აჭარის ტელევიზიისა და რადიოს დირექტორის მოადგილე, ნათია ზოიძე, რომელიც თითქმის 8 თვის განმავლობაში, უდირექტორობის პერიოდში, არხს ხელმძღვანელობდა, მაუწყებელს ტოვებს. ამის შესახებ მან თავად დაწერა სოციალურ ქსელში.

ზოიძე წერს, რომ მაუწყებლის დირექტორმა გიორგი კოხრეიძემ დააკმაყოფილა მისი თხოვნა სამსახურიდან წამოსვლის თაობაზე. ნათია ზოიძე წერს, რომ ეს არ იყო ნებაუოფლობითი პროცესი და იგი იძულებული გახდა ამგვარი გადაწყვეტილება მიეღო. მიზეზად უკვე ყოფილი მოადგილე რამდენიმე მიზეზს ასახელებს, მათ შორის, მისი ახალი ხელშეკრულება, რომელიც აღარ აძლევდა საქმის კეთების საშულებას.



საუბარია ხელშეკრულების პირობებზე, რომელიც ნათია ზოიძეს ახალმა დირექტორმა, გიორგი კოხრეიძემ შეუთანხმებლად შეუცვალა. დირექტორმა ხელშეკრულებიდან ის პუნქტები ამოიღო, რომლითაც მოადგილეს მაუწყებლის სამივე პლატფორმაზე, კოორდინაცია და პოლიტიკის შემუშავება ევალებოდა.

ნათია ზოიძე წერს, რომ სამსახურიდან წამოსვლის შესახებ გადაწყვეტილება სწორედ ამ დროს მიიღო: „გადაწყვეტილება სამსახურიდან წასვლის შესახებ მივიღე 2019 წლის 16 დეკემბერს, როცა ჩემი შრომითი უფლებები შეიცვალა“.

ამავე პოსტში ნათია ზოიძე განმარტავს, რატომ დარჩა ამ დრომდე მაუწყებელში: „არხზე არიან კეთილსინდისიერი თანამშრომლები და ჩემთვის პრინციპული მნიშვნელობა ჰქონდა, გაუგრძელებდნენ თუ არა შრომით ხელშეკრულებებს მომავალი წლიდან მათ. ამ ეტაპზე, ერთის გარდა (ნათია შავაძე), ყველასთან გააგრძელეს ხელშეკრულება. ის ერთიც უპატიებელია“.

ყოფილი მოადგილე წერს, რომ მისი გადაწყვეტილებით აღფრთოვანებული არ არის, მაგრამ ეს გარდაუვალი იყო: „ვერ ავიღებ პასუხისმგებლობას იმაზე, რისთვისაც არაფრის გაკეთების საშუალებას არ მაძლევენ“.

ამავე სტატუსში ნათია ზოიძე ვარაუდობს, რომ გიორგი კოხრეიძე არასასურველ თანამშრომლებს რეორგანიზაციის გზით მაინც ჩამოიცილებს და დაასუსტებს არხის სარედაქციო პოლიტიკას; აქვე იგი ამბობს, რომ ეს ყველაფერი არის პოიტიკური პროცესი და მას ამაში ეჭვი არასდორს შეპარვია.

„ აღარ შევეხები მრჩეველთა საბჭოს ცალკეულ წევრებს, სისტემის მსახურებზე დროის კარგვა არ ღირს; იმედი მაქვს, არხიდან ჩემი წამოსვლის შემდეგ, რამდენიმე თანამშრომელი დროებით მაინც გათავისუფლდება ზეწოლისა და წნეხისგან; არასდროს შემპარვია ეჭვი, რომ აჭარის ტელევიზიაზე რაც ხდებოდა ბოლო ცხრა თვის განმავლობაში, თავიდან ბოლომდე იყო პოლიტიკური პროცესი“.

ნათია ზოიძემ სახელშეკრულებო პირობების შეცვლა სასამართლოში გაასაჩივრა. მის ინტერესებს საქართველოს ახალაზრდა იურისტთა ასოციაცია იცავს. ყოფილი მოადგილე ამბობს, რომ პროცესს ბოლომდე მიყვება, იქვე აზუსტებს, რომ „გამოძიებას ვენდობი-მეთქი რომ ვთქვა, გულუბრყვილო ვიქნები“, თუმცა, ამბობს, რომ მისი აზრით, „ სისტემა, რომელიც გვებრძვის, გვითვალთვალებს და გვაკონტროლებს, მაინც დამარცხდება“.

ნათია ზოიძის ამავე პოსტიდან იკითხება, რომ მისი გადაწყვეტილების შესახებ თანამშრომლებმა იცოდნენ: „თავისუფლებაში გატარებული 10 თვეს კი არა, ერთ საათსაც მნიშვნელობა აქვს. დღესაც რომ მისაღები მქონდეს ეს გადაწყვეტილება, მაინც შევიდოდი ამ ომში. მოკლედ, არაფერს არ ვნანობ და წარმატებები ჩემთვის ძალიან ძვირფას ადამიანებს, რომელებიც ამ არხზე დარჩნენ და მუშაობენ. ამ არხზე ჟურნალისტიკა დღეს კიდევ თუ კეთდება, ეს სწორედ მათი დამსახურებაა. თანამშრომლებისთვის ჩემი ეს გადაწყვეტილება მოულოდნელი არ იყო. ჩვენ ვისაუბრეთ, გავაანალიზეთ და შევთანხმდით“.

ნათია ზოიძე ხაზს უსვამს აჭარის უმაღლესი საბჭოს დეპუტატებისა და თავმჯდომარის პასუხისმგებლობის საკითხსაც: „მაინტერესებს, აჭარის უმაღლესი საბჭოს დეპუტატები, თავმჯდომარის ჩათვლით, ოდესმე პასუხისმგებლობას თუ იგრძნობენ იმაზე, რა შედეგიც დადგა. მგონია, რომ თავს ყოველთვის გაიმართლებენ. აღიარებას სხვა ძალა სჭირდება“.

ამავე სტატუსში იგი წინასწარ პასუხობს კითხვას, რომელიც მისი მისამართით გაჩნდება და წერს, რომ ტოვებს ბათუმს და მუშაობას ტელეკომპანია პირველზე გააგრძელებს.



„ბათუმში „გრიგოლიას არხს“ რომ ეძახით აი იქ. „ღამის ამბების“ თანამშრომელი ვიქნები“

„ღამის ამბები“ Tv პირველზე თამარ ჩიხლაძეს მიჰყავს. გადაცემა,ეთერში გადის ყოველ სამუშაო დღეს, საინფორმაციო გამოშვების დასრულებისთანავე.

თბილისის საქალაქო სასამართლომ, ტელეკომპანია "რუსთავი 2-ის" საქმეზე, მოსარჩელეების დავით დვალისა და ჯარჯი აქიმიძის სარჩელი კვლავ მიიღო წარმოებაში. შპს „სამაუწყებლო კომპანია რუსთავი 2“-ის წილების 60% -ს ისევ ყადაღა დაედო. ამ ინფორმაციას სოციალურ ქსელში დავით დვალი და მათი ადვოკატი, კახა კოჟორიძე ავრცელებენ.

