქართველი ხალხი. არც ვიცი, ის ქართველ ხალხს თავისად თვლის თუ უცხოდ. საქართველოს და ქართველ ხალხს მიაქანებს სიღარიბეში, უბედურებაში. ის უბრალოდ პუტინის ბინძურ გეგმას ასრულებს საქართველოში. ჩვენ ვითხოვთ სასწრაფოდ გაათავისუფლონ ყველა პოლიტიკური პატიმარი. ჩვენ ამისთვის ბოლომდე ვიბრძოლებთ,“ - თქვა სადიგოვმა იზოლატორიდან გამოსვლის შემდეგ.



აფგან სადიგოვი 22 ოქტომბერს, დაახლოებით 20:00 საათზე, სახლთან დააკავეს. ოჯახი მას რამდენიმე საათის განმავლობაში ეძებდა. შსს აზერბაიჯანელ ჟურნალისტს გზის ხელოვნურად გადაკეტვის 18 ოქტომბრის აქციაზე ედავებოდა. ამ საბაბით მოსამართლე ზვიად ცეკვავამ სადიგოვს ადმინისტრაციული პატიმრობა 23 ოქტომბერს შეუფარდა.

„სოციალური სამართლიანობის ცენტრის“ ინფორმაციით, სასამართლო გადაწყვეტილების ჩაბარების შემდეგ ორგანიზაციისთვის ცნობილი გახდა, რომ აფგან სადიგოვი დამატებით 55-ჯერ არის დაჯარიმებული 5000 ლარით - გზის სავალი ნაწილის გადაკეტვისთვის: 

„როგორც საქმის მასალებიდან ირკვევა, შსს მას პერიოდულად 2025 წლის 29 ივლისიდან 17 ოქტომბრამდე აჯარიმებდა, თუმცა აღნიშნულის შესახებ ამ პერიოდში მისთვის არავის შეუტყობინებია“.

ცენტრმა ეს ჯარიმები თბილისის საქალაქო სასამართლოში უკვე გაასაჩივრა, „თუმცა არსებული სასამართლო პრაქტიკის ფონზე, მოლოდინი იმისა, რომ სასამართლო ობიექტურად შეაფასებს მტკიცებულებებს და ადამიანის უფლებებზე დაფუძნებულ მიდგომას გამოიყენებს, საკმაოდ მცირეა“.

ორგანიზაციისთვის, რომელიც აზერბაიჯანელი ჟურნალისტის ინტერესებს იცავს, ცხადია, რომ ამ პირობებში არსებობს მაღალი რისკი, რომ „ქართული ოცნება“ ამ რეპრესიულ მექანიზმს აფგან სადიგოვის წინააღმდეგაც გამოიყენებს.

„შეიძლება ითქვას, რომ აფგან სადიგოვის მიმართ ერთი მხრივ სასამართლოს მიერ მიღებული გადაწყვეტილება, ხოლო მეორე მხრივ მის წინააღმდეგ გამოწერილი ათობით ჯარიმა, ნათლად აჩვენებს მიზანს - პროტესტში აქტიურად ჩართული აქტივისტის სამაგალითო დასჯას. ეს ინტერესი, მათ შორის, უკავშირდება აზერბაიჯანის ხელისუფლების ინტერესებს, რომელიც ბაქოში ჟურნალისტის ექსტრადიციას თვეების განმავლობაში აქტიურად ითხოვდა. ექსტრადიციის პროცესის შეჩერება მხოლოდ ევროპული სასამართლოს გადაწყვეტილების შედეგად გახდა შესაძლებელი“, -  ვკითხულობთ SJC-ის განცხადებაში. 

აფგან სადიგოვი აზერბაიჯანელი ჟურნალისტია, რომელიც თბილისში, აზერბაიჯანის მოთხოვნით, შარშან დააკავეს. სადიგოვი საექსტრადიციო პატიმრობაში თითქმის 9 თვე იმყოფებოდა. მან პროტესტის ნიშნად 161 დღე იშიმშილა.

„გზის ხელონურად გადაკეტვის“ საბაბით 19 ოქტომბრიდან დღემდე პოლიციამ არაერთი ჟურნალისტი დააკავა. სასამართლომ მათ ადმინისტრაციული პატიმრობაც შეუფარდა. 

