„საზოგადოებრივი მაუწყებლის აჭარის ტელევიზიისა და რადიოს“ დირექტორობა ბათუმის თოჯინებისა და მოზარდ მაყურებელთა სახელმწიფო თეატრის ხელმძღვანელს, ირაკლი კიკვაძეს სურს. კიკვაძის თქმით, მისთვის ტელევიზია „ძალიან ახლო ორგანიზმია“. 

„ძალიან დიდი გამოცდილება მაქვს ტელევიზიებთან თანამშრომლობის და გადავწყვიტე, მიმეღო მონაწილეობა ამ კონკურსში იმიტომ, რომ დიდი ხანია უკვე რაღაცა გამოცდილებები მიგროვდება ცხოვრების მანძილზე და ვფიქრობ, რომ მზად ვარ მივიღო მონაწილეობა და გამოწვევები.

ჩემი სამომავლო გეგმა არის ის, რომ ტელევიზია იყოს მეტად გამჭვირვალე და მეტად საზოგადოების სამსახურში. ასევე, გვაქვს ტექნოლოგიური მიმართულებით რაღაცა სიახლეები, ინოვაციები, რომლებსაც წარმოვადგენ ჩემი კონცეფციის დროს და ძალიან ბევრი რაღაც ისეთი საინტერესო პროექტი, რომელიც ვფიქრობ, რომ საზოგადოებრივ არხს წაადგება“, - ამბობს ის „მედიაჩეკერთან“ საუბრისას. 

კიკვაძე „აჭარის ტელევიზიის“ დირექტორის თანამდებობის დასაკავებლად მესამედ გამოცხადებული კონკურსის ერთადერთი მონაწილეა. საზოგადოებრივი მაუწყებლის სამეურვეო საბჭო პირველ ტურს ორშაბათს, 26 იანვარს გამართავს. 

„საზოგადოებრივი მაუწყებლის აჭარის ტელევიზიისა და რადიოს“ დირექტორის თანამდებობის დასაკავებლად გამოცხადებული კონკურსი ორჯერ ჩაიშალა. 

წინა ჯერზე „აჭარის ტელევიზიის“ დირექტორობის კანდიდატები იურისტი აკაკი ბერიძე და მომღერალი, საზოგადოებრივი მაუწყებლის დილის გადაცემის წამყვანი, ანი კეკუა იყვნენ. 2025 წლის 24 ნოემბრის სამეურვეო საბჭოს სხდომაზე საზოგადოებრივი მაუწყებლის იურისტმა, ელენე მიხაილოვამ განმარტა, რომ ანი კეკუას საბუთებმა „მაუწყებლობის შესახებ“ კანონის მოთხოვნები ვერ დააკმაყოფილა „განათლების და სამუშაო გამოცდილების ნაწილში“ და მის კანდიდატურას დისკვალიფიკაცია მიეცა. აკაკი ბერიძეს კი მეორე ტურში გადასასვლელად საზოგადოებრივი მაუწყებლის სამეურვეო საბჭომ მხარი არ დაუჭირა.

აკაკი ბერიძე ნიკოლოზ მეგრელიშვილთან ერთად, პირველად, გასული წლის აგვისტოში, გამოცხადებულ კონკურსშიც მონაწილეობდა. მაშინ კანდიდატები მეორე ტურშიც გადავიდნენ, თუმცა კენჭისყრის დროს სამეურვეო საბჭოს წევრების ვერცერთი ხმა ვერ მიიღეს.

„მაუწყებლობის შესახებ“ კანონით, „აჭარის ტელევიზიის“ დირექტორს თანამდებობაზე საზოგადოებრივი მაუწყებლის სამეურვეო საბჭო ღია კონკურსის წესით, 3 წლის ვადით ნიშნავს. 

„საზოგადოებრივი მაუწყებლის აჭარის ტელევიზიისა და რადიოს“ დირექტორი ვლადიმერ ტატიშვილი იყო, რომელმაც თანამდებობა 2025 წლის 1 სექტემბერს, მის ადგილზე კონკურსის გამოცხადების შემდეგ, დატოვა. ტატიშვილს დირექტორობის ვადა გასული წლის ნოემბერში ეწურებოდა.

კომუნიკაციების კომისიამ რადიო „მარნეული“ 2025 წლის III კვარტალში, ამერიკული ორგანიზაცია „დემოკრატიის ეროვნული ფონდიდან“ (NED) შემოსავლის სახით 32 541.60 ლარის მიღების გამო წერილობით გააფრთხილა.

ComCom-ის დასაბუთებით, „ვინაიდან „დემოკრატიის ეროვნული ფონდი“ (NED) დაფუძნებულია ამერიკის შეერთებულ შტატებში, იგი წარმოადგენს უცხოურ ძალას, ხოლო მისგან მიღებული თანხა - უცხოური ძალისგან პირდაპირ დაფინანსებას“.

კომისია წერს, რომ „აღნიშნული თანხა მიღებული იყო საგრანტო პროექტის ფარგლებში“ და არ წარმოადგენდა „მაუწყებლობის შესახებ“ კანონით განსაზღვრულ გამონაკლისს, როგორიცაა კომერციული რეკლამა, ტელეშოპინგი, სპონსორობა ან პროგრამაში პროდუქტის განთავსება. 

--------------------------------------

„მაუწყებლობის შესახებ“ კანონში 2025 წლის 1 აპრილს შეტანილი ცვლილებებით, მაუწყებლებს „უცხოური ძალისგან“ პირდაპირი ან არაპირდაპირი დაფინანსების (ფულადი თანხის ან ქონებრივი ღირებულების სხვა სახის მატერიალური სიკეთის) მიღება აეკრძალათ. აიკრძალა „უცხოური ძალის“ მიერ მაუწყებლის მომსახურების შესყიდვა (გარდა კომერციული რეკლამისა და პროდუქტის განთავსებისა) ან/და პროგრამის მომზადების ან/და ეთერში გადაცემის პირდაპირი ან ირიბი დაფინანსება ან თანადაფინანსებაც. 

---------------------------------------

რადიო „მარნეულის“ დამფუძნებლისა და დირექტორის, კამილა მამედოვას თქმით, მათ NED-თან პროექტი შეწყვეტილი აქვთ, ეს თანხა კი 4 თვის განმავლობაში 12 ადამიანზე იყო გათვლილი. 

„კანონში ცვლილება ზუსტად იმას ეძღვნებოდა, როცა იღებდნენ, რომ რეგიონულმა მედიებმა შევწყვიტოთ მუშაობა. იმიტომ რომ იცოდნენ ყოველთვის, რომ ერთადერთი შესაძლებლობა გვემუშავა არის ის, რომ იყო გრანტები და მათი მხარდაჭერით ჩვენ გვქონდა შესაძლებლობა გვეარსება, ახლა არის შეწყვეტილი. არანაირი შესაძლებლობა რომ გავაგრძელოთ მუშაობა, არ გვაქვს. არსებობს კომერციული შემოსავალი, რომელიც 3 თვეში ერთხელ 1000 ლარს არ აჭარბებს და ამითი მინიმალური გუნდის შენახვაც კი შეუძლებელია“, - ამბობს მამედოვა „მედიაჩეკერთან“ საუბრისას. 

კომუნიკაციების კომისიამ რადიო „მარნეული“ 2025 წლის ოქტომბერში „დოიჩე ველესგან“ შემოსავლის სახით 7 821.60 ლარის მიღების გამოც გააფრთხილა და „უცხოური ძალისაგან“ დაფინანსების მიღების დაუყოვნებლივ შეწყვეტა დაავალა.

კომუნიკაციების კომისიამ „მაუწყებლობის შესახებ“ კანონის ამავე მუხლის დარღვევისთვის გააფრთხილა და „უცხოური ძალისგან“ დაფინანსების მიღების შეწყვეტა დაავალა რადიომაუწყებლებსაც: „რადიო-ტვ ნორი“, „სისტემა გამა“ [რადიო „პოზიტივი“] და ტელემაუწყებლებს: „ფორმულა“, „ფორმულა მულტიმედია“. 

„საქართველოს ახალგაზრდა იურისტთა ასოციაციის“ კვლევის - „კანონები სიტყვის წინააღმდეგ“ მიხედვით, ამგვარი შეზღუდვა მაუწყებლებს იმ მნიშვნელოვან რესურსზე წვდომის გარეშე ტოვებს, რომელიც, შესაძლოა, გამოყენებული იყოს სარედაქციო დამოუკიდებლობის შენარჩუნების, საგამოძიებო შესაძლებლობებისა და ფინანსური მდგრადობის უზრუნველსაყოფად: „შესაბამისად, აკრძალვა იწვევს მაუწყებლების, გაერთიანებების, გამოხატვის თავისუფლების დარღვევას და არის გაუმართლებელი ბარიერი მათი საქმიანობისთვის“.

რეგიონული ტელეკომპანია „თრიალეთის“ განცხადებით, 2026 წლის 9 იანვარს, ფინანსთა სამინისტროს შემოსავლების სამსახურმა კვლავ ინკასო დაადო. 