"ბრძოლა გრძელდება. და ეს ბრძოლა აუცილებლად წარმატებით დასრულდება!"- წერს კახა კოჟორიძე.

მისივე ინფორმაციით, ორი კვირის წინ სასამართლომ განცხადება გაავრცელა იმის შესახებ, რომ "რუსთავი 2-ის" საქმე განუხილველი დარჩა და ყადაღა გაუქმდა. მაგრამ ორი დღის წინ სარჩელი რომ წამოებაში იქნა მიღებული და ყადაღა ისევ დაედო, ამის შესახებ უწყებას აღარაფერი უთქვამს. "როგორც ჩანს, სასამართლომ მხოლოდ განუხილველად დატოვება მიიჩნია საზოგადოებისათვის საინტერესო ინფორმაციად", - ვკითხულობთ მის პოსტში.





შეგახსენებთ, საქართველოს უზენაესი სასამართლოს დიდმა პალატამ ტელეკომპანია „რუსთავი 2“ 2017 წლის 2 მარტს ქიბარ ხალვაშს მიაკუთვნა. "რუსთავი 2-მა" და მისმა მფლობელებმა საკუთარი უფლებების დარღვევის მოტივით ადამიანის უფლებათა ევროპულ სასამართლოს მიმართეს. 3 მარტს სტრასბურგის სასამართლომ გადაწყვეტილების აღსრულება შეაჩერა. 2019 წლის 18 ივლისს ცნობილი გახდა ამ საქმეზე სტრასბურგის სასამართლოს გადაწყვეტილება, რომლითაც აღსრულების შეჩერება გაუქმდა.

ამის შემდეგ, 2019 წლის ოქტომბერში, დავით დვალმა და ჯარჯი აქიმიძემ "რუსთავი 2-ის" წილის 60%-ის დასაბრუნებლად სასამართლოს მიმართეს.  2020 წლის 17 იანვარს კი თბილისის საქალაქო სასამართლომ გაავრცელა ინფორმაცია, რომელშიც ნათქვამი იყო, რომ სარჩელი განუხილველი დარჩა და ტელეკომპანიის წილების 60%-ს ყადაღა მოეხსნა. ამ გადაწყვეტილების გასაჩივრებისთვის მხარეს 12 დღე ჰქონდა ვადა.

imedinews.ge-ს მთავარმა რედაქტორმა თეონა გეგელიამ აღნიშნული პოზიცია და მთლიანად "იმედის" ჰოლდინგი დატოვა. ამის შესახებ მან სოციალურ ქსელში დაწერა.

"5 წელი ვიმუშავე „იმედში“ სხვადასხვა პოზიციაზე: თავიდან „ქრონიკაში“, რადიო „იმედში“ გადაცემის წამყვანად, ორი გადაცემა მიმყავდა ტელეკომპანია „იმედის“ ეთერში - ჯერ „პოლიტიკა“ და ბოლოს „იმედი Live“, ვიყავი ჰოლდინგის მთავარი საინფორმაციო გამოცემის imedinews.ge-ს მთავარი რედაქტორი მისი შექმნის დღიდან, 2016 წლის დეკემბრიდან - დღემდე.

ჩემთვის ყველაზე ღირებული იყო „იმედინიუსზე“ მუშაობა და მადლობა ამ შესაძლებლობისთვის არხის ყოფილ ხელმძღვანელს, გოგა კალანდარიშვილს.

ჩემი სურვილით და არხის ხელმძღვანელობასთან შეთანხმებით დღეს დავტოვე imedinews.ge-ს მთავარი რედაქტორის პოზიცია, შესაბამისად „იმედის“ ჰოლდინგთან არანაირი საქმიანი ურთიერთობა აღარ მაკავშირებს", - წერს თეონა გეგელია.

ამავე სტატუსში იგი აკონკრეტებს, რომ არსად გადადის: "მივდივარ სახლში".



"მედიაჩეკერმა" თეონა გეგელიასთან დაკავშირება და დამატებითი დეტალების დაზუსტება სცადა,  თუმცა, გეგელია სატელეფონო ზარებსა და მოკლეტქსტურ შეტყობინებებს არ პასუხობს.

ამ საკითხზე დამატებითი დეტალების დაზუსტებას სხვა წყაროებთანაც ვცდილობთ და მათი გარკვევისთანავე, მასალა განახლდება.

აჭარის საზოგადოებრივი მაუწყებლის 65-მა თანამშრომელმა ალტერნატიული პროფკავშირები დააფუძნა. მათი თქმით, ისინი საკუთარი უფლებების დასაცავად ერთიანდებიან და არა ვინმეს წინააღმდეგ.

“გაერთიანების მიზანი სწორედ ისაა, რომ სიტყვის თავისუფლებასთან და სარედაქციო დამოუკიდებლობასთან ერთად შევძლოთ ვისაუბროთ სამართლიან შრომით პირობებსა და შრომის უსაფრთხოებაზე, კვალიფიკაციის ამაღლების საჭიროებაზე და ა.შ.” ჟურნალისტების მიერ გავრცელებულ განცხადებაში ნათქვამია, რომ თანამშრომლებმა გაერთიანება გადაწყვიტეს, რადგან მათი მოთხოვნები ხშირად ყურადღების მიღმა რჩებოდა. აჭარის ტელევიზიის თანამშრომლების მიერ გავრცელებულ განცხადებას სრულად გთავაზობთ:

"საზოგადოებრივი მაუწყებლის აჭარის ტელევიზიისა და რადიოს თანამშრომლები დიდი ხანია ვაკვირდებით მაუწყებელში მიმდინარე მოვლენებს. ამ დროის განმავლობაში მაუწყებელმა გამოიცვალა დირექტორები, რომელთაც ჰქონდათ საკუთარი პრიორიტეტები და ხედვები.

ხშირად, გადაწყვეტილების მიღების პროცესში, თანამშრომელთა ჩართულობა მხოლოდ საჩვენებელ ხასიათს ატარებდა და ფორმალური კონსულტაციით შემოიფარგლებოდა. მიგვაჩნია, რომ ვინც არ უნდა იყოს მაუწყებლის ხელმძღვანელობაში, მნიშვნელოვანია ესმოდეს, რომ რეალურად ორგანიზაციის მართვასთან დაკავშირებით გადაწყვეტილებების მიღებისას უნდა იხელმძღვანელოს ერთი მხრივ, სიტყვისა და გამოხატვის თავისუფლების პრინციპით და მეორე მხრივ - თანამშრომელთა კეთილდღეობისთვის საჭირო დღის წესრიგით.

იქიდან გამომდინარე, რომ თანამშრომელთა მოთხოვნები ხშირად რჩებოდა ყურადღების მიღმა და იმის გამო, რომ თანამშრომელთა მოსმენა არ უნდა იყოს რომელიმე დირექტორის ან მრჩეველთა საბჭოს მიერ გამოვლენილი კეთილი ნება, გადავწყვიტეთ გავერთიანებულიყავით.

