კატეგორია: საქართველო
4 ტელევიზიის ჟურნალისტებმა ნიკა გვარამიას პატიმრობის გასაპროტესტებლად აქცია-პერფომანსი გამართეს და აშშ-ს სახელმწიფო მდივნის თანაშემწეს ერთობლივი წერილი გაუგზავნეს.


სასტუმრო "ქორთიარდ მერიოტთან", სადაც პოლიტიკის საკითხებში აშშ-ის სახელმწიფო მდივნის ენტონი ბლინკენის უფროსი მრჩეველი დერეკ შოლე ოფიციალური ვიზიტის ფარგლებში დილიდან შეხვედრებს მართავს, 4 ტელევიზიის წარმომადგენლები შეიკრიბნენ.

„მთავარი არხის“, „ფორმულას“, „ტვ პირველის“ და „კავკასიის“ მენეჯერებმა და ჟურნალისტებმა ნიკა გვარამიას მხარდასაჭერად აქცია-პერფორმანსი გამართეს და ოპოზიციური პარტიის ლიდერ ელენე ხოშტარიას აშშ-ს სახელმწიფო მდივნის თანაშემწესთან ერთობლივ წერილი გაატანეს.

ჟურნალისტები წერილის დეტალურ შინაარსზე არ საუბრობენ, მაგრამ ამბობენ, რომ წერილში დერეკ შოლე გაეცნობა, თუ „რამდენად დრამატულია ქვეყანაში მდგომარეობა მედიის თავისუფლების და დემოკრატიის კუთხით“.

ჟურნალისტებს აქციაზე მიტანილი აქვთ ბანერები წარწერებით, რომ საქართველოში დამოუკიდებელი მედია და სიტყვის თავისუფლება საფრთხეშია. მათ სიმბოლურად ყელსახვევები გაიკეთეს ყელზე და პირზე იმის საილუსტრაციოდ, რომ ქვეყანაში ჟურნალისტებს ახრჩობენ და აჩუმებენ და ხელისუფლება ცდილობს თავისუფალი სიტყვა ჩაახშოს.

დერეკ შოლე საქართველოში 18 მაისს ჩამოვიდა. ის არასამთავრობო ორგანიზაციების წარმომადგენლებთან, ხელისუფლებასთან და ოპოზიციასთან შეხვედრებს მართავს.

კონტექსტი

16 მაისს თბილისის საქალაქო სასამართლოს მოსამართლე ლაშა ჩხიკვაძემ „მთავარი არხის” დირექტორ ნიკა გვარამიას „რუსთავი 2-ის“ საქმეზე 3 წლით და 6 თვით პატიმრობა მიუსაჯა.

მედიის უფლებებზე მომუშავე ადგილობრივი და საერთაშორისო ორგანიზაციები აცხადებენ, რომ საქმე პოლიტიკურად მოტივირებულია.

სასამართლოს გადაწყვეტილების გამოცხადების შემდეგ დამოუკიდებელი მედიების წარმომადგენლები, სამოქალაქო აქტივისტები, არასამთავრობო ორგანიზაციები და ოპოზიციური პოლიტიკური პარტიების წარმომადგენლები აქციებს მართავენ

18 მაისს 50-მდე მედიამ სარედაქციო განცხადებაც გაავრცელეს და სოლიდარობა გამოუცხადეს გვარამიას და „მთავარ არხს“. მედიები მიიჩნევენ, რომ კრიტიკული ტელევიზიის დამფუძნებლის დაპატიმრებით ხელისუფლება ღიად ემუქრება დამოუკიდებელ მედიებს.
კატეგორია: საქართველო
მედიასაშუალებების ორგანიზებით, თბილისში მედიის სოლიდარობის მარში იმართება.

ორგანიზატორებმა რესპუბლიკის მოედნიდან პარლამენტამდე მსვლელობა მას შემდეგ დაგეგმეს, რაც 16 მაისს, „მთავარი არხის“ დამფუძნებელი ნიკა გვარამია დააპატიმრეს.

აქციაზე მედიამენეჯერებთან და ჟურნალისტებთან ერთად იმყოფებიან მოქალაქეები, სამოქალაქო აქტივისტები, არასამთავრობო ორგანიზაციების და ოპოზიციური პოლიტიკური პარტიების წარმომადგენლები.

ორგანიზატორების თქმით, ნიკა გვარამიას დაპატიმრებით „ქართულმა ოცნებამ“ ფეხქვეშ გათელა ადამიანის უფლებები, სასამართლო, სიტყვის თავისუფლება და ქვეყნის ევროპული მომავალი“.

  • „დღეს, როცა გახსნილია შესაძლებლობის ფანჯარა, კრიტიკული მედიის მფლობელის დაპატიმრება არის უკან დახევა ათწლეულობით ნაბრძოლი და ნაშრომი ევროინტეგრაციის შესაძლებლობისგან და დაბრუნება რუსეთში, საიდან თავის დაღწევასაც საქართველოს პატრიოტთა არაერთი თაობის წარმომადგენელთა სიცოცხლე შეეწირა და ეწირება ახლაც.
  • კრიტიკული მედია დღეს ერთადერთია, რაც საქართველოს რუსეთისგან განასხვავებს და ახლა მედიას სოლიდარობა სჭირდება“ - აცხადებენ აქციის ორგანიზატორები.


სოლიდარობის აქცია იმართება ბათუმშიც. ჟურნალისტები, სამოქალაქო აქტივისტები და ოპოზიციური პარტიების წევრები ბათუმში ცენტრალურ პარკთან შეიკრიბნენ და აჭარის მთავრობის სახლამდე მსვლელობით მივიდნენ.

კონტექსტი

16 მაისს თბილისის საქალაქო სასამართლოს მოსამართლე ლაშა ჩხიკვაძემ „მთავარი არხის” დირექტორ ნიკა გვარამიას „რუსთავი 2-ის“ საქმეზე 3 წლით და 6 თვით პატიმრობა მიუსაჯა.

მედიის უფლებებზე მომუშავე ადგილობრივი და საერთაშორისო ორგანიზაციები აცხადებენ, რომ საქმე პოლიტიკურად მოტივირებულია.

დღეს ნიკა გვარამიას დაპატიმრებასთან დაკავშირებით 50-მდე მედიამ სარედაქციო განცხადებაც გაავრცელეს და სოლიდარობა გამოუცხადეს „მთავარ არხს“. მედიები მიიჩნევენ, რომ კრიტიკული ტელევიზიის დამფუძნებლის დაპატიმრებით ხელისუფლება ღიად ემუქრება დამოუკიდებელ მედიებს.

კატეგორია: საქართველო
ნიკა გვარამიას დაპატიმრებაზე „რეგიონულ მაუწყებელთა ალიანსმა“ და ონლაინგამოცემებმა - „პუბლიკამ“, „სტუდია მონიტორმა“ „ნეტგაზეთმა“ და „ბათუმელებმა“ სარედაქციო განცხადებები გაავრცელეს.

მედიები მიიჩნევენ, რომ ნიკა გვარამიას დაპატიმრება არის ხელისუფლების ღია მუქარა დამოუკიდებელი მედიების მიმართ.

  • „რეგიონულ მაუწყებელთა ალიანსი“, რომელიც 45 რეგიონულ მედიას აერთიანებს, აცხადებს, რომ „გადაწყვეტილება ატარებს მედიაზე ზეწოლის ნიშნებს და განსაკუთრებულ უარყოფით გავლენას იქონიებს როგორც მედიაგარემოზე, ისე ზოგადად ქვეყნის ბედზე, მის ევროპულ მომავალზე, გაზრდის დაპირისპირების ფონს და პოლარიზაციას, რაც „დამოკლეს მახვილვით“ ჰკიდია, როგორც ქართული მედიის, ისე საქართველოს საზოგადოების თავზე“.
  • პუბლიკა“ მიიჩნევს, რომ პროკურატურისა და სასამართლოს ქმედება ემსახურებოდა არა მართლმსაჯულების ინტერესს, არამედ პოლიტიკურ მოტივს და ეს მოტივი ხელისუფლებისთვის არასასურველი მედიის გაჩუმების მცდელობაა“
  • ნეტგაზეთი“ და „ბათუმელები“ აცხადებენ, რომ ნიკა გვარამიასთვის ბრალის წარდგენა და პატიმრობის მისჯა „ცალსახად აღიქმება, როგორც გაფრთხილება და მუქარა თითოეული იმ მედიისა და ჟურნალისტის მიმართ, ვინც არ ემორჩილება ხელისუფლების ცენზურას, კრიტიკულად აშუქებს მის საქმიანობას, იკვლევს კორუფციაში მაღალჩინოსანთა სავარაუდო ჩართვის შემთხვევებსა და სააშკარაოზე გამოაქვს ისეთი ფაქტები, რომლის გაშუქებაც ხელისუფლებას არ სურს“.
  • „სტუდია მონიტორის“ შეფასებით, გვარამიას დაკავების ფაქტი განსაკუთრებით საგანგაშოა იმ დროს, „როდესაც მოქმედი ხელისუფლება ახალისებს ჟურნალისტებზე ფიზიკურ ძალადობას და სათანადოდ არ სჯის ძალადობის ორგანიზატორებს, როგორც ეს მოხდა 2021 წლის 5 ივლისს“. „მონიტორი“ აცხადებს, რომ მედიის წარამომდგენლების მიმართ ხელისუფლება უკანონო ფარულ მიყურადებას ახორციელებს და ეს ფაქტი არა მხოლოდ ჟურნალისტების, არამედ მათი წყარობის უსაფრთხოებას უქმნის პრობლემებს.

მედიები სოლიდარობას უცხადებენ ნიკა გვარამიას და „მთავარ არხს“ და მოუწოდებენ მედიის საკითხებზე მომუშავე ორგანიზაციებსა და ინსტიტუტებს, რომ გააკეთონ ყველაფერი მდგომარეობის გამოსასწორებლად.



ვრცლად განცხადებები იხილეთ შემდეგ ბმულებზე:


კონტექსტი

16 მაისს თბილისის საქალაქო სასამართლოს მოსამართლე ლაშა ჩხიკვაძემ „მთავარი არხის” დირექტორ ნიკა გვარამიას „რუსთავი 2-ის“ საქმეზე 3 წლით და 6 თვით პატიმრობა მიუსაჯა.
კატეგორია: საქართველო
ნიკა გვარამიას განაჩენთან დაკავშირებით საერთაშორისო გამოხმაურებებს 17 მაისს შეუერთდა უფლებადამცველი ორგანიზაცია “ამნესტი ინთერნეიშენალიც”.

  • ორგანიზაციის დირექტორმა აღმოსავლეთ ევროპასა და ცენტრალურ აზიაში, მარი სტრუტერსმა განაჩენი გვარამიას მიერ ხელისუფლების კრიტიკის საპასუხოდ პოლიტიკურად მოტივირებულ დევნად და გამოხატვის თავისუფლების ჩახშობის მცდელობად შეაფასა.
  •  “ამნესთი ინტერნეიშენალი” გვარამიას დაუყოვნებლივ გათავისუფლებას მოითხოვს და საქართველოში მედიის თავისუფლების გაუარესებასა და ოპონენტების ხელის შეშლის მიზნით სასამართლოზე ხელისუფლების მზარდი გავლენის შესახებ საუბრობს.

განაჩენს საქართველოს ევროპული მომავალის სერიოზული საფრთხის წინაშე დაყენებად აფასებს 9 ევროპარლამენტარი 17 მაისს გამოქვეყნებულ ერთობლივ განცხადებაში. ნიკა გვარამიასთვის პატიმრობის მისჯაზე სხვა საერთაშორისო შეფასებებს გაეცანით აქ.

კონტექსტი 

16 მაისს თბილისის საქალაქო სასამართლოს მოსამართლე ლაშა ჩხიკვაძემ „მთავარი არხის” დირექტორ ნიკა გვარამიას „რუსთავი 2-ის“ საქმეზე 3 წლით და 6 თვით პატიმრობა მიუსაჯა. .

ამ თემაზე ვრცლად: სასაამართლომ ნიკა გვარამიას პატიმრობა მიუსაჯა - საქმის დეტალები და შეფასებები
კატეგორია: საქართველო
ამერიკის შეერთებული შტატების სახელმწიფო დეპარტამენტში გამართულ პრესკონფერენციაზე ნიკა გვარამიას განაჩენის შესახებ “მთავარი არხის” ჟურნალისტის შეკითხვებს უპასუხეს.

შეერთებული შტატების სახელმწიფო მდივნის პრესსპიკერი ნედ პრაისი ამბობს, რომ:

  • აშშ განაგრძობს მტკიცედ დგომას დამოუკიდებელი მედიის გვერდით, იქნება ეს საქართველოში თუ მსოფლიოს სხვა ნაწილში.
  • “ჩვენ მუდმივად ვსაუბრობთ თავისუფალი, დამოუკიდებელი მედიის შეუცვლელ როლზე მთელ მსოფლიოში. ჟურნალისტების მოვალეობა სიმართლის გაშუქებასა და მსოფლიოში გავრცელებაზე მეტი არაფერია”.
  • პრაისი ყურადღებას ამახვილებს საქართველოში დემოკრატიული ინსტიტუტებისა და კანონის უზენაესობის განმტკიცების საჭოროებაზე.

ვაშინგტონში მიიჩნევენ, რომ საქართველოს მისწრაფებების მიღწევა ერთ წელიწადში ან თუნდაც ერთი ათწლეულის განმავლობაში შეუძლებელია და ამისთვის მძიმე შრომა, მოთმინება და მნიშვნელოვანი რესურსებია საჭირო. აშშ-ის ამოცანის ნაწილი კი საქართველოსთან პარტნიორობის გაგრძელება და ამ გზაზე დახმარებაა.

სახელმწიფო დეპარტამენტის პრესსპიკერის განმარტებით:

  • აშშ გააგრძელებს ქართველ ხალხთან პარტნიორობას მის დემოკრატიულ, წარმატებულ, მშვიდობიან და ევროატლანტიკურ მომავალზე ორიენტირებულ მისწრაფებებში.
  • აშშ საქართველოს სტრატეგიულ პარტნიორად განიხილავს და მას აქვს კარგი შესაძლებლობები წაახალისოს საქართველო რეფორმების გზაზე.

კონტექსტი
 

16 მაისს თბილისის საქალაქო სასამართლოს მოსამართლე ლაშა ჩხიკვაძემ „მთავარი არხის” დირექტორ ნიკა გვარამიას „რუსთავი 2-ის“ საქმეზე 3 წლით და 6 თვით პატიმრობა მიუსაჯა.
კატეგორია: საქართველო
კრიტიკული მედიების მენეჯერები და ჟურნალისტები ნიკა გვარამიას პატიმრობის საქმეზე აშშ-ს ელჩ კელი დეგნანს შეხვდნენ.

„ვთხოვეთ აშშ-ს ელჩს, რომ გამოიყენონ მათ ხელთ არსებული ყველანაირი ბერკეტი, რათა ნიკა და მისი სახით, მედია გათავისუფლდეს“ - თქვა მედიებთან „მთავარი არხის“ საინფორმაციო სამსახურის უფროსმა გიორგი გაბუნიამ შეხვედრის დასრულების შემდეგ.

შეხვედრა დახურულ ფორმატში გაიმართა და დეტალებზე არ უსაუბრიათ, თუმცა აღნიშნეს, რომ კელი დეგნანი საქმის დეტალებს კარგად იცნობს და მიმდინარე მოვლენებზე ინფორმირებულია.

„ფორმულას“ ტელეწამყვანი, ნინო ჟიჟილაშვილის ამბობს, რომ ელჩთან შეხვედრის შემდეგ აქვს აღქმა, რომ „მედიას ძალიან სერიოზული მხარდაჭერა ექნება“.

მედიის წარმომადგენელთა ნაწილმა ელჩთან შეხვედრის შემდეგ საქართველოს პრეზიდენტსაც მიმართა და ნიკა გვარამიას შეწყალებასთან დაკავშირებით შეხვედრა სთხოვა.

„მთავარი არხის“ საინფორმაციო სამსახურის უფროსი გიორგი გაბუნია ამბობს, რომ ნიკა გვარამიას პოზიციის და სურვილის გათვალისწინებით, „მთავარი არხი“ პრეზიდენტს მის შეწყალებას არ სთხოვს, თუმცა ფორმულას ჟურნალისტის, ნინო ჟუჟილაშვილის თქმით, გვარამიას გასათავისუფლებლად „ყველა რესურსი უნდა გამოიყენონ“.

კონტექსტი

16 მაისს თბილისის საქალაქო სასამართლოს მოსამართლე ლაშა ჩხიკვაძემ „მთავარი არხის” დირექტორ ნიკა გვარამიას „რუსთავი 2-ის“ საქმეზე 3 წლით და 6 თვით პატიმრობა მიუსაჯა.

მედიის უფლებებზე მომუშავე ორგანიზაციების შეფასებით, გვარამიას საქმე პოლიტიკურად მოტივირებულია.
კატეგორია: საქართველო
"მთავარი არხის" დირექტორის ნიკა გვარამიას დაპატიმრებას საერთაშორისო გამოხმაურება მოჰყვა:

ბრიტანეთის საელჩო საქართველოში

იმედგაცრუებულები ვართ, „მთავარი არხის“ გენერალური დირექტორის, ნიკა გვარამიას დაპატიმრების გამო. ეს განსაკუთრებით საგულისხმოა „რეპორტიორები საზღვრების გარეშეს“ ბოლო ანგარიშის ჭრილში, რომელშიც საერთაშორისო პრესის თავისუფლების ინდექსში საქართველოს რეიტინგი მნიშვნელოვნად დაკლებულია.

დიდი ბრიტანეთი გლობალური მედია თავისუფლების სადარაჯოზეა. თავისუფალი მედიის გარეშე, მოქალაქეები, პოლიტიკური სპექტრის რომელ მხარესაც არ უნდა იდგნენ, ვერ შეძლებენ თავიანთი დემოკრატიული უფლებების განხორციელებას.

პოლონეთის საგარეო საქმეთა სამინისტრო

პოლონეთი შეშფოთებულია ოპოზიციური ტელეკომპანია „მთავარი არხის“ გენერალური დირექტორისა და ყოფილ პრეზიდენტ მიხეილ სააკაშვილთან დაახლოებული პირის - ნიკა გვარამიას დაკავების გამო.

გადაწყვეტილებამ შესაძლოა უარყოფითად იმოქმედოს როგორც კანონის უზენაესობის აღქმაზე, ისე - მედიის თავისუფლებაზე საქართველოში

ჯიმ რიში - სენატის საგარეო ურთიერთობათა კომიტეტის წევრი

ნიკა გვარამიას, ქართული მედიის, „მთავარი არხის“ დირექტორს პოლიტიკურად მოტივირებული ბრალდებით 3.5 წლით თავისუფლების აღკვეთა მიესაჯა. პოლიტიკური ოპოზიციის გაჩუმება საქართველოს ძალიან შემაშფოთებელი მიმართულებთ დააყენებს. კანონის უზენაესობა და თავისუფალი პრესა აუცილებელია დემოკრატიისთვის

ამერიკის შეერთებული შტატების საელჩო საქართველოში

დღევანდელი სასამართლო გადაწყვეტილება გვარამიას, იაშვილისა და დამენიას საქმეებზე ეჭვქვეშ აყენებს საქართველოს ერთგულებას კანონის უზენაესობისადმი და უფრო მეტად წარმოაჩენს საქართველოში დამოუკიდებელი, მიუკერძოებელი სასამართლო სისტემის არსებობის ფუნდამენტურ მნიშვნელობას.

თავიდანვე ამ საქმემ წარმოშვა კითხვები დროის გარემოებასა და ბრალდებებთან დაკავშირებით. შერჩევითი გამოძიებისა და სისხლისსამართლებრივი დევნის შემაშფოთებელი პრაქტიკა, მიმართული ამჟამინდელი მთავრობის ოპოზიციაში მყოფი პირების მიმართ, ძირს უთხრის საზოგადოების ნდობას პოლიციის, პროკურატურის, სასამართლოებისა და თვით მთავრობის მიმართ.

განსაკუთრებით ამ დროს, როდესაც საქართველოს ევროატლანტიკური ინტეგრაციის გაღრმავების უპრეცედენტო შესაძლებლობა აქვს, სისხლის სამართლებრივი დევნის პოლიტიზირებულად აღქმაც კი ზიანის მომტანია.

აშშ-ის მტკიცე პოზიციაა, რომ ჯანსაღი დემოკრატია სასამართლო დამოუკიდებლობის უზრუნველყოფასა და მედიის თავისუფლების დაცვაზეა დამოკიდებული. სწორედ ამიტომ, მუდმივად მოვუწოდებდით მთავრობას არსებითი რეფორმების განხორციელებისკენ, ამ ფუნდამენტური დემოკრატიული პრინციპების დასაცავად.

მირიამ ლექსმანი - ევროპარლამენტარი

ნიკა გვარამიასთვის 3.5 წლით თავისუფლების აღკვეთა სერიოზული შეტევაა მედიის თავისუფლებაზე და საქართველოში ფუნდამენტური თავისუფლებების, დემოკრატიისა და კანონის უზენაესობის შელახვის უწყვეტი მცდელობების ნაწილია. საქართველოს ევროკავშირში წევრობის განაცხადის ფონზე არ შეიძლება ამ მოვლენების უგულებელყოფა.

ჟიგიმანტას პავილიონისი - ლიეტუვის სეიმის წევრი

როგორც ჩანს, „ქართული ოცნებას“ სურს, რაც შესაძლებელია ყველაფერი გააკეთოს ქვეყნის დემოკრატიული მიღწევების გასანადგურებლად და დაუშვას ყველა შეცდომა – მათ შორის უკრაინისთვის სოლიდარობის გამოცხადების ნაწილში, ასევე ევროკავშირის მიერ კანდიდატის სტატუსის შესახებ ისტორიული განხილვის წინ პრეზიდენტ სააკაშვილის დაკავების ნაწილში. სამწუხაროა იმის ყურება, როგორ კარგავს საქართველო შესაძლებლობას

კონტექსტი

16 მაისს თბილისის საქალაქო სასამართლოს მოსამართლე ლაშა ჩხიკვაძემ „მთავარი არხის” დირექტორ ნიკა გვარამიას „რუსთავი 2-ის“ საქმეზე 3 წლით და 6 თვით პატიმრობა მიუსაჯა.

ამ თემაზე ვრცლად: სასაამართლომ ნიკა გვარამიას პატიმრობა მიუსაჯა - საქმის დეტალები და შეფასებები
კატეგორია: საქართველო
"მთავარი არხის" დირექტორის ნიკა გვარამიასთვის პატიმრობის მისჯას ეხმაურება ამერიკის შეერთებული შტატების საელჩო საქართველოში.
 
საელჩოს განცხადებით, სასამართლოს გადაწყვეტილება გვარამიას, იაშვილისა და დამენიას საქმეებზე ეჭვქვეშ აყენებს საქართველოს ერთგულებას კანონის უზენაესობისადმი და უფრო მეტად წარმოაჩენს საქართველოში დამოუკიდებელი, მიუკერძოებელი სასამართლო სისტემის არსებობის ფუნდამენტურ მნიშვნელობას.

დიპლომატიური მისიის გავრცელებულ განცხადებაში წერია, რომ ამ საქმემ თავიდანვე წარმოშვა კითხვები დროის გარემოებასა და ბრალდებებთან დაკავშირებით.
  • "შერჩევითი გამოძიებისა და სისხლისსამართლებრივი დევნის შემაშფოთებელი პრაქტიკა, მიმართული ამჟამინდელი მთავრობის ოპოზიციაში მყოფი პირების მიმართ, ძირს უთხრის საზოგადოების ნდობას პოლიციის, პროკურატურის, სასამართლოებისა და თვით მთავრობის მიმართ.
  • განსაკუთრებით ამ დროს, როდესაც საქართველოს ევროატლანტიკური ინტეგრაციის გაღრმავების უპრეცედენტო შესაძლებლობა აქვს, სისხლის სამართლებრივი დევნის პოლიტიზირებულად აღქმაც კი ზიანის მომტანია.
  • აშშ-ის მტკიცე პოზიციაა, რომ ჯანსაღი დემოკრატია სასამართლო დამოუკიდებლობის უზრუნველყოფასა და მედიის თავისუფლების დაცვაზეა დამოკიდებული. სწორედ ამიტომ, მუდმივად მოვუწოდებდით მთავრობას არსებითი რეფორმების განხორციელებისკენ, ამ ფუნდამენტური დემოკრატიული პრინციპების დასაცავად.", - წერია საელჩოს განცხადებაში, 

16 მაისს თბილისის საქალაქო სასამართლოს მოსამართლე ლაშა ჩხიკვაძემ „მთავარი არხის” დირექტორს, ნიკა გვარამიას „რუსთავი 2-ის“ საქმეზე 3 წლით და 6 თვით პატიმრობა მიუსაჯა. განაჩენის დეტალები და შეფასებები წაიკითხეთ ამ ბმულზე.
კატეგორია: საქართველო
მორიგი საერთაშორისო ანგარიში აღნიშნავს საქართველოში მედიის მდგომარეობის გაუარესებას.

84-გვერდიანი პუბლიკაციაში, “პრესის თავისუფლების დაცვა დაძაბულობისა და კონფლიქტის დროს”, საუბარია საქართველოში 5 ივლისს, ჟურნალისტებზე თავდასხმიდან 1 კვირაში გარდაცვლილ ოპერატორ, ლექსო ლაშქარავაზე და გახშირებულ მუქარაზე ჟურნალისტების მიმართ.

ეს ანგარიში ევროპის საბჭოს წევრ ქვეყნებში მედიის თავისუფლების საფრთხეებსა აფასებს და ეყრდნობა მედიის მკვლევარი საერთაშორისო ორგანიზაციების დასკვნებს.

ანგარიშის მიხედვით:

  • 2021 წელს ევროპაში ჟურნალისტთან მკვლელობების ყველაზე მაღალი მაჩვენებელი იყო 2015 წლის შემდეგ (პარიზში ჟურნალ Charlie Hebdo-ზე ტერორისტული თავდასხმა).
  • გასულ წელს 3 ჟურნალისტი დაიღუპა საბერძნეთში, ნიდერლანდებსა და თურქეთში მიზანმიმართული სასიკვდილო თავდასხმების შედეგად.
  • ერთი მათგანი დაიღუპა საქართველოში ძალადობრივი საპროტესტო აქციების შედეგად და 2 აზერბაიჯანში ნაღმთან დაკავშირებული ინციდენტის გამო.

საქართველო:

  • ანგარიშში საუბარია 2021 წლის 11 ივლისს გარდაცვლილ ოპერატორ ლექსო ლაშქარავაზე, რომელსაც 5 ივლისს ძალადობრივი ჯგუფები ფიზიკურად გაუსწორდნენ სხვა 50-მდე ჟურნალისტთან ერთად.
  • აქვე აღნიშნულია ისიც, რომ გარდაცვალებიდან 5 თვის შემდეგაც არ იყო ხელმისაწვდომი ლაშქარავას ცხედრის ექსპერტიზის დასკვნა, ხოლო 5 ივლისის თავდასხმის ორგანიზატორების პასუხისგებაში მისიაცემად სახელმწიფომ საკმარისად არ იმუშავა.
  • ჟურნალისტებს ემუქრებოდნენ ჯანდაცვის კრიზისის საჯარო მენეჯმენტში არსებული ხარვეზების, დარღვევების ან პოტენციური დანაშაულის გამოძიების დროს. ასეთი შემთხვევები იყო ბელგიაში, კვიპროსში, საფრანგეთში, საქართველოში, რუმინეთსა და უკრაინაში.
“ჟურნალისტთა უსაფრთხოების პლატფორმა” ევროსაბჭომ 2015 წელს შექმნა მედიის სფეროში საერთაშორისო არასამთავრობო ორგანიზაციებთან თანამშრომლობით. მისი ფუნქციაა ევროპის საბჭოს წევრ ქვეყნებში მედიის თავისუფლებისა და ჟურნალისტების უსაფრთხოების სერიოზული საფრთხეების შესახებ ინფორმაციის შეგროვებისა და გავრცელების ხელშეწყობა.

პლატფორმა საშუალებას აძლევს ევროსაბჭოს დროულად და სისტემატურად მიიღოს ინფორმაცია ამ საფრთხეების შესახებ და საჭიროების შემთხვევაში კოორდინირებულად და სწრაფად იმოქმედოს.

ანგარიშში გამოთქმული მოსაზრებები არ ასახავს ევროსაბჭოს ოფიციალურ პოლიტიკას.
კატეგორია: საქართველო
ბათუმსა და ქუთაისში ადგილობრივმა ჟურნალისტებმა ნიკა გვარამიას სოლიდარობის ნიშნად აქციები გამართეს.

რა მოხდა?

16 მაისს, ბათუმსა და ქუთაისში ცენტრალურ მოედანზე „მთავარი არხის“ დირექტორის ნიკა გვარამიას დაკავება გააპროტესტეს ადგოლიბრივმა ჟურნალისტებმა, არასამთავრობო ორგანიზაციებისა და პოლიტიკური პარტიების წარმომადგენლებმა.

აქციის მონაწილეები გვარამიას დაკავებას მედიაზე წეზოლად აფასებენ და ამბობენ, რომ სასამართლომ ნიკა გვარამიას წინააღმდეგ პოლიტიკური გადაწყვეტილება გამოიტანა და არა - სამართლებრივი.

კონტექსტი

16 მაისს თბილისის საქალაქო სასამართლოს მოსამართლე ლაშა ჩხიკვაძემ „მთავარი არხის” დირექტორ ნიკა გვარამიას „რუსთავი 2-ის“ საქმეზე 3 წლით და 6 თვით პატიმრობა მიუსაჯა.

მედიის უფლებებზე მომუშავე ორგანიზაციები ამას პოლიტიკურად მოტივირებულ გადაწყვეტილებას უწოდებენ.

ამ თემაზე ვრცლად: სასაამართლომ ნიკა გვარამიას პატიმრობა მიუსაჯა - საქმის დეტალები და შეფასებები
კატეგორია: საქართველო
სასაამართლომ ნიკა გვარამიას 3 წლითა და 6 თვით თავისუფლების აღკვეთა მიუსაჯა. მედიის უფლებებზე მომუშავე ორგანიზაციების შეფასებით, გვარამიას საქმე პოლიტიკურად მოტივირებულია.


რა ხდება

16 მაისს თბილისის საქალაქო სასამართლოს მოსამართლე ლაშა ჩხიკვაძემ „მთავარი არხის” დირექტორ ნიკა გვარამიას „რუსთავი 2-ის“ საქმეზე 3 წლით და 6 თვით პატიმრობა მიუსაჯა.

  • დარჩით "მთავარზე" და მოიპოვეთ ჩვენთან ერთად თავისუფლება! - დაწერა ნიკა გვარამიამ ფეისბუკის პირად გვერდზე სასამართლო დარბაზიდან, დაპატიმრებამდე რამდენიმე წუთით ადრე.

ნიკა გვარამიას რუსთავის მე-12 სასჯელაღსრულების დაწესებულებაში უკვე გადაიყვანეს.

განაჩენის გამოცხადების შემდეგ, ნიკა გვარამიას ადვოკატმა დიტო საძაგლიშვილმა თქვა, რომ გადაწყვეტილებას გაასაჩივრებენ, თუმცა, არც სააპელაციო სასამართლოსგან აქვთ მიუკერძოებელი განაჩენის გამოტანის იმედი:

  • „ესენი ხომ არ იღებენ გადაწყვეტილებას, არამედ - აჟღერებენ. როგორც ჩხიკვაძეს დღეს არ ეყო არანაირი ღირსება, დამოუკიდებლობა და გააჟღერა ბიძინა ივანიშვილის მიერ მიღებული გადაწყვეტილება, იგივე იქნება ზედა ინსტანციებშიც, მაგრამ ჩვენ, ცხადია, სამართლებრივად მაინც მოგვიწევს შესაბამისი ნაიჯების გადადგმა.”

რას ედავებოდა პროკურატურა გვარამიას

ნიკა გვარამიას წინააღმდეგ სადავო საქმე „რუსთავი 2-ის“ დირექტორობის პერიოდში მის მიერ მიღებულ გადაწყვეტილებებს ეხება.

  • საქართველოს პროკურატურამ ნიკა გვარამიას ბრალი 2019 წლის 9 აგვისტოს, სისხლის სამართლის კოდექსის 220-ე მუხლით წარუდგინა.
  • “რუსთავი 2-ის” ყოფილ დირექტორს უფლებამოსილების ბოროტად გამოყენებას, ტელევიზიის კუთვნილი დიდი ოდენობით თანხების სამსახურებრივი მდგომარეობის გამოყენებით მითვისებას და ქონების მოჩვენებითი ან/და თვალთმაქცური გარიგებით გადამალვას და ორგანიზაციის ინტერესის საწინააღმდეგოდ მოქმედებას ედავებოდა, რითაც მაუწყებელს 7 მილიონ ლარამდე ზარალი მიადგა.
  • საქმე ეხება 2015 წელს, სარეკლამო კომპანია „ინტერ მედია პლიუსთან“ გაფორმებულ ხელშეკრულებას.
  • ამავე საქმეზე გვარამიასთან ერთად ბრალი წარედგინათ მაუწყებლის ყოფილ ფინანსურ დირექტორს კახაბერ დამენიასა და “ინტერ მედია პლიუსის” დირექტორ ზურაბ იაშვილს.
  • ნიკა გვარამიას წინააღმდეგ გამოძიება მას შემდეგ დაიწყო, რაც 2019 წლის 16 ივლისს „რუსთავი 2-ის“ 9%-იანი წილის ყოფილმა მფლობელმა, ნინო ნიჟარაძემ მის წინააღმდეგ პროკურატურაში საჩივარი შეიტანა.

საქმის დეტალები ვრცლად: “რუსთავი 2-ის” ყოფილ დირექტორს პროკურატურამ ბრალი წაუყენა


განაჩენი

  • თბილისის საქალაქო სასამართლომ გვარამია დამნაშავედ ცნო „რუსთავი 2-სთვის“ 7 მილიონი ლარის ზიანის მიყენების ფაქტზე.
  • ამ ნაწილში, თბილისის საქალაქო სასამართლომ სრულად გაიზიარა პროკურატურის მიერ წარდგენილი მტკიცებულებები, თუმცა არ დაეთანხმა ბრალდების მხარის შეფასებას ჩადენილი დანაშაულის სამართლებრივ კვალიფიკაციაში, რის გამოც გვარამიას ქმედება დაკვალიფიცირდა სამეწარმეო ორგანიზაციაში უფლებამოსილების ბოროტად გამოყენებად, სისხლის სამართლის კოდექსის 220-ე მუხლით, ნაცვლად ამავე კოდექსის 182-ე მუხლისა.
  • ამ ნაწილში, გვარამიას სასჯელის ზომად დაეკისრა 50 000 ლარის ოდენობით ჯარიმა
  • სასამართლომ ნიკა გვარამია დამნაშავედ ცნო სამეწარმეო ორგანიზაციაში უფლებამოსილების ბოროტად გამოყენების ფაქტზე, სისხლის სამართლის კოდექსის 220-ე მუხლით და საბოლოო სასჯელის სახედ და ზომად 3 წლითა და 6 თვით თავისუფლების აღკვეთა განესაზღვრა.
  • სხვა ყველა წარდგენილ ბრალდებაში კი გვარამია გამართლდა
  • პროკურატურის განცხადებით, სასამართლოს გადაწყვეტილებას სააპელაციო სასამართლოში გაასაჩივრებენ
  • განაჩენამდე, სასამართლო პროცესის მიმდინარეობისას, ნიკა გვარამიას აღკვეთის ზომად 40 000 ლარიანი გირაო ჰქონდა შეფარდებული.
  • 2022 წლის 11 მაისს საქმის განხილვა კახაბერ დამენიასა და ზურაბ იაშვილის საქმეზე დასრულდა და მათ სასამართლომ 50 000 ლარის ოდენობით გირაოები შეუფარდათ.

ვინ გაასამართლა გვარამია

  • ნიკა გვარამიას პატიმრობა მოსამართლე ლაშა ჩხიკვაძემ მიუსაჯა
  • 2021 წლის 15 დეკემბერს გვარამიამ ლაშა ჩხიკვაძის აცილება მოითხოვა.
  • მისი თქმით, ჩხიკვაძე ამაბვე საქმეზე გამოკითხული ერთ-ერთი მოწმის, “რუსთავი 2-ის” მმართველი კომპანიის, სს "მედია ჰოლდინგის" დირექტორის ზაზა გველესიანის მეგობარია.
  • მოსამართლემ გვარამიას შუამდგომლობა არ დააკმაყოფილა.

საქართველოს ახალგაზრდა იურისტთა ასოციაციის თავმჯდომარე ნიკა სიმონიშვილის განცხადებით ნიკა გვარამიას განაჩენი გამოუტანა მოსამართლემ, რომელსაც ამ საქმის განხილვის უფლებაც კი არ ჰქონდა:

„დაუსაბუთებელი ბრალდება და წარმართული პროცესი მხოლოდ იმის თქმის საფუძველს გვაძლევს, რომ ეს პროცესი პოლიტიკურად მოტივირებულია, მიზანი კი კრიტიკულ მედიასთან ანგარიშსწორება", - წერს ნიკა სიმონიშვილი.

შეფასებები

საერთაშორისო გამჭვირვალობა საქართველოს შეფასებით, ნიკა გვარამიას დასჯით სასამართლომ პოლიტიკური დაკვეთა შეასრულა:

  • საქმე პოლიტიკურად მოტივირებულია და მისი მიზანი ნიკა გვარამიას დასჯა და კრიტიკული ტელეკომპანიის საქმიანობის შეფერხებაა.
  • მედიის ცენზურისა და დაშინებისათვის მართლმსაჯულების სისტემის გამოყენება სახიფათო გზავნილია სხვა კრიტიკული მედიასაშუალებებისთვისაც.
  • განაჩენი გაგრძელებაა იმ პოლიტიკური დევნისა, რომელსაც სახელმწიფო ოპონენტების წინააღმდეგ წლებია აწარმოებს. ბოლო პერიოდში მიმდინარე მოვლენებით ცხადი ხდება, რომ კრიტიკული მედიასაშუალებების საქმიანობა საშიში გახდა.
  • ჩნდება განცდა, რომ მმართველი პარტიის და მთავრობის ბოლო პერიოდის რიტორიკა და კონკრეტული ქმედებები მიზანმიმართულია იმისაკენ, რომ საქართველომ ევროკავშირის მხრიდან დადებითი პასუხი არ მიიღოს.
განაჩენის გამოტანამდე, მედიის და გამოხატვის თავისუფლების საკითხებზე მომუშავე 16 არასამთავრობო ორგანიზაციისგან შემდგარ მედიაკოალიციას “ლეგიტიმური მოლოდინი” ჰქონდა, რომ სასამართლო სათანადო ყურადღებას დაუთმობდა ნიკა გვარამიას საქმესთან დაკავშირებით მომზადებულ დასკვნებს.

ნიკა გვარამიასათვის წარდგენილი ბრალდების შეფასებისას კი სახალხო დამცველმა განმარტა, რომ:

  • კომპანიის დირექტორის მიერ მიღებული გადაწყვეტილება არათუ სისხლის სამართლის, არამედ საკორპორაციო-სამართლებრივ პასუხისმგებლობასაც კი მხოლოდ განსაკუთრებულ შემთხვევებში ექვემდებარება.
  • ხოლო პროკურატურის მიერ ნიკა გვარამიასთვის წარდგენილი ბრალდება არ შეიცავს სისხლისსამართლებრივი პასუხისმგებლობის დაკისრებისთვის საკმარის მკაფიო ნიშნებს.

მთავარი ფოტო: ინტერპრესნიუსი
კატეგორია: საერთაშორისო ამბები
ისრაელის უსაფრთხოების ძალების რეიდის გაშუქებისას „ალ-ჯაზირას“ ერთი ჟურნალისტი მოკლეს, ერთი კი - დაჭრეს


ტელეკომპანია „ალ-ჯაზირას“ ცნობით, 11 მაისს მდინარე იორდანეს დასავლეთ სანაპიროზე მდებარე ქალაქ ჯენინში, ისრაელის უსაფრთხოების ძალების მიერ მოწყობილი ოპერაციის დროს, მათი ჟურნალისტი შირინ აბუ აკლი მოკლეს.

  • ჟურნალისტს პრესის ნიშნის მქონე ჯავშანჟილეტი ეცვა, სხვა ჟურნალისტებთან ერთად იდგა და ისრაელის ძალების რეიდს აშუქებდა.
  • პალესტინის ჯანდაცვის სამინისტროს ცნობით, ჟურნალისტს ცეცხსასროლი იარაღიდან ნასროლი ტყვია თავში მოხვდა.

ალ-ჯაზირას ინფორმაციით, რეიდის დროს ზურგში დაჭრეს მათი კიდევ ერთი ჟურნალისტი - ალი ალ-სამუდი. მისი მდგომარეობა სტაბილურია.

  • ალ-სამუდი, ამბობს, რომ იმ დროს, როცა მის კოლეგას ესროლეს, ადგილზე პალესტინელი შეიარაღებულები არ იმყოფებოდნენ.
  • ისრაელის თავდაცვის ძალები კი აცხადებს, რომ სროლა იყო როგორც პალესტინის, ისე ისრაელის ჯარების მხრიდან.

შირინ აბუ აკილა 51 წლის იყო. იგი 1997 წლიდან „ალ-ჯაზირას“ ერთ-ერთი პირველი საველე კორესპონდენტი იყო და ბოლო წლებში ისრაელ-პალესტინის კონფლიქტს აშუქებდა.
კატეგორია: საქართველო
დემოკრატიის კვლევის ინსტიტუტის შეფასებით, „ალტ-ინფო“ რუსეთ-უკრაინის ომის ფონზე ღიად ატარებს პროკრემლისტურ დისკურსს და რუსეთის მიერ ჩადენილი სამხედრო დანაშაულების გამართლებას ან უარყოფას ცდილობს.

რა ხდება

  • 11 მაისს დემოკრატიის კვლევის ინსტიტუტმა (DRI) ულტრა-მემარჯვენე ღიად პრორუსული პოლიტიკური აქტორებისა და მედია საშუალებების დისკურსზე დაკვირვების ანგარიში გამოაქვეყნა.
  • ორგანიზაცია აკვირდებოდა მარტი-აპრილის პერიოდში რუსეთ-უკრაინის ომის ფონზე დეზინფორმაციის გამავრცელებელი ულტრამემარჯვენე მედია საშუალებების გზავნილებს და სწავლობდა მათი მანიპულაციური დისკურსის ძირითად ტენდენციებს.
  • კვლევაში გაანალიზებულია სოციალურ და ონლაინ მედიაში გავრცელებული პროპაგანდისტული შინაარსის მქონე 475 შემთხვევა

რა აჩვენა 2 თვიანმა დაკვირვებამ

DRI-ის დაკვირვებით, საქართველოში კრემლისტური სადეზინფორმაციო კამპანიის მთავარი პლატფორმა „ალტ-ინფოა“.

ორგანიზაცია ამბობს, რომ „ალტ-ინფოს“ რიტორიკაში ორი ძირითადი მიმართულება გამოიკვეთა:

  • ერთი მხრივ, შესამჩნევი იყო რუსეთ-უკრაინის ომში რუსეთის პირდაპირი მხარდაჭერა და უკრაინის დისკრედიტაციის მცდელობა
  • ხოლო მეორე მხრივ, ძირითადი აქცენტები კეთდებოდა ანტიდასავლური და ანტი-ნატო ნარატივების გავრცელებაზე.

DRI-ის შეფასებით, „ალტ-ინფო“ რუსეთ-უკრაინის ომის ფონზე ღიად ატარებს პროკრემლისტურ დისკურსს და რუსეთის მიერ ჩადენილი სამხედრო დანაშაულების გამართლებას ან უარყოფას ცდილობს.

  • „უკრაინაში მიმდინარე მოვლენების შეფასებისას, „ალტ-ინფოს“ წამყვანები, რომლებიც ამავე დროს ღიად პროკრემლისტური პარტია „კონსერვატიული მოძრაობის“ ლიდერები არიან, აქტიურად აკეთებდნენ რუსეთის მხარდამჭერ განცხადებებს, ახდენდნენ კრემლის აგრესიული სამხედრო ინტერვენციის ნორმალიზაციას და ავრცელებდნენ დეზინფორმაციას უკრაინის წინააღმდეგ“.

DRI-ის დაკვირვებით, „ალტ-ინფოს“ ეთერში უწყვეტ რეჟიმში მიმდინარეობს პრორუსული, პროპაგანდისტული მედია კამპანია და ომის მაპროვოცირებელ ძალად დასავლეთია წარმოჩენილი.

ორგანიზაციის დაკვირვებით:

  • ტენდენციად ჩამოყალიბდა „ქართული ოცნებისა“ და „ალტინფოს“ ერთმანეთის მსგავსი განცხადებები, როდესაც საქმე უკრაინის ხელისუფლების დისკრედიტაციას ეხება.
  • „ალტ-ინფოს“ წამყვანებმა საქართველოს ხელისუფლებას მხარდაჭერა გამოუცხადეს რუსეთის წინააღმდეგ დაწესებულ სანქციებთან არ შეერთების გამო.
  • „ალტ ინფოს“ წამყვანები ცდილობენ, უკრაინაში მიმდინარე ომის ფონზე, ხაზი გაუსვან საქართველოს რუსეთთან დაახლოებისა და პირდაპირი დიალოგის აუცილებლობას, როგორც ქვეყნის გადარჩენის ერთადერთ გზას.

ალტ-ინფოს მთავარი გზავნილები

DRI-იმ თავის ანგარიშში„ალტ-ინფოს“ მიერ გაჟღერებული რამდენიმე ძირითადი გზავნილი გამოკვეთა:

  1. რუსეთი, თავს არ ესხმის მშვიდობიან მოსახლეობას და არ ბომბავს დასახლებულ პუნქტებს.
  2. რუსეთის სამხედრო უპირატესობა აშკარაა და ომში უკრაინა დამარცხდება.
  3. დასავლეთის მიერ რუსეთისთვის დაწესებული სანქციები არაეფექტიანია.
  4. უკრაინა თავად ვაჭრობს რუსეთთან, შესაბამისად, მისი პრეტენზიები საქართველოს მიმართ დაუშვებელია.
  5. დასავლეთს საქართველოში „მეორე ფრონტის“ გახსნა სურს.

„ერთი მხრივ, ეს არის რუსეთის მხარდამჭერი მოწოდებები და მისი სამხედრო პოტენციალის გაიდეალება, ხოლო მეორე მხრივ, უკრაინის დემონიზებისა და ანტიდასავლური განწყობების გაღვივების მცდელობები“ - ვკითხულობთ ანგარიშში.


ანგარიში სრულად: ულტრამემარჯვენე რიტორიკა და ტენდენციები სოციალურ მედიაში
კატეგორია: საერთაშორისო ამბები
9 მაისს ჟურნალისტიკაში ყველაზე პრესტიჟული პრემიის - პულიცერის 2022 წლის გამარჯვებულები გამოცხადდნენ.

წელს პულიცერის სპეციალური ჯილდო უკრაინელ ჟურნალისტებს მიენიჭათ.

პულიცერის საბჭოს განმარტებით, სპეციალური ჯილდო უკრაინელ ჟურნალისტებს ვლადიმერ პუტინის მიერ უკრაინაში შეჭრისა და რუსეთში მისი პროპაგანდისტული ომის დროს, სიმამაცის, გამძლეობისა და ჭეშმარიტი გაშუქებისადმი ერთგულებისთვის მიენიჭათ.

„დაბომბვების, გატაცების, ოკუპაციისა და მათ შორის ჟურნალისტების სიკვდილის მიუხედავადაც კი, აგრძელებენ ამ საშინელი რეალობის ზუსტი სურათის ჩვენებას ურაინისა და მსოფლიოში ჟურნალისტების პატივისაცემად“ - ვკითხულობთ ოფიციალურ გვერდზე.




პულიცერის პრემიის 2022 წლის გამარჯვებულები:


  1. საზოგადოებრივი სამსახური (Public Service) - ვაშინგტონ პოსტი
  2. Breaking News Reporting – Miami Herald-ის თანამრომლები
  3. საგამოძიებო რეპორტინგი - Tampa Bay Times-ის თანამშრომლები - კორი ჯონსონი, რებეკა ვულინგტონი და ელი მიურეი
  4. Explanatory Reporting - Quanta Magazine-ის თანამშრომლები, განსაკუთრებით ნატალი ვოლჩოვერი
  5. ადგილობრივი რეპორტინგი (Local Reporting) - მედისონ ჰოპკინსი Better Government Association-დან და სესილია რეიესი Chicago Tribune-დან
  6. ნაციონალური რეპორტინგი (National Reporting) - The New York Times-ის თანამშრომლები
  7. საერთაშორისო რეპორტინგი - The New York Times-ის თანამშრომლები
  8. ფიჩერსი - ჯენიფერ სენიორი The Atlantic-დან
  9. კომენტარი - მელინდა ჰენებერგერი The Kansas City Star-დან
  10. კრიტიკა - სალამიშა ტილე, კრიტიკოსის მონაწილე, The New York Times
  11. სარედაქციო სვეტი - ლიზა ფალკენბერგი, მაიკლ ლინდენბერგერი, ჯო ჰოლი და ლუის კარასკო Houston Chronicle-დან
  12. სარედაქციო კარიკატურა - ფაჰმიდა აზიმი, ენტონი დელ კოლ, ჯოშ ადამსი და უოლტ ჰიკი ინსაიდერის, ნიუ-იორკში
  13. ახალი ამბების ფოტო - მარკუს იამი Los Angeles Times-დან
  14. ფოტოისტორია - ადნან აბიდი, სანა ირშად მატუ, ამიტ დეივი და გარდაცვლილი დანიელი სიდიკი „როიტერიდან“
  15. აუდიო რეპორტინგი - Futuro Media-ს თანამშრომლები, ნიუ-იორკი, ნიუ-იორკი და PRX, ბოსტონი, მას.

გამარჯვებულების შესახებ მეტი ინფორმაცია ნახეთ ბმულზე
კატეგორია: საქართველო
თბილისის საქალაქო სასამართლომ, "რუსთავი 2-ის" საინფორმაციო სამსახურის უფროსის თანამდებობიდან ნოდარ მელაძის გათავისუფლება უკანონოდ სცნო, ბრძანება გააუქმა და ტელეკომპანიას კომპენსაციის სახით 80 000 ლარის გადახდა დააკისრა.

რუსთავის 2-ის საინფორმაციო სამსახურის ყოფილი უფროსის, ნოდარ მელაძის, ინტერესების დამცველი იურისტი თეო ზაქარაშვილი ამბობს, რომ სასამართლოში ორ-წლიანი დავის შემდეგ მათი ძირითადი მოთხოვნები დაკმაყოფილებულია.

ნოდარ მელაძე სასამართლოს გზით ითხოვდა:
  • მისი გათავისუფლების ბრძანების ბათილად ცნობას
  • განაცდურის ანაზღაურებას
  • სამსახურში აღდგენას
  • დამატებითი კომპენსაციის განსაკუთრებული წესით გამოთვლას

“2-წლიანი დავის შემდეგ, ჩვენ დავამტკიცეთ, რომ ბოლო წუთამდე ჩემს მოვალეობას კეთილსინდისიერად ვასრულებდი და გათავისუფლება მოხდა გამოგონილი მიზეზით, ჰოდა ეს ბრძანება გაუქმებულია”, - წერს მელაძე.

მოსამართლემ არ დააკმაყოფილა მოთხოვნა კომპენსაციის გაანგარიშების განსაკუთრებული წესის შესახებ. “საერთაშორისო გამჭვირვალობა საქართველოს” იურისტი ამ საკითხზე სასამართლოს დასაბუთებულ გადაწყვეტილებას დაელოდება და, ამბობს, რომ, სავარაუდოდ, ამ ნაწილს გაასაჩივრებს.