„უკვე ცამეტი დღეა, ფინანსთა სამინისტრო და შემოსავლების სამსახური, არ გვპასუხობს, წერილობით მიმართვებზე და სატელეფონო ზარებზე. ამ დროის განმავლობაში, სრულიად პარალიზებულია ტელე-რადიო კომპანიის საქმიანობა და ვდგავართ მაუწყებლობის გათიშვის რეალური საფრთხის წინაშე.

უკვე შეუძლებელია იმის დათვლა, რამდენჯერ დაგვიდეს და მოგვიხსნეს ინკასო, რამდენჯერ ჩამოგვეჭრა თანხები და რამდენჯერ შეიზღუდა ჩვენი საქმიანობა.

განსაკუთრებით საგანგაშოა ის გარემოება, რომ ინკასოს ყოველი ახალი დადება ემთხვევა „თრიალეთის“ ეთერში გასულ კრიტიკულ მასალებს.

აღსანიშნავია, რომ 2025 წლის 10 ივლისს მთავრობას ოფიციალურად მივმართეთ  საგადასახადო შეთანხმების მოთხოვნით. ამ განცხადების განხილვისა და პასუხის გაცემის კანონით განსაზღვრული ვადა ამოიწურა 2025 წლის 19 ნოემბერს, თუმცა დღემდე არც პასუხი და არც რაიმე ოფიციალური განმარტება არ მიგვიღია.

პასუხის მიღებამდე საინკასო დავალების ხელახლა დადება, ხელისუფლების მხრიდან არის გაუმართლებელი, უკანონო და დამაზიანებელი მოქმედება, რომელიც პირდაპირ საფრთხეს უქმნის დამოუკიდებელი მედიის არსებობას!“ - წერს ტელევიზია. 

ტელეკომპანია „თრიალეთი“ ინკასოს დაუყოვნებლივ მოხსნას, პროცესის კანონის ფარგლებში გაგრძელებას და იმის უზრუნველყოფას მოითხოვს, „რეგიონულ მაუწყებელს არ შეუწყდეს საქმიანობა და მოსახლეობას არ მოესპოს ინფორმაციის მიღების უფლება“.

„თრიალეთის“ განცხადებით, „სამწუხაროდ, ქვეყანაში კვლავ მოქმედებს შერჩევითი სამართალი — მაშინ, როცა ხელისუფლებასთან დაახლოებული მედიასაშუალებები, ათეულობით მილიონი ლარის დავალიანების მიუხედავად, ინკასოსგან თავისუფლები არიან, დამოუკიდებელი მედიის წინააღმდეგ კი, ასჯერ ნაკლები დავალიანების გამო, იგივე მექანიზმი გამოიყენება როგორც დასჯისა და გაჩუმების იარაღი. ეს არის აშკარა უსამართლობა და პირდაპირი შეტევა მედიის თავისუფლებაზე“.

ტელეკომპანიამ ანგარიშებზე ინკასოს დადების შესახებ განცხადება 2025 წლის 30 ივნისსაც გაავრცელა. 

„სოციალური სამართლიანობის ცენტრის“ განცხადებით, აზერბაიჯანელი ჟურნალისტის, აფგან სადიგოვის მიმართ შესაძლოა მშვიდობიან პროტესტში მონაწილეობის გამო სისხლის სამართლებრივი დევნა დაიწყოს. 

ორგანიზაციის ინფორმაციით, გუშინ, 16 იანვარს, აფგან სადიგოვს თბილისის საქალაქო სასამართლოს ადმინისტრაციულ საქმეთა კოლეგიის მოსამართლის, ნინო ენუქიძის დადგენილება ჩაბარდა, რომლის მიხედვითაც, სასამართლომ მის მიმართ დაწყებული ადმინისტრაციული სამართალდარღვევის საქმის წარმოება შეწყვიტა მის ქმედებაში შესაძლო დანაშაულის ნიშნების არსებობის გამო და საქმე შემდგომი რეაგირებისთვის თბილისის პოლიციის დეპარტამენტს გადასცა.

აფგან სადიგოვს სასამართლომ პარლამენტის მიმდებარე ტერიოტირაზე გზის ხელოვნურად გადაკეტვის საბაბით ადმინისტრაციული პატიმრობა ორჯერ შეუფარდა. მოსამართლე ნინო ენუქიძემ მას 7-დღიანი ადმინისტრაციული პატიმრობა 19-21 ოქტომბრის ეპიზოდზე მიუსაჯა, 18 ოქტომბრის აქციაზე გზის გადაკეტვის საბაბით კი 14-დღიანი ადმინისტრაციული პატიმრობა შეუფარდეს. 

როგორც „სოციალური სამართლიანობის ცენტრი“ წერს, შინაგან საქმეთა სამინისტრო აფგან სადიგოვს ამჯერად 2025 წლის 17-18 დეკემბერს, ადმინისტრაციულ სამართალდარღვევათა კოდექსის 1741 მუხლის მე-10 ნაწილით გათვალისწინებული  სამართალდარღვევის  ჩადენას ედავება, რაც ტრანსპორტის ან/და ხალხის(ქვეითთა) გადაადგილების შეფერხებისთვის  პასუხისმგებლობას ითვალისწინებს:

„სასამართლოს შეფასებით, ვინაიდან აფგან სადიგოვი, აქამდე იმავე საფუძვლით უკვე იყო სახდელდადებული, მისი ქმედება სისხლის სამართლის დანაშაულის ნიშნებს  შეიცავს.

„ქართულმა ოცნებამ“  16 ოქტომბერს, სისხლის სამართლის კოდექსში ცვლილებები შეიტანა და  სსკ-ის 347-ე მუხლით ერთ წლამდე თავისუფლების აღკვეთით დასჯადი გახდა შსს-ის მიერ დაშლილ აქციაში მონაწილეობა, გზის სავალი ნაწილის ხელოვნურად გადაკეტვა, ნიღბით სახის დაფარვა, დროებითი კონსტრუქციის მოწყობა ან ცრემლსადენი საშუალების ტარება იმავე ქმედებებისთვის სახდელდადებული პირის მიერ.

მოგვიანებით, 12 დეკემბერს ამოქმედებული საკანონმდებლო ცვლილებებით, “შეკრებებისა და მანიფესტაციების შესახებ” საქართველოს კანონის მე-5, მე-10, მე-111, მე-112 და მე-13 მუხლების რედაქცია შეიცვალა იმგვარად, რომ ახლა უკვე აიკრძალა ხალხის გადაადგილებისთვის განზრახ დაბრკოლებების შექმნაც და განმეორებით ადმინისტრაციულ სახდელდადებული პირის მიერ ჩადენა, კვლავ სისხლის სამართლის კოდექსით დასჯადი დარჩა.

ამ საფუძვლით, ბოლო  კვირებში, სასამართლომ რამდენიმე აქტივისტის საქმეზე ადმინისტრაციული წარმოება შეწყვიტა და საქმე რეაგირებისთვის შსს-ს გადაუგზავნა.

ამ ეტაპისთვის უცნობია, როდის დაიწყებს შინაგან საქმეთა სამინისტრო გამოძიებას და წაუყენებს თუ არა ბრალს მათ მშვიდობიანი პროტესტის აქტივისტებს. თუმცა  გზის გადაკეტვის საფუძვლით უკვე რამდენიმე თვეა წინასწარი პატიმრობა აქვს შეფარდებული ერთ-ერთ აქტივისტს, რომელსაც, პროკურატურა, სწორედ სსკ-ის 347-ე მუხლით გათვალისწინებული ქმედების ჩადენას ედავება“.

„სოციალური სამართლიანობის ცენტრის“ განცხადებით, საქართველოს საკონსტიტუციო და ევროპულ სასამართლოებს ცალსახა პოზიცია აქვთ, რომ მოძრაობის შეფერხების გამო ამგვარი შეზღუდვები შეკრების თავისუფლების არსს ეწინააღმდეგება. ორგანიზაცია აღნიშნავს იმასაც, რომ ეროვნული სასამართლოები შეფერხების „ხელოვნურობის“ დასადგენად რაიმე განჭვრეტად სტანდარტს არ ეყრდნობიან და არც კი მსჯელობენ, თუ შეკრების მონაწილეების რა რაოდენობაა საკმარისი სატრანსპორტო მოძრაობის კანონიერი შეფერხებისთვის:

„შეკრების მონაწილეების დასჯის ამგვარი პრაქტიკა არღვევს კანონის გარეშე დასჯის აკრძალვის საბაზისო და აბსოლუტურ პრინციპსაც, რომელიც ევროპული სასამართლოს თანახმად, მოიცავს ინდივიდუალური ბრალის (mens rea) გარეშე დასჯის აკრძალვასაც. ამასთან, მსგავსი ქმედებისთვის პასუხისმგებლობის დამდგენ კანონმდებლობაში ცვლილებების სიხშირიდან და ვიწრო მიზნებიდან გამომდინარე, დარღვეულია სამართლის უზენაესობის სხვა - კანონის სტაბილურობისა და ზოგადი ბუნების შესახებ  - პრინციპებიც“.