ვერთიანდებით არა ვინმეს წინააღმდეგ, არამედ საკუთარი უფლებების დასაცავად. ეს უფლება, რა თქმა უნდა, პირველ რიგში არის აქ მომუშავე ჟურნალისტების სარედაქციო დამოუკიდებლობა და თავისუფალი სიტყვა, მაგრამ ამდენი ხნის განმავლობაში, თვითგადარჩნის რეჟიმში მუშაობის გამო, ხშირად ყურადღებას არ ვუთმობდით სხვა საკითხებს, რადგან ფოკუსირებული ვიყავით იმ მთავარ ღირებულების ირვგლივ, რასაც მაუწყებელი ემსახურება. გაერთიანების მიზანი სწორედ ისაა, რომ სიტყვის თავისუფლებასთან და სარედაქციო დამოუკიდებლობასთან ერთად შევძლოთ ვისაუბროთ სამართლიან შრომით პირობებსა და შრომის უსაფრთხოებაზე, კვალიფიკაციის ამაღლების საჭიროებაზე და ა.შ.

ჩვენ ვართ და ვიქნებით სოლიდარულები ყველას მიმართ, ვისი შრომითი უფლებები ირღვევა ამ ქვეყანაში. საერთო ბრძოლაში უსამართლობის წინააღმდეგ, ჩვენ ვართ და ვიქნებით თითოეული მოქალაქის მოკავშირე და თანამემბრძოლი", - ნათქვამია აჭარის ტელევიზიის მიერ გავრცელებულ განცხადებაში.

ტელეკომპანია „მთავარი არხის“ გენერალური დირექტორი ნიკა გვარამია ამბობს, რომ მის ოჯახს პროკურატურა 28 დღის განმავლობაში უთვალთვალებდა, მაშინაც კი, როდესაც ისინი ე.წ სადავო მანქანით, "პორშეთი" არ გადაადგილდებოდნენ. საუბარია მანქანაზე, რომელზეც პროკურატურა ირწმუნება, რომ გვარამიას ოჯახს ფაქტობრივ საკუთრებაში აქვს. ამის შესახებ გვარამიამ 24 იანვარს, თბილისის საქალაქო სასამართლოში მის წინააღმდეგ მიმდინარე პროცესზე სხდომის დაწყებამდე, მედიასთან განაცხადა.

გვარამია აცხადებს, რომ ისინი არც მალავენ მანქანით სარგებლობის ფაქტს და პროკურატურას მათთვის რომ ეკითხა, მარტივად დაადასტურებდნენ. ამავდროულად არსებობს საჯარიმო კამერის კადრები, რომლებშიც ჩანს, როგორ მართავს მისი მეუღლე სოფიო ლილუაშვილი ამ მანქანას, ანუ, არ არსებობს საჭიროება რამის, რაც ამ ფაქტს დაადასტურებდა.

„მიუხედავად ამისა, გამოტანილ იქნა დადგენილება ამ საკუთრების დასადგენად თვალთვალის შესახებ, თითქოს ცხადია, რომ მანქანას უნდა უთვალთვალონ, მაგრამ არა“, - განაცხადა ნიკა გვარამიამ მედიასთან და წაიკითხა რამდენიმე ამონარიდი დადგენილებიდან, რომლიდანაც ირკვევა, რომ მის მეუღლეს 28 დღის განმავლობაში უთვალთვალებდნენ.

„ამ კრებსებში არის 28 დღის განმავლობაში თვალთვალი ჩემს მეუღლეზე, აქ არის აღწერილი 28 დღის განმავლობაში მისი გადაადგილებები, მისი და არა მანქანის, რომელიც თითქოს უნდა დადგენილიყო. სულ ორჯერ, ორ დოკუმენტში ფიგურირებს ის მანქანა. დანარჩენი არის სხვა მანქანა, ან ჩემი, ან ჩემი მეგობრების. გადაადგილებები არის ჩემთან ერთად, ჩემს გარეშე, სამსახურში და მინდა კითხვა დავსვა, როდესაც ადამიანი სამსახურში მიდის და იქ ელოდებიან და უთვალთვალებენ, მანქანა რა შუაშია? რომელიც თითქოს უნდა დადგინდეს. სტუმრად რომ მივდივართ , დილის ოთხ საათზე გამოვდივართ და სახლში ვბრუნდებით, სხვა მანქანით, ის მანქანა აღარ არსებობს, მანქანის დადგენასთან ამას რა კავშირი აქვს? 28 დღე რას უთვალთვალებდნენ, რაში აინტერესებდათ ჩემი ცოლის და ჩემი შვილების გადაადგილება და ამის დეტალური აღწერა?" - ამბობს გვარამია და საუბრობს რამდენიმე დეტალზე ამ დადგენილებიდან, საიდანაც, მისივე თქმით, ირკვევა, რომ მის ოჯახს უკანონდაც უთვალთვალებდნენ და ეს სისხლის სამართლის დანაშაულია. ამ დეტალებში იგი გულისხმობს მაგალითად ჩანაწერს, „მივიდნენ (გვარამია და მისი მეუღლე) ნაცნობ მისამართზე“, რაც მისი აზრით, ნიშნავს, რომ ეს მისამართი უკვე არსებობს სხვა კრებსებში და წინმსწრებად უკვე იყო თვალთვალი.

მისივე თქმით, ბოლო 7 წელია მათ იციან, რომ უსმენენ და უთვალთვალებენ, თუმცა, როდესაც ოფიციალურ კადრებს უგზავნიან ცოლისა და ბავშვების გადაადგილების, ეს არის ღიად გამოცხადებული ომი საკუთარი მოქალაქეების წინააღმდეგ.

"ჩვენმა ოჯახმა მიიღო უკვე ომის გამოცხადება დიდი ხანია და დღეს საბოლოოდ ვაცხადებ - ჩვენ ვიღებთ გამოწვევას, ჩვენ შევდივართ ომში, ჩვენ ვუცხადებთ საპასუხო ომს ბიძინა ივანიშვილს და ჩვენ მას ამ ომში დავამარცხებთ, როგორც ადამიანები, რომლებიც ვისჯებით სიმართლისთვის, ჩვენი პოზიციისთვის, ჩვენი სიმტკიცისთვის და ჩვენი ქვეყნის სიყვარულისთვის. ჩვენ მას დავამარცხებთ და დამარცხებულს მოვექცევით უკეთესად, ვიდრე ის გვექცევა ჩვენ“, - განაცხადა ნიკა გვარამიამ.

ნიკა გვარამიას ოჯახზე თვალთვალი პროკურატურამ გასული წლის ნოემბერში უარყო მას შემდეგ, რაც ნიკა გვარამიამ მისი ოჯახის თვალთვალის ამსახველი ვიდეოკადრები გამოაქვეყნა.  საგამოძიებო უწყება აცხადებდა, რომ ვიდეოჩანაწერი გამოძიების ფარგლებში, სასამართლოს განჩინების საფუძველზე, გამომძიებლების მიერ მოპოვებული მტკიცებულებაა და არა თვალთვალის ვიდეო. უწყების მტკიცებით, ჩანაწერი ადასტურებდა, რომ 232 000-ზე მეტი ლარის ღირებულების „პორშეთი“ სარგებლობდა პირადად ნიკა გვარამია და მისი ოჯახი. ნიკა გვარამია ბრალდებას უარყოფდა და ამბობდა, რომ „პორშე“ მისმა ცოლმა იყიდა განვადებით, თუმცა ვერ გადაიხადეს, დააბრუნეს და ჯარიმას იხდიან.