24 ოქტომბერს დააკავეს „პუბლიკას“ ჟურნალისტი ბასტი მგალობლიშვილიც, რომელსაც მოგვიანებით უთხრეს, რომ „სხვაში შეეშალათ“. მგალობლიშვილი აშუქებს რუსთაველის პროტესტსაც. სასამართლო 12 ნოემბერს გააგრძელებს „მედიაჩეკერის“ ჟურნალისტის, ნინია კაკაბაძის ადმინისტრაციული საქმის განხილვასაც. კაკაბაძე, რომელიც რუსთაველის გამზირზე პროფესიულ საქმიანობას ასრულებდა, პოლიციამ „გზის ხელოვნურად გადაკეტვის“ საბაბით 3 ნოემბერს დააკავა და მოგვიანებით გაათავისუფლა.

გუშინ, 5 ნოემბერს, პოლიციამ მანქანაში ძალის გამოყენებით ჩასვა და მალევე გაათავისუფლა ტელეკომპანია „ფორმულას“ ჟურნალისტი, ლიზა ციციშვილი, რომელიც რუსთაველის გამზირზე მიმდინარე აქციას აშუქებდა.

ოქტომბერში „ქართულმა ოცნებამ" გამოხატვის თავისუფლების შემზღუდავი ის საკანონმდებლო ცვლილებები მიიღო, რის საფუძველზეც პოლიციამ „გზის ხელოვნურად გადაკეტვის“ საბაბით პროტესტის ათეულობით მონაწილე დააკავა. ადმინისტრაციულ სამართალდარღვევათა კოდექსში შესული ცვლილებით, შეკრებისა და მანიფესტაციის მონაწილე უალტერნატივოდ 15 დღემდე ვადით ადმინისტრაციული პატიმრობით დაისჯება ტრანსპორტის სავალი ნაწილის ნაწილობრივ ან სრულად გადაკეტვისთვის, თუ რაოდენობის გათვალისწინებით აქციის ჩატარება სხვაგვარად შესაძლებელია.

 

ევროკავშირის გაფართოებასთან დაკავშირებული 2025 წლის ანგარიშის მიხედვით, რომელიც ევროინტეგრაციის გზაზე კანდიდატი ქვეყნების პროგრესს აფასებს, საქართველოში ვითარება კანონის უზენაესობისა და ადამიანის უფლებების კუთხით მკვეთრად გაუარესდა. დოკუმენტში შემზღუდავი საკანონმდებლო ცვლილებების, სამოქალაქო საზოგადოების დევნის, დემონსტრანტების დაკავებებისა და ოპოზიციონერი პოლიტიკოსების პატიმრობასთან ერთად, საუბარია მედიაგარემოზეც.

საქართველოს შესახებ მომზადებულ 90-გვერდიან ანგარიშში ვკითხულობთ, რომ საკანონმდებლო ცვლილებები, მათ შორის: ცვლილებები „მაუწყებლობის შესახებ“ კანონში, „უცხოეთის აგენტების რეგისტრაციის აქტი“ და „ოჯახური ღირებულებებისა და არასრულწლოვანთა დაცვის შესახებ“ კანონები უარყოფითად მოქმედებს გამოხატვის თავისუფლებასა და მედიის თავისუფლად მოქმედების შესაძლებლობაზე:

„ამჟამინდელ კონტექსტში, საქართველომ სასწრაფო ზომები უნდა მიიღოს შემდეგი მიმართულებით:

• გაათავისუფლოს წინასწარი პატიმრობაში მყოფი ჟურნალისტები და უზრუნველყოს, რომ მათ წინააღმდეგ სისხლის სამართლის საქმეები დასრულდეს ადამიანის უფლებათა ევროპული კონვენციითა და ადამიანის უფლებათა ევროპული სასამართლოს (ECtHR) შესაბამისი პრეცედენტული სამართლით დადგენილი კრიტერიუმების შესაბამისად;

• უზრუნველყოს ჟურნალისტების უსაფრთხოება და უზრუნველყოს სწრაფი, მიუკერძოებელი და სათანადო სამართლებრივი რეაგირება ჟურნალისტების წინააღმდეგ თავდასხმის და დაშინების ყველა შემთხვევაზე;აღადგინოს უსაფრთხო და პლურალისტური გარემო, რომელიც მედიას საშუალებას მისცემს, დამოუკიდებლად და შურისძიების ან სამსახურიდან გათავისუფლების შიშის გარეშე განახორციელოს თავისი საქმიანობა;

• გააუქმოს „მაუწყებლობის შესახებ “კანონში შეტანილი ცვლილებები“.