SJC-ის შეფასებით, მიმდინარე პროცესები აჩვენებს, რომ „ქართული ოცნება“ მშვიდობიან პროტესტს ყველა საშუალებით ებრძვის და შეკრების მონაწილეების მიმართ ფაქტობრივად სრულად საპატიმრო სანქციებზე ორიენტირებულ დასჯის მეთოდებს ირჩევს:

„განსაკუთრებულად პრობლემურია, რომ „ქართული ოცნების“ ხელისუფლება ადმინისტრაციულ სამართალდარღვევათა კოდექსის ინსტრუმენტალიზების შემდეგ სულ უფრო და უფრო აქტიურად იყენებს სისხლისსამართლებრივ მექანიზმებს პროტესტის მონაწილეების წინააღმდეგ“.

„სოციალური სამართლიანობის ცენტრის“ ინფორმაციით, სადიგოვისთვის გამოძიების დაწყების შესახებ ჯერჯერობით ოფიციალურად არ უცნობებიათ.

აფგან სადიგოვი აზერბაიჯანელი ჟურნალისტია, რომელიც თბილისში, აზერბაიჯანის მოთხოვნით, 2024 წელს დააკავეს. ის საექსტრადიციო პატიმრობაში თითქმის 9 თვე იმყოფებოდა. სადიგოვმა პროტესტის ნიშნად 161 დღე იშიმშილა.

„საქართველოს ჟურნალისტური ეთიკის ქარტია“ შინაგან საქმეთა სამინისტროს მოუწოდებს, დაუყოვნებლივ გამოიძიოს მუქარა ტელეკომპანია „ფორმულას“ ჟურნალისტის, დავით ქაშიაშვილის მიმართ და მისი უსაფრთხოება დაიცვას.

„დღეს, 17 იანვარს, მას შემდეგ, რაც „შაბათის ფორმულაში“ გავიდა რეპორტაჟი კორუფციულ სქემებში რეჟისორ გოგა ხაინდრავას შესაძლო მონაწილეობის შესახებ, წამყვანმა დავით ქაშიაშვილმა მალევე მიიღო მუქარის შემცველი შეტყობინება სოციალური ქსელით მისთვის უცნობი პირისგან. ამის შესახებ მან თავად განაცხადა შემაჯამებელი, საგამოძიებო გადაცემის პირდაპირ ეთერში და ამ გზით შსს-ც ჩააყენა საქმის კურსში. 

„შაბათის ფორმულამ“ რამდენიმე კვირის წინაც მოამზადა რეპორტაჟი გოგა ხაინდრავას ქონების შესახებ, რომლის ეთერში გასვლის შემდეგ რეჟისორმა საჯაროდ განაცხადა, რომ ის ტელეკომპანიას ცრუ ინფორმაციის გავრცელებისთვის უჩივლებს. 

საქართველო იმ ქვეყანათა რიგშია, სადაც ჟურნალისტთა უსაფრთხოება დაცული არ არის, სადაც ძალადობა მათ წინააღმდეგ არათუ დაგმობილი, არამედ, პირიქით, წახალისებულია. ჟურნალისტური ეთიკის ქარტიისათვის ჟურნალისტის მიმართ გაჟღერებული მუქარის ეს შემთხვევა შემაშფოთებელია. მოვუწოდებთ შსს-ს, დაუყოვნებლივ დაინტერესდეს ამ ფაქტით, სწრაფად გამოიძიოს ის და, პარალელურად, ჟურნალისტის უსაფრთხოება უზრუნველყოს“, - ვკითხულობთ ქარტიის განცხადებაში.  

„მედიის განვითარების ფონდის“ ინფორმაციით, სახელისუფლებო სარედაქციო პოლიტიკის ტელეკომპანია „იმედმა“, 2025 წლის 1 დეკემბრიდან 2026 წლის 9 იანვრის ჩათვლით პერიოდში, საინფორმაციო მომსახურებაზე 8 მუნიციპალიტეტის მერიასთან ჯამში 62 445 ლარის ღირებულების ხელშეკრულება გააფორმა. ეს მუნიციპალიტეტებია: გორის, ახალქალაქის, ადიგენის, ხულოს, რუსთავის, ბორჯომის, ფოთისა და ხობის.

როგორც MDF-ი წერს, ეს კონტრაქტები ერთწლიანია და 7 შემთხვევაში თითოეულის ღირებულება 7 500 ლარია (თვეში 625 ლარი). ამ 7 კონტრაქტში ხელშეკრულების საგანს „იმედის“ ვებგვერდზე არაუმეტეს 60 რელიზის განთავსება წარმოადგენს, რუსთავის მუნიციპალიტეტის შემთხვევაში კი ხელშეკრულების წლიური ღირებულება 9 945 ლარია (თვეში 825, 75) და კონტრაქტი ვებგვერდზე არაუმეტეს 85 საინფორმაციო რელიზის განთავსებას ითვალისწინებს:

„ხელშეკრულების პირობები მეტწილად ერთგვაროვანია და შემდეგ შინაარსობრივ და პროცედურულ ვალდებულებებს ითვალისწინებს:

შემსყიდველის მიერ მიწოდებული ინფორმაციის განთავსებას შინაარსის შეცვლის გარეშე: მასალის რედაქტირება და თარგმნა მხოლოდ იმ შემთხვევაშია დასაშვები, თუ მისი შინაარსი არ შეიცვლება (ხობი, ფოთი, ხულო, გორი, ადიგენი, ბორჯომი).

დამკვეთის მოთხოვნის შესაბამისად გაშუქება: სააგენტო უზრუნველყოფს დამკვეთის მოთხოვნის შესაბამისად მისი საქმიანობისა და მის მიერ ჩატარებული ღონისძიებების შესახებ ანონსების/ინფორმაციების მომზადებასა და გაშუქებას, აგრეთვე მათ გავრცელებას სხვა მედია საშუალებებისთვის, საჭიროებისამებრ, მაგრამ თვეში არაუმეტეს 38-ჯერ.   

სააგენტო უზრუნველყოფს დამკვეთის მოთხოვნის შესაბამისად ღონისძიებების ფოტო გადაღებას, საჭიროებისამებრ, მაგრამ თვეში არაუმეტეს 2-ჯერ ქ. თბილისის მასშტაბით (ბორჯომი).

საინფორმაციო მხარდაჭერა მიწოდებული რელიზების განთავსების გზით: ვებ-გვერდზე (www.imedinews.ge) ჯამში არაუმეტეს 60 რელიზის განთავსება (ხობი, ფოთი, ხულო, გორი, ახალქალაქი, ადიგენი, ბორჯომი), 85 რელიზისი განთავსება (რუსთავი).

ეთიკური და არაშეურაცხმყოფელი ინფორმაციის გავრცელება: არ განათავსოს ისეთი ინფორმაცია რომელიც შეიცავს შეურაცხმყოფელ, არაკორექტულ და არაეთიკურ ინფორმაციას (ახალაქალაქი, ბორჯომი). 

მიწოდებული ინფორმაციის ოპერატიული განთავსება: მიწოდებული ინფორმაცია დაუყოვნებლივ (ინფორმაციის მიწოდებიდან იმავე დღეს) უნდა განთავსდეს (ხობი, ფოთი, ხულო, გორი, ადიგენი).

მუნიციპალიტეტების საავტორო უფლებების დაცვა: შემსყიდველის მიერ მიწოდებული ინფორმაცია მისი თანხმობის გარეშე არ გადასცეს მესამე პირს დისტრიბუციის, გაცვლის ან გაყიდვის მიზნით (ახალქალაქი, ხობი, ფოთი, ხულო, ადიგენი, ბორჯომი)“. 

„მედიის განვითარების ფონდი“ ხაზს უსვამს, რომ „ტელეიმედი“ მუნიციპალიტეტების მიერ მიწოდებულ დაფინანსებულ პრესრელიზებს, სარეკლამო აღნიშვნის გარეშე აქვეყნებს, რითაც მკითხველი შეცდომაში შეჰყავს და მასალის ფასიანი ხასიათის შესახებ მათ ინფორმირებულობას ხელს არ უწყობს.

ორგანიზაცია აქვეყნებს მაგალითებსაც, რომლებშიც „კარგად ჩანს, რომ ის, რასაც ტელეიმედის ვებ-გვერდი სანდო წყაროს რუბრიკით წარმოადგენს, რეალურად დაფინანსებული სტატიაა, შესაბამისი სარეკლამო აღნიშვნის გარეშე, რომელიც შესაბამისი მუნიციპალიტეტის გვერდზეც იდენტური ტექსტით ვრცელდება. ამასთანავე, იმედის ვებ-გვერდზე რეგიონების შესახებ განთავსებული ინფორმაცია ძირითადად უკრიტიკოდ, ოფიციალურ წყაროებზე დაყრდნობით ვრცელდება, რაც იმედის სარედაქციო პოლიტიკის სახელისუფლებო ხასიათზე მეტყველებს“. 