"რუსთავი 2-ის” ყოფილ დირექტორს, ნიკა გვარამიას “რუსთავი 2-ის” ქონების გაფლანგვას, დოკუმენტის გაყალბებას და უკანონო შემოსავლის ლეგალიზაციას ედავებიან. მას ასევე ბრალად ედება სამსახურებრივი უფლებამოსილების ბოროტად გამოყენება. პროკურატურის განცხადებით, გვარამიამ „რუსთავი 2“-ის ეთერში სარეკლამო რგოლების განთავსების სანაცვლოდ საკუთრებაში მიიღო ძვირადღირებული ავტომობილი "Porshe Macan S" და, ამ სქემის შენიღბვის მიზნით, მანქანა კომპანიის, შპს „პროესკო მედიას“ სახელზე გააფორმა.

გვარამიას აღკვეთის ღონისძიების სახით 40 000-ლარიანი გირაო აქვს შეფარდებული და შეზღუდული აქვს ქვეყნიდან გასვლის უფლება.

დღეს, 22 იანვარს, ევროკავშირის წარმომადგენლობამ საქართველოში და ევროკავშირის სადამკვირვებლო მისიამ (EUMM) “ევროკავშირის პრიზი ჟურნალისტიკაში 2019-ის" გამარჯვებულები გამოავლინა.

• ნომინაციაში საუკეთესო სტატია ბეჭდურ ან ელექტრონულ მედიაში პრიზი რადიო თავისუფლების ჟურნალისტს ნინო თარხნიშვილს გადაეცა, სტატიისთვის - "დათმობდი შენს ორგანოებს სიკვდილის შემდეგ?"
  
  
• ნომინაციაში საუკეთესო სიუჟეტი სამაუწყებლო ან ელექტრონულ მედიაში პრიზი მიიღოა ბესო გვენეტაძემ, გამომცემლობა "ინდიგო", მასალისთვის - "თბილისის ტრანსპორტის არასრული ანთოლოგია";
  
  
• ნომინაციაში საუკეთესო საგამოძიებო სტატია ან სიუჟეტი ბეჭდურ, ელექტრონულ ან სამაუწყებლო მედიაში გაიმარჯვა - გიორგი მგელაძემ,  "სტუდია მონიტორი" საგამოძიებო ფილმისთვის "BP-ს ნავთობის პრივილეგირებული ქურდები".
  
  
• ნომინაციაში ბლოგი/თვალსაზრისი /სვეტი ბეჭდურ, ელექტრონულ ან სამაუწყებლო მედიაში გაიმარჯვა - ჯიმშერ რეხვიაშვილმა, "რადიო თავისუფლება", ბლოგისთვის - "როგორ გავყიდოთ სტალინი"
  
  
• ნომინაციაში ორიგინალური და ინოვაციური ნაშრომი ბეჭდურ, ელექტრონულ ან სამაუწყებლო მედიაში პრიზი გადაეცა - ლაშა ცერცვაძეს, გამომცემლობა "ინდიგო", ნაშრომისთვის "გესმის კედელი?"
  
  
• ნომინაციაში დოკუმენტური ფოტო, რომელიც ევროკავშირის ფასეულობებს (ადამიანის უფლებები, მათ შორის უმცირესობათა უფლებები, სოციალური სამართლიანობა, ადამიანის ღირსების პატივისცემა, სიტყვის თავისუფლება, დემოკრატია, თანასწორობა და კანონის უზენაესობა) ასახავს და გამოქვეყნებულია ბეჭდურ ან ელექტრონულ მედიაში გამარჯვებულია - დათო ქორიძე,  "რადიო თავისუფლება", ფოტოსერიისთვის "ჭიათურა, შიმშილობის მე-9 დღე";
  
  
• ნომინაციაში კონფლიქტების მიმართ სენსიტიური საუკეთესო ჟურნალისტური ნაშრომი, რომელიც ხელს უწყობს საქართველოში მომხდარი სამხედრო კონფლიქტების მხარეებს შორის ნდობისა და მშვიდობის აღდგენას, ეყრდნობა ჟურნალისტური ეთიკისა და პროფესიონალიზმის მაღალ სტანდარტებს, ევროკავშირის სადამკვირვებლო მისიის სპეციალური პრიზი სამშვიდობო ჟურნალისტიკაში გადაეცა - მამუკა ყუფარაძეს, სტუდია რე, ტელედისკუსიისთვის "ინტერვიუ თემურ ცხურბათთან".

პირველ ექვს კატეგორიაში თითოეულ გამარჯვებულს ფულადი ჯილდო - დაახლოებით 3900 ლარი გადაეცემა, ევროკავშირის სადამკვირვებლო მისიის პრიზის მფლობელი კი ლონდონში ,,ომისა და მშვიდობის გაშუქების ინსტიტუტში“ ერთთვიან სტაჟირებას გაივლის.

ევროკავშირის პრიზი ჟურინალისტიკაში 2012 წელს დააწესა საქართველოში ევროკავშირის წარმომადგენლობამ. ის მიზნად ისახავს ქართულ მედიაში იმ ნაშრომების წარმოჩენასა და აღიარებას, რომლებიც პროფესიონალურ ჟურნალისტურ ეთიკასა და პრინციპებს იზიარებენ.

2019 წლის კონკურსი 2019 წლის 2 მაისს გამოცხადდა და განაცხადების მიღება 15 ოქტომბრის ჩათვლით იყო შესაძლებელი.

იმის მიუხედავად, რომ “ინდუსტრიის გაერთიანებული კომიტეტი” შეიქმნა, ვერ მოხერხდა სატელევიზიო რეიტინგების მთვლელი კომპანიების გაერთიანება. ამის თაობაზე “მედიაჩეკერს” “თი ვი ემ არ საქართველოს” დირექტორმა ნინო გოგოლაძემ განუცხადა.

ერთი თვის წინ სწორედ ნინო გოგოლაძემ უთხრა “მედიაჩეკერს”, რომ ახალი წლიდან სატელევიზიო რეიტინგებს ახალი კომპანია დაითვლიდა, რომელშიც 50-50%-ით შევიდოდა ბაზარზე უკვე არსებული 2 კომპანია - “თი ვი ემ არ საქართველო” და “ტრი მედია ინტელიჯენსი”.

“სამწუხაროდ, ყველა შემოთავაზებულ ვერსიაში განიხილებოდა მეორე მხარის მიერ მხოლოდ “ტრი მედიას” არსებობა, ამიტომ გაერთიანება ვერ შედგა”, - უთხრა “მედიაჩეკერს” ნინო გოგოლაძემ.

18 დეკემბერს საჯარო რეესტრში ააიპ “ინდუსტრიის გაერთიანებული კომიტეტი” დარეგისტრირდა. კომიტეტის დამფუძნებლები არიან “საქართველოს ბიზნეს ასოციაცია”, “საქართველოს საბანკო ასოციაცია” და “საქართველოს სარეკლამო ასოციაცია”. აღნიშნული ასოციაციის წარმომადგენლებით დაკომპლექტდა კომიტეტის მმართველი საბჭო, ხოლო აღმასრულებელ დირექტორად “თი ვი ემ არ საქართველოს” დირექტორი ნინო გოგოლაძე დაინიშნა.