თეო ზაქარაშვილის ინფორმაციით, არ დაკმაყოფილდა მოთხოვნა აღდგენის ნაწილშიც და სანაცვლოდ სასამართლომ ტელეკომპანიას ნოდარ მელაძისთვის კომპენსაცია დააკისრა. 

კონტექსტი

ნოდარ მელაძე, რომელიც ამჟამად “ტვ პირველის” საინფორმაციო სამსახურის უფროსია, 2019 წლის აგვისტოში “რუსთავი 2-დან” “სამსახურეობრივი მოვალეობის უხეში დარღვევის გამო” გაათავისუფლეს.
  • "რუსთავი 2-ში" ცვლილებები მას შემდეგ დაიწყო, რაც 2019 წლის 18 ივლისს სტრასბურგის სასამართლომ ძალაში დატოვა საქართველოს უზენაესი სასამართლოს გადაწყვეტილება, არხის მფლობელად ქიბარ ხალვაშის ცნობის შესახებ.
  • მფლობელის შეცვლის შემდეგ, გენერალური დირექტორის, ნიკა გვარამიას ადგილი პაატა სალიამ დაიაკავა.
  • შედეგად, ტელევიზია, პროტესტის ნიშნად, თანამშრომლების დიდმა ნაწილმა დატოვა.
კატეგორია: საერთაშორისო ამბები
კიევში სარაკეტო თავდასხმას  "რადიო თავისუფლების" კიევის ბიუროს ჟურნალისტი და პროდიუსერი  ვერა გირიჩი ემსხვერპლა.
ინფორმაციას ადასტურებს "რადიო თავისუფლების" კიევის ბიურო.

რა მოხდა?

უკრაინის ხელისუფლების ინფორმაციით, 28 აპრილს რუსეთის ძალებმა უკრაინის დედაქალაქში საჰაერო იერიში მიიტანეს. ვერა გირიჩი კიევში საკუთარ სახლში იმყოფებოდა, როდესაც კორპუსს ჭურვი მოხვდა. გირიჩის ცხედარი დილით ნახეს. 

ვერა გირიჩი "რადიო თავისუფლებაში" 2018 წლიდან მუშაობდა. მანამდე ის უკრაინულ სატელევიზიო არხებთან თანამშრომლობდა.

დაღუპული ჟურნალისტები

უკრაინის ჟურნალისტთა ეროვნული კავშირის ბოლო მონაცემებით, უკრაინაში რუსეთის დაწყებულ ომში დაიღუპა მედიის 20 თანამშრომელი ადგილობრივი და უცხოური გამოცემებიდან.
კატეგორია: საერთაშორისო ამბები
სანკტ-პეტერბურგის სასამართლომ რუს ჟურნალისტს მარინა პონომარენკოს “ფეიკების” კანონით წინასწარი პატიმრობა შეუფარდა. დამნაშავედ ცნობის შემთხვევაში ჟურნალისტს თავისუფლების 10 წლამდე აღვეთა ემუქრება.

რა მოხდა? რუსული მედიასაშუალების Rosnews-ის ჟურნალისტს მარინა პონომარენკოს რუსეთის არმიის შესახებ მიზანმიმართულად ცრუ ინფორმაციის გავრცელებას ედავებიან.

ჟურნალისტი 23 აპრილს დააკავეს. მომდევნო დღეს სამართალდამცველებმა გაჩხრიკეს მისი სახლი და გამოკითხეს მარინა პონომარენკოს 16 წლის შვილი.

რატომ არის მნიშვნელოვანი?

უკრაინის წინააღმდეგ ომის დაწყების შემდეგ რუსეთის ხელისუფლება ცდილობს ქვეყანაში ინფორმაციული ვაკუუმი შექმნას, ჩაახშოს დამოუკიდებელი მედია და ყველა მისთვის არასასურველი ინფორმაცია, რომელიც რუსეთის უკრაინაში ქმედებებს ეხება.

  • ამავე მიზანს ემსახურება რუსეთის უკრაინაში შეჭრის შემდეგ მიღებული ე.წ. “ფეიკების კანონიც, რომლის მიხედვითაც იკრძალება უკრაინის ომის შესახებ ნებისმიერი ინფორმაციის გავრცელება, რომელიც მთავრობის ოფიციალურ ინფორმაციას ეწინააღმდეგება.

ბრალდების თანახმად: ჟურნალისტმა 17 მარტს ტელეგრამის არხზე სახელით “Цензуре нет” ( “არა ცენზურას”) დაწერა, რომ უკრაინაში მარიუპოლის თეატრი რუსულმა ძალებმა დაბომბეს.

  • სანკტ-პეტერბურგის სასამართლოს პრესსამსახურის განცხადებით, ჟურნალისტმა იცოდა, რომ რუსეთის თავდაცვის სამინისტრო ოფიციალურად უარყოფს მარიუპოლის თეატრზე თავდასხმებს.
  • მარინა პონომარენკო ტელეგრამის არხთან კავშირს უარყოფს.
სასამართლოს გადაწყვეტილებით: ჟურნალისტს წინასწარი დაკავების იზოლატორში 22 ივნისამდე დატოვებენ.

მოსამართლე მიიჩნევს, რომ სხვაგვარად შეუძლებელი იქნებოდა პონომარენკოს დასწრების უზრუნველყოფა მომდევნო სხდომებზე.

“ჟურნალისტთა დაცვის კომიტეტი”, რომელიც ამერიკული არასამთავრობო ორგანიზაციაა რუსეთის ხელისუფლებას მოუწოდებს:
  • ჟურნალისტს დაუყოვნებლივ მოუხსნას ბრალდება
  • გაათავისუფლოს პატიმრობიდან
  • შეწყვიტონ პრესის წარმომადგენლების გასამართლება უკრაინის წინააღმდეგ რუსეთის ომის შესახებ “ფეიკების” გავრცელების ბრალდებით.
კატეგორია: საქართველო
პოსტსაარჩევნო მედიამონიტორინგის ანგარიშის მიხედვით, სამაუწყებლო მედია მკვეთრად მიკერძოებულია ხელისუფლების ან ოპოზიციის მიმართ, ონლაინ მედიის უმრავლესობა კი ამბებს ჟურნალისტური სტანდარტის დაცვით აშუქებს.


რა ხდება?

27 აპრილს პოსტსაარჩევნო მედიამონიტორინგის ანგარიში გამოქვეყნდა.

  • მედიას ევროკავშირისა და გაეროს განვითარების პროგრამის ხელშეწყობით, საქართველოს ჟურნალისტური ეთიკის ქარტიის მონიტორები აკვირდებოდნენ.
  • ანგარიშში შევიდა 6 ტელევიზიასა და და 9 ონლაინ გამოცემის მონიტორინგის შედეგები 2022 წლის 24 იანვრიდან - 24 მარტამდე პერიოდში.

რა არის მნიშვნელოვანი?

  • ანგარიშის მიხედვით, პოსტსაარჩევნო პერიოდში, რომელიც რუსეთ-უკრაინის ომს დაემთხვა, წინა ანგარიშთან შედარებით მკვეთრად გაიზარდა პოლარიზაცია.
  • ტელევიზისების ერთი ნაწილი ხელისუფლებისადმი იყო მიკერძოებული, მეორე კი ოპოზიციისადმი.
  • ონლაინ მედიების უმრავლესობა, ისევე, როგორც წინა პერიოდში, სიღრმისეულად და დაბალანსებულად აშუქებს მოვლენებს.

ვის აკვირდებოდნენ?

  • სატელევიზიო თოქშოუები და ახალი ამბები: საზოგადოებრივი მაუწყებლის პირველი არხი, აჭარის ტელევიზია, „მთავარი არხი“, „იმედი“, „ტვ პირველი“, ‘რუსთავი 2“.
  • ონლაინ მედია: ამბები.ჯი, ინტერპრესნიუსი, მარშალპრესი, ნეტგაზეთი, ონ.ჯი, რადიო თავისუფლება, პუბლიკა, ტაბულა, სპუტნიკი

წინასაარჩევნო მონიტორინგისგან განსხვავებით, ქარტია აღარ აკვირდებოდა რეგიონულ მედიას.

რას აკვირდებოდნენ?

პოსტსაარჩევნო პერიოდში, ისევე როგორც არჩევნებისას, მედიამონიტორები აკვირდებოდნენ სხვადასხვა სუბიექტის გაშუქებას. მათ შორის:

  • 2021 წლის თვითმმართველობის არჩევნებში მონაწილე პარტიები, პოლიტიკოსები და დამოუკიდებელ კანდიდატები;
  • ცენტრალური, ადგილობრივი და ავტონომიური მთავრობა და პრეზიდენტი;
  • ბიძინა ივანიშვილი;
  • მიხეილ სააკაშვილი.

ამავე სუბიექტებს ქარტია წიანასაარჩევნო პერიოდში, 2021 წლის შემოდგომაზეც აკვირდებოდა.

პოსტსაარჩევნო მედიამონიტორინგის მიგნებები დიდად არ განსხვავდება წინა მონიტორინგის შედეგებისგან.

მიგნებები მოკლედ

სატელევიზიო ახალი ამბები

რა შეიცვალა?

  • თუ წინასაარჩევნო პერიოდში აქტუალური თემა არჩევნებთან დაკავშირებული საკთხები იყო, პოსტსაარჩევნო პერიოდში სატელევიზიო ახალ ამბებში ძირითადად, რუსეთ-უკრაინის ომის თემები შუქდებოდა.

რა არ შეცვლილა?
 
  • ტელევიზია მკვეთრად პოლარიზებულია - ნაწილი ხელისუფლების მიმართ არის მიკერძოებული (მაგალითად, „პირველი არხი“, „რუსთავი 2“, „იმედი“), ნაწილი - ოპოზიციის („მთავარი არხი“, „ტვ პირველი“).
  • მიკერძოება აისახებოდა პოლიტიკური სუბიექტების არათანაბრად გაშუქებაში - ხშირად ირღვეოდა სამართლიანი გაშუქების პრინციპიც.
  • საზოგადოებრივი მაუწყებლის აჭარის ტელევიზია ყველაზე პოზიტიურად ადგილობრივ ხელისუფლებას აშუქებდა;

ტოქშოუები

რა შეიცვალა?

  • ამ მონიტორინგის პერიოდში, ყველაზე აქტუალური თემა ტოქშოუებშიც რუსეთ-უკრაინის ომი იყო, განსხვავებით წინასაარჩევნო პერიოდისგან.
  • ომის დაწყების შემდეგ, პოლარიზაცია კიდევ უფრო გაღრმავდა.

რა არ შცვლილა?

  • მმართველი პარტიის წარმომადგენლები ისევ არ დადიან ოპოზიციურ მედიაში, ხოლო ოპოზიციური პარტიები იშვიათად ჩანან ტელეკომპანია „იმედში“.
  • ტელეკომპანია „იმედის“ გზავნილები ემთხვეოდა „ქართული ოცნების“ გზავნილებს.
  • „TV პირველი“ და „მთავარი არხი“ კი, მიკერძოებული იყო ოპოზიციური პარტიების ნაწილის მიმართ.
  • „რუსთავი 2“ მაქსიმალურ კომფორტს უქმნიდა მმართველ პარტიას. ხშირად ტელეკომპანია ხელისუფლებისთვის მხოლოდ ტრიბუნის როლს ასრულებდა.

ონლაინ მედია

რა შეიცვალა?

  • თუ წინასაარჩევნო პერიოდში ონლაინ მედია ყველაზე მეტად საარჩევნო სუბიექტებსა და მიხეილ სააკაშვილის პატიმრობის საკითხს აშუქებდა - პოსტსაარჩევნო პერიოდში მათი მთავარი თემაც რუსეთ-უკრაინის ომი იყო.
  • ონლაინ მედიაში სულ უფრო იკლებს გენდერული ნიშნით შეურაცხმყოფელი განცხადებების გაშუქება.

რა არ შეცვლილა?

  • ონლაინ მედია მოვლენებს დაბალანსებულად, სიღრმისეულად და სტანდარტების დაცვით აშუქებს და არ არის მიკერძოებული არცერთი პარტიული მხარის მიმართ.
  • გამონაკლისია, გამოცემები „მარშალპრესი“ და „სპუტნიკი“, რომლებიც რუსეთ უკრაინის ომს ტენდენციურად აშუქებენ და მიკერძოებულები არიან ხელისუფლების მიმართ.
  • ინტერპრესნიუსსა და ამბები.ჯი-ზე კვლავ პრობლემაა სარეკლამო სტატიების არასათანადო გამიჯვნა სარედაქციო მასალისგან.
კატეგორია: საქართველო
27 აპრილს, “როსკომნადზორმა” ქართული გამოცემის, „სოვა ნიუსის“ დაცენზურება სცადა რუსეთისთვის არასასურველი ინფორმაციის გამოქვეყნების გამო.

რა ხდება?

თბილისში დაფუძნებულმა რუსულენოვანმა გამოცემამ რუსეთის კომუნიკაციების მარეგულირებლისგან “როსკომნადზორისგან” გაფრთხილების წერილი მიიღო, სადაც წერია, რომ „სოვამ“ ომთან დაკავშირებული მასალა რუსეთის “კანონის დარღვევით” გაავრცელა.

“როსკომნადზოირი”ითხოვს:
  • “სოვამ” 24 საათში წაშალოს მასალა რუსეთის ფედერაციის მიერ ჩადენილი ომის დანაშაულების შესახებ.
  • წინააღმდეგ შემთხვევაში ვებგვერდი დაიბლოკება რუსეთის ფედერაციის ტერიტორიის ფარგლებში.

რატომ არის მნიშვნელოვანი?

  • რუსეთი საკუთარი კანომდებლობის გავრცელებას სხვა ქვეყნებშიც ცდილობს.
  • უკრაინაში შეჭრის შემდეგ, რუსეთის მიერ მიღებული “ფეიკების” შესახებ კანონით იკრძალება უკრაინის ომის შესახებ ნებისმიერ ინფორმაციის გავრცელება, რომელიც მთავრობის ოფიციალურ ინფორმაციას ეწინააღმდეგება.
  • “სოვა ნიუსის” შემთხვევა პირველი არ არის, როდესაც კრემლი ქართულ მედიაზე რუსეთის კანონმდმებლობის გავრცელებას ცდილობს. მსგავსი წერილები აპრილის დასაწყისში მიიღეს, ონლაინ მედია „ნეტგაზეთმა“ და საინფორმაციო სააგენტო „აქცენტმაც”.
  • ქართულმა მედიასაშუალებებმა მასალები არ წაშალეს, რის შემდეგაც კრემლმა რუსეთში ru.netgazeti.ge და accentnews.ge-ზე წვდომა დაბლოკა.

Sova-ს მასალა
, რომლის წაშლასაც რუსული მხარე ითხოვს „რუსეთის ფედერაციის დანაშაულები: საქართველოს გასაბჭოებიდან უკრაინის ომამდეა“. 23-წუთიანი ვიდეო “იუთუბზეა ატვირთული”, ასევე ტექსტური ვერსია გამოქვეყნებულია გამოცემის ვებგვერდზე.
კატეგორია: ვაკანსიები
საქართველოს ჟურნალისტური ეთიკის ქარტია საბჭოს მდივნის პოზიციაზე ვაკანსიას აცხადებს.

ძირითადი მოვალეობები:

  • შემოსული განცხადებების მიღება და დასაშვებობის შემოწმება;
  • განცხადების განხილვისთვის მომზადება, მხარეებთან კომუნიკაცია;
  • საბჭოს სხდომების მომზადება, მონაწილეობის მიღება და გადაწყვეტილების სამუშაო ვერსიის მომზადება.

საკვალიფიკაციო მოთხოვნები:

  • უმაღლესი იურიდიული განათლება;
  • იურისტად მუშაობის 2-წლიანი გამოცდილება;
  • მედიაგარემოს ცოდნა;
  • საბჭოს გადაწყვეტილებების ცოდნა.

დაინტერესებულმა პირებმა 2022 წლის 6 მაისის 18:00 საათამდე უნდა გააგზავნონ CV და სამოტივაცი წერილი ელექტრონულ მისამართზე ethicscharter@gmail.com.

სათაურში უნდა მიუთითოთ პოზიციის დასახელება.
კატეგორია: ვაკანსიები
ონლაინგამოცემა „პუბლიკა“ ახალი ამბების ჟურნალიტის პოზიციაზე ვაკანსიას აცხადებს.

მოთხოვნები:


  • გამოცდილება ახალი ამბების მომზადებაში;
  • ქართულ ენაზე გამართულად წერის უნარი;
  • მულტიმედია უნარები – ფოტო/ვიდეოგადაღება/მონტაჟი;
  • ინგლისური (სავალდებულო) და რუსული (სასურველი) ენების ცოდნა. 

ანაზღაურება:

ახალი ამბების რეპორტიორისთვის ანაზღაურება განისაზღვრება კანდიდატის სამუშაო გამოცდილებისა და უნარ-ჩვევების შესაბამისად (დამატებით ინფორმაციას ანაზღაურების შესახებ შერჩეული კანდიდატები გასაუბრების დროს მიიღებენ);

სამუშაო გრაფიკი:

ორშაბათი-პარასკევი, 10:00-18:00 საათი. ასევე – შეთანხმებით განსაზღვრული მორიგეობები.

მსურველებმა რეზიუმე და სამოტივაციო წერილი უნდა გაგზავნონ მისამართზე: info@publika.ge;

განაცხადების მიღების ბოლო ვადაა 6 მაისი, 18:00 საათი;


განაცხადის ელექტრონული ფოსტით გაგზავნისას სათაურის ველში აუცილებლად მიუთითეთ პოზიციის დასახელება – რეპორტიორი!
კატეგორია: საქართველო
ზუგდიდიში, 17 მარტს „მთავარი არხის“ გადამღებ ჯგუფზე თავდასხმის გამო, „ალტ-ინფოს“ მიერ დაფუძნებული პოლიტიკური პარტია „კონსერვატიული მოძრაობის“ ზუგდიდის ოფისის ხელმძღვანელი და მისი თანამზრახველი დააკავეს. 

ინფორმაციას სპეციალური საგამოძიებო სამსახური ავრცელებს.

საგამოძიებო სამსახურის უფროსის განცხადებით, გაომძიებამ დაადგინა, რომ:

  • ბრალდებულები შეურაცხმყოფელი შეძახილებით და გინებით, ჟურნალისტს და მის ოპერატორს ინტერვიუს ჩაწერის შეწყვეტას და მიმდებარე ტერიტორიის დატოვებას სთხოვდნენ.
  • განხორციელებული დევნის დროს, ბრალდებულებმა ჟურნალისტს და მის ოპერატორს სხეულის სხვადასხვა არეში მრავლობითი დაზიანებები მიაყენეს.

რა მოხდა

17 მარტს “მთავარი არხის” ჟურნალისტ ემა გოგოხიასა და ოპერატორ ზვიად აბლოთიას ზუგდიდში, ძალადობრივი ჯგუფის “ალტ-ინფოს” პარტიის ოფისთან თავს დაესხნენ.

ემა გოგოხიას თქმით, ჟურნალისტები ქალაქის მერიის დაქვემდებარებაში მყოფი აიპის თანამშრომლების მიერ “ალტ-ინფოს” ოფისის შენობაზე უკრაინის მხარდამჭერი წარწერების წაშლას იღებდნენ. ჟურნალისტი ცდილობდა ოფისის ერთ-ერთი წარმომადგენლის ჩაწერას. გადაღების დროს ოფისთან რამდენიმე ერთდროულად გაჩერდა და იქიდან გადმოსული “კასტეტებით” შეიარაღებული პირები მათ თავს დაესხნენ.

გოგოხია ჰყვებოდა, რომ ოპერატორს დაახლოებით 8 კაცი სცემდა, საპატრულო პოლიცია კი ფაქტს შორიდან უყურებდა, პოლიციის ეკიპაჟი მხოლოდ მას შემდეგ ჩაერთო, რაც ხმაური მოქალაქეებმა გაიგეს და დახმარება სცადეს.

გამოძიება ჟურნალისტურ საქმიანობაში უკანონოდ ხელის შეშლის ფაქტზე, საქართველოს სისხლის სამართლის კოდექსის 154-ე და 156-ე მუხლის მეორე ნაწილით მიმდინარეობდა

ამავე თემაზე: ღამით 5 ჟურნალისტს თავს დაესხნენ - რა მოხდა?
კატეგორია: საქართველო
პარლამენტის დამტკიცებულმა საკონკურსო კომისიამ საზოგადოებრივი მაუწყებლის სამეურვეო საბჭოს 12 მსურველიდან მეურვეობის 10 კანდიდატი შეარჩია. ახლა მათგან 3 პარლამენტმა უნდა აირჩიოს.

7 აპრილს, საკონკურსო კომისიამ შეარჩია საზოგადოებრივი მაუწყებლის მეურვეობის 10 კანდიდატი, რომელთა სიაც განსახილველად პარლამენტს წარედგინება. მათ შორის მაუწყებლის დირექტორი 2017-2020 წლებში - ვასილ მაღლაფერიძე. 

  • საზოგადოებრივი მაუწყებლის სამეურვეო საბჭოს წევრობის სურვილი თავდაპირველად 12 პირმა გამოთქვა, მოგვიანებით კანდიდატურა მოხსნა ყოფილმა დეპუტატმა გუგული მაღრაძემ ბორდის “მის ერთ-ერთ სამსახურთან ინტერესთა კონფლიქტის” გამო.
  • დარჩენილი კანდიდატებიდან კომისიამ არ შეარჩია მხოლოდ ერთი, გიორგი ჭანტურია, რომელიც 2009-2012 წლებში საზოგადოებრივი მაუწყებლის გენერალური დირექტორი იყო. 

შერჩეული კანდიდატების სია

  1. ალექსი ნონიაძე - საპარლამენტო პოლიტიკური ჯგუფი „რეფორმების ჯგუფის“ აპარატის თანამშრომელი, საქართველოს ავტო იმპორტიორთა ასოციაციის თავმჯდომარის მოადგილე.
  2. ბელა კოპალიანი - აფხაზეთის ავტონომიური რესპუბლიკის განათლებისა და კულტურის მინისტრის მოადგილე.
  3. გიორგი იასაშვილი - საზოგადოებრივი მაუწყებლის პროფკავშირების იურისტი.
  4. დონარა შონავა - სხვადასხვა წლებში იყო საზოგადოებრივი მაუწყებლის ახალი და მიმდინარე ამბების ბლოკის კონსულტანტი,საზოგადოებრივ-პოლიტიკური მიმართულების სამსახურის უფროსი, მაუწყებლის მე-2 არხის გენერალური პროდიუსერი.
  5. ვასილ მაღლაფერიძე - საზოგადოებრივ მაუწყებელზე პროექტის “ჩვენი საქართველოს” წამყვან-პროდიუსერი, საზოგადოებრივი მაუწყებლის ყოფილი გენერალური დირექტორი 2017-2020 წლებში.
  6. ზაზა ხუციშვილი - მომღერალი, ყოფილი დეპუტატი “ქართული ოცნებიდან”.
  7. ლაშა ტუღუში - თსუ-ის პროფესორი, აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის თავმჯდომარე.
  8. ლია შავგულიძე - ჟურნალისტი, კვლევითი ჟურბალისტიკის და ეკონომიკური ანალიზის ცენტრის დირექტორი. 2014-დან 2018 წლამდე იყო ვებპორტალის eugeorgia.info-ს მთავარი რედაქტორი.
  9. მარინა გიორგაძე - პარლამენტის პრესცენტრის სპეციალისტი.
  10. არინა თავაქარაშვილი - სულხან-საბა ორბელიანის უნივერსიტეტის ასისტენტ-პროფესორი, 2018 წელს იყო საზოგადოებრივი მაუწყებლის რეგიონალური საბჭოს წევრი.

სამეურვეო საბჭოს ფუნქციებში მაუწყებლის პროგრამული პრიორიტეტების განსაზღვრა, დებულების მიღებას, ბიუჯეტის მიღებას და სხვა ფუნქციებს მოიცავს.

9-წევრიანი სამეურვეო საბჭოს ამჟამინდელ სამ წევრს - ირინა ფუტკარაძეს, გიორგი ნიჟარაძეს და ირაკლი პაპავას, რომლებიც 2016 წლიდან არიან სამეურვეო საბჭოში, ვადა 18 აპრილიდან ეწურებათ. სწორედ მათ ჩაანაცვლებენ ბორდის ახალი წევრები.

საბჭოს წევრები ასევე არიან: მიხეილ ჩიკვილაძე, გრიგოლ მურღულია, ზაზა აბაშიძე, ბონდო მძინარაშვილი, იზაბელა ოსიპოვა, ბესიკ ლილუაშვილი.

  • 30 მარტს საქართველოს პარლამენტმა 89 ხმით მხარი დაუჭირა საზოგადოებრივი მაუწყებლის სამეურვეო საბჭოს მეურვეობის კანდიდატთა შესარჩევ საკონკურსო კომისიის შემადგენლობას.
  • შერჩეული 9 წევრიდან სამი - ბაკურ ბაკურაძე, ეკა მელქაძე და ნინო მეუნარგია - ტელეკომპანია „იმედის“ ჰოლდინგში მუშაობს.

როგორ ირჩევს კომისია კანდიდატებს

საკონკურსო კომისიამ 3 მეურვე კანდიდატურების წარდგენის ვადის ამოწურვიდან 10 კალენდარული დღის ვადაში, ორ ეტაპად უნდა შეარჩიოს:

პირველ ეტაპზე

კანდიდატები შეირჩევიან „მაუწყებლობის შესახებ“ საქართველოს კანონით დადგენილი საკვალიფიკაციო მოთხოვნების შესაბამისად. კანდიდატთა შეფასების დამატებითი კრიტერიუმები განისაზღვრება საკონკურსო კომისიის დებულებით.

მეორე ეტაპზე

კანდიდატები შეირჩევიან მათ მიერ წარდგენილი საზოგადოებრივი მაუწყებლის განვითარების კონცეფციების განხილვის და მათთან გასაუბრების შედეგად.

კანდიდატთა შერჩევის შემდეგ

საკონკურსო კომისია უმრავლესობას, უმრავლესობის გარეთ დარჩენილ პარლამენტის წევრებს, საქართველოს სახალხო დამცველსა და აჭარის ავტონომიური რესპუბლიკის უმაღლეს საბჭოს წარუდგენს ასარჩევზე სულ ცოტა სამჯერ მეტ კანდიდატურას.

სამეურვეო საბჭოს დაკომპლექტების წესი

  • საზოგადოებრივი მაუწყებლის სამეურვეო საბჭო სულ 9 წევრისგან შედგება.
  • მეურვის უფლებამოსილების ვადა არაუმეტეს 6 წელია.
  • სამეურვეო საბჭოს შემადგენლობის ერთი მესამედი როტაციის წესით 2 წელიწადში ერთხელ იცვლება.
  • არ შეიძლება, ერთი და იგივე ადამიანი კი მეურვედ ერთ ვადაზე მეტი ხნით აირჩეს.
მეურვეობის კანდიდატებიდან:

  • ორ მეურვეს საქართველოს პარლამენტი სიითი შემადგენლობის უმრავლესობით ირჩევს საქართველოს სახალხო დამცველის წარდგენით.
  • სამს – საპარლამენტო უმრავლესობის წარდგინებით.
  • სამს – საპარლამენტო უმრავლესობის გარეთ დარჩენილ პარლამენტის წევრთა არანაკლებ ერთი მეოთხედის წარდგინებით.
  • ერთს – აჭარის ავტონომიური რესპუბლიკის უმაღლესი საბჭოს წარდგინებით.
კატეგორია: საქართველო
საქართველო-ევროკავშრის ასოცირების შეთანხმების განხორციელების განახლებულ შეფასებაში საუბარია საქართველოს პოლარიზებულ მედასა და მტრულ გარემოზე ჟურნალისტებისთვის.

მოკლედ:

• ანგარიში ევროპარლამენტის ვებგვერდზე 25 მარტს გამოქვეყნდა.

• 85-გვერდიანი დოკუმენტი საგარეო საქმეთა კომიტეტის მოთხოვნით ევროპარლამენტის კვლევის სამსახურმა მოამზადა ევროპარლამენტის წევრებისა და თანამშრომლებისთვის როგორც დამატებითი მასალა მათს საპარლამენტო მუშაობაში დასახმარებლად.

• დოკუმენტში გამოთქმული მოსაზრებები ევროპარლამენტის ოფიციალურ პოზიციას არ წარმოადგენს.

უფრო დეტალურად:

• შეფასებით ანგარიშში ნახსენებია 2019 წელს რუსთავი 2-ისა და აჭარის ტელევიზიაში მფლობელებისა და მენეჯმენტის ცვლილება სარედაქციო პოლიტიკაში ჩარევასთან მიმართებით, ასევე 2021 წელს აჭარის ტელევიზიიდან სამი ჟურნალისტის გათავისუფლება, რუსთავი 2-დან გურამ როგოავასა და თეონა ცხომელიძის წასვლა სარედაქციო პოლიტიკის ცვლილების მიზეზით, „სუსის ფაილების“ გავრცელება, რომლებშიც ფარული ჩანაწერები ჟურნალისტებზეც იყო.

• დოკუმენტში საუბარია კომუნიკაციების კომისიის მიერ „მედიაკრიტიკის“ პლატფორმის დამოუკიდებელ მედიაზე თავდასხმისთვის გამოყენებასთან დაკავშირებული ბრალდებები, თბილისის მერის კახა კალაძის განცხადებები კრიტიკული მედიის მიმართ, ცესკოს მედიამონიტორინგში „ნეტგაზეთის“, „პუბლიკასა“ და „ონ.ჯის“ შეცდომით დადანაშაულება დეზინფორმაციის გავრცელებაში.

• მედიაგარემოს შეფასებაში წერია 5 ივლისის მოვლენებზეც, ლექსო ლაშქარავას გარდაცვალების შესახებ, მოყვანილია მსოფლიო პრესის თავისუფლების ინდექსში საქართველოს მონაცემები და Freedom House-ის 2021 წლის შეფასება,.

• ამასთანავე ანგარიშში ნათქვამია, რომ საქართველოს ხელისუფლებამ ვერ ჩაატარა ეფექტური გამოძიება 2019 წლის ივნისსა და 2021 წლის ივლისში მომხდარ ძალადობრივ ინციდენტებზე და რომ 2021 წლის ივლისში განხორციელებულ ძალადობაზე პასუხისმგებელი არც ერთი ორგანიზატორი არ არის დაკავებული.

კონკრეტული შეფასებები:

• ქართული მედიის მდგომარეობა მნიშვნელოვნად გაუარესდა.

• 2021 წელს ჟურნალისტებზე 90-ზე მეტი თავდასხმა დაფიქსირდა.

• მედიის წარმომადგენლების მიმართ მუქარა და ძალადობა შიშს იწვევს ჟურნალისტებში. ბევრი მათგანი ცდილობს წაშალოს თავისი პროფესიული იდენტობა, მაგალითად, დემონსტრაციების დროს აქციის მონაწილეებად წარმოაჩინონ თავი.

• მიუხედავად იმისა, რომ წინა რეფორმებმა შედარებით პლურალისტური მედია ლანდშაფტის გაჩენის საშუალება შექმნა, ბოლო პერიოდში მედია პოლარიზაციის მსხვერპლი გახდა და ჟურნალისტები ახლა უფრო რთული სამუშაო პირობების წინაშე დგანან.

• მედია გარემო პლურალისტულია, მაგრამ მედიის პოლარიზაცია პოლიტიკური კრიზისის პარალელურად გაიზარდა.

• უფრო მეტი გამოწვევა აქვს ჟურნალისტების სამუშაო გარემოს მედიის მუშაობაში პოლიტიკური ჩარევის, ასევე ჟურნალისტების მიმართ სიტყვიერი და ფიზიკური თავდასხმების გამო.

• 2021 წლის საარჩევნო კამპანიამ მზრდადი აგრესიული რიტორიკა და მედიის გარემოს მკვეთრი გაუარესება ასახა.

• ისევ პრობლემაა მედიის მფლობელობის საკითხი და პოლიტიკურ პარტიებთან მათი კავშირები. • საქართველოში მედია კანონმდებლობა ლიბერალური და პროგრესულია. თუმცა, ბოლოდროინდელმა საკანონმდებლო ცვლილებებმა საერთაშორისო და ადგილობრივი ორგაბიზაციების შეშფოთება გამოიწვია.

საუბარია "ელექტრონული კომუნიკაციების შესახებ“ კანონში მთავრობისა და კომუნიკაციების ეროვნული კომისიის მიერ ინიცირებულ და შემდგომ უკვე მიღებულ ცვლილებებზე. ასევე „ქართული ოცნების“ საკანონმდებლო პაკეტის შესახებ, რომელიც საარჩევნო კამპანიისას პოლიტიკური სუბიექტის მიმართ „უარყოფითი დამოკიდებულების შემქმნელი“ სარეკლამო მასალის გავრცელებას კრძალავს ითვალისწინებდა.

• მმართველმა კოალიციამ გააგრძელა მედიაგარემოში ჩარევა, როგორც ფორმალური, ისე არაფორმალური ბერკეტების გამოყენებით.

• მმართველი უმრავლესობა უფრო მეტად აკრიტიკებს მედიას. „ქართული ოცნების“ წევრები და სამთავრობო უწყებები ცდილობდნენ ოპოზიციური გამოცემების დისკრედიტაციას მათი დეზინფორმაციის წყაროებად წარმოჩენით.

• მმართველი უმრავლესობის მხრიდან სიტყვიერი თავდასხმები ქართული მედიისთვის მტრულ გარემოს ქმნის და გზას უხსნის ფიზიკურ ძალადობას.
კატეგორია: საქართველო
სასამართლომ 5 ივლისს „ინტერპრესნიუსის“და „ტვ პირველის“ რეპორტიორების მიმართ ძალადობაში ბრალდებულებს ორგანიზებულ ჯგუფურ დანაშაულში მონაწილეობის მუხლი მოუხსნა და მათ 12 და 18 თვით თავისუფლების აღკვეთა მიუსაჯა


5 ივლისს „ინტერპრესნიუსის“ ფოტოგრაფ გიორგი ნიკოლიშვილის და „ტვ პირველის“ ოპერატორის, ლევან ბრეგვაძის მიმართ ძალადობაში ბრალდებულებს სასაართლომ განაჩენი დღეს, 6 აპრილს გამოუტანა.

სასჯელი

მოსამართლე ვალერიან ბუგიანიშვილმა ყველა პირს ორგანიზებულ ჯგუფურ დანაშაულში მონაწილეობა მოუხსნა და ის ძალადობის მუხლით გადაუკვალიფიცირა.

მოსამართლის გადაწყვეტილებით,

1 წლიანი პატიმრობა მიესაჯათ „ინტერპრესნიუსის“ ფოტოგრაფ გიორგი ნიკოლიშვილზე ძალადობაში ბრალდებულებს:

  • ბაქარ მაისურაძეს
  • ნიკოლოზ დადვანს
  • თორნიკე გაბელიანს

„ტვ პირველის“ ოპერატორის ძალადობაში ბრალდებულ ვანო ბურდულს კი, წარსულში ნასამართლეობის გამო, სხვებთან შედარებით 6 თვით მეტი- 1 წლითა და 6 თვის ვადით პატიმრობა მიესაჯა.

მაისურაძე, დადვანი და გაბელიანი 3 თვეში, ბურდული კი - 9 თვეში დატოვებს პენიტენციურ დაწესებულებას.

4 აპრილს მოსამართლემ გამოაცხადა სასამართლოს განაჩენი 5 ივლისის საქმის რამდენიმე ეპიზოდზე და ტელეკომპანია პირველის“ ოპერატორის ლექსო ლაშქარავასა და ჟურნალისტის მირანდა ბაღათურიას მიმართ ძალადობაზე თავისუფლების 5 წლით აღკვეთა მიესაჯა 6 ბრალდებულს.


ვრცლად ამ თემაზე: სასამართლომ 5 ივლისის მოძალადეებს განაჩენი გამოუტანა


კონტექსტი

5 ივლისს "თბილისი პრაიდის" მიერ დაგეგმილი "ღირსების მარშის" წინააღმდეგ გამოსული ძალადობრივი ჯგუფები მედიის 53 წარმომადგენელს ფიზიკურად გაუსწორდნენ.

ძალადობრივი აქციის ორგანიზატორების დასჯას შვიდ თვეზე მეტია უშედეგოდ ითხოვს მედია, არასამთავრობო სექტორი და სამოქალაქო საზოგადოება. თუმცა, ამ დრომდე არც ერთი ორგანიზატორი პასუხისგებაში მიცემული არ არის.
კატეგორია: საქართველო
2 აპრილს, საქართველოს პარლამენტის ვებგვერდზე გამოქვეყნდა საზოგადოებრივი მაუწყებლის სამეურვეო საბჭოს წევრობის 12 კანდიდატის სია. ბორდის წევრად პარლამენტმა, საკონკურსო კომისიის მიერ წარდგენილი კანდიდატებიდან სამი უნდა აარჩიოს.

კომისიის თავმჯდომარე რეჟისორი ბაკურ ბაკურაძეა. ის პროსახელისუფლებო განცხადებებით გამოირჩევა და 2020 წლიდან ტელეკომპანია "იმედში" მუშაობს. 


ბორდის წევრობის მსურველებს შორის არის საზოგადოებრივი მაუწყებლის ყოფილი დირექტორი და “ქართული ოცნების” თავმჯდომარის ყოფილი მოადგილე ვასილ მაღლაფერიძე, ასევე ყოფილი დეპუტატები “ქართული ოცნებიდან” გუგული მაღრაძე და ზაზა ხუციშვილი.

ბორდის წევრობის მსურველების სია:

  1. ალექსი ნონიაძე - საპარლამენტო პოლიტიკური ჯგუფი „რეფორმების ჯგუფის“ აპარატის თანამშრომელი, საქართველოს ავტო იმპორტიორთა ასოციაციის თავმჯდომარის მოადგილე.
  2. ბელა კოპალიანი - აფხაზეთის ავტონომიური რესპუბლიკის განათლებისა და კულტურის მინისტრის მოადგილე.
  3. გიორგი იასაშვილი - საზოგადოებრივი მაუწყებლის პროფკავშირების იურისტი.
  4. გიორგი ჭანტურია - თსუ-ის მედიისა და ტელეხელოვნების კოლეჯის პედაგოგი, 2009-2012 წლებში საზოგადოებრივი მაუწყებლის გენერალური დირექტორი.
  5. გუგული მაღრაძე - ყოფილი დეპუტატი. საქართველოს IX მოწვევის პარლამენტის წევრი „ქართული ოცნება - დემოკრატიული საქართველო“ პარტიული სიით.
  6. დონარა შონავა - სხვადასხვა წლებში იყო საზოგადოებრივი მაუწყებლის ახალი და მიმდინარე ამბების ბლოკის კონსულტანტი,საზოგადოებრივ-პოლიტიკური მიმართულების სამსახურის უფროსი, მაუწყებლის მე-2 არხის გენერალური პროდიუსერი.
  7. ვასილ მაღლაფერიძე - საზოგადოებრივ მაუწყებელზე პროექტის “ჩვენი საქართველოს” წამყვან-პროდიუსერი, საზოგადოებრივი მაუწყებლის ყოფილი გენერალური დირექტორი 2017-2020 წლებში.
  8. ზაზა ხუციშვილი - მომღერალი, ყოფილი დეპუტატი “ქართული ოცნებიდან”.
  9. ლაშა ტუღუში - თსუ-ის პროფესორი, აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის თავმჯდომარე.
  10. ლია შავგულიძე - ჟურნალისტი, კვლევითი ჟურბალისტიკის და ეკონომიკური ანალიზის ცენტრის დირექტორი. 2014-დან 2018 წლამდე იყო ვებპორტალის eugeorgia.info-ს მთავარი რედაქტორი.
  11. მარინა გიორგაძე - პარლამენტის პრესცენტრის სპეციალისტი.
  12. არინა თავაქარაშვილი - სულხან-საბა ორბელიანის უნივერსიტეტის ასისტენტ-პროფესორი, 2018 წელს იყო საზოგადოებრივი მაუწყებლის რეგიონალური საბჭოს წევრი.
კანდიდატების მიერ წარდგენილ საზოგადოებრივი მაუწყებლის განვითარების კონცეფციციებს გაეცანით ამ ბმულზე.

სამეურვეო საბჭოს ფუნქციებში მაუწყებლის პროგრამული პრიორიტეტების განსაზღვრა, დებულების მიღებას, ბიუჯეტის მიღებას და სხვა ფუნქციებს მოიცავს.

ამ დროისთვის სამეურვეო საბჭო შემდეგნაირად არის დაკომპლექტებული:

  • სამეურვეო საბჭოს თავმჯდომარე ირინა ფუტკარაძეა.
  • საბჭოს წევრები არიან: მიხეილ ჩიკვილაძე, გრიგოლ მურღულია, ზაზა აბაშიძე, ბონდო მძინარაშვილი, იზაბელა ოსიპოვა, ბესიკ ლილუაშვილი, ირაკლი პაპავა, გიორგი ნიჟარაძე.
  • ბორდის სამ წევრს - ირინა ფუტკარაძეს, გიორგი ნიჟარაძეს და ირაკლი პაპავას, რომლებიც 2016 წლიდან არიან სამეურვეო საბჭოში, ვადა 18 აპრილიდან ეწურებათ.
კატეგორია: საქართველო
5 ივლისის საქმის რამდენიმე ეპიზოდზე სასამართლოს განაჩენი ცნობილია.

განახლება:  „ტელეკომპანია პირველის“ ოპერატორის ლექსო ლაშქარავასა და ჟურნალისტის მირანდა ბაღათურიას მიმართ ძალადობის ეპიზოდზე თავისუფლების 5 წლით აღკვეთა მიესაჯა 6 ბრალდებულს:

  • დავით კუტალაძეს
  • თორნიკე დავლაშერიძეს
  • ​გია გიგუაშვილს
  • ცოტნე ჩიხლაძეს
  •  ოთარ გელაშვილს
  • აკაკი ნაკაშიძეს

მოსამართლემ დამნაშავედ ცნო ტელეკომპანია „ფორმულას“ ჟურნალისტის, რატი წვერავას მიმართ ძალადობაში ბრალდებულები. ასევე„მთავარი არხის“ ჟურნალისტების დეა მამისეიშვილის და დათუნა ახალაძის, „იმედის“ ჟურნალისტების: დიტო ყირიმლიშვილისა და შოთა კერვალიშვილის, „ტაბულას” ჟურნალისტის, მაკა ჯაბუას, „რადიო თავისუფლების” ჟურნალისტების: თორნიკე მანდარიას და ოპერატორ დათო ქორიძის „რუსთავი 2-ის“ ოპერატორის ბექა ათაბეგაშვილის მიმართ ძალადობის საქმეზე ბრალდებულები.
  • მოსამართლემ ბრალდებულებს ორგანიზებული დანაშაულის ბრალდება ჯგუფური ძალადობის მუხლით გადაუკვალიფიცირა.

სასჯელი

  • 4 მსჯავრდებულს: გიორგი ნასყიდაშვილს, გიორგი კახიანს, რომეო კეკუტიას, ზაზა მჭედლიძეს - შეეფარდათ თავისუფლების აღკვეთა 1 წლითა და 3 თვის ვადით - მათ საპატიმროში 6 თვის გატარება მოუწევთ, რადგან 9 თვეა ისინი უკვე დაკავებულები არიან.
  • 2 მსჯავრდებულს: ილია ქებაძესა და თემურ ხარაულს - თავისუფლების აღკვეთა 1 წლითა და 2 თვის ვადით.
  • უშანგი დათუნაშვილს - 5000-ლარიანი გირაო შეეფარდა.

ე.წ მოპედის ეპიზოდზე -  „რუსთავი 2"-ის ჟურნალისტის  თამარ თათარაშვილის,  "ფორმულას" ფოტოგრაფის ვახტანგ ქარელის, "საზოგადოებრივი მაუწყებლის" ოპერატორის ილია თვალიაშვილის, "ნიუ პოსტის" ფოტოგრაფის ზურაბ ცერცვაძის მიმართ ძალადობისთვის პატიმრობა შეეფარდა 7 პირს:
  • თედო ბურდული - 3 წელი
  • გენო გერმანიშვილი - 3 წელი 
  • გიორგი ხეჩუაშვილი - 3 წელი 
  • გიორგი წარუაშვილი - 1 წელი და 3 თვე
  • გიორგი მაღრაძე - 1 წელი და 3 თვე
  • ზაზა ჭაავას - 1 წელი 
  • მურად დევლარიშვილი - 1 წელი 

ცოტახანში გახდება ცნობილი სასამართლოს განაჩენი “ტვ პირველის” ოპერატორის ლექსო ლაშქარავას მიმართ ძალადობის ეპიზოდზე.

კონტექსტი

5 ივლისს "თბილისი პრაიდის" მიერ დაგეგმილი "ღირსების მარშის" წინააღმდეგ გამოსული ძალადობრივი ჯგუფები მედიის 53 წარმომადგენელს ფიზიკურად გაუსწორდნენ.

ძალადობრივი აქციის ორგანიზატორების დასჯას შვიდ თვეზე მეტია უშედეგოდ ითხოვს მედია, არასამთავრობო სექტორი და სამოქალაქო საზოგადოება. თუმცა, ამ დრომდე არც ერთი ორგანიზატორი პასუხისგებაში მიცემული არ არის.
კატეგორია: საერთაშორისო ამბები
უკრაინაში რუსეთის მიერ დაწყებულ ომში მედიის კიდევ ორი წარმომადგენელი დაიღუპა. ლიეტუველი დოკუმენტალისტი მანტას კვედარავიჩიუსი და უკრაინელი ფოტოგრაფი მაკსიმ ლევინი.

მანტას კვედარავიჩიუსი უკრაინის თავდაცვის უწყების ინფორმაციით, რუსმა ოკუპანტება მაშინ მოკლეს, როცა ის ქალაქ მარიუპოლის დატოვებას ცდილობდა.

45 წლის ლიეტუველ რეჟისორს გადაღებული აქვს დოკუმენტური ფილმი “მარიუპოლისი”, ასევე “ბარზახი”, რომელიც რუსეთის ჩეჩნეთში ომის შესახებაა. ფილმმა 2011 წელს ბერლინის საერთაშორისო კინოფესტივალზე “ამნესთი ინთერნეიშენალის” პრიზი მიიღო.

მაკსიმ ლევინი - უკრაინული საინფორმაციო მედიასაშუალება LB.ua-სთვის მუშაობდა და 2013 წლიდან სააგენტო “როიტერის” კონტრიბუტორი იყო. ფოტოგრაფის ცხედარი კიევთან ახლოს ერთ-ერთ სოფელში 1 აპრილს ნახეს. ის მუშაობის დროს შუიარაღებელი იყო და პრესის ჟილეტი ეცვა.

40 წლის ლევინის გაუჩინარების შესახებ ცნობები 22 მარტს გავრცელდა. ფოტოგრაფს ცოლი და 4 შვილი დარჩა.

ფოტოგრაფის ნამუშევრები უკრაინიდან ნახეთ ამ ბმულზე.

დაღუპული ჟურნალისტები

უკრაინის გენერალური პროკურორის ინფორმაციით, 26 მარტის მონაცემებით, უკრაინაში რუსეთის დაწყებულ ომში 12 ჟურნალისტი დაიღუპა, დაშავდა 10.

უკრაინის გენერალური პროკურორი ამბობს, რომ რუსეთის შეიარაღებულმა ძალებმა დანაშაულები მედიის 56 წარმომადგენლის მიმართ ჩაიდინეს.

უკრაინაში შეჭრის შემდეგ ჟურნალისტებისა და მედიის წინააღმდეგ 148 უკანონო ქმედება განხორციელდა.
კატეგორია: საქართველო
საქართველოს საზოგადოებრივი მაუწყებლის სამეურვეო საბჭოს სხდომაზე საბჭოს ახალი თავმჯდომარე ვერ აირჩიეს.

სამეურვეო საბჭოს თავმჯდომარის ფუნქციაა, მოიწვიოს საბჭო, წარმართოს სხდომები, ხელი მოაწეროს საბჭოს გადაწყვეტილებებს.

რა მოხდა?

საბჭოს წევრების ხმათა უმრავლესობა წარდგენილმა კანდიდატმა ვერ მიიღო.

1 აპრილს გამართულ სხდომაზე 9-წევრიანი სამეურვეო საბჭოს თავმჯდომარის 2 კანდიდატურა იყო წარდგენილი:
  1. ბონდო მძინარაშვილი - რომელმაც თავისი კანდიდატურა მოხსნა და კენჭისყრაში მონაწილეობა არ მიიღო.
  • “გულახდილად ვიტყვი მქონდა სურვილი, რომ ჩემს კოლეგებს ჩემი კანდიდატურისთვის დაეჭირათ მხარი, მაგრამ მე ვიცი უკვე დამოკიდებულება ჩემი კოლეგების. ჩვენ ბუნებრივია გვქონდა საუბარი, არაფერი დასამალი და საიდუმლო არ არის ამაში, ერთმანეთის დამოკიდებულებები და განწყობები ვიცით. ამიტომ, მე ჩემს კანდიდატურას მივცემ თვითაცილებას და არ მივიღებ მონაწილეობას კენჭისყრაში”
  • "სასურველი იყო ჩემთვის მხარი დაგეჭირათ, ნუ ასე არ გამოდის და რაკი მხარს არ მიჭერთ, მაშინ მე არც არავის დავუჭერ მხარს, როგორც ერთ-ერთი კანდიდატი. “- მიმართა კოლეგებს მძინარაშვილმა.
     2. ბესიკ ლილუაშვილი - რომელმაც მხოლოდ 4 ხმა მიიღო.
  • “დარწმუნებული ვარ, რომ აქაც საჭირო რაოდენობის ხმებს ვერ მივიღებ, მაგრამ ლუსტრაციისთვის ეს აუცილებელი მგონია.”, - თქვა კეჭისყრამდე თავისი კანიდატურის დასახელებისას ლილუაშვილმა.

სამეურვეო საბჭოს თავმჯდომარის ასარჩევად საჭიროა მინიმუმ 5 ხმა.

კენჭისყრის შედეგები:

ბესიკ ლილუაშვილის 4 ხმიდან:
  • ერთი თავისივე ხმა იყო.
  • ასევე ხმები მიიღო: ზაზა აბაშიძის, ირინა ფუტკარაძისა, გიორგი ნიჟარაძისგან.

ვინ დაესწრო სხდომას?

სხდომას 9-დან 2 მეურვე არ დაესწრო:

სხდომას ესწრებოდნენ: ირინა ფუტკარაძე, მიხეილ ჩიკვილაძე, ზაზა აბაშიძე, ბონდო მძინარაშვილი, იზაბელა ოსიპოვა, ბესიკ ლილუაშვილი, გიორგი ნიჟარაძე.

არ ესწრებოდა: ირაკლი პაპავა - სამეურვეო საბჭოს ახლანდელი თავმჯდომარის ირინა ფუტკარაძის განმარტებით, მას ვერ დაუკავშირდნენ.

სხდომა დაწყებისას პროტესტის ნიშნად დატოვა: გია მურღულიამ.
  • “დღეს ჩვენ ვიღებთ ისეთ გადაწყვეტილებას და თან იმ შემადგენლობით, რომლიდანაც სამი ადამიანი უახლოეს დღეებში გადის ამ სამეურვეო საბჭოდან. შეიძლება აღმოჩნდეს, ძალიან დიდი ალბათობით, რომ ახალი თავმჯდომარე აირჩიოს ძალიან ცოტა ადამიანმა სამეურვეო საბჭოს სრული შემადგენლობიდან. ვფიქრობ, ძალიან იკითხება არა საზოგადო ინტერესები, არამედ რაღაც სხვა ინტერესები. მივიჩნევ, რომ ეს სხდომა არ გამოხატავს ჩვენი ტელევიზიის ინტერესებს”,- განმარტა მურღულიამ.