„მედიის განვითარების ფონდი“ აღნიშნავს, რომ ორგანიზაცია სახელისუფლებო სარედაქციო პოლიტიკის ტელეკომპანია „იმედსა“ და მუნიციპალიტეტებს შორის კონტრაქტების გაფორმების პრაქტიკით, Qartli.ge-ის მიერ გავრცელებული ინფორმაციის შემდეგ დაინტერესდა, რომელიც „ტელეიმედსა“ და გორის მუნიციპალიტეტის მერიას შორის, მერიის საქმიანობის შესახებ ინფორმაციის გავრცელების მიზნით, ფასიანი მომსახურების ხელშეკრულების გაფორმებას შეეხებოდა და სახელმწიფო შესყიდვების სააგენტოზე დაყრდნობით, 2025 წლის დეკემბრისა და 2026 წლის 9 იანვარის ჩათვლით მონაცემები შეისწავლა. 

„საქართველოს ახალგაზრდა იურისტთა ასოციაციის“ განცხადებით, სტრასბურგის სასამართლოში მზია ამაღლობელის საქმეების წარმოება აქტიურად გრძელდება, პირველ საქმეზე (პატიმრობის, როგორც აღკვეთი ღონისძიების შეფარდება და დაკავშირებული დარღვევები) საიამ წერილობითი პოზიცია წარადგინა, მეორეზე კი (ადმინისტრაციული დაკავება და სამართალდარღვევები) ევროსასამართლომ ახალი საჩივარი დაარეგისტრირა.

საიას ინფორმაციით, პირველი საქმე (Amaghlobeli v. Georgia, no. 13661/25) ეხება 2025 წლის 12 იანვარს, „ბათუმელებისა“ და „ნეტგაზეთის“ დამფუძნებლის, უკანონოდ დაკავებული და პატიმრობაში მყოფი მზია ამაღლობელის მიმართ ადამიანის უფლებათა ევროპული კონვენციით გათვალისწინებული შემდეგი უფლებების დარღვევას: მე-5 მუხლი (თავისუფლებისა და უსაფრთხოების უფლება), მე-6 მუხლი (საქმის სამართლიანი განხილვის უფლება), მე-8 მუხლი (პირადი და ოჯახური ცხოვრების დაცულობის უფლება), მე-10 მუხლი (გამოხატვის თავისუფლება), კონვენციის მე-13 მუხლი მე-8 და მე-10 მუხლებთან ერთობლიობაში (სამართლებრივი დაცვის ქმედითი საშუალების უფლება) და მე-18 მუხლი (უფლების შეზღუდვათა გამოყენების ფარგლები). ამ საქმესთან დაკავშირებით ორგანიზაციამ მზია ამაღლობელის სახელით ადამიანის უფლებათა ევროპულ სასამართლოს 2025 წლის 28 აპრილს მიმართა:

„2025 წლის 31 ოქტომბერს, საქართველოს მთავრობამ სტრასბურგის სასამართლოში გაგზავნილ საჩივარზე წერილობითი პოზიცია წარადგინა. სახელმწიფომ დარღვევები არ აღიარა და მიუთითა, რომ მზია ამაღლობელის დაკავება, ისევე, როგორც მისი განგრძობადი წინასწარი პატიმრობა, იყო კონვენციურ ვალდებულებებთან შესაბამისი“.

2025 წლის 11-12 იანვარს, შინაგან საქმეთა სამინისტროს ბათუმის საქალაქო სამმართველოს შენობის წინ გამართულ საპროტესტო აქციაზე მზია ამაღლობელი ორჯერ დააკავეს:

„2025 წლის 11 იანვარს მზია ამაღლობელი უკანონოდ დააკავეს სტიკერის, წარწერით - „იფიცება საქართველო“, ქ. ბათუმის საქალაქო სამმართველოს დამხმარე შენობის გარე ფასადზე გაკვრის გამო, რა დროსაც მზია ამაღლობელი სარგებლობდა კონსტიტუციითა და კონვენციით განმტკიცებული გამოხატვის თავისუფლებით და სოლიდარობას უცხადებდა მიმდინარე აქციის ფარგლებში უკანონოდ დაკავებულ პირებს. მზია ამაღლობელის ადმინისტრაციული წესით უკანონო დაკავებასთან და მის წინააღმდეგ წარმოებულ ადმინისტრაციულ სამართალდარღვევათა საქმეების ფარგლებში გამოვლენილ დარღვევებთან დაკავშირებით, საიამ 2025 წლის 17 ნოემბერს სტრასბურგის სასამართლოს მიმართა, რომელიც სასამართლომ უკვე დაარეგისტრირა და მიანიჭა შესაბამისი ნომერი (no. 36304/25). ეს მზია ამაღლობელის რიგით მეორე საქმეა სტრასბურგის სასამართლოში.

2025 წლის 12 იანვარს, მზია ამაღლობელი, ქ. ბათუმის საქალაქო სამმართველოს შენობის წინ მეორედ იქნა უკანონოდ დაკავებული სისხლის სამართლის წესით და 2025 წლის 13 იანვარს პროკურატურამ ბრალი წარუდგინა სისხლის სამართლის კოდექსის 3531 მუხლის 1-ლი ნაწილით, რაც გულისხმობს პოლიციელზე თავდასხმას. ამ საქმეზე წარმოება ეროვნულ დონეზე კვლავ გრძელდება“.

„საქართველოს ახალგაზრდა იურისტთა ასოციაცია“ აღნიშნავს, რომ სახელმწიფოს როგორც ეროვნულ დონეზე, ისე სტრასბურგის სასამართლოს წინაშეც არ განუმარტავს და არ დაუდგენია მათ შორის იმ პირის ვინაობა, რომელმაც მზია ამაღლობელი სისხლის სამართლის წესით რეალურად დააკავა:

„იუსტიციის სამინისტრო, ისევე როგორც პროკურატურა, ვერ ასაბუთებს დანაშაულის ჩადენის საფუძვლიანი ეჭვის არსებობას, რომელიც დაადასტურებდა მზია ამაღლობელის მხრიდან კონკრეტული ქმედების, როგორც თავად პროკურატურამ დააკვალიფიცირა - ,,პოლიციელზე თავდასხმის” ფაქტს, თუ აღკვეთის სახით პატიმრობის გამოყენების აუცილებლობას, რითაც დაირღვა მზია ამაღლობელის კონვენციის მე-5 მუხლით გარანტირებული თავისუფლების უფლება.

კერძოდ, სახელმწიფო თავად მიუთითებს, რომ ქმედების კვალიფიკაციისათვის მხოლოდ ,,ზიანის ხარისხი” არ არის განმსაზღვრელი და, რომ სისხლის სამართლის კოდექსის 3531 მუხლის მიხედვით, ქმედების კვალიფიკაციისას ასევე მნიშვნელობა ენიჭება ,,იმ კონტექტს, რომელშიც ქმედება განხორციელდა” და ,,დამნაშავის მიზანს”. მოვლენათა თანმიმდევრობისა და ქმედების განხორციელების ირგვლივ არსებულ გარემოებათა გადმოსაცემად და მზია ამაღლობელის განზრახვის დასადასტურებლად, სახელმწიფოს არ წარმოუდგენია შესაბამისი, მათ შორის, ნეიტრალური მტკიცებულებები და დაეყრდნო საქმეში არსებულ ვიდეომასალას, რომლითაც შეუძლებელია კონკრეტული დანაშაულისა და განსაკუთრებით ,,დამნაშავის მიზნის” იდენტიფიცირება. წარდგენილ პოზიციაში განმარტებულია, რომ დაკავება იყო თვითნებური და ემსახურებოდა ავ განზრახვას, რამდენადაც ეს განპირობებული იყო არა საფუძვლიანი ეჭვით, არამედ - ირაკლი დგებუაძის მუქარით, რომ ,,სისხლით” დაიჭერდა მზია ამაღლობელს“.

როგორც საია აღნიშნავს, მზია ამაღლობელის მიმართ აღკვეთი ღონისძიების სახით პატიმრობის გამოყენებასთან დაკავშირებით, სახელმწიფომ ეროვნულ დონეზე პროკურატურის მიერ გაჟღერებული არგუმენტები გაიმეორა, რომლებიც მიმალვის, მოწმეებზე ზემოქმედებისა და ახალი დანაშაულის ჩადენის რისკებს უკავშირდებოდა:

„იმ პირობებშიც კი, როდესაც ეროვნულ დონეზე საქმის არსებითი განხილვის ფარგლებში მზია ამაღლობელის ადვოკატებმა არათუ გააბათილა აღნიშნული რისკების არსებობა, არამედ უფლებადამცველებმა პროკურატურას მიუთითეს კიდეც სტანდარტზე და იმ მტკიცებულებების აუცილებლობაზე, რომელთა არსებობა აუცილებელი იყო განგრძობადი პატიმრობის დასადასტურებლად, საერთაშორისო დონეზე სახელმწიფომ ვერ წარმოადგინა შესაბამისი მტკიცებულებები.