დოკუმენტში აღნიშნულია, რომ საქართველოში მედიაგარემო მნიშვნელოვნად გაუარესდა, გაიზარდა მუქარა, დაშინება და ძალადობა ჟურნალისტების მიმართ:

„FARA დამატებით ზეწოლას ახდენს სამოქალაქო საზოგადოებასა და დამოუკიდებელ მედიაზე, იმის გათვალისწინებით, რომ მისი მოთხოვნების შეუსრულებლობამ შეიძლება ხუთ წლამდე თავისუფლების აღკვეთა გამოიწვიოს. „მაუწყებლობის შესახებ“ შესწორებული კანონი კომუნიკაციების კომისიას მეტ უფლებამოსილებას ანიჭებს მაუწყებლობის კონტენტის კონტროლის თვალსაზრისით და კრძალავს აუდიოვიზუალური მაუწყებლების პირდაპირ ან ირიბ დაფინანსებას უცხოური სუბიექტების მიერ. ეს მოვლენები კიდევ უფრო აძლიერებს გამოხატვის თავისუფლებაზე იმ შემაფერხებელ ეფექტს, რაც უცხოური გავლენის გამჭვირვალობის შესახებ კანონს ჰქონდა, სტიგმატიზაციას უკეთებს უცხოური დაფინანსების მიმღებ მედიასაშუალებებს და მათ დამამძიმებელ მოთხოვნებს უქმნის“.

ანგარიშში ყურადღებაა გამახვილებული 2024 წლის 29 ნოემბრიდან 2025 წლის 4 ივნისის ჩათვლით პერიოდში მომხდარ ჟურნალისტურ საქმიანობაში ხელშეშლის 150-ზე მეტ შემთხვევაზეც:

„სპეციალური დანიშნულების რაზმებისა და პოლიციის მიერ ჟურნალისტების მიმართ ძალადობის შესახებ ინფორმაციის მიუხედავად, მათ შორის ფიზიკური შეურაცხყოფისა და მათი აღჭურვილობის განადგურების შესახებ, ამ ინციდენტებიდან არცერთს არ მოჰყოლია ბრალდება ან გამამტყუნებელი განაჩენი, რის გამოც დამნაშავეები დაუსჯელები დარჩნენ. მრავალ ჟურნალისტსა და მედიის თანამშრომელს არაპროპორციული ადმინისტრაციული ჯარიმები დაეკისრა ან თვითნებურად დააკავეს სამუშაოს შესრულებისას. ონლაინ მედია „ბათუმელების“ დამფუძნებელი და დირექტორი საპროტესტო აქციების დროს დააკავეს და ორწლიანი პატიმრობა მიუსაჯეს. გრძელდება SLAPP (სტრატეგიული სამართალწარმოება სამოქალაქო ჩართულობის წინააღმდეგ) სარჩელების გამოყენება. საჭიროა ევროკავშირის ანტი-SLAPP დირექტივასთან და რეკომენდაციასთან შესაბამისობის უზრუნველყოფა“.

საქართველოს საზოგადოებრივი მაუწყებლის შეფასებისას კი, ვკითხულობთ, რომ არხს არ გააჩნია დამოუკიდებლობა და მიკერძოებული სარედაქციო პოლიტიკა აქვს:

„საქართველოს საზოგადოებრივ მაუწყებელს არ გააჩნია დამოუკიდებლობა, აქვს მიკერძოებული სარედაქციო პოლიტიკა და ხელს უწყობს ევროკავშირის საწინააღმდეგო რიტორიკის პოპულარიზაციას. 2024 წლის ოქტომბრის საპარლამენტო არჩევნებამდე მან არაპროპორციულად გამოყო საეთერო დრო, საარჩევნო კამპანიის გაშუქების უმეტესი ნაწილი (61%) „ქართულ ოცნებაზე“ იყო ფოკუსირებული. 2025 წლის აპრილში, სხვა კანდიდატების არარსებობის პირობებში, „ქართული ოცნების“ ყოფილი მაღალჩინოსანი პოლიტიკოსი ხელახლა აირჩიეს საზოგადოებრივი მაუწყებლის საბჭოს თავმჯდომარედ. საბჭოსა და მენეჯმენტის წინააღმდეგ საჩივრებია შეტანილი საზოგადოებრივი ინტერესების დაუცველობისა და მოსაზრებების მრავალფეროვნების უგულვებელყოფისთვის საპროტესტო აქციების გაშუქებაზე უარის თქმის გამო.

რამდენიმე ჟურნალისტი სამსახურიდან გაათავისუფლეს მას შემდეგ, რაც მათ გააკრიტიკეს მაუწყებლის გადაწყვეტილება, დაეხურა ხელისუფლებისადმი კრიტიკულად განწყობილი ტოქშოუ“.

ევროკავშირის გაფართოებასთან დაკავშირებული 2025 წლის ანგარიში 4 ნოემბერს გამაოქვეყნა.

„საქართველოს ჟურნალისტური ეთიკის ქარტია“ მოითხოვს, დაუყოვნებლივ შეწყდეს ადმინისტრაციული საქმის წარმოება მისი მედიაპლატფორმის „მედიაჩეკერის“ ჟურნალისტის, ნინია კაკაბაძის მიმართ და გაუქმდეს შედგენილი ადმინისტრაციული სამართალდარღვევის ოქმი.

ქარტიის განცხადებით, „მედიაჩეკერის“ ჟურნალისტები პროევროპული პროტესტის დაწყების დღიდან აშუქებენ საპროტესტო აქციებს, პარლამენტის მიმდებარე ტერიტორიაზე თუ სხვა ლოკაციებზე. ნინია კაკაბაძე 3 ნოემბერსაც პროფესიულ მოვალეობას ასრულებდა. ის იდგა არა მანიფესტანტებთან, არამედ სხვა ჟურნალისტებთან ერთად და კადრებს იღებდა. 

ჟურნალისტური ეთიკის ქარტია პროფესიული მოვალეობის შესრულების დროს, ნინია კაკაბაძისა და სხვა ჟურნალისტების დაკავებას დამოუკიდებელ მედიაზე ზეწოლის და კრიტიკული ხმების ჩახშობის მცდელობად მიიჩნევს.

„გუშინ, 3 ნოემბერს, დაახლოებით 22:00 საათზე, პოლიციამ დააკავა საქართველოს ჟურნალისტური ეთიკის ქარტიის მედიაპლატფორმის „მედიაჩეკერის“ ჟურნალისტი ნინია კაკაბაძე. შსს მას, სავარაუდოდ, გზის ხელოვნურად გადაკეტვას ედავება. ნინია კაკაბაძე რუსთაველის გამზირიდან, სადაც ის პროფესიულ მოვალეობას ასრულებდა, სახლში ბრუნდებოდა, რა დროსაც დააკავეს და კახეთის გზატკეცილზე მდებარე შინაგან საქმეთა სამინისტროს შენობაში გადაიყვანეს. 

ჟურნალისტის თქმით, მას დიდი ხნის განმავლობაში არ აძლევდნენ მცირეწლოვან შვილთან დარეკვის საშუალებას, რომელიც სახლში მარტო იმყოფებოდა. მოგვიანებით ნინია კაკაბაძე გაათავისუფლეს. სასამართლო მის მიმართ შედგენილ სამართალდარღვევის ოქმთან დაკავშირებით სავარაუდოდ დღეს, 4 ნოემბერს, იმსჯელებს. 

„მედიაჩეკერის“ ჟურნალისტები პროევროპული პროტესტის დაწყების დღიდან აშუქებენ საპროტესტო აქციებს, პარლამენტის მიმდებარე ტერიტორიაზე თუ სხვა ლოკაციებზე. ისინი ფოტო და ვიდეოკამერაზე ასახავენ ჟურნალისტების უფლებების დარღვევის შესაძლო ფაქტებსაც.