საზოგადოებრივი მაუწყებლის სამეურვეო საბჭოს მოქმედ თავმჯდომარეს ირინა ფუტკარაძეს უფლებამოსილების ვადა 17 აპრილს ეწურება.

  • კანონმდებლობის მიხედვით, სამეურვეო საბჭო თავმჯდომარეს 3 წლის ვადით ირჩევს თავმჯდომარის უფლებამოსილების ვადის ამოწურვამდე არაუადრეს 30 და არაუგვიანეს 15 კალენდარული დღისა.
  • შესაბამისად, სამეურვეო საბჭოს თავმჯდომარის არჩევის ბოლო სამუშაო დღე სწორედ 1 აპრილს იყო.

საბჭოს თავმჯდომარეს მეურვეები, სავარაუდოდ, ახალი წევრების შესვლის შემდეგ აირჩევენ.

სამეურვეო საბჭოში ვადა სამ წევრს - ირინა ფუტკარაძეს, გიორგი ნიჟარაძეს და ირაკლი პაპავას ეწურება.
 
საზოგადოებრივი მაუწყებლის სამეურვეო საბჭოს/ბორდს პარლამენტის საკონკურსო კომისია დააკომპლექტებს -პარლამენტმა საკონკურსო კომიასია უკვე დაამტკიცა

სამეურვეო საბჭოს ფუნქციებში მაუწყებლის პროგრამული პრიორიტეტების განსაზღვრა, დებულების მიღებას, ბიუჯეტის მიღებას და სხვა ფუნქციებს მოიცავს.
კატეგორია: საერთაშორისო ამბები
რუსეთის კომუნიკაციების მარეგულირებელი “როსკომნადზორი” უფასო ონლაინ ენციკლოპედიას Wikipedia-ს დაჯარიმებით ემუქრება.

რა მოხდა?

რუსეთის მარეგულირებელი Wikipedia-ს 4 მილიონი რუბლით (49 000$) დააჯარიმებს, თუ რუსეთის უკრაინაში შეჭრაზე კრემლის ვერსიისგან განსხვავებულ ინფორმაციას არ წაშლის.

“როსკომნადზორი” ითხოვს ენციკლოპედიამ, რომელსაც მსოფლიოს მასშტაბით მოხალისეები არედაქტირებენ:

  • წაშალოს ყველა ინფორმაცია უკრაინაში შეჭრის შესახებ, რომელიც რუსებს “არასწორ” ინფორმაციას აწვდის.
  • “არალეგალური ინფორმაციის” არ წაშლის გამო Wikipedia-ს ადმინისტრაციული პასუხისმგებლობა დაეკისრება.

“ვიკიპედიის” რუსმა რედაქტორებმა ჯერ კიდევ მარტის დასაწყისში თქვეს, რომ “როსკომნადზორისგან” ენციკლოპედიის დაბლოკვის მუქარა მიიღეს. ამის მიზეზი რუსული მასალა “რუსეთის უკრაინაში შეჭრა (2022)” გახდა, რომელშიც ეწერა უკრაინული მთავრობის მონაცემები დაღუპული უკრაინელი მშვიდობიანი მოქალაქეებისა და რუსი სამხედროების შესახებ.

The Wikimedia Foundation-ს - “ვიკიპედიის” მშობელ ორგანიზაციას, რომელიც სან-ფრანცისკოშია ბაზრირებული რუსეთის მარეგულირებლის მოთხოვნაზე კომენტარი არ გაუკეთებია.

თუმცა, 3 მარტს გავრცელებულ განცხადებაში ორგანიზაცია წერს, რომ ცენზურისა და მათი მოძრაობის წვერების დაშინების ფონზე უკან დახევას არ აპირებს და დაიცავს საკუთარ მისიას - მიაწოდოს უფასო ცოდნა მსოფლიოს.

რუსეთი უკრაინაში შეჭრასა და სრულმასშტაბიან ომს “სპეციალურ სამხედრო ოპერაციას” უწოდებს. ცენზურის მიზნით ქვეყანაში შესაბამისი კანონმდებლობა მიიღეს.

მოკლედ: რას ამბობს „ფეიკების“ შესახებ ახალი რუსული კანონი?
კატეგორია: საქართველო
"ამნესთი ინთერნეიშენალის" ანგარიშის მიხედვით,  საქართველოში კრიტიკული მედიის, არასამთავრობო ორგანიზაციებისა და ოპოზიციის წარმომადგენლებს ფარულად უთვალთვალებენ, აშინებენ და თავს ეხსმიან.

ორგანიზაციამ ადამიანის უფლებების მდგომარეობის შესახებ ყოველწლიურ ანგარიშში 2021 წლის მოვლენები შეაჯამა.

“ამნესთი ინთერნეიშენალი” საქართველოში მედიის ნაწილში რამდენიმე საკითხს გამოყოფს.

“ოპოზიციის წევრებზე, ხელისუფლებისადმი კრიტიკულ მედიაზე და არასამთავრობო ორგანიზაციებზე ხორციელდებოდა, მიყურადება, დაშინება და თავდასხმები, არსებული დაუსჯელობის ფონზე. იყო მუქარისა და თავდასხმის შემთხვევები ოპოზიციის წევრების, სამოქალაქო აქტივისტებისა და ჟურნალისტების წინააღმდეგ, რაც, ხშირად, ხელისუფლების წარმომადგენლების მხრიდან გაკეთებული განცხადებებით ან უმოქმედობით იყო წახალისებული.”, - წერია ანგარიშში.

5 ივლისის მოვლენები:

  • “ძალადობრივი ჰომოფობიური ჯგუფები თავს დაესხნენ და ფიზიკური ზიანი მიაყენეს 50-მდე ჟურნალისტს.
  • ერთ-ერთი სასტიკად ნაცემი, TV პირველის ოპერატორი ლექსო ლაშქარავა, ინციდენტიდან ექვს დღეში, საკუთარ სახლში, გარდაცვლილი იპოვეს.
  • ხელისუფლების წარმომადგენლებმა მათი ბრალეულობა უარყვეს და ძალადობის პროვოცირებაში Pride-ის ორგანიზატორები დაადანაშაულეს.
  • ხელისუფლებამ გამოაქვეყნა ლექსო ლაშქარავას სიცოცხლის უკანასკნელ დღეს გადაღებული სათვალთვალო კამერის ჩანაწერები, იმის მისანიშნებლად, რომ ლაშქარავამ თითქოს ნარკოტიკული საშუალება შეიძინა.
  • მთავრობამ ვერ უზრუნველყო მასობრივი ძალადობის ორგანიზატორების სამართლებრივ პასუხისმგებლობა და მოვლენების ეფექტური გამოძიება.

“სუსის” სავარაუდო ფარული ჩანაწერები:

  • 12 სექტემბერს, ინტერნეტ და მედია სივრცეში განთავსდა ათასობით ფარული ჩანაწერის დოკუმენტური მასალა, რომელიც სავარაუდოდ სახელმწიფო უსაფრთხოების სამსახურის მიერ, მათ შორის, ფარული თვალთვალის და მიყურადების შედეგად არის შექმნილი.
  • მასალა მოიცავს ჟურნალისტების, სამოქალაქო აქტივისტების, პოლიტიკოსების, სასულიერო პირებისა და დიპლომატების პირადი ცხოვრების ამსახველ დეტალებს.
  • მასალების უკანონოდ მოპოვების შესახებ მიმდინარე გამოძიების შედეგები საანგარიში წლის ბოლოსთვის არ დამდგარა.

სასამართლო პროცესები:

  • კრიტიკულად განწყობილი მედიის წარმომადგებლების პოლიტიკური სარჩულით დევნა კვლავ მწვავე პრობლემად დარჩა.
  • გაგრძელდა ოპოზიციურად განწყობილი სატელევიზიო არხის დირექტორისა და თანადამფუძნებლის სასამართლო პროცესი, რომელიც თანამდებობის ბოროტად გამოყენებისა და ქონების მითვისების დაუსაბუთებელი ბრალდების საფუძველზე დაიწყო.
  • გიორგი რურუა, რომელიც არხის მთავარი მეწილეა, პრეზიდენტმა აპრილში შეიწყალა და ამით, ის 2020 წელს დაკისრებული 4-წლიანი სასჯელისგან გათავისუფლდა.
კატეგორია: საერთაშორისო ამბები
რუსული დამოუკიდებელი მედიასაშუალება “ნოვაია გაზეტა” მუშაობას აჩერებს.

მიზეზი: რუსეთის კომუნიკაციების მარეგულირებლის კიდევ ერთი გაფრთხილებაა.

განცხადება: “როსკომნადზორისგან” კიდევ ერთი გაფრთხილება მივიღეთ. ამის შემდეგ ჩვენ ვაჩერებთ გაზეთის გამოცემას ვებგვერდზე, ქსელებსა და ქაღალდზე - “უკრაინის ტერიტორიაზე სპეცოპერაციის დასრულებამდე. პატივისცემით, “ნოვაია გაზეტას” რედაქტორები.”

რუსეთში “ფეიკების” შესახებ კანონების გამო არაერთი მედიასაშუალება დაიბლოკა ან დაიხურა. კანონით ისჯება რუსეთის უკრაინაში ომისთვის “ომის” დარქმევა და მას რუსეთის ხელისუფლება “სამხედრო სპეცოპერაციად” მოიხსენიებს.




“ნოვაია გაზეტას” რედაქტორს დმიტრი მურატოვს მშვიდობის დარგში ნობელის პრემია გასულ წელს გადასცეს.




  • "ნოვაია გაზეტა" კრემლისადმი კრიტიკულად განწყობილი მედიაა და მუქარის, ძალადობისა და მკვლელობების მიუხედავად გამოცემას და დამოუკიდებელ სარედაქციო პოლიტიკას მაინც აგრძელებს.
  • თუმცა, რუსეთის უკრაინაში შეჭრის შემდეგ რუსეთში მიღებული კანონმდებლობის გამო “ნოვაია გაზეტამ” გადარჩენის მიზნით ომის გაშუქება შეაჩერა.
  • გაზეთის დაფუძნებიდან დღემდე მისი 6 ჟურნალისტია მოკლული, მათ შორისაა ანნა პოლიტკოვსკაია. დმიტრი მურატოვს ნობელის პრემიის მინიჭება კრემლშიც მიულოცეს.
კატეგორია: საერთაშორისო ამბები
რუსეთის იუსტიციის სამინისტრომ გერმანული მაუწყებენლი “დოიჩე ველე” იმ მედიასაშუალებების სიას დაამატა, რომლებიც “უცხოელ აგენტებად” მიიჩნევიან.

მედიის “უცხოელ აგენტად” გამოცხადება ნიშნავს, რომ მედიასაშუალების გამოქვეყნებულ მასალებს თანდართული უნდა ჰქონდეს მითითება “უცხოელი აგენტობის” შესახებ.

გერმანული მედიასაშუალება 119-ე მედიაა, რომელიც რუსეთში “უცხოელ აგენტად” გამოცხადდა.

მანამდე, “დოიჩე ველეს” ვებგვერდი რუსეთის კომუნიკაციების მარეგულირებელმა ე.წ როსკომნადზორმა მარტის დასაწყისში დაბლოკა.
კატეგორია: საქართველო
ქარტია საზოგადოებრივი მაუწყებლის სამეურვეო საბჭოს მოუწოდებს, რომ შეისწავლოს სარედაქციო დამოუკიდებლობაში შესაძლო ჩარევის საკითხი და მიიღოს შესაბამისი ზომები.


28 მარტს საქართველოს ჟურნალისტური ეთიკის ქარტიამ საზოგადოებრივი მაუწყებლის პირველი არხის შენობასთან პრესკონფერენცია გამართა და მაუწყებლის სამეურვეო საბჭოს მიმართა.

ქარტია აცხადებს, რომ კატეგორიულად მიუღებელია ჟურნალისტთა სარედაქციო დამოუკიდებლობაში ჩარევა და ითხოვს, რომ გადაცემა „ახალი კვირის“ წამყვანისა და ჟურნალისტების განცხადების საფუძველზე, სამეურვეო საბჭომ დაიწყოს მოკვლევა და გაატაროს შესაბამისი ზომები.

ქარტიის განცხადებით, კრიტიკულად მნიშვნელოვანია ეს პროცრსი იყოს საჯარო და ყველა დაინტერესებულ პირს ჰქონდეს ჩართვის შესაძლებლობა.

25 მარტს პირველი არხის გადაცემა “ახალი კვირის” წამყვანმა, იმედა დარსალიამ დაასახელა კონკრეტული ორგანიზაციები და რესპონდენტები, რომლებიც, მისი თქმით, არხის მენეჯმენტმა ე.წ. შავ სიაში ჩასვა. ცენზურის მცდელობაზე საუბრობენ არხის ჟურნალისტები, სოფო ზედელაშვილი და თამთა ჯანაძეც.


ამ თემაზე ვრცლად: საზ.მაუს “შავი სია” და დაბლოკილი სიუჟეტები - ჟურნალისტები სახელებს ასაჯაროვებენ.


"პირველმა არხმა" მაუწყებელში ცენზურასა და “შავის სიების” არსებობაზე ბრალდებები 17 თებერვალს უარყო და მის წინააღმდეგ მიმდინარე მიზანმიმართული კამპანია უწოდა.
კატეგორია: საერთაშორისო ამბები
რუსეთის სამთავრობო ტელევიზიის პირველი არხის ყოფილ რედაქტორს - მარინა ოვსიანიკოვას, რომელიც პირდაპირ ეთერში ომის საწინააღმდეგო პლაკატით შეიჭრა, მოსკოვის სასამართლომ ახალი საქმე აღძრა. ინფორმაციას ნოვაია გაზეტა სასამართლოზე დაყრდნობით ავრცელებს.

რუსი სამხედროების „დისკრედიტაციის“ გამო, რუსეთის ფედერაციის ადმინისტრაციულ სამართალდარღვევათა კოდექსის 20.3.3. მუხლის მიხედვით, ოვსიანიკოვას 30 000-დან 50 000 რუბლამდე ჯარიმა ემუქრება

მარინა ოვსიანიკოვას საქმეზე სასამართლო სხდომა 14 აპრილს 15:30 საათზეა ჩანიშნული.

ვრცლად: მოკლედ: რას ამბობს „ფეიკების“ შესახებ ახალი რუსული კანონი?

კონტექსტი

  • პირველი არხის ყოფილი რედაქტორი 14 მარტს, რუსეთის სამთავრობო ტელევიზიის არხის მთავარი საინფორმაციო გამოშვება „ვრემიას“ პირდაპირ ეთერში, სტუდიაში ომის საწინააღმდეგო მოწოდებებით და ბანერით შეიჭრა - „შეაჩერეთ ომი. არ დაუჯეროთ პროპაგანდას. აქ თქვენ გატყუებენ".
  • მალევე, მან სოციალურ ქსელში გაავრცელა ვიდეო მიმართვა, სადაც რუსეთს აგრესორს უწოდებს, ომს უკრაინაში - კი დანაშაულს.
  • ოვსიანკოვა რუსეთის პოლიციამ მალევე დააკავა. იგი სასამართლომ დამნაშავედ ცნო რუსეთის ადმინისტრაციულ სამართალდარღვევათა კოდექსის მეორე ნაწილის მე-20.2 მუხლის მიხედვით. ეს საზოგადოებრივი წესრიგის დარღვევას არასანქცირებული შეკრების, მიტინგის ან დემონსტრაციის, მსვლელობის გამართვას ან პიკეტირებას გულისხმობს.
  • 15 მარტს მარინა ოვსიანიკოვა მოსკოვის სასამართლომ 30 000 რუბლით (280$-ით) დააჯარიმა.

ამავე თემაზე: რუსული სამთავრობო არხის რედაქტორი 280$-ით დააჯარიმეს
კატეგორია: საქართველო
საქართველოს საზოგადოებრივი მაუწყებლის “პირველი არხის” სამი ჟურნალისტი ცენზურისა და ე.წ შავი სიების დეტალებზე საუბრობს.

პირველ არხზე ამჟამად გაჩერებული გადაცემა “ახალი კვირის” ყოფილმა წამყვანმა იმედა დარსალიამ პრესკონფერენციაზე “ ერთი კონკრეტული ჟურნალისტისთვის გაკეთებული საერთაშორისო ექსპერტების “შავი სია” წაიკითხა”.

შავი სია- ანუ ის რესპონდენტები, რომელთა ჩაწერაც, დარსალიას თქმით, ჟურნალისტებს არხის მენეჯმენტის მხრიდან ეკრძალებოდათ.

  • რონდელის ფონდის ექსპერტების უმრავლესობა:
  • განსაკუთრებით ზურა ბატიაშვილი
  • ასევე ბუკა პეტრიაშვილი
  • თინა ხიდაშელი
  • ლაშა ბაქრაძე ისტორიულ სიუჟეტებზე, ძირითადად საბჭოთა კავშირის შესახებ გაკეთებულ სიუჟეტებზე.
  • ბოლო თვეებში დაბლოკილი იყო საერთაშორისო ურთიერთობათა სპეციალისტი ეკა აკობია
  • კავკასიოლოგი - ლევან ჯეჯელავა
  • ატლანტიკური საბჭოს ქართული წარმომადგენლობა - ბათუ ქუთელია ორჯერ ჩაწერა ჟურნალისტმა რუსულ პროპაგანდაზე და ორივეჯერ შენიშვნა მიიღო.

დაბლოკილი თემები - საერთაშორისო თემებზე მომუშავე კონკრეტულ ჟურნალისტს დაუბლოკეს:

  • საბჭოთა კავშირის სამხედრო დანაშაულზე სიუჟეტი, რასაც კონფლიქტი მოჰყვა გუნდში.
  • ბელარუსის აქციები - არხის მენეჯმენტს არ უნდოდა ლუკაშენკოს რეჟიმისადმი რეპორტაჟი კრიტიკული ყოფილიყო.
  • ჟურნალისტი გააფრთხილეს, რომ ეკრძალება რუსეთზე ცუდის დაწერა და პარალელი გაავლო ამერიკასთან - "როგორც ამერიკაზე არ უნდა დავწეროთ ცუდი, არ უნდა დავწეროთ ცუდი რუსეთზე, რადგან ჩვენი მაყურებლის გარკვეული ნაწილი პრორუსია".

იმედა დარსალია ამბობს, რომ 2 წლის განმავლობაში ანალიტიკურ გადაცემაში დაბლოკილი იყო პოლიტიკა, რაც დიდი ბრძოლების შემდეგ დაბრუნდა და ამ პროცესში მნიშვნელოვანი როლი შეასრულა არხის დირექტორმა თინათინ ბერძენიშვილმა.
  • “პოლიტიკა დააბრუნებინა გადაცემის ხელმძღვანელობას ეთერში, თუმცა პრობლემები ძალიან ცოტახნით მოგვარდა, ცენზურის მცდელობა და სარედაქციო პოლიტიკაში უხეში ჩარევები კვლავ გრძელდებოდაო”, - ამბობს დარსალია.

პოლიტიკის მიმართულების ჟურნალისტი თამთა ჯანაძე ცენზურის კონკრეტულ შემთხვევებზე:

  • მენეჯმენტი ცდილობდა სახელისუფლებო გუნდის, მმართველი პარტიის “ქართული ოცნების” წარმომადგენლების მიმართ კრიტიკული კომენტარები ან საერთოდ ამოეღო სიუჟეტიდან ან შეემოკლებინა.
  • უჭირდა კვირის მთავარ პოლიტიკურ მწვავე თემებზე მუშაობა, რადგან ეუბნებოდნენ, რომ კვირის განმავლობაში ეს თემები იმდენად “გადაიღეჭებოდა” მოამბეში, რომ საინტერესო აღარ იქნებოდა: ლუკა სირაძის, სარალიძის, უზენაესი სასამართლოს მოსამართლეების საქმეები, ოპოზიციის მიერ დაგეგმილი აქციების გაშუქება.

ჯანაძე ამბობს, რომ “არასასურველ” რესპონდენტებს მენეჯმენტის წინააღმდეგობის მიუხედავად მაინც წერდნენ, მაგრამ ეს ხანგრძლივ კონფლიქტებს ნიშნავდა მენეჯმენტთან.

  • მაგალითად, საპრეზიდენტო არჩევნების შემდეგ მომზადებული სიუჟეტი სალომე ზურაბიშვილის არჩევნებში გამარჯვებასა და მეორე ტურის თემაზე - “გადაცემაში გასვლამდე რამდენიმე წუთით ადრე გენერალური პროდიუსერი შემოვიდა სამონტაჟოში და ამოჭრა სახელისუფლებო გუნდის წარმომადგენლების მიმართ ექსპერტების კრიტიკული კომენტარები და ცესკოს მონაცემების მიხედვით გაკეთებული გრაფიკა, საიდანაც ირკვეოდა, რომ “ქართულმა ოცნებამ” 6 წლის განმავლობაში მხარდამჭერთა იგივე რაოდენობა დაკარგა, რაც “ნაციონალურმა მოძრაობამ” 9 წლის განმავლობაში”.
  • ოპოზიციის წარდგენილი ჩრდილოვანი კაბინეტის თემაზე სიუჟეტი უნდა გასულიყო, მაგრამ წინა დღით პროსდიუსერმა დაურეკა და უთხრა, რომ ქრონომეტრაჟის უკმარისობის გამო სიუჟეტი ეთერში ვერ გავიდოდა.
  • ერთ-ერთ სიუჟეტში, რომელშიც ექსპერტი ბექა კობახიძე ვალერი გელაშვილის ცემის ფაქტსა და კორცხელის ინციდენტს ერთმანეთს ადარებდა და ამბობდა, რომ ხელისუფლება შერჩევითი სამართლის მომხრეა და პროდიუსერი კატეგორიულად ითხოვდა ამ მონაკვეთის ამოღებას ან სინქრონის შემოკლებას.

“პირველი არხის” სამივე მოქმედი ჟურნალისტის უფლებებს „საერთაშორისო გამჭვირვალობა – საქართველო“ იცავს და მათი პროფესიული საქმიანობის განხორციელებაში შესაძლო ხელშეშლისა და დისკრიმინაციის დადგენის განაცხადით სახალხო დამცველს მიმართავს.
  • “ახალი კვირის” სოციალური მიმართულების ჟურნალისტი სოფო ზედელაშვილი ამბობს, რომ არხის მენეჯმენტმა თავიანთ საჯარო განცხადებებთან დაკავშირებით წერილობითი ახსნა-განმარტებები სთხოვა, რაც უკვე მიაწოდეს და იმედი აქვს, რომ შიდა მოკვლევა ჩატარდება.
  • “იმედი მაქვს, სამართლიანად გამოიკვლევენ ამ ყველაფერს და ის ადამიანები, ალბათ, პასუხს აგებენ სარედაქციო პოლიტიკაში უხეშ ჩარევაზე. ეს მნიშვნელოვანია იმიტომ, რომ სხვა დროს აღარ განმეორდეს ეს ფაქტი. “, - ამბობს იმედა დარსალია.

"პირველმა არხმა" მაუწყებელში ცენზურასა და “შავის სიების” არსებობაზე ბრალდებები 17 თებერვალს უარყო და მის წინააღმდეგ მიმდინარე მიზანმიმართული კამპანია უწოდა.

ამ თემაზე: დეტალები მოკლედ: რა ვიცით საზოგადოებრივი მაუწყებლის მიმართ გამოთქმულ ბრალდებებზე?
კატეგორია: საერთაშორისო ამბები
უკრაინაში რუსეთის შეჭრის და ომის დაწყების შემდეგ, პროფესიული საქმიანობის შესრულებისას, დადასტურებულად, 5 ჟურნალისტი დაიღუპა.

უკრაინის სახალხო დამცველის მიერ ჯერ კიდევ 15 მარტს გავრცელებული ინფორმაციით კი, ომში მინიმუმ 35 რეპორტიორი დაშავდა.


24.03 - უკრაინის ომის გაშუქებისას, დაბომბვისას, რუსი ჟურნალისტი ოკსანა ბაულინა დაიღუპა. 42 წლის ბაულინა ლატვიაში ბაზირებული დამოუკიდებელი საგამოძიებო ახალი ამბების მედიასაშუალება The Insider-ისთვის მუშაობდა. ის რუსეთის პოლიტიკასა და კორუფციის თემებს აშუქებდა.

21.03 - რუსმა ოკუპანტებმა უკრაინული მედიასაშუალება hromadske-ს ჟურნალისტი ვიქტორია როშჩინა 9-დღიანი ტყვეობიდან გაათავისუფლეს.

ამავე დღეს რუსულმა ძალებმა უკრაინის ქალაქ მელიტოპოლიდან მედიასაშუალება Melitopolskie Vedomosti ჟურნალისტები იულია ოლხოვსკა და ლიუბოვ ჩაიკა, გამოცემის მთავარი რედაქტორი იევგენია ბორიანი და ყოფილი გამომცემელი მიხაილო კუმოკი ტყვედ აიყვანეს და რამდენიმე საათში გაათავისუფლეს

altalt 
18.03 - Hromadske-ს თანამშრომლებმა განაცხადეს, რომ 12 მარტიდან ჟურნალისტი ვიქტორია როშჩინა გაუჩინარდა. ის ბოლოს სამხრეთ-აღმოსავლეთის ქალაქ ბერდიანსკში ნახეს. იყო ეჭვი, რომ ის რუსეთის არმიამ გაიტაცა. ჟურნალისტის სავარაუდო გატაცებასთან დაკავშირებით სისხლის სამართლის საქმე აღძრა უკრაინის გენერალურმა პროკურატურამ.

16.03 - Fox News-ის დაშავებული რეპორტიორი ბენჯამინ ჰოლი უკრაინიდან გაიყვანეს. ჰოლი 14 მარტს კიევთან ახლოს, ჰორენკაში დაიჭრა და მძიმე დაზიანებებით კიევის საავადმყოფოში მკურნალობდა

15.03 - დაიღუპნენ "ფოქს ნიუსის" ოპერატორი პიერ შაშევსკი და მასთან ერთად მყოფი უკრაინელი პროდიუსერი ალექსანდრა კუვშინოვა, რომლებსაც 14 მარტს ცეცხლი გაუხსნეს.

პიერ შაშევსკი ომის ფოტოგრაფი იყო, რომელიც "ფოქსისთვის" საერთაშორისო ამბებს ერაყიდან, ავღანეთიდან და სირიიდან აშუქებდა. შაშევსკი უკრაინაში თებერვლიდან იმყოფებოდა. 2021 წელს, ავღანეთის თალიბანის რეჟიმის დროს, მან დიდი როლი ითამაშა "ფოქსის" ადგილობრივი კორესპონდენტებისა და მათი ოჯახების ქვეყნიდან გამოყვანაში.

altalt
14.03 - ამერიკული ტელეარხის Fox News-ის გადამღებ ჯგუფს უკრაინის დედაქალაქ კიევთან ახლოს, ჰორენკაში ცეცხლი გაუხსნეს. სასიკვდილოდ დაიჭრა ოპერატორი პიერ ზაკრჟევსკი და უკრაინელი პროდიუსერი ალექსანდრა კუვშინოვა. ფეხში დაიჭრა და სერიოზული დაზიანებები მიიღო ბრიტანელმა ჟურნალისტმა ბენჯამინ ჰოლიმ.

13.03 - კიევის რეგიონში, ქალაქ ირპინში რუსმა სამხედროებმა ამერიკელი ჟურნალისტი და არაერთი ჯილდოს მფლობელი კინორეჟისორი - ბრენტ რენო მოკლეს და 2 რეპორტიორი დაჭრეს. მათგან ერთ-ერთი, ამერიკელ-კოლუმბიელი ჟურნალისტი ხუან არედონდო კიევის საავადმყოფოში გადაიყვანეს.

altalt
11.03 - რადიო თავისუფლების რეპორტიორი მარიან კუშნირი ბარიშივკაში, კიევთან ახლოს, სარაკეტო თავდასხმის დროს დაშავდა.

8.03 - რუსი ჯარისკაცები შეიჭრნენ ქალაქ ბერდიანსკის სატელევიზიო ანძაში, სადაც განთავსებულია რამდენიმე ადგილობრივი მედია, მათ შორის რადიოსადგური Novosti Berdiansk, გაზეთი Berdianskiye Vedomosti და ტელეარხი Youg TV. ჯარისკაცებმა 50-მდე ჟურნალისტი მძევლად ჰყავდათ აყვანილი ხუთ საათზე მეტი დროის განმავლობაში. RSF-ის წყაროს ინფორმაციით, კრემლის პროპაგანდაზე უარის თქმის გამო, ჟურნალისტებზე ფიზიკურად ძალადობდნენ

6.03 - უკრაინის სამხრეთით, კროპივენცკისა და მიკოლაევს შორის საგუშაგოს გავლის შემდეგ, შვეიცარიელ ფოტოგრაფ გიომ ბრიკეტს ცეცხლი გაუხსნეს. ის საქარე მინის შუშის ნამსხვრევებით სახესა და მკლავში დაიჭრა. რუსმა სამხედროებმა მას 3000 ევრო და აღჭურვილობა წაართვეს.

altalt
01.03 - კიევის სატელევიზიო ანძის დაბომბვის შედეგად Live TV-ის ოპერატორი ევგენი საკუნი დაიღუპა

26.02 - უკრაინის ქალაქ ოხტირკაში დანიური ტაბლოიდის, Ekstra-Bladet-ის რეპორტიორი სტეფან ვაიკერტი და ფოტოგრაფი ემილ ფილტენბორგ მიკკელსენი დაბომბილი საბავშვო ბაღის გადასაღებად ავტომობილით გადაადგილდებოდნენ. ჟურნალისტების ავტომობილს ცეცხლი გაუხსნეს, მიუხედავად იმისა, რომ ტყვიაგაუმტარი ჟილეტები ეცვათ, ორივე მათგანმა სერიოზული ჭრილობები მიიღო. ფოტოგრაფს სამი ტყვია ფეხებში, ჟურნალისტს კი ერთი ტყვია მხარში მოხვდა.

altalt

ძირითადი წყარო: რეპორტიორები საზღვრებს გარეშე
კატეგორია: საერთაშორისო ამბები
რუსეთის კომუნიკაციების მარეგულირებელმა ე.წ როსკომნადზორმა Google News დაბლოკა.

Google News კომპანია Alphabet-ის ( “გუგლის” მშობელი კომპანია) პროდუქტია, რომელიც მომხმარებლებს სხვადასხვა გამოცემის სტატიებს სთავაზობს. აპლიკაციის სახით ის “ანდროიდზე”, iOS-სა და ვებზეა ხელმისაწვდომი.

დაბლოკვის მიზეზი: მარეგულირებელი “გუგლ ნიუსს” უკრაინაში “სამხედრო ოპერაციის” შესახებ “ყალბ” მასალებზე წვდომის დაშვებას ედავება.

“როსკომნადზორმა” გადაწყვეტილება რუსეთის პროკურატურის თხოვნის საფუძველზე მიიღო.
  • "ამერიკული ონლაინ ახალი ამბების რესურსმა უზრუნველყო წვდომა არაერთ პუბლიკაციასა და მასალაზე, რომელიც არაავთენტურ და საჯაროდ მნიშვნელოვან ინფორმაციას შეიცავს უკრაინის ტერიტორიაზე მიმდინარე სამხედრო სპეც.ოპერაციის შესახებ”, - აცხადებს რუსეთის მარეგულირებელი.
რუსეთში არაერთი მედიასაშუალება და სოციალური ქსელი დაიბლოკა. ძირითად შემთხვევებში ამის საფუძვლად ხელისუფლება ე.წ ფეიკების კანონებს იყენებს.


Google-ის პოზიცია: კომპანიამ დაადასტურა, რომ რუსეთში მომხმარებლებს Google News-ის აპლიკაციასა და ვებგვერდზე წვდომასთან დაკავშირებით პრობლემები აქვთ, თუმცა ამის მიზეზი მათი მხრიდან ტენიკური პრობლემა არაა.
  • “ ბევრი ვიშრომეთ, რათა საინფორმაციო სერვისები, როგორიცაა “ნიუსი”, რაც შეიძლება დიდხანს ყოფილიყო ხელმისაწვდომი რუსეთში მცხოვრები ხალხისთვის” - ამბობს “გუგლის” წარმომადგენელი.
ამ თემაზე: რუსეთის მარეგულირებელი დამოუკიდებელ მედიასაშუალებებს ბლოკავს

რუსეთმა Meta “ექსტრემისტულ ორგანიზაციად” გამოაცხადა
კატეგორია: რესურსები
უკრაინის ჟურნალისტური ეთიკის ქარტია აქვეყნებს წერილს, სადაც უკრაინული მედია ორგანიზაციები, რეპორტიორები, ფოტოგრაფები და მენეჯერები მიმართავენ კოლეგებს, სწორად გააშუქონ რუსეთის ომი უკრაინაში.

მთავარი მოწოდება:

უკრაინელი ჟურნალისტები კოლეგებს რუსული დეზინფორმაციული კამპანიის შესახებ აფრთხილებენ და ომის გაშუქების დროს სწორი ტერმინოლოგიის გამოყენებისკენ მოუწოდებენ.
  • “უკრაინის მედია საზოგადოების ჟურნალისტებსა და ორგანიზაციებს, რომლებიც 2014 წლიდან რუსულ საინფორმაციო ომს ვებრძვით, გვინდა გამოვყოთ შემდეგი პუნქტები ამ ომის აღსაწერი ენის გამოყენებასთან დაკავშირებით. ზოგიერთი მათგანი შესაძლოა აშკარა არ იყოს, მაგრამ ჩვენთვის და ომის ჭეშმარიტად გადმოსაცემად სასიცოცხლოდ მნიშვნელოვანია. ვთხოვთ მედია ორგანიზაციებს, გაუზიარონ ეს თავიანთ ნიუსრუმებსა და აუდიტორიას.”

კონფლიქტი თუ ომი?

  • შეცდომაა ისეთი ტერმინების გამოყენება, როგორებიცაა: „კრიზისი“, „კონფლიქტი“, „სამხედრო ოპერაცია“, ე.ი მისთვის “უკრაინულის” დარქმევა მაგალითად: „უკრაინის კრიზისი“ ან „უკრაინის კონფლიქტი“.
  • ეს უკრაინაში სრულმასშტაბიანი შეჭრა და უკრაინის წინააღმდეგ ომია.
  • სწორად მიუთითეთ ომში რუსეთის როლი ამ ფორმულირებით „რუსეთის ომი უკრაინაში“ ან/და „რუსეთის შეჭრა უკრაინაში“, განსაკუთრებით ტიტრებში, სათაურებში,ლიდებსა და ჰეშთეგებში.

პუტინის თუ რუსეთის ომი?

  • გადაჭარბებულად არ გამოიყენოთ ფრაზა „პუტინის ომი“. მიუხედავად იმისა, რომ იმის დაჯერების ცდუნება არსებობს, რომ ეს ომი მხოლოდ რუსეთის პრეზიდენტის გამო დაიწყო.
  • სხვადასხვა ორგანიზაციის გამოკითხვებით (Savanta ComRes, VCIOM, კვლევითი პროექტი "უნდათ თუ არა რუსებს ომი?"), რომ რუსების ჩუმი უმრავლესობა - დაახლოებით 60% - მხარს უჭერს ომს.
  • ომის პირველ კვირას რუსეთში პუტინისადმი საზოგადოების მხარდაჭერა 60-დან 71%-მდე გაიზარდა. რუსი ჯარისკაცები ისვრიან რაკეტებს და ბომბებს და წინასწარ განზრახვით ხოცავენ მშვიდობიან მოქალაქეებს. ბევრ რუსს არ აქვს წვდომა ფაქტებთან და დამოუკიდებელ მედიასთან, მაგრამ ეს მათ პასუხისმგებლობას არ არიდებს.

სეპატარისტები თუ რუსეთი?

  • რუსეთის სამხედრო აგრესიის ასახსნელად ბევრს მოჰყავს 2014 წელს ჩატარებული ფსევდორეფერენდუმები უკრაინის ყირიმსა და დონეცკისა და ლუგანსკის ოლქებში, როგორც რუსული სამხედრო აგრესიის ახსნა. ეს შეცდომაში შემყვანია.
  • ყირიმის ტერიტორიები, დონეცკისა და ლუგანსკის ოლქების ნაწილები რუსეთის ძალების მიერ 2014 წელს ანექსირებული და ოკუპირებულია.
  • რუსეთის მიერ ყირიმის ანექსია საერთაშორისო სამართლის ცალსახად დარღვევით მოხდა.
  • დონბასში ომი რუსეთის სახელმწიფოს მხარდაჭერილი და ორკესტრირებული იყო. ფსევდორეფერენდუმებსა და მარიონეტულ რესპუბლიკებს არ აღიარებს საერთაშორისო საზოგადება.

ექსპერტები, ორისია ლუცევიჩი, ენდრიუ უილსონი, ნიკოლაი მიტროხინი და სხვები, ხაზს უსვამენ, რომ არც დონეცკსა და ლუგანსკში მარიონეტული „რესპუბლიკების“ შექმნა და არც ომი რუსეთის ჩარევის გარეშე არ მოხდებოდა.

მიმდინარე ესკალაცია აჩვენებს რუსეთის სურვილს აკონტროლოს მთელი უკრაინა და ამ „რესპუბლიკებს“ იყენებს სრულმასშტაბიანი შეჭრის პლატფორმად და პროპაგანდისა და დეზინფორმაციის ინსტრუმენტად.

ამასთანავე, დონბასში კვაზი "რესპუბლიკები" არ არიან კონფლიქტის კიდევ ერთი შეიარაღებული მხარე. ისინი უკრაინაში მოქმედებენ, როგორც რუსული არმიისა და დაქირავებული მებრძოლების ნაწილი.
  • აქედან გამომდინარე, არასწორია ისეთი ტერმინების გამოყენება, როგორიცაა „სეპარატისტთა კონტროლირებადი ტერიტორიები“. გამოიყენეთ ფრაზები, „რუსეთის მარიონეტები”, “რუსეთის მიერ მართული ჯგუფები".

“თანაბარი პოზიციები?”

  • კიდევ ერთი გავრცელებული შეცდომაა უკრაინის და რუსეთის პოზიციების მოხსენება, როგორც ორ თანაბარ მხარედ მოხსენიება.
  • რუსეთის პოზიციები ეფუძნება ტყუილებს, პროპაგანდასა და უკრაინის, როგორც ერისა და სახელმწიფოს არსებობის უარყოფას.
  • რუსული პროპაგანდა უბრალოდ „სტრატეგიული კომუნიკაცია“ ან განსახვავებული თვალსაზრისი არ არის, ის დეზინფორმაციას იყენებს ათასობით მშვიდობიანი მოქალაქის მკვლელობის გასამართლებლად და სრულიად არაპროვოცირებული ომის გასაგრძელებლად.

“ომი რუსეთსა და დასავლეთს შორის?”

ნარატივი, რომელიც ომს, რუსეთსა და დასავლეთს შორის ომად ახასიათებს, უარყოფს უკრაინის წარმომადგენლობას - რასაც ნათლად წარმოაჩენს უკრაინელი ხალხის წინააღმდეგობა რუსეთის შეჭრისადმი.

  • ნატო არის ალიანსი, რომელიც დაფუძნებულია სუვერენული ქვეყნების კოლექტიური თავდაცვის უფლებაზე, რაც გათვალისწინებულია გაეროს წესდების 51-ე მუხლში.
  • „გაფართოებაზე“ ყურადღების გამახვილებით მედია აგრძელებს კრემლის ომის გამართლებას და უგულებელყოფს უკრაინელი ხალხის დემოკრატიულ ხმას, რომელთაც სურთ იცხოვრონ მშვიდობიანად, რუსული აგრესიისგან თავისუფლად.

ექსპერტების შერჩევა

ეცადეთ, გაშუქებისას დაუკავშირდეთ და მოუსმინოთ უკრაინელ ექსპერტებს.

  • საერთაშორისო ექსპერტების უმრავლესობა სპეციალიზირებულია რუსეთის ან აღმოსავლეთ ევროპის საკითხებში.
  • გთხოვთ, ომის შესახებ გამოქვეყნებულ ჟურნალისტურ მასალებში გყავდეთ უკრაინელი ექსპერტები ან ისინი, ვისაც უცხოვრია და უმუშავია უკრაინაში.

უკრაინელი ჟურნალისტების ღია წერილი სრულად წაიკითხეთ აქ.
კატეგორია: საქართველო
ქართველმა ჰაკერებმა სატელევიზიო არხის “პოსტვის” ვებგვერდი დაჰაკეს. ამ დროისთვის www.postv.media გათიშულია.

ჰაკერთა ჯგუფმა “ტვიტერზე” “პოსტვის” დაჰაკული ვებგვერდის ფოტო გამოაქვეყნა წარწერით: “მესიჯი GNG-დან: დიდება უკრაინას! ეძებე სიმართლე, ის ფაქტებამდე მიგიყვანს”

alt

მანამდე კი “ტვიტერზე”წერდნენ,, რომ არხის ვებგვერდზე შეტევას იწყებდნენ.

alt
კატეგორია: საერთაშორისო ამბები
უკრაინის ომის გაშუქებისას დაბომბვის შედეგად რუსი ჟურნალისტი ოკსანა ბაულინა დაიღუპა. ის მედიის მეხუთე წარმომადგენელია, რომელიც რუსეთის მიერ უკრაინაში დაწყებულ ომს ემსხვერპლა.

რა მოხდა?

42 წლის ოკსანა ბაულინა ლატვიაში ბაზირებული დამოუკიდებელი საგამოძიებო ახალი ამბების მედიასაშუალება The Insider-ისთვის მუშაობდა. 23 მარტს კიევის დაბომბილ პოდილსკის რაიონს იღებდა, რა დროსაც რუსეთის ძალებმა ადგილი კიდევ ერთხელ დაბომბეს.

თავდასხმის დროს ადგილზე დაიღუპა ერთი მშვიდობიანი მოქალაქეც. დაიჭრა ბაულინას თანმხლები ორი ადამიანი - ისინი საავადმყოფოში გადაიყვანეს.

ვინ იყო ოკსანა ბაულინა?

ოკსანა ბაულინა The Insider-ისთვის უკრაინაში მუშაობდა. ის რუსეთის პოლიტიკასა და კორუფციის თემებს აშუქებდა.

მანამდე, ის რუსი ოპოზიციონერის ალექსეი ნავალნის ანტიკოროფციული ფონდისთვის, პროდიუსერად მუშაობდა. მან არხი Navalny LIVE შექმნა. ის, დროებით რუსმა სამართალდამცველებმა დააკავეს ნავალნის შტაბში შეჭრისას. ბაულინას რუსეთის დატოვება მას შემდეგ მოუწია, რაც 2021 წლის ივნისში ნავალნის ორგანიზაცია მოსკოვმა “ექსტრემისტულად” გამოაცხადა.

ბაულინა ასევე მუშაობდა რუსეთიდან დევნილი ოლიგარქის მიხაილ ხოდორკოვსკის ორგანიზაცია „ღია რუსეთისთვის", ასევე თანამშრომლობდა “რადიო თავისუფლებასა” და „მედიაზონასთან”. 2017 წელს “რადიო თავისუფლებამ” ბაულინას შესახებ დოკუმენტური ფილმი გამოაქვეყნა.



პოლიტიკით დაინტერესებამდე ოკსანა ბაულინა ჟუნრალ Time Out Moscow-სა და In Style-ისა და Glamour-ისთვის მუშაობდა.

  • "საოცრად მამაცი რუსი ჟურნალისტი, რომელიც საკუთარი ქვეყნის არმიამ კიევის პოდოლის რაიონში სამოქალაქო დასახლებების დაბომბვისას მოკლა. ის დაბომბვებისგან მიყენებული ზიანის გაშუქების დროს დაიღუპა”,- წერს “ტვიტერზე” საგამოძიებო ჟურნალისტური ჯგუფის Bellingcat-ის რეპორტიორი კრისტო გროზევი.
ოკსანა ბაულინამ ომის დროს რამდენიმე სიუჟეტის მოზადება მოახერხა ლვოვიდან და კიევიდან.

უკრაინაში ომის გაშუების დროს დაიღუპნენ:

კატეგორია: საერთაშორისო ამბები
რუსმა სამხედროება უკრანაში Radio France-ისთვის მომუშავე “ფიქსერი” 9 დღის განმავლობაში აწამეს. ორგანიზაცია “რეპორტიორები საღვრებს გარეშე” (RSF) წერს, რომ მას ელექტროშოკით აწამებდნენ, რკინის ფილებით სცემდნენ და აშიმშილებდნენ.

ორგანიზაცია ამ ინფორმაციას სისხლს სამართლის საერთაშორისო სასამართლოს მთავარ პროკურორს გადასცემს.

რა მოხდა?

RSF-მა უსაფრთხოების მიზნით 32 წლის უკრაინელ ფიქსერს სახელი შეუცვალა და თავის განცხადებაში მას ”ნიკიტად” მოიხსენიებს.

ნიკიტა იურისტი და მენეჯერია, თუმცა 2013 წლიდან, როგორც ფიქსერი, ეხმარება სხვადასხვა საერთაშორისო მედიას, უკრაინაში მუშაობის დროს. მას უთანამშრომლია ისეთ უცხოურ მედიებთან, როგორებიცაა France 2, BFMTV და RFI.

მეტი მათ შესახებ: ფიქსერები - ჟურნალისტები, უსახელოდ

RSF-ის ცნობით, ნიკიტა რუსმა სამხედროებმა უკარინის ცენტრალური ნაწილიდან აიყვანეს და 9 დღის განმავლობაში ჰყავდათ დატყვევებული. მოგვიანებით, მასთან ერთად დაატყვევეს კიდევ სამი ადამიანი.

ნიკიტას ამბავი მოიცავს:
  • მისი ავტომობილის ჩაცხრილვას
  • დანითა და ელექტროშოკით წამებას
  • სახისა და სხეულის არეში მეტალის ფილებით და თოფის კონდახებით მუდმივ ცემას
  • სიკვდილით დასჯის ინსცენირებასა
  • 48-საათიან შიმშილობას.

“რეპორტიორებმა საზღვრებს გარეშე” ნიკიტას ძებნა 8 მარტს, მას შემდეგ დაიწყო, რაც Radio France-ისგან მისი გაუჩინარების შესახებ შეიტყო. ორგანიზაცია ნიკიტას მისი გათავისუფლების შემდეგ ლვოვში გახსნილი “პრესის თავისუფლების ცენტრის” საშუალებით დაუკავშირდა.

RSF-მა გამოკითხა ნიკიტას ოჯახის წევრები, მასთან ერთად მყოფი ერთ-ერთი ტყვე და Radio France-ის ორი ჟურნალისტი. ნიკიტას სამედიცინო ექსპერტიზის დროს თან ახლდნენ RSF-ის თანამშრომლებიც. სამედიცინო შემოწმებამ დაადასტურა უკრაინელი ფიქსერისადმი არასათანადო ფიზიკური მოპყრობა.

რას ჰყვება უკრაინელი ფიქსერი? (გაფრთხილება: შეიცავს მძიმე დეტალებს)

5 მარტს ნიკიტა Radio France-ის ჯგუფთან ერთად უკრაინის ცენტრალურ ნაწილში ერთ-ერთ სასტუმროში იმყოფებოდა. ის იმ სოფელთან ახლოს იყო, სადაც ნიკიტას ოჯახის წევრები აფარებდნენ თავს.

ნიკიტამ შეიტყო, რომ სოფლისკენ მიმავალი გზა გახსნილი იყო. რადგან რეგიონში ინტენსიურად იბომბებოდა, გადაწყვიტა ცოტახნით სოფელში გამგზავრებულიყო, რათა გაერკვია ოჯახის მდგომარეობა და ისინი ადგილიდან გაეყვანა.

ნიკიტამ უცხოელი რეპორტიორების ავტომობილი ითხოვა, მათი აღჭურვილობა ამოალაგა და დანიშნულების ადგილისკენ დაიძრა. მას სამი სოფელი უნდა გაევლო.

  • ნიკიტას, რომელიც პრესის ნიშინიანი ავტომობილით გადაადგილდებოდა ტყის პირას გზაზე რუსეთის სადაზვერვო ქვედანაყოფი დაესხა თავს. მის მანქანას დაახლოებით 30-40-ჯერ ესროლეს.
  • ფიქსერი თავის დაღწევას შეეცადა, თუმცა ხეს შეეჯახა, ის უსაფრთხოების ბალიშმა გადაარჩინა. კაცმა ყვირილი დაიწყო, რომ მშვიდობიანი მოქალაქე იყო, ხელები ასწია, რათა სამხედროები დაერწმუნებინა, რომ შეუიარაღებელი იყო და ავტომობილიდან გადავიდა.
  • ექვსმა სამხედრომ ნიკიტა დაიჭირა, მიწაზე დააგდო, გაჩხრიკა და ფიზიკურად გაუსწორდა. უკრაინელი ყვიროდა, რომ მშვიდობიანი მოქალაქე იყო, თუმცა, როგორც ჩანს, რუსები ფიქრობდნენ, რომ ნიკიტა სამხედრო მზვერავი იყო.
  • რუსმა სამხედროებმა ნიკიტას თვალები აუკრეს და რამდენიმე წუთის სავალ გზაზე ერთ-ერთ სახლში მიიყვანეს. რუსებმა მისი მობილურის დათვალიერებით შეიტყვეს ნიკიტას სამსახურის შესახებ ინფორმაცია - რომ ის ტყვიაგაუმტარ ჟილეტებს ეძებდა და მარშრუტებს გეგმავდა, რაზეც დაეჭვდნენ.
  • ნიკიტა გარეთ გაიყვაანეს, კედელს მიანარცხეს და სახესთან დანის პირის მიტანით დაჭრით დაემუქრნენ. მან სამხედროებს უთხრა, რომ უცხოელი ჟურნალისტების ფიქსერი და თარჯიმანი იყო, თუმცა რუსებმა სახესა და სხეულზე კონდახები ურტყეს.
  • შემდეგ ფიქსერი თხრილში მკვდარ ძაღლთან ჩააგდეს და მისი მოკვლის სცენა გაითამაშეს - ერთმა სამხედრომ თავი მოაჩვენა, თითქოს თავისი იარაღის გამართულობის შემოწმება სურდა და გაისროლა.
  • შემდეგ ნიკიტა სამხედროებმა 10 წუთის სავალ გზაზე, ტყეში თავიანთ ბანაკში წაიყვანეს, მას თვალები კვლავ აკრული ჰქონდა და ვერ ხედავდა, თუმცა ფიქრობს, რომ ადგილზე 100-მდე ჯარისკაცი იქნებოდა ჯავშანტექნიკითა და არტილერიით.
  • სამხედროებმა ის ხეზე მიაბეს, მოიპარეს მისი ქორწინების ბეჭედი და გახადეს ფეხსაცმელები. იმ საღამოს რუსებმა ნიკიტა კვლავ კონდახებითა და ლითონის ფილებით სცემეს ფეხებში. უკრაინელმა ფიქსერმა გონება რამდენჯერმე დაკარგა.
  • თვალებაკრული ნიკიტა ამის შემდეგ კიდევ ორ ხეზე მიაბეს. მან ასეთ თითქმის სამი დღე გაატარა ტყეში. 6 მარტს კი ის, სავარაუდოდ, პოლკოვნიკმა დაკითხა თავისი საქმიანობის შესახებ.
  • მომდევნო 2 დღე ნიკიტამ ტყეში დაბმულმა გაატარა. აღარ სცემდნენ. მის გვერდით დააბეს სხვა მოქალაქეებიც.
  • 8 მარტს ნიკიტა და კიდევ ორი ტყვე მანქანით დაახლოებით 40 წუთის სავალზე გადაიყვანეს. მისვლისას სამხედროებმა ნიკიტა ავტომობილიდან გადმოსვეს, მიწაზე დააგდეს, მის ზურგზე სამხედრო დაჯდა და იგივე შეკითხვები დაუსვა, რასაც ტყეში ეკითხებოდნენ. სამხედროები ფიქრობდნენ, რომ ნიკიტა ჯაშუში იყო და ამის დასაფარად ფიქსერის სამუშაოს იყენებდა.
  • ერთმა სამხედრომ შარვლის მარჯვენა ტოტი მუხლამდე აუწია, მეორემ კი ელექტროშოკი გამოიყენა. მიწეზე სახედადებული ნიკიტა ვერ ხედავდა რა ინსტრუმენტს იყენებდნენ ელექტრო დარტყმებისთვის, თუმცა 5-10 წამიანი ოთხი შოკი დაითვალა. აწამეს დანარჩენი ორი მოქალაქეც.
  • სამხედროებმა ნიკიტას რუსეთის არმიისა და უკრაინაში შეჭრის მხარდამჭერი წერილის დაწერა და ხელმოწერა აიძულეს.
  • თვალებაკრული ნიკიტა და ორი მოქალაქე სახლის სარდაფში გადაიყვანეს, რომლის იატაკიც წყლით იყო სავსე. სარდაფში ისინი 2 დღეს დატოვეს მანამ, სანამ ტყვეები მცველებს ნაკლებად ცივ ადგილას გადაყვანას არ შეეხვეწნენ.
  • 10 მარტს ტყვეები სხვა სახლის სარდაფში გადაიყვანეს, სადაც მათ კიდევ ერთი ტყვე, უკრაინელი ყოფილი საჯარო მოხელე შეუერთდა. იმ სახლში ოთხივე მათგანი სხვადასხვა სამხედრომ დაჰკითხა. ნიკიტას მხოლოდ მათი ფეხებისა და ფეხსაცმელების დანახვა შეეძლო, თუმცა ეს საკმარისი იყო იმის მისახვედრად, რომ ისინი საბრძოლო შეანაერთებიდან არ იყვნენ. სუფთა ფეხსაცმელები და დაუთოებული შარვლები მიანიშნებდა, რომ ისინი შესაძლოა რუსეთის უსაფრთხოების ფედერალური სამსახურის (FSB) ან რუსეთის სამხედრო დაზვერვის (GRU) წევრები ყოფილიყვნენ.
  • 12 მარტს ტყვეებს უთხრეს, რომ მომდევნო დღეს გაათავისუფლებდნენ. შესაბამისად, 13 მარტს ნიკიტა ერთსაათიანი მგზავრობის შემდეგ ტყეში გაუშვეს. უკრანელი ფიქსერი ფიქრობდა, რომ მოკლავდნენ და გაიქცა. თუმცა სროლის ხმა არ გაუგია და გზამდე გავიდა.
  • ნიკიტა გზაზე სხვა რუსმა სამხედროებმა გააჩერეს, მას ეგონა, რომ კიდევ ერთხელ გაიტაცებდნენ, თუმცა უკრაინელი მოქალაქეების ავტომობილში მოხვედრა მოახერხა. “თუ არ წაიყვანთ, აქვე ვესვრით”- ასე მიმართა უკრაინელ მოქალაქეებს რუსმა სამხედრომ.