წარდგენილ შეპასუხებაში აღნიშნულია, რომ აღკვეთის ღონისძიების სახით პატიმრობის გამოყენებისათვის პროკურატურა დაეყრდნო მზია ამაღლობელის ადმინისტრაციულ დაკავებასა და სამართალდარღვევის საქმეებს, რომელთა ირგვლივ, არა თუ საბოლოო გადაწყვეტილება არ იყო გამოტანილი, არამედ არც იყო განხილული სასამართლოების მიერ. შესაბამისად, იმ პირობებში, როცა ,,ახალი დანაშაულის” ჩადენის რისკის დასამტკიცებლად პროკურატურას არ წარმოუდგენია შესაბამისი მტკიცებულებები და მხოლოდ ეყრდნობოდა ადმინისტრაციული დაკავებას, მზია ამაღლობელს პარალელურად უწევდა ემტკიცებინა საკუთარი უდანაშაულობა იმ საქმეების ირგვლივ, რომელიც ეროვნულ დონეზე იყო მიმდინარე. Პროკურატურის პოზიციითა და სასამართლოების მიერ პროკურატურის არგუმენტების ყოველგვარი შეფასების გარეშე გაზიარებით დაირღვა მზია ამაღლობელის უდანაშაულობის პრეზუმფცია, რომელიც საერთაშორისო დადგენილი პრაქტიკით ინდივიდს იცავს სამართალწარმოების ყველა ეტაპზე, სანამ საბოლოო გადაწყვეტილება არ იქნება მიღებული“.

ორგანიზაციის განცხადებით, მთავრობის მიერ წარდგენილი პოზიციით ვერ დასტურდება იმ განზრახვის არარსებობა, რომლის მიზანს რეალურად მზია ამაღლობელის სამაგალითო დასჯა წარმოადგენდა. ამასთან დაკავშირებით საიამ წარადგინა მმართველი პარტიის წარმომადგენლების, მათ შორის ირაკლი კობახიძისა და ნინო წილოსანის განცხადებებიც, რომლებიც მზია ამაღლობელს, იმ პირობებშიც კი როდესაც მის მიმართ ჯერაც არ დამდგარა ეროვნულ დონეზე საბოლოო გადაწყვეტილება, დამნაშავედ მოიხსენიებენ და მიუთითებენ, რომ მან კონკრეტული დაკვეთა შეასრულა.

„დამატებით წერილობით პოზიციაში წარდგენილია ახალი ფაქტობრივი გარემოებები საქმის ირგვლივ, მათ შორის იმ მნიშვნელოვან გარემოებებთან დაკავშირებით, რომელიც სახელმწიფოს მიერ წარდგენილ შეპასუხებაში არ ყოფილა აღნიშნული. კერძოდ, 2025 წლის 14 ნოემბერს, პროკურატურამ, რომელიც მზია ამაღლობელის მიმართ ბრალისა და სასჯელის დამძიმებას მოითხოვდა, ქუთაისის სააპელაციო სასამართლოში წარადგინა ექსპერტიზის დასკვნა, რომელიც მზია ამაღლობელის მობილურ ტელეფონზე დაინიშნა სრულიად უკანონოდ, გურიის პოლიციის დეპარტამენტის, დეტექტივების (ოპერატიული) სამმართველოს დეტექტივის ვლადიმერ ჩიტაიას პატაკის საფუძველზე, რომელშიც იგი მიუთითებდა, რომ მის ხელთ არსებული ინფორმაციის თანახმად, მზია ამაღლობელის მიერ პოლიციელზე თავდასხმა წინასწარ იყო დაგეგმილი, რასთან დაკავშირებითაც მზია ამაღლობელი მობილური ტელეფონის აპლიკაციის საშუალებებით ესაუბრებოდა იმ ეტაპისთვის დაუდგენელ პირებს, ჰქონდა მიმოწერა და იღებდა ინსტრუქციებს. აღსანიშნავია, რომ მზია ამაღლობელის მობილურ ტელეფონზე გარდა იმისა, რომ ექსპერტიზის დანიშვნისას სასამართლომ იხელმძღვანელა მხოლოდ ვლადიმერ ჩიტაიას მიერ მიწოდებული ინფორმაციით და არ გაითვალისწინა ფაქტი, რომ მზია ამაღლობელის ტელეფონში იქნებოდა ინფორმაცია ჟურნალისტური საქმიანობის შესახებ, რითაც დაარღვია მომჩივნის მიმართ კონვენციის მე-8 და მე-10 მუხლებით გარანტირებული უფლებები, თითქმის 9 თვიანი ექსპერტიზის შემდგომ, მზია ამაღლობელის ტელეფონში გამოძიებისათვის საინტერესო ინფორმაცია ვერ მოიპოვა“, - წერს საია.

„საქართველოს ახალგაზრდა იურისტთა ასოციაციის“ განცხადებით, ამ პირობებში მზია ამაღლობელს უფლების დაცვის ქმედითი საშუალება წაერთვა, რამდენადაც მისი უფლებები შეიზღუდა იმ გარემოებებში, როდესაც არ არსებობდა მტკიცებულებათა ერთობლიობა ვლადიმერ ჩიტაიას პატაკის გარდა, რომელშიც მოცემული ინფორმაციაც ვერ დადასტურდა. 

„მითების დეტექტორის“ ინფორმაციით, სახელისუფლებო მედია დაპატიმრებული ირაკლი ღარიბაშვილის ნათესავებს ტროლის მეშვეობით მიმართავს. როგორც ფაქტების გადამოწმების პორტალი წერს, 13 იანვარს, სახელისუფლებო სარედაქციო პოლიტიკის მქონე მედიებმა წინა დღით დაპატიმრებული ყოფილი პრემიერ მინისტრის, ირაკლი ღარიბაშვილის ნათესავებისადმი ექიმ ნათია თოფურიას მიმართვა გამოაქვეყნეს, რომელიც ფეისბუქ-მომხმარებლის, Nati Topuria-ს პოსტს ეყრდნობა, ის კი სინამდვილეში ტროლია. პოსტის ავტორი ღარიბაშვილს „კორუმპირებულ ნაძირალად“ და „ქვეყნისა და ხალხის მოღალატედ“ მოიხსენიებს, ხოლო ნათესავებს მოუწოდებს, ან საჯაროდ განაცხადონ, რომ მათი „ფალავანი“ უდანაშაულოა, ან გაჩუმდნენ და მადლობა თქვან, რომ ასეთი მძიმე დანაშაულისთვის მხოლოდ ხუთწლიანი სასჯელი მიიღო.

„მითების დეტექტორის“ მიხედვით, ნათია თოფურიას ეს მიმართვა ტელეკომპანია POSTV-ის, მხარე • mkhare.ge-ის, Ongo-ს, რეპორტიორი-ს, InfoPostalioni.com-ის, მედიაჰოლდინგი „კვირას” და საერთო გაზეთი-ს ფეისბუქ-გვერდებზე თითქმის იდენტური ტექსტით გავრცელდა, მასალა ასევე გამოქვეყნდა სახელისუფლებო ტელეკომპანია რუსთავი 2-ის, სააგენტოების newshub.ge-სა და region.ge-ს ვებ-გვერდებზე. POSTV News-ის მიერ გავრცელებული პოსტი კი დასპონსორებულიც იყო.

„აღსანიშნავია ის, რომ POSTV News-ის პოსტსა და სხვა საინფორმაციო სააგენტოების მიერ გავრცელებულ სტატიებში, პოსტის ავტორ Nati Topuria-ს ერთმანეთისგან სრულიად განსხვავებული ფოტოები გვხვდება. რეალურად, Nati Topuria-ს ფეისბუქზე მხოლოდ ერთი ფოტო აქვს გამოქვეყნებული, თუმცა სხვა სახელისუფლებო საინფორმაციო სააგენტოების მიერ გავრცელებულ სტატიებში ფოტოზე სრულიად განსხვავებული ადამიანი გვხვდება. 

POSTV-ის ვერსიაში გამოყენებული ფოტო „მითების დეტექტორმა“ მათე დევიძის საწინააღმდეგო ფეისბუქ კამპანიის დროს გადაამოწმა და დაადგინა, რომ Nati Topuria-ს  ანგარიში vk.com-ის მომხმარებლის, Натиа Двали -ის ფოტოს იყენებდა.  ანგარიში Nati Topuria 2024 წლის 27 თებერვალს შეიქმნა, აქტიურად პოსტვა კი 2024 წლის მაისში, პროევროპული პროტესტის დისკრედიტაციის მიზნით დაიწყო.  