როგორც ვიდეოკადრებიდან ჩანს, ნინია კაკაბაძე 3 ნოემბერსაც პროფესიულ მოვალეობას ასრულებდა. ის იდგა არა მანიფესტანტებთან, არამედ სხვა ჟურნალისტებთან ერთად და კადრებს იღებდა. 

ნინია კაკაბაძის და სხვა ჟურნალისტების დაკავებას პროფესიული მოვალეობის შესრულების დროს, ჟურნალისტური ეთიკის ქარტია დამოუკიდებელ მედიაზე ზეწოლის და კრიტიკული ხმების ჩახშობის მცდელობად მიიჩნევს. 

ჟურნალისტური ეთიკის ქარტია მოითხოვს, დაუყოვნებლივ შეწყდეს ადმინისტრაციული საქმის წარმოება მისი მედიაპლატფორმის „მედიაჩეკერის“ ჟურნალისტის, ნინია კაკაბაძის, მიმართ და გაუქმდეს შედგენილი ადმინისტრაციული სამართალდარღვევის ოქმი“ - ვკითხულობთ ქარტიის განცხდებაში.

„გზის ხელონურად გადაკეტვის“ საბაბით 19 ოქტომბრიდან დღემდე პოლიციამ არაერთი ჟურნალისტი დააკავა. სასამართლომ მათ ადმინისტრაციული პატიმრობაც შეუფარდა. 24 ოქტომბერს დააკავეს „პუბლიკას“ ჟურნალისტი ბასტი მგალობლიშვილიც, რომელსაც მოგვიანებით უთხრეს, რომ „სხვაში შეეშალათ“. მგალობლიშვილი რუსთაველის პროტესტსაც აშუქებს. 

ოქტომბერში „ქართულმა ოცნებამ" გამოხატვის თავისუფლების შემზღუდავი ის საკანონმდებლო ცვლილებები მიიღო, რის საფუძველზეც პოლიციამ „გზის ხელოვნურად გადაკეტვის“ საბაბით პროტესტის ათეულობით მონაწილე დააკავა. ადმინისტრაციულ სამართალდარღვევათა კოდექსში შესული ცვლილებით, შეკრებისა და მანიფესტაციის მონაწილე უალტერნატივოდ 15 დღემდე ვადით ადმინისტრაციული პატიმრობით დაისჯება ტრანსპორტის სავალი ნაწილის ნაწილობრივ ან სრულად გადაკეტვისთვის, თუ რაოდენობის გათვალისწინებით აქციის ჩატარება სხვაგვარად შესაძლებელია.

 

(ფოტო: „პუბლიკა“)

„მედიაჩეკერის“ ჟურნალისტი ნინია კაკაბაძე, რომელიც პოლიციამ 3 ნოემბერს, დაახლოებით 22:00 საათზე, დააკავა, თავისუფალია. კაკაბაძის თქმით, სასამართლო მის მიმართ შედგენილ ადმინისტრაციულ სამართალდარღვევის ოქმთან დაკავშირებით ხვალ, 4 ნოემბერს იმსჯელებს. შსს მას „გზის ხელოვნურად გადაკეტვას“ ედავება. ნინია კაკაბაძე რუსთაველის გამზირზე პროფესიულ საქმიანობას ასრულებდა, ეკეთა პრესის მაიდენტიფიცირებელი ბარათიც. 

როგორც კაკაბაძე ჰყვება, ის რუსთაველის გამზირიდან სახლისკენ მიმავალ გზაზე დააკავეს და კახეთის გზატკეცილზე მდებარე შინაგან საქმეთა სამინისტროს შენობაში მიიყვანეს:

„ბავშვთან დარეკვის უფლებას არ მაძლევდნენ ძალიან დიდ ხანს. დაახლოებით 20 პოლიციელისგან მხოლოდ ერთი აღმოჩნდა გულისხმიერი, რომელმაც, როგორც იქნა, დამთანხმდა და მომცა საშუალება, რომ ბავშვთან დამერეკა, ნიკოსთან, რომელიც სახლში მარტო იყო და ვერ გავაფრთხილე აქამდე, რომ 22:00 საათზე, როდესაც წავედი უკვე სახლისკენ, რომ სახლში ავსულიყავი და დამაპატიმრეს, სადღაც 12-ის წუთებზე ძლივს დამარეკინეს, მანამდე არ მარეკინებდნენ. ადვოკატთან ბოლომდე არ დამარეკინეს, მაგრამ აი, ახლა გამომიშვეს…დიდი ექსკორტით მომაქანეს აქ, როგორც ცნობილი კრიმინალი და ახლა, ასე ძაღლივით გამომაგდეს გარეთ“.