ნიკიტას მთელს სხეულზე აქვს ჩალურჯებები, შეშუპებული აქვს ფეხი, ელექტროშოკის შედეგად უჭირს ხელების მოძრაობა. ექიმმა მის თავსა და ტანზე ჰემატომები ნახა. ფიქსერს ა დალურჯებული აქვს კიდურები. იმის გათვალისწინებით, რომ მას დაზიანებები რუსეთის არმიამ მიაყენა, ექიმმა დაასკვნა, რომ მან “კრიმინალური ტრავმა” მიიღო. უკრაინელი ფიქსერი ახლა გამოჯანმრთელების პროცესს გადის. მისმა ოჯახმა გაქცევა მოახერხა.

RSF ნიკიტას შესახებ ინფორმაციას სისხლის სამართლის საერთაშორისო სასამართლოს მთავარ პროკურორს აქამდე წარდგენილი ორი საჩივრის დამატებად გაუგზავნის.
  • „ნიკიტამ შემზარავი ჩვენება მოგვცა, რომელიც ადასტურებს რუსეთის არმიის მიერ ჟურნალისტების წინააღმდეგ ჩადენილი ომის დანაშაულების სიმძიმეს. მისი ჩვენების სისხლის სამართლის საერთაშორისო სასამართლოს პროკურორისთვის გადაცემა ყველაზე ცოტაა, რაც შეგვიძლია გავაკეთოთ ამ მამაცი ახალგაზრდა ფიქსერისთვის”, - ამბობს RSF-ის გენერალური მდივანი კრისტოფ დელუა.

ნიკიტასთან ერთად დატყვევებულებიდან: ერთი მოქალაქე მძიმე დაზიანებებით საავადმყოფოშია. უცნობია ყოფილი საჯარო მოხელის ბედი, მესამე მოქალაქე კი ამბობს, რომ რუსი სამხედორებისგან თავის დაღწევა ბევრი დაზიანების გარეშე შეძლო. როცა RSF-მა ჰკითხა, მისი აზრით, რატომ გაათავისუფლეს, მათი მოკვლის ნაცვლად, უკრაინელმა მოქალაქემ უპასუხა, რომ “არამგონია, გამბედაობა ჰქონოდათ საფლავების გათხრისთვისო”.
კატეგორია: საერთაშორისო ამბები
რუსეთის მიერ უკრაინაში ომის დაწყების გამო პროტესტის ნიშნად რუსეთის სამთავრობო “პირველი არხი” დატოვა ტელეწამყვანმა და კორესპონდენტმა ჟანნა აგალაკოვამ.

რა მოხდა?

ჟანნა აგალაკოვა რუსეთის სახელმწიფო ტელევიზიაში, “პირველ არხზე” 20 წელიწადზე მეტ ხანს მუშაობდა. ის ბოლო წლებში არხის კორესპონდენტი იყო ნიუ-იორკსა და პარიზში.

აგალაკოვამ არხის დატოვების შესახებ პარიზში ორგანიზაციის, “რეპორტიორები საზღვრებს გარეშე”, პრესკონფერენციაზე ისაუბრა. მანამდე კი “ინსტაგრამზე” გამოაქვეყნა ვიდეო, რომელშიც სიმბოლურად რუსეთის “პირველი არხის” ლოგოიან სამაჯურს მაკრატლით ჭრის.

არხიდან წასვლის მიზეზები:

რუსი ჟურნალისტი ჟანნა აგალაკოვა ამბობს, რომ:

  • აღარ შეეძლო რუსეთის სახელმწიფო ტელევიზიის ტყუილებსა და მანიპულაციებში მონაწილეობა.
  • ის კარიერის განმავლობაში ბევრს “კომპრომისზე” წავიდა, მაგრამ უკრაინაში რუსეთის შეჭრა “წითელი ხაზი” იყო.
  • ის ყოყმანობდა საჯაროდ საუბარზე, მაგრამ სხვა არჩევანი არ ჰქონდა.
  • “ვფიქრობდი, რომ პარიზში მოვლენების გაშუქებით თავს ავარიდებდი პროპაგანდისტობას. მე არ მომიტყუებია. ყველა ფაქტი [რასაც ვაშუქებდი] რეალური იყო, მაგრამ აიღეთ ფაქტები, არიეთ ერთმანეთში და დიდ ტყუილს მიიღებთ"
  • “მინდა რუსეთმა მომისმინოს, ადამიანებმა ისწავლონ პროპაგანდის ცნობა, მინდა, ეძებონ ინფორმაციის ალტერნატიული წყაროები და აღარ იყვნენ დაზომბებულები”
  • “ვიცი, რუსეთში ჯაშუშობაში დამადანაშაულებენ, იტყვიან, რომ ბევრს მიხდიან ამის თქმისთვის. არავინ მიხდის, მე არავისთვის ვმუშაობ, უბრალოდ ჩემს ქვეყანას ვემსახურები.”

რუსმა ჟურნალისტმა სახელმწიფო მედია პროპაგანდის გავრცელებაში ამხილა. მედია გააკრიტიკა რუსეთის ოპონენტების მუდმივად “ნაცისტებად” მოხსენიების გამოც.

  • “როცა რუსეთში სიტყვა “ნაცისტი” გვესმის, ჩვენი ერთადერთი რეაქციაა - განადგურება. ეს [მედიის ნარატივი] მანიპულაცია და დიდი ტყუილია.”
  • “რუსეთში მთავრობა ახშობს დამოუკიდებელ მედიას და ვრჩებით სიტუაციაში, როცა მედიაში მხოლოდ ერთ - მთავრობის, ერთ ადამიანის ნარატივს ვხედავთ, ჩვენი ახალი ამბები რეალობას არ აჩვენებს.”
  • “ეს პარადოქსია. ჩვენ მხოლოდ ქვეყნის პირველ პირს ვხედავთ, რა შეჭამა, ვის ჩამოართვა ხელი, წელს ზემოთ შიშველიც კი ვნახეთ, მაგრამ არ ვიცით ის დაქორწინებულია თუ არა, ჰყავს თუ არა შვილები. ეს უცნაური დისბალანსია”

“ვითარების მძევლებად” - მოიხსენიებს აგალაკოვა იმ კოლეგებს, რომლებიც რუსეთში სამთავრობო მედიაში მუშაობენ.
  • "ბევრი ადამიანი, ვინც მედიაში მუშაობს ჩემსავით ფიქრობს, მარტივია მათი დადანაშაულება, ჰკითხოთ რატომ არ ტოვებენ სამსახურს, რატომ არ აპროტესტებენ, მაგრამ ვინც [სახელმწიფო მედიაში] რჩება, მათ ოჯახები, მოხუცი მშობლები, ბავშვები ჰყავთ და გადასახადები აქვთ. ისინი ვითარების მძევლები არიან”, - ამბობს რუსი ჟურნალისტი.

ჟანნა აგალაკოვამ სამსახურიდან წასვლის წერილი 3 მარტს დაწერა. ის პირველი არაა, ვინც რუსეთის უკრაინაში შეჭრის შემდეგ რუსული სამთავრობო არხი დატოვა.

“პირველ არხზე” პირდაპირ ეთერში პროტესტის შემდეგ სამსახური დატოვა რედაქტორმა მარინა ოვსიანიკოვამ.

ჯერ ქვეყნიდან წავიდა და შემდეგ კრემლის პროპაგანდისტული არხი НТВ დატოვა ტელეწამყვანმა ლილია გილდეევამ. ამავე არხის დატოვების გადაწყვეტილება მიიღო ბრიუსელის კორესპონდენტმა ვადიმ გულკსერმაც.
კატეგორია: საერთაშორისო ამბები
21 მარტს რუსმა ოკუპანტებმა უკრაინული მედიასაშუალება hromadske-ს ჟურნალისტი ვიკტორია როშჩინა ტყვეობიდან გაათავისუფლეს.

დეტალები

21 მარტს სოციალურ ქსელში გავრცელდა ვიდეო, რომელშიც 12 მარტს გაუჩინარებული უკრაინელი ჟურნალისტი უარყოფს, რომ ის რუსეთის სამსახურებმა დაატყვევეს და ამბობს, რომ პირიქით, მათ მისი სიცოცხლე იხსნეს.

როგორც ვიკტორია როშჩინას დამსაქმებელი მედიასაშუალება hromadske იუწყება, ჟურნალისტს ვიდეო რუსეთის უშიშროების ძალებმა ზეწოლით ჩააწერინეს და სწორედ ამ ვიდეოს პირობით გაათავისუფლეს.
  • “ვიკტორია დაკავებისა და ტყვეობის შესახებ სიმართლეს ახლო მომავალში თავად მოჰყვება”, - წერს გამოცემა.

კონტექსტი

ვიკტორია როშჩინა უკრაინის აღმოსავლეთ და სამხრეთ ცხელი წერტილებიდან ვიდეომასალებსა და სტატიებზე მუშაობდა.
  • ჟურნალისტი რუსულმა ძალებმა, სავარაუდოდ, დროებით ოკუპირებულ ქალაქ ბერდიანსკში აიყვანეს.
  • მის გათავისუფლებას აშშ-ის საელჩო უკრაინაში, ევროკავშირი და არასამთავრობო ორგანიზაციები ითხოვდნენ.

ვიკტორია როშჩინას გაუჩინარების დეტალები წაიკითხეთ აქ.
კატეგორია: საერთაშორისო ამბები
რუსეთის სახელმწიფო დუმამ მეორე და მესამე მოსმენით მიიღო კანონპროექტი, რომლითაც დასჯადი ხდება “ყალბი” ინფორმაციის გავრცელება რუსეთის სამთავრობო უწყებების საგარეო საქმიანობასთან დაკავშირებით.

დეტალები

კანონპროექტი, რომელსაც მხარი 340-მა დეპუტატმა 3-ის წინააღმდეგ დაუჭირა (თავი შეიკავა 59-მა), ისეთივეა, როგორიც აქამდე მიღებული კანონი რუსეთის შეაიარაღებულ ძალების შესახებ “ყალბი” ინფორმაციის გავრცელებაზე.

პასუხისმგებლობა “ყალბი ინფორმაციის გავრცელებისთვის” ისეთ სახელმწიფო უწყებებზე, როგორებიცაა საელჩოები, პროკურატურა, რუსეთის გვარდია, საგანგებო სიტუაციების სამინისტრო და სხვა დეპარტამენტები, 15 წლამდე პატიმრობას ითვალისწინებს.
  • “ყალბი ინფორმაციის მიზანმიმართულად გავრცელება, რომელიც მოიცავს მონაცემებს რუსეთის სახელმწიფო ორგანოების მიერ მათი უფლებამოსილების განხორციელების შესახებ ქვეყნის ტერიტორიის გარეთ რუსეთის ფედერაციის, მისი მოქალაქეების ინტერესების დასაცავად, ასევე საერთაშორისო მშვიდობისა და უსაფრთხოების შესანარჩუნებლად” - დაისჯება ჯარიმით 700 ათასი - 1.5 მილიონი რუბლამდე ან სამ წლამდე პატიმრობით.
  • იგივე ქმედება სამსახური მდგომარეობის გამოყენებით, ჯგუფურად, “ბრალდების მტკიცებულებათა ხელოვნური შექმნით”, “მოტივიებული პოლიტიკური, იდეოლოგიური, რასობრივი, ეროვნული ან რელიგიური სიძულვილით ან მტრობით“ - დაისჯება ჯარმით 3 მილიონიდან -5 მილიონ რუბლამდე ან 5-დან 10 წლამდე პატიმრობით.
  • მძიმე შედეგების შემთხვევაში - სასჯელი 10-დან 15 წლამდე თავისუფლების აღკვეთა იქნება.
  • “ნოვაია გაზეტას” ინფორმაციით, ასევე, კანონი ითვალისწინებს პასუხისმგებლობას რუსეთის ფედერაციის სახელმწიფო ორგანოების „დისკრედიტაციისთვის“, რაც გამოიწვევს - ჯარიმას 300 ათას რუბლამდე ან თავისუფლების აღკვეთას 5 წლამდე.
რუსეთში ასეთივე კანონი, ოღონდ, რუსული არმიის შესახებ 4 მარტს მიიღეს. ომის შესახებ კრემლის ნარატივის საწინააღმდეგო ინფორმაციის გავრცელების შემთხვევაში, შესაძლოა მოქალაქე 15 წლით დააპატიმრონ. მოკლედ: რას ამბობს „ფეიკების“ შესახებ ახალი რუსული კანონი?
კატეგორია: საერთაშორისო ამბები
ნობელის პრემიის ლაურეატი რუსი ჟურნალისტი დმიტრი მურატოვი უკრაინელი ლტოლვილების დასახმარებლად პრემიის მედალს გაყიდის.

დეტალები

“ნოვაია გაზეტას” მთავარი რედაქტორი დმიტრი მურატოვი აუქციონის სახლებს მოუწოდებს მისი ცნობილი ჯილდო გასაყიდად გაიტანონ.

“ იმისთვის, რომ ლტოლვილებს, დაჭრილებს და ბავშვებს, რომლებსაც გადაუდებელი მკურნალობა ესაჭიროებათ გაუზიარო ის, რაც შენთვის ძვირფასია და სხვებისთვის ღირებულია. მე და “ნოვაია გაზეტამ” გადავწყვიტეთ 2021 წლის ნობელის პრემიის მედალი “უკრაინელ ლტოლვილთა ფონდს” გადავცეთ.” - წერს მურატოვი.

რუსი რედაქტორი ამბობს, რომ დაუყოვნებლივ:

  • უნდა შეწყდეს ცეცხლი
  • გაიცვალონ პატომრები
  • გადასცენ დაღუპულთა ცხედრები
  • უზრუნველყონ ჰუმანიტარული კორიდორები და დახმარება
  • მხარი დაუჭირონ ლტოლვილებს
დმიტრი მურატოვი სიტყვის თავისუფლებას თავისი საქმიანობით რუსეთში ათწლეულებია იცავს. ის დამოუკიდებელი გაზეთის "ნოვაია გაზეტას" ერთ-ერთი დამფუძნებელია და მის რედაქტორად 1995 წლიდან მუშაობს.
  • "ნოვაია გაზეტა" კრემლისადმი კრიტიკულად განწყობილი მედიაა და მუქარის, ძალადობისა და მკვლელობების მიუხედავად გამოცემას და დამოუკიდებელ სარედაქციო პოლიტიკას მაინც აგრძელებს.
  • თუმცა, რუსეთის უკრაინაში შეჭრის შემდეგ რუსეთში მიღებული კანონმდებლობის გამო “ნოვაია გაზეტამ” გადარჩენის მიზნით ომის გაშუქება შეაჩერა.
  • გაზეთის დაფუძნებიდან დღემდე მისი 6 ჟურნალისტია მოკლული, მათ შორისაა ანნა პოლიტკოვსკაია. დმიტრი მურატოვს ნობელის პრემიის მინიჭება კრემლშიც მიულოცეს.
დმიტრი მურატოვს მშვიდობის დარგში ნობელის პრემია გასულ წელს ფილიპინელ ჟურნალისტ მარია რესასთან ერთად გადასცეს.
კატეგორია: საერთაშორისო ამბები
რუსეთის საგამოძიებო კომიტეტმა უკრაინელი ჟურნალისტის დმიტრი გორდონის წინააღმდეგ სისხლის სამართლის საქმე აღძრა.

რა მოხდა?

რუსეთის საგამოძიებო კომიტეტი უკრაინელ ჟურნალისტ დმიტრი გორდონს “ომის დაწყების შესახებ საჯარო მოწოდებების, ეროვნული ნიშნით სიძულვილის გაღვივებასა და რუსეთის შეიარაღებული ძალების ქმედებების შესახებ ყალბი ინფორმაციის გავრცელებაში” ედავება.

რუსეთის საგამოძიებო დეპარტამენტი ამბობს:
  • “გორდონმა უკრაინული ტელევიზიის პირდაპირ ეთერში მოუწოდა რუსეთის ფედერაციაზე შეიარაღებული თავდასხმისა და ბირთვული იარაღის გამოყენებით მის წინააღმდეგ აგრესიული ომის გაჩაღებისკენ.”
  • “გორდონმა განზრახ გაავრცელა ყალბი ინფორმაცია რუსეთის მიერ სამოქალაქო ინფრასტრუქტურისა და მშვიდობიანი მოქალაქეების დაბომბვის შესახებ. “
რუსული საგამოძიებო უწყება ამბობს, რომ უკრაინულ მედიას ჟურნალისტიკის საბაზისო პრინციპები და კანონის ნორმები “დაავიწყდა” და ექსტრემისტული მოწოდებების პლატფორმად იქცა. რაც რუსული მხარის განმარტებით, აჩვენებს “უკრაინული ნაციონალიზმის არსს, რაც უფრო და უფრო რადიკალურ ფორმას იღებს”.

რუსეთის საგამოძიებო კომიტეტი შესაბამის ზომებს მიმართავს, რათა დმიტრი გორდონი ძებნილთა სიაში დაამატონ.

გორდონის პასუხი

ჟურნალისტი მის მიმართ სისხლის სამართლის საქმის აღძვრას ვიდეო მიმართვით გამოეხმაურა.

“ჩემთვის დიდი პატივი და ბედნიერებაა, რუსეთის ფედერაციისგან ახლა სისხლის სამართლის საქმის მიღება. ეს ნიშნავს, რომ მე პატიოსნად ვასრულებ ჩემს სამოქალაქო და ადამიანურ მოვალეობას”, - ამბობს უკრაინელი ჟურნალისტი.

დმიტრი გორდონი ამბობს:
  • პუტინის ჯარები განაგრძობენ უკრაინის ქალაქების დაბომბვას და მშვიდობიანი მოქალაქეების, მატ შორის ბავშვების, ქალებისა და პენსიონერების დახოცვას.
  • გორდონი ამბობს, რომ არავის ემალება, არავის ეშინია და კიევში საკუთარ სახლშია.
  • ის ფიქრობს, რომ მის წინააღმდეგ სისხლის სამართლის საქმის აღძვრის ბრძანება პესონალურად ვლადიმერ პუტინმა გასცა.
  • “ვერც უკრაინას და ვერც მე დამაშინებ. პუტინო, მე არ ვარ დამნაშავე, ნაცისტი დამნაშავე შენ ხარ და შენ წარსდგები ახალ ტრიბუნალზე იმავე ადგილას, სადაც ნაცისტები ისხდნენ”, - ამბობს დმიტრი გორდონი.
დმიტრი გორდონი უკრაინელი მწერალი, ჟურნალისტი და ტელეწამყვანია. ის გადაცემის "სტუმრად დიმიტრი გორდონთან" წამყვანი, გაზეთ "გორდონის ბულვარის" მთავარი რედაქტორი და ონლაინ გამოცემა "GORDON"-ის დამფუძნებელია.

რუსეთის საგამოძიებო კომიტეტს სისხლის სამართლის საქმე კიდევ რამდენიმე უკრაინელი ჟურნალისტის მიმართ აქვს აღძრული.
კატეგორია: საერთაშორისო ამბები
რუსეთის საოკუპაციო ძალებმა ქალაქ მელიტოპოლიდან გატაცებული 4 უკრაინელი ჟურნალისტი გაათავისუფლეს. ინფორმაციას უკრაინის ჟურნალისტთა ეროვნული კავშირი ავრცელებს.

რა მოხდა?

21 მარტის დილით, რუსულმა ძალებმა უკრაინის ქალაქ მელიტოპოლიდან მედიასაშუალება Melitopolskie Vedomosti-სთან დაკავშირებული პირები გაიტაცეს.

ჟურნალისტთა კავშირის ინფორმაციით, შეიარაღებული პირები ჟურნალისტების, იულია ოლხოვსკასა და ლიუბოვ ჩაიკას, გამოცემის მთავარი რედაქტორის იევგენია ბორიანისა და ყოფილი გამომცემელის მიხაილო კუმოკის სახლებში მივიდნენ. ზოგიერთ მათგანს ჩამოართვეს კომპიუტერები და ავტომობილით უცნობი მიმართულებით წაიყვანეს.
  • უცნობმა პირებმა გაიტაცეს მიხაილ კუმოკის ცოლი და შვილიც.
  • ჟურნალისტები და მათი ოჯახის წევრები რამდენიმე საათის შემდეგ გაათავისუფლეს.
  • ჟურნალისტთა კავშირის ცნობით, გამტაცებლებს მედიის წაარმომადგენლებთან “პრევენციული საუბარი” ჰქონდათ და თანამშრომლობა შესთავაზეს.
  • Melitopolskie Vedomosti ჰოლდინგის გენერალური დირექტორი ანნა მედვიდი ამბობს, რომ ადგილობრივი ხელისუფლების პრორუსმა წარმომადგენლებმა ერთი კვირის წინ სალაპარაკოდ დაიბარეს და თანამშრომლობა შესთავაზეს. ისინი რედაქციის ოფისში შეხვდნენ, სადაც ოკუპანტები თვითნებურად შევიდნენ და ადგილი გაჩხრიკეს. რედაქცია მათთან თანამშრომლობას არ დათანხმდა.
  • მედვიდის თქმით, გატაცების მიზანი იყო ჟურნალისტები ეიძულებინათ მხარი დაეჭირათ უკრაინაში რუსეთის შეჭრისთვის.

ომის დროს გაუჩინარებული ჟურნალისტი

10 დღეა გაუჩინარებულია უკრაინული მედიასაშუალების, hromadske-ის ჟურნალისტი ვიკტორია როშჩინა. გამოცემის ინფორმაციით, ის რუსმა ოკუპანტებმა დაატყვევეს.
ვრცლად ამ თემაზე: უკრაინაში ჟურნალისტი გაუჩინარდა
 
კატეგორია: საერთაშორისო ამბები
მოსკოვის სასამართლომ “ექსტრემისტულ ორგანიაციად” გამოაცხადა კომპანია “მეტა” (ყოფილი ფეისბუკი). შედეგად, რუსეთში აიკრძალა “ფეისბუქი” და “ინსტაგრამი”.

რა მოხდა?

რუსული დამოუკიდებელი მედიასაშუალების, “ნოვაია გაზეტას” ინფორმაციით:
  • სასამართლოში “მეტას” წარმომადგელებმა სხდომის გადადება ითხოვეს, რათა დამატებითი დრო ჰქონოდათ თავიანთი პოზიციისთვის მოსამზადებლად, რაც მოსამართლემ არ დააკმაყოფილა.
  • “მეტას” ადვოკატი ამბობს, რომ მოსკოვის სასამართლოს ამ საქმეზე გადაწყვეტილების უფლებამოსილება არ აქვს, რადგან კომპანია უცხოეთშია რეგისტრირებული და ქვეყანაში წარმომადგენელი არ ჰყავს.
  • რუსეთის გენერალური პროკურატურა ირწმუნებოდა, რომ სოციალურ ქსელებში “ფეისბუქსა” და “ინსტაგრამზე” ექსტრემისტული მასალები იყო გამოქვეყნებული. მაგალითად, 2016 წელს “ინსტაგრამზე” გამოქვეყნებული ადლოფ ჰიტლერის ფოტოები.
  • პროკურატორა ასევე ირწმუნებოდა, რომ “მეტამ” გამოაქვეყნა მოწოდებები “მასობრივ არაკოორდინირებულ ქმედებებში მონაწილეობისა და რუსეთის მოქალაქეების მიმართ ძალადობის, მათ შორის უკრაინაში გაგზავნილი სამხედროების მიმართ”.
  • სასამართლოს გადაწყვეტილებით, საქმიანობა აეკრძალება “ფეისბუქსა” და “ინსტაგრამს”, თუმცა არა “მეტას” კიდევ ერთ კუთვნილ ქსელს “ვოტსაპს”. ჯერჯერობით უცნობია, როგორ განაგრძობს “ვოტსაპი” მუშაობას.
  • პროკურორის განმარტებით “პირები პასუხს არ აგებენ მხოლოდ იმ ფაქტის გამო, რომ ისინი “მეტას” მომსახურებით სარგებლობენ”, ასევე მეტას აეკრძალება ფილიალების გახსნისა და კომერციული საქმიანობის უფლება.
რუსეთის პროკურორის მოთხოვნებს მხარი დაუჭირეს რუსეთის კომუნიკაციების მარეგულირებელმა “როსკომნადზორმა” და რუსეთის ფედერალური უშიშროების სამსახურმა.

“მეტას” ადვოკატმა სასამართლოში განაცხადა, რომ კომპანია ექსტრემისტულ საქმიანობას არ ეწევა და რუსოფობიის წინააღმდეგ დგას.

კონტექსტი

  • რუსეთს აქამდე “ფეისბუქი” უკვე დაბოლკილი ჰქონდა, რადგან პლატფორმამ შეზღუდა წვდომა რუსულ სამთავრობო მედიაზე.
  • “ინსტაგრამის” დაბლოკვა კი “მეტას” მიერ უკრაინის ომის კონტექსტში რუსეთის პრეზიდენტისა და ჯარის მიმართ ძალადობრივი მოწოდებების შესახებ პოლიტიკის ცვლილებას მოჰყვა.
  • “მეტამ” 10 მარტს სიძულვილის ენის აკრძალვის პოლიტიკაში ცვლილებები შეიტანა, რომლის მიხედვითაც დროებით რამდენიმე ქვეყანაში, მათ შორის სქართველოში, “ფეისბუქსა” და “ინსტაგრამზე” უკრაინაში ომის კონტექსტში რუსეთის ლიდერებისა და სამხედროების წინააღმდეგ ძალადობისკენ მოწოდების შემცველ პოსტებს არ წაშლიდა.
  • რუსეთში “ექსტრემისტულად” ასამდე ორგანიზაციაა გამოცხადებული, მათ შორის რელიგიური, უფლებადამცველი, პოლიტიკური და სხვა ორგანოზაციები. რუსეთში ექსტრემისტულ ორგანიზაციადაა გამოცხადებული რუსი ოპოზიციონერის ალექსეი ნავალნის ანტიკორუფციული ფონდიც.
“მეტას” სასამართლოს ბოლო გადაწყვეტილების შესახებ კომენტარი არ გაუკეთებია.

რუსეთი უკრაინაში შეჭრასა და ომს “სპეციალურ სამხედრო ოპერაციას” უწოდებს. “ომზე ყალბი ინფორმაციის გავრცელების შესახებ კანონის გამო რუსეთში დაიბლოკა ან დაიხურა თითქმის ყველა დამოუკიდებელი მედიასაშუალება. რთულდება “ტვიტერის” გამოყენება”, რუსეთში მიღებული კანონის გამო რუსეთის ტერიტორიიდან ახალი კონტენტის ატვირთვა შეზღუდულია “ტიკტოკზეც”. ქვეყანაში კვლავ ხელმისაწვდომია “იუთუბი” და “ტელეგრამი”.
კატეგორია: საერთაშორისო ამბები
რუსეთის უკრაინაში ომის გაშუქების დროს უკრაინული მედიასაშუალების, hromadske-ის ჟურნალისტი ვიკტორია როშჩინა გაუჩინარდა. გამოცემა ამბობს, რომ ჟურნალისტი რუსმა ოკუპანტებმა დაატყვევეს.

რა მოხდა?

ვიკტორია როშჩინასა და მის დამსაქმებელ მედია ორგანიზაციას შორის კავშირი 12 მარტს გაწყდა. მედიასაშუალების ინფორმაციით:
  • ომის დღეებში ვიკტორია როშჩინა უკრაინის აღმოსავლეთ და სამხრეთ ცხელი წერტილებიდან ვიდეომასალებსა და სტატიებზე მუშაობდა.
  • 11 მარტს hromadske-მ მისი სტატია გამოაქვეყნა დროებით ოკუპირებული ქალაქის ენერგოდარის ცხოვრების შესახებ.
  • როშჩინა მასალებს ამზადებდა ზაპოროჟიესა და დონეცკის რეგიონებში სამხედრო ოპერაციების შესახებ, ის ქალაქ მარიუპოლში წასვლასა და იქ არსებული ვითარების გაშუქებას გეგმავდა.
  • 11 მარტის საღამოს როშჩინა, სავარაუდოდ, ზაპოროჟიედან მარიუპოლში მიემგზავრებოდა. ტელეფონზე ცუდი კავშირი ჰქონდა და, ფაქტობრივად, შეუძლებელი იყო მასთან საუბარი. მხოლოდ ის იყო ცნობილი, რომ იმ დროისთვის ენერგოდარი უკვე დატოვა.
  • 12 მარტს რედაქცია ვიკტორია როსშჩინას ვერ დაუკავშირდა. მოწმის ინფორმაციით, რომელსაც უსაფრთხოების მიზნით არ ასახელებენ, ჟურნალისტი დროებით ოკუპირებულ ქალაქ ბერდიანსკში იმყოფებოდა.
  • 16 მარტს რედაქციამ შეიტყო, რომ წინა დღით ვიკტორია როშჩინა რუსეთის უშიშროების ფედერალურმა სამსახურმა დაატყვევა. მისი ადგილსამყოფელის შესახებ ინფორმაცია ამ დრომდე უცნობია.
hromadske იუწყება, რომ რამდენიმე დღის განმავლობაში ყველანაირად ეცადნენ ჟურნალისტის გათავისუფლებას, ამბის გახმაურების გარეშე, თუმცა უშედეგოდ.

ჟურნალისტის, სავარაუდო, გატაცებასთან დაკავშირებით სისხლის სამართლის საქმე აღძრა უკრაინის გენერალურმა პროკურატურამ. უწყება მომხდარში რუსულ მხარეს ადანაშაულებს.

გათავისუფლების მოწოდებები

  • ვიკტორია როშჩინას გაუჩინარებას გამოეხმაურა “რეპორტიორები საზღვრებს გარეშე”. ორგანიზაცია ჟურნალისტის ადგილსამყოფელისა და პირობების შესახებ ინფორმაციის გასაჯაროებისა და მისი დაუყოვნებლივ გათავისუფლების მოწოდებით გამოდის.
  • როსჩინას გათავისუფლებისკენ მოუწოდა რუსეთს ამერიკის შეერთებული შტატების საელჩომ უკრაინაში.
  • რუსული საოკუპაციო ძალების მიერ უკრაინელი ჟურნალისტების, აქტივისტების, საჯარო მოხეელეებისა და მოქალაქეების გატაცებები დაგმო ევროკავშირმა.

ჟურნალისტების გატაცება უკრაინის ომში

20 მარტს გაათავისუფლეს უკრაინული გაზეთის Novyi Den-ის რედაქტორი ოლეგ ბატურინი. ჟურნალისტი 8 დღით მას შემდეგ გაუჩინარდა, რაც ქალაქ კახოვკაში, თავის სახლთან ახლოს “20 წუთით” გავიდა.

  • “ჟურნალისტთა დაცვის კომიტეტის” ინფორმაციით, ბატურინის გათავისუფლების შესახებ “ფეისბუქზე” მისმა დამ ოლგა პერეპელიციამ დაწერა. მას არ დაუსახელებია ჟურნალისტის გამტაცებლების ვინაობა, თუმცა დაწერა, რომ ბატურინს დამამცირებლად ეპყრობოდნენ და მოკვლით ემუქრებოდნენ. მისივე ინფორმაციით, გამტაცებლებს სურდათ ეჩვენებინათ, რა მოუვა ყველა ჟურნალისტს.
კატეგორია: საერთაშორისო ამბები
რუსეთის სამთავრობო ტელევიზიის პირველი არხის ეთერში ომის საწინააღმდეგო მოწოდებებით შეჭრის შემდეგ, რუსმა რედაქტორმა მარინა ოვსიანიკოვამ პირველი სატელევიზიო ინტერვიუ 17 მარტს, CNN-ს მისცა.

რუსი რედაქტორი ესაუბრა სააგენტო Reuters-სა და France 24-ს, სადაც თავისი პროტესტის შესახებ მეტი დეტალი მოჰყვა.

მოკლედ: ოვსიანიკოვა “პირველ არხს” ტოვებს. მან უარი განაცხადა საფრანგეთის მიერ პოლიტიკური თავშესაფრის შეთავაზებაზე, რადგან “პატრიოტია და სამშობლოში დარჩენა სურს”.

CNN-თან ინტერვიუს მთავარი აქცენტები:

რედაქტორი “სი ენ ენის” ეთერში მეგობრის სახლიდან ჩაერთო. ის ამბობს, რომ არ ეშინია, მაგრამ დიდ პასუხისმგებლობას გრძნობს და მისი ცხოვრება მნიშვნელოვნად შეიცვალა.

მარინა ოვსიანიკოვა ამბობს:
  •  ჯერ კოლეგებთან არ უსაბრია, თუმცა ინტერნეტიდან შეიტყო, რომ ზოგიერთმა კოლეგამ სახელმწიფო ტელევიზიები დატოვა.
  •  იმედი აქვს, რომ სისხლის სამართლის პასუხისმგებლობა არ დაეკისრება.
  • პირდაპირი ეთერის დროს სტუდიაში შესვლა სპონტანურად გადაწყვიტა.
  • ბოლო პერიოდში უფრო და უფრო გრძნობდა შინაგან წინააღმდეგობას საკუთარ რწმენასა და იმას შორის, თუ რას ამბობდა პირველი არხი ეთერში.
  • ყოველწლიურად იზრდებოდა უკმაყოფილების გრძნობა იზრდებოდა და შემობრუნების წერტილად ომი იქცა. შეუძლებელი იყო სიჩუმის შენარჩუნება. რამე უნდა გაეკეთებინა ან უფრო გართულდებოდა რაიმეს გაკეთება.




როგორ შეაღწია სტუდიაში?

  • “ბოლო წუთამდე მეშინოდა, რომ ვერ შევძლებდი და ამას არ ექნებოდა ის ეფექტი, რასაც ველოდი. პირველ არხის ნიუსრუმი დიდი, ღია სივრცეა, ვგეგმავდი უკან დადგომას, მაგრამ მივხვდი, რომ არ გამოვჩნდებოდი, რეჟისორები სწრაფად შეცვლიდნენ კადრს და მე დამაკავებდნენ.”, - ჰყვება ოვსიანიკოვა.
  • დაავკირდა სივრცეს და წინასწარ მოიფიქრა, როგორ დაეორგანიზებინა ეთერში შეჭრა სწორად.
  • ბოლო წუთს გადავწყვიტა, რომ სტუდიის წინ მდგომ დაცვას უნდა გასცდენოდა და ტელეწამყვანის უკან დამდგარიყო.

რუსი ხალხის განწყობა და პროტესტის მიზანი

მარინა ოვსიანიკოვა ამბობს, რომ ნახევარი რუსეთი მხარს უჭერს ომს და სახელმწიფო, პროპაგანდისტულ ტელევიზიას უყურებს, ნახევარი კი ომის წინააღმდეგია.
  • “მინდოდა მსოფლიოსთვის მეჩვენებინა, რომ რუსების უმრავლესობა ომს ეწინააღმდეგება და, მაშინაც კი, თუ ისინი კრემლის პოლიტიკას მხარს უჭერენ, ისინი შინაგანად პაციფისტები არიან და სძულთ ომი. რუსეთში ყველა შეშინებულია იმის გამო, რაც ხდება, ყველა დაბნეულია. ჩვენი ცხოვრება ერთ ღამეში შეიცვალა.”

ოვსიანიკოვა ამბობს, რომ კარგად ესმის უკრაინელი ლტოლვილების, „რადგან საკუთარ თავზე აქვს გამოცდილი ომი ჩეჩნეთში“.
  • ის რუსი სამხედროების გამოც, რადგან “ისინი ძალიან ახალგაზრდა ბიჭები არიან, ვფიქრობ, ნამდვილად, არ ესმით რატომ ომობენ”
  • არ იცის რა მოხდება ან რა ნაბიჯებს გადადგამს. ამ მომენტისთვის მისი შვილები უსაფრთხოდ არიან, შიშობს მათ გამო, მაგრამ იმედი აქვს, რომ კარგად იქნებიან.
  • “აბსოლუტურად არ ვგრძნობ თავს გმირად, ძალიან მინდა ვიგრძნო, რომ ეს მსხვერპლი ამაო არ იყო და ხალხი თვალებს გაახლეს” - უთხრა Reuters-ს ოვსიანკოვამ.
კატეგორია: საქართველო
17 მარტს ღამით, თბილისსა და ზუგდიდში ჟურნალისტებს თავს დაესხნენ. პროფესიული საქმიანობის შესრულებაში ხელი “ფორმულასა” და “მთავარის” გადამღებ ჯგუფებს ორ განსხვავებულ ადგილას, განსხვავებულ თემებზე მუშაობის დროს შეუშალეს. ორივე შემთხვევაზე დაწყებულია გამოძიება.

რა მოხდა?

“ფორმულას” - ჟურნალისტს ნანო ჩაკვეტაძეს, ოპერატორსა და მის ასისტენტს თბილისში, აბაშიძის ქუჩაზე ერთ-ერთ ბარში ინტერვიუს ჩაწერის დროს მოქალაქე დაესხა თავს. ნაცემია ორი ოპერატორი. ფიზიკური დაზიანებები აქვს ჟურნალისტსაც. დაზიანებულია აპარატურა.

მომხდარის დეტალები:
  • გადამღები ჯგუფი გადაცემა “დროებისთვის” უკრაინაში რუსეთის შეჭრის შემდეგ საქართველოში რუსი მოქალაქეების ჩამოსვლის თემაზე ბარში წინასწარ შეთანხმებულ ინტერვიუს წერდა. რესპონდენტი რუსეთის მოქალაქე იყო.
  • ბარში შესვლისთანავე ჟურნალისტებს ადგილზე მყოფმა პირმა ჰკითხა რომელი ტელევიზიიდან იყვნენ და რას აკეთებდნენ.
  • მოქალაქე მას შემდეგ გაღიზიანდა, რაც გაიგო, რომ ჯგუფი “ფორმულადან” იყო. ინტერვიუს ჩაწერის პროცესში ჟურნალისტის მიმართ ჰქონდა რეპლიკები. ამბობდა, რომ არ მოსწონდა “ფორმულა” და ის, თუ როგორ აშუქებს ტელევიზია ამბებს.
  • მოქალაქემ გინება დაიწყო რესპოდნეტის მიმართაც, თუმცა მას ფიზიკურად არ შეხებია.
  • მოქალაქემ ფიზიკური და სიტყვიერი შეურაცხყოფა მიაყენა გადამღები ჯგუფის სამივე წევრს.
  • ჟურნალისტმა ჯერ პროდიუსერებს შეატყობინა მომხდარის შესახებ, შემდეგ კი პოლიციაში დარეკა.
  • როდესაც პირველმა გადამღებმა ჯგუფმა ბარი დატოვა, ადგილზე “ფორმულას” კიდევ ერთი ჯგუფი მივიდა. აგრესიულმა პირმა ჩაწერის დროს მათ სიტყვიერი შეურაცხყოფა მიაყენა და არხის მიკროფონი გადაადო.



პოლიციამ თავდამსხმელი ღამითვე დააკავა. სამართალდამცავებმა უკვე გამოკითხეს “ფორმულას თანამშრომლები.
  • “ ჩვენი პოზიცია, გამოძიებამ აბსოლუტურად გაიზიარა: რომ თუ დღეს ვინმეს რომელიმე არხის საქმიანობა არ მოსწონს, ლეგიტიმურად მიიჩნევს, ხელი შეუშალოს მას, იძალადოს და ა.შ.”, - თქვა ჟურნალისტმა ნანო ჩაკვეტაძემ ფორმულას ეთერში.

გამოძიება: ჟურნალისტურ საქმიანობაში უკანონოდ ხელის შეშლის ფაქტზე, საქართველოს სისხლის სამართლის კოდექსის 154-ე მუხლის მეორე ნაწილით დაიწყო.
  • სპეციალური საგამოძიებო სამსახური აცხადებს, რომ ყველა საჭირო მოქმედებას შემჭიდროვებულ ვადებში ჩაატარებს დამნაშავე პირის დადგენისა და მის მიმართ კანონით გათვალისწინებული ზომების მიღების მიზნით.
  • ძალადობრივ ქმედებასთან დაკავშირებით სამედიცინო ექსპერტიზა “ფორმულას” გადამღები ჯგუფის სამივე წევრს დღეს ჩაუტარდება.

“მთავარი არხის” - ჟურნალისტს ემა გოგოხიასა და მის ოპერატორს ზუგდიდში, ძალადობრივი ჯგუფის “ალტ-ინფოს” პარტიის ოფისთან დაესხნენ თავს. ემა გოგოხია ჰყვება, რომ:
  • ჟურნალისტები ქალაქის მერიის დაქვემდებარებაში მყოფი აიპის თანამშრომლების მიერ “ალტ-ინფოს” ოფისის შენობაზე უკრაინის მხარდამჭერი წარწერების წაშლას იღებდნენ. ჟურნალისტი ცდილობდა ოფისის ერთ-ერთი წარმომადგენლის ჩაწერას.
  • გადაღების დროს ოფისთან რამდენიმე ერთდროულად გაჩერდა და იქიდან გადმოსული “კასტეტებით” შეიარაღებული პირები მათ თავს დაესხნენ.
  • ოპერატორს დაახლოებით 8 კაცი სცემდა. იძალადეს ჟურნალისტზეც.
  • ძალადობის ამ ფაქტს საპატრულო პოლიცია შორიდან უყურებდა, პოლიციის ეკიპაჟი მხოლოდ მას შემდეგ ჩაერთო, რაც ხმაური მოქალაქეებმა გაიგეს და შველას შეეცადნენ.
  • ადგილზე მოსულმა პოლიციამ დააკავა რამდენიმე ადამიანი, მაგრამ არა ყველა.
  •  თავდამსხმელები ერთმანეთს მიუთითებდნენ აპარატურის დამტვრევისკენ. ცდილობდნენ კამერის გატაცებას.


გამოძიება - ჟურნალისტურ საქმიანობაში უკანონოდ ხელის შეშლის ფაქტზე, საქართველოს სისხლის სამართლის კოდექსის 154-ე მუხლის მეორე ნაწილით დაიწყო. სპეციალური საგამოძიებო სამსახური აცხადებს, რომ შემჭიდროვებულ ვადებში ჩაატარებს ყველა საჭირო საგამოძიებო და საპროცესო მოქმედებას.

კოალიცია „მედიის ადვოკატირებისთვის” მიიჩნევს, რომ „მთავარი არხის” გადამღებ ჯგუფზე თავდასხმა მედიისთვის შექმნილი მტრული გარემოს შედეგია და წახალისებულია ჟურნალისტების წინააღმდეგ ჩადენილ არაერთ დანაშულზე არასათანადო რეაგირებით.
კატეგორია: საერთაშორისო ამბები
Fox News-ის დაშავებული რეპორტიორი ბენჯამინ ჰოლი უკრაინიდან გაიყვანეს.

დეტალები

"ფოქს ნიუსის" ინფორმაციით, ბენჯამინ ჰოლი უსაფრთხოდაა, კარგ განწყობაზეა და მკურნალობას განაგრძობს.

კონტექსტი

  • 14 მარტს კიევთან ახლოს, ჰორენკაში ცეცხლი გაუხსნეს ავტომობილს, რომელშიც "ფოქს ნიუსის" რეპორტიორთან ერთად ამავე არხის ოპერატორი პიერ შაშევსკი და მათთან ერთად მომუშავე უკრაინელი ჟურნალისტი პროდიუსერის ალექსანდრა (საშა) კუვშინოვა იყვნენ. ორივე მათგანი დაიღუპა.
  • მძიმედ დაშავდა ბენჯამინ ჰოლი, რომელიც საავადმყოფოში მრავლობითი დაზიანებებით გადაიყვანეს.
  • უკრაინაში ომის გაშუქებისას დაიღუპნენ ამერიკელი ჟურნალისტი ბრენტ რენო და Live TV-ის უკრაინელი ოპერატორი ევგენი საკუნი.
კატეგორია: საერთაშორისო ამბები
რუსეთის სამთავრობო ტელევიზიის პირველი არხის რედაქტორი, მარინა ოვსიანიკოვა, რომელიც პირდაპირ ეთერში ომის საწინააღმდეგო პლაკატით შეიჭრა, მოსკოვის სასამართლომ 30 000 რუბლით (280$-ით) დააჯარიმა.

15 მარტს საღამოს, პირველი არხის რედაქტორი სასამართლომ დამნაშავედ სცნო რუსეთის ადმინისტრაციულ სამართალდარღვევათა კოდექსის მეორე ნაწილის მე-20.2  მუხლის მიხედვით. ეს საზოგადოებრივი წესრიგის დარღვევას არასანქცირებული შეკრების, მიტინგის ან დემონსტრაციის, მსვლელობის გამართვას ან პიკეტირებას გულისხმობს.

  • ეს ჯარიმა ეხება 14 მარტს გამოქვეყნებულ ვიდეოს, სადაც ჟურნალისტი უკრაინაში რუსეთის შეჭრას დანაშაულს უწოდებს.
  • პირველი არხის რედაქტორს ბრალი წაუყენეს ამ 20.2 მუხლის მეორე პუნქტით, რაც გულისხმობს საჯარო ღონისძიების ორგანიზებას ან გამართვას შესაბამისი ნებართის გარშე
  • ეს პუნქტი ითვალიწინებს: 20 000-დან 30 000 რუბლამდე, ან იძულებითი სამუშაოთი 50 საათამდე ან ადმინისტრაციული წესით დაკავებას ვადით 10 დღემდე.
  • რუსეთის პრეზიდენტის პრეს მდივანმა, დიმიტრი პესკოვმა ოვსიანკოვას მოქმედებას "ხულიგნობა" უწოდა.
  • რუსეთის მედიის ცნობით, გრძელდება გამოძიება მის მიერ ეთერში გამოტანილ პლაკატზეც, ომის საწინააღმდეგო წარწერით. 

კონტექსტი

  • პირველი არხის რედაქტორი 14 მარტს, რუსეთის სამთავრობო ტელევიზიის არხის მთავარი საინფორმაციო გამოშვება „ვრემიას“ პირდაპირ ეთერში, სტუდიაში ომის საწინააღმდეგო მოწოდებებით და ბანერით შეიჭრა - „შეაჩერეთ ომი. არ დაუჯეროთ პროპაგანდას. აქ თქვენ გატყუებენ".
  • მალევე, მან სოციალურ ქსელში გაავრცელა ვიდეო მიმართვა, სადაც რუსეთს აგრესორს უწოდებს, ომს უკრაინაში - კი დანაშაულს.
  • ოვსიანკოვა რუსეთის პოლიციამ მალევე დააკავა.
  • 14 მარტს, საღამოს, მისი დაკავებისშემდეგ ოვსიანკოვას ადგილსამყოფელი რამდენიმე საათის განმავლობაში გაურკვეველი იყო.
მეტი ამ თემაზე: გაურკვეველია რუსეთის პირველი არხის თანამშრომლის ადგილსამყოფელი
კატეგორია: საერთაშორისო ამბები
უკრაინის თავდაცვის სამინისტრო ავრცელებს ინფორმაციას ადგილობრივი პროდიუსერის ალექსანდრა (საშა) კუვშინოვას დაღუპვის შესახებ.

კუვშინოვა "ფოქს ნიუსის" გადამღები ჯგუფის წევრებთან ერთად იმ ავტომობილში იმყოფებოდა, რომელსაც 14 მარტს კიევთან ახლოს, ჰორენკაში ცეცხლი გაუხსნეს. შემთხვევას ემსხვერპლა "ფოქს ნიუსის" ომის ფოტოგრაფი და ოპერატორი  პიერ შაშევსკიც. მძიმედაა "ფოქს ნიუსის" რეპორტიორი ბენჯამინ ჰოლი, რომელიც საავადყოფოშია გადაყვანილი. 

ამ თემაზე: უკრაინაში Fox News-ის ოპერატორი დაიღუპა
 

კატეგორია: საერთაშორისო ამბები
უკრაინაში დაიღუპა "ფოქს ნიუსის" ოპერატორი პიერ შაშევსკი. ასევე მასთან მყოფი უკრაინელი პროდიუსერი ალექსანდრა კუვშინოვა

  • ტელეკომპანიის შიდა წერილის მიხედვით, რომელიც ტვიტერზე გავრცელდა, 55 წლის შაშევსკი კიევის ოლქში, სოფელ ჰორენკაში დაიღუპა.
  • ის 14 მარტს დაჭირლ რეპორტიორთან ბენჯამინ ჰოლთან ერთად იმყოფებოდა ავტომობილში, რომელსაც ცეცხლი გაუხსნეს.
  • შაშევსკი უკრაინაში თებერვლიდან მუშაობდა.

"ფოქს ნიუსი" სამძიმარს უცხადებს ოპერატორის ოჯახს და ავრცელებს ინფორმაციას, რომ დაჭრილი რეპორტიორი ბენჯამინ ჰოლი კვლავ საავადმყოფოშია, კრიტიკულ მდგომარეობაში. მას მრავლობითი დაზიანება აქვს. სხვა დეტალები ამ დროისთვის უცნობია.