კომიტეტის დამფუძნებლებს შორის არ არიან სატელევიზიო არხების წარმომადგენლები, თუმცა წინასწარ გაცხადებული იყო, რომ კომიტეტში სამივე მხარე - რეკლამის დამკვეთები, საეტელევიზიო არხები და სარეკლამო სააგენტოები უნდა ყოფილიყვნენ ჩართულები.

წესდების მიხედვით, კომიტეტის მიზანია “საუკეთესო საერთაშორისო პრაქტიკაზე დაყრდნობით, სატელევიზიო და რადიო აუდიტორიის გაზომვების სტანდარტების შემუშავება, დანერგვა, სარეკლამო ინდუსტრიის განვითარება და გაჯანსაღება”.

სწორედ ინდუსტრიის კომიტეტს უნდა ემართა ახალი მთვლელი კომპანია, რომელიც “თი ვი ემ არ საქართველოსა” და “ტრი მედია ინტელიჯენსის” გაერთიანების საფუძველზე უნდა ჩამოყალიბებულიყო, თუმცა, როგორც ირკვევა, ამ უკანასკნელის პოზიციის გამო ეს გაერთიანება არ შედგა.

ეს ორი კომპანია 2016 წლიდან ითვლის საქართველოში სატელევიზიო რეიტინგებს.

“ტრი მედია ინტელიჯენსის” (TMI) მფლობელები არიან მერაბ ფაჩულია (საზოგადოებრივი აზრისა და ბიზნესის კვლევის საერთაშორისო ცენტრის “გორბის” დამფუძნებელი) გიორგი თევდორაშვილი (პალიტრა მედია ჰოლდინგის დამფუძნებელი). „ტრი მედია ინტელიჯენსის“ ცნობით, ის კანტარ მედიას სატელევიზიო აუდიტორიის ტექნოლოგიის ექსკლუზიური ლიცენზიანტია საქართველოში. თავის მხრივ, კანტარ მედიას 50-ზე მეტი ქვეყნის სატელევიზიო აუდიტორიის გაზომვის გამოცდილება აქვს და 22,000-ზე მეტი მომხმარებელი ჰყავს. TMI-ის კლიენტებს შორის ნაციონალური მაუწყებლებიდან არიან საზოგადოებრივი მაუწყებელი, იმედი, მაესტრო, ჯი დი ესი, პალიტრა.

“თი ვი ემ არ საქართველოს” 100%-ანი წილის მფლობელია კომანდიტური საზოგადოება თი-ვი ემ-არ (დიდი ბრიტანეთისა და ჩრდილოეთ ირლანდიის გაერთიანებული სამეფო). ეს კომპანია 2005 წლიდან აწვდის საქართველოს სატელევიზიო ბაზარს კვლევის შედეგებს. “თი-ვი ემ-არ საქართველო“ ამერიკული ნილსენის სატელევიზიო აუდიტორიის გაზომვების ოფიციალური ლიცენზირებული პარტნიორია. TVMR-ის კლიენტებს შორის ნაციონალური მაუწყებლებიდან საქართველოში არიან რუსთავი 2, მთავარი არხი, ტვ პირველი, ფორმულა, კავკასია, საზოგადოებრივი მაუწყებელი და სხვ.

სატელევიზიო რეიტინგების მთვლელი ორივე კომპანიის სანდოობის მიმართ სხვადასხვა დროს პერიოდულად გამოთქვამდნენ პრეტენზიებს მაუწყებლები. TVMR-ს წინა ხელისუფლების ინტერესების გატარებაში ადანაშაულებდნენ, TMI-ის კი - მოქმედი ხელისუფლების. თუმცა ამ ბრალდებებს ორივე კომპანიაში უარყოფდნენ.

ქონებრივი დეკლარაციის არასწორად შევსებისთვის საზოგადოებრივი მაუწყებლის დირექტორმა ვასილ მაღლაფერიძემ  გააფრთხილება მიიღო, საქართველოს კომუნიკაციების კომისიის წევრი კახა ბექაური კი დაჯარიმდა. 

 საჯარო სამსახურის ბიუროს 2019 წლის ანგარიშის მიხედვით, კახა ბექაურის დეკლარაციაში მითითებული არ იყო საბანკო ანგარიშები და შეუსაბამობა იყო მეუღლის შემოსავლებში.

ვასილ მაღლაფერიძე საქართველოს საზოგადოებრივი მაუწყებლს დირექტორად სამეურვეო საბჭომ 2017 წლის 6 იანვარს აირჩია. 

რას შეეხება კახა ბექაურს, ის 2019 წლის 11 დეკემბერს, პარლამენტმა 6 წლის ვადით, განმეორებით აირჩია. იგი  2014 წლიდან კომუნიკაციების კომისიის წევრი, 2017 წლიდან კი თავმჯდომარეა. 

საჯარო სამსახურის ბიუროს ინფორმაციით, 2019 წელს, შეამოწმეს 596 დეკლარაცია და აქედან:

• დადებითად შეფასდა 237 თანამდებობის პირის დეკლარაცია;
• დაჯარიმდა - 254;
• გაფრთხილდა - 75;
• მონიტორინგი შეწყდა - 27 თანამდებობის პირზე, მიზეზს წარმოადგენდა კანონში შეტანილი ცვლილება, რომლის თანახმადაც მუნიციპალიტეტის საკრებულოს ფრაქციის თავმჯდომარის მოადგილეები აღარ არიან ვალდებულნი შეავსონ დეკლარაცია, თანამდებობის პირის გარდაცვალება, თანამდებობის პირის თანამდებობიდან გადადგომიდან მისი დეკლარაციის შერჩევამდე გასულია ერთ წელზე მეტი ვადა;
• პროკურატურაში გადაიგზავნა - 1;

2019 წლის აპრილთან შედარებით, უმნიშვნელოდ, თუმცა მაინც შემცირდა მათი რიცხვი, ვისთვისაც ინფორმაციის პირველწყარო ტელევიზიაა; შემცირდა ნდობა “იმედისა” და “რუსთავი 2-ის” მიმართ, ამ უკანასკნელის მიმართ უფრო მკვეთრად (16%-ით); თითქმის უცვლელია ინტერნეტის მოხმარების მაჩვენებელი (2019, აპრილი 65%, 2020 იანვარი 64%) და აზერბაიჯანის AzTV-ს მსგავსად, კვლავ მყარად 3%-იანი ნდობა აქვს საქართველოს საზოგადოებრივ მაუწყებელს, რომელიც ამ მაჩვენებლით მხოლოდ “არმენია ტე-ვეს”, “ობიექტივს”, “პალიტრა TV-ს” და “მაესტროს” უსწრებს.

ეს არის ძირითადი მიგნებები ეროვნულ დემოკრატიული ინსტიტუტისა (NDI) მიერ დღეს, 16 იანვარს გამოქვეყნებული კვლევის მედიის ნაწილიდან.