„გზის ხელონურად გადაკეტვის“ საბაბით 19 ოქტომბრიდან დღემდე პოლიციამ არაერთი ჟურნალისტი დააკავა. სასამართლომ მათ ადმინისტრაციული პატიმრობაც შეუფარდა. 24 ოქტომბერს დააკავეს „პუბლიკას“ ჟურნალისტი ბასტი მგალობლიშვილიც, რომელსაც მოგვიანებით უთხრეს, რომ „სხვაში შეეშალათ“. მგალობლიშვილი რუსთაველის პროტესტსაც აშუქებს. 

ოქტომბერში „ქართულმა ოცნებამ" გამოხატვის თავისუფლების შემზღუდავი ის საკანონმდებლო ცვლილებები მიიღო, რის საფუძველზეც პოლიციამ „გზის ხელოვნურად გადაკეტვის“ საბაბით პროტესტის ათეულობით მონაწილე დააკავა. ადმინისტრაციულ სამართალდარღვევათა კოდექსში შესული ცვლილებით, შეკრებისა და მანიფესტაციის მონაწილე უალტერნატივოდ 15 დღემდე ვადით ადმინისტრაციული პატიმრობით დაისჯება ტრანსპორტის სავალი ნაწილის ნაწილობრივ ან სრულად გადაკეტვისთვის, თუ რაოდენობის გათვალისწინებით აქციის ჩატარება სხვაგვარად შესაძლებელია.

Meta-ს რეკლამების ბიბლიოთეკის (Ad Library) მიხედვით, პროპაგანდისტულმა Postv-იმ 2 აგვისტოდან 30 ოქტომბრამდე პერიოდში, Facebook-ის სხვადასხვა გვერდზე 3 049 პოსტი დაასპონსორა, რაშიც ჯამურად $66 857 დახარჯა:

• „POSTV-ანალიტიკა“: 645 პოსტი - $29 681;

• POSTV News: 2 312 პოსტი - $29 044;

• „ევროკრატია-ყოფილი ევროპა“: 40 პოსტი - $5 150;

• „ევროპის დაისი“: 10 პოსტი - $1 589;

• „ლიბერალიზმის ანატომია“: 19 პოსტი - $1 169;

• „კონსერვატორია“: 23 პოსტი - $224;

Postv-ს, რომლის 52%-იანი წილის მფლობელიც პარლამენტარი ვიქტორ ჯაფარიძეა, 2020 წლის აგვისტოდან [Meta-ს რეკლამების ბიბლიოთეკა ამ დროიდან მოქმედებს] 2025 წლის 30 ოქტომბრამდე, Facebook-ის სხვადასხვა გვერდზე, ჯამში 435 000 დოლარზე მეტი ღირებულების პოსტები აქვს დასპონსორებული. 

სამთავრობო ტელეკომპანია „იმედმა“ კი ანალოგიურ პერიოდში (2 აგვისტო - 30 ოქტომბერი) Facebook-ის 2 გვერდზე 68 პოსტი დაასპონსორა, რაშიც ჯამურად 24 268 დოლარი დახარჯა:

• tv imedi: 64 პოსტი - $23 275;

• „იმედის კვირა“: 4 პოსტი - $993;

სამთავრობო „იმედს“, რომლის მფლობელიც ბიზნესმენი ირაკლი რუხაძეა, 2020 წლის აგვისტოდან 2025 წლის 30 ოქტომბრამდე, Facebook-ის სხვადასხვა გვერდზე, ჯამში 209 000 დოლარზე მეტი ღირებულების პოსტები აქვს დასპონსორებული.