დამატებითი ინფორმაცია

პიერ შაშევსკი ომის ფოტოგრაფი იყო, რომელიც "ფოქსისთვის" საერთაშორისო ამბებს ერაყიდან, ავღანეთიდან და სირიიდან აშუქებდა. შაშევსკი უკრაინაში თებერვლიდან იმყოფებოდა. 2021 წელს, ავღანეთის თალიბანის რეჟიმის დროს, მან დიდი როლი ითამაშა "ფოქსის" ადგილობრივი კორესპონდენტებისა და მათი ოჯახების ქვეყნიდან გამოყვანაში.

უკრაინაში ომის გაშუქებისას დაიღუპნენ ამერიკელი ჟურნალისტი ბრენტ რენო და Live TV-ის უკრაინელი ოპერატორი ევგენი საკუნი.

ამ თემაზე: უკრაინაში დაიღუპულია Fox News-ის ჯგუფთან მომუშავე ჟურნალისტი
 
კატეგორია: საერთაშორისო ამბები
რუსული მედიის ცნობით, რუსეთის სახელმწიფო ტელევიზიის პირველი არხის თანამშრომელ მარინა ოვსიანიკოვას, რომელიც ომის საწინააღმდეგო ბანერით პირდაპირ ეთერში შეიჭრა, ადმინისტრაციული წესით ასამართლებენ.


ტელეგრამის არხზე გავრცელდა ადვოკატ ანტონ გაშინსკისთან ერთად სასამართლოში გადაღებული მარინა ოვსიანიკოვას ფოტო.

„ნოვაია გაზეტა“ ადვოკატზე დაყრდნობით, წერს, რომ "პირველი არხის” თანამშრომლის საქმის მოკვლევა ოსტანკინსკის რაიონულმა სასამართლომ დაიწყო და მას ადმინისტრაციული წესით ასამართლებენ.

მარინა ოვსიანიკოვას ადგილსამყოფელი  მისი გუშინდელი პერფორმანსის ამ დრომდე გაურკვეველი იყო.



რა მოხდა
  • 14 მარტს, მარინა ოვსიანიკოვა, რუსეთის სამთავრობო ტელევიზიის - „პირველი არხის” რედაქტორი, არხის მთავარი საინფორმაციო გამოშვება „ვრემიას“ პირდაპირ ეთერში, სტუდიაში ომის საწინააღმდეგო მოწოდებებით და ბანერით შეიჭრა - „შეაჩერეთ ომი. არ დაუჯეროთ პროპაგანდას. აქ თქვენ გატყუებენ“.
  • მალევე გავრცელდა ვიდეო მიმართვა, სადაც ოვსიანიკოვა ამბობს რომ რცხვენია, რადგან წლების განმავლობაში კრემლის პროპაგანდით იყო დაკავებული და ხალხს ატყუებდა.
 
ვრცლად ამ თემაზე: გაურკვეველია რუსეთის პირველი არხის თანამშრომლის ადგილსამყოფელი
კატეგორია: საერთაშორისო ამბები
კიევის რეგიონში, ქალაქ ირპინში რუსმა სამხედროებმა ამერიკელი ჟურნალისტი და არაერთი ჯილდოს მფლობელი კინორეჟისორი - ბრენტ რენო მოკლეს და 2 ამერიკელი რეპორტიორი დაჭრეს.


ჟურნალისტის დაღუპვის დეტალები

ბრენტ რენოს და ორ ამერიკელ ჟურნალისტს რუსმა ჯარისკაცებმა ცეცხლი უკრაინის ქალაქ ირპინთან 13 მარტს გაუხსნეს. 
  • უკრაინის შინაგან საქმეთა მინისტრის მრჩეველმა ანტონ გერაშენკომ ტელეგრამზე გავრცელა საავადმყოფოში გადაღებული ვიდეო, სადაც რენოსთან ერთად მყოფი ერთ-ერთი გადარჩენილი რეპორტიორი მომხდარს იხსენებს.
  • ის ჰყვება, რომ ირპინში ლტოლვილების გადასაღებად მიდოდნენ, როდესაც უცნობმა ხიდამდე მიყვანა შესთავაზათ და მანქანაში ჩაუსხდნენ:
  • „მეორე ხიდთან სროლა დაგვიწყეს. მძღოლმა მანქანა მოატრიალა, მათ სროლა განაგრძეს.
  • ტელეგრამზე გავრცელდა ვიდეოც, სადაც უკრაინელი ჯარისკაცი რენოს ცხედართან ყვება, რომ ჟურნალისტს ტყვია თავში აქვს მოხვედრილი.


განახლება 23:36 - თეთრი სახლის მრჩეველი ეროვნული უსაფრთხოების საკიტხებში, ჯეიკ სალივანი CBS-თან მიცემულ ინტერვიუში ამბობს, რომ აშშ-ს მხარეს ექნება კონსულტაციები უკრაინასთან, რათა გაარკვიოს დაღუპვის ვითარება და "შესაბამისად იმოქმედოს".




ვინ იყო ბრენტ რენო?


50 წლის ბრენტ რენო არაერთი ჯილდოს მფლობელი ჟურნალისტი და დოკუმენტალისტი კინორეჟისორი იყო.
  • ბრენტ რენო და მისი ძმა კრეიგი მსოფლიოს ცხელი წერტილებიდან ჰუმანური ისტორიების მოყოლით გახდნენ ცნობილი.
  • მათ დააარსეს Little Rock Film Festival და Arkansas Motion Picture Institute.
  • რენოს უთანამშრომლია ისეთ ცნობილ და გავლენიან ორგანიზაციებთან, როგორიცაა HBO, NBC და The New York Times.
  • ძმები მუშაობდნენ როგორც ფილმებზე, ისე სატელევიზიო პროექტებზე, ცხელ წერტილებში მსოფლიოს გარშემო. ბოლო ათწლეულში ძმებმა გააშუქეს ომები ერაყსა და ავღანეთში, მიწისძვრა ჰაიტიზე, ნარკოდანაშაულის ჯგუფების დაპირისპირება მექსიკაში, ჰატის მიწისძვრა, პოლიტიკურ არეულობა ეგვიპტესა და ლიბიაში, ექსტრემიზმი აფრიკაში და ა.შ.
  • რენოს ფილმებსა და სატელევიზიო შოუებს მოგებული აქვს არაერთი ჯილდო, მათ შორის Peabody Award, ორი Columbia DuPont Awards, ორი უცხოური პრესკლუბის ჯილდო, Edward R. Murrow Award, IDA Award, DGA ნომინაცია საუკეთესო რეჟისორებისთვის და მრავალი Emmy-ის ნომინაციები.
კატეგორია: საერთაშორისო ამბები
კიევის გარეუბანში რუსმა სამხედროებმა ამერიკელი ჟურნალისტი და კინორეჟისორი ბრენტ რენო მოკლეს. დაჭრილია 2 კორესპონდენტი.


ამერიკელი ჟურნალისტისა და დოკუმენტური კინორეჟისორის, 50 წლის ბრენტ რენოს მკვლელობის შესახებ ინფორმაცია თავდაპირველად უკრაინელმა პოლიციის ოფიცერმა ანდრეი ნებიტოვმა გაავრცელა. მისივე თქმით, დაჭრილია კიდევ ორი კორესპონდენტი.

alt

პოლიციელმა ფეისბუქის პირად გვერდზე დაწერა, რომ დაჭრილები შემთხვევის ადგილიდან უკვე გამიყვანეს და ახლა დედაქალაქის საავადმყოფოში იმყოფებიან. მათი ჯანმრთელობის მდგომარეობა ჯერჯერობით უცნობია.

ნებიტობის მიერ გავრცელებულ ფოტოში ჩანს, რომ ბრენტ რენოს თან ჰქონდა New York Times-ის პრესის ბარათი. გამოცემის რედაქტორი კლიფ ლევი ტვიტერზე წერს, რომ რენო ტაიმსთან 2015 წლამდე თანამშრომლობდა და უკრაინაში გამოცემის დავალებით არ წასულა.

alt

კატეგორია: საქართველო
რუსული დამოუკიდებელი არხის „დოჟდის“ ჟურნალისტი მიხაილ ფიშმანი საქართველოში არ შემოუშვეს. ინფორმაცია თავდაპირველად 5 მარტს გვიან ღამით „რადიო თავისუფლებამ“ გაავრცელა.


რა მოხდა

ტელეწამყვანმა მიხაილ ფიშმანმა ტელეკომპანია „ფორმულასთან“ საუბრისას თქვა, რომ საქართველოში 5 მარტს ოჯახთან ერთად ჩამოვიდა. მისი 4 წლის შვილი შემოუშვეს, მას კი უარი უთხრეს ქვეყანაში შემოსვლაზე

  • „თავიდან ერთი საათი საზღვარზე გამაჩერეს, მერე პასპორტი მომცეს და მითხრეს, რომ საქართველოში შემოსვლაზე უარს მეუბნებოდნენ. ისიც მითხრეს, რომ შემიძლია, გადაწყვეტილება ათი დღის ვადაში გავასაჩივრო“- ამბობს ფიშმანი.

მისი თქმით, იკითხა, თუ რის გამო არ უშვებდნენ ქვეყანაში, თუმცა, არაფერი აუხსნეს და მიზეზი მისთვის გაურკვეველი დარჩა:

  • „მითხრეს, რომ როცა ბაქოში დავბრუნდებოდი, საბუთებს მაჩვენებდნენ. წარმოდგენა არ მაქვს, რა საბუთებზე მელაპარაკებოდნენ. პასპორტიც კი მას შემდეგ მომცეს, რაც გამოვფრინდი… კონტაქტებთან გავიგე, რომ ყველაფერი ტელეარხ „დოჟდთან“ კავშირის გამო მოხდა“



კონტექსტი

  • რუსეთის უკრაინაში შეჭრის შემდეგ, რუსეთში ოცამდე მედიასაშუალება დაიბლოკა ან დაიხურა. მათ შორის არის ტელეკომპანია „დოჟდიც“.
  • თავდაპირველად რუსეთში „დოჟდის” ვებგვერდი დაბლოკეს. 4 მარტს კი, არხმა სახელმწიფოსგან ზეწოლის გამო მაუწყებლობა დროებით შეაჩერა. ქვეყანა დატოვეს „დოჟდის“ რედაქციის თანამშრომლებმა.
  • „დოჟდის“ ბოლო ეთერი 3 მარტს გავიდა და სიმბოლურად პეტრე ჩაიკოსვკის ბალეტის „გედების ტბის“ ნაწყვეტით დასრულდა. ამბების გაშუქების ნაცვლად, სწორედ ამ ოპერას გადასცემდა უწყვეტად საბჭოთა ტელევიზია 1991 წლის აგვისტოს პუჩტის დროს სსრკ-ის პრეზიდენტის მიხაილ გორბაჩოვის ჩამოგდების მცდელობისას.

ვრცლად ამ თემაზე: საინფორმაციო ომი რუსეთში - დაბლოკილი მედია და პროპაგანდა
კატეგორია: საერთაშორისო ამბები
კიევის სატელევიზიო ანძის დაბომბვის შედეგად Live TV-ის ოპერატორი დაიღუპა. ინფორმაციას „რეპორტიორები საზღვრებს გარეშე“ ავრცელებს.

ორგანიზაციის ცნობით, 1 მარტს ანძის დაბომბვას ტელევიზიის ოპერატორი ევგენი საკუნი ემსხვერპლა.

„ჩვენ გლოვობთ მის დაკარგვას და ვიძიებთ გარემოებებს. ჟურნალისტების მიზანში ამოღება ომის დანაშაულია“, -წერს ორგანიზაცია „ტვიტერზე“.

უკრაინულმა მხარემ გუშინ გაავრცელა ინფორმაცია, რომ რუსული ძალების მხრიდან კიევის სატელევიზიო და რადიო ანძაზე იერიშს 5 ადამიანის სიცოცხლე ემსხვერპლა.

RSF-ის ინფორმაციით, 26 თებერვალს უკრაინაში 2 დანიელი ჟურნალისტი დაჭრეს.

კატეგორია: საქართველო
თბილისის საქალაქო სასამართლოსთან 5 ივლისს ჟურნალისტებზე ძალადობის საქმის პროცესის შემდეგ ბრალდებულების ახლობლებმა ჟურნალისტებს შეურაცხყოფა მიაყენეს და დაემუქრნენ.

რა მოხდა?

2 მარტს 5-6 ივლისის მოვლენების შესახებ სასამართლო პროცესის შემდეგ, სავარაუდოდ, ძალადობრივ ჯგუფებთან დაკავშირებული პირები
  • გამოკითხვიდან გამოსულ “ფორმულას” ჟურნალისტს, რატი წვერავას დახვდნენ, მას სიტყვიერი შეურაცხყოფა მიაყენეს, ცდილობდნენ ფიზიკურ ანგარიშსწორებას და ისმოდა მუქარები.
  • შეურაცხყოფა მიაყენეს “რუსთავი 2” -ის გადამღებ ჯგუფსაც არჩილ ჭიჭიბოშვილს და ხათუნა გაგნიძეს.
ვითარება მანდატურებმა განმუხტეს, ასევე გამოიძახეს საპატრულო პოლიცია. სამართალდამცველებმა „რუსთავი 2-ის“ თანამშრომლები ადგილზე გამოკითხეს.



  •  „კოალიცია მედიის ადვოკატირებისთვის“ სამართალდამცავ ორგანოებს მოუწოდებს სწრაფად და ეფექტიანად გამოიძიონ მომხდარი სავარაუდო დამნაშავეების გამოვლენისა და სისხლისსამართლებრივ პასუხისგებაში მიცემის მიზნით.
  • მედიაკოაკიციის შეფასებით, ეს კიდევ ერთხელ მიუთითებს, რომ 2021 წლის 5-6 ივლისის მაშტაბური თავდასხმის მონაწილეებისა და ორგანიზატორების სათანადო დაუსჯელობამ წაახალისა მედიის წარმომადგენლებისა და, ზოგადად, უფლებადამცველების წინააღმდეგ მიმართული ძალადობრივი ქმედებები.
ვრცლად განცხადებას გაეცანით აქ.

კონტექსტი

  • 2021 წლის 5 ივლისს "თბილისი პრაიდის" მიერ დაგეგმილი "ღირსების მარშის" წინააღმდეგ გამოსული ძალადობრივი ჯგუფები მედიის 53 წარმომადგენელს ფიზიკურად გაუსწორდნენ. მათ შორის „ფორმულას“ ჟურნალისტს რატი წვერავას, რომელსაც 22 თებერვალს სასამართლო პროცესზე ბრალდებულები დაემუქრნენ
  • ძალადობრივი აქციის ორგანიზატორების დასჯას შვიდ თვეზე მეტია უშედეგოდ ითხოვს მედია, არასამთავრობო სექტორი და სამოქალაქო საზოგადოება. თუმცა, ამ დრომდე არც ერთი ორგანიზატორი პასუხისგებაში მიცემული არ არის.
კატეგორია: რესურსები
უკრაინის დემოუკიდებელი მედიის მხარდასაჭერად რამდენიმე ორგანიზაციამ კამპანია წამოიწყო.
  • გამოცემა The Fix Media-ს
  • მედიასაკონსულტაციო კომპანიამ Jnomics Media-ს
  • უკრაინის მედიის განვითარების ფონდისა (MDF)
  • და ნიდერლანდების ფონდ Are We Europe-ის ორგანიზებით
დახმარება გაეწევა 10-ზე მეტ ეროვნულ და რეგიონულ მედიასაშუალებას უკრაინაში, მათ შორის, Ukrainska Pravda-ს, Ukrainer-ს, Liga.net-სა და Kyiv Independent-ს.

უკრაინელი ჟურნალისტების ძირითადი საჭიროებები ახლა არის:

  • უსაფრთხოების აღჭურვილობა (პირველადი დახმარების ნაკრები, ჩაფხუტები, ჯავშნები და ა.შ.)
  • მხარდაჭერა მათი ოპერაციების ნაწილის საზღვარგარეთ გადატანაში მუშაობის გასაგრძელებლად
  • ლოგისტიკური მხარდაჭერა - გადაადგილება ქვეყნის შიგნით ან გარეთ
  • სხვა რესურსები მუშაობის გასაგრძელებლად.
დონაცია შესაძლებელია Gofundme-ზე: ბმული

დამატებითი ინფორმაცია იხილეთ აქ: ბმული

დამატებითი კითხვების შემთხვევაში საკონტაქტო ელ-ფოსტა: @newsroom@thefix.media
კატეგორია: საქართველო

საზოგადოებრივი მაუწყებლის პირველი არხი საქართველოში მყოფ უკრაინის მოქალაქეებს საინფორმაციო დახმარებას სთავაზობს


  • პირველი არხი აცხადებს, რომ უკრაინის მოქალაქეებს, რომლებიც საქართველოში არიან, შესაბამის უწყებებთან კომუნიკაციაში დაეხმარებიან.
  • დახმარების სურვლის შემთხვევაში, უკრაინის მოქალაქეებს შეუძლიათ დარეკონ საქართველოს პირველი არხის ცხელ ხაზზე: +995 32 240 94 77




    კონტექსტი

    24 თებერვლის დილით რუსეთი უკრაინაში შეიჭრა და სრულმასშტაბიანი ომი წამოიწყო. ქვეყნის პრეზიდენტმა ვლადიმერ პუტინმა ოფიციალურად გამოაცხადა სამხედრო ოპერაციის დაწყება. ამ დროისთვის უკვე დაბომბილია რამდენიმე ქალაქი და ქვეყნის სხვადასხვა რეგიონში სამხედრო ოპერაციები მიმდინარეობს.
კატეგორია: საქართველო
საქართველოს ჟურნალისტური ეთიკის ქარტია უკრაინაში მიმდინარე ომის გაშუქებისას, მედიებს სიფრთხილისკენ მოუწოდებს და საზოგადოებას მიმართავს, რომ არ გახდნენ პრორუსული დეზინფორმაციის მსხვერპლი

ქარტია მიმართავს საქართველოს მედიასაშუალებებს:

  • გამოიჩინონ სიფრთხილე უკრაინაში მიმდინარე მოვლენების გაშუქებისას, რადგან ასეთ დროს განსაკუთრებით აქტიურდება პროპაგანდისტული კამპანიები და დეზინფორმაცია, ვრცელდება უამრავი გადაუმოწმებელი ცნობა, ვიდეო და ფოტო მასალა.
  • იმ ვითარებაში, როდესაც ქვეყნის მოსახლეობის ყურადღება მთლიანად მიმართულია უკრაინის მოვლენებისადმი, მნიშვნელოვანია, მედიამ გაორმაგებული ძალისხმევა დახარჯოს ინფორმაციის გადასამოწმებლად და მხოლოდ სანდო წყაროები გამოიყენოს. 



ამ თემაზე ვრცლად: როგორ აკონტროლებს რუსეთის ხელისუფლება მედიის გზავნილებს ომის შესახებ 



ქარტია მიმართავს საზოგადოებასაც, რომ

  • ნუ წამოეგებიან საქართველოში მოქმედი პრორუსული და ანტიდასავლური ორგანიზაციებისა და საინფორმაციო არხების მიერ გავრცელებულ დეზინფორმაციას.
საქართველოს ჟურნალისტური ეთიკის ქარტია სოლიდარობას უცხადებს უკრაინას და უკრაინელ ხალხს, მედიის წარმომადგენლებს და კოლეგებს უკრაინის პრესის საბჭოში.

კონტექსტი

24 თებერვლის დილით რუსეთი უკრაინაში შეიჭრა და სრულმასშტაბიანი ომი წამოიწყო. ქვეყნის პრეზიდენტმა ვლადიმერ პუტინმა ოფიციალურად გამოაცხადა სამხედრო ოპერაციის დაწყება. ამ დროისთვის უკვე დაბომბილია რამდენიმე ქალაქი და ქვეყნისსხვადასხვა რეგიონში სამხედრო ოპერაციები მიმდინარეობს.
კატეგორია: საქართველო
5 ივლისს ჟურნალისტებზე ძალადობის საქმის მორიგ სასამართლო პროცესზე ბრალდებულები „ფორმულას“ ჟურნალისტს დაემუქრნენ.

რა მოხდა?

თბილისის საქალაქო სასამართლოში, „ფორმულას“ ჟურნალისტის, რატი წვერავას, მოწმის სახით გამოკითხვის დროს ბრალდებულები ჟურნალისტის განცხადებამ გააღიზიანა.

  • ბრალდებულების აგრესია და ხმაური მოჰყვა რატი წვერავას ნათქვამს: "ჩვენ არაკაცებს არ ვაშუქებთ ანუ ძალადობრივი მოწოდებების მქონე ადამიანებს არ ვაშუქებთ ეთერში".
  • ბრალდებულის, გიორგი ნასყიდაშვილის მუქარა: „არაკაციც ხარ და უნამუსო... გამომიშვით 1 წუთით და დამიმატეთ მერე 6 წელი კიდევ, მიმიშვით ამ არაკაცთან. ამ ვიგინდარას რომ შემოვარტყამ მოძალადე მერე მე ვარ და ეს არის ანგელოზი. მოდის და არაკაცს გვიწოდებს".
  • ბრალდებულების ადვოკატმა ირაკლი ზაქარეიშვილმა სხდომა დატოვა, ის მოსამართლემ 300 ლარით დააჯარიმა.

პროკურორის შეფასება

„დაცვის მხარის მიზანი არ არის საქმეზე ობიექტური ჭეშმარიტების დადგენა, მათი მიზანია პროცესის გაჭიანურება, ეს მიუთითებს სასამართლო დარბაზში მათ ქცევაზეც და ასევე მათ მიერ მოწმეებისათვის დასმულ შეკითხვაზე.“, - თქვა ლევან ვეფხვაძემ სხდომის დასრულების შემდეგ.
  • დღეს ჩვენება უნდა მიეცა „მთავარი არხის“ ოპერატორის დათუნა ახალკაცსაც, თუმცა მისი გამოკითხვა გადაიდო.
  • 5 ივლისს დაზარალებული ჟურნალისტების გამოკითხვა მომდევნო პროცესზე 2 მარტს დასრულდება.

კონტექსტი


  • 2021 წლის 5 ივლისს "თბილისი პრაიდის" მიერ დაგეგმილი "ღირსების მარშის" წინააღმდეგ გამოსული ძალადობრივი ჯგუფები მედიის 53 წარმომადგენელს ფიზიკურად გაუსწორდნენ. მათ შორის „ფორმულას“ ჟურნალისტს რატი წვერავას.
  • ძალადობრივი აქციის ორგანიზატორების დასჯას შვიდ თვეზე მეტია უშედეგოდ ითხოვს მედია, არასამთავრობო სექტორი და სამოქალაქო საზოგადოება. თუმცა, ამ დრომდე არც ერთი ორგანიზატორი პასუხისგებაში მიცემული არ არის.



    ვრცლად: დაუსჯელი ორგანიზატორები და გირაოს სანაცვლოდ გათავისუფლებული ბრალდებულები - რა ხდება 5 ივლისის საქმეზე
კატეგორია: საქართველო
ჟურნალისტებზე კასპში მომხდარ ძალადობის ინციდენტთან დაკავშირებით სახელმწიფო ინსპექტორის სამსახურმა მოკვლევა დაიწყო.
  • უწყებაში დღეს ტელეკომპანია "მთავარის", "პირველისა" და "ფორმულას" ჟურნალისტები გამოკითხეს.
  • მოკვლვა საქართველოს სისხლის სამართლის კოდექსის 333-ე მუხლის მე-3 ბ ქვეპუნქტით მიმდინარეობს, რაც სამსახურებრივი უფლებამოსილების გადამეტებას გულისხმობს.

კონტექსტი

  • 18 თებერვალს,კასპის საკრებულოში მომხდარი დაპირისპირების გაშუქებისას "მთავარის" ინფორმაციით, მათს ჟურნალისტსა და ოპერატორზე პოლიციელებმა ფიზიკურად იძალადეს.
  • არხის განმარტებით: მმართველი პარტიის "ქართული ოცნების" წარმომადგენლების მითითებით მედიის წარმომადგენლებს ჯერ სხდომათა დარბაზი, შემდეგ კი შენობა ფიზიკური ძალის გამოყენებით დაატოვებინეს. დაზიანდა აპარატურა.
  • საქართველოს ჟურნალისტური ეთიკის ქარტიის ინფორმაციით, კასპში არასათანადო პირობებში მუშაობა მოუწიათ "პირველის", „ფორმულას”, „თრიალეთისა” და „ტვ მონიტორინგის” წარმომადგენლებსაც.
ქარტია შესაბამის უწყებებს მოუწოდებს სწრაფად და ეფექტიანად შეისწავლონ პოლიციელების მხრიდან მედიის წარმომადგენლებზე თავდასხმის ფაქტი.

მეტი კასპის ინციდენტზე ნახეთ აქ.

კატეგორია: საქართველო
ტელეკომპანია "მთავარის" ინფორმაციით, არხის ჟურნალისტსა და ოპერატორს ფიზიკურად გაუსწორდნენ.

დეტალები


კასპის საკრებულოში მომხდარი დაპირისპირების გაშუქებისას "მთავარის" გადამღებ ჯგუფს თავს დაესხნენ. "მთავარის" ინფორმაციით, ჟურნალისტსა და ოპერატორზე პოლიციელებმა ფიზიკურად იძალადეს.

არხის განმარტებით: მმართველი პარტიის "ქართული ოცნების" წარმომადგენლების მითითებით მედიის წარმომადგენლებს ჯერ სხდომათა დარბაზი, შემდეგ კი შენობა ფიზიკური ძალის გამოყენებით დაატოვებინეს. დაზიანდა აპარატურა.

"მთავარი" მომხდარის ამსახველ კადრებს ავრცელებს.

საქართველოს ჟურნალისტური ეთიკის ქარტიის ინფორმაციით, კასპში არასათანადო პირობებში მუშაობა მოუწიათ ტელეკომპანიების: "პირველის", „ფორმულას”, „თრიალეთისა” და „ტვ მონიტორინგის” წარმომადგენლებსაც.

ჟურნალისტური ეთიკის ქარტია მოუწოდებს ხელისუფლებას:

  • დაიცვას ჟურნალისტების უსაფრთხოება
  • პროფესიული საქმიანობის შესრულებისას მედიას შეუქმნას შესაბამისი სამუშაო პირობები, რათა მოქალაქეებს ჰქონდეთ შესაძლებლობა, მიიღონ ინფორმაცია მიმდინარე პროცესებთან დაკავშირებით.
  • ქარტია მოუწოდებს შესაბამის უწყებებს, სწრაფად და ეფექტიანად შეისწავლონ პოლიციელების მხრიდან მედიის წარმომადგენლებზე თავდასხმის ფაქტი.

"განსაკუთრებით საყურადღებოა თავდასხმა პოლიციელების მხრიდან. მსგავსი ქმედებები კიდევ უფრო ახალისებს ჟურნალისტების მიმართ ძალადობას. აუცილებელია სამართალდამცავ პირებს კანონის შესაბამისად მოსთხოვონ პასუხი და დაუყოვნებლივ გაატარონ პრევენციული ღონისძიებები მედიის წარმომადგენლების უსაფრთხოების უზრუნველსაყოფად", - წერია ქარტიის განცხადებაში. 

კატეგორია: საქართველო

მედიამ კიდევ ერთხელ დაუთმო ეთერი არაკომპეტენტურ ადამიანებს ვაქცინაციაზე სასაუბროდ.


1 თებერვალს, მას შემდეგ, რაც მთავრობამ “მწვანე პასპორტის” მოთხოვნის ვალდებულება გააუქმა, ტელეკომპანია „რუსთავი 2-მა” და „TV პირველმა” საღამოს ეთერი ვაქცინის მოწინააღმდეგეებსა და მომხრეებს შორის დებატებს დაუთმო. ტოქშოუებში საკითხში კვალიფიციურ ადამიანებს ცნობილი მსახიობები, მომღერლები, მწერლები, რეჟისორები და სხვები სჭარბობდნენ.

რა პრობლემაა?

  • ეს პირველი შემთხვევა არაა, როდესაც მედია ტრიბუნას უთმობს საზოგადოებრივ აზრზე გავლენის მქონე ცნობილ ადამიანებს, რომლებიც სამეცნიერო ფაქტებს, ამ შემთხვევაში, ვაქცინაციას, ეწინააღმდეგებიან. ტელევიზიებში მათ ხშირად ისეთ თემებზე სასაუბროდ იწვევენ, რომლებზეც კომპეტენცია არ აქვთ.
  • ცხადია, ცნობილი ადამიანის ეთერში გამოჩენა უფრო მაღალი რეიტინგის მომტანია, მაგრამ, საკითხავია, რა სარგებელს იღებს და რამდენად ინფორმირებული რჩება მაყურებელი მსგავსი შოუების ნახვის შემდეგ?

დეტალები:

  • „რუსთავი 2-ისა” და „TV პირველის“ ეთერში ერთი მხარე დაჟინებით ამტკიცებდა, რომ არ უნდა ავიცრათ, საუბრობდა კონსპირაციულ თეორიებზე, ავრცელებდა დაუდასტურებელ და ცრუ ინფორმაციებს
  • მეორე მხარე ცდილობდა აცრის სიკეთეების შესახებ ესაუბრა და დაერწმუნებინა მაყურებელი, რომ პანდემიის დასამარცხებლად ვაქცინაციას ალტერნატივა არ აქვს.
  • გადაცემის არცერთი წამყვანი არ იყო მზად იმისთვის, რომ ეთერში ნათქვამ დეზინფორმაციას სანდო და გადამოწმებული ფაქტებით დაპირისპირებოდა.

რატომ არის ეს მნიშვნელოვანი?

  • პანდემიის პერიოდში, მაშინ, როდესაც საქართველოში კორონავირუსით ყოველდღიურად ათობით ათასი ადამიანი ინფიცირდება, ათობით მათგანი იღუპება და ვაქცინაციის დაბალი მაჩვენებელია, განსაკუთრებით მნიშვნელოვანია მედიის როლი.
  • განსაკუთრებით მაშინ, როდესაც საქმე ადამიანის სიცოცხლეს და ჯანმრთელობას ეხება, მედია ვალდებულია, რესპონდენტები შეარჩიოს მათი კვალიფიციურობის და არა „ცნობადობის“ მიხედვით.
  • ნებისმიერ შემთხვევაში, როდესაც რესპონდენტი ეთერში დეზინფორმაციას ავრცელებს, ჟურნალისტი ვალდებულია, რომ ეს უაპელაციოდ არ გაატაროს და თავის აუდიტორიას მიაწოდოს ზუსტი და მართალი ინფორმაცია.

ზოგადად, რა შემთხვევაშია გამართლებული ცნობილი ადამიანების მოსაზრებების გაშუქება?

„რაც უფრო დიდ სიყვარულს, აღფრთოვანებას ან პატივისცემას იმსახურებს საზოგადოების ან მისი ნაწილის მხრიდან, მას კიდევ უფრო მეტი ზეგავლენა აქვს ადამიანების აზრზე, ქცევაზე. სრულიად შესაძლებელია, რომ ამ ადამიანის პირად მოსაზრებას სერიოზული გავლენა ჰქონდეს ვიღაცის ცხოვრებაზე.“ - ამბობს ჟურნალისტური ეთიკის ქარტიის საბჭოს თავმჯდომარე, თამარ რუხაძე.

რუხაძის განმარტებით:

  • მედიამ სხვადასხვა სპეციალობის ადამიანს ისეთ თემაზე არ უნდა ჰკითხოს აზრი, რომელიც სპეციფიკურად მის სფეროს არ ეხება, განსაკუთრებით მაშნ, როდესაც საქმე გვაქვს საზოგადოების კეთილდღეობისთვის სასიცოცხლოდ მნიშვნელოვან საკითხებთან.
  • ერთადერთი მიზანი კი, რის გამოც შეიძლება, მედიამ მასთან [დეზინფორმაციის გამავრცელებელ ადამიანთან] ინტერვიუ ჩაწეროს ან პირდაპირ ეთერში მოისურვოს მისი მოყვანა, უნდა იყოს ის, რომ გააბათილოს არასწორი და ხშირად მავნე ინფორმაცია.
„თუკი არ გაქვს შესაძლებლობა, რომ წინააღმდეგობა გაუწიო დეზინფორმაციას, სულერთია ვისგან მოდის ის, მაშინ შენ თვითონ ხდები არასწორი ინფორმაციის გავრცელების ხელშემწყობი და, შესაბამისად, შენ თვითონ მოდიხარ წინააღმდეგობაში საკუთარ მოვალეობასთან და საერთოდ - ფუნქციასთან“, - ამბობს თამარ რუხაძე.

დამატებითი მასალა ამ თემაზე:

კატეგორია: საქართველო
NDI-ის გამოკითხულთა უმრავლესობა ფიქრობს, რომ საქართველოში სიტყვის თავისუფლების მიმართულებით სიტუაცია არ შეცვლილა ან გაუარესდა.

ეროვნულ-დემოკრატიული ინსტიტუტი (NDI) და CRRC-საქართველო საზოგადოების განწყობის შესახებ კვლევას აქვეყნებს.

დეტალები: გამოკითხულთა უმეტესობა (40%) მიიჩნევს, რომ ბოლო 10 წლის განმავლობაში საქართველოში სიტყვის თავისუფლება გაუმჯობესდა, თუმცა მათი ერთობლიობა ვინც ფიქრობს, რომ ამ მიმართულებით მდგომარეობა არ შეცვლილა (28%) და გაუარესდა (27%) გამოკითხულთა ნახევარზე მეტს შეადგენენ.

alt
კვლევის მიხედვით, ეროვნული საკითხების მიმართ დამოკიდებულებას პარტიული სიმპატიები განაპირობებს.
  •  მმართველი პარტიის მხარდამჭერების უმრავლესობა ამბობს, რომ სიტყვის თავისუფლება გაუმჯობესდა.
  •  ოპოზიციის მხარდამჭერების უმეტესობის აზრით კი პირიქით, სიტყვის თავისუფლება გაუარესებულია.
alt
პანდეემის შესახებ
გამოკითხვის მიხედვით, კი მოსახლეობის უმრავლესობა დარწმუნებულია, რომ კორონავირუსის წინააღმდეგ ვაქცინაციის შესახებ საკმარისი ინფორმაცია აქვს.

alt
კვლევა 2021 წლის 7-13 დეკემბრის პერიოდში საქართველოს მასშტაბით 2,099 სატელეფონო ინტერვიუს წარმომადგენლობითი შერჩევის საფუძველზე, ქვეყნის სრულწლოვან მოსახლეობას შორის ჩატარდა (ოკუპირებული ტერიტორიების გამოკლებით).
  • გამოკითხვის საშუალო ცდომილების ზღვარია +/- 1.3%. ინტერვიუები ქართულ , აზერბაიჯანულ, სომხურ და რუსულ ენებზე ჩატარდა. რესპონდენტები შემთხვევით ნომერზე დარეკვის მეთოდით შეირჩნენ. კვლევა ჩაატარა CRRC-საქართველომ. NDI-ის კვლევა დიდი ბრიტანეთის მთავრობის UK aid-ის ფინანსური ხელშეწყობით ხორციელდება.
კატეგორია: საქართველო
ტელეკომპანია "მთავარში" ცვლილებებია. არხის გენერალური დირექტორის მოადგილე და საინფორმაციო სამსახურის უფროსი გიორგი გაბუნია გახდა. 

"მთავარი არხის" გენერალური დირექტორის, ნიკა გვარამიას, ინფორმაციით, არხი ახალ სეზონს განახლებული საეთერო ბადით იწყებს:
  • გადაცემა "პოსტ ფაქტუმს" ჟურნალისტი მიხეილ სესიაშვილი წაიყვანს. გადაცემის გუნდს შეემატა ჟურნალისტი ბექა ყორშია. 
  • დაიხურა შაბათის ფორმატი აქამდე არსებული სახით, მის ნაცვლად ახალი ამბების გამოშვება გავა, რომელსაც თამარ ბაღაშვილი წაიყვანს. 
  • დაიხურა თოქ-შოუ "დებატები თამარ ბაღაშვილთან" და პროექტი "ხალხის ხმა". 
  • შეიცვალა ნიკა გვარამიას გადაცემის ეთერში გასვლის დრო. "მთავარი აქცენტები" ხუთშაბათობით 22:00 საათზე გავა.

კატეგორია: საქართველო
„2021 წელს საქართველომ ადამიანის უფლებათა რიგ სფეროებში უკუსვლა განიცადა. შეშფოთებას იწვევდა თავდასხმები ჟურნალისტებზე, მედიაპლურალიზმის შეზღუდვის მზარდი საფრთხე.“ - ადამიანის უფლებათა დაცვის საერთაშორისო ორგანიზაცია Human Rights Watch ანგარიშს აქვეყნებს, რომელშიც საქართველოში 2021 წლის მოვლენებს აჯამებს. მათ შორისაა მედიის თავისუფლების საკითხი.

ორგანიზაციის შეფასებით, „გადაუჭრელ პრობლემად დარჩა სამართალდამცავთა მიერ ჩადენილ დანაშაულებზე არასათანადო პასუხისმგებლობა.“

რა წერია მედიაზე Human Rights Watch-ის ანგარიშში?

უფლებადამცველი ორგანიზაცია მედიასთან მიმართებით გასულ წელს მომხდარ რამდენიმე შემთხვევას გამოყოფს:

• „ფორმულას“ წამყვანის ვახო სანაიას თავდამსხმელების თებერვალში დაკავება. აგვისტოში კი მათი დამნაშავედ ცნობა და პატიმრობის ზუსტად იმ ვადით შეუფარდება, რამდენიც უკვე წინასწარ პატიმრობაში ჰქონდათ გატარებული.

• 5 ივლისს ჟურნალისტებზე თავდასხმა. ანგარიშში წერია, რომ ძალადობის დროს პოლიცია ხშირად ადგილზე იყო, მაგრამ ძალადობრივი ინციდენტების აღკვეთა ვერ შეძლო. სახალხო დამცველმა ხელისუფლება გააკრიტიკა იმის გამო, რომ ძალადობის არც ერთი ორგანიზატორი არ დაუსჯია.

• „ტვ პირველის“ ოპერატორი ალექსანდრე ლაშქარავას გარდაცვალება 5 ივლისის მოვლენებიდან რამდენიმე დღეში.

• ლაშქარავას გარდაცვალების მომდევნო დღეს, „ექსპერტიზის შუალედური დასკვნის“ საფუძველზე, ხელისუფლების მიერ ლაშქარავას გარდაცვალების სავარაუდო მიზეზად ნარკოტიკული საშუალებით ზედოზირების დასახელება.

• დაჩქარებულად გამოქვეყნებულ შედეგებში ლაშქარავას ოჯახისა და სამოქალაქო საზოგადოების მიერ ეჭვის შეტანა და შსს-ს მიერ საქმეზე თვითმკვლელობამდე მიყვანის მუხლით გამოძიების დაწყება.

• 22 ივლისს კულტურის მინისტრის, თეა წულუკიანის მიერ ოპოზიციურად განწყობილი ტელეკომპანიის „მთავარი არხის“ ჟურნალისტისთვის მიკროფონის „წაგლეჯვა და აღარ დაბრუნება“. [წულუკიანმა "მთავარ არხს" მიკროფონი ოქტომბერში დაუბრუნა.]

• 2021 წლის სექტემბერში, სავარაუდოდ, სუს-დან გაჟონილ მასალებში ჟურნალისტების, ოპოზიციური პოლიტიკოსების, საჯარო მოხელეებისა და უცხოელი დიპლომატების საუბრებიც იყო. ანგარიშში წერია, რომ ინფორმაცია, სავარაუდოდ, უკანონო თვალთვალის და მიყურადების გზით იყო მოპოვებული.
კატეგორია: საქართველო
2021 წელს მომხდარ შემთხვევებთან დაკავშირებით „იუნესკო“ ხელისუფლებას 2022 წლის გაზაფხულზე დაუკავშირდება, ხოლო ინფორმაცია შემოდგომაზე გასაჯაროვდება.

2021 წლის 13 ივლისს „იუნესკოს“ გენერალურმა დირექტორმა განცხადება გაავრცელა და ხელისუფლებას ლაშქარავას სიკვდილის ფაქტის გამჭვირვალედ და სრულყოფილად გამოძიებისკენ მოუწოდა. 

ამ ინფორმაციის "იუნესკოს" "მოკლული ჟურნალისტების" სიაში გადატანის შემდეგ, ლაშქარავას გარდაცვალების თარიღად 5 ივლისი იყო მითითებული, რაც მოგვიანებით 11 ივლისით შეიცვალა.

alt

„იუნესკოს“ გამოხატვის თავისუფლებისა და ჟურნალისტების უსაფრთხოების განყოფილების ხელმძღვანელმა გილერმე კანელამ „მედიაჩეკერს“ უთხრა, რომ  სიაში ლაშქარავას გარდაცვალების თავდაპირველი თარიღი შეცდომით იყო მითითებული.

ორგანიზაციაში განგვიმარტეს, რომ „იუნესკო ჟურნალისტების მკვლელობებს სანდო პარტნიორებისგან მიღებულ ინფორმაციაზე დაყრდნობით გმობს.“

სიაში მითითებული „სასამართლო გამოძიების სტატუსი“ კი აღწერს მიაწოდა თუ არა ორგანიზაციის წევრმა სახელმწიფომ “იუნესკოს“ ჟურნალისტის სიკვდილთან დაკავშირებით სასამართლოს შემდგომი პროცესების შესახებ ინფორმაცია.

ლექსო ლაშქარავა 2021 წელს მოკლულ ჟურნალისტთა სიაში შეიყვანა მედიის თემებზე მომუშავე რამდენიმე საერთაშორისო ორგანიზაციამ: „რეპორტიორებმა საზღვრებს გარეშე“ (RSF), ჟურნალისტთა საერთაშორისო ფედერაციამ (IFJ) და „ჟურნალისტთა დაცვის კომიტეტმა“ (CPJ). ამ უკანასკნელს ვრცელი ინფორმაციაც უდევს ლაშქარავასთან დაკავშირებით და აღნიშნული აქვს, რომ მისი გარდაცვალების ოფიციალური მიზეზი ამ დროისთვის დადასტურებული არ არის.

შესწორება: მასალის თავდაპირველ ვერსიაში ეწერა: „იუნესკოს“ გამოხატვის თავისუფლებისა და ჟურნალისტების უსაფრთხოების განყოფილების ხელმძღვანელმა გილერმე კანელამ „მედიაჩეკერს“ უთხრა, რომ სიაში „იუნესკოს“ გენერალური დირექტორის მიერ ლაშქარავას გარდაცვალების თავდაპირველი თარიღი შეცდომით იყო მითითებული",  რაც "მედიაჩეკერმა" შეასწორა.

კატეგორია: საქართველო
  • ლექსო ლაშქარავას გარდაცვალებაზე ექსპერტიზის დასკვნა მისი ოჯახის უფლებადამცველებს კითხვის ნიშნებს უჩენს.
  • დასკვნის მიხედვით, “ტვ პირველის” ოპერატორის გარდაცვალება ნარკოტიკულმა საშუალებამ გამოიწვია და არა 5 ივლისს ძალადობრივი ჯგუფების თავდასხმის შედეგად მიღებულმა დაზიანებებმა.
  • დასკვნის ნაწილი შინაგან საქმეთა სამინისტრომ 7 იანვარს, მას შემდეგ გაასაჯაროვა, რაც მედიაში გავრცელდა ინფორმაცია, რომ UNESCO-მ ლაშქარავა 2021 წელს მოკლული ჟურნალისტების სიაში შეიყვანა.
  • “ტვ პირველის” დაქირავებული ექსპერტი ამბობს, რომ იანვრის დასაწყისში ექსპერტიზის დასკვნის ასლი უკვე ჰქონდა, თუმცა "ტვ პირველს" არ აცნობა, რადგან საშობაო დღეებში „სადღესასწაულო განწყობა“ არ გაეფუჭებინა.

რა წერია ექსპერტიზის დასკვნის ფრაგმენტებში?

ლევან სამხარაულის სახელობის ექსპერტიზის ბიუროს მიერ 30 დეკემბერს მიღებული 37-გვერდიანი დასკვნიდან მედიისთვის მიწოდებული ნაწილით ირკვევა:

• გვამის სასამართლო სამედიცინო და ქიმიურ-ტოქსიკოლოგიური მონაცემებით, ალექსანდრე ლაშქარავას სიკვდილის მიზეზია ნარკოტიკული საშუალება ჰეროინით ინტოქსიკაციის შედეგად განვითარებული გულ-სისხლძარღვთა და სუნთქვის მწვავე უკმარისობა (ინექციის უბნები ორივე საზარდულის მიდამოში).

• ორმხრივ საზარდულის მიდამოს კანში და კანქვეშა ცხიმოვან ქსოვილში აღენიშნებოდა სისხლჩაქცევები, მარცხნივ ხანდაზმულობით სიკვდილამდე 5 წუთი - 1 საათი, მარჯვნივ 30 წუთი - 1 საათი.

• ლაშქარავას სიკვდილიდან გვამის გამოკვლევამდე გასული უნდა იყოს დაახლოებით 14 საათი. ჰეროინის ინექციიდან სიკვდილამდე გასული უნდა იყოს საშუალოდ 10 წთ - 3 საათის შუალედი.

ექსპერტიზის დასკვნაში ნახსენებია დაზიანებები, რომლებიც ოპერატორმა 5 ივლის ჟურნალისტებზე თავდასხმის დროს მიიღო. თუმცა, ეს დაზიანებები ნაკლებად მძიმედაა შეფასებული და დოკუმენტის მიხედვით, ლაშქარავას გარდაცვალებას არ უკავშირდება.

„დაზიანებები განვითარებულია რაიმე მკვრივი-ბლაგვი საგნის მოქმედებით. ცოცხალ პირთა სასამართლო სამედიცინო ექსპერტიზისას სხეულის დაზიანების ხარიხის განსაზღვრის დროს დაზიანებები ერთობლიობაში აღებული ატარებენ ნაკლებად მძიმე დაზიანების ნიშნებს და არ იმყოფებიან კავშირში დამდგარ შედეგთან“.

რაშია პრობლემა?


ლექსო ლაშქარავას ოჯახის უფლებადამცველი ორგანიზაციის, “ახალგაზრდა იურისტთა ასოციაციის“ თავმჯდომარე ნიკა სიმონიშვილი ექსპერტიზის დასკვნაში სამ მთავარ პრობლემას ხედავს.
  • ექსპერტიზის წარმართვა
შინაგან საქმეთა სამინისტრომ “საიას” 2021 წლის ივლისში საერთაშორისო ექსპერტების დასახელება შესთავაზა, რომლებიც ექსპერტიზაცში ჩაერთვებოდნენ, თუმცა, მას შემდეგ, რაც ლაშქარავას ოჯახის უფლებების დამცველმა მხარემ ამერიკელი და ბრიტანელი ექსპერტები დაასახელა, შსს-მ მათს მიწვევაზე უარი განაცხადა.

“ისინი არ მოიწვიეს იმ მიზეზით, რომ თურმე ჩვენს სახელმწიფოს არ ჰქონია აშშ-სთან და დიდ ბრიტანეტთან ამგვარი თანამშრომლობის გამოცდილება, რაც არასერიოზული არგუმენტიაო”, - ამბობს ნიკა სიმონიშვილი.

მისივე თქმით, სამართალდამცავმა უწყებამ არ მოიწვია ის შვეიცარიელი ექსპერტებიც, რომლებსაც ლაშქრავას ოჯახს თავად სთავაზობდნენ:

“როცა ისინი გვთავაზობდნენ კონკრეტულ საერთაშორისო ექსპერტებს და გაუგებარი მიზეზებით, დაუსაბუთებლად ბოლოს უარყვეს, რა თქმა უნდა, [ეს გარემოება ექსპერტიზის დასკვნის] სანდოობის ხარისხს გვიკლებს“ - განმარტავს “საიას” თავმჯდომარე.

  • „ცხედრის გატაცება“
2021 წლის 11 ივლისს, დილაადრიან, ლექსო ლაშქარავას ცხედარი სამართალდამცავებმა სახლიდან ექსპერტიზის ბიუროში ისე გადაიყვანეს, რომ მის ადვოკატებს არ დაელოდნენ. ბინიდან ცხედრის ნაჩქარევად გამოსვენების კადრები მედიაშიც ვრცელდებოდა. 

“ლექსოს ცხედარი გაიტაცეს მაშინ, როდესაც ოჯახის ადვოკატები გზაში ვიყავით და ლექსოს სახლისკენ მივდიოდით, ხოლო დაახლოებით 4 საათის განმავლობაში ჩვენთვის უცნობია, რამე მანიპულირება ხომ არ მოხდა ცხედარზე.” - ამბობს ნიკა სიმონიშვილი.

  • დასკვნის გასაჯაროების ფორმა
ნიკა სიმონიშვილი ამბობს, რომ ექსპერტიზის დასკვნის შესახებ ლაშქარავას ოჯახმა და ადვოკატებმა მედიიდან შეიტყვეს, რაც ოჯახისთვის ფსიქოლოგიურად რთულად გადასატანი იყო:

“აბსოლუტურად გაუგებარი და მიუღებელია, როცა ასეთ ინფორმაციას მედიიდან იგებენ ოჯახის წევრები იმ პირობებში, როდესაც ექსპერტიზის დასკვნა რამდენიმე დღეა უკვე მიღებულია.“

სამხარაულის ბიუროს ექსპერტიზის დასკვნის ნაწილი 7 იანვარს მას შემდეგ გასაჯაროვდა, რაც გაირკვა, რომ იუნესკომ ლექსო ლაშქარავა 2021 წელს დაღუპოული ჟურნალისტების სიაში შეიყვანა. ნიკა სიმონიშვილის აზრით, ეს „პირდაპირ მიანიშნებს იმაზე, რომ ხელისუფლებას, სავარაუდოდ, ჰქონდა ეს დასკვნა, და ელოდებოდნენ იმ მომენტს, როდესაც ამ დასკვნის გამოყენება შეეძლებოდათ.”

დამატებით: იუნესკო ლექსო ლაშქარავას გამოძიების შესახებ. 

“საიას” თავმჯდომარე ფიქრობს, რომ ექსპერტიზის დასკვნას ჯერ ოჯახი და ადვოკატები უნდა გაცნობოდნენ, თუმცა სხვაგვარი ფორმით გასაჯაროვება ხელისუფლების მიერ „პოლიტიკური ქულების დაწერას“ უკავშირებს - „პოლიტიკური მოტივებით მოქმედება უფრო მეტ კითხვას გვიჩენს ექსპერტიზის დასკვნასთან მიმართებითო”, - დასძენს სიმონიშვილი.

“საიაში” მიიჩნევენ, რომ მართებული არ იყო არც სრული დოკუმენტის და არც მისი ნაწილის გასაჯაროვება და ინფორმაცია ისე უნდა გავრცელებულიყო, რომ გარდაცვლილის პერსონალური მონაცემები სათანადოდ დაეცვათ.

“თუმცა აქაც საინტერესოა, რომ გასაჯაროვდა ის ნაწილი, რომელიც რეალურად ხელისუფლებას აწყობდა საზოგადოებრივ აზრზე ზემოქმედებისთვის.”, - გვეუბნება სიმონიშვილი.

რას ამბობს დამოუკიდებელი ექსპერტი?

ლექსო ლაშქარავას ექსპერტიზის დასკვნას დაეთანხმა და 30 დეკემბერს ხელი მოაწერა “ტვ პირველის” მიერ დაქირავებულმა ექსპერტმა ალექსანდრე გეჯაძემ. თუმცა, ექსპერტიზის დასრულების შესახებ მას არხისთვის არ უცნობებია, რადგან „რადგან, დღესასწაულების ჩავლას ელოდა.“

„ადამიანური და მორალური თვალსაზრისით, ახლოვდებოდა შობა, განწყობა იყო სხვა და არ დავძაბე სიტუაცია. რომ დამერეკა 4-ში [როდესაც მისი თქმით, დასკვნის ასლი ჩაბარდა] და მეთქვა, დასკვნა ხელში მაქვს, მაგრამ ვერაფერს გეტყვით, წარმოიდგინეთ, რა რეაქცია იქნებოდა“, - გვითხრა ალექსანდრე გეჯაძემ.