⇒  მაყურებლების ნდობა და ტელევიზიების მიკერძოებულობა

NDI-ს კვლევის მიხედვით, ნდობის ყველაზე მაღალი მაჩვენებელი ტელეკომპანია “იმედს” აქვს - 30% (2019 წლის აპრილში ეს მაჩვენებელი 32% იყო). თუმცა, ამავე კვლების შედეგების მიხედვით, გამოკითხულთა 53% მიიჩნევს, რომ “იმედი” “ქართული ოცნების” ინტერესებს გამოხატავს.

კვლევის შედეგების მიხედვით, ახალდაარსებულ “მთავარ არხს” უფრო მეტი მაყურებელი ენდობა, ვიდრე “რუსთავი 2-ს”. ამ უკანასკნელის მიმართ ნდობა, 2019 წლის აპრილთან შედარებით, 16%-ით არის შემცირებული. თუ აპრილის თვეში, პოლიტიკისა და მიმდინარე მოვლენების შესახებ სანდო ინფორმაციის მისაღებად, მოსახლეობის 28% “რუსთავი 2-ს” ენდობოდა, ნოემბრის მონაცემებით, მათი რიცხვი 12%-ს შეადგენს.

“მთავარ არხს”, რომელმაც მაუწყებლობა სექტემბრიდან დაიწყო, ნდობას 18% უცხადებს. “მთავარი არხის” შემთხვევაში, გამოკითხულთა 63% ფიქრობს, რომ პოლიტიკისა და მიმდინარე მოვლენების შესახებ მომზადებული გადაცემებით, არხი ოპოზიციის ინტერესების გამტარებელია. 

NDI-ს კვლევა, 2020, იანვარი. ინფოგრაფიკა კვლევის შედეგებიდან

უცვლელია საზოგადოებრივი მაუწყებლის პირველი არხის ნდობის მაჩვენებელი - 3% და ამ მაჩვენებლით ის უსწორდება აზერბაიჯაინის AzTv-ს. გამოკითხულთა 21% მიიჩნევს, რომ არხი “ქართული ოცნების” ინტერესებს გამოხატავს, 7% ფიქრობს, რომ მაუწყებელი ოპოზიციის ინტერესებს ატარებს, 27% კი თვლის, რომ პირველი არხი არცერთის ინტერესებს არ ატარებს. ტელეკომპანია “ფორმულაზე” გამოკითხულთა 26% , “რუსთავი2-ზე” - 29%, “TV პირველზე” კი - 18% ფიქრობს, რომ ეს მაუწყებლები ოპოზიციის ინტერესებს გამოხატავენ.

პოლიტიკისა და მიმდინარე მოვლენების შესახებ სანდო ინფორმაციის მისაღებად, არცერთ არხს არ ენდობა გამოკითხულთა 20%. ზოგადად, საინფორმაციო საშუალებებს საქართველოში სრულად გამოკითხულთა მხოლოდ 6% ენდობა, 10% საერთოდ არ ენდობა, 66% კი მხოლოდ ნაწილობრივ უცხადებს ნდობას.


⇒ ახალი ამბები და ინტერნეტი


პოლიტიკისა და მიმდინარე მოვლენების შესახებ ინფორმაციის მიღების ყველაზე მნიშვნელოვანი პირველი წყარო გამოკითხულთა უმრავლესობისთვის (69%) ტელევიზია, 24%-ისთვის კი ინტერნეტი/ფეისბუქია. აღსანიშნავია, რომ 2019 წლის აპრილში ინფორმაციის მიღების პირველწყაროდ ტელევიზიას 72%, ინტერნეტს/ფეისბუქს კი 21% ასახელებდა.

კვლევის მიხედვით, ინტერნეტის მოხმარებისას, გამოკითხულთათვის ყელაზე ხშირი აქტივობა ფეისბუქის გამოყენებაა. ფეისბუქის მოხმარებისას კი 53%-ს ხშირად პოლიტიკური ახალი ამბები ხვდება.

ინტერნეტის მომხმარებლების 37% ფიქრობს, რომ სოციალური მედია (ფეისბუკი, ტვიტერი, ბლოგები და ა.შ.) მიმდინარე მოვლენების უკეთესად გაგებაში ეხმარება. 14%-სთვის უფრო მეტად დამაბნეველია, 36 % კი ამბობს, რომ მათზე გავლენა საერთოდ არ აქვს. 

NDI-ს კვლევა, 2020, იანვარი. ინფოგრაფიკა კვლევის შედეგებიდან

NDI-ს კვლევა, 2020, იანვარი. ინფოგრაფიკა კვლევის შედეგებიდან

⇒ კვლევის შესახებ

NDI-ის კვლევებს, დიდი ბრიტანეთის მთავრობის UK aid-ის ფინანსური ხელშეწყობით, CRRC საქართველო ატარებს.

NDI-ის აღნიშნული კვლევა, 2019 წლის 19 ნოემბერისა და 13 დეკემბრის პერიოდში, საქართველოს მასშტაბით 2,180 პირისპირი ინტერვიუს წარმომადგენლობითი შერჩევის საფუძველზე, ქვეყნის ქართულ, სომხურ და აზერბაიჯანულენოვან სრულწლოვან მოსახლეობას შორის ჩატარდა (ოკუპირებული ტერიტორიების გამოკლებით). გამოკითხვის საშუალო ცდომილების ზღვარი +/- 1.9 პროცენტია.

ბათუმის საქალაქო სასამართლომ არ დააკმაყოფილა აჭარის ტელევიიზიის მრჩეველთა საბჭოს მეხუთე წევრის შესარჩევ კონკურსში მონაწილე 4 კანდიდატის სარჩელი გია ქარცივაძის კენჭისყრის პროცესის შეჩერების შესახებ.

მეხუთე მრჩევლის შესარჩევ კონკურსში მონაწილე კანდიდატებმა: ციალა ქათამიძემ, არჩილ ხახიტაიშვილმა, ბეჟან გობაძემ და ჯემალ მეგრელიძემ, ბათუმის საქალაქო სასმართლოს 6 იანვარს მიმართეს.  ისინი კონკურსის მეორე ეტაპზე ვერ გადავიდნენ. კონკურსანტები  ითხოვდნენ მრჩევლობის კანდიდატთა შესარჩევი კომისიის მიერ ბოლო გასაუბრების შემაჯამებელი ოქმის მოქმედების შეჩერებას, დავის საბოლოო გადაწყვეტამდე. კონკრეტულად, იმ ნორმების შეჩერებას, რომლის საფუძველზეც შემაჯამებელი ოქმი  შედგა. განმცხადებლები ამბობდნენ, რომ კონკურსანტების შერჩევისას კომისია კომპეტენციას გასცდა და დეპუტატებს შემზღუდავი ბარიერები დაუწესა, რაც მათი ნაწილის ღია განცხადებებში გამოიხატა. 

ბათუმის საქალაქო სასამართლოს მოსამართლე ჯუმბერ ბეჟანიძემ სარჩელი არ დააკმაყოფილა. 