„მითების დეტექტორი“ ნათია დვალს „ინსტაგრამის“ ვიდეოზარის საშუალებით დაუკავშირდა, რათა დაედასტურებინა, რომ ფოტოზე, რომელსაც  Nati Topuria იყენებს,  რეალურად ნათია დვალია ასახული. ნათია დვალმა საუბარში აღნიშნა, რომ ფოტო 2010 წელს რუსეთში Canon-ის ბრენდის ფოტოაპარატით გადაიღო. მას ვკითხეთ, ჰქონდა თუ არა რაიმე კავშირი ანგარიშთან „Nati Topuria“, რაზეც მან გვიპასუხა, რომ არ იცის, ვინ შეიძლება იყენებდეს მის ფოტოს სანდოობის შემქნის მიზნით. ნათია დვალმა ასევე აღნიშნა, რომ ფეისბუქზე პოლიტიკური ხასიათის პოსტებს არ ავრცელებს.

„ნათი თოფურიას“ ფეისბუქ გვერდს სასწავლებლად კავკასიის საერთაშორისო უნივერსიტეტი აქვს მითითებული, სამუშაო ადგილად კი – Cebu World-Class RunFest, რომლის გვერდი 2024 წლის 5 დეკემბრამდე Casino hero-სა სახელით იყო რეგისტრირებული და ფილიპინებიდან იმართება. სახელისუფლებო მედიის პოსტებში ნათია თოფურია ექიმად არის მოხსენიებული. 

OSINT ინსტრუმენტებით მეორე ფოტოს გადამოწმების შედეგად მსგავსი ვიზუალით კიდევ ერთ პირს მივაკვლიეთ, კერძოდ, რუსული სოციალური ქსელის Vkontakte.ru-ს მომხმარებელს, ქსენია კოვალენკოს“, - წერს ფაქტების გადამოწმების პორტალი.

12 იანვარს, თბილისში, „ბათუმელები“/„ნეტგაზეთის“ დამფუძნებლისა და დირექტორის, მზია ამაღლობელის პატიმრობიდან ერთი წლის თავზე მისი გათავისუფლების მოთხოვნით მარში გაიმართა. ამაღლობელის კოლეგები, ოჯახის წევრები და გულშემატკივრები მარჯანიშვილის მოედანზე შეიკრიბნენ და მსვლელობით რუსთაველის გამზირზე გადაინაცვლეს.

„ერთი წელი გავიდა, სამწუხაროდ, მას შემდეგ, რაც საქართველოში ჟურნალისტი დაატყვევეს უკანონოდ, უსაფუძვლოდ, შეთითხნილი ბრალებით. ერთი წლის თავზე გავიგეთ, რომ პოლიციელი, რომელმაც მზია ამაღლობელზე იძალადა, დააწინაურეს. როგორც ჩანს, ეს არის რეჟიმის ბუნება, მაგრამ მე მაინც იმედს ვიტოვებ, რომ რეჟიმს ეყოფა გონიერება და გაათავისუფლებს ადამიანებს, რომლებიც ტყუილად ჰყავს გამოკეტილი“, - თქვა მარშზე მყოფმა „ბათუმელების“ მთავარმა რედაქტორმა, ეთერ თურაძემ.

მზია ამაღლობელის მხარდასაჭერად მარშზე მივიდნენ სინდისის პატიმრების მშობლები და სასულიერო პირებიც. დოროთე ყურაშვილის განცხადებით: 

„მზიას პატიმრობა საქართველოს ტკივილიც არის და ამავდროულად, საქართველოს სირცხვილიც არის, მზია ციხეში იყოს და დგებუაძე - დაწინაურებული პოლიციელი. სამწუხაროდ, ჩვენ ვერ მოვახერხეთ, ხალხმა ვერ დავიხსენით მზია, მაგრამ მადლობა ყველას, ვინც იბრძვის და მინდა, ჩვენმა ბრძოლამ შედეგი გამოიღოს და მზია თავისუფლებაზე იყოს, ამას რომ მივაღწიოთ“.

წინა დღეს, 11 იანვრის საღამოს, მზია ამაღლობელის კოლეგები და მხარდამჭერები შეიკრიბნენ რუსთავის მე-5 ქალთა პენიტენციურ დაწესებულებასთანაც.

„მთის ამბები“/„საქართველოს ამბების“ დამფუძნებლისა და რედაქტორის, გელა მთივლიშვილის თქმით: „მზია რეჟიმის ტყვეებს შორის იქცა სიმბოლოდ თავისუფლებისთვის ბრძოლაში, მათ შორის ჩვენთვის. თავისი მტკიცე ხასიათით, თავისი უტეხობით გარეთ მყოფ კოლეგებს მოგვცა მაგალითი იმისა, რომ არ უნდა გავტყდეთ დრაკონული და რეპრესიული კანონების პირობებშიც კი“.

„ბათუმელები“/„ნეტგაზეთის“ დირექტორის მოადგილემ, თამარ რუხაძემ კი აღნიშნა, რომ მზია ამაღლობელის პატიმრობით საქართველო ისეთი სახელმწიფოების რიცხვში შეიყვანეს, რომელთა დიქტატორული რეჟიმების შესახებ მსოფლიოში ეჭვი, სამწუხაროდ, აღარავის ეპარება:

„შევიკრიბეთ იმისთვის, რომ კიდევ ერთხელ მივაწვდინოთ ხმა, კიდევ ერთხელ გავაგონოთ ხმა იმას, ვინც უნდა გაიგონოს, პირველ რიგში, „ქართული ოცნების“ ხელისუფლებას და გავახსენოთ, რომ ერთი წელია უკვე, რაც უკანონო ტყვეობაში ჰყავს „ბათუმელების“ და „ნეტგაზეთის“ დამფუძნებელი და დირექტორი, მზია ამაღლობელი - ევროკავშირის უმაღლესი ჯილდოს, სახაროვის პრემიის და კიდევ არაერთი პროფესიული ჯილდოს მფლობელი. ძალიან უნდა სრცხვენოდეს, ალბათ, საქართველოს ხელისუფლებას, რომ მზიას პატიმრობით ეს ქვეყანა შეიყვანეს ისეთი სახელმწიფოების რიცხვში, რომელთა დიქტატორული რეჟიმების შესახებ მსოფლიოში ეჭვი აღარავის ეპარება, სამწუხაროდ“.

„ბათუმელები“/„ნეტგაზეთის“ დამფუძნებლისა და დირექტორის დაკავებიდან ერთი წლის თავზე ერთობლივი განცხადება გააკეთეს პრესის თავისუფლების დამცველმა საერთაშორისო ორგანიზაციებმა და საქართველოს ხელისუფლებას მზია ამაღლობელის დაუყოვნებლივ გათავისუფლებისკენ კიდევ ერთხელ მოუწოდეს.

როგორც „პრესის საერთაშორისო ინსტიტუტი“ (IPI), „ჟურნალისტთა დაცვის კომიტეტი“ (CPJ) და „რეპორტიორები საზღვრებს გარეშე“ (RSF) აღნიშნავენ, მზია ამაღლობელის დაპატიმრება „ქართული ოცნების“ მიერ ავტორიტარული პოლიტიკისკენ მკვეთრი შემობრუნებისა და პრესის თავისუფლების შეზღუდვის ფონზე მოხდა, ამაღლობელი კი როგორც სასამართლო პროცესზე, ისე ციხის საკნიდან აგრძელებს დემოკრატიისა და თავისუფალი პრესისთვის პრინციპულ ბრძოლას.

მზია ამაღლობელის ერთწლიან პატიმრობას გამოეხმაურნენ ადგილობრივი სამოქალაქო საზოგადოების ორგანიზაციებიც. „საქართველოს ახალგაზრდა იურისტთა ასოციაციის“ განცხადებით, „ქართული მართლმსაჯულება აშკარად უგულვებელყოფს მზია ამაღლობელის მიმართ პოლიტიკურად მოტივირებულ ბრალდებასა და საქმესთან დაკავშირებულ სხვა დარღვევებს. მზიას საქმეში სხვადასხვა დარღვევაზე სამართლებრივი ბრძოლა გრძელდება საერთაშორისო დონეზე, მათ შორის, ადამიანის უფლებათა ევროპულ სასამართლოში. რეალური მართლმსაჯულების აღსრულება მზიას გამარჯვებით უნდა დასრულეს“. 

„საქართველოს ჟურნალისტური ეთიკის ქარტიის“ შეფასებით კი, მზია ამაღლობელის პატიმრობაში დატოვება განგრძობითი სირცხვილია ქართული სახელმწიფოსთვის და იმ პოლიტიკური ძალისთვის, რომელიც მას მართავს. 

------------------------------------

მზია ამაღლობელი 1 წელია უკანონო პატიმარია. 2025 წლის 6 აგვისტოს, მას ბათუმის საქალაქო სასამართლოს მოსამართლე ნინო სახელაშვილმა 2-წლიანი პატიმრობა მიუსაჯა. „ბათუმელები“/„ნეტგაზეთის” დამფუძნებელსა და დირექტორს ბათუმის პოლიციის უფროსისთვის, ირაკლი დგებუაძისთვის სილის გაწვნის გამო პოლიციელზე თავდასხმას ედავებოდნენ, თუმცა მოსამართლემ ამაღლობელს ბრალი გადაუკვალიფიცირა და ის დამნაშავედ სისხლის სამართლის კოდექსის 353-ე მუხლის პირველი ნაწილით ცნო. მზია ამაღლობელისთვის გამოტანილი განაჩენი ძალაში დატოვა ქუთაისის სააპელაციო სასამართლომაც.