გეჯაძე ამბობს, რომ შინაარსის გასაჯაროების უფლება არ ჰქონდა, თუმცა, ექსპერტიზის დასრულების შესახებ “ტვ პირველისთვის” ინფორმაციის მიწოდებას შობის მეორე დღეს აპირებდა: „მე რა ვიცოდი რომ გამოძიება გამოაქვეყნებდა. პოლიტიკურ სიმულაციებში მე ვერც ვერკვევი და არც მაინტერესებს“.

8 იანვარს “ტვ პირველის” დირექტორმა ვატო წერეთლმა ფეისბუქის პირად გვერდზე დაწერა, რომ მათთვის ალექსანდრე გეჯაძეს არც ექსპერტიზის დასრულების და არც დასკვნაზე ხელმოწერის შესახებ არ უცნობებია, რაც “ბადებს გონივრულ ეჭვს რომ "დასკვნა" სასწრაფოდ შეთხზეს, უკანა თარიღით, მას შემდეგ, რაც “იუნესკომ” ლექსო მოკლული ჟურნალისტების სიაში შეიყვანა“ - წერს ვატო წერეთელი.



ხელისუფლების პასუხისმგებლობა და 5 ივლისი

ნიკა სიმონიშვილი ფიქრობს, რომ ექსპერტიზის ამ დასკვნით ხელისუფლება 5 ივლისის მოვლენებთან თავისი ბრალეულობის გაწყვეტას ცდილობს.

“რაც უნდა იყოს ლექსოს გარდაცვალების მიზეზი, ხელისუფლების ბრალი 5 ივლისს ჟურნალისტების ჯანმრთელობის დაზიანებისა და უსაფრთხოების დაუცველობის საკითხში პირდაპირ იკვეთება“ - ამბობს ნიკა სიმონიშვილი.

“საია” გარდაცვალების ფაქტთან მიმართებით ექსპერტიზის დასკვნას შეისწავლის და ლაშქარავას ოჯახთან კონსულტაციის შემდეგ გადაწყვეტს გაასაჯაროვებენ თუ არა სრულ დოკუმენტს.

მანამდე კი ლაშქარავას ჯანმრთელობის დაზიანების ნაწილში სასამართლო პროცესები მიმდინარეობს. „ყველა დამნაშავე პირი გამოკვეთილი და დასჯილი არ არის, არც მოძალადეებისა და არც ორგანიზატორების ნაწილში, ასევე მნიშვნელოვანია შესაბამისი თანამდებობის პირების ბრალი გამოიკვეთოს, რომლებსაც უნდა ემოქმედათ და არ იმოქმედეს, ამ ნაწილში ვაგრძელებთ მუშაობას.”, - ამბობს “საიას” თავმჯდომარე ნიკა სიმონიშვილი.

კონტექსტი

"ტვ პირველის" ოპერატორი ალექსანდრე ლაშქარავა 11 ივლისს გამთენიისას საკუთარ სახლში გარდაცვლილი იპოვეს. იგი ერთ-ერთია მედიის 53 წარმომადგენელს შორის, რომელსაც 5 ივლისს "თბილისი პრაიდის" მიერ დაგეგმილი "ღირსების მარშის" წინააღმდეგ გამოსული ძალადობრივი ჯგუფები ფიზიკურად გაუსწორდნენ, რის შემდეგაც ის საავადმყოფოში სახის ძვლის მოტეხილობითა და თვალის დაზიანებით გადაიყვანეს. ალექსანდრე ლაშქარავა სამედიცინო დაწესებულებიდან 8 ივლისს გაწერეს. ოპერაციის შემდეგ იგი მკურნალობას სახლში განაგრძობდა.
კატეგორია: საქართველო
მედიის თემებზე მომუშავე საერთაშორისო ორგანიზაციის, „რეპორტიორები საზღვრებს გარეშეს“ (RSF) მიხედვით, 2021 წელს მსოფლიოში მედიის 45 წარმომადგენელი და 4 სამოქალაქო ჟურნალისტი მოკლეს.

აქედან ყველაზე მეტი ჟურნალისტი მექსიკაში (7) და ავღანეთში (6) მოკლეს.

alt

2021 წელს მოკლულ ჟურნალისტთა სიაში მოხვდა „TV პირველის” ოპერატორი ლექსო ლაშქარავაც.

RSF-ის გვერდზე 20 წლიანი სტატისტიკა იძებნება. ამ დროის განმავლობაში საქართველო ორჯერ მოხვდა იმ ქვეყნების სტატისტიკაში, სადაც ჟურნალისტები მოკლეს. პირველად 2008 წლის ომის დროს, როდესაც 4 ჟურნალისტი მოკლეს და მეორედ 2021 წელს, 5 ივლისის მოვლენების დროს დაშავებული ლექსო ლაშქარავას გარდაცვალების გამო.

RSF-ის განმარტებით, მათ მიერ გამოქვეყნებული ცხრილში მხოლოდ იმ ჟურნალისტების ჩამონათვალია, რომლებზეც ორგანიზაციამ დაადგინა, რომ მათი სიკვდილი ჟურნალისტურ საქმიანობას უკავშირდებოდა.
კატეგორია: საერთაშორისო ამბები
2021 წელს მსოფლიოს მასშტაბით მედიასივრცეში არაერთი მნიშვნელოვანი მოვლენა მოხდა. „მედიაჩეკერი“ საინტერესო შემთხვევებს მთელი წლის განმავლობაში აშუქებდა. გთავაზოობთ 2021 წლის 10 მნიშვნელოვან ამბავს მედიის სფეროში.

ტრამპის დაბლოკვა Twitter-ზე, შეფასებები და Twitter-ის ახალი, საპილოტე პროექტი

2021 წლის 8 იანვარს უპრეცენდენტო შემთხვევა მოხდა და კომპანია Twitter-მაამერიკის შეერთებული შტატების 45-ე პრეზიდენტის, დონლად ტრამპის ანგარიში - @realDonaldTrump სამუდამოდ დაბლოკა.

გადაწყვეტილებას წინ ორი დღით ადრე დონალდ ტრამპის მხარდამჭერების მიერ კაპიტოლიუმის შენობაზე შტურმი და პრეზიდენტის Twitter-ის ანგარიშზე გავრცელებული ძალადობის წამქეზებელი შინაარსის განცხადებები უძღოდა.

უნდა ჰქონოდა თუ არა პრეზიდენტს სოციალურ ქსელში სხვა მომხმარებლებისგან განსხვავებით პრივილეგიები? და ვინ უნდა აკონტროლებდეს სოციალური მედიის კომპანიებს? - ამ თემაზე ვრცლად ჩვენს სტატიაში წაიკითხავთ.

გარდაიცვალა ლარი კინგი

ლეგენდარულ ამერიკელი ტელეწამყვანი 2021 წლის 23 იანვარს, 87 წლის ასაკში, ლოს ანჯელესის საავადმყოფოში გარდაიცვალა.

წამყვანს კარიერის განმავლობაში 50 000-მდე ინტერვიუ აქვს ჩაწერილი. მის რესპონდენტებს შორის იყვნენ აშშ-ის პრეზიდენტები ჯერალდ ფორდიდან ბარაკ ობამამდე. სხვა ცნობილ სტუმრებს შორის ასევე იყვნენ - დალაი ლამა, ნელსონ მანდელა, მარტინ ლუთერ კინგი და სხვები. კინგის ცხივრების შესახებ მეტს ამ ბმულზე გაიგებთ.

პრესის თავისუფლების შეზღუდვა პანდემიის საბაბით

Thomson Reuters Foundation-ის კვლევის მიხედვით, კოვიდ კრიზისი და პანდემია ზოგიერთი სახელმწიფოს მთავრობამ მედიის თავისუფლების შესაზღუდად გამოიყენა.

ეს კი რამდენიმე ფორმით, მათ შორის ინფორმაციაზე წვდომის შეზღუდვით, ჟურნალისტებზე თავდასხმით, მედია ორგანიზაციების დახურვითა და პრესის თავისუფლების შემზღუდავი კანონების მიღებით გამოიხატა. მეტ დეტალს ამ თემაზე ჩვენს სტატიაში შეიტყობთ.

დახურული გამოცემები, უმუშევრად დარჩენილი ჟურნალისტები - პანდემიის გავლენა მედიაზე

კორონავირუსის შედეგად გამოწვეულმა ფინანსურმა კრიზისმა შეამცირა მედიასაშუალებების სარეკლამო შემოსავალი, რამაც საკადრო ცვლილებები, ანაზღაურების შემცირება, ზოგიერთ შემთხვევაში კი ორგანიზაციების დახურვა გამოიწვია. ამის შესახებ ვრცლად 2021 წელს გამოქვეყნებულ კვლევაში წაიკითხავთ.

ბელორუსიაში დააკავეს ხელისუფლების მიმართ კრიტიკულად განწყობილი ჟურნალისტი

23 მაისს ავიაკომპანია Ryanair-ის ათენიდან ვილნიუსისკენ მიმავალი თვითმფრინავი მინსკის აეროპორტში დაუგეგმავად დაეშვა. ბელარუსელმა სამართალდამცავებმა ხელისუფლების მიმართ კრიტიკულად განწყობილი ჟურნალისტი, რომან პროტასევიჩი დააკავეს. დეტალებს გაიგებთ აქ.

პულიცერის პრემია 18 წლის მოქალაქეს

18 წლის დარნელა ფრეიზერს, რომელმაც 2020 წელს ჯორჯ ფლოიდის მკვლელობა გადაიღო, ჟურნალისტიკაში ყველაზე პრესტიჟული ჯილდო - პულიცერის პრემია გადასცეს. ფრეიზერი ჟურნალისტი არაა და არც მედიაში მუშაობს. წაიკითხეთ, რამდენად მნიშვნელოვანია სამოქალაქო ჟურნალისტიკა.

ფილიპინელ და რუს ჟურნალისტებს ნობელის პრემია გადაეცათ მშვიდობის დარგში

ფილიპინელ და რუს ჟურნალისტებს: მარია რესასა და დიმიტრი მურატოვს მშვიდობის დარგში 2021 წლის ნობელის პრემია მიანიჭეს. ნორვეგიის ნობელის კომიტეტი ჟურნალისტებს ჯილდოს ფილიპინებსა და რუსეთში გამოხატვის თავისუფლებისათვის გაბედული ბრძოლისათვის გადასცემს.

ეს ჟურნალისტებისთვის ნობელის მშვიდობის პრემიის მინიჭების პირველი ფაქტია 1935 წლის შემდეგ.

"ფეისბუქის" ბნელი მხარე - რა წერია "ფეისბუქის ქაღალდებში"

ფინანსური მოგება მომხმარებლების უსაფრთხოებაზე წინ, სიძულვილის ენასა და დეზინფორმაციასთან არასაკმარისად ბრძოლა, ვიეტნამში ანტი სამთავრობო პოსტების ცენზურა - ეს იმ ბრალდებების არასრული ჩამონათვალია, რომლებშიც მარკ ცუკერბერგის კომპანია „მეტას“ (ძველი სახელით „ფეისბუქი“) მედია პროექტი The Facebook Papers (“ფეისბუქის ქაღალდები“) ამხელს.

ეს 17 ამერიკულ მედიასაშუალების საერთო პროექტია. სხვადასხვა ორგანიზაციის ჟურნალისტებმა ერთობლივი მუშაობით „ფეისბუქის“ შიდა ორგანიზაციულ დოკუმენტებზე წვდომა მოიპოვეს. წაიკითხეთ აქ, თუ რაში ამხელს გაჟონილი დოკუმენტები „ფეისბუქს“.

რა არის მეტავერსი?

მარკ ცუკერბერგმა 2021 წლის 28 ოქტომბერს “ფეისბუქს“ სახელი შეუცვალა, „მეტა“ დაარქვა და დააანონსა, რომ ის ახალ ეტაპზე გადადის და მეტავერსის განვითარებაზე იწყებს მუშაობას. გაიგეთ ყვლელაფერი მეტავერსის შესახებ ამ სტატიაში.

რატომ გაათავისუფლა რეიტინგული ტელეწამყვანი CNN-მა?

წლის ერთ-ერთი გახმაურებული მოვლენა CNN-ის ცნობილი წამყვანის, კრის კუომოს გათავისუფლება იყო. ნიუ-იორკის გენერალური პროკურატურის მიერ გამოქვეყნებული მასალებით გაირკვა, რომ წამყვანი სკანდალში გახვეული პოლიტიკოსი ძმის დასახმარებლად თავის ჟურნალისტურ სტატუსსა და გავლენას იყენებდა. წაიკითხეთ დეტალები ამ ბმულზე.
კატეგორია: საქართველო

"კოალიცია მედიის ადვოკატირებისთვის" აცხადებს, რომ "საზოგადოებრივი მაუწყებლის" ჟურნალისტის ქეთი თუთბერიძის მიმართ "მუქარის შემცველი განცხადებების და შევიწროების ფაქტები რეალურ საფრთხეებს შეიცავს. 

რა მოხდა? 

კოალიციის ინფორმაციით, 2021 წლის 24 დეკემბერს, პოლიტიკური პარტია „კონსერვატიული მოძრაობის" მიერ სახალხო დამცველის ოფისის წინ ორგანიზებული აქციის გაშუქებისას ჟურნალისტ ქეთი თუთბერიძეს პროფესიული საქმიანობის თავისუფლად შესრულების შესაძლებლობა არ ჰქონდა. აქციის მონაწილეები 2021 წლის 5 ივლისის მოვლენების დროს დაკავებულების გათავისუფლებას ითხოვდნენ.

გავრცელებული კადრებიდან, ჩანს, რომ აქციის მონაწილეებმა ჟურნალისტი ალყაში მოაქციეს და სიტყვიერი შეურაცხყოფა მიაყენეს. ჟურნალისტის მიმართ აგრესია სოციალურ ქსელშიც გაგრძელდა. კოალიციის განცხადებით, ეს ქეთი თუთბერიძის მიმართ ძალადობის წახალისებას უწყობს ხელს.


ჟურნალისტის შევიწროების ერთ-ერთ მიზეზად მის მიერ მომზადებული მასალა ალტ-ინფოს” სახიფათო იდეოლოგია" სახელდება.

რას ითხოვს მედიაკოალიცია?

"კოალიცია მედიის ადვოკატირებისთვის" მიიჩნევს, რომ 5 და 6 ივლისს ჟურნალისტების მასობრივი დარბევის ფონზე "საზოგადოებრივი მაუწყებლის" ჟურნალისტის მიმართ მუქარის შემცველი განცხადებების და შევიწროების ფაქტები რეალურ საფრთხეებს შეიცავს.

კოალიციის წევრები შინაგან საქმეთა სამინისტროს ქეთი თუთბერიძის მიმართ მუქარის შემცველი განცხადებების და შევიწროვების ფაქტების დაუყოვნებლივ შესწავლისა და სათანადო სამართლებრივი რეაგირებისკენ მოუწოდებენ.

კატეგორია: საქართველო
18 დეკემბერს ქარტიის ყოველწლიურ, რიგით მეცამეტე საერთო კრებაზე, საქართველოს ჟურნალისტური ეთიკის ქარტიის წევრებმა ქარტიის საბჭოს სამი ახალი წევრი აირჩიეს.

საბჭოს წევრები გახდნენ:

  • თბილისის კვოტით - ხატია ღოღობერიძე 
  • რეგიონების კვოტით - თამარ რუხაძე და მანანა ქველიაშვილი 

სხდომაზე წევრების მიერ დასახელებული საბჭოს წევრობის კანდიდატები იყვნენ:

თბილისის კვოტით:
  • მალხაზ რეხვიაშვილი
  • ხატია ღოღობერიძე
  • ნინო რამიშვილი
რეგიონის კვოტით:
  • ია მამალაძე
  • ვლადიმერ ჩხიტუნიძე
  • თამარ რუხაძე
  • მანონი ბოკუჩავა
  • ირმა ზოიძე
  • მანანა ქველიაშვილი
  • შორენა ღლონტი

ქარტიის საბჭოში სულ 9 წევრია, 6 წევრი რეგიონულ მედიას წარმოადგენს, 3 კი - თბილისს. საბჭო საკუთარი განცხადებით, საბჭო დატოვა ნინო ჯაფიაშვილმა, რომელსაც მაია წიკლაური შეცვლის.

საბჭოს ახალი შემადგენლობა ასეთია:

  • ზვიად ქორიძე - მედიაექსპერტი
  • თამარ რუხაძე - მთის ამბები
  • ხატია ღოღობერიძე - On.ge
  • კამილა მამედოვა - რადიო მარნეული
  • მანანა ქველიაშვილი - ბათუმელები
  • ნინა ხელაძე - TOK TV
  • სოფო ჟღენტი - აჭარის ტელევიზია
  • გულო კოხოძე - "სამხრეთის კარიბჭე"
  • ნათია ზოიძე - დამოუკიდებელი ჟურნალისტი
საქართველოს ჟურნალისტური ეთიკის ქარტიის საბჭო 9 ჟურნალისტისგან შედგება. 9 წევრიან საბჭოში 3-ს თბილისის კვოტით ირჩევენ, 6-ს კი - რეგიონების. საბჭოს წევრები 3 წლის ვადით ირჩევიან.

18 დეკემბერს ქარტიის ყოველწლიური, რიგით მეცამეტე საერთო კრება ონლაინ, Zoom-ის პლატფორმის გამოყენებით გაიმართა. საერთო კრებაზე წევრების წინაშე ანგარიშებით წარდგნენ ქარტიის საბჭოს თავმჯდომარე კამილა მამედოვა, ქარტიის აღმასრულებელი დირექტორი მარიამ გოგოსაშვილი და სარევიზიო კომისიის​ წევრი გუბაზ სანიკიძე.
კატეგორია: საქართველო

საქართველოს ჟურნალისტური ეთიკის ქარტიამ 18 დეკემბერს, ქარტიის საერთო კრებაზე "ქარტიის პრიზი 2021-ის" გამარჯვებულები გამოავლინა.

ჟიურიმ საუკეთესოდ შემდეგი ნამუშევრები მიიჩნია:

ვიდეორეპორტაჟი: ბასტი მგალობლიშვილი - პუბლიკა

მასალა ნახეთ ამ ბმულზე

მულტიმედია პროექტი: რეპორტაჟების სერია ჭიათურიდან - მთის ამბები

მასალა ნახეთ ამ ბმულზე.

სტატია ან ნარკვევი ბეჭდურ ან ონლაინ მედიაში: ეკა ქევანიშვილი - რადიო თავისუფლება

მასალა ნახეთ ამ ბმულზე

ჟურნალისტური გამოძიება: ნინო წვერავა - სტუდია მონიტორი, რადიო თავისუფლება

მასალა ნახეთ ამ ბმულზე

ქალთა უფლებებისა და გენდერული თანასწორობის გაშუქება: ანი ბურდული - რადიო თავისუფლება

მასალა ნახეთ ამ ბმულზე

გამარჯვებულებს საჩუქრად ქარტიის სპეციალური პრიზები და ლეპტოპები გადაეცათ.

კატეგორია: გრაფიკა
ქართველი ინტერნეტ მომხმარებლებისთვის არაერთი თემატური ჯგუფი არსებობს, მათ შორის მოგზაურობის, ჯანდაცვის, ქველმოქმედების, ვაჭრობის, კულინარიის და სხვა. თუმცა, როგორ შეიძლება ეს სივრცე მედიასაშუალებებმა ეფექტურად აითვისონ და საერთოდ რა სარგებელს მოუტანთ მათ? გიზიარებთ "რადიო თავისუფლების" ციფრული რედაქტორის, საბა ჩიხლაძის რჩევებს. 

კატეგორია: საქართველო
“რუსთავი 2-ის” ყოფილმა დირექტორმა და „მთავარი არხის“ დამფუძნებელმა ნიკა გვარამიამ, “რუსთავი 2-ის” საქმეზე მოსამართლის აცილება მოითხოვა. მოსამართლემ კი შუამდგომლობა არ დააკმაყოფილა.

რა მოხდა

15 დეკემბერს, "რუსთავი 2-ის" ქონების მართლსაწინააღმდეგოდ გამოყენებისა და გაფლანგვის საქმეზეზე გამართულ სასამართლო სხდომაზე გაირკვა, რომ საქმის განმხილველი მოსამართლე ლაშა ჩხიკვაძე ამავე საქმეზე გამოკითხული ერთ-ერთი მოწმის, “რუსთავი 2-ის” მმართველი კომპანიის, სს "მედია ჰოლდინგის" დირექტორის ზაზა გველესიანის მეგობარია.

ნიკა გვარამიას თქმით, მოსამართლე ლაშა ჩხიკვაძემ ზაზა გველესიანი მოწმეთა სიიდან ამოიღო. თუმცა, მხარეებს მასთან კავშირის შესახებ არ აცნობა.

სასამართლო სხდომაზე მოსამართლემ დაადასტურა, რომ ზაზა გველესიანთან მეგობრული ურთიერთობა აკავშირებს, თუმცა, თქვა, რომ მან არ იცოდა რა თანამდებობას იკავებს "რუსთავი 2-ში" მისი მეგობარი.

მოსამართლემ განმარტა, რომ მეგობრობა არ ნიშნავს, რომ გველესიანთან საქმესთან დაკავშირებითაც საუბრობს.

საქმის აცილების შესახებ შუამდგომლობის არდაკმაყოფილების მიზეზად მოსამართლემ მისი "უსაფუძვლობა" დაასახელა.

ნიკა გვარამიას საქმე

“რუსთავი 2-ის” ყოფილ დირექტორს ნიკა გვარამიას, საქართველოს პროკურატურამ ბრალი 2019 წლის 9 აგვისტოს სისხლის სამართლის კოდექსის 220-ე მუხლით წარუდგინა. მას უფლებამოსილების ბოროტად გამოყენებასა და ორგანიზაციის ინტერესის საწინააღმდეგოდ მოქმედებას ედავებიან, რითაც მაუწყებელს 7 მილიონ ლარამდე ზარალი მიადგა. საქმე ეხება 2015 წელს, სარეკლამო კომპანია „ინტერ მედია პლიუსთან“ გაფორმებულ ხელშეკრულებას.

ნიკა გვარამიას წინააღმდეგ გამოძიება მას შემდეგ დაიწყო, რაც 16 ივლისს „რუსთავი 2-ის“ 9%-იანი წილის ყოფილმა მფლობელმა, ნინო ნიჟარაძემ მის წინააღმდეგ პროკურატურაში საჩივარი შეიტანა.
კატეგორია: საქართველო
კოალიცია „მედიის ადვოკატირებისთვის“ უარყოფითად აფასებს აზარტული თამაშების და მათი რეკლამების შემზღუდავი საკანონმდებლო პაკეტის დაჩქარებული წესით განხილვას.

რა მოხდა?

2021 წლის 13 დეკემბერს, საქართველოს პარლამენტის ბიურომ “ქართული ოცნების” წევრების მიერ აზარტული თამაშების რეკლამის შესახებ ინიცირებული კანონპროექტის დაჩქარებული წესით განხილვა გადაწყვიტა

ცვლილებები “მაუწყებლობის შესახებ” საქართველოს კანონსაც ეხება. ცვლილების მიხედვით, აზარტული თამაშობის, ტოტალიზატორის, ლოტოს, ბინგოს, აზარტული თამაშობის, ასევე მათი მოწყობის ორგანიზატორის შესახებ რეკლამის გავრცელება დაუშვებელი იქნება.

გამონაკლისია, როდესაც ასეთ რეკლამას მაუწყებელი სპორტული ღონისძიების, სპორტული შეჯიბრების ან/და სპორტული ორგანიზაციის საქმიანობის მაუწყებლობის სპონსორობის სანაცვლოდ გაავრცელებს.

რაშია პრობლემა?

მედიაკოალიციის შეფასებით, კანონპროექტის განმარტებით ბარათში წარმოდგენილი არგუმენტაცია „უკიდურესად პრობლემური და არასაკმარისია“.

კოალიციის განცხადებით, ძლიერდება ეჭვი, რომ საკანონმდებლო პაკეტის დაჩქარებული წესით მიღების საჭიროება არ არსებობს და პარლამენტის რეალური მიზანი, სრულყოფილი და პროფესიული განხილვების თავიდან აცილებაა.

მედიაკოალიცის შეფასებით:

• საგანგაშოა, რომ “მაუწყებლობის შესახებ” კანონში შესატანი ცვლილების გავლენა მაუწყებლების შემოსავლებზე არ არის სათანადოდ შეფასებული.

• არსებობს რისკი, რომ კანონპროექტის მიღება მნიშვნელოვნად დააზარალებს მაუწყებლების ფინანსურ დამოუკიდებლობას.

• კანონპროექტის მომზადების პროცესში არ არის მიღებული კონსულტაციები სახელმწიფო, არასახელმწიფო ან/და საერთაშორისო ორგანიზაცია/დაწესებულებებისგან, კანონპროექტს არ ერთვის დარგის ექსპერტების, მათ შორის, კომუნიკაციების კომისიის, სათანადო დასკვნები და შეფასებები.

კოალიციის განმარტებით, კანონპროექტის დაჩქარებული წესით განხილვა და ერთ დღეში მისი ორი მოსმენით მიღება გამორიცხავს სრულფასოვან საპარლამენტო განხილვას, დაინტერესებული პირების მიერ მოსაზრებების წარდგენას და კანონპროექტის დახვეწას.

„აღნიშნული პროცედურები პრინციპულად მნიშვნელოვანია ინიციატივებზე, რომლებსაც მნიშვნელოვანი ფინანსური ეფექტების გამოწვევა შეუძლია სახელმწიფო ბიუჯეტისა და მედია სექტორისთვის“, - წერია განცხადებაში.
კატეგორია: საქართველო
საქართველოს ჟურნალისტური ეთიკის ქარტია 2021 წლის მუნიციპალური არჩევნების მედიაში გაშუქების მონიტორინგის საბოლოო ანგარიშებს აქვეყნებს.

ანგარიშები: სატელევიზო ახალ ამბებს, სატელევიზიო ტოქშოუებს, ონლაინ მედიასა და სოციალურ მედიას მოიცავს.

მონიტორინგის დროს რამდენიმე ძირითადი მიგნება გამოიკვეთა:

სატელევიზიო ახალი ამბები (5 ივლისი - 14 ნოემბერი, 2021)

• მაუწყებელთა პოლარიზაცია წინა წელთან შედარებით კიდევ უფრო გაიზარდა - ტელესივრცე ორ ბანაკად გაიყო. ტელეარხების ნაწილი მიკერძოებულია ხელისუფლებისადმი, მეორე ნაწილს კი ოპოზიციის მიმართ მიკერძოებული სარედაქციო პოლიტიკა აქვს.

• პოლიტიკური პოლარიზაციის შედეგად ეროვნული მაუწყებლები წინასაარჩევნო პერიოდში ხშირად არღვევდნენ სამართლიანი და თანაბარი გაშუქების პრინციპს.

• გამოიკვეთა სიუჟეტების სიმცირე საარჩევნო თემაზე, რომელიც ამომრჩეველს მეტად დაეხმარებოდა ინფორმაციის საფუძველზე შეგნებული არჩევანის გაკეთებაში.

• სატელევიზიო ახალ ამბებში ხშირად გვხვდებოდა პროფესიული ეთიკის დარღვევისა და მანიპულაციის ფაქტები.

• ხელისუფლების მიმართ ლოიალურ სარედაქციო პოლიტიკას ინარჩუნებს საზოგადოებრივი მაუწყებლის პირველი არხი.

• საზოგადოებრივი მაუწყებლის პირველი არხი ყველაზე დადებითად მთავრობას აშუქებდა (21%) ყველაზე უარყოფითად კი საქართველოს მესამე პრეზიდენტი მიხეილ სააკაშვილი გაშუქდა (21%).

• საზოგადოებრივი მაუწყებლის აჭარის ყველაზე პოზიტიურად (21%) ადგილობრივ ხელისუფლებას აშუქებდა.

• ტელეკომპანია ,რუსთავი 2“ მფლობელის შეცვლიდან ორი წლის თავზე შეუერთდა იმ მაუწყებელთა რიგს, რომლებიც განსაკუთრებით უარყოფითად აშუქებენ ოპოზიციას, მმართველ პარტია „ქართულ ოცნებას“ და მთავრობას კი დადებითად.

• მონიტორინგის პერიოდში „ტვ პირველი“ მაუწყებლობდა ხელისუფლებასთან მკვეთრი დაპირისპირებისა და პროტესტის პირობებში.

• „მთავარი არხი“ 6 ოქტომბრიდან ეკრანზე წარწერით #თავისუფლებამიშას მაუწყებლობდა.

• ,,მთავარ არხს “წინასაარჩევნო პერიოდში პოლიტიკური სუბიექტების საარჩევნო კამპანიის გაშუქებისას შერჩევითი მიდგომა ჰქონდა. ის ძირითადად დროს „ნაციონალური მოძრაობის“ აქტივობის გაშუქებას უთმობდა.

• 18 ოქტომბერს, ტელეკომპანია იმედმა ღიად განაცხადა, რომ საგანგებო რეჟიმზე გადადის. მისი მთავარი მიზანია, არ დაუშვას „ნაციონალური მოძრაობის“ რევანში საქართველოში.

• ტელეარხების მიკერძოება კონკრეტული სუბიექტის მიმართ ნათლად ჩანდა ისეთი მნიშვნელოვანი თემების გაშუქებისას, როგორიცაა „5 ივლისის მოვლენები“, „ევროკავშირის მაკროფინანსურ დახმარებაზე უარის თქმა“, „შარლ მიშელის შეთანხმების ანულირება“ და, სავარაუდოდ, „სუსიდან გამოჟონილი ჩანაწერები“ და „მიხეილ სააკაშვილის დაპატიმრება“.

• მეტწილად გაუარესებულია წინა წლებთან შედარებით რეგიონული ტელევიზიების საინფორმაციო გამოშვებების ხარისხი, როგორც ტექნიკური, ისე შინაარსობრივი თვალსაზრისით

• რეგიონული არხების ნაწილი ხშირად იყენებდა სამთავრობო უწყებების პრესსამსახურების მომზადებულ მასალებს, მკაფიო მინიშნების გარეშე;

• კვლავ პრობლემად რჩება რეგიონულ მაუწყებლებში გასული სიუჟეტების ზედაპირულობა და სიღრმისეული მასალების არარსებობა;

• რეგიონულ მაუწყებელთა უმეტესობის მაყურებლები ამომწურავ ინფორმაციას ვერ იღებდნენ არათუ საარჩევნო პროცესების, არამედ ქვეყანაში განვითარებული მოვლენების შესახებ;

• რამდენიმე რეგიონული არხის საინფორმაციო გამოშვებაში დაფიქსირდა სარეკლამო შინაარსის შემცველი სიუჟეტები, რაც დაუშვებელია;

• ტვ 25 კრიტიკულად აშუქებდა ,,ქართული ოცნების” და ხელისუფლების აქტივობებს.

• მეცხრე არხს და ტელეკომპანია „გურიას“ ხელისუფლების და ,,ქართული ოცნების” მიმართ კრიტიკული სარედაქციო პოლიტიკა აქვს.

• ტელეკომპანია „გურჯაანი“ ხელისუფლებისა და მმართველი პარტიისადმი მიკერძოებული არხია. მონიტორინგის პერიოდში უკრიტიკოდ, დადებითად შუქდებოდა ადგილობრივი და ცენტრალური მთავრობის საქმიანობა.

• ხელისუფლებისა და მმართველი პარტიისადმი დადებითი განწყობა გამოიკვეთა ტელეკომპანია „თრიალეთზე“, TV 4-სა და ტელეკომპანია „რიონზე“ დაკვირვების შედეგად

ონლაინ მედია ( 5 ივლისი - 14 ნოემბერი, 2021)

• ონლაინ მედიის უმეტეს ნაწილში შეინიშნებოდა სარედაქციო დამოუკიდებლობის მაღალი ხარისხი. შედეგად, ონლაინ მედიაში ნაკლებად იგრძნობოდა მკვეთრი პოლიტიკური პოლარიზაცია.

• ონლაინ გამოცემები მონიტორინგის სუბიექტებს შორის ყველაზე ხშირად და დიდი რაოდენობით მთავრობას (ადგილობრივი და ცენტრალური) და მმართველ პარტიას აშუქებდნენ, ხოლო ოპოზიციიდან - “ერთიან ნაციონალურ მოძრაობასა” და მიხეილ სააკაშვილს.

• გაშუქების ტონი ონლაინ მედიაში უმეტესად ნეიტრალური იყო; გამოიკვეთა მხოლოდ რამდენიმე ვებ-გვერდი, რომლებზეც აშკარად შეინიშნებოდა დადებითი განწყობა სახელისუფლებო გუნდის ან ოპოზიციის მიმართ.

• რეგიონული გამოცემების უმრავლესობა ვერ ახერხებდა ადგილობრივი მოსახლეობის სათანადოდ ინფორმირებას რეგიონში მიმდინარე პოლიტიკური პროცესების შესახებ. • ონლაინ გამოცემების ნაწილი ცდილობდა და ახერხებდა, რომ ჯეროვნად დაეცვა ჟურნალისტური ეთიკის სტანდარტები.

• ვებგვერდების ნაწილი არასათანადოდ მიჯნავდა სარედაქციო მასალებისგან სარეკლამო მასალებს და მათ შესაბამისი მითითების გარეშე აქვეყნებდა.

• ონლაინ მედიის ყველაზე დიდ გამოწვევად მოვლენების ზედაპირული გაშუქება გამოიკვეთა.

• მერობის კანდიდატთა გაშუქებისას, უმეტეს შემთხვევებში, დედაქალაქის თუ სხვა მუნიციპალიტეტების კანდიდატების გაშუქება ხდებოდა პარტიული დაპირისპირებების კონტექსტში.

• 2020 წელს განხორციელებული მედიამონიტორინგის შედეგებთან შედარებით, მკვეთრად გაუმჯობესდა მედიასაშუალებების მიერ გენდერულად სენსიტიური გაშუქება.

სატელევიზიო ახალი ამბების შემთხვევაში აკვირდებიან: 14 სატელევიზიო (5 ეროვნულ, 9 რეგიონულ) არხს: პირველი არხი, აჭარის საზოგადოებრივი მაუწყებელი, ტელეკომპანია მთავარი, რუსთავი 2, იმედი, ტვ პირველი, ტვ 25, თრიალეთი, მე-9 არხი, ტვ ოდიში, ტელეკომპანია გურჯაანი, ტვ გურია, ტელეკომპანია რიონი, ტვ 4.

ონლაინ მედიამონიტორინგისთვის შეირჩა 17 ონლაინ მედიასაშუალება: ambebi.ge, batumelebi.ge, guriismoambe.com, interpressnews.ge, knews.ge, kutaisipost.ge, livepress.ge, mpn.ge, netgazeti.ge, news.on.ge, publika.ge, qartli.ge, radiotavisupleba.ge, reginfo.ge, sknews.ge, sputnik-georgia.com, tabula.ge.

მონიტორინგი რაოდენობრივი და თვისებრივი კვლევის კომპონენტებისგან შედგება.
კატეგორია: გრაფიკა
კოვიდ-19-ის პანდემიისა და ვაქცინაციის გაშუქებისას განსაკუთრებით მნიშვნელოვანია სიზუსტის დაცვა. ნებისმიერი არაზუსტი ინფორმაცია პირდაპირ აისახება ადამიანების ჯანმრთელობაზე. საზოგადოებრივი ჯანდაცვის სპეციალისტის, ზურაბ ალხანიშვილის რჩევები მედიისთვის. 
კატეგორია: გრაფიკა
სოციალური მედიის ბოტი პროგრამულად შექმნილი ციფრული პროფილია, რომელიც მიმსგავსებულია რეალური ადამიანის პროფილთან. ხშირად ბოტებს არაკეთილსინდისიერი მიზნებისთვის იყენებენ.

რეკომენდაციები სოციალურ ქსელებში ბოტების ამოსაცნობად:

კატეგორია: საქართველო
კომუნიკაციების კომისიასთან საპროტესტო აქცია მიმდინარეობს. სამოქალაქო მოძრაობა „სირცხვილიას“ აქტივისტები კომისიის მიერ „მთავარი არხის“ დაჯარიმებას აპროტესტებენ.

აქტივისტები ამბობენ, რომ კრიტიკული მედიასაშუალების სანქცირება ავტორიტარიზმისკენ გადადგმული ნაბიჯია და სიტყვისა და გამოხატვის თავისუფლებას ზღუდავს.

„პოლიტიკური ხელისუფლების მხრიდან კიდევ ერთხელ დავინახეთ ცენზურის დაკანონებისა და ზოგადად, კრიტიკული აზრის შეზღუდვის განზრახვა. ამასთან ერთად, “მთავარი არხის” სანქცირება არის სამოქალაქო აქტივისტების წინააღმდეგ წარმოებული რეპრესიული პოლიტიკის გაგრძელებაა.“, - ამბობენ „სორცხვილიას“ აქტივისტები.

“მთავარი არხის” მიმართ წარმოებულ საქმეებს საგანგაშოდ მიიჩნევენ კოალიცია “მედიის ადვოკატირებისთვის” წევრი ორგანიზაციები. მედიაკოალიციის განცხადებით,  “მთავარი არხის” სანქცირების ტენდენცია ცენზურის ნიშნებს ატარებს და შესაძლოა კომუნიკაციების კომისიის მიზანი მაუწყებლის შეჩერება და კრიტიკული სარედაქციო პოლიტიკის შეცვლა იყოს.

კომუნიკაციების ეროვნულმა კომისიამ „მთავარი არხი“ “სირცხვილიას” ვიდეორგოლის განთავსების გამო 111 903 ლარით დააჯარიმა. რგოლში “ქართული ოცნების” დეპუტატების კოლაჟი, რუსეთის პრეზიდენტის, ვლადიმერ პუტინის, ფოტოდ გარდაიქმნება.
კატეგორია: რესურსები
კოვიდ-19-ის პანდემიისა და ვაქცინაციის გაშუქებისას განსაკუთრებით მნიშვნელოვანია სიზუსტის დაცვა. ნებისმიერი არაზუსტი ინფორმაცია პირდაპირ აისახება ადამიანების ჯანმრთელობაზე.



საზოგადოებრივი ჯანდაცვის სპეციალისტი, ზურაბ ალხანიშვილის საუბრობს ათ საკითხზე, რაზეც მედიამ ყურადღება უნდა გაამახვილოს.

1. ეცადეთ, არ გამოიწვიოთ პანიკა საზოგადოებაში

საზოგადოებრივი ჯანმრთელობის კრიზისული მდგომარეობის დროს მედიის საქმიანობის ერთ-ერთი მიზანი უნდა იყოს საზოგადოებაში შფოთის დონის დაწევა და პანიკის თავიდან არიდება, რაც მოსახლეობას საშუალებას მისცემს, გააზრებული გადაწყვეტილებები მიიღოს და დაიცვას თავი და გარშემომყოფები. ამ მიზნის მისაღწევად მაყურებელს არ უნდა შევუქმნათ უიმედობის განცდა.

2. შეარჩიეთ კომპეტენტური რესპონდენტები

საზოგადოებრივი ჯანმრთელობის კრიზისული სიტუაციის დროს რესპონდენტის შერჩევა მედიის უმთავრესი ამოცანაა. რესპონდენტი უნდა საუბრობდეს ფაქტებით და მის მიერ მოწოდებული ინფორმაცია გამყარებული უნდა იყოს მტკიცებულებებით. დღევანდელ ვითარებაში მაღალი სანდოობის მქონე რესპონდენტი, მით უფრო სამედიცინო სფეროს წარმომადგენელი, რომელიც ვაქცინაციის მოწინააღმდეგეა, მრავალ კითხვას ბადებს. ასეთი რესპონდენტის ჩაწერის დროს ჟურნალისტი უნდა დარწმუნდეს მის კომპეტენციაში, რადგან არსებობს რისკი, რომ მან, მაგალითად, კოვიდ-19-ის პრევენციის ისეთი საშუალებებზე ისაუბროს, რაც რეალურად ზოგიერთი ადამიანის გადაწყვეტილებას, რომ არ აიცრას, გაამართლებს. ეს კი ნაკლებად იქნება მიმართული საზოგადოების საკეთილდღეოდ.

3. ერიდეთ დარგის სპეციალისტების ისეთ კრიტიკას, რომელიც არ ეხება მათს პროფესიულ საქმიანობას

დარგის ლიდერები, რომლებიც ავტორიტეტით სარგებლობენ, პანდემიასთან ბრძოლისთვის უმნიშვნელოვანესი იარაღია. იმისათვის, რომ მოსახლეობამ სპეციალისტების მიერ შემუშავებული რეკომენდაციები დაიცვას, მათ უნდა ენდობოდეს. სასურველია, მედიის კრიტიკა მათ პროფესიულ საქმიანობას ეხებოდეს და არ ხდებოდეს სპიკერების დისკრედიტაცია მაგალითად, მათი პირადი ცხოვრების დეტალებით. სპიკერების მიმართ ნდობის ხარისხი რეკომენდაციების დაცვის ხარისხის პირდაპირპროპორციულია.

4. არ შეუწყოთ ხელი სტიგმის შექმნას

სასურველია გაშუქებისას აქცენტი არ გაკეთდეს ქვეყნებზე (მაგალითად, რომელიმე ქვეყნის სახელობის შტამი), ეთნიკურ ჯგუფებზე და თემებზე (მაგალითად, გავრცელების არეალის მიმოხილვისას), ეს შეიძლება სტიგმისა და დისკრიმინაციის საფუძველი გახდეს.

5. ყურადღება გაამახვილეთ ვირუსისგან თავდაცვის საშუალებებზე

პანდემიის შესახებ ინფორმაციის გაშუქებისას გარდა სტატისტიკური მონაცემებისა, მნიშვნელოვანია აქცენტი მუდმივად კეთდებოდეს ინფიცირებისგან დაცვის მეთოდებისა და საშუალებების შესახებ და სასურველია ეს ინფორმაცია დამოწმებული იყოს დარგის სანდო პროფესიონალის მიერ. მოსახლეობას მუდმივად ისეთი ინფორმაცია უნდა მიეწოდებოდეს, რომლის გამოყენებაც პრაქტიკაში შეუძლია.

6. ერიდეთ პანდემიის სენსაციურ გაშუქებას

მედიასაშუალებები ინფორმაციის დადასტურებამდე უნდა მოერიდონ ისეთი სენსაციური და სკანდალური ინფორმაციის გავრცელებას, როგორიცაა მაგალითად, ვაქცინაციის შესაძლო გვერდითი მოვლენები. ასეთი ფაქტები, რეალურად, უიშვიათესია და დიდია ალბათობა, მაყურებელი შეცდომაში შეიყვანოს. შემდგომში გადამოწმებული და სწორი ინფორმაციის ხელახლა გაშუქება იმ ზიანის საპირწონე არაა, რაც კრიზისის მართვის პროცესს მიადგება. პანდემიის მიმდინარეობის გაშუქებისას მნიშვნელოვანია გზავნილები თანხვედრაში იყოს ეროვნულ და საერთაშორისო მესიჯებთან და მაგალითად, ვაქცინაციის კამპანიის მიზნებთან.

7. გაამახვილეთ ყურადღება ინფორმაციაზე და არა ემოციაზე

ჟურნალისტი უნდა ეცადოს შეარჩიოს ნაკლებად სენსიტიური სათაურები, ნაკლებად ემოციური რესპონდენტები, რათა აქცენტი გამოყენებად ინფორმაციაზე დარჩეს, თუმცა ეთიკის ნორმების დაცვით პირადი მაგალითების და ამბების გაშუქება სასურველია.

8. გადაამოწმეთ ინფორმაცია

ცნობილი ადამიანის, თუნდაც ცნობილი სპეციალისტის, მეცნიერის გამონათქვამი არაფერს ნიშნავს, როცა მის სიტყვებს ფაქტები და სამეცნიერო მტკიცებულებები ზურგს არ უმაგრებს. კრიზისულ სიტუაციებში რესპონდენტის მიერ მოწოდებული ინფორმაციის წყაროს გადამოწმებაც მნიშვნელოვანია.

9. გააშუქეთ ვაქცინების თემა მაქსიმალურად ზუსტად

ვაქცინაციის საკითხების გაშუქებისას მოსახლეობას ინფორმაცია უნდა მიეწოდოს როგორც მისი სარგებლის, ისე სავარაუდო გვერდითი ეფექტების შესახებ. ასევე მნიშვნელოვანია, რომ ვაქცინების თემა არ გაშუქდეს, როგორც რაღაც ახალი და ექსტრაორდინალური. იმუნიზაცია ჩვენი ცხოვრების ნაწილია და მხოლოდ სამეცნიერო ცოდნის და რესურსების კონსოლიდაციის შედეგია, რომ კოვიდ-19 საწინააღმდეგო ვაქცინები დროის მცირე მონაკვეთში დამზადდა.

10. თუ რესპონდენტი ფაქტებით დაუდასტურებელ ინფორმაციას ავრცელებს, ჟურნალისტი მას მეცნიერული ფაქტებით უნდა შეეწინააღმდეგოს

ვაქცინაციის მოწინააღმდეგეებისთვის ეთერის დათმობის დროს მნიშვნელოვანია დაცული იყოს რამდენიმე პრინციპი: მომენტალურად უნდა მოხდეს დეზინფორმაციაზე რეაგირება, მაშინვე მკაფიოდ უნდა განიმარტოს, რომ ეს არის რესპონდენტის აზრი, რომელიც გამყარებული არაა სამეცნიერო მტკიცებულებებით და სიმართლეს არ შეესაბამება. ასეთ დისკუსიაში ჟურნალისტი არის მხარე, რომელიც საუბრობს სამეცნიერო კონსენსუსის სახელით. ხოლო ჟურნალისტი თუ ვერ მოახერხებს სათანადოდ მოემზადოს დისკუსიისთვის, „ფსევდო ბალანსის“ დაცვას, აჯობებს მასალა ეთერში არ მოხვდეს.
კატეგორია: საქართველო
აჭარის საზოგადოებრივი მაუწყებლის ალტერნატიული პროფკავშირების შეფასებით, აჭარის ტელევიზიაში ბოლო ორი წელია კრიტიკისგან დაცლილი და ხელისუფლების მიმართ ლოიალური სარედაქციო პოლიტიკა, უთანასწორობა, რეპრესიული და მტრული შრომით პირობებია.

რა მოხდა

აჭარის საზოგადოებრივი მაუწყებლის ალტერნატიული პროფესიული გაერთიანებამ აჭარის მაუწყებელში გიორგი კოხრეიძის დირექტორობის “2 წლიანი პერიოდის ალტერნატიული/კრიტიკული ანგარიში” გამოაქვეყნა. კვლევა 2019 წლის 22 ნოემბერდან 2021 წლის 22 ნოემბრის პერიოდს მოიცავს.

ანგარიშში მიმოხილულია გიორგი კოხრეიძის დირექტორად არჩევამდე მაუწყებელში მიმდინარე მოვლენები და შეჯამებულია ბოლო 2 წლის განმავლობაში აჭარის ტელევიზიაში მომხდარი მნიშვნელოვანი ამბები.

ვის აერთიანებს აჭარის მაუწყებლის ალტერნატიული პროფკავშირები

აჭარის საზოგადოებრივი მაუწყებლის ალტერნატიული პროფკავშირები არხის 65-მა თანამშრომელმა 2020 წლის 28 იანვარს დააფუძნა. მათი თქმით, ისინი საკუთარი უფლებების დასაცავად გაერთიანდნენ.

ანგარიშის ძირითადი მიგნებები:

  • აჭარის საზოგადოებრივი მაუწყებლის სარედაქციო ხაზი გახდა ლოალური როგორც რეგიონული, ისე - ცენტრალური ხელისუფლების მიმართ და სრულიად დაიცალა კრიტიკისგან;
  • მოიშალა შრომითი დისციპლინა და გაღრმავდა შრომითი უთანასწორობა დასაქმებულ პირებს შორის. კარიერული წინსვლის შესაძლებლობა, ხშირ შემთხვევაში, არ არის დაკავშირებული კომპეტენციის ზრდასთან და შემოფარგლულია მენეჯმენტთან სიახლოვის კრიტერიუმით;
  • მრჩეველთა საბჭოს უმრავლესობა (განსაკუთებით - „ქართული ოცნების“ კვოტით გასული სამი წევრი) მოქმედებდა საკუთარი სამართლებრივი არსის წინააღმდეგ და ნაცვლად მაკონტროლებლის ფუნქციის შესრულებისა, მწვანე შუქს აძლევდა დირექტორის ყველა დამაზიანებელ გადაწყვეტილებას;
  • რეპრესიული და მტრული შრომითი პოლიტიკის გამო, ორგანიზაცია დატოვეს პროფესიონალმა თანამშრომლებმა. მათი ნაწილი პირდაპირ გაათავისუფლეს სამსახურიდან, ჩამოაშორეს სარედაქციო პოლიტიკაზე პასუხისმგებლობას, ან შეუქმნეს თავისუფლად მუშაობისთვის შეუსაბამო გარემოპირობები;
  • მაუწყებელმა სრულად ჩააგდო პანდემიის პირველ რამდენიმე ტალღასთან დაკავშირებული სირთულეები; განსაკუთრებით - მაყურებლისთვის ამომწურავი ინფორმაციის მიწოდების კომპონენტი. ამით, ისედაც მძიმე გარემოპირობებში მყოფი მოქალაქეებისთვის კიდევ უფრო გაართულა ინფორმირებული გადაწყვეტილებების მიღების შესაძლებლობა ყოველდღიურ რეჟიმში;
  • ნაცვლად იმისა რომ მაუწყებლის მენეჯმენტს რეალურად ეჩვენებინა მაუწყებლის ფუნქცია, სარგებელი და საჭიროება მთელი საზოგადოებისა და საზოგადოებრივი მაუწყებლის იდეის მიმართ სკეპტიკურად განწყობილი მოქალაქეებისთვის, ის დაკავებული იყო ამისგან სრულიად საპირისპირო საქმიანობით;

ალტერნატიული პროფკავშირების დაკვირვებით, აჭარის ტელევიზიაში ახალი კადრების მიღება, ხშირ შემთხვევაში ერთპიროვნულ გადაწყვეტილებებს ემყარებოდა. “კარიერული წინსვლის შესაძლებლობა, ხშირ შემთხვევაში, არ არის დაკავშირებული კომპეტენციის ზრდასთან და შემოფარგლულია მენეჯმენტთან სიახლოვის კრიტერიუმით”. პროფკავშირების შეფასებით, ამგვარი მიდგომა და პრაქტიკა სრულიად უპერსპექტივოს ხდის თანამშრომელთა დიდი ნაწილისთვის მაუწყებელში საკუთარი საქმიანობის პირნათლად შესრულებას და გულგრილ, უიმედო მდგომარეობაში ამყოფებს მათ.

ანგარიშში საუბარია პანდემიის პერიოდში მაყურებლის ინფორმირების პრობლემაზეც: აჭარის მაუწყებელმა “არათუ ახალი და შეცვლილ რეალობაზე მორგებული გადაცემები ვერ შესთავაზა მაყურებელს, არამედ - რადიკალურად შეამცირა არსებული საეთერო ბადეც კი; ამასთანავე, კვირაში მხოლოდ ერთი დღე დაუთმო სამედიცინო გადაცემას და ამით, ინფორმაციული სიმწირის შევსების ნაცვლად - გააღრმავა ყოველდღიური გადაწყვეტილებების მიღების პროცესი რიგითი მოქალაქეებისთვის”.