შეგახსენებთ, აჭარის ტელევიზიის მრჩეველთა საბჭოს მეხუთე წევრი, რომელიც “ნაციონალური მოძრაობის” კვოტით აირჩიეს, საკონკურსო კომისია 9 განმცხადებლიდან უნდა შეერჩია. კონკურსში მონაწილეობდნენ: ბეჟან გობაძე, თემურ დიასამიძე, ნათია აფხაზავა, ლაშა ზარგინავა, არჩილ ხახუტაიშვილი, ციალა ქათამიძე, ჯემალ მეგრელიძე, ირმა ზოიძე და გია ქარცივაძე. 

კომისიამ, რომლის შემადგენლობაშიც იყვნენ: „აღმოსავლეთ ევროპის ცენტრი მრავალპარტიული დემოკრატიისათვის“ EECMD რეგიონული კოორდინატორი – თამარ მამეიშვილი, პროფესიული კავშირის წარმომადგენელი – მანანა შარაშიძე, ჟურნალისტური ეთიკის ქარტიის აღმასრულებელი დირექტორი – გიორგი მგელაძე, ჟურნალისტიკის რესურსცენტრის ხელმძღვანელი – ნათია კუპრაშვილი და ახალგაზრდა მეცნიერთა კავშირის – „ინტელექტის“ გამგეობის თავმჯდომარე – ლევან გობაძე, მათგან სამი კონკურსანტი შეარჩია:   ირმა ზოიძე, გია ქარცივაძე და ლაშა ზარგინავა. 

ამ სამი კანდიდატიდან,  8 იანვარს, უმაღლესმა საბჭომ, 15 ხმით აჭარის ტელევიზიისა და რადიოს მრჩეველთა საბჭოს მეხუთე წევრად გია ქარცივაძე დაამტკიცა.

კომუნიკაციების კომისიამ „არასამეწარმეო მედია-კავშირი ობიექტივი“ ეთერში არასახელმწიფო ენაზე გასული გადაცემების გამო, გააფრთხილა და რუსულ ენაზე განთავსებული პროგრამების სამაუწყებლო ბადიდან დაუყოვნებლივ ამოღება დაავალდებულა.

კომისიის ინფორმაციით, საქმე ეხება საზოგადოებრივ-პოლიტიკურ გადაცემებს: „ყველას გასაგონად“ და „Неделя“, რომლებიც „ობიექტივის“ ეთერში რუსულ ენაზე გავიდა. აღნიშნული გადაცემები სამაუწყებლო ბადეში კომუნიკაციების კომისიის დადგენილებით დასაშვები ხანგრძლივობის გადაჭარბებით და ასევე, სახელმწიფო ენაზე სუბტიტრების გარეშე განთავსდა.

"შეგახსენებთ, რომ კომუნიკაციების კომისიის დადგენილებისა და „მაუწყებლობის შესახებ“ საქართველოს კანონის შესაბამისად, საქართველოში ავტორიზებული საერთო ეროვნული ტელემაუწყებელი უფლებამოსილია სამაუწყებლო ბადეში პროგრამები, არასახელმწიფო ენაზე, განათავსოს ისე, რომ მათი მთლიანი მოცულობა არ აღემატებოდეს მისი დღიური მაუწყებლობის ხანგრძლივობის 10%-ს. ამასთანავე, საუკეთესო დროს არასახელმწიფო ენაზე განთავსებული პროგრამების ხანგრძლივობა არ უნდა აღემატებოდეს საუკეთესო დროის 10%-ს. მაუწყებელი ასევე ვალდებულია, პროგრამა სამაუწყებლო ბადეში განათავსოს საქართველოს სახელმწიფო ენაზე სუბტიტრებით", - ნათქვამია კომუნიკაციების კომისიის განცხდებაში.

2019 წელს "მედიაჩეკერის" არქივში ასობით მასალა დაგროვდა.  გასული წლის მსგავსად, წელსაც, განყოფილება "ეთიკაში" 130-ზე მეტი მასალა იძებნება მანიპულაციურ, დაუბალანსებელ, მიკერძოებულ, ზედაპირულ თუ სხვადასხვა ეთიკური სტანდარტების დარღვევით მომზადებულ სტატიებსა და სიუჟეტებზე.

მიმდინარე წელს გამოწვევა იყო სუიციდის შემთხვევების ეთიკური გაშუქება და ამ თემაზე "მედიაჩეკერს" ყველაზე ხშირად უწევდა წერა.  კონკრეტული, ეთიკური სტანდარტების დარღვევით მომზადებული მასალების მიმოხილვის გარდა, წელს "მედიაჩეკერმა" ჟურნალისტებისთვის, და არა მხოლოდ მათთვის, რამდენიმე სარეკომენდაციო ხასიათის მასალა, სტატია, ინტერვიუ და ვიდეოგზამკვლევიც მოამზადა.  მიუხედავად ამისა, ეს თემა მაინც რჩება ერთ-ერთ ყველაზე პრობლემატურ თემად ქართული მედიის ნაწილისთვის. 

შედარებით შემცირდა, თუმცა, პერიოდულად მედიაში მაინც ჩნდება ბავშვთა საკითხებზე არაეთიკურად მომზადებული მასალები. ასეთ მასალებში ბავშვები ხშრად ქველმოქმედების მიმღებ ობიექტებად არიან წარმოჩენილი, მათი უმეტესობა ზედაპირული და ცალმხრივია და მიზნად არ ისახავს სისტემური პრობლემის ჩვენებას. აღსანიშნავია, რომ ასეთი მასალები ინტენსიურად ჩნდება ხოლმე ახალი წლის მოახლოებისთანავეც.



გასული წლისგან განსხვავებით, მიმდინარე წელს შემცირდა ისეთი თემების რაოდენობა, რომლებსაც რომელიმე ცენტრალური არხი არ აშუქებდა, საუბარია ე.წ.  გამოტოვებულ თემებზე.   "მედიაჩეკერზე" წლების განმავლობაში ეს ერთ-ერთი აქტიური რუბრიკა იყო. თემების გამოტოვების ნაცვლად, წელს ასეთი თემების კადრ-სინქრონებად გაშუქების ტენდენცია შეინიშნებოდა. 



მიმდინარე წელს ჟურნალისტებისთვის გამოწვევა იყო ე.წ. რადიკალური ჯგუფების გაშუქება და "მედიაჩეკერის" არქივში ამ თემებზეც შეგიძლიათ არაერთ საინტერესო მასალას გაეცნოთ. 

2019 წელი საქართველოში პოლარიზებული მედიაგარემოთი გამოირჩეოდა. ეს განსაკუთრებულად ჩანდა სხვადასხვა საკითხების გაშუქებისას. ასეთი კი წელს, ასევე ბევრი მოვლენა იყო, მათ შორის: რუსთაველის გამზირზე მიმდინარე საპროტესტო აქციები, სპეცოპერაცია პანკისში ...   პოლარიზებული და მიკერძოებული მედიის მაჩვენებლი იყო წელს კიდევ ერთი ტენდენცია - არასამთავრობო სექტორის დისკრედიტაციის მცდელობა, რაზეც ასევე არაერთი მასალა მოამზადა "მედიაჩეკერმა".