რეკლამების ბიბლიოთეკა არჩევნების, სოციალური და პოლიტიკური საკითხების შესახებ დასპონსორებულ პოსტებს აერთიანებს და Meta-ს კუთვნილ პლატფორმებზე განთავსებული ყველა იმ რეკლამის შესახებ მოიცავს ინფორმაციას, რომელიც განმათავსებლის მიერ მონიშნული იქნა სოციალურ/პოლიტიკურ რეკლამად ან თავად პლატფორმამ მიიჩნია ასეთად. 

 

„რეპორტიორები საზღვრებს გარეშემ“ (RSF) 2 ნოემბერთან - ჟურნალისტების წინააღმდეგ ჩადენილ დანაშაულთა დაუსჯელობის აღმოფხვრის საერთაშორისო დღესთან დაკავშირებით გამოქვეყნებულ „პრესის თავისუფლების მტაცებელთა“ 2025 წლის 34-კაციან სიაში „ქართული ოცნების“ დამფუძნებელი და საპატიო თავმჯდომარე ბიძინა ივანიშვილიც შეიყვანა.

ბიძინა ივანიშვილთან ერთად სიაში მოხვდნენ: სი ძინპინი (ჩინეთი), ვლადიმერ პუტინი(რუსეთი), ალექსანდრ ლუკაშენკო (ბელარუსი), ილჰამ ალიევი (აზერბაიჯანი), ნიკოლას მადურო (ვენესუელა), ვიქტორ ორბანი (უნგრეთი), ალექსანდრ ვუვიჩი (სერბეთი), რეჯეფ თაიფ ერდოღანი (თურქეთი), დანიელ ორტეგა (ნიკარაგუა) და სხვები.

RSF-ის შეფასებით, მიუხედავად იმისა, რომ თითოული მათგანის მედიასთან ბრძოლის მეთოდები განსხვავებულია, მიზანი ერთია - დამოუკიდებელი მედიის ხმის ჩახშობა:

„რა აქვთ მათ საერთო? პრესის თავისუფლების სიძულვილი. მათი მეთოდები განსხვავებულია, მაგრამ მათი მიზნები თანხვედრაშია: დამოუკიდებელი მედიის ხმის გაჩუმება და ახალი ამბებისა და ინფორმაციის მიღების უფლების გათელვა“.

RSF-ის გენერალური დირექტორის, ტიბო ბრუტენის განცხადებით, დაუსჯელობა გარდაუვალი არ არის და ვინც ინფორმაციის თავისუფლებას არღვევს, „უნდა დასახელდნენ და პასუხისგებაში მიეცნენ“.

„რეპორტიორების საზღვრებს გარეშე“ ივანიშვილს მილიარდელ ოლიგარქს უწოდებს, რომელიც მიუხედავად იმისა, რომ ოფიციალურად წასულია პოლიტიკური ცხოვრებიდან, საქართველოში კვლავ ძალაუფლების ცენტრად რჩება:

„მისი ბიზნესიმპერია  მას გადამწყვეტ გავლენას ანიჭებს, რადგან რამდენიმე კომერციული ტელეკომპანია, მათ შორის „იმედი“ და „რუსთავი 2“, ავრცელებენ მის მიერ დაფუძნებული პარტიის - „ქართული ოცნების“ პოზიციებსა და ხედვებს.

მისი გავლენის ქვეშ პლურალიზმი მცირდება, ხოლო დამოუკიდებელი ჟურნალისტები ხდებიან დისკრედიტაციის, ძალადობრივი თავდასხმების, უმეტესად დაუსჯელად,  ან სასამართლო დევნის ობიექტები“.

RSF-ი მიიჩნევს, რომ 2025 წელს ბიძინა ივანიშვილის სახელს უკავშირდება: „ბათუმელები“/„ნეტგაზეთის“ დამფუძნებლისა და იდრექტორის, მზია ამაღლობელის პატიმრობა; საქართველოს ევროკავშირში გაწევრიანების ჩაშლა, პირველ რიგში, მედიის თავისუფლების გარანტიების შეუსრულებლობის გამო; დამოუკიდებელი მედიებისა და მათ მხარდამჭერი არასამთავრობო ორგანიზაციების შევიწროება ანტიკორუფციული ბიუროს მეშვეობით; ოპოზიციური ტელეკომპანიების დევნა სახელმწიფოსა და „ქართული ოცნების“ პარტიის მხრიდან.