კონტექსტი

გიორგი კოხრეიძის დირექტორად დანიშვნის შემდეგ ცვლილებები აჭარის ტელევიზიის არაერთ თანამშრომელს შეეხო. ახალი ხელმძღვანელობის პირობებში, კრიტიკულად განწყობილი თანამშრომლების ნაწილი სამსახურიდან გაათავისუფლეს, ზოგიერთმა მათგანმა კი თავად დატოვა მაუწყებელი.

ბოლო ორი წლის განმავლობაში, აჭარის ტელევიზიის ჟურნალისტების მხარდასაჭერად და დირექტორის გადადგომის მოთხოვნით არაერთი აქცია გაიმართა.

მაუწყებელში მიმდინარე მოვლენებს კრიტიკულად აფასებდნენ გავლენიანი ორგანიზაციებიც. აჭარის საზოგადოებრივ მაუწყებელზე მმართველი პარტიის გავლენის შესახებ რამდენიმე საერთაშორისო ანგარიშში, მათ შორის აშშ-ის სახელმწიფო დეპარტამენტის 2020 წლისა და „რეპორტიორების საზღვრებს გარეშეს“ 2021 წლის ანგარიშებშია საუბარი.
კატეგორია: საქართველო
იუსტიციის სამინისტროში გამართულ ბრიფინგზე მედიის ნაწილი ვერ მოხვდა. „მთავარ არხს“ დაგეგმილი ბრიფინგის შესახებ სამინისტროს პრესსამსახურიდან არ შეატყობინეს, „ფორმულას“ ბრიფინგის შესახებ 10 წუთით ადრე აცნობეს, „ტვ.პირველის“ ჟურნალისტი კი ბრიფინგის ბოლო წუთზე შეუშვეს.

რა მოხდა?

იუსტიციის მინისტრ, რატი ბრეგაძის ბრიფინგი საქართველოს მესამე პრედიზენტის, მიხეილ სააკაშვილის საქმეზე სტრასბურგის სასამართლოს წერილის შესახებ, 11 ნოემბერს, 13 საათსა და 12 წუთზე დაიწყო. ბრიფინგზე იყვნენ „“საზოგადოებრივი მაუწყებლის“, „იმედის“, „რუსთავი 2-ისა“ და „პოსტვის“ ჟურნალისტები, თუმცა ბრიფინგის შესახებ მედიასაშუალებების ნაწილმა არაფერი იცოდა. მათ შორისაა „მთავარი არხი“ და „ფორმულა“.

ტელეკომპანია „პირველს“ სამინისტროს პრესსამსახურმა ბრიფინგის შესახებ დაწყებამდე 10 წუთით ადრე შეატყობინა. არხის საინფორმაციო სამსახურის უფროსი ნოდარ მელაძე გვიყვება, რომ იუსტიციის სამინისტროში ბრიფინგის შესაძლო ჩატარების შესახებ პრემიერმინისტრ ირაკლი ღარიბაშვილის განცხადებიდან გაიგეს. ამის შემდეგ, 12:43 საათზე მათ იუსტიციის სამინისტროს პრესსამსახურის ხელმძღვანელს, ნატალია მახვილაძეს ინფორმაციის დასაზუსტებლად დაურეკეს, თუმცა მახვილაძემ მათ ზარს არ უპასუხა, რამდენიმე წუთში მისწერა, რომ ბრიფინგის დაგეგმვის შემთხვევაში არხს აცნობებდა.

„ამ დროს უკვე ბრიფინგიც დაგეგმილი იყო, სამთავრობო მედია - გაფრთხილებული და უკვე იუსტიციის სამინისტროს ტერიტორიაზე იყვნენ. 13:00 საათზე ნატა მახვილაძისგან შემოვიდა შეტყობინება, როდესაც მინისტრი უკვე ბრიფინგისთვის ემზადებოდა, რომ დავძრულიყავით.“, - ამბობს მელაძე.

ბრიფინგზე მისასვლელად და გასაშუქებლად 10 წუთით ადრე შეტყობინება გონივრული ვადა არ არისო, ამბობს „ტვ. პირველის“ საინფორმაციო სამსახურის უფროსი.

ირაკლი ღარიბაშვილის განცხადების შემდეგ, იუსტიციის სამინისტროს ბრიფინგის შესაძლო დანიშვნის შესახებ დაუკავშირდა „ფორმულაც“, უწყების პრესსამსახურის ხელმძღვანელი მათაც დაჰპირდა, რომ ბრიფინგის დანიშვნის შემთხვევაში შეატყობინებდა. „ტვ პირველის“ მსგავსად დაგეგმილი ბრიფინგის შესახებ პრესსამსახურისგან 10 წუთით ადრე გაიგეს. არხის გადამღებმა ჯგუფმა მინისტრის ბრიფინგზე მისვლა ვერ მოასწრო.

როდის შეუშვეს „ტვ. პირველის“ ჟურნალისტი ბრიფინგზე

ბრიფინგის მიმდინარეობისას იუსტიციის სამინისტროსთან მისული „ტვ. პირველის“ ჟურნალისტი, გიორგი ხუხია, დაცვამ შეაყოვნა.

„როგორც კი დავალება მივიღე, წავედი სამინისტროში. 2 წუთში ადგილზე ვიქნებოდი და გზიდან პერიოდულად ვურეკავდი ნატა მახვილაძეს, რომ რამე შეფერხება, რომ მქონოდა, ვინაიდან ვიცოდი მალე იწყებოდა ბრიფინგი, არ დამეგვიანა ან ცოტა რომ დამლოდებოდნენ იმიტომ, რომ ხდება ხოლმე ასე, რომ ერთმანეთს ველოდებით.“ - გვიყვება გიორგი ხუხია.

ის ისხსენებს, რომ გზიდან მახვილაძეს რამდენჯერმე დაურეკა, შეტყობინებაც გაუგზავნა თუმცა პასუხად მიიღო, რომ ვერ შეუშვებდნენ და მასალა ტელეკომპანია „იმედისგან“ აეღოთ.

ხუხია ამბობს, რომ იუსტიციის სამინისტროს პრესსამსახურის ხელმძღვანელი შენობიდან დაცვას ანიშნებდა, რომ ბრიფინგზე არ შეეშვათ. ჟურნალისტი სამინისტროს ცენტრალური შესასვლელიდან მეორე შესასვლელისკენ გადაამისამართეს, თუმცა დაცვამ არც იქიდან შეუშვა.

„არ მიშვებდნენ, ერთმა ტანსაცმელზე მომქაჩა, სამი კაცი წინ გადამიდგა, კარი დავიჭირე იქნებ არ დავაკეტინო-მეთქი, იყო მთელი გაწევ-გამოწევა“ - იხსენებს ხუხია.

„ტვ. პირველის“ ჟურნალისტი ბრიფინგზე მხოლოდ მაშინ შეუშვეს, როდესაც მინისტრმა გამოსვლა დაასრულა და დარბაზიდან გადიოდა. ის მინისტრს გაჰყვა და კითხვების დასმა სცადა, თუმცა პასუხები ვერ მიიღო.

ხუხია იუსტიციის სამინისტროს საზოგადოებასთან ურთიერთობის ხელმძღვანელს მუქარაშიც ადანაშაულებს: „ნატა მახვილაძე დამემუქრა, პერსონალური ინფორმაციის გამოქვეყნებით. გამოსაქვეყნებელი მაგაში რა არის, ოდესღაც რომ სივი მქონდა გაგზავნილი იუსტიციის სამინისტროში.“

ტელეკომპანია „პირველში“ ამბობენ, რომ იუსტიციის სამინისტროსთან ასეთი კომუნიკაცია პირველი არაა და ეს „დამკვიდრებული პრაქტიკაა“.

კოალიცია “მედიის ადვოკატირებისთვის” განცხადებით, იუსტიციის სამინისტროში დაგეგმილი ბრიფინგის ანონსი არ მიუღია ზოგიერთ ონლაინ მედიასაშუალებასაც.

კოალიცია საქართველოს იუსტიციის სამინისტროს მოუწოდებს შეწყვიტოს მედიის მიმართ დისკრიმინაციული მიდგომა და ყველა ჟურნალისტს მისცეს ინფორმაციაზე წვდომის თანაბარი შესაძლებლობა.

"მსგავსი დისკრიმინაციული მიდგომა ლახავს მედიის წარმომადგენლების უფლებას შეასრულონ პროფესიული მოვალეობა, მიიღონ და გაავრცელონ ინფორმაცია მნიშვნელოვან საკითხებზე. ამასთან, საზოგადოებას ეზღუდება შესაძლებლობა სხვადასხვა წყაროებზე დაყრდნობით თვალი ადევნოს მიმდინარე პროცესებს.", - წერია განცხადებაში

„მედიაჩეკერი“ იუსტიციის სამინისტროს პრესისა და საზოგადოებასთან ურთიერთობის დეპარტამენტის ხელმძღვანელს, ნატალია მახვილაძეს, დაუკავშირდა, თუმცა მისგან კომენტარი ვერ მიიღო.

კატეგორია: საქართველო
ტელევიზიების სარეკლამო შემოსავლები 2021 წლის მესამე კვარტალში, წინა კვარტალთან შედარებით, შემცირდა.

კომუნიკაციების კომისიის ინფორმაციით, თუ ამ წლის მეორე კვარტალში ტელევიზიებმა რეკლამით 21.3 მილიონი ლარი გამოიმუშავეს, მესამე კვარტალში ეს რიცხვი 20 მილიონამდე ლარამდე შემცირდა. პირველ კვარტალში კი ტელევიზიების ჯამური სარეკლამო შემოსავლები 14,5 მილიონი ლარი იყო.

alt
რეკლამებიდან ყველაზე მეტი - 5.9 მილიონი ლარი, კვლავ ტელეკომპანია “იმედმა” მიიღო. “იმედს” მოსდევს „მთავარი არხი“ - 2.8 მილიონი ლარით, „რუსთავი 2“ - 2.4 მილიონი ლარით და „ტელეკომპანია პირველი“ - 1.9 ლარით. 1.7 მილიონი ლარის სარეკლამო შემოსავალი ჰქონდა „პოსტივის“, „ფურმულამ“ კი - 1.1 მილიონი ლარი მიიღო.

2021 წლის პირველ ცხრა თვეში, “იმედს” რეკლამებიდან ჯამში 18 მილიონ ლარზე მეტი აქვს მიღებული. რაც თითქმის 2,5-ჯერ აღემატება “რუსთავი2-ისა” და “მთავარი არხის” ამავე პერიოდის შემოსავლებს.

სარეკლამო შემოსავლები პირდაპირ რეკლამას, სპონსორობას, პროდუქტის განთავსებას, განცხადებებს და ტელეშოფინგს მოიცავს.

2021 წლის მესამე კვარტალში, წინა კვარტალთან შედარებით, მცირედით, 1.735 მილიონიდან 1.77 მილიონ ლარამდე გაიზარდა რადიოების შემოსავალი. აქედან ყველაზე მეტი - თითქმის ერთი მილიონი ლარი რადიო “ფორტუნამ” მიიღო.
კატეგორია: საქართველო
30 ოქტომბერს, თვითმართველობის არჩევნების მე-2 ტურს მედიების უმრავლესობა უწყვეტ რეჟიმში აშუქებს. საქართველოს სხვადასხვა რეგიონში ჟურნალისტებისთვის მუშაობაში ხელშეშლისა და სიტყვიერი შეურაცხყოფის არაერთი შემთხვევა დაფიქსირდა. ( I ტურზე მომხდარი შემთხვევები ნახეთ ამ ბმულზე)

19:25 - შსს-ს ინფორმაციით, ქარელის N2 საარჩევნო უბანზე ტელეკომპანია "მონიტორინგის“ ჟურნალისტისთვის ფიზიკური შეურაცხყოფის ფაქტზე, ჟურნალისტისათვის პროფესიულ საქმიანობაში უკანონოდ ხელის შეშლის და კენჭისყრის შენობაში ძალადობის ფაქტზე, სისხლის სამართლის კოდექსის 154-ე და 162 მუხლებით, გამოძიება დაიწყო.

ამავე მუხლებით მიმდინარეობს გამოძიება ფოთში, N12-ე საარჩევნო უბანში, ტელეკომპანია "პირველის" ჟურნალისტისთვის მიკროფონის წართმევის და დაპირისპირების ფაქტზე.

187-ე მუხლით დაიწყო გამოძიება გონიოში "ფორმულას" ავტომანქანის დააზიანების საქმეზე. სენაკის N14 საარჩევნო უბნიდან, ტელეკომპანია "მთავარის“ ჟურნალისტის შეტყობინების საფუძველზე კი, გამოძიება სისხლის სამართლის კოდექსის 126-ე მუხლით დაიწყო

19:00 - "მთავარი არხის" ჟურნალისტ ემა გოგოხიას სენაკის ერთ-ერთ საარჩევნო უბანზე დაუპირისპირდნენ და სიტყვიერი შეურაცხყოფა მიაყენეს.

18:02 - "გურიანიუსის" ინფორმაციით, სენაკის პირველი საარჩევნო უბნიდან მათი ჟურნალისტი გამოაძევეს, რომელიც უბანზე დაპირისპირების კადრებს იღებდა.

16:54 - იმერეთში, სოფელ ზედა მესხეთში „ფორმულას“ ჟურნალისტს ქვა ესროლეს და სიტყვიერი შეურაცხყოფა მიაყენეს.



16:45 - ფოთში “მთავარი არხის” ჟურნალისტს დაუპირისპირდნენ





16:37 - გონიოში “ფორმულას” და "მთავარი არხის" გადამღებ ჯგუფებს თავს დაესხნენ და ფიზიკური და სიტყვიერი შეურაცხყოფა მიაყენეს.



16:04 - კოალიცია "მედია ადვოკატირებისთვის" განცხადებას ავრცელებს და "ქართულ ოცნებას" მოუწოდებს, შეწყვიტოს აგრესიის წახალისება მედიის მიმართ. შსს-ს კი მოუწოდებს, რომ დაუყოვნებლივ მოახდინოს რეაგირება ჟურნალისტურ საქმიანობაში უკანონოდ ხელშეშლის ფაქტებზე.

15:54 - ბათუმში, ერთ-ერთ საარჩევნო უბანთან TV25-ის ჟურნალისტს ფიზიკური და სიტყვიერი შეურაცხყოფა მიაყენეს.



15:39 - POS TV-ის ჟურნალისტმა "მთავარი არხის" გადამღებ ჯგუფს პირდაპირი ჩართვის დროს მუშაობაში ხელი შეუშალა.



15:19 - “ტვ პირველის” ინფორმაციით, “ქართული ოცნების” აგრესიულად განწყობილმა დამკვირვებელმა “ტვ პირველის” ჟურნალისტს სიტყვიერი და ფიზიკური შეურაცხყოფა მიაყენა.





15:18 - ქუთაისში On.ge-ის ჟურნალისტს კოორდინატორმა სიტყვიერი და ფიზიკური შეურაცხყოფა მიაყენა.



15:09 - ერთ-ერთ საარჩევნო უბანზე, კენჭისყრის შენობაში, “ტვ პირველის” ჟურნალისტს საარჩევნო უბნის თავმჯდომარე სიტყვიერად დაუპირისპირდა.



14:46 - ქუთაისში „ფორმულას“ გადამღებ ჯგუფს სიტყვიერი შეურაცხყოფა მიაყენეს



14:27 - „ტვ პირველის“ ინფორმაციით, მათ ჟურნალისტს ფოთში “ქართული ოცნების" აგიტატორმა მიკროფონი წაართვა და ფიზიკურად დაუპირისპირდა



13:40 - ქარელის მუნიციპალიტეტში, მე-2 საარჩევნო უბნის კენჭისყრის შენობაში “ერთიანი ნაციონალური მოძრაობის“ დამკვირვებელი “ტვ მონიტორინგის“ ჟურნალისტს თავს დაესხა და ფიზიკური შეურაცხყოფა მიაყენა.





13:56 - „ფორმულას“ ჟურნალისტ ნანო ჩაკვეტაძეს მარტვილში, მე-2 საარჩევნო უბანზე თავს დაესხნენ




13:01 - „TV მედია ცენტრის" ჟურნალისტს გიგა გელხვიძეს ქუთაისში მე-14 საარჩევნო უბანზე სიტყვიერად და ფიზიკურად დაუპირისპირდნენ.



12:54 - საქართველოს პრემიერ მინისტრმა ირაკლი ღარიბაშვილმა “მთავარი არხის” ჟურნალისტს კითხვებზე პასუხად აგრესიულად მიმართა: "ზრდილობა იქონიეთ. თქვენ ხართ ჩვეულებრივი მოძალადე ახლა, პროვოკატორი, სირცხვილია, პროვოკატორი ხართ" - უთხრა ღარიბაშვილმა დეა მამისეიშვილს.




13:07 - “ფორმულას” და “ტვ პირველის” ჟურნალისტებთან დაპირისპირების ფაქტებს საქართველოს ჟურნალისტური ეთიკის ქარტია გამოეხმაურა. “ვითხოვთ სათანადო რეაგირებას არჩევნების დღეს ჟურნალისტთა უფლებების დარღვევის ფაქტებზე” - აცხადებს ქარტია.


12:01 - “ტვ პირველის” გადამღებ ჯგუფს რუსთავში საარჩევნო უბანთან მყოფმა პირმა სიტყვიერი შეურაცხყოფა მიაყენა



11:06 - მარტვილში, 31-ე უბანზე ფორმულას ჟურნალისტს, ნანო ჩაკვეტაძეს უცხო პირი კითხვების დასმის დროს ფიზიკურად დაუპირისპირდა.



11:04 - თბილისში, გლდანის ერთ-ერთი საარჩევნო უბნის მიმდებარე ტერიტორიაზე “ტვ პირველის” ჟურნალისტს სიტყვიერი შეურაცხყოფა მიაყენეს




 



10:41 - ზუგდიდში საარჩევნო უბანთან “ქართული ოცნების” კოორდინატორები “ფორმულას” ჟურნალისტს სიტყვიერად და ფიზიკურად დაუპირისპირდნენ



შენიშვნა: განახლების დროდ მითითებულია შესაბამისი მედიის მიერ ინფორმაციის/მასალის გამოქვეყნების დრო.

კატეგორია: საერთაშორისო ამბები
28  ოქტომბერს, Faсebook-ის შემქმნელმა მარკ ცუკერბერგმა გამოაცხადა, რომ კომპანიას სახელს უცვლის და მას ამიერიდან "META" ერქევა. თუმცა აპლიკაცია "ფეისბუკი" სახელს არ იცვლის.

"ფეისბუკი" აქამდე ერთ კომპანიაში სხვადასხვა პლატფორმას აერთიანებდა, როგორიცაა "ინსტაგრამი", "ვოტსაპი", "Oculus VR" და სხვა. ამიერიდან კი, ეს აპლიკაციები, "ფეისბუკის" ჩათვლით, კომპანია "META-ს" ქვეშ გაერთიანდება.

ეს ნაწილია ცუკერბერგის პროექტ "მეტავერსისა", რომელიც ვირტუალური რეალობის შექმნაზე მუშაობს.

"მეტავერსში (metaverse)" თითქმის ყველაფერს გააკეთებთ, რისი წარმოდგენაც შესაძლებელია: შეიკრიბებით მეგობრებთან და ოჯახთან, იმუშავებთ, ისწავლით, ითამაშებთ..." - დაწერა ცუკერბერგმა ფეისბუკ პოსტში, სადაც კომპანიის რებრენდიგის შესახებ საუბრობდა.
კატეგორია: საქართველო
უკრაინელი ჟურნალისტი დიმიტრი გორდონი ამბობს, რომ 27 ოქტომბერს საქართველოში არ შემოუშვეს. ჟურნალისტი ამას მიხეილ სააკაშვილთან ციხეში შეხვედრის სურვილს უკავშირებს.

“ოფიციალურად გამომიცხადეს, რომ საქართველოში არ მიშვებენ. მიზეზები არ დაუსახელებიათ. ამას ცალსახად ვუკავშირებ იმ ფაქტს, რომ უკრაინის საგარეო საქმეთა სამინისტრომ წინა დღეს საქართველოს საგარეო საქმეთა სამინისტროს მიმართა თხოვნით, დაეორგანიზებინა ჩემი ვიზიტი მიხეილ სააკაშვილთან რუსთავის ციხეში. რაც მოხდა არის საერთაშორისო სკანდალი და სირცხვილი საქართველოს ხელისუფლებისთვის” - დაწერა გორდონმა ტელეგრამზე.
alt

ტელეკომპანია „მთავარი არხის” მიერ გავრცელებული ინფორმაცით, გორდონთან ერთად ქვეყანაში არ შემოუშვეს მისი მეუღლე - ალისია ბაცმანი.

კოალიცია “მედია ადვოკატირებისთვის” წევრმა ორგანიზაციებმა განცხადება გაავრცელეს და მოუწოდეს საქართველოს მთავრობას, რომ გააკეთოს განმარტებები საქართველოში უკრაინელი ჟურნალისტების არ შემოშვებასთან დაკავშირებით და პატივი სცეს მედიის წარმომადგენელთა უფლებებს, რომ შეასრულონ თავიანთი პროფესიული მოვალეობა.

დიმიტრი გორდონი უკრაინელი მწერალი, ჟურნალისტი და ტელეწამყვანია. იგი არის გადაცემის "სტუმრად დიმიტრი გორდონთან" წამყვანი, გაზეთ "გორდონის ბულვარის" მთავარი რედაქტორი და ონლაინ გამოცემა "GORDON"-ის დამფუძნებელი.
კატეგორია: საქართველო
ტელეკომპანია „ფორმულას“ და „TV პირველის“ ინფორმაციით, „ქართული ოცნების“ აქციის მონაწილეები ჟურნალისტებს სიტყვიერად და ფიზიკურად დაუპირისპირდნენ.

ტელეკომპანია “ფორმულა” აცხადებს, რომ ჟურნალისტ რატი წვერავას „ქართული ოცნების" აქციაზე მისულმა მოქალაქეებმა ფიზიკური და სიტყვიერი შეურაცხყოფა მიაყენეს. მაუწყებლის ინფორმაციით, აქციის მონაწილეები აგრესიულად არიან განწყობილი კრიტიკული მედიის სხვა ჟურნალისტებისა და ოპერატორების მიმართაც.



“ფორმულას” და “ტვ პირველის” მიერ გავრცელებულ კადრებში ჩანს, რომ აქციაზე მისული რამდენიმე პირი სიტყვიერ შეურაცხყოფას აყენებს ჟურნალისტებს და აგრესიულად სთხოვს ტერიტორიის დატოვებას. ზოგიერთი მათგანი ფიზიკურადაც უპირისპირდება და ხელის კვრით ცდილობს ჟურნალისტის გაგდებას.




“ტვ პირველმა” გაავრცელა კიდევ ერთი ვიდეო, სადაც ჩანს, რომ მათი ჟურნალისტის მიკროფონს აქციის მონაწილემ სიგარეტი ჩააწვა. ტელეკომპანია შსს-ს რეაგირებას სთხოვს.



ჯერ-ჯერობით უცნობია, დაწყებულია თუ არა გამოძიება რომელიმე საქმეზე. “მედიაჩეკერი” შინაგან საქმეთა სამინისტროსთან დაკავშირებას ცდილობს. პასუხის მიღებისთანავე მასალა განახლდება.

ფაქტებთან დაკავშირებით, საქართველოს ჟურნალისტური ეთიკის ქარტიამ განცხადება გაავრცელა და მმართველ პარტიასა და მათ აქტივისტებს მიმართა, რომ მედიას მუშაობის საშუალება მისცენ: „მივმართავთ მმართველ პარტიას დააფიქსიროს მკაფიო პოზიცია მედიის ხელშეუხებლობისათვის. გასცეს სათანადო რეკომენდაციები, რათა შეჩერდეს აქციაზე მომუშავე ჟურნალისტების სიტყვიერი და ფიზიკური შეურაცხყოფა“ - ნათქვამია ქარტიის განცხადებაში.

ქარტია მიიჩნევს, რომ დღეს პარტიის წარმომადგენლის, მამუკა მდინარაძის მიერ გაკეთებულმა განცხადებამ, თითქოს მოსალოდნელი იყო პროვოკაციები მედიის წარმომადგენლების მხრიდან, აქციის მონაწილეებსა და ჟურნალისტებს შორის კონფლიქტი წაახალისა.

თბილისში, თავისუფლების მოედანზე, 17:00 საათიდან "ქართული ოცნების" ორგანიზებით აქცია იმართება.
კატეგორია: ცხოვრება კოვიდთან ერთად


ანა ზაქაშვილი - “გურია ნიუსი“

პირველი პრობლემა, რომელზეც შემიძლია ვისაუბრო და რაც ამ თემის გაშუქებისას ყველაზე ხელისშემშლელი იყო ჩემთვის, არის კონკრეტულ დაწესებულებებში არსებული ბიუროკრატიული რეჟიმი. მოგეხსენებათ, როდესაც ისეთ თემაზე მუშაობ, რომელიც არის მეინსტრიმული და შენს მიერ მომზადებული მასალა დღეს რომ ფასეულია, შეიძლება ხვალ აღარ იყოს მნიშვნელოვანი, კონკრეტულმა უწყებებმა დროულად უნდა მოგაწოდონ ინფორმაცია გარკვეულ საკითხებთან დაკავშირებით.

მე მქონდა პრობლემა სხვადასხვა ორგანიზაციისგან და დაწესებულებისგან, როდესაც ისინი აგვიანებდნენ ჩემთვის სასურველი ინფორმაციის მოწოდებას. კონკრეტულ შემთხვევას გავიხსენებ. ერთ-ერთი საავამდყოფოს დირექტორი და პიარის სამსახურის უფროსი მინიშნავდა შეხვედრას ზუსტად ხუთი დღის განმავლობაში. რაც დამეთანხმებით, რომ არ არის კომფორტული, როდესაც ასეთ საკითხზე მუშაობ.

ადამიანებთან ურთიერთობის პრობლემა არ მქონია. პირიქით, მე ორსულთა და ბავშვების საკითხზე ვმუშაობდი, ბავშვების ინფიცირების საკითხზე და რესპონდენტებთან არ მქონია ამ კუთხით პრობლემები. უბრალოდ, მე ისევ მქონდა სახელმწიფო უწყებებთან ამ მიმართულებით პრობლემები. როდესაც ვმუშაობდი, მაგალითად, ორსულთა და ბავშვთა ინფიცირების საკითხებზე, გამოვითხოვდი შესაბამისი უწყებებიდან სტატისტიკურ მასალას, ან საერთოდ არ არსებობდა ეს მასალა, ან კიდევ აგვიანებდა ამ ინფორმაციის დროულად მოწოდებას.

ყველა ექსტრემალურ სიტუაციაში ვმუშაობთ პანდემიის პირობებში. მაგალითად, როდესაც პირველი ორსული გარდაიცვალა, მაშინ დაიწყო საუბარი თემაზე, რამდენად არიან განსაკუთრებულად რისკ-ჯგუფში ორსული ადამიანები. მესმის, რომ იმ მომენტში, შესაძლოა, არ არსებობდეს კონკრეტული სტატისტიკური მონაცემი ან ინფორმაცია, მაგრამ მე ვფიქრობ, მინიმუმ საავადმყოფოები უნდა იყვნენ მობილიზებულები და აწვდიდნენ უფრო მსხვილ სახელმწიფო უწყებებს ინფორმაციას მათ საავადმყოფოში მყოფი ინფიცირებული ორსულების რაოდენობაზე. მე, მაგალითად, გავიხსენებ საჩხერის საავადმყოფოს. მქონდა კომუნიკაცია პიარის სამსახურთან. მათ არ ჰქონდათ ინფორმაცია მათ საავადმყოფოში რამდენი კოვიდინფიცირებული ორსული მკურნალობდა. ამიტომ ვფიქრობ, რომ ძირშივეა ეს პრობლემა.

ჩემთვის, როგორც ჟურნალისტისთვის, ხელის შემშლელი არა მხოლოდ როგორც ჟურნალისტისთვის, არამედ რიგითი მოქალაქისთვის, რომელიც დაინტერესებული არის კორონავირუსის გარშემო არსებული კვლევებით, თუნდაც ვაქცინებთან დაკავშირებით, ხელის შემშლელი ფაქტორი აღმოჩნდა ის, რომ არ არის კვლევები საკმარისი რაოდენობით ნათარგმნი იმდენი უცხოური წყაროდან, რამდენიც საჭირო არის, რომ კონკრეტული მოქალაქე დაარწმუნო, რომ უნდა აიცრას. მე ვალდებული ვარ ასეთი ინფორმაცია უცხოური წყაროებიდან ვთარგმნო, თუმცა აუცილებელი არის, რომ სახელმწიფო უწყებები აწვდიდნენ მოსახლეობას ინფორმაციას სხვადასხვა ორგანიზაციის მიერ საზღვარგარეთ ჩატარებული კვლევების შესახებ.
კატეგორია: საქართველო
მმართველი პარტია „ქართული ოცნება“ 27 ოქტომბერს 17:00 საათზე თავისუფლების მოედანზე დაგეგმილი აქციის გასაშუქებლად ჟურნალისტებს აკრედიტაციას სთავაზობს.

მედიასაშუალებების წარმომადგენლებმა აქციამდე ერთი დღით ადრე პარტიისგან ელექტრონული ფოსტით წერილი მიიღეს, რომელშიც „ქართული ოცნება“ „შემაჯამებელი აქციის“ გასაშუქებლად მედიის წარმომადგენლების გვარის, სახელისა და პირადი ნომრის გადაგზავნას სთხოვს.

როგორც პარტიის პრესსამსახურში განმარტავენ, ღონისძიების გასაშუქებლად მისული ჟურნალისტების პირადი მონაცემები მათთვის ბეიჯების (პრეს ბარათების) დასარიგებლად სჭირდებათ, თუმცა, ასევე ამბობენ, რომ აქციის გაშუქებას ნებისმიერი მედიასაშუალების წარმომადგენელი შეუზღუდავად შეძლებს, განურჩევლად იმისა, ექნებათ თუ არა მათ „ქართული ოცნების“ მიერ დამზადებული ბეიჯი.

რისთვის არის საჭირო ბეიჯები ღია სივრცეში დაგეგმილი აქციის გასაშუქებლად?

კითხვაზე, თუ რატომ განჩნდა ღია სივრცეში დაგეგმილი აქციის გასაშუქებლად მედიის წარმომადგენლებისთვის ბეიჯების დარიგების აუცილებლობა, „ქართული ოცნების“ პრესსამსახურის წარმომადგენელი, ლელა გაბეჩავა გვპასუხობს, რომ „ქართული ოცნების“ ღონისძიებებზე ყოველთვის ასე ხდება.“

არ მახსენდება, რომელიმე ქუჩის აქციაზე აკრედიტაცია დაგვჭირვებოდაო, ამბობს On.ge-ის მთავარი რედაქტორი ხატია ღოღობერიძე.

„გამიკვირდა, რომ აკრედიტაციები მოითხოვეს, როცა საუბარია აქციაზე ღია სივრცეში, ქუჩაში, სადაც გადაადგილება ყველა ადამიანს თავისუფლად შეუძლია. უცნაურია მით უფრო, თუ ამბობენ, რომ ამ აკრედიტაციის გარეშეც შეგვიძლია ჩვეულებრივად გავაშუქოთ იქ მიმდინარე პროცესები.“- გვეუბნება on.ge-ის რედაქტორი.

ღოღობერიძე დასძენს, რომ 5 ივლისის მოვლენების გათვალისწინებით, არ იცის რამდენად უნდა ელოდოს საფრთხეებს „ქართული ოცნების“ ამომრჩევლებისგან. გამოცემაში ჯერ-ჯერობით არ გადაუწყვეტიათ, გაგზავნიან თუ არა On.ge ჟურნალისტების პირად მონაცემებს აკრედიტაციის მისაღებად:

„ცოტა პრინციპული საკითხიც არის. რატომ უნდა გვჭირდებოდეს აკრედიტაცია აქციაზე? ამიტომ ვფიქრობთ ჯერ გავგზავნოთ თუ არა.“

რეკომენდაციები პრეს ბარათებთან დაკავშირებით

მედიის უსაფრთხოების დაცვის შესახებ ევროპის საბჭოს მინისტრთა კომიტეტის რეკომენდაციიით, ,,წევრმა სახელმწიფოებმა უნდა გაითვალისწინონ ჟურნალისტებისა და მედიის სხვა აქტორების მიერ დაკისრებული როლის სპეციფიკური ხასიათი და დემოკრატიული მნიშვნელობა კონკრეტულ კონტექსტში, როგორიცაა კრიზისის დროს, საარჩევნო პერიოდში, საზოგადოებრივ დემონსტრაციებსა და კონფლიქტის ზონებში.

ამ კონტექსტებში სამართალდამცავი ორგანოებისთვის მნიშვნელოვანია პატივი სცენ ჟურნალისტებისა და სხვა მედიის წარმომადგენლების როლს, რომლებიც აშუქებენ დემონსტრაციებსა და სხვა მოვლენებს. პრესის ან პროფესიული გაერთიანების წევრობის დამადასტურებელი ბარათები, შესაბამისი აკრედიტაცია და ჟურნალისტის სამკერდე ნიშანი სახელმწიფო ორგანოებმა უნდა მიიღონ, როგორც ჟურნალისტობის დამადასტურებელი საბუთი, ხოლო თუ შეუძლებელია, რომ ჟურნალისტმა ან სხვა მედია აქტორმა წარმოადგინოს პროფესიული დოკუმენტაცია, სახელმწიფო ორგანოებმა ყველა შესაძლო ძალისხმევა უნდა გასწიონ მათი სტატუსის დასადგენად.”

„შეკრების მიმდინარეობისას მედია აქტორების და დამკვირვებლების უსაფრთხოების“ შესახებ სახელმძღვანელოში წერია, რომ ამ რეკომენდაციის შესაბამისად აქციებისა და დემონსტრაციების დროს დამატებითი აკრედიტაციის გავლა არ არის საჭირო და საკმარისია მედიის წარმომადგენლობის დამადასტურებელი ბარათის სამართალდამცავი ორგანოს წარმომადგენლებისთვის ჩვენება.
კატეგორია: ეთიკა
იმედინიუსი” და რამდენიმე მედიაგამოცემა, ახალ ამბად, შეცდომაში შემყვან ინფორმაციას ავრცელებენ და დაუდასტურებელ წყაროზე დაყრდნობით,“ნაციონალური მოძრაობის ჩრდილოვანი კაბინეტის” შემადგენლობას აქვეყნებენ.

რა მოხდა

20 ოქტომბერს სოციალური ქსელის მომხმარებელმა ირაკლი ლატარიამ, რომელიც პროსახელისუფლებო განცხადებებით არის ცნობილი, დაწერა ფეისბუქ პოსტი, თითქოს, “ხელში ჩაუვარდა ნაციონალური მოძრაობის ჩრდილოვანი კაბინეტის სრული შემადგებლობა”.

პოსტის ავტორი არ წერს, რომ ინფორმაცია სერიოზულია ან ფაქტებს ეყრდნობა და ფეისბუქ მომხმარებლებიც კომენტარებში ირონიულად ეხმანებიან ლატარიას გავრცელებულ ინფორმაციას.



მიუხედავად ამისა, გამოცემები სიტყვა-სიტყვით აქვეყნებენ მინისტრების ჩამონათვალს და, მათ შორის, წერენ, რომ “ფორმულას” ჟურნალისტი ვახო სანაია თავდაცვის მინისტრი იქნება. “იმედინიუსმაც” ყოველგვარი ახსნა-განმარტების გარეშე, უაპელაციოდ, გამოაქვეყნა ირაკლი ლატარიას სტატუსი ნამდვილ ამბად და დაწერა, რომ ნაციონალური მოძრაობის “ჩრდილოვანი კაბინეტის შემადგენლობაზე ინფორმაციას ექსპერტი” აქვეყნებს.

ამ დროისთვის (18:00) ლატარიას პოსტი, “იმედინიუსის” გარდა, ახალ ამბად გამოქვეყნებული აქვს “ახალი თაობას” და for.ge-ს.

რა პრობლემაა

იმედინიუსი” გამოქვეყნებული მასალის პირველსავე წინადადებაში ხაზს უსვამს, რომ ინფორმაციას ექსპერტი აქვეყნებს. ტექსტში არსად არის ნახსენები, რომ ინფორმაცია შესაძლოა იყოს სარკასტული, დაუდასტურებელი, არასანდო ან სულაც არ შეესაბამებოდეს სინამდვილეს. მასალა მთლიანად ეყრდნობა ერთადერთ წყაროს - თავად პოსტის ავტორს. მსგავსი ფორმულირებით გავრცელებული ინფორმაცია კი მკითხველისთვის შეცდომაში შემყვანია.

კონტექსტი

ტელეკომპანია “იმედმა” 18 ოქტომბერს, არჩევნების მეორე ტურამდე ორი კვირით ადრე, განაცხადა, რომ საგანგებო რეჟიმზე გადავიდა და არ დაუშვებს ნაციონალური მოძრაობის ხელისუფლებაში დაბრუნებას. ტელევიზიის განცხადებით „იმედი“ როგორც ბრძოლის სიმბოლო, ბრძოლის წინა ხაზზე იქნება.

ვრცლად: ტელეკომპანია „იმედის“ „პოლიტიკური განაცხადი“
კატეგორია: საქართველო
„რეპორტიორები საზღვრებს გარეშე“ 2 ოქტომბერს საქართველოში გამართული ადგილობრივი თვითთმართველობის არჩევნების დროს ჟურნალისტების მიმართ თავდასხმისა და მუქარების ფაქტებს ეხმაურება. ორგანიზაცია ხელისუფლებას მოუწოდებს ყველა ინციდენტს ნათელი მოჰფინოს.

„მუქარები, შეურაცხყოფა და ფიზიკური თავდასხმაც კი „ტვ.პირველის“ რეპორტიორზე. 2 ოქტომბრის მუნიციპალური არჩევნების დროს ჟურნალისტებისთვის ხელის შეშლის სულ მცირე 7 შემთხვევა დაფიქსირდა. „რეპორტიორები საზღვრებს გარეშე“ მოუწოდებს ხელისუფლებას ნათელი მოჰფინოს ყველა ინციდენტს“,- წერია ორგანიზაციის განცხადებაში.

2 ოქტომბერს საქართველოს სხვადასხვა რეგიონში ჟურნალისტებისთვის მუშაობაში ხელშეშლისა და სიტყვიერი შეურაცხყოფის არაერთი შემთხვევა დაფიქსირდა.
კატეგორია: საქართველო
განახლებადი ინფორმაცია

2 ოქტომბერს, თვითმართველობის არჩევნებს მედიების უმრავლესობა უწყვეტ რეჟიმში აშუქებს. საქართველოს სხვადასხვა რეგიონში ჟურნალისტებისთვის მუშაობაში ხელშეშლისა და სიტყვიერი შეურაცხყოფის არაერთი შემთხვევა დაფიქსირდა.

19:33 - "რადიო მარნეულის" ინფორმაციით, ერთ-ერთ საარჩევნო უბანზე მათ ჟურნალისტს გადაღებაში ხელი შეუშალეს.






18:46 - "ბათუმელების" ინფორმაციით,  ბათუმის ერთ-ერთ საარჩევნო უბანზე "ქართული ოცნების" აქტივისტები მათ ჟურნალისტს დაემუქრნენ: „თქვეს, რომ „მოგვხედავენ“, „დაიმახსოვრებდნენ სახელებსა და გვარებს“- წერს "ბათუმელები".

17:10 - TV25-ის ჟურნალისტს ბათუმში ერთ-ერთ საარჩევნო უბანზე ფიზიკური შეურაცხყოფა მიაყენეს.



16:20 -
"ტვ პირველის" ინფორმაციით, "ქართული ოცნების" აქტივისტი გადამღებ ჯგუფს თავს დაესხა და კამერა დაუმტვრია.



12:46 - გონიოში საარჩევნო უბანზე "მთავარი არხის" ჟურნალისტს შეურაცხყოფა მიაყენეს.



12:20 - ვანის საკრებულოს წევრმა “ქართული ოცნებიდან” სიტყვიერი შეურაცხყოფა მიაყენა ჟურნალისტებს.



11:49 - "ბათუმელების" ჟურნალისტს ხელი შეუუშალეს პროფესიული საქმიანობის შესრულების დროს ბათუმის 64-ე უბანის მიმდებარე ტერიტორიაზე. 




10:30 - “TV პირველის“ ჟურნალისტის თამთა დოლენჯაშვილის ინფორმაციით, ბათუმში, ერთ-ერთ საარჩევნო უბანთან, „ქართული ოცნების“ აქტივისტებმა მაუწყებლის აპარატურა სამარშუტო ტაქსში ჩაკეტეს.




10:08 - ზუგდიდში, ერთ-ერთი საარჩევნო უბანზე უცხო პირი “ფორმულას” ჟურნალისტს, სალომე ჩადუნელს ელექტროშოკით დაემუქრა და სიტყვიერი შეურაცხყოფა მიაყენა.




09:30 - სამეგრელოში ერთ-ერთ საარჩევნო უბანთან “ტვ პირველის” ჟურნალისტს სიტყვიერი შეურაცხყოფა მიაყენეს.



შენიშვნა:
განახლების დროდ მითითებულია შესაბამისი მედიის მიერ ინფორმაციის/მასალის გამოქვეყნების დრო.
კატეგორია: საქართველო
საქართველოს ჟურნალისტური ეთიკის ქარტია, სამართლიანი არჩევნებმა და საერთაშორისო გამჭვირვალობა-საქართველომ წინასაარჩევნო გარემო შეაფასეს. ორგანიზაციების განცხადებით, მედიაზე ზეწოლა გაძლიერებულია და ჟურნალისტებისთვის უსაფრთხო სამუშაო გარემოს არსებობა კვლავ გამოწვევად რჩება.

გამოქვეყნებულ ანგარიშში წერია, რომ 5 ივლისის მოვლენების შემდეგ, როდესაც ძალადობრივი ჯგუფები მედიის 50-ზე მეტ წარმომადგენელს ფიზიკურად გაუსწორდნენ და უკანონოდ ხელი შეუშალეს პროფესიულ საქმიანობაში, „ტვ პირველის” ოპერატორი - ლექსო ლაშქარავა კი, გარდაიცვალა, კიდევ უფრო გახშირდა ჟურნალისტების მიმართ ძალადობისა და სიტყვიერი შეურაცხყოფის ფაქტები.

“ერთის მხრივ, სამართალდამცავი ორგანოების უმოქმედობა - უზრუნველყონ უსაფრთხო სამუშაო გარემო მედიის წარმომადგენლებისთვის და, მეორე მხრივ, აგრესიული რიტორიკისა და სიძულვილის ენის შემცველი განცხადებები, კიდევ უფრო მეტად ახალისებს მედიის წარმომადგენლების მიმართ ძალადობას და უარყოფითად აისახება მედიაგარემოზე”, - ნათქვამია ანგარიშში.

ორგანიზაციების შეფასებით, წელს ეროვნული სამაუწყებლო მედია წინა წლებზე მეტად პოლარიზებულია და ეს საკითხი კვლავ მნიშვნელოვან გამოწვევად რჩება იმ ფონზე, რომ მოსახლეობის უმრავლესობა ინფორმაციის მიღების პირველწყაროდ სწორედ ტელევიზიას ასახელებს.

ანგარიშში წერია, რომ სისხლიანი ბანერების გამოფენა, რომლებზეც, ოპოზიციონერ პოლიტიკოსებთან ერთად, გამოსახულნი იყვნენ კრიტიკული მედიასაშუალებების წარმომადგენლები, ხელს უწყობს პოლარიზაციას და ახალისებს მედიასაშუალებებისა და ჟურნალისტების მიმართ ძალადობას.

დაკვირვებით, წინასაარჩევნო პერიოდში მოვლენების გაშუქებისას, ტელეკომპანია „იმედის“ ნარატივები ემთხვეოდა „ქართული ოცნების“ გზავნილებს. „TV პირველსა“ და „მთავარ არხზე“ კი, იკვეთებოდა სუბიექტური დამოკიდებულება ოპოზიციური საარჩევნო სუბიექტების ნაწილის მიმართ.

“წინა წელთან შედარებით, აღსანიშნავია „რუსთავი 2-ის“ ტრანსფორმაცია. თუ წინა წელს მაუწყებელი მეტ-ნაკლებად კრიტიკული იყო ხელისუფლების მიმართ, წინასაარჩევნო პერიოდში, მაქსიმალურ კომფორტს უქმნიდა მმართველ პარტიას. წინა წლის მსგავსად, ხელისუფლების მიმართ ლოიალურ სარედაქციო პოლიტიკას ინარჩუნებს საზო­გადოებრივი მაუწყებლის პირველი არხი”.

ანგარიშში საუბარია ცესკოს მიერ ჩატარებულ მედიამონიტორინგზეც. ორგანიზაციები ამბობენ, რომ არსებობს რისკი, რომ მონიტორინგის შედეგები გამოყენებული იყოს მედიის რეგულირების მიზნით.

კომუნიკაციების კომისიის მიერ ჩატარებულ მაუწყებლების თვისობრივ მონიტორინგზე კი ნათქვამია, რომ მარეგულირებელს ამის ვალდებულება კანონით არ გააჩნია და შესაძლოა, ეს იყოს კომისიის კიდევ ერთი მცდელობა ჩაერიოს მედიის შინაარსში.
კატეგორია: საქართველო
საქართველოს ჟურნალისტური ეთიკის ქარტია 2021 წლის მუნიციპალური არჩევნების მედიაში გაშუქების მონიტორინგის წინასწარ ანგარიშებს აქვეყნებს.

ანგარიშები: სატელევიზო ახალ ამბებს, სატელევიზიო ტოქშოუებს, ონლაინ მედიასა და სოციალურ მედიას მოიცავს.

სამივე შემთხვევაში რამდენიმე ძირითადი მიგნება გამოიკვეთა.

სატელევიზიო ახალი ამბები (5 ივლისი - 25 სექტემბერი, 2021)

• მაუწყებელთა პოლარიზაცია წინა წელთან შედარებით კიდევ უფრო გაიზარდა - ტელესივრცე ორ ბანაკად გაიყო. ტელეარხების ნაწილი მიკერძოებულია ხელისუფლებისადმი, მეორე ნაწილს კი ოპოზიციის მიმართ მიკერძოებული სარედაქციო პოლიტიკა აქვს;

• მაუწყებლებში მიკერძოებული სარედაქციო პოლიტიკა გამოიხატებოდა მათთვის არასასურველი პოლიტიკური სუბიექტის ნეგატიურად გაშუქებაში

• სატელევიზიო ახალ ამბებში ხშირად გვხვდებოდა პროფესიული ეთიკის დარღვევისა და მანიპულაციის ფაქტები

• ხელისუფლების მიმართ ლოიალურ სარედაქციო პოლიტიკას ინარჩუნებს საზოგადოებრივი მაუწყებლის პირველი არხი;

• ხელისუფლების და მმართველი პარტიის მიმართ კეთილგანწყობის ზრდის ტენდენცია გამოიკვეთა ტელეკომპანია „რუსთავი 2-ის“ შემთხვევაში

• წინა წლებთან შედარებით გაუარესებულია რეგიონული ტელევიზიების საინფორმაციო გამოშვებების ხარისხი, როგორც ტექნიკური, ისე შინაარსობრივი თვალსაზრისით

• რეგიონული არხების ნაწილი ვერ ახერხებდა ყოველდღიურად მაუწყებლობას.

• რეგიონული არხების ნაწილი ხშირად იყენებს სამთავრობო უწყებების პრესსამსახურების მომზადებულ მასალებს, მკაფიო მინიშნების გარეშე.

• ტელეარხების მიკერძოება კონკრეტული სუბიექტის მიმართ ნათლად ჩანდა ისეთი მნიშვნელოვანი თემების გაშუქებისას, როგორიცაა „5 ივლისის მოვლენები“, „ევროკავშირის მაკროფინანსურ დახმარებაზე უარის თქმა“, „შარლ მიშელის შეთანხმების ანულირება“ და, სავარაუდოდ, „სუსიდან გამოჟონილი ჩანაწერები“.

სატელევიზიო ტოქშოუები (2 აგვისტო - 25 სექტემბერი, 2021)

• წინა წლის მსგავსად, მმართველი პარტიის წარმომადგენლები უარს აცხადებდნენ კრიტიკულად განწყობილ ეროვნულ მაუწყებლებში სტუმრობაზე. ოპოზიციური პარტიები კი, ნაკლებად იყვნენ წარმოდგენილნი ტელეკომპანია „იმედში“.

• ტელეკომპანია „იმედის“ ნარატივები ემთხვეოდა „ქართული ოცნების“ გზავნილებს.

• „TV პირველსა“ და „მთავარ არხზე“ კი, იკვეთებოდა სუბიექტური დამოკიდებულება ოპოზიციური საარჩევნო სუბიექტების ნაწილის მიმართ.

• ტელეკომპანია „რუსთავი 2“ წინასაარჩევნო პერიოდში, მაქსიმალურ კომფორტს უქმნიდა მმართველ პარტიას. ხშირად, ტელეკომპანია მხოლოდ ტრიბუნის ფუნქციას ასრულებდა, რომელსაც მმართველი გუნდი საკუთარი გზავნილების ტირაჟირებისთვის და სასურველ თემებზე სასუბროდ იყენებდა.

• საზოგადოებრივი მაუწყებლის პირველ არხზე თბილისის მერის კანდიდატების დებატებში გადაცემის ფორმატმა მაყურებელს არ მისცა შესაძლებლობა სრულყოფილი ინფორმაცია მიეღო ინფორმირებული არჩევანის გასაკეთებლად. მერობის კანდიდატები ავრცელებდნენ ჰომოფობიურ და ქსენოფობიურ განცხადებებს, რაზეც წამყვანს არ ჰქონია სათანადო რეაგირება.

• აჭარის საზოგადოებრივი მაუწყებლის გადაცემა „თავისუფალ სივრცეში“, რომელშიც მერობის კანდიდატები მონაწილეობდნენ, ჟურნალისტის მხრიდან არ ისმოდა დამაზუსტებელი და კრიტიკული შეკითხვები. გადაცემებში ჭარბობდნენ მმართველი პარტიის წარმომადგენლები.

• ცენტრალური ტელევიზიებისგან განხვავებით, პოლარიზაცია ნაკლებად გამოხატულია რეგიონულ მაუწყებლებში.

ონლაინ მედია ( 5 ივლისი - 25 სექტემბერი, 2021)

• ონლაინ მედიის უმეტეს ნაწილში შეინიშნება სარედაქციო დამოუკიდებლობის მაღალი ხარისხი

• ონლაინ მედიაში ნაკლებად იგრძნობა მკვეთრი პოლიტიკური პოლარიზაცია. თუმცა, გამოიკვეთა რამდენიმე ვებ-გვერდი, რომლებზეც აშკარად შეინიშნება დადებითი განწყობა სახელისუფლებო გუნდის მიმართ (მაგალითად, mpn.ge, sputnik-georgia.com, interpessnews.ge, knews.ge) ან ოპოზიციის მიმართ (მაგალითად, guriismoambe.com);

• ონლაინ გამოცემების დიდი ნაწილი ცდილობს და ახერხებს, რომ ჯეროვნად დაიცვას ჟურნალისტური ეთიკის სტანდარტები.

• ჟურნალისტური სტანდარტების მაღალ დონეზე დაცვის მიმართ განსაკუთრებული ყურადღება შეინიშნება ვებგვერდებზე: batumelebi.ge, livepress.ge, netgazeti.ge, news.on.ge, publika.ge, radiotavisupleba.ge, reginfo.ge და sknews.ge.

• ჟურნალისტური სტანდარტების დაცვით მუშაობს tabula.ge, თუმცა ხშირად გვხვდება ფოტომანიპულაციის შემთხვევები, რომლებშიც მმართველი პარტიის წარმომადგენლები განგებ არიან წარმოდგენილნი დამცინავი თუ დამაკნინებელი ფორმით.