2019 წელს, წლის მიწურულს, მედიისთვის კიდევ ერთმა გამოწვევამ იჩინა თავი და ეს რელიგიური თემების გაშუქებას შეეხებოდა.  თუ ერთ შემთხვევაში მედიის ნაწილმა ეპისკოპოსის მხრიდან სავარაუდო სექსუალური შევიწროების მსხვერპლის იდენტიფიცირება მოახდინა, მეორე შემთხვევაში, მაღალი საჯარო ინტერესის მქონე თემა ისე გააშუქა, არ უცდია აუდიტორიისთის დამატებითი დეტალები მოეძიებინა.

უფრო მეტი თემა, რაც ეთიკურ დარღვევებს შეეხება, შეგიძლიათ ამ ბმულზე მოიძიოთ. 

გასული წლისგან განსხვავებით, მიმდინარე წელი მძიმე იყო მედიაგარემოსთვის.  წელს განსაკუთრებით ბევრი მოვლენა აჭარის ტელევიზიისა და "რუსთავი 2-ის" ირგვლივ ხდებოდა. აჭარის ტელევიზიაში პროცესები ყოფილი დირექტორის იმპიჩმენტით დაიწყო, არაერთხელ ჩაშლილი კონკურსით გაგრძელდა და ახალი მრჩეველთა საბჭოსა და ახალი დირექტორის არჩევით დასრულდა. 

იხილეთ ამ თემებზე:

• ხუთი თვე დირექტორის გარეშე - რა   ელის აჭარის ტელევიზიას
• “ჟურნალისტებს მოთმენა უნდა ასწავლო” - აჭარის ტელევიზიის დირექტორად გიორგი კოხრეიძე აირჩიეს

"რუსთავი 2-ზე" "კურიერის ერთთვიანი წყვეტა და ორი ახალი მაუწყებლის , "მთავარი არხისა" და "ფორმულას" დაარსება მოჰყვა "რუსთავი 2-ის" საქმეზე სტრასბურგის ადამიანის უფლებათა სასამართლოს გადაწყვეტილებას. 

ერთი მედიიდან წამოსვლისა და მეორე მედიის დაფუძნების შემთხვევა იყო ონლაინმედიაშიც. 2019 წელს სარედქციო გუნდმა დატოვა ლიბერალი და დააფუძნა ახალი პლატფორმა "პუბლიკა".  წლის ბოლოს ეს ამბები იმით დასრულდა, რომ "ლიბერალი" დაიხურა. "მედიაჩეკერი" მთელი ამ ხნის განმავლობაში ცდილობდა მის მფლობელთან ინტერვიუს, თუმცა, ეს ის შემთხვევაა, როცა ამ თემაზე მასალას ვერ ნახავთ, რადგან ინტერვიუ არ შედგა. 

2019 წელს დაფიქსირდა მასშტაბური კიბერშეტევა მედიაზე. 

წლის ბოლოს "მედიაჩეკერს" კიდევ ერთ მძიმე თემაზე - მაუწყებლების ინკასოზე მოუხდა მასალების მომზადება.  სამი ცენტრალური და ერთი რეგიონული ტელევიზიის ანგარიშებს ინკასო საგადასახადო დავალიანების გამო დაედო. აღსანიშნავია, რომ "მედიაჩეკერი" იყო პირველი, რომელმაც მაუწყებლების საგადასახადო დავალიანებების შესახებ მოამზადა მასალა მიმდინარე წლის მარტის თვეში.

2019 წელი სხვა ბევრი მხრივაც მძიმე იყო მედიისთვის.  მედიაგარემოში მომხდარი ბევრი მნიშვნელოვანი ცვლილების გარდა, წელს ხშირი იყო ჟურნალისტების მუშაობაში ხელშეშლისა და პოლიტიკოსების მზრიდან ჟურნალისტებზე თავდასხმის შემთხვევები.  გასული წლების მსგავსად, ამ შემთხვევების უმეტესობა არც წელს გამოუძიებია შესაბამის ორგანოებს. ამ მიზეზების გამო, წლის მიწურულს, საქართველოს დედაქალაქსა და რეგიონებში მომუშავე ათობით ჟურნალისტმა პარლამენტის წინ საპროტესო აქციაც გამართა. 

განსაკუთრებულად მძიმე კი 20-21 ივნისის საპროტესტო აქციის გაშუქება იყო, რა დროსაც, მედიის 40-მდე წარმომადგენელ დაშავდა.





"მედიაჩეკერზე" იპოვით მასალას რეგიონული მედიის შესახებაც. 2019 წელს მედაბაზარზე რეგიონული მედიის კონტენტის მნიშვნელოვანი დეფიციტი შეინიშნებოდა. 

               ⇒   ამ თემაზე წაიკითხეთ: გამქრალი გაზეთები, ადგილობრივი ამბების დეფიციტი და რეგიონული მედიის სხვა პრობლემები

მედიაგარემოს 5 ყველაზე მნიშვნელოვანი მოვლენა, წლის მიწურულს "მედიაჩეკერმა" ერთ სტატიაში შეაჯამა და ამ ამბებს შეგიძლიათ ამ  ბმულზე გაეცნოთ. 


                         სასარგებლო და საინტერესო მასალები ჟურნალისტებისთვის

მედიაკრიტიკა და მედიაგარემოს ტენდენციები "მედიაჩეკერის" ძირითადი სამუშაო მიმართულებებია, თუმცა, არა ერთადერთი. ვებგვერდზე, განყოფილებაში - WIKI - არაერთ საინტერესო მასალას იპოვით საერთაშორისო მედიაში მიმდინარე ამბებზე, უცხოური მედიის ეთიკურ დილემებზე, საინტერესო და ცნობილ ჟურნალისტებზე, ნახავთ ფოტოისტორიებს და იპოვით სვადასხვა რესურსებსა და რეკომენდაციებს, რაც მუშაობასა და პროფესიული უნარების გაუმჯობესებაში დაგეხამრებათ. 

ამ განყოფილებიდან გირჩევთ:

• რა არის Deepfake - დეზინფორმაციის ახალი ფორმა
• ახალ ზელანდიაში მომხდარის გაშუქება: როგორ კვებავს მედია რადიკალურ-მემარჯვენე ტერორიზმს

ვინაიდან 2019 წელი საპროტესტო აქციებით გამოირჩეოდა, "მედიაჩეკერმა" სხვადასხვა საერთაშორისო გაიდლაინი მოიძია და თავი მოუყარა რჩევებს ჟურნალისტებისათვის - როგორ მოვემზადოთ საპროტესტო აქციების გასაშუქებლად.

მიმდინარე წელს რამდენჯერმე დადგა დღის წესრიგში ციფრული უსაფრთხოების საკითხიც. 

ამ თემაზე გირჩევთ:

•  ციფრული უსაფრთხოების წესები ჟურნალისტებისათვის;
• როგორ დავიცვათ Facebook ანგარიში 

და ბოლოს,  "მედიაჩეკერზე" ასევე იპოვით, 8 აპლიკაციას, ვიდეოს მობილურში დასამონტაჟებლად   და რჩევებს, როგორ გავაუმჯობესოთ ჩვენი გვერდი სოციალურ მედიაში, ან როგორ გამოვიყენოთ Instagram-ი კიდევ უფრო ეფექტურად.