„პრესის თავისუფლების მტაცებლების 2025 წლის სია“ RSF-ის მიერ ყოველწლიურად გამოქვეყნებული „მსოფლიო პრესის თავისუფლების ინდექსის“ ნაწილია. ინდექსი აფასებს პრესის თავისუფლების მდგომარეობას მსოფლიოს მასშტაბით, „მტაცებელთა სია“ კი გამოყოფს მათ, ვინც თავისუფალ მედიას ებრძვის. „პრესის თავისუფლების მტაცებლები“ 5 კატეგორიად არის [პოლიტიკური, ეკონომიკური, უსაფრთხოების, სამართლებრივი და სოციალური] დაყოფილი. ბიძინა ივანიშვილი კი მათ შორის მოხვდა, ვინც მედიებს ფინანსურად ანადგურებს.

კომუნიკაციების კომისიის თავმჯდომარეს, კახი ბექაურს უფლებამოსილების ვადა ეწურება. „მაუწყებლობის შესახებ“ კანონის შესაბამისად, ბექაურის უფლებამოსილების ვადის გასვლამდე 100 დღით ადრე, მთავრობამ კომუნიკაციების კომისიის წევრის ერთი ვაკანტური თანამდებობის დასაკავებლად ღია კონკურსი გამოაცხადა. კომისიის წევრობაზე კანდიდატურის დასახელების უფლება ყველას აქვს, შესაბამის საბუთებს მთავრობის ადმინისტრაცია 15 ნოემბრის ჩათვლით მიიღებს.

--------------------

კახი ბექაური კომუნიკაციების კომისიის თავმჯდომარე 2017 წლიდან არის. ის მესამე ვადით 2023 წლის იანვარში აირჩიეს. მანამდე, 2014-2017 წლებში ბექაური კომისიის წევრი იყო, 2012 წელს კი, ტელეკომპანია „მეცხრე არხს“ ხელმძღვანელობდა. აღსანიშნავია, რომ 2019 წლამდე  ერთი და იგივე პირის თავმჯდომარედ ორჯერ არჩევა შეუძლებელი იყო. 2019 წელს მიღებული ცვლილებითკი, ეს შეზღუდვა გაუქმდა.

21 ბინა, 14 მიწის ნაკვეთი, 7 მანქანა, 5 ცეცხლსასროლი იარაღი - რა ქონებას ფლობს კახი ბექაურის ოჯახი - წაიკითხეთ „მედიაჩეკერის“ მასალა ვრცლად.

--------------------

„მაუწყებლობის შესახებ“  კანონით, ComCom-ის წევრობის კანდიდატი უნდა იყოს საზოგადოებრივი აღიარებისა და ნდობის მქონე პირი, რომელსაც აქვს ეკონომიკის, ფინანსების, საჯარო ადმინისტრირების, ბიზნესადმინისტრირების, სამართლის, ელექტრონული კომუნიკაციების ან ჟურნალისტიკის მაგისტრის ან მასთან გათანაბრებული აკადემიური ხარისხი და არანაკლებ 10 წლის მუშაობის გამოცდილება, მათ შორის, მმართველ თანამდებობაზე - არანაკლებ 3 წლისა.

საბუთების მიღების ვადის ამოწურვიდან 10 დღეში კანდიდატთა სია და წარდგენილი საკონკურსო დოკუმენტები მთავრობის ოფიციალურ ვებგვერდზე  გამოქვეყნდება, შემდეგ მთავრობა არანაკლებ სამ კანდიდატურას პრეზიდენტს  წარუდგენს, პრეზიდენტი კი - პარლამენტს.

კომუნიკაციების ეროვნული კომისია 5 წევრისგან შედგება, მათი უფლებამოსილების ვადა 6 წლითაა განსაზღვრული. პირის კომისიის წევრად არჩევა 2-ზე მეტი ვადით არ შეიძლება. კომისიის თავმჯდომარეს კი ფარული კენჭისყრით კომისია საკუთარი შემადგენლობიდან, 3 წლის ვადით ირჩევს.