• ჟურნალისტური სტანდარტების უმძიმესი დარღვევის შემთხვევები შერჩეულ ონლაინ გამოცემებს შორის სისტემატურად არის ვებგვერდზე, mpn.ge, რომელიც ოპოზიციონერ პოლიტიკოსთა დისკრედიტაციას ცდილობს.

• მმართველი გუნდის წარმომადგენელთა მიმართ გამოთქმული განსაკუთრებულად შეურაცხმყოფელი განცხადებები ხშირად ქვეყნდება რეგიონულ ვებგვერდზე guriismoambe.com

• პოლიტიკური მოვლენების გაშუქებისას გონივრული ბალანსის დაცვის სტანდარტის დარღვევის შემთხვევები ხშირად გვხვდებოდა ვებგვერდებზე ambebi.ge და sputnik-georgia.com

• ონლაინ მედიაში პრობლემად რჩება პოლიტიკური სპექტრის პლურალისტური და მრავალფეროვანი გაშუქება

• ონლაინ მედიისთვის გამოწვევად რჩება კომერციული ხელშეკრულების ფარგლებში მომზადებული სტატიების არასათანადო გამიჯვნა სარედაქციო მასალებისგან

• ონლაინ მედიის ყველაზე დიდი გამოწვევა მოვლენების ზედაპირული გაშუქებაა.

• რეგიონული გამოცემების უმრავლესობა ვერ ახერხებს ადგილობრივი მოსახლეობის სათანადოდ ინფორმირებას რეგიონში მიმდინარე პოლიტიკური პროცესების შესახებ.

• წინასაარჩევნო პერიოდში ონლაინ მედიაში გამოვლინდა არაერთი შემთხვევა, როდესაც უცვლელად და უკომენტაროდ შუქდებოდა გენდერული სტერეოტიპებისა და გენდერული ნიშნით დისკრიმინაციის შემცველი განცხადებები, რომლებიც მიზანმიმართულად აკნინებდა ქალის როლს პოლიტიკაში.

„საქართველოს ჟურნალისტური ეთიკის ქარტია“ მონიტორინგს გაეროს განვითარების პროექტ „საქართველოს 2021 წლის ადგილობრივი არჩევნების მედიაში გაშუქების კვლევის“ ფარგლებში ევროკავშირის ფინანსური დახმარებით აწარმოებს.

სატელევიზიო ახალი ამბების შემთხვევაში აკვირდებიან: 14 სატელევიზიო (5 ეროვნულ, 9 რეგიონულ) არხს: პირველი არხი, აჭარის საზოგადოებრივი მაუწყებელი, ტელეკომპანია მთავარი, რუსთავი 2, იმედი, ტვ პირველი, ტვ 25, თრიალეთი, მე-9 არხი, ტვ ოდიში, ტელეკომპანია გურჯაანი, ტვ გურია, ტელეკომპანია რიონი, ტვ 4.

ტოქშოუების შემთხვევაში მონიტორინგდებოდა შემდეგი სატელევიზიო არხები: საზოგადოებრივი მაუწყებლის პირველი არხი, „რუსთავი 2“, „იმედი“, „TV პირველი“, „მთავარი არხი“, აჭარის საზოგადოებრივი მაუწყებელი, „TV25“, „რიონი“, „გურჯაანის ტელევიზია“, „გურია TV“, „TV4“, „თრიალეთი“, „ოდიში“, „მეცხრე არხი“.

მედიამონიტორინგისთვის შეირჩა 17 ონლაინ მედიასაშუალება: ambebi.ge, batumelebi.ge, guriismoambe.com, interpressnews.ge, knews.ge, kutaisipost.ge, livepress.ge, mpn.ge, netgazeti.ge, news.on.ge, publika.ge, qartli.ge, radiotavisupleba.ge, reginfo.ge, sknews.ge, sputnik-georgia.com, tabula.ge.

მონიტორინგი რაოდენობრივი და თვისებრივი კვლევის კომპონენტებისგან შედგება.
კატეგორია: გრაფიკა
2 ოქტომბერს საქართველში თვითმართველობის არჩევნებია.

იხილეთ არჩევნების გაშუქების ძირითად რეკომენდაციები, რომლებიც "მედიაჩეკერმა" საქართველოს ჟურნალისტური ეთიკის ქარტიის სახელმძღვანელოზე დაყრდნობით მოამზადა:

კატეგორია: საქართველო

"ფორმულას" მფლობელის, დავით კეზერაშვილის საქმეზე სარჩელთან დაკავშირებით თავდაცვის სამინისტრო განცხადებას ავრცელებს და ამბობს, რომ "საზოგადოებრივი ინტერესებიდან გამომდინარე, სამინისტროს არც კი დაუშვია იმის ალბათობა, რომ სარჩელის უზრუნველყოფის მიზნით, მოეთხოვა ტელევიზიის წილის დაყადაღება".

სამინისტრო აცხადებს, რომ დავით კეზერაშვილი წლების განმავლობაში "ფორმულადან" დივიდენდს არ იღებს და, შესაბამისად, ზიანის ანაზღაურების ალბათობა აღნიშნული კომპანიიდან არ არსებობს.

"მიუხედავად იმისა, რომ დავით კეზერაშვილი თავის კომპანიებს აფინანსებს სახელმწიფოსგან მიტაცებული თანხებით, რომლებიც სახელმწიფოსთვის საზიანო საქმიანობას ეწევიან, თავდაცვის უწყება კარგად იაზრებს დემოკრატიულ ღირებულებებს, სიტყვის თავისუფლების მნიშვნელობას ჩვენი ქვეყნის ევროატლანტიკურ და ევროკავშირში გაწევრიანების გზაზე", - წერია სამინისტროს განცხადებაში. 

"თავდაცვის სამინისტრომ" დღეს გაავრცელა განცხადება, რომ „ფორმულას“ მფლობელის, დავით კეზერაშვილის წინააღმდეგ სასამართლოში სარჩელი შეაქვს ერთ-ერთ საქმეზე ზიანის ანაზღაურების მოთხოვნით. ტელეკომპანია „ფორმულას“ მენეჯმენტი აცხადებს, რომ ხელისუფლება არხის კრიტიკული სარედაქციო პოლიტიკის გამო ტელევიზიისთვის ფინანსური პრობლემების შექმნას ცდილობს.

დეტალები

თავდაცვის სამინისტრო "ფორმულას" 51%-იანი წილის მფლობელის, დავით კეზერაშვილის წინააღმდეგ სასამართლოში სარჩელი შეაქვს.

სარჩელით სამინისტრო ე.წ წვრთნების საქმეზე უზენაესი სასამართლოს მიერ გამტყუნებულად ცნობილ კეზერაშვილისგან მიყენებული ზიანის ანაზღაურებას ითხოვს.

პროკურატურა დავით კეზერაშვილს თავდაცვის მინისტრობის პერიოდში საწვრთნელ პროექტებზე 5 მილიონ ევროზე მეტის გაფლანგვაში ედავებოდა.

დავით კეზერაშვილის სასამართლომ 5 წლით თავისუფლების აღკვეთა 7 სექტემბეს მიუსაჯა. მანამდე ამავე საქმეზე წინა ორი ინსტანციის სასამართლოს გამამართლებელი განაჩენი ჰქონდა.

უცნობია, მოითხოვს თუ არა თავდაცვის უწყება ტელეკომპანია "ფორმულას" ქონების დაყადაღებას.
კატეგორია: საქართველო
ტელეკომპანია „ფორმულას“ მენეჯმენტი აცხადებს, რომ ხელისუფლება არხის კრიტიკული სარედაქციო პოლიტიკის გამო ტელევიზიისთვის ფინანსური პრობლემების შექმნას ცდილობს.

„ფორმულას“ მფლობელის, დავით კეზერაშვილის წინააღმდეგ თავდაცვის სამინისტროს სასამართლოში სარჩელი შეაქვს ერთ-ერთ საქმეზე ზიანის ანაზღაურების მოთხოვნით.

„ფორმულას“ გენერალური დირექტორი ზუკა გუმბარიძე ამას ტელეკომპანია „ფორმულას“ უკავშირებს და ამბობს, რომ „ ეს არის ნაწილი არსებული იმ კამპანიისა, რასაც ახორციელებს ხელისუფლება უკანასკნელ პერიოდში და როგორც ჩანს ეს ქმედებები რაღაც ფინალურ ფაზაში შედის.“

თავდაცვის სამინისტროს სარჩელის მიზეზებად გუმბარიძის ვერსიით, „ფორმულას“ ეთერში 27 სექტემბერს გასული „ედისონ რისერჩის“ მიერ წარმოებული კვლევების შედეგებია, რომლის მიხედვითაც მმართველი პარტია ვერ ახერხებს 43%-იანი ბარიერის გადალახვას, ასევე არჩევნების დღეს, 2 ოქტომბერს 20:00 საათზე დაგეგმილ ამავე კომპანიის ჩატარებული ეგზიტპოლების გამოქვეყნებას.

„რა სცენარითაც არ უნდა განვითარდეს მოვლენები. სულ რომ დღეს ან ხვალ ამ კომპანიაში დაინიშნოს დროებითი მმართველი ან მოხდეს რამე სხვა ტიპის ღონისძიება, რაც ხელს შეუშლის ეგზიტპოლების გამოქვეყნებას, ეს ეგზტიტპოლები მაინც გავა რომელიმე ქართული არხის ეთერში.“ - თქვა გუმბარიძემ პრესკონფერენციაზე.

ტელეკომპანიის დირექტორის განმარტებით, „მთავარის“ დამფუძნებლის ნიკა გვარამიას და „ტვ.პირველის“ მფლობელის ვატო წერეთლის მამის ბოლო პერიოდში დაჩაქრებული პროცესით მიმდინარე საქმეები ეჭვს აჩენს, რომ თუ არჩევნებზე ხელისუფლებისთვის სასურველი შედეგი არ დადგება, ისინი განიხილავენ სცენარს ერთდროულად შეაფერხონ ან გააჩერონ სამივე მედიის მაუწყებლობა, რისთვისაც სამართლებრივ ბერკეტებს გამოიყენებენ.

„ფორმულას“ დირექტორი აშშ-ის საელჩოს მოუწოდებს გაატარონ ყველანაირი პრევენციული ზომა, რათა ზეწოლა არ მოხდეს ეგზიტპოლების ჩამტარებელ კომპანიაზე.

დეტალები

თავდაცვის სამინისტრო "ფორმულას" 51%-იანი წილის მფლობელის, დავით კეზერაშვილის წინააღმდეგ სასამართლოში სარჩელი შეაქვს.

სარჩელით სამინისტრო ე.წ წვრთნების საქმეზე უზენაესი სასამართლოს მიერ გამტყუნებულად ცნობილ კეზერაშვილისგან მიყენებული ზიანის ანაზღაურებას ითხოვს.

პროკურატურა დავით კეზერაშვილს თავდაცვის მინისტრობის პერიოდში საწვრთნელ პროექტებზე 5 მილიონ ევროზე მეტის გაფლანგვაში ედავებოდა.

დავით კეზერაშვილის სასამართლომ 5 წლით თავისუფლების აღკვეთა 7 სექტემბეს მიუსაჯა. მანამდე ამავე საქმეზე წინა ორი ინსტანციის სასამართლოს გამამართლებელი განაჩენი ჰქონდა.

უცნობია, მოითხოვს თუ არა თავდაცვის უწყება ტელეკომპანია "ფორმულას" ქონების დაყადაღებას.
კატეგორია: რესურსები
• რა რაოდენობის ადამიანს/მომხმარებელს ვწვდები ონლაინ?

• ვინ არის ჩემი ონლაინ აუდიტორია?

• რითაა ჩემი ონლაინ აუდიტორია დაინტერებული?

• როდის და როგორ შემიძლია უკეთ მოვიზიდო ონლაინ აუდიტორია?

• რა ტიპის კონტენტი მუშაობს ჩემს ონლაინ აუდიტორიაზე?

ამ კითხვებზე პასუხებს სპეციალურად ჟურნალისტებისა და მედიის პროფესიონალებისთვის შექმნილ ახალ სახელმძღვანელოში გაიგებთ.

სოციალური მედიის გზამკვლევი „დოიჩე ველემ“ მოამზადა და რამდენიმე ენაზე, მათ შორის ქართულადაა ხელმისაწვდომი.

სახელმძღვანელო დაგეხმარებათ, გაიგოთ, თუ რა ტიპის ონლაინ აქტივობები ღირს ძალისხმევად, რომლის გაუმჯობესებაა შესაძლებელი და რომელი არ ღირს დროის ფუჭად კარგვად.

გზამკვლევი დაყოფილია 7 ნაწილად:

1. აღწერს სოციალური მედიის ანალიზს მედიაში ყველაზე ხშირად დასმული კითხვების კუთხით.

2. ეთმობა სოციალური მედიის ანალიზის საფუძვლებს.

3. ეძღვნება იმ რესურსებს, რომლებიც აუცილებელი წინაპირობაა ონლაინ კომუნიკაციების ეფექტური ანალიზისათვის.

4. გაეცნობბით ფეისბუკს, ტვიტერს, იუთუბსა და ვოთსაპს.

5. როგორ წარვუდგინოთ ანალიზი მენეჯერებსა და რეკლემის დამკვეთებს.

6. ეხმარება ტრენერებს, რომელთაც ამ სახელმძღანელოს გამოყენება ვორქშოფებზე და ტრენინგებზე სურთ.

7. მოიცავს სოციალური მედიის ტერმინოლოგიის განმარტებას.

სახელმძღვანელო შეგიძლიათ იხილოთ ამ ბმულზე.
კატეგორია: საქართველო
თბილისის მერმა და „ქართული ოცნების“ გენერალურმა მდივანმა კახა კალაძემ, კრიტიკულ კითხვებზე საპასუხოდ, “მთავარი არხის” ჟურნალისტს სიტყვიერი შეურაცხყოფა მიაყენა.

ჟურნალისტმა კითხვის დასმისას კალაძეს 5-6 ივლისს მედიის წარმომადგენლებზე თავდასხმა შეახსენა და უთხრა - რადიკალები გარეთ თქვენ გამოიყვანეთო. საპასუხოდ, კალაძემ ჟურნალისტს მოუწოდა, “სიტყვები შეარჩიოს” და შეურაცხმყოფელი სიტყვებით მიმართა: “თქვენზე დიდი რადიკალები, თქვენზე უბინძურესი ადამიანები ამ ქვეყანაში არ არსებობენ. თქვენ ხართ თავი და თავი სიძულვილის, ბოროტების. თუ რაიმე ცუდი შეიძლება გაიფიქროს ადამიანმა, აი, თქვენ ხართ ამის სახე”.



კახა კალაძის შეურაცხმყოფელი კომენტარები კრიტიკული ჟურნალისტების მიმართ ხელისუფლების მხრიდან მედიაზე თავდასხმის პირველი შემთხვევა არ არის. საქართველოს ჟურნალისტური ეთიკის ქარტიამ არაერთხელ მოუწოდა “ქართულ ოცნებას” შეწყვიტოს აგრესიული რიტორიკა და გადავიდეს მედიასთან საქმიანი ურთიერთობის რეჟიმში.

დღეს, 29 სექტემბერს “საერთაშორისო გამჭვირვალობ საქართველო” წინასაარჩევნო მედიაგარემოს შეფასების ანგარიშში წერდა, რომ ბოლო პერიოდში მმართველი პარტიის წევრთა აგრესიულმა და მუქარის შემცველმა რიტორიკამ ყოველდღიური სახე მიიღო და “ხელისუფლების უმოქმედობითა თუ აგრესიული რიტორიკის მაგალითებით წახალისებული მოქალაქეები საჯარო სივრცეში ღიად ემუქრებიან და შეურაცხყოფას აყენებენ ჟურნალისტებს.”
კატეგორია: საქართველო
„ჟურნალისტებისათვის პროფესიული საქმიანობის შესრულება სიცოცხლისა და ჯანმრთელობისათვის საშიში გახდა, განსაკუთრებით კრიტიკული მედიის წარმომადგენლებისათვის.“, - ასე აფასებს წინასაარჩევნოდ მედიაგარემოს „საერთაშორისო გამჭვირვალობა-საქართველო“.

ორგანიზაციის ანგარიში 2020 წლის 31 ოქტომბრის საპარლამენტო არჩევნებიდან 2021 წლის თვითმმართველობის არჩევნებამდე პერიოდს მოიცავს.

რას წერს მედიაგარემოზე არასამთავრობო ორგანიზაცია?

„საერთაშორისო გამჭვირვალობა - საქართველოს“ შეფასებით, მედიაგარემოსთან მიმართებით მდგომარეობამ ქვეყანაში კრიტიკულ ზღვარს მიაღწია.

საპარლამენტო არჩევნებიდან დღემდე სულ მცირე 23 მედიის წარმომადგენელზე 93 ძალადობის ფაქტი დაფიქსირდა. მათგან 2021 წლის 5-6 ივლისს ჰომოფობიური და მოძალადე ჯგუფების თავდასხმის შედეგად მედიის 53 წარმომადგენელი დაშავდა.

ორგანიზაციის განცხადებით:

• ხელისუფლება ჟურნალისტების უფლებების დარღვევაზე სათანადოდ არ რეაგირებს.

• მონიტორინგის პერიოდში დაფიქსირდა, სავარაუდოდ, განსხვავებული აზრის გამო ჟურნალისტის გათავისუფლებისა და მედიის ხელმძღვანელობის მიერ ჟურნალისტის მიმართ დისკრიმინაციული მოპყრობის ფაქტები.

• მმართველი პარტიის წევრთა აგრესიულმა და მუქარის შემცველმა რიტორიკამ ყოველდღიური სახე მიიღო, რაც დამატებით ახალისებს მედიის წინააღმდეგ ძალადობას და ამძაფრებს ქვეყანაში არსებულ ისედაც რთულ და პოლარიზებულ გარემოს.

• ქვეყანაში უკანონო მოსმენები გრძელდება, მათ შორის კრიტიკული მედიის ჟურნალისტების წინააღმდეგ და ამას ტოტალური ხასიათი აქვს. მინიმუმ, 10 მედიასაშუალების 55-მა ჟურნალისტი ადასტურებს, სავარაუდოდ, სუს-ის ფაილებში არსებული ინფორმაცის ნამდვილობას.

• გრძელდება პოლიტიკურად მოტივირებული საქმეები კრიტიკული მედიის წინააღმდეგ, მათ შორის, ტელევიზიის მფლობელებზე, ხელმძღვანელობასა თუ ოჯახის წევრებზე ზეწოლის მიზნით.

• გრძელდება სოციალურ ქსელებში დეზინფორმაციული კამპანია, რომელიც საზოგადოებრივი აზრის მანიპულირების გზით პოლიტიკური ოპონენტების, სამოქალაქო სექტორისა და ჟურნალისტების დისკრედიტაციას ისახავს მიზნად.

„საერთაშორისო გამჭვირვალობა- საქართველოს“ ანგარიშში მედიაგარემოს შეფასებისას მოყვანილია ცალკეული მაგალითებიც.
კატეგორია: საქართველო
ქართული საინფორმაციო სივრცის დეზინფორმაციისგან დაცვის მიზნით, რვა არასამთავრობო ორგანიზაციამ „კოალიცია ინფორმაციის სანდოობისთვის“ ჩამოაყალიბა. კოალიციის ინფორმაციით, მათი ძირითადი სამუშაო მიმართულებები დეზინფორმაციის წყაროების იდენტიფიცირება, მონიტორინგი და კვლევა იქნება.

კოალიციის წევრი, ჟურნალისტური ეთიკის ქარტიის დირექტორი მარიამ გოგოსაშვილი ამბობს, რომ მათი გაერთიანებით მთავარი მიზანი დეზინფორმაციასთან კოორდინებული ბრძოლა და საინფორმაციო ველის გაუმჯობესებაა:

“რვავე ორგანიზაციას გვაქვს ჩვენი ნიშა, რა მიმართულებითაც ვმუშაობთ. კოალიციის შექმნით კი ჩვენ გვეძლევა საშუალება, რომ ჩვენ მიერ ჩატარებული კვლევები, მონიტორინგი თუ ზოგადად, მოსაზრებები გავუზიაროთ ერთმანეთს, შევქმნათ საერთო სურათი და ერთიანი ძალებით ვებრძოლოთ დეზინფორმაციას.” - ამბობს მარიამ გოგოსაშვილი.

„კოალიცია ინფორმაციის სანდოობისთვის“ USAID და Zinc Network-ის მხარდაჭერით შეიქმნა. Zinc Network-ის ინფორმაციული სანდოობის პროგრამის ხელმძღვანელი მიხეილ ბენიძე ამბობს, რომ დეზინფორმაცია ახალი გამოწვევა არ არის, თუმცა, ბოლო წლების განმავლობაში განსაკუთრებით სერიოზულ პრობლემად იქცა:

„არავის აქვს ილუზია, რომ დეზინფორმაცია აღარ იქნება და ეს გამოწვევა მოიხსნება, მაგრამ ჩვენი მიზანია, რომ ზიანი შემცირდეს და მედეგობა გაიზარდოს. გამოწვევა მზარდია, დეზინფორმაცია უფრო მძლავრი ხდება და შეიძლება სერიოზული საფრთხეები შექმნას”.

მიხეილ ბენიძე ამბობს, რომ ადგილობრივი და გარე ძალები აქტიურად ცდილობენ საინფორმაციო სივრცეზე გავლენის მოხდენას. ამიტომ, მისი თქმით, მნიშვნელოვანია პრობლემის კარგად გააზრება და სწორი სტრატეგიების დასახვა: “ჩვენი პროგრამის მიზანია არა მხოლოდ “სიმპტომებს” ვებრძოლოთ, არამედ - გავარკვიოთ რა არის ფესები ამ პრობლემის”.

კოალიცის განცხადებით, ისინი მზად არიან, ითანამშრომლონ საზოგადოებასთან, სამოქალაქო სექტორთან, მედიასთან, აქტივისტებთან, საერთაშორისო ორგანიზაციებთან და შესაბამის სახელმწიფო ინსტიტუტებთან. ყველასთან, ვინც იაზრებს დეზინფორმაციის დამაზიანებელ საფრთხეებს და მზადაა ქვეყნის გაძლიერებაში წვლილი შეიტანოს.

კოალიციაში შემავალი ორგანიზაციები არიან: ჟურნალისტის ეთიკის ქარტია, მედიის განვითარების ფონდი, iFact, ინფორმაციის თავისუფლების განვითარების ინსტიტუტი (IDFI), ომისა და მშვიდობის გაშუქების ინსტიტუტი, სამართლიანი არჩევნები, საქართველოს რეფორმების ასოციაცია (GRASS), საქართველოს სტრატეგიისა და საერთაშორისო ურთიერთობების კვლევის ფონდი, ტოლერანტობისა და მრავალფეროვნების ინსტიტუტი (TDI).
კატეგორია: საქართველო
სახელმწიფო ინსპექტორის სამსახურმა, ლექსო ლაშქარავას გადაადგილების ამსახველი ვიდეოჩანაწერების გასაჯაროების გამო, შინაგან საქმეთა სამინისტრო 2000 ლარით დააჯარიმა. უწყების განმარტებით, მასალის გასაჯაროებას არ ჰქონდა კონკრეტული და მკაფიოდ განსაზღვრული კანონიერი მიზანი.

სახელმწიფო ინსპექტორის სამსახურის შეფასებით, შსს-მ დაარღვია პერსონალურ მონაცემთა დაცვის შესახებ საქართველოს კანონი, რადგან „11 ივლისს სამინისტროს მიერ გასაჯაროებული ვერც ერთი ვიდეოჩანაწერი ვერ პასუხობდა საზოგადოებაში არსებულ მთავარ კითხვას გარდაცვალების კონკრეტულ მიზეზთან დაკავშირებით”. გარდა ამისა, ბრიფინგებზე არ იყო განმარტებული, რა კავშირი ჰქონდა ლაშქარავას გარდაცვალებასთან გასაჯაროებულ ვიდეოჩანაწერებს.

სახელმწიფო ინსპექტორის სამსახურის განცხადებაში ნათქვამია, რომ შსს-მ ბრიფინგზე გასაჯაროებული ერთ-ერთი აუდიო-ვიდეოჩანაწერი არაკანონიერად მოიპოვა. საუბარია სამედიცინო დაწესებულებიდან ამოღებულ ჩანაწერზე, რომელიც სამინისტრომ წერილობითი მოთხოვნის საფუძველზე მოიპოვა.

“უდიო-ვიდეოჩანაწერზე წვდომისა და სამედიცინო დაწესებულების კომპიუტერული მოწყობილობიდან მისი გადმოწერის დროს სამინისტროს მიერ არ შედგენილა საგამოძიებო მოქმედების ჩატარების ამსახველი რაიმე საპროცესო დოკუმენტი” - წერია განცხადებაში.

პერსონალურ მონაცემთა დაცვის შესახებ კანონის დარღვევის გამო, ადმინისტრაციული პასუხისმგებლობა დაეკისრა სამედიცინო დაწესებულებასაც და 500 ლარით დაჯარიმდა.



"ტვ პირველის" ოპერატორი ალექსანდრე ლაშქარავა 11 ივლისს გამთენიისას საკუთარ სახლში გარდაცვლილი იპოვეს. იგი ერთ-ერთია მედიის 53 წარმომადგენელს შორის, რომელსაც 5 ივლისს "თბილისი პრაიდის" მიერ დაგეგმილი "ღირსების მარშის" წინააღმდეგ გამოსული ძალადობრივი ჯგუფები ფიზიკურად გაუსწორდნენ.
კატეგორია: საქართველო
“მთავარი არხის” ინფორმაციით, მაუწყებლის ოპერატორი ლევან აბლოთია ქარელში, “ქართული ოცნების” წევრებმა პარტიის შტაბის მეორე სართულიდან გადმოაგდეს.

ჟურნალისტი ბექა ყორშია, რომელიც ქარელში ოპერატორთან ერთად იყო, გვიყვება, რომ “ქართული ოცნების” შტაბში მერობის კანდიდატის, ზაზა გულიაშვილის ჩასაწერად იყვნენ მისულები:

“გავრცელდა ინფორმაცია, რომ სუსის აგენტია და მქონდა რამდენიმე შეკითხვა. ამ ყველაფერმა გააღიზიანა “ოცნების” წევრები, რომლებიც იყვნენ შტაბში. გამოგვაგდეს. აღარც გვიცდია შეცვლა. ვწერდით სტენდაფს, გამოვარდნენ და გაგვისწორდნენ”.

მისი თქმით, ოპერატორის მდგომარეობა მძიმეა - “მეუბნებოდა ფეხს ვერ ვამოძრავებო, ზურგს და ხელს ვერ ვგრძნობო”. 

"ქართული ოცნების" წევრმა მამუკა მდინარაძემ სპეციალურ ბრიფინგზე თქვა, რომ ბექა ყორშია იქ პროვოკაციის მოწყობას ცდილობდა, რა დროსაც გამოაძევეს შტაბიდან. მისივე თქმით, სიტყვიერი კამათი და დაპირისპირება იყო, თუმცა, არანაირი ფიზიკური შეხება ოპერატორსა და "ოცნების" შტაბის წარმომადგენლებს შორის არ ყოფილა: " "მთავარი არხის" ოპერატორი  უკანა სვლით ტოვებდა ტერიტორიას, რა დროსაც კიბის მოაჯირს წამოედო და გადავარდა და დაეცა კიბის ზედა საფეხურებზე".

"მთავარი არხი" ამბობს, რომ თავდასხმის ვიდეოკადრები გადაღებული აქვთ და მალე გამოაქვეყნებენ. თავის მხრივ, მამუკა მდინარაძეც ამბობს, რომ მათაც ვიდეომასალა გადაღებული და გაავრცელებენ.
კატეგორია: საქართველო
სავარაუდოდ, სახელმწიფო უსაფრთხოების სამსახურიდან გამოჟონილ ფაილებთან დაკავშირებით, “TV პირველის“ საინფორმაციო სამსახურის უფროსი ნოდარ მელაძე პროკურატურამ გამოკითხა.

მელაძე ამბობს, რომ 15 სექტემბერს თბილისის პროკურორი დაუკავშირდა და გამოკითხვაზე დაიბარა, რის შემდეგაც, ადვოკატთან ერთად მივიდა დაკითხვაზე. მისივე თქმით, კითხვების ძირითადი ნაწილი ეხებოდა, თუ რა ფორმით მიიღეს ბმული და რა მიმოწერა ჰქონდათ წყაროსთან.

“გამოძიებას აინტერესებს ის, ვინ გაავრცელა და არა ის, ვინ ჩაწერა. ვინ იდგა ამ უკანონობის უკან - ამის დადგენის განზრახვა გამოძიებას არ აქვს” - ამბობს მელაძე “TV პირველის” ეთერში..

მისივე თქმით, გამოძიებას “ცოტა უცნაური კითხვები” ჰქონდა. მაგალითად, ინტერესდებოდნენ, რა მასალებს გაეცნენ ჟურნალისტები - “მოგვიყევი იქ რაც წაიკითხეო”.

გამოკითხვაზე დაბარებულები არიან სხვა მედიასაშუალებების წარმომადგენლებიც. “ფორმულას” ინფორმაციით, მათი ჟურნალისტებს, მარტა ქურასბედიანსა და ქეთი ნადიბაიძეს პროკურატურიდან დაუკავშირდნენ და ხვალ, 16 სექტემბერს აპირებენ მისვლას.

რა მოხდა

13 სექტემბერს სხვადასხვა მედიასაშუალებას ელექტრონულ ფოსტაზე „ჰაკიმ ფაშას“ სახელით მიუვიდა ბმული სახელწოდებით, “სუსის კომპრომატი საპატრიარქოს წინააღმდეგ“.

ღია წყაროზე ატვირთულ ფაილებში, სავარაუდოდ, სასულიერო პირების პირადი ცხოვრების შესახებ წერილობითი დეტალებია ასახული. მასალების ავთენტურობა დადასტურებული არ არის.

სხვადასხვა მედიასაშუალების ჟურნალისტებმა დაადასტურეს, რომ ფაილებში მათი საუბრებიც იძებნება. მათ ნაწილს გადაწყვეტილი აქვს, რომ გამოძიების დაწყების მოთხოვნით საგამოძიებო ორგანოეს მიმართოს.

მედიასაშუალებების მიერ ფარულ ჩანაწერებთან დაკავშირებით გავრცელებულ ინფორმაციაზე საქართველოს პროკურატურამ გამოძიება კერძო კომუნიკაციის საიდუმლოების დარღვევის ფაქტზე დაიწყო. სუს-მა 14 სექტემბერს განაცხადა, რომ პროკურატურასთან თანამშრომლობისთვის მზად არის.
კატეგორია: საქართველო
ჟურნალისტების ნაწილი ადასტურებს, რომ 13 სექტემბერს, სავარაუდოდ, სახელმწიფო უსაფრთხოების სამსახურიდან, გამოჟონილ ჩანაწერებში მათი საუბრებიცაა. ისინი აპირებენ, საგამოძიებო ორგანოებს მიმართონ.

რა მოხდა?

ტელეკომპანია „მთავარის“ წამყვანი ეკა კვესიტაძე ერთ-ერთია მათ შორის, ვინც ამბობს, რომ 13 სექტემბერს გავრცელებულ მასალებში მისი მიმოწერაც იძებნება.

„ფეისბუქის მიმოწერიდან არის ძალიან ბევრი რამე. მათ შორის ისიც - როგორ მომილოცა დაბადების დღე მელქისედეკმა. ასევე ჩემი ნინია კაკაბაძის მიმოწერა - სადაც ნინიას ვეუბნები, რომ არ ვიცნობ პეტრე ცაავას და მასთან შეხვედრა მაინტერესებს მეთქი. ანუ, რასაც ფეისბუკ ინბოქსში ვწერთ მეგობრებო, ყველაფერი სუსმა იცის.“, - ამბობს ჟურნალისტი. ის იურიდიულ კონსულტაციებს გადის და აპირებს საქმესთან დაკავშირებით საგამოძიებო ორგანოებს მიმართოს.

ჟურნალისტებს გამოძიების დაწყების მოთხოვნით საგამოძიებო ორგანოებისთვის წერილობითი მიმართვისკენ მოუწოდებს იურისტი სულხან სალაძე.

„ კარგად ვიცი, რომ არავინ გამოიძიებს და ისიც კარგად ვიცი, რომ გამოძიების დაწყების ვალდებულება ინფორმაციის გავრცელების მომენტიდან ისედაც არსებობობდა, მაგრამ ამ მარაზმის დასრულება თუ გვინდა ეს მოჯადოებული წრე უნდა დაირღვეს. ჯერ ქვეყნის შიდა მართლმსაჯულების ინსტიტუტების გამოყენების ცდა და მერე საერთაშორისო მექანიზმები”, - წერს სულხან სალაძე "ფეისბუქზე".

ეკა კვესიტაძე ამბობს, რომ არც მას აქვს ამ საქმის გამოძიების მოლოდინი, თუმცა პრეცედენტები უნდა შეიქმნასო. „ყველამ უნდა მივმართოთ და რაღაც დროს შეიძლება სტრასბურგშიც წავიდეს ეს საქმეო“,-გვეუბნება კვესიტაძე.

კონტექსტი

13 სექტემბერს სხვადასხვა მედიასაშუალებას ელექტრონულ ფოსტაზე „ჰაკიმ ფაშას“ სახელით მიუვიდა ბმული სახელწოდებით, “სუსის კომპრომატი საპატრიარქოს წინააღმდეგ“.

ღია წყაროზე ატვირთულ ფაილებში, სავარაუდოდ, სასულიერო პირების პირადი ცხოვრების შესახებ წერილობითი დეტალებია ასახული. მასალების ავთენტურობა დადასტურებული არ არის.

მედიასაშუალებების მიერ ფარულ ჩანაწერებთან დაკავშირებით გავრცელებულ ინფორმაციაზე საქართველოს პროკურატურამ გამოძიება კერძო კომუნიკაციის საიდუმლოების დარღვევის ფაქტზე დაიწყო.

"იმ მედიასაშუალებებს, რომლებსაც გააჩნიათ აღნიშნული მასალა, მოვუწოდებთ ამჯერად მაინც ითანამშრომლონ გამოძიებასთან და მოგვაწოდონ მათ ხელთ არსებული მტკიცებულებები", - წერია პროკურატურის გავრცელებულ განცხადებაში.

ჟურნალისტები გაჟონილ ფაილებში

ტელეკომპანია „მთავარის“ დირექტორი ნიკა გვარამია ამბობს, რომ გაჟონილ ფაილებში მისი და მისი ჟურნალისტების „ვოტსაპში“ საუბარი ამოიცნო.

„ჩემს ნაწილში, ყველაზე ამაზრზენი ჩემი და დეკანოზ მამალაძის სატელეფონო საუბრის კრებსია - ანუ, ადვოკატის და კლიენტის ურთიერთობა, რომელიც ფარულობის სრული პრივილეგიითაა კანონმდებლობით დაცული.“, - წერს გვარამია.

ამავე აპლიკაციაში მისი რესპონდენტთან საუბარი ამოიცნო „ტვ პირველის“ საინფორმაციო სამსახურის უფროსმა ნოდარ მელაძემაც. მელაძე წერს, რომ გაჟონილ მასალებში მისი შვილების შესახებ ნათლობის დეტალებიც იძებნება.



2014 და 2020 წლით დათარიღებულ ფაილებში საკუთარი სახელი ნახა „ფორმულას“ ჟურნალისტმა ვახო სანაიამ.

„მე, ჟიჟი [ნინო ჟიჟილაშვილი], ჩვენი პროდიუსერები და ჟურნალისტები სრული შემადგენლობის სუსის ანგარიშებში. ვინ დავპატიჟეთ გადაცემებში, ვის რა უთხრეს პროდიუსერებმა და ვის რა უპასუხეს“, - წერს სანაია.

13 სექტემბერს გაჟონილ მასალებში თავიანთი საუბრების ამოცნობა დაადასტურეს „ტაბულას“ რედაქტორმა ლევან სუთიძემ და On.ge-ს ყოფილმა რედაქტორმა და „რადიო თავისუფლების“ ჟურნალისტმა გელა ბოჩიკაშვილმაც.
კატეგორია: საქართველო

„ტვ პირველის“ ოპერატორს პროფესიული მოვალეობის შესრულების დროს ავტომობილი შეაჯახეს. ამის შესახებ ინფორმაციას „ტვ პირველი“ ავრცელებს.

რა მოხდა?

ტელევიზიის გადამღები ჯგუფი ფონიჭალაში ნარკორეალიზატორების დაკავების სპეცოპერაციას აშუქებდა. არხის საინფორმაციო სამსახურის უფროსი, ნოდარ მელაძე, გვიყვება, რომ შემთხვევა მაშინ მოხდა, როდესაც ჟურნალისტები ინფორმაციის მოპოვებას დაკავებულების ახლობლებისგან ცდილობდნენ.

„ამ დროს გამოვიდა მანქანა, რომელიც, სავარაუდოდ, კავშირში იყო დაკავებულებთან და განზრახ შეეჯახა ჩვენს ოპერატორს. კადრებში შესაძლებელია მანქანის ნომრის იდენტიფიცირება, ამიტომ სამართალდამცველებს ეს არ უნდა გაუჭირდეთ“, - ამბობს მელაძე.

„ტვ პირველში“ გვეუბნებიან, რომ ინციდენტის შედეგად დაზიანდა სამაუწყებლო აპარატურა.

ოპერატორის მდგომარეობა

ნოდარ მელაძის ინფორმაციით, დაშავებული ოპერატორი კლინიკაში გადაიყვანეს. მისი მდგომარეობა სტაბილურია და მძიმე დაზიანებები არ მიუღია.

"სამუშაო პროცესი იყო ჩვეულებრივად, უბრალოდ ერთ-ერთი დაკავებულის ნათესავი გაღიზიანდა, რადგან ჩემს საქმეს ვაკეთებდი, პირდაპირ მოვიდა და მანქანით ფეხში დამეჯახა. ისე აღმოჩნდა, რომ მარტო მე მომხვდა, საბედნიეროდ, სხვები გადარჩნენ.", - ამბობს დაშავებული ოპერატორი ლევან ბრეგვაძე.

გამოძიება დაწყებულია

ოპერატორზე თავდასხმის ფაქტთან დაკავშირებით გამოძიება საქართველოს სისხლის სამართლის კოდექსის 187-ე და 154-ე მუხლებით დაიწყო, რაც სხვისი ნივთის დაზიანებას ან განადგურებას და ჟურნალისტის საქმიანობაში ხელის შეშლას გულისხმობს. შინაგან საქმეთა სამინისტროს ინფორმაციით, დაკავებულია ერთი პირი.

ქარტია ხელისუფლებას ჟურნალისტების უსაფრთხოების დაცვისკენ მოუწოდებს

ჟურნალისტური ეთიკის ქარტიამ მომხდართან დაკავშირებით განცხადება გაავრცელა, რომლითაც ხელისუფლებას მოუწოდებს დაიცვას ჟურნალისტთა უსაფრთხოება და პროფესიული საქმიანობის შესრულებისას მედიას შეუქმნას შესაბამისი სამუშაო პირობები.

ქარტია მოუწოდებს შსს-ს სწრაფად და ეფექტიანად გამოიძიოს ჟურნალისტებზე თავდასხმის თითოეული ფაქტი და მიიჩნევს, რომ ბოლო პერიოდში ჟურნალისტებზე გახშირებულ თავდასხმებს ხელისუფლების აგრესიული რიტორიკა და სამართალდამცავი უწყებების მხრიდან არასათანადო რეაგირება განაპირობებს. 

კატეგორია: ცხოვრება კოვიდთან ერთად
ხვიჩა ვაშაყმაძე, „ქუთაისიპოსტი“



პრობლემა, რომელსაც ჩვენ შევეხეთ პანდემიის პერიოდში, არის საკმაოდ მრავალფეროვანი. მაგრამ ადამიანებთან ერთად, მნიშვნელოვანია ის, რომ კოვიდის თემა შეეხო ცხოველებს და, კერძოდ, ძაღლებს, რომლებიც ქუჩაში ცხოვრობენ. აქ რამდენიმე პრობლემა გამოიკვეთა. პირველი ის, რომ მაშინ როდესაც პანდემია დაიწყო და დაიხურა აბსოლუტურად ყველაფერი, კვების ობიექტები, რესტორნები, ადამიანები ქუჩაში ვერ გამოდიოდნენ, ბაზრობები დაიხურა, ამ დროს მიუსაფარი ძაღლები დარჩნენ აბსოლუტურად ბედის ანაბარა. ისინი ფაქტობრივად ვერ იკვებებოდნენ და მათი მდგომარეობა გაუარესდა, როგორც კვების კუთხით, ისე ჯანმრთელობასთან დაკავშირებული პრობლემები შეექმნათ და ასე შემდეგ. მაგრამ რაც ყველაზე მნიშვნელოვანია, ამ პერიოდში საგრძნობლად იმატა ქალაქის ქუჩებში მიუსაფარი ძაღლების რაოდენობამ.

როგორც გაირკვა, ეს ყველაფერი ხდებოდა სწორედ კოვიდთან დაკავშირებით და გავრცელებულ ხმებთან დაკავშირებით, თითქოს ცხოველებისგან კოვიდი გადადის ადამიანებზე და ავადდებიან ადამიანები. ამ დროს მოსახლეობის გარკვეულ ნაწილში გაჩნდა შიში და სწორედ ამიტომ ძალიან ბევრი ძაღლი აღმოჩნდა, სამწუხაროდ, ქუჩებში, ძაღლები, რომლებიც აბსოლუტურად არ იყვნენ ადაპტირებული ქუჩასთან და მათ არ შეეძლოთ თავის გადარჩენა პატრონის გარეშე.

ადამიანებმა ძალიან ადვილად დაიჯერეს ეს ყველაფერი, გავრცელებული ჭორები, და ასევე ადვილად გასწირეს თავიანთი ოჯახის წევრები, თავიანთი ოთხფეხა მეგობრები ქუჩისთვის და სიკვდილისთვის. ხშირად ცხოველები, ძაღლები მიჰყავდათ სადღაც ტყის პირას, ტრასებზე, იქ ტოვებდნენ და ერთ-ერთი ასეთი ადგილი ქუთაისთან ახლოს არის ქუთაისი-ხონის დამაკავშირებელი გზა მდინარე გუბისწყალთან, სადაც არის დაუსახლებელი ტერიტორია, და იქ ძალიან ბევრი ძაღლი ჩამოსვა პატრონმა და მიატოვა.

პრობლემა სერიოზულია და აქ ერთადერთი გამოსავალი რაც არის, კოვიდის გამო ქუჩაში გამოჩენილი ძაღლები ბევრმა შეიფარა, მიიკედლა, მაგრამ ძალიან მცირე რაოდენობით. აქ ახლა მუნიციპალიტეტის როლი იქნება დიდი ამ ძაღლების მოვლა-პატრონობაში.

მუნიციპალიტეტში ხდება როგორ: დაიჭერენ ცხოველს, გადაიყვანენ თავშესაფარში, იქ ხდება სტერილიზაცია, კასტრაცია და შემდეგ ისევ უბრუნებენ იმ ადგილს, საიდანაც იქნა აყვანილი. ის, რომ მუდმივად იქ ჰყავდეთ ეს ცხოველები, ვერ ხერხდება. აუცილებელია, რომ ხელისუფლებამ მიიღოს ზომები, რომ მოხდეს ქუჩაში მიუსაფარი ძაღლების სტერილიზაცია, კასტრაცია და არ მოხდეს მასობრივად მათი გამრავლება, იმიტომ რომ უკვე თვალშისაცემია, პრობლემებს უქმნის გამვლელებსაც ხშირ შემთხვევაში, თუმცა ძაღლების უმრავლესობა არ არის აგრესიული და ცდილობენ ადამიანებთან კონტაქტში შესვლას. მაგრამ ხშირად ადამიანების გარკვეული ნაწილისგან ისინი ხდებიან ძალადობის მსხვერპლნი. ძალიან ბევრი ადამიანია ცხოველთა მოძულე. ხშირად მათ სცემენ, ურტყამენ.

ჩემს ჭიშკართან მოვიდა გაუბედურებულ მდგომარეობაში და გახდა ჩემი ოჯახის წევრი ასეთი ქუჩის მიუსაფარი ძაღლი. მიხარია, რომ ბევრია ისეთი ადამიანი ვისაც აჰყავს, მაგრამ სამწუხარო ის არის, რომ ადამიანებმა დაიჯერეს მითები კოვიდთან დაკავშირებით, თითქოს ცხოველებს გადააქვთ რაღაც შტამი კოვიდის.
კატეგორია: საქართველო
კომუნიკაციების კომისიის ინფორმაციით, 2021 წლის მეორე კვარტალში ტელევიზიებმა სარეკლამო შემოსავლების სახით 21.3 მილიონი ლარი გამოიმუშავეს, რაც გასული წლის ამავე პერიოდთან შედარებით 74%-ით მეტია.

ყველაზე მეტი სარეკლამო შემოსავალი - 6.9 მილიონი ლარი ტელეკომპანია “იმედმა” მიიღო. 3.2 მილიონი ლარი “მთავარმა არხმა”, 2.5 მილიონი ლარი კი - “რუსთავი 2-მა”.

გაიზარდა ტელეკომპანია “ფორმულას” და “ტვ პირველის” შემოსავალიც და 1.8 მილიონი ლარი და 1.7 მილიონი ლარი გახდა. 2021 წლის მეორე კვარტალში 1.2 მილიონ ლარი გამოიმუშავა „პოსტვ-მ”. რაც შეეხება საზოგადოებრივი მაუწყებლისა და „სილქნეტის“ სარეკლამო შემოსავლებს - ბოლო სამ თვეში მაუწყებლებმა 0.9-0.9 მილიონ ლარი მიიღეს.

კომუნიკაციების კომისიის ინფორმაციით, საერთო ჯამში, 21.3 მილიონი ლარიდან ყველაზე დიდი წილი, 19.3 მილიონი ლარი პირდაპირი რეკლამა და სპონსორობა იყო.

2021 წლის მეორე კვარტალში, წინა წლის ამავე პერიოდთან შედარებით, 90%-ით გაიზარდა რადიოს სარეკლამო შემოსავლებიც და 1.735 მილიონი ლარი შეადგინა.

ყველაზე მეტი, 965.1 ათასი ლარის სარეკლამო შემოსავალი რადიო ჰოლდინგმა „ფორტუნამ“ მიიღო, რადიო „იმედს“ სარეკლამო შემოსავალი 183.3 ათასი ლარი ჰქონდა, 88.5 ათასი ლარი შეადგინა „რადიოცენტრი პლუსის“ სარეკლამო შემოსავალმა, 77.5 ათასი ლარი - „ქართულმა რადიომ“, ხოლო 77.0 ათასი ლარი რადიო „ჯორჯიან თაიმსმა“ მიიღო. „ჩვენი რადიოს“ სარეკლამო შემოსავალმა 61.3 ათასი ლარი, მედია ჰოლდინგის - „აფხაზეთის ხმა“ - 59.5 ათასი ლარი, ხოლო კომპანია „მედიასტრიმის“ შემოსავალმა 53.1 ათასი ლარი შეადგინა. 31.0 ათასი ლარის სარეკლამო შემოსავალი მიიღო სამაუწყებლო კომპანია „ჰერეთმა“, „ახალი რადიოს“ მიღებულმა შემოსავალმა კი 19.3 ათასი ლარი შეადგინა. 119.3 ათასი ლარი დანარჩენ რადიო მაუწყებლებზე გადანაწილდა.

2021 წლის წლის პირველ კვარტალში, წინა წლის იმავე პერიოდთან შედარებით, ტელევიზიების შემოსავალი მცირედით გაზრდილი, რადიოების კი - შემცირებული იყო. პირველ სამ თვეში ტელემაუწყებლებმა რეკლამებით საერთო ჯამში 14.5 მილიონი ლარი, რადიოებმა კი 1.4 მილიონი ლარი გამოიმუშავეს.
კატეგორია: ეთიკა

ტელეკომპანია "ფორმულამ" სოციალური ქსელიდან წაშალა სიუჟეტი, სადაც ძალადობის სავარაუდო მსხვერპლი და სავარაუდო დამნაშავე იყვნენ იდენტიფიცირებულები.

რა მოხდა?

საინფორმაციოში გასულ კადრებში სმარტფონის ეკრანზე ძალადობის მსხვერპლი ქალის სახელი და გვარი, მიმოწერების ჩვენების დროს კი სავარაუდო მოძალადის ტელეფონის ნომერი ჩანდა.

„ფორმულას“ საინფორმაციო ამბების პროდუსერის, ხათუნა საღინაძის თქმით, მასალის გაშვებამდე დაგეგმილი იყო საქმეში მონაწილე პირების დაფარვა, იდენტიფიცირება კი, სავარაუდოდ, სიჩქარისა გამო ტექნიკური შეცდომაა.

„ჩვენთვის მნიშვნელოვანი საკითხი და პრიორიტეტია მსხვერპლი არ იყოს იდენტიფიცირებული.“, - ამბობს პროდიუსერი.

სიუჟეტში ნახსენები ძალადობის მსხვერპლი ქალის ინტერესებს ორგანიზაცია „საფარი“ იცავს. ქალთა უფლებადამცველი ორგანიზაციის კომუნიკაციების მენეჯერი ამბობს, რომ მედიაში ძალადობის თემის გაშუქების დროს, როგორც მსხვერპლის, ისე დამნაშავის კონფიდენციალობის დარღვევის ფაქტები ხშირია.

„არავინ არის დაზღვეული შეცდომისგან, მაგრამ როცა ამას გაცნობიერებულად აკეთებ, დიდი დანაშაულია“ - ამბობს შორენა გაბუნია.

მისი თქმით, იდენტიფიკაცია  მსხვერპლისთვის ტრავმის გაღრმავების საფუძველია და კიდევ უფრო უმძიმებს მდგომარეობას. „სამწუხაროდ, ასეთი შეცდომები ხშირია ხოლმე.“ - გვეუბნება „საფარის“ კომუნიკაციების მენეჯერი.

კრიმინალისა და გენდერული საკითხების სახელმძღვანელო წესები

·        მსხვერპლებს აქვთ უფლება, არ იყვნენ იდენტიფიცირებული საჯაროდ. მსხვერპლის სახელის და გვარის ცოდნა, როგორც წესი, არაფრისმომცემია ხოლმე. სახელის, გვარისა და ფოტოების ჩვენება შესაძლებელია ოჯახის წევრების ან თავად მსხვერპლის ნებართვით.

·        დანაშაულისა და ანტისოციალური ქმედების გაშუქებისას, მედიამ უნდა დამალოს სავარაუდო დამნაშავის, ბრალდებულის ან მსჯავრდებულის ვინაობა გარდა იმ შემთხვევისა, როცა მისი სახელი საზოგადოებისთვის ცნობილია ან საქმე საზოგადოებრივი ინტერესის მქონეა.

·        დაუშვებელია ძალადობის მსხვერპლის იდენტიფიცირება, სანამ ფაქტი ოჯახის წევრებისთვის არ გახდება ცნობილი, გარდა იმ შემთხვევისა, თუ ამგვარი ინფორმაციის გავრცელება გამართლებულია მაღალი საზოგადოებრივი ინტერესით.

·        ხშირად მსხვერპლთა მხოლოდ სახის დაფარვა საკმარისი არ არის მისი არაიდენტიფიცირებისთვის. ისტორიის მოყოლითაც კი შესაძლებელია ადვილად ამოსაცნობი გახდეს მოძალადისთვის. ამიტომაც კარგად გაანალიზეთ, დაცული იქნება თუ არა მსხვერპლის უსაფრთხოება მას შემდეგ, რაც მის ისტორიას მოყვებით. რესპონდენტის ინტერესებიდან გამომდინარე შესაძლებელია არათუ სახელის, გვარის და სახის დაფარვა, არამედ ისტორიის დეტალების შეცვლაც კი მოგიწიოთ.