„ბათუმელებისა“ და „ნეტგაზეთის“ დამფუძნებელი და დირექტორი 11-12 იანვრის ღამით, ბათუმის პოლიციის მთავარ სამმართველოსთან ორჯერ დააკავეს. პირველად მზია ამაღლობელი პოლიციამ კედელზე იმ სტიკერის გაკვრის გამო დააკავა, რომელზეც „გაიფიცე“ ეწერა, ის მოგვიანებით ხელწერილის საფუძველზე გაათავისუფლეს, თუმცა მალევე მეორედ, ირაკლი დგებუაძისთვის სილის გაწვნის გამო დააკავეს. დაკავებისას მზია ამაღლობელს ღირსების შემლახავად მოექცნენ, თუმცა პროკურატურას საქმის გამოძიება არ დაუწყია.

სასამართლომ მზია ამაღლობელი დააჯარიმა ორ ადმინისტრაციულ საქმეზეც. მოსამართლე სალიხ შაინიძემ ამაღლობელი პირველ ადმინისტრაციულ საქმეზე სამართალდამრღვევად 18 მარტს ცნო და 2 000 ლარით დააჯარიმა. 18 ივნისს კი, ის სამართალდამრღვევად მოსამართლე მარიანა ფამოევამ ცნო და 1000 ლარით დააჯარიმა. შსს ამაღლობელს პოლიციელების სიტყვიერ შეურაცხყოფასა და  აჭარის პოლიციის დეპარტამენტის წინ, დამხმარე ნაგებობაზე სტიკერის გაკვრის გამო იერსახის დამახინჯებას ედავებოდა. 

„ბათუმელები“/„ნეტგაზეთის“ დამფუძნებელი და დირექტორი დაკავების დღიდან, 38 დღე შიმშილობდა. მზია ამაღლობელი ბოლო თვეების განმავლობაში არაერთი საერთაშორისო ჯილდოს მფლობელი გახდა. მათ შორის, ამაღლობელმა მიიღო სახაროვის პრემია - ევროკავშირის ადამიანის უფლებათა უმაღლესი ჯილდო.

„ბათუმელები“/„ნეტგაზეთის“ დამფუძნებლისა და დირექტორის, მზია ამაღლობელის დაკავებიდან ერთი წლის თავზე, პრესის თავისუფლების დამცველი საერთაშორისო ორგანიზაციები საქართველოს ხელისუფლებას ამაღლობელის დაუყოვნებლივ გათავისუფლებისა და მისი უფლებების სავარაუდო დარღვევის ფაქტების ობიექტურად გამოძიებისკენ კვლავ  მოუწოდებენ. 

„პრესის საერთაშორისო ინსტიტუტი“ (IPI), „ჟურნალისტთა დაცვის კომიტეტი“ (CPJ) და „რეპორტიორები საზღვრებს გარეშე“ (RSF) აღნიშნავენ, რომ საქართველოს დამოუკიდებლობის მოპოვების შემდეგ, მზია ამაღლობელი პირველი ქალი ჟურნალისტია, რომელიც დააპატიმრეს, მის მიერ დაფუძნებული გამოცემები კი საერთაშორისოდ აღიარებულია, როგორც საქართველოში ჟურნალისტიკის ხარისხის სტანდარტების დამდგენნი. 

პრესის თავისუფლების დამცველი ორგანიზაციების განცხადებით, მზია ამაღლობელის დაპატიმრება „ქართული ოცნების“ მიერ ავტორიტარული პოლიტიკისკენ მკვეთრი შემობრუნებისა და პრესის თავისუფლების შეზღუდვის ფონზე მოხდა, ამაღლობელი კი როგორც სასამართლო პროცესზე, ისე ციხის საკნიდან აგრძელებს დემოკრატიისა და თავისუფალი პრესისთვის პრინციპულ ბრძოლას:

„მისი გამბედაობის აღიარების ნიშნად, 2025 წლის დეკემბერში ევროპარლამენტმა მას სახაროვის პრემია მიანიჭა აზრის თავისუფლებისთვის“.

საერთაშორისო ორგანიზაციების შეფასებით, საქართველოს ხელისუფლებამ სათანადოდ ვერ გამოიძია ბრალდებები, რომ მზია ამაღლობელი ადმინისტრაციული წესით უკანონოდ დააკავეს დაკავებამდე ცოტახნით ადრე და პოლიციის უფროსმა დაკავების შემდეგ შეაფურთხა და ტუალეტსა და სასმელ წყალზე წვდომა აუკრძალა. მთავრობის მაღალი თანამდებობის პირებმა, მათ შორის პრემიერ მინისტრმა, გაავრცელეს შეთქმულების თეორიები, რომ ამაღლობელი პოლიტიკური ოპოზიციის ან უცხო ქვეყნების დავალებით მოქმედებდა, ხელისუფლებამ კი საეჭვო საგადასახადო მოთხოვნების საფუძველზე მისი გამოცემების საბანკო ანგარიშები დააყადაღა.

პრესის თავისუფლების დამცველი ორგანიზაციები აღნიშნავენ, მზია ამაღლობელის მხედველობა პატიმრობაში მკვეთრად გაუარესდა, ერთ თვალში მხედველობის 10% დარჩა, მეორეთი კი მხოლოდ სინათლის აღქმა შეუძლია.

„მზია ამაღლობელი სწრაფად მზარდი ავტორიტარიზმის წინააღმდეგ ქართველი ხალხის ბრძოლის სიმბოლოდ იქცა“, - განაცხადეს პრესის თავისუფლების დამცველმა ორგანიზაციებმა. ისინი საქართველოს ხელისუფლებას მოუწოდებენ, საბოლოოდ გამოასწოროს ეს უსამართლობა და უზრუნველყოს, რომ ამაღლობელმა გისოსებს მიღმა ერთი დღეს აღარ გაატაროს. 

-------------------------------------------------------------------------------

მზია ამაღლობელი 1 წელია უკანონო პატიმარია. 2025 წლის 6 აგვისტოს, მას ბათუმის საქალაქო სასამართლოს მოსამართლე ნინო სახელაშვილმა 2-წლიანი პატიმრობა მიუსაჯა. „ბათუმელები“/„ნეტგაზეთის” დამფუძნებელსა და დირექტორს ბათუმის პოლიციის უფროსისთვის, ირაკლი დგებუაძისთვის სილის გაწვნის გამო პოლიციელზე თავდასხმას ედავებოდნენ, თუმცა მოსამართლემ ამაღლობელს ბრალი გადაუკვალიფიცირა და ის დამნაშავედ სისხლის სამართლის კოდექსის 353-ე მუხლის პირველი ნაწილით ცნო. მზია ამაღლობელისთვის გამოტანილი განაჩენი ძალაში დატოვა ქუთაისის სააპელაციო სასამართლომაც.

„ბათუმელებისა“ და „ნეტგაზეთის“ დამფუძნებელი და დირექტორი 11-12 იანვრის ღამით, ბათუმის პოლიციის მთავარ სამმართველოსთან ორჯერ დააკავეს. პირველად მზია ამაღლობელი პოლიციამ კედელზე იმ სტიკერის გაკვრის გამო დააკავა, რომელზეც „გაიფიცე“ ეწერა, ის მოგვიანებით ხელწერილის საფუძველზე გაათავისუფლეს, თუმცა მალევე მეორედ, ირაკლი დგებუაძისთვის სილის გაწვნის გამო დააკავეს. დაკავებისას მზია ამაღლობელს ღირსების შემლახავად მოექცნენ, თუმცა პროკურატურას საქმის გამოძიება არ დაუწყია.

სასამართლომ მზია ამაღლობელი დააჯარიმა ორ ადმინისტრაციულ საქმეზეც. მოსამართლე სალიხ შაინიძემ ამაღლობელი პირველ ადმინისტრაციულ საქმეზე სამართალდამრღვევად 18 მარტს ცნო და 2 000 ლარით დააჯარიმა. 18 ივნისს კი, ის სამართალდამრღვევად მოსამართლე მარიანა ფამოევამ ცნო და 1000 ლარით დააჯარიმა. შსს ამაღლობელს პოლიციელების სიტყვიერ შეურაცხყოფასა და  აჭარის პოლიციის დეპარტამენტის წინ, დამხმარე ნაგებობაზე სტიკერის გაკვრის გამო იერსახის დამახინჯებას ედავებოდა. 

„ბათუმელები“/„ნეტგაზეთის“ დამფუძნებელი და დირექტორი დაკავების დღიდან, 38 დღე შიმშილობდა. მზია ამაღლობელი ბოლო თვეების განმავლობაში არაერთი საერთაშორისო ჯილდოს მფლობელი გახდა. მათ შორის, ამაღლობელმა მიიღო სახაროვის პრემია - ევროკავშირის ადამიანის უფლებათა უმაღლესი ჯილდო.

დღეს, 12 იანვარს, მზია ამაღლობელის გათავისუფლების მოთხოვნით მარში გაიმართება: 

„12 იანვარს ერთი წელი ხდება, რაც მზია ამაღლობელი უკანონოდ არის დაპატიმრებული. მზიას გათავისუფლების მოთხოვნით, საღამოს 8 საათზე, მარჯანიშვილის მოედნიდან დაიწყება და გალაკტიონის ხიდისა და მიხეილ ჯავახიშვილის ქუჩის გავლით, რუსთაველზე, პარლამენტთან დასრულდება მარში „მზიას თავისუფლებისთვის“.

ამ მარშით „ქართული ოცნების“ ხელისუფლებას კიდევ ერთხელ შევახსენებთ, რომ ზუსტად ერთი წელია, რაც ევროკავშირის უმაღლესი ჯილდოს მფლობელი ჟურნალისტი და მედიამენეჯერი მზია ამაღლობელი დატყვევებული ჰყავთ შეთითხნილი ბრალდების, ცრუ ჩვენებების და უზურპირებული სასამართლო სისტემის მეშვეობით.

ამ მარშით კიდევ ერთხელ გავაპროტესტებთ მზიას უკანონო პატიმრობას, მის მიმართ სახელმწიფოს დაუნდობელ, არაადამიანურ მოპყრობას, მისი უფლებების არაერთგზის დარღვევას და მოვითხოვთ მის დაუყოვნებლივ და უპირობო გათავისუფლებას…

ამ ერთი წლის განმავლობაში, მზია ამაღლობელი იქცა სიტყვის თავისუფლებისა და საქართველოს წინააღმდეგობის ძლიერ სიმბოლოდ, რომლის ხმაც გისოსებიდან მთელ ევროპასა და ცივილიზებულ სამყაროში ისმის. საქართველო კი სწორედ მზიას საქმის გამო პირველად აღმოჩნდა იმ ავტორიტარული ქვეყნების სიაში, რომლებსაც სინდისის პატიმარი ჟურნალისტები ჰყავთ“.

გუშინ, საღამოს, მზია ამაღლობელის კოლეგები, მეგობრები და გულშემატკივრები რუსთავის მე-5 ქალთა პენიტენციურ დაწესებულებასთანაც შეიკრიბნენ.

მზია ამაღლობელი 1 წელია უკანონო პატიმარია. 2025 წლის 6 აგვისტოს, მას ბათუმის საქალაქო სასამართლოს მოსამართლე ნინო სახელაშვილმა 2-წლიანი პატიმრობა მიუსაჯა. „ბათუმელები“/„ნეტგაზეთის” დამფუძნებელსა და დირექტორს ბათუმის პოლიციის უფროსისთვის, ირაკლი დგებუაძისთვის სილის გაწვნის გამო პოლიციელზე თავდასხმას ედავებოდნენ, თუმცა მოსამართლემ ამაღლობელს ბრალი გადაუკვალიფიცირა და ის დამნაშავედ სისხლის სამართლის კოდექსის 353-ე მუხლის პირველი ნაწილით ცნო. მზია ამაღლობელისთვის გამოტანილი განაჩენი ძალაში დატოვა ქუთაისის სააპელაციო სასამართლომაც.

„ბათუმელებისა“ და „ნეტგაზეთის“ დამფუძნებელი და დირექტორი 11-12 იანვრის ღამით, ბათუმის პოლიციის მთავარ სამმართველოსთან ორჯერ დააკავეს. პირველად მზია ამაღლობელი პოლიციამ კედელზე იმ სტიკერის გაკვრის გამო დააკავა, რომელზეც „გაიფიცე“ ეწერა, ის მოგვიანებით ხელწერილის საფუძველზე გაათავისუფლეს, თუმცა მალევე მეორედ, ირაკლი დგებუაძისთვის სილის გაწვნის გამო დააკავეს. დაკავებისას მზია ამაღლობელს ღირსების შემლახავად მოექცნენ, თუმცა პროკურატურას საქმის გამოძიება არ დაუწყია.

სასამართლომ მზია ამაღლობელი დააჯარიმა ორ ადმინისტრაციულ საქმეზეც. მოსამართლე სალიხ შაინიძემ ამაღლობელი პირველ ადმინისტრაციულ საქმეზე სამართალდამრღვევად 18 მარტს ცნო და 2 000 ლარით დააჯარიმა. 18 ივნისს კი, ის სამართალდამრღვევად მოსამართლე მარიანა ფამოევამ ცნო და 1000 ლარით დააჯარიმა. შსს ამაღლობელს პოლიციელების სიტყვიერ შეურაცხყოფასა და  აჭარის პოლიციის დეპარტამენტის წინ, დამხმარე ნაგებობაზე სტიკერის გაკვრის გამო იერსახის დამახინჯებას ედავებოდა. 

„ბათუმელები“/„ნეტგაზეთის“ დამფუძნებელი და დირექტორი დაკავების დღიდან, 38 დღე შიმშილობდა. მზია ამაღლობელი ბოლო თვეების განმავლობაში არაერთი საერთაშორისო ჯილდოს მფლობელი გახდა. მათ შორის, ამაღლობელმა მიიღო სახაროვის პრემია - ევროკავშირის ადამიანის უფლებათა უმაღლესი ჯილდო.

„საქართველოს ჟურნალისტური ეთიკის ქარტია“ ეხმაურება საინფორმაციო სააგენტო CNews-ისა და გაზეთ „ქრონიკა პლიუსისთვის“ ჟურნალისტურ საქმიანობაში სავარაუდო ხელშეშლის ფაქტს და შესაბამისს უწყებებს მოუწოდებს ამ შემთხვევით დროულად დაინტერესდნენ. 

„საინფორმაციო სააგენტოს CNews და გაზეთის „ქრონიკა პლიუსის“ დამფუძნებლის, ელისო კილაძის განცხადებით, ის და მისი ჟურნალისტური კოლექტივი 8 იანვრიდან ვერ ახერხებს გურამ ფანჯიკიძის ქუჩაზე მდებარე ოფისში შესვლას. გათიშულია ასევე CNews საიტი. ამ მისამართზე შესვლისას მკითხველს ხვდება წარწერა: „გადაუხდელობის გამო ვებგვერდი დროებით არააქტიურია“. ელისო კილაძე მსგავსი დავალიანების არსებობას უარყოფს. მომხდარში ელისო კილაძე ყოფილ ბიზნეს პარტნიორს, იმ ბიზნეს ცენტრის მფლობელს, რომელშიც მედიასაშუალებების ოფისია განთავსებული, ადანაშაულებს და ამბობს, რომ ამ ყოფილი ბიზნეს პარტნიორის და მისი ნდობით აღჭურვილი პირის ქმედებების გამო მის ორივე მედიასაშუალებას მუშაობაში ხელი ეშლება. შედეგად, ორშაბათს ვერ გამოვა „ქრონიკა პლიუსის“ მორიგი ნომერი. ელისო კილაძე შექმნილ პრობლემას ყოფილ ბიზნეს პარტნიორთან უთანხმოებას უკავშირებს, რაც, მისი შეფასებით, შეიძლებოდა გამხდარიყო სამოქალაქო დავის საგანი, მაგრამ არა საოფისე ფართიდან მათი აღსრულების მექანიზმით გამოძევების საფუძველი. 

ელისო კილაძე ხაზს უსვამს, რომ საოფისე კომპიუტერებსა და ელექტრონულ მოწყობილობებში ინახება კონფიდენციალური ინფორმაცია. ოფისში ინახება გაზეთ „ქრონიკა პლიუსის” არქივიც. ელისო კილაძემ არ იცის, ამჟამად მედიასაშუალებების ოფისში რა მდგომარეობაა - გატეხილია თუ არა ოფისის კარი და მიიღეს თუ არა უცხო პირებმა წვდომა მედიასაშუალებების კუთვნილ კომპიუტერებზე. 

ჟურნალისტური ეთიკის ქარტია შესაბამისს უწყებებს მოუწოდებს, დროულად დაინტერესდნენ ამ შემთხვევით და დაუყოვნებლივ უზრუნველყონ, რომ CNews და გაზეთის „ქრონიკა პლიუსის“ ჟურნალისტურ კოლექტივს მიეცეს წვდომა მათ სამუშაო სივრცეზე, არ დაზიანდეს მათი კუთვნილი კომპიუტერები და მათ კუთვნილ ელექტრონულ მოწყობილობებში დაცულ ინფორმაციაზე წვდომა არ მიიღონ გარეშე პირებმა. საჭიროების შემთხვევაში აღიძრას სისხლის სამართლის საქმე ჟურნალისტურ საქმიანობაში უკანონოდ ხელშეშლის გამო“, - ვკითხულობთ ქარტიის განცხადებაში.